#IFFIWood, 25 नोव्‍हेंबर 2025

भारतीय आंतरराष्ट्रीय चित्रपट महोत्सव (IFFI) 2025 च्या सव्या दिसा “द न्यू AI सिनेमा: ए डिस्कोर्स ऑन जेनरेटिव AI एंड लार्ज लैंग्वेज मॉडल्स (LLMs)” ह्या विशयाचेर विचार करपा सारको मास्टरक्लास जालो, तातूंत तंत्रगिन्यान आनी सिनेमांतल्या नामनेच्या व्यक्तींनी  एकठांय येवन AI चलीत फिल्म निर्मितीच्या नेटान विकसीत जावपी परिदृश्याचेर चर्चा केली.

ह्या पॅनलांत नामनेचो तंत्रज्ञ श्री शंकर रामकृष्णन, AI तज्ञ श्री वी. मुरलीधरन आनी संवसारात नामनां जोडील्ले चित्रपट निर्माते  श्री शेखर कपूर हांचो आस्पाव आशिल्लो. 

श्री रवि कोट्टारकरान  शेखर कपूराच्या भारतीय सिनेमांतल्या अग्रणी योगदानाचो भोवमान करून सत्राची सुरवात जाली. ताणें कपूराच्या कथा सांगपाच्या आनी चित्रपट निर्मितीच्या दूरदर्शी  दृश्टीकोनाचेर भर दिलो, तशेच “मिस्टर इंडिया” ह्या सिनेमाचो खाशेलो उल्लेख केलो, जाका तंत्रीक नवनिर्माण आनी टिकपी सांस्कृतीक परिणामा खातीर आयज लेगीत मनयतात.

AI: फिल्म निर्मितींतलें सगळ्यांत चड लोकशाय माध्यम

सत्राची सुरवात करतना श्री शेखर कपूर हांणी कृत्रिम बुध्दीच्या उदयाक लागून संवसारांत खोलायेन बदल जाला अशें नदरेक हाडलें. ताणें AI हें “फिल्म निर्मितीचें सगळ्यांत लोकशाय माध्यम” अशें वर्णन केलें,  AI न  उद्देगा भितरल्यो पारंपारीक आडमेळीं आनी गेटकीपिंग मोडून उडयल्यात हाचेरय तांणी भर दिलो.

एके मजेशीर गजाल  ताणें सांगली. आपल्या रांदप्यान चॅटजीपीटी वापरून मिस्टर इंडिया 2 खातीर स्क्रिप्ट कशी तयार केली, हे सांगतानाच, AI  टूल्स सादारण व्यक्तींक सुलभताय आनी सशक्तीकरण दिता हे तांणी स्पष्ट केले. 

AI जागतीक सिनेमाची नवी व्याख्या करपाक तयार आसा, अपूर्व सृजनशील स्वातंत्र्य दिवपाक तयार आसा अशें तांणी सांगलें. संवसारांतली सगळ्यांत व्हडली तरणाटी लोकसंख्या आशिल्लें राष्ट्र म्हूण भारताचो दर्जो लक्षात घेवन ही लोकसंख्याशास्त्रीय ताकद फिल्म तंत्रगिन्यानाच्या फुडाराक भारताच्या नेतृत्वाक गती दितली असो विस्वास तांणी उक्तायलो.

सत्रांत श्री कपूर हांणी VFX आनी AI  हांचे मदलो भेदय स्पश्ट केलो, VFX त डिजिटल रितीन व्हिज्युअल तयार करप वा हाताळप आसता, जाल्यार AI फिल्म निर्मिती प्रक्रियेचे घटक स्वयंचलीत करपाक, वाडोवपाक वा तयार करपाक मशीन-लर्निंग मॉडेल वापरता अशें स्पश्ट केलें.

तंत्रज्ञांनी फिल्म निर्मितींत AIचे वेव्हारीक उपेग दाखयले

तंत्रज्ञ श्री शंकर रामकृष्णन आनी श्री वी. मुरलीधरन हांणी चॅटजीपीटी आनी गूगल जेमिनी सारक्या AI टूल्साच्या विस्तृत श्रेणीविशीं म्हायती दिली,  जे चित्रपट निर्मात्यांक पटकथा, स्टोरीबोर्डिंग आनी शॉट डिस्क्रिप्शन डिझायन करपाक मदत करतात, जांतूंत प्रकाश आनी कॅमेऱ्याची गरज आसता.

राजा राव हांणी बरयल्लो ह्या जोडयेचो AI सहाय्यित चित्रपट “द टर्बन अँड द रॉक” ह्या वेळार प्रदर्शित केलो, तातूंत वेगवेगळे AI प्लॅटफॉर्म आनी मॉडेल ताच्या निर्मितींत कशे एकठांय केल्यात तें तांणी स्पश्ट केलें.

प्रेक्षकांचो संवाद आनी AI-निर्मित चित्रपटांचें प्रदर्शन

परस्पर संवादात्मक प्रस्न आनी जाप सत्रांत, पॅनेलिस्टांनी AI, डॉक्युमेंटरी फिल्म निर्मिती, आर्काइवल रेस्टोरेशन, आनी फिल्म एजुकेशनाक कसो म्हत्वाचो आदार दिवंक शकता हाचेर भर दिलो. तशेंच तांणी AI जनरेटेड “द लॉस्ट लेजेंड्स” नांवाची एक लघु डॉक्युमेंटरी दाखयली, जातूंत प्रेक्षकांक उदयाक येवपी सृजनशील तंत्रगिन्यानाच्या क्षमतायची झलक मेळ्ळी.

सिनेमाचो गाभो मनशाची भावना

AIची नेटान उदरगत जाली तरी सिनेमाचें सार मनशाच्या भावनांनी आसा अशें श्री शेखर कपूर हांणी रेखांकित केलें. AI प्रक्रियांक मदत आनी गती दिवंक शकता, पूण पडद्याचेर खरी भावना आनी खोलाय सांगपा खातीर खरे कलाकार गरजेचे अशें तांणी मत मांडले.

धर्मेंद्र हांका श्रद्धांजली

मास्टरक्लासाची सांगता दिग्गज अभिनेतो धर्मेंद्र हांका काळजा सावन आर्गा ओपून जाली, जांतूत भारतीय सिनेमांतल्या तांच्या अफाट योगदानाचो सम्मान केलो 

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, Click on:

https://www.pib.gov.in/PressReleasePage.aspx?PRID=2191742

https://www.pib.gov.in/PressReleasePage.aspx?PRID=2190381

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/उत्कर्षा भुस्कुटे/दर्शना राणे | IFFI 56