Ka jingiamir jingmut ka panel hapoh ka phang ‘A Global India Through Independent Cinema: A Women’s Panel’ ka la wanrah lang ia ki sur jong ka — barikor- nongshna phlim Rajni Basumatary, cinematographer Fowzia Fathima, barikor-nongshna phlim Rachel Griffiths, bad ka barikor Meenakshi Jayan. Ka jingiakren ka la long halor ka jingiaid lynti shimet bad ha ka jingsaindur ki kynthei ki thaw ia ka lawei jong ka kam shna phlim shimet.

Ka jingiakren ka la sdang da ki jingpyrkhat shaphang ka jingsngewlem kum ka bynta kaba batai ia ka jingshna phlim jong ki kynthei. Ka Fowzia ka la batai kumno ka jingsaindur, naduh ka jingshai jong ka jingmut haduh ka frame kaba khatduh, ka long kaba la pynshong nongrim ha ka jingsngewlem, kaba plie lad ïa ki nongshna phlim ban pynkylla ïa ki jingïathuhkhana na ki thaiñ sha ki khana kiba sawa ha ka pyrthei. Ka Rajni ka la bynrap ba ki kynthei bunsien ki ïohi ïa ki jingtip kiba jylliew shaphang ka jingim, bad dei kine ki jingpeit bniah kiba rit kiba ailad ïa ki phlim jong ki ban ai ka sur ïa ki khana kiba lym kumta ki lah ban jah khlem da ïathuh.

Haba ka jingiakren ka la phai sha ka jingioh bynta, ka kynhun ka la wad bniah hato ki kynthei ki sngew ba ki kham paw ha ka kam mynta. Ka Rachel ka la ïathuh ba ka kam jong ka, la kham bun ki kynthei kiba dei ki cinematographer bad kiba pynmih phlim. Ka Fowzia ka kren shaphang ka jingkylla jong ka Indian Women Cinematoraphers’ Collective, kaba la sdang ha u snem 2017 da ki khyndiat ngut ki dkhot bad mynta ka la kiew sha ka arspah ngut, kaba kynthup ïa ki khynnah rit haduh kiba la rangbah. Ka la batai kumno ka kynhun ka kyntiew ïa ka jinghikai bad ka jingïatreilang, kaba ai ïa ka jait jingkyrshan kaba ki kynthei ki la donkam slem bha ha ka kam. Ka la rakhe ruh ïa ka jingdon jong ki nongshna phlim kynthei ha ka IFFI, da kaba ai jingïaroh ïa ka jingtbit jong ka Shelly Sharma ha ka phlim ‘Vimukti’ bad ïa ka jingtbit jong ka Archana Ghangrekar ha ka phlim ‘Shape of Momo’.”

Ka Rajni ka la pynkynmaw kumno, ar snem mynshwa, la phah ia ka sha uwei u nongshna phlim na kane ka kynhun na ka bynta la ka jong ka projek, kaba pynpaw ia ka jingktah jong kum kine ki rynsan. Ka Meenakshi ka la pynpaw ïa ka sienjam ba la kyrshan da ka Sorkar Jylla Kerala kaba bei tyngka ïa ki phlim ba la shna da ki kynthei, da kaba ong ba ka phlim jong ka, ka Victoria ka la wan na kane ka kabu. Ka Fowzia, kaba la don ha ka kynhun kaba nyngkong kaba jied na ka bynta kane ka sienjam jong ka Sorkar Jylla Kerala kaba kyrshan ïa ki phlim ba la ïalam da ki kynthei, ka la ong ïa ki jingsngewkhia shaphang ki shynrang kiba aiti ïa ki projek hapoh ki kyrteng jong ki kynthei, kaba pynpaw ïa ka jingdonkam ban bteng ban peitngor.

Hadien kane, ki dkhot ka panel ki la kren shaphang ki jingeh ban shna phlim ha ryngkat ki kamram ha ka jingim shimet. Ka Rachel ka la kren shai shaphang ka jingpyniaid ia ka kam katba ka dang pynsan ia lai ngut ki khun, da kaba ai jingmut ia ki nuksa kum ka jingpynkylla ia ki taiew trei ban kyrshan ia ki kynthei. Ka Fowzia ka la iathuh ia ka jingeh ban wanphai biang sha ka kam saindur jong ka hadien ba ka la ioh khun bad ka la pynpaw ia ka jingsngewnguh ba ka kam jong ka ka la lah ban bteng, khamtam eh da ka phlim jong ka kaba dang wan ka ‘Train’ kaba don u Vijay Sethupathi.

Halor ka jingkylli kumno ki aktor ki pynwan dur ïa ki jingïathuhkhana ha ka jaka shna phlim, ka Meenakshi ka la ong ba kiba dang sdang bunsien ki duna ka jinglaitluid ban jied ïa ki paralok jong ki, hynrei katba ka kam jong ka ka nang kiew ka kyrmen ban ïatreilang bad kiwei pat ki kynthei nongshna phlim. Ka Rajni ka la ïohi ba ki OTT ki la pynïar ïa ki jait kam kiba ki kynthei ki lah ban ïoh, kaba ai ïa ki ïa ka lad bad ka jinglong kaba kham khraw. Ka Fowzia ka la bynrap ba ki kynthei ak phlim mynta ki nang kiew sha ka jingpynmih phlim, kaba pynïar ïa ka kynhun jong ki nongshim rai kiba thymmai. Ka Meenakshi ka la kren shaphang la ka jong ka jingkwah ban pynmih phlim ha kawei ka sngi, katba ka Rachel ka la pyrkhat shaphang ka jingdon slem ki nongpynmih phlim kynthei ha Hollywood bad ki jingeh kiba ki dang ïaid lyngba. Ka Rachel ka la kren ruh shaphang ka jinglong mar ryngkat ka jingsiew, da kaba kdew ba ka jingkylla kaba don jingmut ka donkam ia ki shynrang ban pdiang ia ka jingbym iahap bad ban kyrshan ia ki jingpyrshang kiba pynthikna ia ka jinglong hok na ka bynta ki kynthei.

Haba ka jingiakren ka la phai sha ka jingthoh bad ka jingpyntreikam, ka Rajni ka la kren shaphang ka jingpynshong nongrim ia ki khana jong ka ha ki jingshisha jong ka thain bad ka jingsngewsih kaba la mad da ka thain jong ka. Ka phlim kaba dang shen jong ka ka pyni ia ki kynthei kiba wad ia ka jingbishar hok hapdeng ki kynthei bad shynrang. Ka Meenakshi ka la bynrap ba ïa ka phlim jong ka ‘Victoria’ la bun ki kynthei, ka rai kaba la wanrah ïa ki jingkylli namar ba ka pynkylla ïa ka jinglong jingman.

Haba ka panel ka phai sha ki jingshisha jong ka jingshna bad pynneh pynsah ïa ki phlim, ka Rachel ka la ong ba ki nongshna phlim ki dei ban thaw ïa ki khana kiba lah ban khring ïa ki nongpeitkai jong ki, da kaba shaniah ba ka jingïathuhkhana kaba dei kan poi sha ki briew kiba la thmu ban iohi ia ka. Ka Rajni ka la bynrap ba ïa ki phlim jong ka la shna da ka mang tyngka kaba rit bad la kyrshan da ki nongpynmih phlim kynthei, bad ka la pynthikna ba kim ju mad ïa ka jingduhnong.

Haba ka jingïalang ka la jan kut, la kylli ïa ki nongïashim bynta kino ki phlim kiba ki ngeit ba baroh ki dei ban peit. Ka Rachel ka la ai kyrteng ia ka Dangal namar ka jingrakhe jong ka ia ki khynnah kynthei; ka Fowzia u la jied ia ka The Power of the Dog; ka Rajni u la ai jingmut ia ka Article 15 bad ka Eye in the Sky; bad ka Meenakshi ka la jied ia ka Shiva Baby namar ka jingpyni jong ka ia ka jingkhuslai, da kaba bynrap da ka jingphuh samrkhie ba kan ai jingmut ruh ia la ka jong ka phlim ‘Victoria’.

Ka jingialang ka la kut da ka jingsngewtynnat bad ki lad kiba don. Ka Meenakshi ka la ïaroh ïa ka kam shna phlim ha Australia na ka bynta ka jinglong jingman jong ka kaba kiew shaphrang bad ka la pynkynmaw ïa kawei ka phlim kaba ka la ïohi ha ka Adelaide Film Festival kaba ka kwah eh ba kan lah ban ak ha ka. Ka Rachel ka la jubab da kaba ong ba baroh saw ngut ki kynthei ha kawei ka sngi ki lah ban iatrei lang, kaba long ka dak jong ka jingsngew iatylli ha kane ka nongphaisngi: ki kynthiew kiba puson lang shapang ka lawei, bad ka kam shna phlim shimet kaba ai ka lad ia kine ki kam ba kin sdang.

Shaphang ka IFFI

La sdang ha u snem 1952, ka International Film Festival of India (IFFI) ka ieng skhem kum ka jingrakhe kaba la rim bad kaba heh tam ha South Asia ha ka kam ba iadei bad ki phlim. La pynlong lang da ka National Film Development Corporation (NFDC), ka Tnad Information and Broadcasting, Sorkar india bad ka Entertainment Society of Goa (ESG), ka Sorkar Jylla Goa,kane ka tamasa ka la nangroi sha ka jaka ba don bor ha ka pyrthei ha ka kam pynmih phlim—ha kaba ki phlim hyndai ba la pynthymmai ki ïakynduh ïa ki jingpyrshang ba shlur bad ki briew kiba la pynskhem ialade ha kane ka kam ki iakynduh ia kito kiba dang sdang ha kane ka kam. Kaba pynlong ïa ka IFFI ban tyngshaiñ shisha ka dei ka jingbun ki bynta—ki jingïakob ha kylleng ka pyrthei, ki jingpyni ïa ka kolshor, ki masterclass, ki jingai burom, bad ka WAVES Film Bazaar ba shitrhem bha, ha kaba ki jingmut, ki jingïateh bad ki jingïatreilang ki kiew shaphrang. Ha ka jingpynlong ha rud duriaw jong ka Goa naduh ka 20–28 tarik u Naiwieng, ka bynta kaba 56 kan don ki bynta jong ki ktien bapher bapher , ki jait phlim bapher bapher, ki jingsaindur thymmai, bad ki sur—ka jingrakhe ïa ka jingtbit ka India ha ka kam saindur jong ka pyrthei.

Ban ioh jingtip shuh shuh, shon ha ka:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *