#IFFIWood, 22 नोव्‍हेंबर 2025

सध्या सुरू असलेल्या भारतीय आंतरराष्ट्रीय चित्रपट महोत्सवात (इफ्फी) चित्रपट दिग्दर्शक हॅरॉल्ड डोमेनिक रोस्सी यांनी पेस्काडोर चित्रपटाच्या निर्मितीवेळचे ह्रदयस्पर्शी अनुभव सांगितले. “वैद्यकीयदृष्ट्या बेशुद्ध अवस्थेत असताना आलेल्या अनुभवांमधून ही कथा जन्माला आली. त्या अवस्थेत मला फक्त समुद्र दिसत असे. एकटेपणाचा हा अनुभव थरारक होता,” असे त्यांनी माध्यम प्रतिनिधींशी बोलताना सांगितले. निर्माती बार्बरा ऍन रसेल आणि छायाचित्रणकार, निर्माते आयझॅक जोसेफ बँक्स हे त्यांचे सहकारी यावेळी उपस्थित होते. 

“ते भावनिक अंतर आणि संपर्क साधण्याची तीव्र इच्छा, चित्रपटाच्या माध्यमातून मांडण्याचा पेस्काडोर हा माझ्यासाठी एक मार्ग होता,” असे ते म्हणाले. समुद्रात चित्रीकरण करताना येणाऱ्या समस्या रोस्सी यांनी हसत हसत, प्रामाणिकपणे सांगितल्या. “गतकाळातला प्रत्येक चित्रपटकर्ता तुम्हाला सांगत असतो – नावेवर चित्रपटाचे चित्रीकरण करू नका. मी ऐकले नाही,” त्यांनी हसून सांगितले. “पण लवकरच मला कळले ते असे का सांगत होते. भर समुद्रात प्रत्यक्ष कोळ्याच्या नावेवर आणि घनदाट जंगलात चित्रीकरण करणे अत्यंत आव्हानात्मक होते. पण त्यामुळे चित्रपटाला प्राप्त झालेला सच्चेपणा हा संघर्ष सार्थ ठरवणारा होता.”   

“चित्रपटातली मच्छिमाराची मध्यवर्ती भूमिका अभिनयाची काहीच माहिती नसलेल्या सामान्य माणसाने केली आहे. आम्ही एक प्रयोग केला.. आणि तो यशस्वी ठरला. त्याचे सहज वावरणे चित्रपटाला वेगळा अर्थ देणारे ठरले.”

निर्मात्या बार्बरा रसेल म्हणाल्या की “पेस्काडोर हा खऱ्या अर्थाने आंतरराष्ट्रीय सहकार्यातून निर्माण झालेला चित्रपट आहे. चित्रपटातले कलाकार आणि इतर कर्मचारी अमेरिका आणि कोस्टा रिकामधले आहेत. आम्ही एकत्र राहून काम केले, एकमेकांची भाषा शिकलो. हा माझ्या आयुष्यातला सर्वात सुंदर, अनोखा अनुभव होता.”

छायाचित्रणकार आणि निर्माते आयझॅक जोसेफ बँक्स चित्रपटाच्या दृश्यांतून व्यक्त होणाऱ्या भाषेविषयी बोलले. “दोन्ही प्रमुख भूमिकांच्या चित्रीकरणाबाबतचा माझा आणि हॅरॉल्डचा दृष्टीकोन वेगवेगळा होता. त्या भिन्न, विरोधी दृष्टीकोनांमुळे कथा सशक्तपणे साकारता आली.”

चित्रपटाच्या कथेचा मूळ गाभा, आंतरराष्ट्रीय भावना आणि समुद्रातली साहसी निर्मिती यामुळे पेस्काडोर इफ्फी 2025 मधील प्रेक्षकांवर सर्वाधिक प्रभाव टाकणाऱ्या, आकर्षक चित्रपटांपैकी एक  ठरला आहे.

चित्रपटाचा सारांश

पेस्काडोर या शब्दाचा स्पॅनिश, पोर्तुगीज अर्थ मच्छीमार. अमेरिकेतली एक मुलगी, तिचा भाऊ आणि कोस्टा रिकामधला एक मच्छिमार यांची भर समुद्रात जीवनमृत्यूच्या संघर्षादरम्यान गाठ पडते. पहिल्या भागात एक तरुण अमेरिकन वैज्ञानिक कोस्टा रिकाच्या घनदाट जंगलात फिरत असते. ती एका रहस्यमय माशाचा शोध घेत असते. एका निराशाजनक प्रसंगानंतर ती बसमध्ये झोपी जाते आणि तिथून चित्रपट सुरू होतो. दुसऱ्या भागात एक जादूगार लॉबस्टर एकाकी असलेल्या मच्छिमाराला, तुझी सर्वात मोठी बाप होण्याची इच्छा पूर्ण होईल असा आशीर्वाद देतो. मच्छिमाराला त्या वैज्ञानिक मुलीचा समुद्रात वाहत गेलेला भाऊ सापडतो आणि तो त्याची सेवा करुन त्याला बरे करतो. सुरुवातीला त्या भावाला तिथून सुटका करुन घ्यायची असते पण हळूहळू तो मच्छिमाराशी जुळवून घ्यायला लागतो, मासेमारी शिकतो आणि मच्छिमारांच्या समाजात मिसळून जातो. चित्रपटाच्या शेवटी त्यांच्यातले नाजूक बंध नष्ट झाल्यानंतर पेस्काडोर  काही प्रश्न उपस्थित करतो, - एकांत मिळवण्यासाठी तुम्ही कशाचा त्याग करू शकता? नातेसंबंध जपण्यासाठी आणि आयुष्यातील स्थैर्यासाठी तुम्ही कोणती जोखीम पत्करू शकता?

इफ्फीविषयी

वर्ष 1952 मध्ये सुरु झालेला भारतीय आंतरराष्ट्रीय चित्रपट महोत्सव (इफ्फी) हा दक्षिण आशियात सर्वप्रथम सुरु झालेला आणि चित्रपटांशी संबंधित असा सर्वात मोठा उत्सव समजला जातो. राष्ट्रीय चित्रपट विकास महामंडळ (एनएफडीसी), केंद्रीय माहिती आणि प्रसारण मंत्रालय, एन्टरटेनमेंट सोसायटी ऑफ गोवा (ईएसजी) ही संस्था तसेच गोवा राज्य सरकार यांच्या संयुक्त विद्यमाने आयोजित होत असलेला हा महोत्सव आता, जेथे पुनर्संचयित अभिजात कलाकृती धाडसी प्रयोगांना सामोऱ्या जातात आणि दिग्गज कलाकार निर्भय नव-कलाकारांसोबत एकत्र येऊन काम करतात, अशा जागतिक चित्रपटीय शक्तीकेंद्राच्या रुपात उदयाला आला आहे. इफ्फीला खऱ्या अर्थाने चमकदार स्वरूप देणारे घटक म्हणजे त्यातील विजेसारख्या तळपणाऱ्या मिश्र आंतरराष्ट्रीय स्पर्धा, सांस्कृतिक सादरीकरणे, मास्टर क्लासेस,श्रद्धांजलीपर उपक्रम तसेच  कल्पना, व्यवहार आणि सहयोगी संबंधांना झेप घेऊ देणारा, चैतन्याने भारलेला वेव्हज चित्रपट बाजार. गोव्यातील जबरदस्त आकर्षक समुद्रकिनाऱ्याच्या पार्श्वभूमीवर, 20 ते 28 नोव्हेंबर दरम्यान होत असलेला महोत्सवाचा 56 वा भाग भाषा, शैली, नवोन्मेष आणि आवाजांचा झळाळता पिसारा घेऊन जागतिक मंचावर भारताच्या सर्जक प्रतिभेचा गुंगवून टाकणारा सोहळा सादर करत आहे.

For more information, click on:

IFFI Website: https://www.iffigoa.org/

 PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Post Link: https://x.com/PIB_Panaji/status/1991438887512850647?s=20

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सोनाली काकडे/सुरेखा जोशी/दर्शना राणे | IFFI 56