ভাৰতৰ ৫৬সংখ্যক আন্তঃৰাষ্ট্ৰীয় চলচ্চিত্ৰ মহোৎসৱৰ পূৰ্বে পিআইবি মহাৰাষ্ট্ৰ আৰু গোৱাৰ উদ্যোগত সংবাদ মাধ্যমৰ বাবে চলচ্চিত্ৰ প্ৰশংসা পাঠ্যক্ৰম
ভাৰতৰ চলচ্চিত্ৰ আৰু দূৰদৰ্শন প্ৰতিষ্ঠান (এফটিআইআই)ৰ সহযোগত পিআইবি মহাৰাষ্ট্ৰ আৰু গোৱাৰ উদ্যোগত মঙলবাৰে গোৱাত ৫৬সংখ্যক আন্তঃৰাষ্ট্ৰীয় চলচ্চিত্ৰ মহোৎসৱ (আইএফএফআই) ৰ পূৰ্বে সংবাদ মাধ্যমৰ স্বীকৃতিপ্ৰাপ্ত প্ৰতিনিধিসকলৰ বাবে এক বিশেষ চলচ্চিত্ৰ প্ৰশংসা পাঠ্যক্ৰম আয়োজন কৰে। এই কাৰ্যসূচীৰ উদ্দেশ্য আছিল সাংবাদিকসকলক চলচ্চিত্ৰৰ বিষয়ে গভীৰভাৱে বুজিবলৈ সক্ষম কৰি অধিক তথ্যসমৃদ্ধ আৰু অন্তৰ্দৃষ্টিসম্পন্ন বাতৰি পৰিৱেশন কৰা।
এই পাঠ্যক্ৰমৰ আঁত ধৰে এফটিআইআইৰ স্ক্ৰীণ ষ্টাডিজ এণ্ড ৰিচাৰ্ছ বিভাগৰ অধ্যাপক ড০ ইন্দ্ৰনীল ভট্টাচাৰ্য আৰু চলচ্চিত্ৰ পৰিচালনা বিভাগৰ সহকাৰী অধ্যাপক বৈভৱ অবনাৱে। বক্তৃতা, চলচ্চিত্ৰ প্ৰদৰ্শন, আলোচনা আৰু বিশ্লেষণাত্মক অনুশীলনৰ জৰিয়তে বিশেষজ্ঞসকলে অংশগ্ৰহণকাৰীসকলক চলচ্চিত্ৰৰ ৰূপ, চলচ্চিত্ৰৰ ইতিহাস আৰু বিশ্বজুৰি চলচ্চিত্ৰ নিৰ্মাণৰ পৰম্পৰা গঢ়ি তোলা নান্দনিকতাৰ বিষয়ে অৱগত কৰে।
এই অধিৱেশনত পিআইবিৰ সঞ্চালক প্ৰধান শ্ৰীমতী স্মিতা ভাটছ শৰ্মা; তথ্য আৰু সম্প্ৰচাৰ মন্ত্ৰালয়ৰ অতিৰিক্ত সচিব শ্ৰী প্ৰভাত কুমাৰ; আৰু এনএফডিচিৰ পৰিচালন সঞ্চালক শ্ৰী প্ৰকাশ মগডুমকে ধৰি একাংশ নেতৃস্থানীয় ব্যক্তিয়ে অংশগ্ৰহণ কৰে। প্ৰতিনিধিসকলক সম্বোধন কৰি তেওঁলোকে চলচ্চিত্ৰ নিৰ্মাতা আৰু দৰ্শকৰ মাজৰ ব্যৱধান দূৰ কৰাত এক জ্ঞাত আৰু সংবেদনশীল সংবাদ মাধ্যমৰ গুৰুত্বপূৰ্ণ ভূমিকাৰ ওপৰত আলোকপাত কৰে। তেওঁলোকে গুৰুত্ব আৰোপ কৰে যে চলচ্চিত্ৰ উদ্যোগৰ এক সুকীয়া উপলব্ধিয়ে সাংবাদিকসকলক অধিক সমৃদ্ধিশালী আৰু অধিক অৰ্থপূৰ্ণ ব্যাখ্যা প্ৰদান কৰিবলৈ সক্ষম কৰে।
এই কাৰ্যসূচীৰ সফল সমাপ্তি উপলক্ষে সংবাদ মাধ্যমৰ প্ৰতিনিধিসকলক প্ৰভাত কুমাৰ, প্ৰকাশ মগডুম আৰু শ্ৰীমতী স্মিতা ভাটছ শৰ্মাই প্ৰমাণপত্ৰ প্ৰদান কৰে। সমালোচনামূলক দৃষ্টিভংগী আৰু চলচ্চিত্ৰৰ প্ৰতি নৱীকৃত প্ৰশংসাৰে সমৃদ্ধ হৈ প্ৰতিনিধিসকলে এতিয়া ৫৬সংখ্যক আন্তঃৰাষ্ট্ৰীয় চলচ্চিত্ৰ মহোৎসৱত বিভিন্ন চলচ্চিত্ৰ প্ৰদৰ্শনৰ সৈতে জড়িত হ'বলৈ সাজু হৈছে।
* * *
रिलीज़ आईडी:
2191955
| Visitor Counter:
23