Ha ka jingjia kaba kongsan, u Hardeep Singh Puri, Myntri ka Tnad Petroleum and Natural Gas, u la pynbna mynta ka sngi ba ki kompeni umphniang PSU jong ka India ki la pyndep da kaba jop ia ka jingiateh kaba shisnem ban wanrah kumba 2.2 MTPA ka LPG na US Gulf Coast na ka bynta ka jingiakut ia u snem 2026. Kane ka pyni haduh shiphew percent jong ka jingwanrah LPG jong ka India man la u snem bad ka dei ka jingïateh kular LPG jong ka US kaba la buh ryntih kaba nyngkong eh na ka bynta ka ïew India. U Myntri u la batai ia kane ka rai kum ka kam kaba kongsan, da kaba kdew ba kawei na ki iew LPG kaba heh tam bad kaba kiew stet tam ha ka pyrthei mynta ka la plie sha ka ri America.

U Myntri u la pynpaw ba ka India ka la trei borbah ban ïoh ïa ka jingpynbiang LPG kaba jem dor bad kaba lah ban shaniah da kaba pyniar ïa ki lad ioh LPG jong ka. Kum shi bynta kane ka sienjam, ka kynhun jong ki heh sorkar na ka Indian Oil, ka Bharat Petroleum Corporation Limited (BPCL) bad ka Hindustan Petroleum Corporation Limited (HPCL) ki la leit jngoh ïa ka ri America naduh ka 21 haduh ka 24 tarik u Naitung 2025 bad ïakren bad ki nongpynmih umphniang ba heh jong ka US. Kine ki jingiakren, kiba la pynshong nongrim ha ka Mount Belvieu kum ka nongrim ban thied ia ka LPG, ka la kut noh da kaba pyndep ia ka jingiateh kular.

U Puri u la pynpaw ba hapoh ka jingïalam jong u Myntri Rangbahduh ka ri u Narendra Modi, ki kompeni umphniang PSU ki la pynthikna ban pynbiang ïa ka LPG ha ka dor kaba duna  tam ha ka pyrthei sha ki longïing ha kylleng ka ri. Wat haba ka dor jong ka LPG ha ka pyrthei ka la kiew palat 60 percent ha u snem ba la dep, ki nongïoh jingmyntoi na ka Ujjwala ki dang bteng ban ïoh ïa ki cylinder ha ka dor ba la ai jingïarap kaba long kumba T.500–550, watla ka jinglut ka la palat ïa ka T.1100. Ka Sorkar India ka la shim ïa ka jingkitkhlieh, da kaba pynlut palat T.40,000 klur ha u snem ba la dep ban ïada ïa ki longïing—khamtam ïa ki kmie bad ki para kynthei—na ka jingktah jong ka jingkiew dor jong ka LPG ha ka pyrthei.

U Myntri u la ban jur ba kane ka jingpynbeit thymmai ban wad umphniang na ka bynta u snem 2026 ka dei kawei pat ka sienjam ban pynkhlain ïa ka jingpynbiang bording jong ka India katba ka pynthikna ïa ka jingïoh ïa ka umphniang shet kaba khuid kaba jem dor na ka bynta ki million ki longïing.

****