: #IFFIWood, 15 નવેમ્બર, 2025

56મા ઇન્ટરનેશનલ ફિલ્મ ફેસ્ટિવલ ઑફ ઇન્ડિયા (IFFI)ની શરૂઆત થવામાં હવે માત્ર પાંચ દિવસ બાકી છે, ત્યારે આજે પણજી ખાતે ગોવાના મુખ્યમંત્રી ડૉ. પ્રમોદ સાવંત અને કેન્દ્રીય માહિતી અને પ્રસારણ તથા સંસદીય બાબતોના રાજ્ય મંત્રી ડૉ. એલ. મુરુગન દ્વારા આ પ્રતિષ્ઠિત ફિલ્મ ફેસ્ટિવલ પર એક પ્રેસ કોન્ફરન્સને સંબોધવામાં આવી હતી.

મીડિયાને સંબોધતા, ગોવાના મુખ્યમંત્રી ડૉ. પ્રમોદ સાવંતે જણાવ્યું હતું કે ફેસ્ટિવલના ભાગરૂપે, ફિલ્મોનું સ્ક્રીનિંગ INOX પણજી, INOX પોર્વોરિમ, માક્વિનેઝ પેલેસ પણજી, રવીન્દ્ર ભવન મડગાંવ, મેજિક મૂવીઝ પોન્ડા, અશોકા અને સમ્રાટ સ્ક્રીન્સ પણજી ખાતે કરવામાં આવશે.¹ તેમણે કહ્યું હતું, “આ વર્ષે, એક ભવ્ય પરેડ દ્વારા ફેસ્ટિવલનું ઉદ્ઘાટન કરવામાં આવશે. આ પરેડ 20મી નવેમ્બરે બપોરે 03.30 વાગ્યે એન્ટરટેઈનમેન્ટ સોસાયટી ઑફ ગોવા (ESG) કાર્યાલયથી કલા અકાદમી સુધી યોજાશે. પ્રતિનિધિઓની સુવિધા માટે, અમે તમામ સ્થળો સુધી મફત પરિવહનની વ્યવસ્થા પણ કરી છે. ઉપરાંત, મિરામાર બીચ, રવીન્દ્ર ભવન માડગાંવના ઓપન સ્પેસ અને વાગેટર બીચ ખાતે ખુલ્લા આકાશ નીચે (ઓપન એર) સ્ક્રીનિંગનું આયોજન કરવામાં આવશે.”

કેન્દ્રીય રાજ્ય મંત્રી ડૉ. એલ. મુરુગને જણાવ્યું હતું કે 56મો ઇન્ટરનેશનલ ફિલ્મ ફેસ્ટિવલ ઑફ ઇન્ડિયા (IFFI), જે 20 થી 28 નવેમ્બર, 2025 દરમિયાન ગોવામાં યોજાવાનો છે, તેમાં અનેક પ્રથમ આયોજનો (firsts) જોવા મળશે, જે ફેસ્ટિવલની વધતી જતી વૈશ્વિક પ્રતિષ્ઠા, પરિવર્તનકારી પહેલો અને ભારતીય સિનેમાને પ્રોત્સાહન આપવા તેમજ આંતરરાષ્ટ્રીય સાંસ્કૃતિક વિનિમયને ઉત્તેજન આપવામાં તેની મહત્ત્વપૂર્ણ ભૂમિકાને બળ આપશે. તેમણે આજે (15 નવેમ્બર, 2025) પણજી ખાતે ગોવાના મુખ્યમંત્રી ડૉ. પ્રમોદ સાવંત સાથે આયોજિત ફેસ્ટિવલ પૂર્વેની પ્રેસ કોન્ફરન્સને સંબોધિત કરી હતી.

ડૉ. મુરુગને કહ્યું હતું કે IFFI 2025માં 127 દેશોમાંથી અભૂતપૂર્વ 3,400 ફિલ્મ એન્ટ્રીઓ આકર્ષિત થઈ છે, જે એશિયાના પ્રમુખ ફિલ્મ ફેસ્ટિવલ્સમાં તેની સ્થિતિને મજબૂત કરે છે. તેમણે કહ્યું હતું, “84 દેશોમાંથી 270થી વધુ ફિલ્મોનું સ્ક્રીનિંગ કરવામાં આવશે, જેમાં 26 વર્લ્ડ પ્રીમિયર્સ, 48 એશિયા પ્રીમિયર્સ અને ભારત તરફથી 99 પ્રીમિયર્સનો સમાવેશ થાય છે. આ વધતી ભાગીદારી માત્ર ફેસ્ટિવલની પ્રતિષ્ઠા જ નહીં, પરંતુ વિશ્વ સિનેમામાં ભારતની વધતી સ્થિતિને પણ દર્શાવે છે.”

આ વર્ષે, IFFIનું કન્ટ્રી ફોકસ જાપાન છે, જેમાં સ્પેન અને ઓસ્ટ્રેલિયા તરફથી વિશેષ ક્યુરેટેડ પેકેજો હશે. કેન્દ્રીય મંત્રીએ જણાવ્યું હતું કે આ ફેસ્ટિવલ ગુરુ દત્ત, રાજ ખોસલા, ઋત્વિક ઘટક, પી. ભાનુમતી, ભૂપેન હઝારિકા અને સલિલ ચૌધરી જેવા દંતકથા સમાન ભારતીય સિનેમા આઇકોન્સને શતાબ્દી શ્રદ્ધાંજલિ પણ આપશે. ડૉ. મુરુગને એ પણ જાહેરાત કરી હતી કે અભિનેતા રજનીકાંતને સિનેમામાં 50 વર્ષ પૂર્ણ કરવા બદલ સમાપન સમારોહમાં સન્માનિત કરવામાં આવશે. તેમની ફિલ્મ, લાલ સલામ, પણ ફેસ્ટિવલમાં દર્શાવવામાં આવશે, એમ તેમણે કહ્યું હતું. ગોવાના જાણીતા સિનેમેટોગ્રાફર શ્રી કે. વૈકુંઠનું પણ આ ફેસ્ટિવલમાં સન્માન કરવામાં આવશે.

ક્રિએટિવ માઇન્ડ્સ ઑફ ટુમોરો (Creative Minds of Tomorrow) પહેલ વિશે વાત કરતા મંત્રીએ જણાવ્યું હતું કે આ વર્ષે અત્યંત સ્પર્ધાત્મક પ્રક્રિયા દ્વારા 799 એન્ટ્રીઓમાંથી 124 યુવા સર્જકોની પસંદગી કરવામાં આવી છે. ડૉ. મુરુગને એ પણ કહ્યું હતું કે WAVES ફિલ્મ બજારની 19મી આવૃત્તિ ભારત અને વિદેશના સેંકડો પ્રોજેક્ટ્સ માટે સહ-નિર્માણ અને બજારની તકો ખોલશે, જેમાં AI, VFX અને CGI જેવી અદ્યતન ટેક્નોલોજીઓનું અન્વેષણ કરવા માટે એક સમર્પિત ટેક પેવેલિયન પણ હશે.

પ્રધાનમંત્રી શ્રી નરેન્દ્ર મોદીના નારી શક્તિને ભારતના વિકાસ યાત્રાના કેન્દ્રમાં રાખવાના વિઝન વિશે બોલતા, કેન્દ્રીય મંત્રીએ કહ્યું હતું કે IFFI 2025માં મહિલા નિર્દેશકોની 50થી વધુ ફિલ્મો રજૂ કરવામાં આવશે. “આ ફેસ્ટિવલમાં 21 ઓસ્કર એન્ટ્રીઝ અને પ્રથમ વખત ફિલ્મ બનાવનારા 50થી વધુ સર્જકોની કૃતિઓનું સ્ક્રીનિંગ કરવામાં આવશે. વિશ્વના ટોચના ફિલ્મ ફેસ્ટિવલ્સમાંથી ટોચના પુરસ્કાર વિજેતા ફિલ્મોનું સ્ક્રીનિંગ પણ 56મા IFFIમાં કરવામાં આવશે.”

સિનેમામાં સર્જનાત્મકતા અને નવીનતાને પ્રોત્સાહન આપવા પ્રત્યે સરકારની પ્રતિબદ્ધતાને પુનર્પુષ્ટ કરતા મંત્રીએ કહ્યું હતું, “સિનેમAI હેકાથોન અને થિયેટરોમાં ઍક્સેસિબિલિટી (સુલભતા) જેવી પહેલો અમારા સિનેમાને વધુ સમાવેશી (inclusive), ટેક્નોલોજી-સંચાલિત અને વૈશ્વિક સ્તરે સહયોગી બનાવવાની દ્રષ્ટિને પ્રતિબિંબિત કરે છે.”

આ વર્ષે IFFIની શરૂઆત જૂની GMC બિલ્ડિંગની સામેના રસ્તા પર એક રંગીન પરેડ સાથે થશે, જ્યાં પ્રોડક્શન હાઉસ, વિવિધ રાજ્યો અને સાંસ્કૃતિક ટ્રુપ્સ દ્વારા ઝાંખીઓ (tableau) ભારતીય સંસ્કૃતિ, પરંપરા અને નીતિમત્તાનું પ્રદર્શન અને જતન કરશે. આ પરેડમાં 34 ફ્લોટ્સ હશે, જેમાંથી 12 ગોવા સરકાર દ્વારા ગોઠવવામાં આવ્યા છે.

SM/NP/GP/JD