Ha ka jingkyntiew kaba kongsan ïa ka jingshemjong ki nongleit nongwan ha kawei na ki jaka pynïaid rel kaba bun briew tam ha ka ri, u Myntri Sorkar Pdeng ba dei khmih ia ka Tnad Rel, Information & Broadcasting, and Electronics & Information Technology, u Ashwini Vaishnaw mynta ka sngi u la leit jurip ïa ka Yatri Suvidha Kendra (Permanent Holding Railway) kaba la shna thymmai ha New Delhi Railway Station (NDLS). Ia kane ka jaka la shna khnang ban lah ban pdiang kumba 7,000 ngut ki nongleit nongwan ha kano kano ka por, kaba kyntiew shibun ia ka jingsuk bad jingtuid shwa ban kiew ia ki rel.

U Ashwini Vaishnaw u la ong, "Ka Yatri Suvidha Kendra kaba la shna thymmai kan pynsuk ia ki nongleit nongwan ha ka aiom lehkmen namar ba ka don ka jingkiew ha ka jingbun ki nongleit nongwan. Ka Yatri Suvidha Kendra kaba kum kane yn sa shna ha kiwei pat ki steshon ha ka ri."

Ia kane ka Yatri Suvidha Kendra kaba thymmai la phiah ha ki lai tylli ki zone ban pynsuk ia ka leit ka wan jong ki nongleit nongwan, ka jaka thied tiket kaba heh 2,860 sqm, ka jaka hadien ba ladep thied tiket kaba heh 1,150 sqm, bad ka jaka shuwa ban thied kaba heh 1,218 sqm. Ia kane ka jingphiah ia ka jaka la shna khnang ban pynduna ka jingkhapngiah bad ban kyntiew ia ka jingsuk jong ki nongleit nongwan ha baroh kawei ka jaka rung jong ka terminal.

Ka Northern Railway ka la pynbiang ia ka Kendra da ki jingdonkam kiba bniah bad kiba katkum ka juk mynta ban pynthikna ka jingsuk bad jingshngain jong ki nongleit nongwan.

Ki bynta ba kongsan:

Ka jingdie tiket: 22 tylli ki jaka die tiket kiba katkum ka juk mynta bad 25 tylli ki Automatic Ticket Vending Machine (ATVM).

Ka bor treikam bad jingsuk: Ka jaka shong na ka bynta 200 ngut ki nongleit nongwan bad 18 tylli ki pangkha High Volume Low Speed (HVLS) na ka bynta ban pynpyngngad.

Ka Jingkhuid & Ka Um: Ki painkhana ba la shna kyrpang ha palat ia ka 652 sqm, ryngkat bad ka rukom ai um dih katkum ka RO.

Ka Jingai jingtip & Jingshngain: Ka rukom pynbna ia ki nongleit nongwan kaba khlain kaba don 24 tylli ki speaker, lai tylli ki LED ai jingtip shaphang ki rel, bad 7 tylli ki unit jong ka rukom pynlip ding kaba katkum ka juk mynta.

Ka jingshngain: Ki lad jingïada kiba katkum ka juk mynta kiba kynthup 18 tylli ki camera CCTV, 5 tylli ki tiar peit bniah ïa ki tiar, bad 5 tylli ki Door Frame Metal Detectors (DFMD).

Ka Northern Railway ka la jop ha ka jingïaid lyngba ïa ki katto katne ki jingeh ha ka por ba shna, kynthup ïa ka jingpynpra bad jingpynkylla kaba donkam ïa ki jingtei kiba la don lypa kum ki ATM, ka kamra jong ki Pulit ka Delhi, bad ki jingpynbna ba la wah. Shuh shuh, jingpyntreikam ia ka jingpynkynriah kaba kongsan kum ki pipe um, ki nala bad ki cable OFC khlem da pynthut ia ki jingtreikam ba man ka sngi.

Ha kajuh ka por, la pyndep ia ka jingkyntiew ia ki jingtei kiba donkam da kaba pynheh ia ka Foot Over Bridge 1 (FOB 1). Kane ka jingpyniar ka pynthikna ba ki nongleit nongwan kiba hiar na ki rel ha NDLS mynta ki lah ban mih beit sha ka Metro Station, kaba kyntiew shibun ïa ka jingïasoh jong ki lad ka leit ka wan bad pynduna ka jingkhapngiah ha ki platform .

Ia u Myntri Sorkar Pdeng la synran lang da u Satish Kumar, Chairman bad CEO ka Railway Board; u Ashok Kumar Verma, General Manager ka Northern Railway, bad kiwei kiwei ki heh ophisar jong ka Railway, kiba la ai ka jingpynshai kaba bniah halor ka jingthmu bad jingpyntreikam jong kane ka jaka. Ka jingleit jurip ka la pynpaw ïa ka jingangnud jong ka tnad Rel ban pynthymmai ïa ki jingdon jingem kiba kongsan bad ban pynthikna ïa ki jingdonkam kiba katkum ka juk mynta na ka bynta ki nongleit nongwan.

*****