Da kaba shim ïa ka kaiphod ‘The Future of Jobs Report 2025’ jong ka World Economic Forum, u Myntri Sorkar Pdeng ba dei peit ïa ka Tnad Labour & Employment bad Kam ialehkai, u Dr. Mansukh Mandaviya u la ong ba ka jingbym don kam don jam ha India ka long 2%, kaba long kaba duna tam napdeng ki ri G20. U la pynpaw kumno ka jingpynmih kam ka la jia ha kylleng ki bynta ryngkat bad ka jingkiew stet ka ïoh ka kot jong ka India, bad u la ban jur ïa ki skhim sorkar kiba la noh synñiang sha kane ka kam.

U Myntri Sorkar Pdeng u la ai jingkren ha kane ka jingialang ha New Delhi mynta ka sngi ha ka jingiasoi ia k Memorandums of Understanding (MoU) hapdeng ka Tnad Labour & Employment bad ka ‘Mentor Together’ bad ka ‘Quikr’ na ka bynta ban kyntiew ia ki lad ioh kam ioh jam bad kumjuh ruh ia ka jingioh kam jong ki samla ha ka rynsan National Career Service (NCS). Ia kane ka MoU la iasoi ha ka jingiadonlang u Myntri Sorkar Pdeng u Dr. Mansukh Mandaviya bad ka Myntri Khynnah ka sorkar pdeng ka Sushri Shobha Karandlaje.

Ha ka jingai jingkren jong u, u Dr. Mandaviya u la ong, “Ka rynsan National Career Service (NCS), kaba don haduh 52 lak ngut ki nongpyntreikam kiba la pynrung kyrteng, 5.79 klur ngut ki nongwad kam bad palat 7.22 klur tylli ki kam ba lait, mynta ka nang kiew ban ai ym tang ïa ki jingpynbna kam, hynrei kum kawei ka jaka pdeng na ka bynta baroh ki kam kiba iadei bad ka jingioh kam. Mynta, ki don palat 44 lak tylli ki kam ba lait  ha ka rynsan. Ha kine ki snem ba ladep, ka Tnad ka la ïasoi ïa ki MoU bad ki shiphew tylli ki seng ba kongsan, kynthup ïa ka Amazon bad ka Swiggy. Kine ki jingïatreilang ki la plie lad na ka bynta san lak tylli ki kam.”

Haba kren shaphang ka jingpyrkhat thymmai jong ka Sorkar halor ki samla, u Dr. Mandaviya u la pynkynmaw, ha kaba sdang jong ka samoi treikam kaba lai, u Myntri Rangbahduh u Narendra Modi u la pynbna ïa ka package jong ki san tylli ki skhim ba kongsan ryngkat bad ka mang tyngka baroh kaba T.2 lak klur ban kyrshan ïa ka kam, ka jingtbit, bad ki lad ki lynti na ka bynta 4.1 klur ngut ki samla. Kawei ka bynta ba kongsan jong kane ka package ka dei ka Pradhan Mantri Viksit Bharat Rozgar Yojana (PM-VBRY), kaba la mang pisa haduh T.99,446 klur, kaba thmu ban ai jingmyntoi ban thaw ïa palat 3.5 klur ki kam ha ki ar snem, ha kaba 1.92 klur kin ai jingmyntoi ïa kiba wan trei nyngkong.

U Myntri u la ban shuh shuh ia ka jingdonkam ban thaw ki lad ioh kam lyngba ka jingkiew jong ki kam ai jingshakri, ki kam shna tiar, bad ka rep ka riang, da kaba kdew ba ka Sorkar ka la sdang ia ki skhim wanrah jingkylla kum ka MUDRA bad ka PM SVANidhi ban kyntiew ia ka jingseng kam lajong.

Haba pdiang sngewbha ia ka jingiatreilang hapdeng ka Tnad bad ki ar tylli ki seng, u Dr. Mandaviya u la ong ba kine ki jingiatreilang kin plie ia ki lad ioh kam kiba biang bad kumjuh ruh ia ka jinghikai ba la buh ryntih ia ki nongwad kam, khamtam ha kaba iadei bad ka Pradhan Mantri Viksit Bharat Rozgar Yojana ka ban sdang treikam ha u Nailar mynta u snem. Kine ki jingiatreilang, ha kajuh ka por, kin ai jingmyntoi ym tang ia ki samla, hynrei ia ka ri hi baroh kawei, u la bynrap. “Kan pynthikna ba ka lawei jong kane ka ri, bad jong ki samla jong ka, kan long kaba phyrnai,” u la ong.

Ka Myntri Khynnah jong ka Sorkar Pdeng ba dei peit ia ka Tnad Labour and Employment, ka Sushri Shobha Karandlaje ka la ong ba ka NCS ka la long kum ka rynsan ba bha tam jong ka India na ka bynta ka jingplie lad digital ban ioh kam, kaba plie ia ki lad ban ioh kam, ka jingai jingmut, bad ka jingtbit ha kawei ka jaka. “Kane ka jingiatreilang ym tangba kan iarap ia ki samla jong ngi ha kaba ioh kam ioh jam, hynrei kan long ruh ka jingialam lynti kaba biang na ka bynta jong ki”, ka la ong.

La khmih lynti ba ka jingiatreilang bad ka Mentor Together kan poi sha ar lak ngut ki samla ha ka snem ba nyngkong jong ka, kynthup shi lak ngut ki samla na ka NCS bad shi lak ngut ki nongwan rung hapoh ka Pradhan Mantri Viksit Bharat Rozgar Yojana, kaba pynbiang ia ki jingai jingtip ba kyrpang sha kito kiba wan kam, khnang ba kin ym don ki nongwad kam kiba sahdien. Kan iarap ruh ia ki nongwad kam ba nyngkong, khamtam kito kiba na ki longïing kiba duna ka jingioh jingshakri, ban ïoh ïa ka jingïalam lynti ba kyrpang na palat 24,000 ngut ki riew shemphang kiba la shah hikai pyntbit.

Ka jingpynthymmai ia ka MoU bad ka Quikr ka thmu ban pynkhlain shuh shuh ia ka jinglong jingman ba iadei bad ka jingioh kam da kaba pyniasoh ia palat 1,200 tylli ki jingpynbna kam man ka sngi ha kylleng ki 1200 tam ki nongbah naduh ka Quikr Jobs haduh ka rynsan NCS. Kane ka jingiatreilang kan pyniar ia ka jinglah ban ioh kam ha ka por na ka bynta ki million ngut ki nongwad kam, khamtam na ki jaka nongkyndong bad ki jaka ba duna ka jingioh jingshakri.

Ka MoU bad ka Mentor Together bad ka Quikr ka thmu ban pynbiang sa kawei ka bynta, bad pynkhlain ia ka jingthmu jong ka Tnad ban pyndap ia ka jingduna hapdeng ki nongwad kam bad ki kam jong ki riew shimet. Ha kajuh ka por, kine ki jingiatreilang ki pyni ia ka rukom treikam kaba la pynkhreh na ka bynta ka lawei—kaba long digital, kaba kynthup lang ia baroh, bad kaba don burom.

*****