U Myntri Sorkar Pdeng ba dei khmih ia ka tnad Electronics and Information Technology mynta ka sngi u la plie paidbah ia ka jaka shna Tempered Glass na ka bynta ki Mobile ha Noida. Kane ka jaka treikam ka dei kaba la pynbiang da ka Optiemus Electronics ha ka jingiatreilang bad ka Corning Incorporated, USA, bad kan pynmih ia ki n tempered glass ba bha hapoh ka kyrteng “Engineered by Corning”. Ia ki mar yn pyndonkam hapoh ka ri bad yn pynbiang na ka bynta ki iew ha ki ri bapher bapher.

Haba ai jingkren ha kane ka sngi, u Myntri u la ong ba ka tempered glass ka dei ka tiar kaba kongsan na ka bynta ki mobile phone bad ka jingshna jong ka hapoh ka ri ka dei ka sienjam kaba kongsan na ka bynta ka jingjop jong ka Make in India bad ka jingiohi jngai jong u Myntri Rangbahduh ka ri u Narendra Modi. U la bynrap ruh ba katba dang iaid ka por, ka India kan shna ïa man la ki bynta ba pyndonkam ha ki mobile phone, kynthup ïa ki chip, ki cover glass, ki laptop bad ki bynta jong ki server, ka ban kyntiew ia ka ri kum ka nongiadon bynta ba kongsan ha ka pyrthei ha ka jingshna ïa ki tiar electronic. U Myntri u la pyntip ruh ba la khmih lynti ba yn sa pynmih noh shen ïa u chip Made in India, kaba long kawei pat ka mawjam ha ka jingïaid lynti jong ka ri sha ka jinglah ban shaniah ha lade.

U Vaishnaw u la pynpaw ba ha kine ki 11 snem ba la dep, ka jingshna tiar electronic ha India ka la kiew haduh hynriew shah ban poi sha ka dor kaba ₹11.5 lak klur, da ka jingshalan shabar ri palat ₹3 lak klur bad ai kam na ka bynta 2.5 million ngut ki briew. U la ong ba ka jinglong jingman jong ki tiar electronic baroh kawei ha ka ri ka nang kiew stet bad ka jingkyntiew ia ki kam ka nang kiew stet katba dang iaid ka por.

U Myntri u la pynpaw ruh ba ka jingkhlain jong ka India ha ka jingsaindur ka dei ka bor kaba khraw tam jong ka, bad ka sorkar kan dang bteng ban kyntiew ia ka jingwad bniah bad ka jingkyntiew ia ka bor treikam. Da kaba ai nuksa, u la ong ba kawei ka startup ba la iarap da ka IIT Madras ka la shna ïa ka microcontroller ba nyngkong eh jong ka ri India, ïa kaba shen yn sa pyndonkam ha ki mar jong ka ri India. Ha ka liang ki kam rel, ki nongshna tiar na India ki la dep ban shalan ia ki tiar kiba iahap bad ki tiar ba biang tam ha ka pyrthei sha ki ri Europe.

U Vaishnaw u la ong shuh shuh ba ka jingkiew jong ka GDP jong ka India kaba long 7.8% ha ka lai bnai ba nyngkong jong u snem mang tyngka 2025-26 ka pyni ba ka ri ka long kaba skhem, kaba khlain bad kaba la iaid da ka ioh ka kot kaba wan na ka jingsaindur thymmai. U la kyntu ia ki samla ban trei shitom bad ban noh synniang sha ka jingiohi jngai jong ka Atmanirbhar Bharat bad ka Viksit Bharat 2047, da kaba pynpaw ba ka pyrthei ka peit sha ka Ri India da ka jingkhmih lynti kaba khraw.

Ha kane ka sngi, u Ashok Kumar Gupta, Chairman ka Optiemus Infracom Limited u la ong, “Kane ka dei ka por kaba kongsan bha na ka bynta ka kam shna tiar electronic jong ka ri India bad ka jing thmu Make in India. Watla ka dei kawei na ki iew die mobile phone kaba heh tam ha ka pyrthei, hynrei ka India ka la shaniah ha ka jingwanrah nabar ia ki tempered glass. Da kane ka sienjam, ngi thmu ban tei ia ki bor treikam ban kyrshan ia ki iew jong ka ri India bad ka pyrthei da ki mar kiba bha tam. Ka jingthmu jong ngi ka long ba uwei pa uwei u nongpyndonkam mobile phone na India u dei ban pyndonkam da ka Make in India tempered glass kaba don ka jingpynshisha BIS bad ka fog marking ban ïada ïa ka screen jong ki.”

U Pankaj Mahindroo, Chairman, India Cellular & Electronics Association (ICEA) u la ong “Kine ki mar ki don ïa ka rukom shna kaba donkam bha ïa ki nongtrei bad ka ai ka lad kaba khraw ïa ka India – ym tang ban pyndap ïa la ka jong ka jingdonkam kaba heh hapoh ka ri, hynrei ban long ruh ka nongshalan mar ba khlain. Da kaba kyntiew ïa ka jingshna tiar kiba bha, ngi ïohi ïa ka lad kaba khraw ban kyrshan ïa ki MSME, ban pynmih ïa ki kam kiba heh, bad ban noh synñiang shibun sha ka jingshalan mar jong ka India shabar ri – kaba pynlong ïa ka India kum ka jaka pdeng jong ka pyrthei na ka bynta ka jingshna ïa ki tiar elektrik.”

Na ka bynta ki Tempered Glass, la antad ba ka iew hapoh ka ri ka long palat ia ka 500 million tylli bad ka dor die khutia ka long kumba INR 20,000 klur – kaba pyni ia ka lad kaba heh ha ka ri. Ka iew ka hat jong ka pyrthei ka shongdor palat USD 60 billion.

Shaphang ka jaka shna Tempered Glass Manufacturing Facility da ka Optiemus

Da ka jingbei tyngka ba nyngkong kaba long INR 70 klur, ka jaka ha Noida kan don ïa ki jingtei kiba thymmai tam ki ban plie lad ban pynkylla pura ïa ki mar ba donkam ban sha ki tempered glass ba bha tam. Ka Phase 1 kan don ka bor treikam ban pynmih 25 million unit ha ka shi snem, kaba ai kam ia palat 600 ngut ki briew. Ha ka Phase 2, yn pynheh ia ka bor treikam ban pynmih haduh 200 million unit ha ka shi snem na ka bynta ki iew ha ka ri bad ka pyrthei, da ka jingbei tyngka shuh shuh haduh INR 800 klur – kaba thaw palat 4,500 tylli ki lad ioh kam.

Ka jaka ka don ki lad shna tiar ba pura, kynthup ia ka scribing, shaping/chamfering, polishing, dual-stage rinsing, chemical tempering, coating, printing, bad lamination. Ia kawei pa kawei ka bynta la pyndep hapoh ki jingpeit bniah kiba pyrkhing bha na ka bynta ka jingbha, kaba wanrah ia ka jingpynbiang ia ki tempered glass ba ryntih ia ki nongpyndonkam ha India ha ka sien kaba nyngkong ha India.

Shaphang ka Optiemus Infracom

Ka Optiemus Group ka dei ka telecommunications bad manufacturing enterprise kaba treikam na India. Kane ka kompani ka la treikam jan 30 snem ha ki kam telecommunications, technology bad ka jingshna tiar, bad ka don ka jinglong kaba kyrpang ha ka jingsngewthuh jong ka ia ka iew electronic jong ka India.

***