ఎజిమలలోని ఇండియన్ నేవల్ అకాడమీ (ఐఎన్ఏ)లో 2025, నవంబర్ 5న భారతీయ నౌకా సేన నిర్వహించిన థింక్ 25 క్విజ్ తుది పోటీ ఉత్సాహంగా ముగిసింది. ఈ కార్యక్రమానికి నౌకాదళ ప్రధానాధికారి అడ్మిరల్ దినేష్ కె.త్రిపాఠి ముఖ్యఅతిథిగా హాజరయ్యారు. దీంతో దేశవ్యాప్తంగా నిర్వహించిన విజ్ఞానం, ఆవిష్కరణ, సుసంపన్నమైన భారతీయ నౌకా వారసత్వానికి సంబంధించిన మేధో యాత్ర ముగిసింది.

‘‘మహాసాగర్’’ ఇతివృత్తంతో ఈ ఏడాది నిర్వహించిన ఈ కార్యక్రమం.. అన్వేషణ, సమర్థత, నిబద్ధత అనే భారతీయ నౌకా సేన స్ఫూర్తిని ప్రతిబింబిస్తుంది. అలాగే యువతలో సముద్ర భద్రతా అవగాహనను పెంపొందించాలనే అంకితభావాన్ని సూచిస్తుంది. దేశవ్యాప్తంగా వేలాది మంది ఈ కార్యక్రమంలో పాల్గొనగా.. ఉత్తర, దక్షిణ, తూర్పు, పశ్చిమ జోన్ల నుంచి 16 పాఠశాలలు సెమీఫైనల్స్‌కు చేరుకున్నాయి.

తెలివితేటలు, బృంద స్ఫూర్తి, ఆసక్తిని నిరూపించుకుంటూ.. ప్రతిష్ఠాత్మక థింక్ - 25 తుది పోటీకి ఎనిమిది జట్లు చేరుకున్నాయి.

తుది పోటీదారులు: జయశ్రీ పెరివాల్ ఉన్నత పాఠశాల – జైపూర్, భారతీయ విద్యాభవన్ - కన్నూర్, సుబోధ్ పబ్లిక్ స్కూల్ - జైపూర్, శిక్షా నికేతన్ - జంషెడ్‌పూర్, పద్మ శేషాద్రి బాల భవన్ సీనియర్ సెకండరీ స్కూల్ - చెన్నై, కేంబ్రిడ్జి కోర్టు హై స్కూల్ - జైపూర్, డాక్టర్ వీరేంద్ర స్వరూప్ ఎడ్యుకేషన్ సెంటర్ - కాన్పూర్, పీఎం శ్రీ జేఎన్‌వీ - సమస్టిపూర్.

ఈ పోటీల్లో జైపూర్‌కి చెందిన జయశ్రీ పెరివాల్ హై స్కూల్ విజేతగా నిలవగా, సమస్టిపూర్‌కు చెందిన పీఎం శ్రీ జవహర్ నవోదయ విద్యాలయ రన్నరప్‌గా నిలిచి థింక్ - 25 కు స్ఫూర్తిదాయకమైన ముగింపు తీసుకువచ్చాయి.

ఈ సందర్భంగా నౌకాదళ ప్రధానాధికారి మాట్లాడుతూ.. ఉత్సాహం, అవగాహన, భారతీయ నౌకా సేన వారసత్వాన్ని పూర్తిగా అర్థం చేసుకొని ఈ పోటీల్లో పాల్గొన్న విద్యార్థులను ప్రశంసించారు. యువతలో ఉత్సాహాన్ని పెంపొందించడం, ఆవిష్కరణలను ప్రోత్సహించాల్సిన అవసరాన్ని వివరించారు. ఇవే భవిష్యత్తులో నౌకా సేనను నడిపించే నాయకులను, మేధావులను తయారు చేస్తాయన్నారు.

భారతీయ నౌకా సేవ అధికారిక యూట్యూబ్ ఛానల్ ద్వారా తుది పోటీలు ప్రత్యక్ష ప్రసారమయ్యాయి. దేశవ్యాప్తంగా వివిధ పాఠశాలలు, నౌకాసేన సంస్థలు, సముద్ర రంగంపై ఆసక్తి ఉన్నవారు ఈ కార్యక్రమాన్ని వీక్షించారు.

అన్వేషణ, ఆసక్తి, నైపుణ్యాలు దిశగా యువతను ప్రోత్సహించేలా జ్ఞానం, పరిశోధన అనే సాహస యాత్రను కొనసాగిస్తూ.. థింక్ - 26 నిర్వహించేందుకు భారత నౌకా సేన ఎదురుచూస్తోంది.