প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা মুম্বাইদা ইন্দিয়া মেরিতাইম ৱিক ২০২৫ দা মেরিতাইম লুচিংবশিংগী মীফমদা ৱা ঙাংখ্রে
অকনবা খোঙজেল অমসুং থৌনাগা লোয়ননা ভারতকী মেরিতাইম সেক্তর চাউখৎলক্লি: প্রধান মন্ত্রী
চহি ১০০ শুরবা অরিবা লোয়লম লৈঙাক মতমগী সিপ্পিং লোশিং ২১শুবা চহিচাগা চুনরবা অনৌবা, তুংকোইনা চৎনরবা য়ারবা লোশিংনা ঐখোয়না শিন্দোক্লে: প্রধান মন্ত্রী
ঙসিদি, চাউখৎলক্লিবা মালেম অসিদা খ্বাইদগী ফবশিংগী মনুংদা ভারতকী হিথাংফমশিং য়াওরে; হিরম কয়াদা, মখোয়না চাউখৎলবা লৈবাকশিংগী হিথাংফমশিংদগী হেন্না ফরে: প্রধান মন্ত্রী
জহাজ শাবদা অনৌবা থাকশিং য়ৌনবা ভারতনা থবকশিং য়াংখৎহল্লি, হৌজিক ঐখোয়না অচৌবা জহাজশিং ইনফ্রাষ্ট্রকচর এসেতশিং ওইনা শকখঙলে: প্রধান মন্ত্রী
ভারতকী সিপ্পিং সেক্তর থবক তৌনবা অমসুং পাকথোক-চাউথোক্নবা হৌজিক মতম চপ চারবনি: প্রধান মন্ত্রী
মালেমগী সমুদ্রশিং খুদোংথিবা মতমদা, মালেম্না লেংদবা লাইতহাওস অমা থিরি, পাঙ্গল অমসুং তংদু-লৈতাবগা লোয়ননা মদুগী থৌদাং অদু লৌনবা ভারতনা ফজনা শেম-শারে: প্রধান মন্ত্রী
মালেমগী উংখৎনবশিং, ললোন-ইতিকশিং খুদোংচাদবশিং অমসুং সপ্লাই চেনশিং হোংলিবা মরক অসিদা, ভারতনা ষ্ট্রাতেজিক ওতোনোমি, শান্তি অমসুং পুন্না চাউখৎপগী খুদম অমা ওইনা লৈরি: প্রধান মন্ত্রী
Posted On:
29 OCT 2025 5:58PM by PIB Imphal
ঙসি মহারাষ্ট্রাগী মুম্বাইদা ইন্দিয়া মেরিতাইম ৱিক ২০২৫ দা প্রধান মন্ত্রী শ্রী নরেন্দ্র মোদীনা মেরিতাইম লুচিংবশিংগী মীফমদা ৱা ঙাংখ্রে অমসুং গ্লোবেল মেরিতাইম সি.ই.ও ফোরমগী চিয়ার লৌখ্রে। থৌরম অদুদা ৱা ঙাংবদা, প্রধান মন্ত্রীনা মালেমগী মেরিতাইম লুচিংবশিংগী মীফমদা শরুক য়াখিবশিং তরাম্না ওকখি। মহাক্না হায়খি থৌরম অসিদা ২০১৬ দা মুম্বাইদা হৌখিবনি অমসুং মসি হৌজিক মালেমগী মীফম অমা ওইরকপদা হরাওই। থৌরম অসিদা লৈবাক ৮৫ হেন্না শরুক য়ারিবা অসিনা অকনবা পাউজেল অমা পীরে। থৌরম অসিদা শক্নাইরবা সিপ্পিংগী কম্পেনিশিং, ষ্টার্দঅপশিং, থৌশিল শেম্বশিং অমসুং ইন্নোবেতরশিংগী সি.ই.ওশিং শরুক য়ারে। অপীকপা ইথৎ লৈবাকশিংগী মীহুৎশিং থৌরম অসিদা শরুক য়ারি অমসুং মখোয়গী অপুনবা পান্দম অদুনা মীফম অসিগী মপাঙ্গল হেনগৎহল্লে।
প্রধান মন্ত্রীনা হায়খি মীফম অসিদা সিপ্পিং সেক্তরগা মরী লৈনবা প্রোজেক কয়া হৌদোক্লে। সিপ্পিং সেক্তরদা লুপা করোর লাখ কয়াগী এম.ও.য়ুশিং খুৎয়েক পীনরে। ভারতকী মেরিতাইমগী তৌবা ঙম্বশিংদা মালেম্না থাজবা থম্লে হায়বা মসিদা মমি তারে অমসুং থৌরম অসিদা মশিং য়াম্না শরুক য়াবা অসি মখোয়গী থাজবগী খুদম অমনি।
প্রধান মন্ত্রীনা হায়খি ২১শুবা চহিচাদা, অকনবা খোঙজেল অমসুং থৌনাগা লোয়ননা ভারতকী মেরিতাইম সেক্তর চাউখৎলক্লি। ২০২৫ অসি সেক্তরগী অসিগী য়াম্না মরুওইবনি অমসুং মাইপাকপা কয়া পুরকপা ঙম্লে। ভারতকী অহানবা দিপ-ৱাতর ইন্তরনেসনেল ত্রান্স-সিপমেন্ত হব হৌজিক থবক হৌরে। মালেমগী খ্বাইদগী চাউবা কন্তেন্নর ভেসেলশিং হিথাংফম অসি থুংলদুনা, ভারতমচা খুদিংমক চাউথোকহল্লে। ২০২৪-২৫ দা ভারতকী অচৌবা হিথাংফমশিংনা কার্গো ভোলুম খ্বাইদগী য়াম্না থবক তৌদুনা অনৌবা রেকোর্দ অমা থম্লে। অহানবা ওইনা, ভারতকী হিথাংফম কন্দলা পোর্তনা লৈবাক অসিনা শাজবা মেগাৱাত থাক্কী গ্রিন হায়দ্রোজেনগী খুদোংচাবা হৌদোক্লে। জে.এন.পি.তিগী অচৌবা মাইপাকপা অমা ওইনা, ভারত মুম্বাই কন্তেন্নর তর্মিনেল থবক হৌরে। মসিদা কন্তরেন্না থাংদোক-থাংজিন ঙম্বা শরুক অনি হেনগৎলে, মসি ভারতকী খ্বাইদগী চাউবা কন্তেন্নর পোর্ত ওইরে। ভারতকী পোর্ত ইনফ্রাষ্ট্রকচরদা এফ.দি.আই য়াম্না লাকপদগী মসি ওইথোকপনি অমসুং মসিদা মখোয়না মতেং পাংলকপগীদমক শিঙ্গাপুর থাগৎপা ফোঙদোকচরি।
প্রধান মন্ত্রীনা হায়খি চহি অসিদা ভারতনা মেরিতাইম সেক্তরদা অনৌবা অওনবশিং পুরক্লে। চহি ১০০ শুরবা অরিবা লোয়লম লৈঙাক মতমগী সিপ্পিং লোশিং ২১শুবা চহিচাগা চুনরবা অনৌবা, তুংকোইনা চৎনরবা য়ারবা লোশিংনা ঐখোয়না শিন্দোক্লে। অনৌবা আইনশিং অসিনা ষ্টেৎ মেরিতাইম বোর্দশিং ফগৎহল্লে, অশোই-অঙাম থোক্তবা অমসুং তুংকোইনা চৎনবা য়াবা ফগৎলে অমসুং হিথাংফম শেন্নবগী থবকশিং দিজিতেল ওন্থোকপা হেনগৎলে। মর্চেন্ত সিপ্পিং এক্তকী মখাদা, ভারতকী আইনশিং মালেমগী কনভেন্সনশিংগা চুনরে। মসিনা অশোই-অঙাম থোক্তনবা থবকশিংদা থাজবা হেনগৎহল্লে, ললোন-ইতিক পাংথোকপা লাইবা হেনগৎলে অমসুং সরকারনা খুৎথিংজিনবা হন্থরে। থবকশিং অসিনা মরী লৈনবশিং অমসুং ইনভেষ্টরশিংগী থাজবা হেনগৎহনগনি।
প্রধান মন্ত্রীনা হায়খি ললোনবা লাইহন্নবা অমসুং সপ্লাই চেন সেকুরিতি মপাঙ্গল কনখৎহন্নবা কোষ্টেল সিপ্পিং এক্ত দিজাইন তৌখিবনি। এক্ত অসিনা ভারতকী শাংলবা সমুদ্র মপানশিং থোং মান্ননা চাউখৎহল্লে। লৈবাক অমা, হিথাংফম অমগী থবকশিংনা হিথাংফমগা মরী লৈনবা থবকশিং ফগৎহনগনি অমসুং চে-চাংগী দরকার ওইবশিং হন্থহল্লে। সিপ্পিং সেক্তরগী অওনবশিং অসি ভারতকী চহি ১০ গী অওনবগী খোঙচৎকী মখা তারকপনি। হৌখিবা চহি ১০-১১ দা লৈখিবা ভারতকী মেরিতাইম সেক্তরগী অওনবশিং পুৱারি ওইরে। মেরিতাইম ইন্দিয়া ভিজনগী মখাদা, অনৌবা থবক ১৫০ হেন্না হৌদোক্লে, মসিনা অচৌবা হিথাংফমশিংগী থবক তৌবা ঙম্বা শরুক অনিরোম হেনগৎলে, তর্নএরাউন্দ তাইম শিংথাবা য়ানা হন্থরে অমসুং ক্রুইজ তুরিজমদা অনৌবা ইনোৎ অমা লৈরে। কংফাল মনুংগী ঈশিং লম্বীশিংদা কার্গো চৎথোক-চৎশিন তৌবা চাদা ৭০০ হেনগৎলে অমসুং থবক তৌরিবা ঈশিং লম্বী মশিং অহুমদগী ৩২ য়ৌরে। হৌখিবা চহি ১০ দা ভারতকী হিথাংফমশিংগী চহিগী অপুনবা সরপ্লস শরুক মপান হেনগৎলে।
প্রধান মন্ত্রীনা হায়খি ঙসিদি, চাউখৎলক্লিবা মালেম অসিদা খ্বাইদগী ফবশিংগী মনুংদা ভারতকী হিথাংফমশিং য়াওরে; হিরম কয়াদা, মখোয়না চাউখৎলবা লৈবাকশিংগী হিথাংফমশিংদগী হেন্না ফরে। ভারত্ত কন্তেন্নরশিং লৈবগী মতম নুমিৎ হুমনি য়ৌদ্রে, মসি চাউখৎলবা লৈবাক কয়াগী হেন্না ফরবনি। চাংচত্ত ভেসেল অমগী তর্নএরাউন্দ তাইম পুং ৯৬ ওইরম্বদগী পুং ৪৮ দা হন্থরে, মসিনা ভারতকী হিথাংফমশিং চাংদম্নবা হেন্না ঙমহল্লে অমসুং মালেমগী সিপ্পিং লাইনশিংনা পাম্নরে। ৱার্ল্দ বেঙ্কগী লোজিষ্টিক্স পর্ফোমেন্স ইন্দেক্সতা ভারত শিংথাবা য়ানা ফগৎলে। মেরিতাইম হুমেন রিছোর্সতা ভারতকী ফিবম ফগৎলে অমসুং হৌখিবা চহি ১০ দা ভারতকী হিরোয় লাখ ১.২৫ লৈরম্বদগী লাখ ৩ দা হেনগৎলে। ঙসি হিরোয়শিংগী মশিং য়েংনবদা মালেমগী মকোক থোঙবা লৈবাক অহুমগী মনুংদা ভারত য়াওরে। ২১শুবা চহিচাগী শরুক মরি থোকপগী শরুক অমা হৌখ্রে অমসুং মথংগী চহি ২৫ অসিনা হেন্না মরুওইরে। ব্লু ইকোনোমি অমসুং তুংকোইনা চৎনবা য়ানবা সমুদ্র খোঙবাল শেমগৎপদা ভারতনা মীৎয়েং চঙলি। গ্রিন লোজিষ্টিক্স, হিথাংফম য়ৌবা লম্বী-থোঙ অমসুং কোষ্টেল ইন্দষ্টিএল ক্লষ্টরশিংদা সরকারনা মীৎয়েং চঙলে। প্রধান মন্ত্রীনা হায়খি হৌজিক ভারতনা মরুওইনা লৌরিবশিংগী মনুংদা জহাজ শাবা য়াওরে। জহাজ শাবগী ভারতকী অফবা পুৱারি লৈরমখি। হিরম অসিদা মতম অমদা লৈবাক অসি মালেমগী ময়োল অমা ওইরমখি। থৌরম মফম অসিদগী য়াম্না লাপ্তনা অজান্ত শুরুংশিংদা ৬শুবা চহিচাগী অয়েকপা লাইশিংদা মাষ্ট অহুম য়াওবা জহাজ অমগী দিজাইন উৎলি। ভারতকী অরিবা কলাদা উৎলিবা দিজাইন অসি চহিচা কয়াগী মতুংদা অতোপ্পা লৈবাকশিংনা শীজিন্নখি।
প্রধান মন্ত্রীনা হায়খি মতম অমদা ভারতনা শাবা জহাজশিংনা মালেমগী ললোন-ইতিক্কী মরুওইবা শরুক অমা ওইরমখি। তুংদা ভারতনা জহাজ শিদোকপগী থবকশিংদা খুমাঙচাউশিনখি অমসুং হৌজিক জহাজ শাবদা অনৌবা থাকশিং য়ৌনবা ভারতনা থবকশিং য়াংখৎহল্লি। হৌজিক ঐখোয়না অচৌবা জহাজশিং ইনফ্রাষ্ট্রকচর এসেতশিং ওইনা শকখঙলে। থৌশিল অসিনা হৌজিক থৌরম অসিদা শরুক য়ারিবা জহাজ শাবা কম্পেনিশিংগী অনৌবা খুদোংচাবশিং ফংলগনি। মসিনা নৌনা শেন থাদনবা খুদোংচাবশিং পীগনি, শেন্দোয় হন্থহনগনি অমসুং শেন্থং লাইনা ফংহনগনি। অওনবা অসি য়াংনা চঙশিন্নবা, সরকারনা লুপা করোর ৭০,০০০ থাদগনি। থাদগদৌরিবা শেনফমশিং অসিনা লৈবাক অসিগী থবক তৌবা ঙম্বা হেনগৎহনগনি, মতম শাংনা শেন থাদবা পুক্নিং থৌগৎকনি, গ্রিনফিল্দ অমসুং ব্রাউনফিল্দ সিপয়ার্দশিং শেমগৎপদা মতেং পাংগনি, অৱাংবা থাক্কী মেরিতাইম স্কিলশিং লৈহনগনি অমসুং নহারোলশিংগী থবক লাখ কয়া পীগনি। থবক অসিনা মরী লৈনবা খুদিংমক নৌনা শেন থাদনবা খুদোংচাবা পীরগনি। মীফম পাংথোক্লিবা মফম অসি, অরিয়ান সিগী ললোন-ইতিক্কী লম্বীশিংদা ভারতকী মপাঙ্গল উৎখিবা অমসুং মেরিতাইম সেকুরিতিগী য়ুম্ফম থোনখিবা ছত্রপতি সিবাজী মহারাজগী লমদমনি। সমুদ্রশিং অসি ঙমখৈশিং নত্তে, খুদোংচাবশিংগী থোঙ্গালশিংনি হায়বগী পান্দম সিবাজী মহারাজগী লৈখি। মসিগী ৱাখল্লোনগা লোয়ননা ভারত মাংলোমদা চঙশিল্লি।
প্রধান মন্ত্রীনা হায়খি মালেমগী সপ্লাই চেনগী ফিবম ফগৎনবা ভারতনা থবক পায়খৎলে অমসুং লৈবাক অসিনা থৱায় য়াওনা মালেম থাক্কী অচৌবা হিথাংফমশিং শেমগৎলি। লুপা করোর ৭৬,০০০ রোম চঙনা মহারাষ্ট্রাগী বধাবন্দা অনৌবা হিথাংফম অমা শেমগৎলি। লৈবাক অসিগী অচৌবা হিথাংফমশিং থবক তৌবা ঙম্বা শরুক মরি হেনগৎহন্নবা ভারতনা থবক পায়খৎলি। পান্দমশিং অসি ফংনবা হোৎনবদা থৌরম অসিদা শরুক য়ারিবা মরী লৈনবা খুদিংমক মরুওইবা মরুপশিংনি অমসুং মখোয়গী অনৌবা ৱাখলশিং, অনৌবা থবকশিং অমসুং শেন থাদরকপা তরাম্না ওক্লি। হিথাংফমশিং অমসুং সিপ্পিংদা এফ.দি.আই চাদা ১০০ গী অয়াবা ভারতনা পীরে অমসুং সরকার অমসুং লনাই পুন্না থবক তৌমিন্নবা য়াংনা হেনগৎলক্লি। “মেক ইন ইন্দিয়া, মেক ফোর ৱার্ল্দ” পান্দমগী মখাদা, ইন্সেনতিশিং পীরে অমসুং শেন থাদরক্নবা রাজ্যশিং পুক্নিং থৌগৎলে। ভারতকী সিপ্পিং সেক্তর চাউখৎনবা অমসুং থবক তৌমিন্ননবা খুদোংচাবা লৌনবা লৈবাকশিংনা শেন থাদরক্কদবনি। ভারতকী সিপ্পিং সেক্তর থবক তৌনবা অমসুং পাকথোক-চাউথোক্নবা হৌজিক মতম চপ চারবনি।
প্রধান মন্ত্রীনা হায়খি ভারতকী গনতন্ত্র অমসুং থবক ফজনা পাংথোকপা ঙম্বা অসি মপাঙ্গল অমনি। মালেমগী সমুদ্রশিং খুদোংথিবা মতমদা, মালেম্না লেংদবা লাইতহাওস অমা থিরি, পাঙ্গল অমসুং তংদু-লৈতাবগা লোয়ননা মদুগী থৌদাং অদু লৌনবা ভারতনা ফজনা শেম-শারে। মালেমগী উংখৎনবশিং, ললোন-ইতিকশিং খুদোংচাদবশিং অমসুং সপ্লাই চেনশিং হোংলিবা মরক অসিদা, ভারতনা ষ্ট্রাতেজিক ওতোনোমি, শান্তি অমসুং পুন্না চাউখৎপগী খুদম অমা ওইনা লৈরি। পান্দম অসিদা ভারতকী মেরিতাইম অমসুং ললোন-ইতিক্কী থবকশিং তৎন-থানবা য়াদ্রবা শরুক অমনি। ইন্দিয়া-মিদল ইষ্ট-য়ুরোপ ইকোনোমিক কোরিদোর অসি খুদম অমনি অমসুং মসিনা ললোন-ইতিক্কী অনৌবা লম্বীশিং লৈরগনি অমসুং ক্লিন ইনর্জি অমসুং স্মার্দ লোজিষ্টিক্স ফগৎহনগনি।
প্রধান মন্ত্রীনা হায়খি খুদিংমক কোনশিনবা মেরিতাইম চাউখৎনবা ভারতনা মীৎয়েং চঙলি। তেক্নোলোজি, ত্রেনিং অমসুং ইনফ্রাষ্ট্রকচরগী খুৎথাংদা অপীকপা ইথৎ লৈবাকশিং অমসুং চাউখৎত্রিবা লৈবাকশিং ফিবম ফগৎহল্লবা মতমদা পান্দম অসি ফংবা ঙমগনি। অইং-অশাগী খল হোংলকপা, সপ্লাই চেন অকায়বা পীরকপা, শেন-থুমগী ফিবম তম্বা ঙমদবা ফিবম অমসুং মেরিতাইম সেকুরিতিগী খুদোংচাদবশিং কোকহন্নবা অপুনবগী থবক দরকার ওই। শান্তি, চাউখৎপা অমসুং নুংঙাই য়াইফবা পুরক্নবা অমসুং তুংকোইনা চৎনবা য়াবা তুংলমচৎ অমা শেমগৎনবা শরুক য়ারিবশিং পুন্না চৎমিন্নগদবনি। মীফম অসিদা শরুক য়ারিবা মীওই খুদিংমক য়াইফ পাউজেল পীজরি অমসুং থাগৎপা ফোঙদোকচরি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা মহারাষ্ট্রাগী রাজ্যপাল শ্রী অচার্য়া দেবব্রত, মহারাষ্ট্রাগী চীফ মিনিষ্টর শ্রী দেবেন্দ্র ফদনাবিস, য়ুনিয়ন মিনিষ্টরশিং, শ্রী সর্বনন্দা সোনোৱাল, শ্রী সান্তনু থাকুর অমসুং শ্রী কিরতি বর্ধন সিংহ য়াওখি।
নুঙগীৱারোল
গ্লোবেল মেরিতাইম সি.ই.ও ফোরম, ইন্দিয়া মেরিতাইম ৱিক ২০২৫ গী মরুওইবা থৌরম অসিনা গ্লোবেল মেরিতাইম কম্পনীশিংগী সি.ই.ওশিং, মরুওইবা ইনভেষ্টরশিং, পোলিসি মেকরশিং, ইন্নোভেতরশিং অমসুং মালেমগী পার্তনরশিং পুনশিন্নদুনা গ্লোবেল মেরিতাইম ইকোসিস্তেমগী তুংলমচৎকী মতাংদা খন্ন-নৈনগনি। ফোরম অসিনা ষ্টেনেবল মেরিতাইম গ্রোথ, রেসিলিএন্ত সপ্লাই চেন, গ্রীন শিপ্পিং অমসুং ইনক্লুসিব ব্ল্যু ইকোনোমী ষ্ট্রাতেজীশিংদা ৱারী শানবগী মরুওইবা প্লেতফোর্ম অমা ওইনা মথৌ তৌগনি।
প্রধান মন্ত্রীনা শরুক য়াবা অসিনা মেরিতাইম অমৃত কাল ভিজন ২০৪৭গা মরী লৈননা অচৌবা, তুংলমচৎতা য়ুম্ফম ওইবা মেরিতাইম ত্রান্সফোর্মেসনগীদমক মহাক্কী অচেৎপা ফিরেপ অদু উৎলি। পোর্ত-লেদ দিবেলপমেন্ত, শিপ্পিং অমসুং জহাজ শাবা, অপনবা লৈতবা লোজিস্তিক্স, অমসুং মেরিতাইম স্কিল-বিল্দিং হায়রিবা স্ত্রেতেজিক পিল্লর মরিদা য়ুম্ফম ওইবা লোং-তর্ম ভিজন অসিনা ভারত মালেমগী মকোক থোংবা মেরিতাইম পাৱরশিংগী মরক্তা থম্নবা পান্দম থম্লি। ইন্দিয়া মেরিতাইম ৱিক ২০২৫ অসি ভারত সরকারগী মরুওইবা গ্লোবেল প্লেতফোর্ম অমা ওইদুনা ভিজন অসি থবক ওইনা ওন্থোক্নবা হোৎনগনি, মসিনা শিপ্পিং, পোর্তশিং, জহাজ শাবা, ক্রুজ তুরিজম অমসুং ব্ল্যু ইকোনোমী ফাইনান্সকী লমদা মকোক থোংবা মরী লৈনবশিং পুনশিন্নগনি।
ওক্তোবর ২৭ তগী ৩১, ২০২৫ ফাওবা "য়ুনাইতিং ওসিনস, ৱান মেরিতাইম ভিজন" হায়বা থিমগী মখাদা পাংথোক্কদৌরিবা ইন্দিয়া মেরিতাইম ৱিক ২০২৫ না মালেমগী মেরিতাইম হব অমা অমসুং ব্ল্যু ইকোনোমীদা লুচিংবা অমা ওইনা থোরক্নবা ভারতকী স্ত্রেতেজিক রোদমেপ উৎকনি। ইন্দিয়া মেরিতাইম ৱিক ২০২৫দা লৈবাক ৮৫ হেনবনা শরুক য়াগনি, মসিদা দেলিগেৎ ১,০০,০০০, এক্সিবিতর ৫০০ অমসুং ইন্তর্নেস্নেল স্পীকর ৩৫০ হেনবনা শরুক য়াগনি।
***
(Release ID: 2184029)
Visitor Counter : 5
Read this release in:
English
,
Urdu
,
Marathi
,
हिन्दी
,
Nepali
,
Bengali
,
Assamese
,
Punjabi
,
Gujarati
,
Odia
,
Tamil
,
Kannada
,
Malayalam