ਰਾਸ਼ਟਰਪਤੀ ਸ਼੍ਰੀਮਤੀ ਦ੍ਰੌਪਦੀ ਮੁਰਮੂ ਨੇ ਅੱਜ (29 ਅਕਤੂਬਰ, 2025) ਹਰਿਆਣਾ ਦੇ ਅੰਬਾਲਾ ਹਵਾਈ ਸੈਨਾ ਸਟੇਸ਼ਨ ਤੋਂ ਰਾਫੇਲ ਜਹਾਜ਼ ਵਿੱਚ ਉਡਾਨ ਭਰੀ। ਸ਼੍ਰੀਮਤੀ ਮੁਰਮੂ ਭਾਰਤੀ ਹਵਾਈ ਸੈਨਾ ਦੇ ਦੋ ਲੜਾਕੂ ਜਹਾਜ਼ਾਂ ਵਿੱਚ ਉਡਾਨ ਭਰਨ ਵਾਲੀ ਦੇਸ਼ ਦੀ ਪਹਿਲੀ ਰਾਸ਼ਟਰਪਤੀ ਹੈ। ਇਸ ਤੋਂ ਪਹਿਲਾਂ, ਉਨ੍ਹਾਂ ਨੇ 2023 ਵਿੱਚ ਸੁਖੋਈ 30 ਐੱਮਕੇਆਈ ਵਿੱਚ ਉਡਾਨ ਭਰੀ ਸੀ।

ਅੰਬਾਲਾ ਹਵਾਈ ਸੈਨਾ ਸਟੇਸ਼ਨ ਪਹਿਲਾ ਹਵਾਈ ਸੈਨਾ ਸਟੇਸ਼ਨ ਹੈ, ਜਿੱਥੇ ਫ਼ਰਾਂਸ ਦੇ ਦਸੌਲਟ ਏਵੀਏਸ਼ਨ ਫੈਸਿਲਿਟੀ ਤੋਂ ਰਾਫੇਲ ਜਹਾਜ਼ ਪਹੁੰਚੇ।

ਰਾਸ਼ਟਰਪਤੀ ਭਾਰਤੀ ਹਥਿਆਰਬੰਦ ਸੈਨਾਵਾਂ ਦੀ ਸਰਬਉੱਚ ਕਮਾਂਡਰ ਹਨ। ਉਨ੍ਹਾਂ ਨੇ ਲਗਭਗ 30 ਮਿੰਟ ਤੱਕ ਉਡਾਨ ਭਰੀ ਅਤੇ ਲਗਭਗ 200 ਕਿੱਲੋਮੀਟਰ ਦੀ ਦੂਰੀ ਤੈਅ ਕੀਤੀ, ਉਸ ਤੋਂ ਬਾਅਦ ਹਵਾਈ ਸੈਨਾ ਸਟੇਸ਼ਨ 'ਤੇ ਵਾਪਸ ਆਏ। ਜਹਾਜ਼ ਨੂੰ 17 ਸਕੁਐਡਰਨ ਦੇ ਕਮਾਂਡਿੰਗ ਅਫ਼ਸਰ ਗਰੁੱਪ ਕੈਪਟਨ ਅਮਿਤ ਗੇਹਾਨੀ ਨੇ ਉਡਾਇਆ। ਰਾਫੇਲ ਨੇ ਸਮੁੰਦਰ ਤਲ ਤੋਂ ਲਗਭਗ 15,000 ਫੁੱਟ ਦੀ ਉਚਾਈ 'ਤੇ ਅਤੇ ਲਗਭਗ 700 ਕਿੱਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਉਡਾਨ ਭਰੀ।

ਵਿਜ਼ਟਰ ਬੁੱਕ ਵਿੱਚ ਰਾਸ਼ਟਰਪਤੀ ਨੇ ਇੱਕ ਸੰਖੇਪ ਨੋਟ ਲਿਖ ਕੇ ਆਪਣੀਆਂ ਭਾਵਨਾਵਾਂ ਦਾ ਪ੍ਰਗਟਾਵਾ ਕੀਤਾ। ਵਿਜ਼ਟਰ ਬੁੱਕ ਵਿੱਚ ਉਨ੍ਹਾਂ ਨੇ ਕਿਹਾ, "ਭਾਰਤੀ ਹਵਾਈ ਸੈਨਾ ਦੇ ਰਾਫੇਲ ਜਹਾਜ਼ 'ਤੇ ਆਪਣੀ ਪਹਿਲੀ ਉਡਾਨ ਲਈ ਹਵਾਈ ਸੈਨਾ ਸਟੇਸ਼ਨ ਅੰਬਾਲਾ 'ਤੇ ਆ ਕੇ ਮੈਨੂੰ ਬੇਹੱਦ ਖ਼ੁਸ਼ੀ ਹੋ ਰਹੀ ਹੈ। ਰਾਫੇਲ 'ਤੇ ਉਡਾਨ ਭਰਨਾ ਮੇਰੇ ਲਈ ਇੱਕ ਨਾ-ਭੁੱਲਣਯੋਗ ਤਜਰਬਾ ਹੈ। ਸ਼ਕਤੀਸ਼ਾਲੀ ਰਾਫੇਲ ਜਹਾਜ਼ 'ਤੇ ਇਸ ਪਹਿਲੀ ਉਡਾਨ ਨੇ ਮੈਨੂੰ ਰਾਸ਼ਟਰ ਦੀਆਂ ਰੱਖਿਆ ਸਮਰੱਥਾਵਾਂ ਦੇ ਪ੍ਰਤੀ ਮਾਣ ਦੀ ਇੱਕ ਨਵੀਂ ਭਾਵਨਾ ਨਾਲ ਭਰ ਦਿੱਤਾ ਹੈ। ਮੈਂ ਇਸ ਉਡਾਨ ਦੇ ਸਫ਼ਲ ਸੰਚਾਲਨ ਲਈ ਭਾਰਤੀ ਹਵਾਈ ਸੈਨਾ ਅਤੇ ਹਵਾਈ ਸੈਨਾ ਸਟੇਸ਼ਨ, ਅੰਬਾਲਾ ਦੀ ਪੂਰੀ ਟੀਮ ਨੂੰ ਵਧਾਈ ਦਿੰਦੀ ਹਾਂ।"

ਰਾਸ਼ਟਰਪਤੀ ਨੂੰ ਰਾਫੇਲ ਅਤੇ ਭਾਰਤੀ ਹਵਾਈ ਸੈਨਾ ਦੀਆਂ ਸੰਚਾਲਨ ਸਮਰੱਥਾਵਾਂ ਬਾਰੇ ਵੀ ਜਾਣਕਾਰੀ ਦਿੱਤੀ ਗਈ।

************

ਐੱਮਜੇਪੀਐੱਸ/ ਐੱਸਆਰ