ಕೇಂದ್ರ ಹಣಕಾಸು ಮತ್ತು ಕಾರ್ಪೊರೇಟ್ ವ್ಯವಹಾರಗಳ ಸಚಿವರಾದ ಶ್ರೀಮತಿ ನಿರ್ಮಲಾ ಸೀತಾರಾಮನ್; ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವರಾದ ಶ್ರೀ ಪಿಯೂಷ್ ಗೋಯಲ್; ಮತ್ತು ಕೇಂದ್ರ ರೈಲ್ವೆ, ವಾರ್ತಾ ಮತ್ತು ಪ್ರಸಾರ, ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರು ಇಂದು ನವದೆಹಲಿಯಲ್ಲಿ ಜಿ ಎಸ್ ಟಿ ಉಳಿತಾಯ ಉತ್ಸವದ ಕುರಿತು ಜಂಟಿ ಮಾಧ್ಯಮ ಗೋಷ್ಠಿ ನಡೆಸಿದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ದೀಪಾವಳಿಗೆ ಮುನ್ನ ಮುಂದಿನ ಪೀಳಿಗೆಯ ಜಿ ಎಸ್ ಟಿ ಸುಧಾರಣೆಗಳನ್ನು ಜಾರಿಗೆ ತರಲಾಗುವುದು ಎಂದು ಕೆಂಪು ಕೋಟೆಯಿಂದ ಘೋಷಿಸಿದ್ದರು ಎಂದು ಶ್ರೀಮತಿ ನಿರ್ಮಲಾ ಸೀತಾರಾಮನ್ ಹೇಳಿದರು.

"ಅದರಂತೆ, ದರ ಕಡಿತ, ಪ್ರಕ್ರಿಯೆ ಸರಳೀಕರಣ, ತೆರಿಗೆ ಹಂತಗಳನ್ನು ನಾಲ್ಕರಿಂದ ಎರಡಕ್ಕೆ ಇಳಿಸುವುದು ಮತ್ತು ವರ್ಗೀಕರಣ ಸಮಸ್ಯೆಗಳನ್ನು ಪರಿಹರಿಸುವುದು ಎಲ್ಲವೂ ನಿಗದಿತ ಸಮಯಕ್ಕಿಂತ ಮೊದಲೇ ಪೂರ್ಣಗೊಂಡವು. ಮುಂದಿನ ಪೀಳಿಗೆಯ ಜಿ ಎಸ್ ಟಿ ಸುಧಾರಣೆಗಳು ನವರಾತ್ರಿಯ ಮೊದಲ ದಿನದಂದು ಜಾರಿಗೆ ಬಂದವು ಮತ್ತು ಭಾರತದ ಜನರು ಅವುಗಳನ್ನು ಉತ್ತಮವಾಗಿ ಸ್ವೀಕರಿಸಿದ್ದಾರೆ ಎಂದು ನಾನು ಭಾವಿಸುತ್ತೇನೆ" ಎಂದು ಶ್ರೀಮತಿ ಸೀತಾರಾಮನ್ ಹೇಳಿದರು.

"ನಾವು ಜಿ ಎಸ್ ಟಿ ಗೆ ಮಾರ್ಗಸೂಚಿಗಳನ್ನು ರೂಪಿಸಿದ್ದೇವೆ ಮತ್ತು ಅದನ್ನು ಜಾರಿಗೆ ತಂದಿದ್ದೇವೆ. ವಿರೋಧ ಪಕ್ಷಗಳು ಜಿ ಎಸ್ ಟಿ ಯನ್ನು ತರಲಿಲ್ಲ ಅಥವಾ ಆ ಪ್ರಯತ್ನದ ಧೈರ್ಯವನ್ನೂ ಮಾಡಲಿಲ್ಲ. ನಾವು ಇಂದು ಮಾಡುತ್ತಿರುವುದು ತಿದ್ದುಪಡಿಯಲ್ಲ, ಬದಲಾಗಿ ಪ್ರಜ್ಞಾಪೂರ್ವಕ ನಿರ್ಧಾರ - ಜನರಿಗೆ ಗರಿಷ್ಠ ಪ್ರಯೋಜನಗಳನ್ನು ನೀಡಲು ಕೇಂದ್ರ ಸರ್ಕಾರ ಮತ್ತು ಜಿ ಎಸ್ ಟಿ ಮಂಡಳಿಯ ನಡುವಿನ ಸಹಯೋಗದ ಪ್ರತಿಬಿಂಬ" ಎಂದು ಕೇಂದ್ರ ಹಣಕಾಸು ಸಚಿವರು ಹೇಳಿದರು.

"ತೆರಿಗೆ ದರ ಕಡಿತ ಮಾಡಿರುವುದು ಗ್ರಾಹಕರ ಅನುಕೂಲಕ್ಕಾಗಿ. ಗೌರವಾನ್ವಿತ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ನಮಗೆ ಮಾರ್ಗದರ್ಶನ ನೀಡಿದ್ದು ಅದನ್ನೇ. 2017 ರಿಂದ ನಾವು ನಿರಂತರವಾಗಿ ಇದನ್ನು ಮಾಡುತ್ತಿದ್ದೇವೆ" ಎಂದು ಶ್ರೀಮತಿ ಸೀತಾರಾಮನ್ ಹೇಳಿದರು.

"ಸೆಪ್ಟೆಂಬರ್ 22 ರಿಂದ, ನಾವು ಎಲ್ಲಾ ವಸ್ತುಗಳ ಬಗ್ಗೆ ವಲಯ ಮಟ್ಟಗಳಿಂದ ಮಾಹಿತಿಯನ್ನು ಪಡೆಯುತ್ತಿದ್ದೇವೆ. ಆದಾಗ್ಯೂ, ಪರಿಷ್ಕೃತ ತೆರಿಗೆ ರಚನೆಯ ಪ್ರಯೋಜನಗಳು ಅಂತಿಮ ಗ್ರಾಹಕರನ್ನು ತಲುಪುತ್ತಿವೆ ಎಂದು ಖಚಿತಪಡಿಸಿಕೊಳ್ಳಲು ನಾವು 54 ಉತ್ಪನ್ನಗಳ ಬೆಲೆಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದೇವೆ. ಮುಂದಿನ ಪೀಳಿಗೆಯ ಜಿ ಎಸ್ ಟಿ ಪ್ರಯೋಜನಗಳನ್ನು ಎಲ್ಲಾ 54 ವಸ್ತುಗಳಿಗೆ ಸಂಪೂರ್ಣವಾಗಿ ವರ್ಗಾಯಿಸಲಾಗಿದೆ" ಎಂದು ಕೇಂದ್ರ ಹಣಕಾಸು ಸಚಿವರು ಹೇಳಿದರು.

ಮುಂದಿನ ಪೀಳಿಗೆಯ ಜಿ ಎಸ್ ಟಿ ಪರಿವರ್ತನೆಯ ಅವಧಿಯಲ್ಲಿ ಹಣಕಾಸು ಸಚಿವಾಲಯದ ಕಂದಾಯ ಇಲಾಖೆಯು ಆಯ್ದ 54 ಉತ್ಪನ್ನಗಳನ್ನು ಸಕ್ರಿಯವಾಗಿ ಮೇಲ್ವಿಚಾರಣೆ ಮಾಡುತ್ತಿದೆ.

ಶ್ರೀ ಪಿಯೂಷ್ ಗೋಯಲ್ ಅವರು, ಸೆಪ್ಟೆಂಬರ್ 22 ರಂದು ಮುಂದಿನ ಪೀಳಿಗೆಯ ಜಿ ಎಸ್ ಟಿ ಜಾರಿಗೆ ತರುವ ಮೂಲಕ ಈ ವರ್ಷದ ನವರಾತ್ರಿಯನ್ನು ವಿಶೇಷವಾಗಿಸಿದ್ದಕ್ಕಾಗಿ ಪ್ರಧಾನಿ ಮತ್ತು ಹಣಕಾಸು ಸಚಿವರಿಗೆ ಕೃತಜ್ಞತೆಗಳನ್ನು ವ್ಯಕ್ತಪಡಿಸಿದರು. ಈ ಸುಧಾರಣೆಯು ದೇಶಾದ್ಯಂತ - ಜನಸಾಮಾನ್ಯರು, ಕೈಗಾರಿಕಾ ಮತ್ತು ವಾಣಿಜ್ಯ ವಲಯಗಳು ಮತ್ತು ಮನೆಗಳಲ್ಲಿ - ಹೊಸ ಉತ್ಸಾಹ ಮತ್ತು ಶಕ್ತಿಯನ್ನು ತಂದಿದೆ ಎಂದು ಅವರು ಹೇಳಿದರು. ಸ್ವಾತಂತ್ರ್ಯದ ನಂತರದ ಅತಿದೊಡ್ಡ ಸುಧಾರಣೆ ಇದು ಎಂದು ಬಣ್ಣಿಸಿದ ಸಚಿವರು, ಪರೋಕ್ಷ ತೆರಿಗೆ ವ್ಯವಸ್ಥೆಯು 140 ಕೋಟಿ ಭಾರತೀಯರ ಮೇಲೆ ಪರಿಣಾಮ ಬೀರುತ್ತದೆ ಮತ್ತು ನೇರ ಮತ್ತು ಪರೋಕ್ಷ ತೆರಿಗೆ ಕ್ರಮಗಳ ಮೂಲಕ 2.5 ಲಕ್ಷ ಕೋಟಿ ರೂ.ಗಳ ಪರಿಹಾರವನ್ನು ನೀಡುವ ನಿರ್ಧಾರವು ಅಭೂತಪೂರ್ವ ಮತ್ತು ಕಲ್ಪನೆಗೆ ಮೀರಿದ್ದು ಎಂದು ಹೇಳಿದರು.

ಈ ವರ್ಷ ಫೆಬ್ರವರಿ 1 ರಂದು ಆದಾಯ ತೆರಿಗೆಯಲ್ಲಿ ಘೋಷಿಸಲಾದ ಪ್ರಮುಖ ಪರಿಹಾರವು ಜನರ ಉಳಿತಾಯವನ್ನು ಉತ್ತೇಜಿಸುವ ಮತ್ತು ಬಳಸಬಹುದಾದ ಆದಾಯವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಒಂದು ಪ್ರಮುಖ ಹೆಜ್ಜೆಯಾಗಿದೆ ಎಂದು ಶ್ರೀ ಗೋಯಲ್ ಒತ್ತಿ ಹೇಳಿದರು. ಪ್ರಧಾನ ಮಂತ್ರಿಯವರ ಮಾರ್ಗದರ್ಶನದಲ್ಲಿ, ಹಣಕಾಸು ಸಚಿವರು ಕಳೆದ ಒಂದೂವರೆ ವರ್ಷದಿಂದ ಸಮಗ್ರ ತೆರಿಗೆ ಸುಧಾರಣೆಗಳ ಮೇಲೆ ಕೆಲಸ ಮಾಡುತ್ತಿದ್ದಾರೆ, ಇದು ಸೆಪ್ಟೆಂಬರ್ 3, 2025 ರಂದು ಘೋಷಣೆಯೊಂದಿಗೆ ಕೊನೆಗೊಂಡಿತು ಎಂದು ಅವರು ಹೇಳಿದರು.

ಈ ಸುಧಾರಣೆಗಳ ಪರಿಣಾಮವು ಈಗಾಗಲೇ ಹೂಡಿಕೆ, ವ್ಯವಹಾರ ಮತ್ತು ಕೈಗಾರಿಕೆಗಳಲ್ಲಿ ಗೋಚರಿಸುತ್ತಿದ್ದು, ಭಾರತೀಯ ಆರ್ಥಿಕತೆಯನ್ನು ಉತ್ತೇಜಿಸುತ್ತದೆ ಮತ್ತು ಗ್ರಾಹಕರ ವೆಚ್ಚವನ್ನು ಹೆಚ್ಚಿಸುತ್ತದೆ ಎಂದು ಶ್ರೀ ಗೋಯಲ್ ಹೇಳಿದರು. ಮೂಲಸೌಕರ್ಯ ಅಭಿವೃದ್ಧಿ ಮತ್ತು ದೈನಂದಿನ ಅಗತ್ಯ ವಸ್ತುಗಳು ಹೆಚ್ಚು ಕೈಗೆಟುಕುವಂತಹ ಪರಿಸ್ಥಿತಿ ನಿರ್ಮಾಣವಾದಾಗ, ಪೂರೈಕೆ ಮತ್ತು ಬೇಡಿಕೆಯಿಂದ ಬರುವ ಉತ್ತೇಜನವು ಆರ್ಥಿಕತೆಯು ವೇಗವಾಗಿ ಬೆಳೆಯಲು ಸಹಾಯ ಮಾಡುತ್ತದೆ, ಭಾರತವನ್ನು ವಿಶ್ವದಲ್ಲೇ ವೇಗವಾಗಿ ಬೆಳೆಯುತ್ತಿರುವ ದೊಡ್ಡ ಆರ್ಥಿಕತೆಯನ್ನಾಗಿ ಮಾಡುತ್ತದೆ ಎಂದು ಶ್ರೀ ಗೋಯಲ್ ಹೇಳಿದರು.

ಶ್ರೀ ಅಶ್ವಿನಿ ವೈಷ್ಣವ್ ಅವರು ಭಾರತದ ಎಲೆಕ್ಟ್ರಾನಿಕ್ಸ್ ಪರಿಸರ ವ್ಯವಸ್ಥೆಯಲ್ಲಿನ ಗಮನಾರ್ಹ ಬೆಳವಣಿಗೆ ಮತ್ತು ಬಳಕೆ, ಹೂಡಿಕೆ ಮತ್ತು ಉತ್ಪಾದನೆಯ ಮೇಲೆ ಜಿ ಎಸ್ ಟಿ ಸುಧಾರಣೆಗಳ ಸಕಾರಾತ್ಮಕ ಗುಣಕ ಪರಿಣಾಮಗಳನ್ನು ಒತ್ತಿ ಹೇಳಿದರು. ದಾಖಲೆಯ ಗ್ರಾಹಕರ ಬೇಡಿಕೆ, ನೀತಿ ಸ್ಥಿರತೆ ಮತ್ತು ವೇಗವಾಗಿ ಬೆಳೆಯುತ್ತಿರುವ ಉತ್ಪಾದನಾ ನೆಲೆಯಿಂದ ಭಾರತೀಯ ಆರ್ಥಿಕತೆಯ ಮೂಲಭೂತ ಅಂಶಗಳು ಬಲಿಷ್ಠವಾಗಿ ಉಳಿದಿವೆ ಎಂದು ಸಚಿವರು ಹೇಳಿದರು.

ಈ ವರ್ಷದ ನವರಾತ್ರಿ ಋತುವಿನಲ್ಲಿ ಎಲೆಕ್ಟ್ರಾನಿಕ್ಸ್ ವಲಯದಲ್ಲಿ ದಾಖಲೆಯ ಮಾರಾಟ ವರದಿಯಾಗಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇ. 20–25 ರಷ್ಟು ಹೆಚ್ಚಳವಾಗಿದೆ ಎಂದು ಶ್ರೀ ವೈಷ್ಣವ್ ಮಾಹಿತಿ ನೀಡಿದರು. ಎಲ್ಲಾ ಪ್ರಮುಖ ಚಿಲ್ಲರೆ ಸರಪಳಿಗಳು ಟೆಲಿವಿಷನ್ ಮತ್ತು ವಾಷಿಂಗ್ ಮೆಷಿನ್ ಗಳಿಂದ ಹಿಡಿದು ಸ್ಮಾರ್ಟ್ಫೋನ್ ಗಳು ಮತ್ತು ಹವಾನಿಯಂತ್ರಣಗಳವರೆಗೆ ಉತ್ಪನ್ನ ವಿಭಾಗಗಳಲ್ಲಿ ಅಭೂತಪೂರ್ವ ಬೇಡಿಕೆಯನ್ನು ವರದಿ ಮಾಡಿವೆ. ಗಮನಾರ್ಹವಾಗಿ, 85-ಇಂಚಿನ ಟೆಲಿವಿಷನ್ ಗಳು ಸಂಪೂರ್ಣವಾಗಿ ಮಾರಾಟವಾಗಿವೆ ಮತ್ತು ಅನೇಕ ಕುಟುಂಬಗಳು ತಮ್ಮ ಉಪಕರಣಗಳನ್ನು ಹೊಸ ಮಾದರಿಗಳಿಗೆ ನವೀಕರಿಸಿವೆ, ಇದು ಗ್ರಾಹಕರ ವಿಶ್ವಾಸ ಮತ್ತು ಖರೀದಿ ಶಕ್ತಿಯನ್ನು ಹೆಚ್ಚಿಸಿರುವುದನ್ನು ಪ್ರತಿಬಿಂಬಿಸುತ್ತದೆ ಎಂದು ಅವರು ಹೇಳಿದರು.

ಜಿ ಎಸ್ ಟಿ ಸುಧಾರಣೆಗಳು ಆರ್ಥಿಕತೆಗೆ ರಚನಾತ್ಮಕ ಸ್ಥಿರತೆಯನ್ನು ತಂದಿವೆ, ವಿಶೇಷವಾಗಿ ಆಹಾರ ಹಣದುಬ್ಬರವನ್ನು ನಿಯಂತ್ರಿಸುವ ಮೂಲಕ ಮಧ್ಯಮ ವರ್ಗದ ಕುಟುಂಬಗಳಿಗೆ ಪ್ರಯೋಜನವನ್ನು ನೀಡಿವೆ ಎಂದು ಶ್ರೀ ವೈಷ್ಣವ್ ಹೇಳಿದರು. ಕಳೆದ ನಾಲ್ಕು ಸತತ ತಿಂಗಳುಗಳಲ್ಲಿ, ಆಹಾರ ಬೆಲೆಗಳು ಸುಮಾರು ಶೇ.2 ರಷ್ಟು ಹಣದುಬ್ಬರವಿಳಿತದ ಪ್ರವೃತ್ತಿಯನ್ನು ತೋರಿಸಿವೆ, ಇದು ಕುಟುಂಬದ ಖರೀದಿ ಶಕ್ತಿಯನ್ನು ಕಾಪಾಡಿಕೊಳ್ಳಲು ಮತ್ತು ನಿರಂತರ ಗ್ರಾಹಕರ ಬೇಡಿಕೆಯನ್ನು ಉಳಿಸಿಕೊಳ್ಳಲು ಸಹಾಯ ಮಾಡುತ್ತದೆ ಎಂದು ಅವರು ಹೇಳಿದರು.

ಬೇಡಿಕೆಯಲ್ಲಿನ ಏರಿಕೆಯು ಭಾರತದ ಎಲೆಕ್ಟ್ರಾನಿಕ್ಸ್ ಉತ್ಪಾದನಾ ವಲಯದಲ್ಲಿ ಎರಡಂಕಿಯ ಬೆಳವಣಿಗೆಗೆ ನೇರವಾಗಿ ಕಾರಣವಾಗಿದೆ, ಇದು ದೇಶಾದ್ಯಂತ 25 ಲಕ್ಷಕ್ಕೂ ಹೆಚ್ಚು ಜನರಿಗೆ ಉದ್ಯೋಗವನ್ನು ಸೃಷ್ಟಿಸಿದೆ ಎಂದು ಶ್ರೀ ವೈಷ್ಣವ್ ಹೇಳಿದರು. ವಿಶ್ವದ ಅತಿದೊಡ್ಡ ಗ್ರಾಹಕ ಮಾರುಕಟ್ಟೆಗಳಲ್ಲಿ ಒಂದಾದ ಅಮೆರಿಕಕ್ಕೆ ಸ್ಮಾರ್ಟ್ಫೋನ್ ರಫ್ತಿನಲ್ಲಿ ಭಾರತವು ತನ್ನ ನೆರೆಯ ದೇಶವನ್ನು ಮೀರಿಸಿದೆ. ಒಂದು ಪ್ರಮುಖ ಜಾಗತಿಕ ಕಂಪನಿಯು ಈಗ ತನ್ನ ಒಟ್ಟು ಉತ್ಪಾದನೆಯ ಶೇ.20 ರಷ್ಟನ್ನು ಭಾರತದಲ್ಲಿ ಉತ್ಪಾದಿಸುತ್ತದೆ, ಇದು ದೇಶವು ಆದ್ಯತೆಯ ಜಾಗತಿಕ ಉತ್ಪಾದನಾ ತಾಣವಾಗಿ ಹೊರಹೊಮ್ಮುತ್ತಿರುವುದನ್ನು ಪ್ರತಿಬಿಂಬಿಸುತ್ತದೆ. ಬೇಡಿಕೆ ಹೆಚ್ಚಾದಂತೆ, ಹೂಡಿಕೆ ಹೆಚ್ಚಾಗುತ್ತದೆ ಮತ್ತು ಪ್ರತಿಯಾಗಿ, ಬೇಡಿಕೆಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ - ಆರ್ಥಿಕ ಬೆಳವಣಿಗೆಯ ಚಕ್ರವನ್ನು ಸೃಷ್ಟಿಸುತ್ತದೆ ಎಂದು ಅವರು ಹೇಳಿದರು.

ಭಾರತದ ತಂತ್ರಜ್ಞಾನ ಪರಿಸರ ವ್ಯವಸ್ಥೆಯಲ್ಲಿ ಮಹತ್ವದ ಮೈಲಿಗಲ್ಲಿನ ಕುರಿತು ಮಾತನಾಡಿದ ಶ್ರೀ ವೈಷ್ಣವ್, ಸಿಜಿ ಸೆಮಿ ಮತ್ತು ಕೇನ್ಸ್ ಎಂಬ ಎರಡು ಸೆಮಿಕಂಡಕ್ಟರ್ ಉತ್ಪಾದನಾ ಸೌಲಭ್ಯಗಳಲ್ಲಿ ಉತ್ಪಾದನೆ ಪ್ರಾರಂಭವಾಗಿದೆ, ಇದು ಸೆಮಿಕಂಡಕ್ಟರ್ ಗಳಲ್ಲಿ ಸ್ವಾವಲಂಬನೆಯತ್ತ ಭಾರತದ ಪ್ರಯಾಣದಲ್ಲಿ ಮಹತ್ವದ ಹೆಜ್ಜೆಯಾಗಿದೆ ಎಂದು ಹೇಳಿದರು. ಈ ಘಟಕಗಳ ಕಾರ್ಯಾರಂಭದೊಂದಿಗೆ, ಭಾರತವು ತನ್ನ ಸೆಮಿಕಂಡಕ್ಟರ್ ಪರಿಸರ ವ್ಯವಸ್ಥೆಯಲ್ಲಿ ಹೊಸ ಹಂತವನ್ನು ಪ್ರವೇಶಿಸಿದೆ, ಇದು ಪ್ರಧಾನ ಮಂತ್ರಿಯವರ ತಂತ್ರಜ್ಞಾನ-ಸಶಕ್ತ ಮತ್ತು ಸ್ವಾವಲಂಬಿ ಭಾರತದ ದೃಷ್ಟಿಕೋನಕ್ಕೆ ಅನುಗುಣವಾಗಿದೆ ಎಂದು ಅವರು ಹೇಳಿದರು.

ಸ್ಥೂಲ ಆರ್ಥಿಕ ದತ್ತಾಂಶವನ್ನು ಉಲ್ಲೇಖಿಸಿದ ಶ್ರೀ ವೈಷ್ಣವ್, ಕಳೆದ ವರ್ಷ ಭಾರತದ ₹335 ಲಕ್ಷ ಕೋಟಿ ಜಿಡಿಪಿಯಲ್ಲಿ ₹202 ಲಕ್ಷ ಕೋಟಿ ಬಳಕೆಯಿಂದ ಮತ್ತು ₹98 ಲಕ್ಷ ಕೋಟಿ ಹೂಡಿಕೆಯಿಂದ ಬಂದಿದೆ ಎಂದು ಹೇಳಿದರು. ಜಿ ಎಸ್ ಟಿ ಸುಧಾರಣೆಗಳ ಪರಿಣಾಮವು ಸ್ಪಷ್ಟವಾಗಿ ಗೋಚರಿಸುತ್ತಿದೆ, ಏಕೆಂದರೆ ಈ ವರ್ಷ ಬಳಕೆ ಸುಮಾರು ಶೇ.10 ರಷ್ಟು ಹೆಚ್ಚಾಗಿದೆ, ಇದು ಗ್ರಾಹಕ ವೆಚ್ಚದಲ್ಲಿ ಹೆಚ್ಚುವರಿ ₹20 ಲಕ್ಷ ಕೋಟಿಗಳನ್ನು ಪ್ರತಿಬಿಂಬಿಸುತ್ತದೆ. ಈ ಹೆಚ್ಚಳವು ಹೂಡಿಕೆಗಳಲ್ಲಿ ಅನುಗುಣವಾದ ಏರಿಕೆಗೆ ಕಾರಣವಾಗುತ್ತದೆ ಎಂದು ನಿರೀಕ್ಷಿಸಲಾಗಿದೆ, ಬೆಳವಣಿಗೆಯ ಆವೇಗವನ್ನು ಬಲಪಡಿಸುತ್ತದೆ ಮತ್ತು ಜಿ ಎಸ್ ಟಿ ಸುಧಾರಣೆಗಳು ಆರ್ಥಿಕತೆಯಲ್ಲಿ ಬಳಕೆ ಮತ್ತು ಹೂಡಿಕೆಯ ನಡುವಿನ ಸಂಪರ್ಕವನ್ನು ಹೇಗೆ ಬಲಪಡಿಸಿವೆ ಎಂಬುದನ್ನು ತೋರಿಸುತ್ತದೆ ಎಂದು ಶ್ರೀ ವೈಷ್ಣವ್ ಹೇಳಿದರು.

ಜಿ ಎಸ್‌ ಟಿ ಉಳಿತಾಯ ಉತ್ಸವ ಪತ್ರಿಕಾಗೋಷ್ಠಿಯನ್ನು ಇಲ್ಲಿ ವೀಕ್ಷಿಸಿ:

https://www.youtube.com/watch?v=a610oNnYsak

ಸಾಮಾಜಿಕ ಮಾಧ್ಯಮದಲ್ಲಿನ ಇತರ ಪೋಸ್ಟ್‌ ಗಳು:

https://x.com/nsitharamanoffc/status/1979477378783952935

https://x.com/nsitharamanoffc/status/1979483460428275964

https://x.com/nsitharamanoffc/status/1979490241590288400

https://x.com/nsitharamanoffc/status/1979490887940874583

https://x.com/nsitharamanoffc/status/1979492109221597574

https://x.com/AshwiniVaishnaw/status/1979493163481079993

https://x.com/PiyushGoyal/status/1979448718798786664

https://x.com/PiyushGoyal/status/1979476359177982128

https://x.com/PiyushGoyal/status/1979479118283489330

https://x.com/PiyushGoyal/status/1979493568189288510

https://x.com/PiyushGoyal/status/1979500837585174862

https://x.com/mib_india/status/1979477488905380206

https://x.com/mib_india/status/1979474778185400593

https://x.com/mib_india/status/1979491958130393454

https://x.com/mib_india/status/1979487257817227633

*****