প্ৰধানমন্ত্ৰী নৰেন্দ্ৰ মোদীয়ে ২০২৪ চনৰ ২ অক্টোবৰত ঝাৰখণ্ড ভ্ৰমণ কৰিব। দিনৰ প্ৰায় ২ বজাত তেওঁ ঝাৰখণ্ডৰ হাজাৰিবাগত ৮৩,৩০০ কোটি টকাৰ বিভিন্ন প্ৰকল্পৰ আধাৰশিলা স্থাপন, মুকলি আৰু উদ্বোধন কৰিব।

দেশজুৰি জনজাতীয় সম্প্ৰদায়ৰ সৰ্বাংগীন আৰু সামগ্ৰিক বিকাশ সুনিশ্চিত কৰাৰ প্ৰতিশ্ৰুতি অনুসৰি, প্ৰধানমন্ত্ৰীয়ে ৭৯,১৫০ কোটি টকাৰ মুঠ ব্যয়ৰে 'ধৰতি আবা জনজাতিয়া গ্ৰাম উৎকৰ্ষ অভিযান'ৰ শুভাৰম্ভ কৰিব। এই অভিযানে প্ৰায় ৬৩,০০০খন গাঁও সামৰি ল'ব যিয়ে ৩০খন ৰাজ্য আৰু কেন্দ্ৰীয় শাসিত অঞ্চলৰ ৫৪৯খন জিলা আৰু ২,৭৪০ খণ্ডত ৫ কোটি জনজাতীয় লোকক উপকৃত কৰিব। ইয়াৰ লক্ষ্য হৈছে সামাজিক আন্তঃগাঁথনি, স্বাস্থ্য, শিক্ষা, জীৱিকাৰ ক্ষেত্ৰত থকা গুৰুত্বপূৰ্ণ ব্যৱধানসমূহ দূৰ কৰা। ইয়াৰ বাবে ১৭টা মন্ত্ৰালয় আৰু বিভাগে ২৫টা পদক্ষেপ গ্ৰহণ কৰিছে।

জনজাতীয় সম্প্ৰদায়সমূহৰ বাবে শৈক্ষিক আন্তঃগাঁথনিৰ বিকাশৰ বাবে প্ৰধানমন্ত্ৰীয়ে ৪০খন একলাভিয়া মডেল আৱাসিক বিদ্যালয় (ইএমআৰএছ) উদ্বোধন কৰিব আৰু ২,৮০০ কোটি টকাৰ ২৫খন ইএমআৰএছৰ আধাৰশিলা স্থাপন কৰিব।

প্ৰধানমন্ত্ৰীয়ে ১৩৬০ কোটি টকাৰ অধিক মূল্যৰ প্ৰধানমন্ত্ৰী জনজাতি আদিবাসী ন্যায্য মহা অভিযানৰ (পিএম-জনমান) অধীনত একাধিক প্ৰকল্প উদ্বোধন আৰু আধাৰশিলা স্থাপন কৰিব। ইয়াত ১৩৮০ কিলোমিটাৰতকৈও অধিক পথ, ১২০টা অংগনৱাড়ী, ২৫০টা বহুমুখী কেন্দ্ৰ আৰু ১০খন বিদ্যালয় হোষ্টেল অন্তৰ্ভুক্ত আছে। তদুপৰি, তেওঁ পিএম জনমানৰ অধীনত কেইবাটাও গুৰুত্বপূৰ্ণ সাফল্য উন্মোচন কৰিব, য'ত প্ৰায় ৩০০০খন গাঁৱৰ ৭৫,৮০০তকৈ অধিক বিশেষভাৱে দুৰ্বল জনজাতীয় গোষ্ঠীৰ (পিভিটিজি) পৰিয়ালক বিদ্যুতীকৰণ কৰা, ২৭৫টা ম'বাইল চিকিৎসা ইউনিট কাৰ্যকৰী কৰা, ৫০০টা অংগনবাড়ী কেন্দ্ৰ কাৰ্যকৰী কৰা, ২৫০টা বন ধন বিকাশ কেন্দ্ৰ স্থাপন কৰা আৰু ৫৫৫০খনতকৈ অধিক পিভিটিজি গাঁৱক 'নল-জল' যোগান ধৰা অন্তৰ্ভুক্ত।

MJPS/SR