প্ৰধানমন্ত্ৰী শ্ৰী নৰেন্দ্ৰ মোদীয়ে আজি জাৰ্মানীৰ ষ্টুটগাৰ্টত অনুষ্ঠিত নিউজ৯ গ্ল’বেল ছামিটত ভিডিঅ’ কনফাৰেন্সিঙৰ জৰিয়তে ভাষণ আগবঢ়ায়। সভাত ভাষণ প্ৰদান কৰি প্ৰধানমন্ত্ৰী মোদীয়ে কয় যে এই সন্মিলন ভাৰত-জাৰ্মান অংশীদাৰিত্বৰ এক নতুন অধ্যায়ৰ সংযোজন। প্ৰধানমন্ত্ৰীয়ে কয়, ‘আজিৰ তথ্য যুগত ভাৰতৰ এটা মিডিয়া গ্ৰুপে জাৰ্মানী আৰু জাৰ্মান জনসাধাৰণৰ সৈতে সংযোগ স্থাপনৰ প্ৰয়াস কৰাত মই সুখী অনুভৱ কৰিছো। ইয়াৰ দ্বাৰা ভাৰতৰ জনসাধাৰণে জাৰ্মানী আৰু জাৰ্মানৰ জনসাধাৰণক বুজিবলৈও এক মঞ্চ প্ৰদান কৰিব।”

প্ৰধানমন্ত্ৰীয়ে উল্লেখ কৰে যে ভাৰতৰ টিভি৯ৰ উদ্যোগত এফএইউ জাৰ্মানীৰ ষ্টুটগাৰ্ট আৰু বেডেন-উৰ্টেমবাৰ্গৰ সহযোগত এই সন্মিলন আয়োজন কৰা হয়। সন্মিলনৰ বিষয়বস্তু হৈছে "ভাৰত-জাৰ্মানী: বহনক্ষম বৃদ্ধিৰ বাবে এক ৰোডমেপ," যিয়ে ভাৰত আৰু জাৰ্মানীৰ মাজৰ দায়িত্বশীল অংশীদাৰিত্বক প্ৰতিফলিত কৰে বুলি প্ৰধানমন্ত্ৰীয়ে মন্তব্য কৰে। প্ৰধানমন্ত্ৰীয়ে কয় যে বিগত দুদিনত উপস্থিত লোকসকলে অৰ্থনৈতিক বিষয়সমূহৰ লগতে ক্ৰীড়া আৰু মনোৰঞ্জনৰ সৈতে জড়িত বিষয়সমূহৰ ওপৰত ফলপ্ৰসূ আলোচনাত লিপ্ত হৈছে, দুয়োখন দেশৰ মাজত সহযোগিতাৰ বহল পৰিসৰক উজ্জ্বল কৰি তুলিছে।

প্ৰধানমন্ত্ৰী শ্ৰী নৰেন্দ্ৰ মোদীয়ে ভাৰতৰ বাবে ইউৰোপৰ কৌশলগত গুৰুত্ব, বিশেষকৈ ভূ-ৰাজনৈতিক সম্পৰ্ক, বাণিজ্য আৰু বিনিয়োগৰ ওপৰত গুৰুত্ব আৰোপ কৰে। জাৰ্মানী ভাৰতৰ অন্যতম মূল অংশীদাৰ। ২০২৪ বৰ্ষত ভাৰত-জাৰ্মান কৌশলগত অংশীদাৰিত্বৰ ২৫ বছৰ সম্পূৰ্ণ হ’ল, যাৰ ফলত ই এক ঐতিহাসিক বছৰ হিচাপে পৰিগণিত হৈছে। প্ৰধানমন্ত্ৰীয়ে চেন্সেলৰ শ্ব’লজৰ তৃতীয় ভাৰত ভ্ৰমণ আৰু ১২ বছৰৰ পাছত দিল্লীত অনুষ্ঠিত এছিয়া-পেচিফিক জাৰ্মান ব্যৱসায়ী সন্মিলনকে ধৰি উল্লেখযোগ্য অনুষ্ঠানসমূহৰ ওপৰত আলোকপাত কৰে। জাৰ্মানীয়ে "ফ'কাচ অন ইণ্ডিয়া" নথি আৰু ইয়াৰ প্ৰথমখন দেশ নিৰ্দিষ্ট "ভাৰতৰ বাবে দক্ষ শ্ৰমিক কৌশলো" প্ৰকাশ কৰে, যাৰ ফলত দ্বিপাক্ষিক সম্পৰ্ক আৰু অধিক শক্তিশালী হয় বুলি লগতে কয় প্ৰধানমন্ত্ৰীয়ে।

প্ৰধানমন্ত্ৰীয়ে কয় যে ভাৰত-জাৰ্মান কৌশলগত অংশীদাৰিত্ব ২৫ বছৰ ধৰি চলি আছে যদিও দুয়োখন দেশৰ মাজৰ সম্পৰ্ক শতাব্দী প্ৰাচীন। উল্লেখযোগ্য যে এগৰাকী জাৰ্মানে ইউৰোপৰ প্ৰথম সংস্কৃত ব্যাকৰণ গ্ৰন্থ সৃষ্টি কৰিছিল আৰু জাৰ্মান বণিকসকলে ইউৰোপত তামিল আৰু তেলেগু ছপাৰ প্ৰৱৰ্তন কৰিছিল। প্ৰধানমন্ত্ৰীয়ে কয়, “আজি জাৰ্মানীত প্ৰায় ৩ লাখ ভাৰতীয়ই বসবাস কৰে, তাত ৫০ হাজাৰ ভাৰতীয় ছাত্ৰ-ছাত্ৰীয়ে অধ্যয়ন কৰে। ভাৰতত যোৱা ৩-৪ বছৰত ১৮০০ৰো অধিক জাৰ্মান কোম্পানীয়ে ১৫ বিলিয়ন ডলাৰ বিনিয়োগ কৰিছে।” দেশসমূহৰ মাজত দ্বিপাক্ষিক বাণিজ্য প্ৰায় ৩৪ বিলিয়ন ডলাৰ আৰু শক্তিশালী অংশীদাৰিত্বৰ বাবে অনাগত বছৰবোৰত এই বাণিজ্য বৃদ্ধি পাই থাকিব বুলি প্ৰধানমন্ত্ৰীয়ে লগতে কয়।

প্ৰধানমন্ত্ৰীয়ে ভাৰতক বিশ্বৰ আটাইতকৈ দ্ৰুতগতিত বৃদ্ধি পোৱা বৃহৎ অৰ্থনীতি হিচাপে গুৰুত্ব আৰোপ কৰে, যাৰ সৈতে বিশ্বৰ বৃদ্ধিৰ বাবে অংশীদাৰিত্বৰ আগ্ৰহ আছে। জাৰ্মানীৰ "ফ'কাচ অন ইণ্ডিয়া" নথিখনে ভাৰতৰ কৌশলগত গুৰুত্বক বিশ্বই স্বীকৃতি দিয়াৰ প্ৰতিফলন ঘটায়। এই পৰিৱৰ্তনৰ কাৰণ হৈছে বিগত দশকত ভাৰতৰ সংস্কাৰ, যিয়ে ব্যৱসায়িক পৰিস্থিতিৰ উন্নতি সাধন কৰিছে, আমোলাতন্ত্ৰ হ্ৰাস কৰিছে আৰু বিভিন্ন খণ্ডত নীতি আধুনিকীকৰণ কৰিছে। মূল সংস্কাৰৰ ভিতৰত জিএছটিৰ সৈতে কৰ ব্যৱস্থা সৰল কৰা, ৩০ হাজাৰৰো অধিক বাধ্যবাধতা আঁতৰোৱা, বেংকিং খণ্ডক সুস্থিৰ কৰা আদি অন্তৰ্ভুক্ত বুলি প্ৰধানমন্ত্ৰীয়ে বিশদভাৱে কয়। প্ৰধানমন্ত্ৰী মোদীয়ে লগতে কয় যে এই প্ৰচেষ্টাসমূহে ভাৰতৰ ভৱিষ্যত উন্নয়নৰ বাবে এক শক্তিশালী ভেটি স্থাপন কৰিছে, জাৰ্মানীয়ে এই যাত্ৰাৰ মূল অংশীদাৰ হিচাপে অব্যাহত ৰাখিছে।

প্ৰধানমন্ত্ৰীয়ে উৎপাদন আৰু অভিযান্ত্ৰিক ক্ষেত্ৰত জাৰ্মানীৰ নিজা উন্নয়নৰ সমান্তৰালতা অৰ্জন কৰি বিশ্বৰ এক প্ৰধান উৎপাদন কেন্দ্ৰ হোৱাৰ দিশত ভাৰতৰ অগ্ৰগতিৰ ওপৰত আলোকপাত কৰে। "মেক ইন ইণ্ডিয়া" পদক্ষেপৰ অধীনত দেশখনে উৎপাদকসকলক উৎপাদন সম্পৰ্কীয় প্ৰৰোচনা আগবঢ়াইছে। ভাৰতে উল্লেখযোগ্য অগ্ৰগতি লাভ কৰিছে, মোবাইল আৰু ইলেক্ট্ৰনিকছ নিৰ্মাণৰ ক্ষেত্ৰত আগশাৰীৰ দেশ, দুচকীয়া বাহনৰ বিশ্বৰ সৰ্ববৃহৎ উৎপাদনকাৰী আৰু তীখা আৰু চিমেণ্টৰ দ্বিতীয় বৃহত্তম উৎপাদনকাৰী দেশ হিচাপে পৰিগণিত হৈছে। এই পৰিৱৰ্তনে বিশ্ব উৎপাদন ক্ষেত্ৰত ভাৰতৰ ক্ৰমবৰ্ধমান গুৰুত্ব চিহ্নিত কৰিছে।

প্ৰধানমন্ত্ৰীয়ে লগতে কয় যে ভাৰত চতুৰ্থ বৃহত্তম চাৰিচকীয়া বাহনৰ নিৰ্মাতা দেশ আৰু ইয়াৰ অৰ্ধপৰিবাহী উদ্যোগ বিশ্বব্যাপী সফলতাৰ বাবে সাজু হৈছে। এই অগ্ৰগতিৰ কাৰণ হৈছে আন্তঃগাঁথনি উন্নত কৰা, লজিষ্টিক খৰচ হ্ৰাস কৰা, ব্যৱসায়িক কাৰ্য্যকলাপ সহজ কৰা আৰু সুস্থিৰ শাসন ব্যৱস্থা নিশ্চিত কৰাৰ লক্ষ্যই হৈছে শেহতীয়া চৰকাৰী নীতি। ভাৰতে ভৌতিক, সামাজিক আৰু ডিজিটেল আন্তঃগাঁথনিৰ ক্ষেত্ৰত দ্ৰুত অগ্ৰগতি লাভ কৰিছে, যাৰ ফলত ইয়াৰ উদ্ভাৱনীমূলক ডিজিটেল প্ৰযুক্তিৰ পৰা উল্লেখযোগ্য বিশ্বব্যাপী প্ৰভাৱ পৰিছে। ভাৰতে এতিয়া বিশ্বৰ আটাইতকৈ অনন্য ডিজিটেল ৰাজহুৱা আন্তঃগাঁথনিৰ গৌৰৱ কৰিছে।

প্ৰধানমন্ত্ৰী শ্ৰী নৰেন্দ্ৰ মোদীয়ে ভাৰতত ইতিমধ্যে প্ৰতিষ্ঠিত জাৰ্মান কোম্পানীসমূহক বিনিয়োগ বৃদ্ধি কৰিবলৈ উৎসাহিত কৰি এতিয়াও উপস্থিত নোহোৱাসকলক ভাৰতীয় বজাৰত প্ৰৱেশৰ কথা চিন্তা কৰিবলৈ আমন্ত্ৰণ জনায়। ভাৰতৰ বিকাশৰ লগত খোজ মিলোৱাৰ এইটোৱেই উপযুক্ত সময় বুলি দৃঢ়তাৰে উল্লেখ কৰি প্ৰধানমন্ত্ৰীয়ে ভাৰতৰ গতিশীলতা আৰু জাৰ্মানীৰ নিখুঁততা, অভিযান্ত্ৰিক, উদ্ভাৱনৰ মাজত অংশীদাৰিত্বৰ আহ্বান জনায়। প্ৰধানমন্ত্ৰী শ্ৰী নৰেন্দ্ৰ মোদীয়ে তেওঁৰ ভাষণৰ সামৰণিত কেনেকৈ এখন প্ৰাচীন সভ্যতা হিচাপে ভাৰতে বিশ্ব অংশীদাৰিত্বক সদায় আদৰণি জনাই আহিছে সেই বিষয়ে কয় আৰু বিশ্বৰ এক সমৃদ্ধিশালী ভৱিষ্যত গঢ়ি তোলাত সকলোকে যোগদান কৰিবলৈ আমন্ত্ৰণ জনাইছে।

***

MJPS/VJ/DB