প্রধানমন্ত্রীগী লোইশঙ
প্রধান মন্ত্রী নরেন্দ্র মোদী ন্যুজ ৯ গ্লোবেল সম্মিত্তা ৱা ঙাংখ্রে
সম্মিৎ অসি ইন্দো-জর্মন পার্তনরশিপকী অনৌবা পন্দুব অমা হাংদোকপনি: প্রধান মন্ত্রী
২০২৪ দা ইন্দো-জর্মন স্ত্রাতেজি পার্তনরশিপ চহি ২৫ মপুংফারে, মসি পুৱারি ওইরবা চহি অমনি: প্রধান মন্ত্রী
জর্মনিগী “ফোকস ওন ইন্দিয়া” দোকুমেন্তদা ভারতকী মরুওইবা মালেম্না মশক খঙবগী মমি তারে: প্রধান মন্ত্রী
ভারত শিংথাবা য়ানা চাউখৎলে, মোবাইল অমসুং ইলেক্ত্রোনিক্স মেনুফেকচরিংদা মাংজিল থাবা লৈবাক অমা ওইরে: প্রধান মন্ত্রী
ফিজিকেল, সোসিএল অমসুং দিজিতেল ইনফ্রাস্ত্রকচরদা ভারত য়াংনা চাউখৎলক্লি: প্রধান মন্ত্রী
ভারতকী মপাঙ্গল অমসুং জমর্নিগী থবক হৈবগী মরক্ত পুনশিন্নবা প্রধান মন্ত্রীনা তকশিল্লি
Posted On:
22 NOV 2024 11:23PM by PIB Imphal
ঙসি প্রধান মন্ত্রী শ্রী নরেন্দ্র মোদী ভিদিও কনফরেন্সকী খুৎথাংদা জর্মনিগী স্তুতগার্দতা পাংথোকখিবা ন্যুজ ৯ গ্লোবেল সম্মিত্তা ৱা ঙাংখ্রে। মীফম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি সম্মিৎ অসি ইন্দো-জর্মন পার্তনরশিপকী অনৌবা পন্দুব অমা হাংদোকপনি। ঙসিগী ই-পাউগী যুগ অসিদা ভারতকী মেদিয়া গ্রুপ অমনা জর্মনি অমসুং জর্মনগী মীয়ামগা শম্ননবা হোৎনবা অসিদা ঐ হরাওই। মসিনা ভারতকী মীয়াম্না জর্মনি অমসুং জর্মনিগী মীয়াম মশক খঙনবগী মফম অমা পীরগনি।
প্রধান মন্ত্রীনা হায়খি সম্মিৎ অসি ভারতকী তি.ভি ৯ অমসুং এফ.এ.য়ু স্তুতগার্দ অমসুং বাদেন-উরত্তেমবার্গনা জর্মনিদা পাংথোকপনি। সম্মিৎ অসিগী থিমদি ‘ ইন্দিয়া-জর্মনি: তুংকোইনা চৎনবা য়াগদবা চাউখৎ-থৌরাংগী লম্বী অমা শেম্বা’ হায়বনি, মসিদা ভারত অমসুং জর্মনিগী মরক্তা দাইত্ব খঙনবা মরুপ ওইবগী মমি তারে। হৌখিবা নুমিৎ নিনিদা সম্মিৎ শরুক য়াখিবশিংনা শেন-থুম, শান্নবা অমসুং হরাও-কুম্মৈগী হিরমশিংদা লৈবাক অনিগী মরক্তা মতেং পাংনবগী মতাংদা খন্নখ্রে।
প্রধান মন্ত্রীনা হায়খি জর্মনি ভারতকী মরুওইবা মরুপ অমা ওইনা, ললোন-ইতিক অমসুং শেন থাদবা অমসুং মালেমগী রাজনিতিগী মরীশিংদা য়ুরোপ অসি ভারতকী ওইনা য়াম্না মরুওই। ২০২৪ দা ইন্দো-জর্মন স্ত্রাতেজি পার্তনরশিপ চহি ২৫ মপুংফারে, মসি পুৱারি ওইরবা চহি অমনি। চান্সেল্লর স্কোলজগী ভারতকী অহুমশুবা খোঙচৎ পাংথোকখ্রে অমসুং চহি ১২ গী মতুংদা দিল্লিদা জর্মনি ব্যুজিনেসশিংগী এসিয়া-পেসিফিক কনফরেন্স পাংথোকখ্রে। জর্মনিনা “ফোকস ওন ইন্দিয়া” দোকুমেন্ত ফোঙখ্রে অমসুং মসি অকক্নবা লৈবাক অমগী ফোঙবা অহানবনি। ভারতকীদমক খুৎশা-হৈবা শিন্মীগী লাল্লোং অসিনা লৈবাক অনিগী মরী মখা তানা ফগৎহনগনি।
প্রধান মন্ত্রীনা হায়খি ইন্দো-জর্মনি স্ত্রাতেজিক পার্তনরশিপ চহি ২৫ মপুংফারকপগা লোয়ননা, লৈবাক অনিগী মরক্তা মরী লৈনরকপা অসি চহি চা কয়া শুরে। জর্মন অমনা য়ুরোপকী অহানবা সংস্কৃত গ্রাম্মার লাইরিক পুথোকখি অমসুং জমর্নি ললোনবশিংনা য়ুরোপতা তামিল অমসুং তেলুগু প্রিন্তিং মশক তাকখি। হৌজিক, জর্মনিদা ভারতমচা ৩০০,০০০ রোম লৈরি অমসুং ভারতকী মহৈরোয় ৫০,০০০ রোম লৈবাক অসিদা লাইরিক তম্লি। হৌখিবা চহি ৩-৪ দা ভারত্তা জর্মন কম্পেনি ১,৮০০ হেনবনা দোল্লর বিল্লিয়ন ১৫ থাদরে। লৈবাক অনিগী ললোন-ইতিক চাউরাক্না দোল্লর বিল্লিয়ন ৩৪ য়ৌরে অমসুং মরুপ-মপাংগী মরী মপাঙ্গল কনখৎলকপদগী লাক্লিবা চহিশিংদা মখা তানা ললোন-ইতিক চাউখৎলক্লগনি।
প্রধান মন্ত্রীনা হায়খি ভারত মালেমদা য়াংনা চাউখৎলক্লিবা ইকোনোমি ওইরকপদগী, চাউখৎলকপা অসিদা পুন্না চৎমিন্ননিংবগী অপাম্বা মালেমগী লৈবাকশিংদা লৈরে। জর্মনিগী “ফোকস ওন ইন্দিয়া” দোকুমেন্তদা ভারতকী মরুওইবা মালেম্না মশক খঙবগী মমি তারে। হৌখিবা চহি ১০ দা ভারত্তা অহোংবা কয়া পুরকপদগী ললোন-ইতিক্কী ফিবমশিং ফগৎলে, ৱাচৎ-ৱানোমগী থবক হন্থরে অমসুং হিরম কয়াদা অনৌবা থৌশিলশিং চৎনরে। মরুওইবা অওনবশিংগী মনুংদা জি.এস.তিগা লোয়ননা তেক্সকী থবক লাইথোকহনবা, কমপ্লাইয়েন্স ৩০,০০০ হেন্না মুৎথৎপা অমসুং বেঙ্কগী থবকশিংদা তংদু-লৈতাবা পুরকপা অসিনি। খোঙচৎ অসিদা জর্মনি মখা তানা মরুওইবা মরুপ খোঙলোই অমা ওইদুনা, হায়রিবা থবকশিং অসিনা ভারতকী তুংলমচৎ চাউখৎনবা অকনবা য়ুম্ফম অমা থোল্লে।
প্রধান মন্ত্রীনা হায়খি মালেমগী মরুওইবা মেনুফেকচরিংগী মফম অমা ওইনবা মাইকৈদা ভারতনা চাউখৎলক্লিবা অসিগা, জর্মনি মশাগী মেনুফেকচরিং অমসুং ইঞ্জনিয়ারিংগী চাউখৎপা অসিগা মান্নরে। “মেক ইন ইন্দিয়া” থবক্কী মখাদা, লৈবাক অসিনা মেনুফেকচররশিংদা প্রদক্সন-লিঙ্ক ইন্সেন্তিপশিং পীরে। ভারত শিংথাবা য়ানা চাউখৎলে, মোবাইল অমসুং ইলেক্ত্রোনিক্স মেনুফেকচরিংদা মাংজিল থাবা লৈবাক অমা ওইরে, মালেমদা খ্বাইদগী য়াম্না চকা অনি পানবা গারি পুথোকপা লৈবাক ওইরে অমসুং স্তিল অমসুং সিমেন্ত পুথোকপা অনিশুবা খ্বাইদগী চাউবা লৈবাক ওইরে। মসিগী অওনবা অসিনা মালেমগী মেনুফেকচরিংদা ভারতকী মরুওইবা হেনগৎলকপা অদু উৎলে।
প্রধান মন্ত্রীনা মখা তানা হায়খি চকা মরি পানবা গারিশিং পুথোকপদা ভারত মরিশুবা মফমদা লৈরি অমসুং লৈবাক অসিগী সেমিকন্দক্তর ইন্দস্ত্রি মালেমগী ওইনা মাইপাক্নবা থৌরাং তৌরে। ইনফ্রাস্ত্রকচর চাউখৎনবা, পুথোক-পুশিনগী চাদিং হন্থহন্নবা, ললোন-ইতিক্কী থবকশিং লাইথোকহন্নবা পান্দম থম্বা সরকারগী থৌশিলশিং অমসুং তংদু-লৈতাবা সরকার পুরকপদগী চাউখৎলকপা ঙম্বনি। লৈবাক অসিগী অনৌবা দিজিতেল তেক্নোলোজিশিংনা মালেমদা ইথিল অমা পীবগা লোয়ননা, ফিজিকেল, সোসিএল অমসুং দিজিতেল ইনফ্রাস্ত্রকচরদা ভারত য়াংনা চাউখৎলক্লি। মালেমদা খ্বাইদগী অখন্নবা দিজিতেল পব্লিক ইনফ্রাস্ত্রকচর লৈদুনা হৌজিক ভারতনা চাউথোকচরি।
প্রধান মন্ত্রীনা হায়খি হান্নদগী ভারত্তা লৈরক্লবা জর্মনিগী কম্পেনিশিংনা মখোয়গী শেন থাদবা হেনগৎহনগদবনি অমসুং হৌজিক ফাওবা ভারত্তা লাক্ত্রিবা কম্পেনিশিং লাক্নবা হায়জরি। ভারতকী চাউখৎপা অসিগা পুন্না চৎমিন্ননবগী চপ চারবা মতম অদু হৌজিক্নি। ভারতকী মপাঙ্গল অমসুং জমর্নিগী থবক হৈবা, ইঞ্জিনিয়ারিং অমসুং ইন্নোবেসনগা পুন্না চৎমিন্নবা দরকার ওইরে। অরিবা সভেত্য অমা ওইরিবা ভারতনা মতম পুম্নমক্তা মালেমগা পুন্না চৎমিন্নবা তরাম্না ওক্লি অমসুং মালেমগী নুংঙাই-য়াইফবা তুংলমচৎ অমা শেমগৎনবা শরুক য়ানবা লৈবাক খুদিংমক্তা হায়জরি।
****
(Release ID: 2076401)
Visitor Counter : 4