కస్టమ్స్ విధానాలను సరళీకృతం చేయటానికి, వాణిజ్య సౌలభ్యాన్ని పెంపొందించటానికి.. మానవ ప్రమేయం లేకుండా ఐఎఫ్ ఎస్ సీ కోడ్ ను ఆటోమేటిక్ గా ఆమోదించే ప్రక్రియను కేంద్ర పరోక్ష పన్నులు, కస్టమ్స్ బోర్డు (సీబీఐసీ) ప్రవేశపెట్టింది. దీనిద్వారా సులభతర వ్యాపార సౌలభ్యానికి ఐఎఫ్ఎస్ సీ కోడ్ ను రిజిస్ట్రేషన్ చేసుకోవచ్చు.

ఈ కొత్త కార్యక్రమం ద్వారా ఒకే దిగుమతి- ఎగుమతి కోడ్ (ఐఈసీ) కోసం ఒకే ఇన్సెంటివ్ బ్యాంకు ఖాతా, ఐఎఫ్ఎస్ సీ ఇప్పటికే ఏదైన ఒక కస్టమ్స్ కేంద్రంలో ఆమోదం పొంది ఉంటే, వాటిని ఇతర కస్టమ్స్ కేంద్రాల్లోనూ నమోదు చేయాల్సిందిగా కోరితే, వెంటనే ఆమోదం లభిస్తుంది. పోర్టు అధికారి ప్రమేయం లేకుండా, కస్టమ్స్ అధికారిక వ్యవస్థ ఆయా అభ్యర్థనలకు నేరుగా అంటే ఆటోమేటిక్ గా ఆమోదం తెలుపుతుంది.

ఈ కార్యక్రమం ముఖ్య ఉద్దేశం:

i. బ్యాంకు ఖాతా, ఐఎఫ్ఎస్ సీ కోడ్ అభ్యర్థనలను వేగంగా పరిశీలించటం.

ii. వివిధ పోర్టుల్లో రిజిస్ట్రేషన్ ప్రక్రియను సులభతరం చేయటం.

iii. ఎగుమతి ప్రోత్సాహకాలను ఎగుమతిదారుల బ్యాంకు ఖాతాల్లో వీలైనంత త్వరగా, ఎలాంటి అంతరాయాలు లేకుండా జమ చేయటం.

iv. మొత్తంగా వాణిజ్య సామర్థ్యాన్ని పెంచటం.

కస్టమ్స్ ఆటోమేటెడ్ సిస్టమ్ ద్వారా ఎగుమతిదారు ఇచ్చిన బ్యాంక్ ఖాతాకు ఎగుమతికి సంబంధించిన ప్రయోజనాలు అందుతాయి. ఐసీఈగేట్ లో ఎగుమతిదారు, ఆథరైజ్డ్ డీలర్ (ఏడీ) కోడ్ ను ఆన్ లైన్ లో నమోదు చేసుకునే సౌకర్యం ఇప్పటికే ఉంది. దిగుమతి- ఎగుమతి కోడ్ (ఐఈసీ) ద్వారా ఇన్సెంటివ్ లింక్డ్ బ్యాంకు ఖాతాలు, ఐఎఫ్ఎస్ సీ కోడ్ ల నమోదు అభ్యర్థనలకు ప్రతి పోర్టు లోకేషన్ లో కస్టమ్స్ అధికారులతో ఆమోదం పొందాల్సిన అవసరం ఉండేది. దీనివల్ల ఒకే బ్యాంకు ఖాతా, ఐఎఫ్ఎస్ సీని వివిధ కస్టమ్స్ కేంద్రాల్లో నమోదు చేసినప్పుడు ఒకే పని పునరావృతం కావటం, అభ్యర్థనలు పెండింగ్ లో ఉండటం వంటివి జరిగేవి.

సాంకేతకత వినియోగంతో విధానాలను సరళీకృతం చేయటానికి, లావాదేవీల ఖర్చులను తగ్గించేందుకు, మెరుగైన కస్టమ్స్ అనుభవాలతో భారత వాణిజ్య సమాజంలో సులభతర వ్యాపార మార్గాలను పెంచటానికి సీబీఐసీ కట్టుబడి ఉంది.

***