কেন্দ্ৰীয় গৃহ মন্ত্ৰী তথা সমবায় মন্ত্ৰী শ্ৰী অমিত শ্বাহে আজি মহাৰাষ্ট্ৰৰ অহিল্যা নগৰত প্ৰৱাৰা চেনি কাৰখানাৰ সম্প্ৰসাৰিত সুবিধা উদ্বোধন কৰে আৰু পদ্মশ্ৰী ড^০ ভিত্থালৰাও ভিখে পাটিল আৰু পদ্মভূষণ বালাচাহেব ভিখে পাটিলৰ প্ৰতিমূৰ্তি উন্মোচন কৰে। এই অনুষ্ঠানত মহাৰাষ্ট্ৰৰ মুখ্যমন্ত্ৰী শ্ৰী দেৱেন্দ্ৰ ফাড়নাবিচ, উপ-মুখ্যমন্ত্ৰী শ্ৰী একনাথ সিণ্ডে আৰু শ্ৰী অজিত পাৱাৰ আৰু কেন্দ্ৰীয় সমবায় বিভাগৰ ৰাজ্য মন্ত্ৰী শ্ৰী মুৰলীধৰ মোহোলকে ধৰি কেইবাজনো গণ্যমান্য ব্যক্তি উপস্থিত থাকে। ইয়াৰ পূৰ্বে কেন্দ্ৰীয় গৃহ আৰু সমবায় মন্ত্ৰীগৰাকীয়ে শিৰডী সাই ধাম ভ্ৰমণ কৰি সাই বাবাক আৰাধনা কৰাৰ লগতে দেশৰ সকলো নাগৰিকৰ সুখ আৰু সমৃদ্ধিৰ বাবে প্ৰাৰ্থনা কৰে।

অহিল্যা নগৰত আয়োজিত কাৰ্যসূচীত সমবেত লোকসকলক সম্বোধন কৰি কেন্দ্ৰীয় গৃহ আৰু সমবায় মন্ত্ৰীগৰাকীয়ে কয় যে কেৱল ছত্ৰপতি শিৱাজী মহাৰাজৰ অনুগামীসকলেহে ঔৰংগাবাদৰ নাম সম্ভাজীনগৰ আৰু আহমেদনগৰৰ নাম অহিল্যা নগৰ হিচাপে সলনি কৰাৰ সাহস দেখুৱাব পাৰে-ঔৰংজেবৰ অনুগামীসকলৰ এনে সাহস নাই। তেওঁ কয় যে এইবাৰ মহাৰাষ্ট্ৰত প্ৰচণ্ড বৰষুণৰ ফলত ৬০ লাখ হেক্টৰতকৈও অধিক কৃষিভূমি তথা শস্য ধ্বংস হৈছে। তেওঁ কয় যে ২০২৫-২৬ বিত্তীয় বৰ্ষৰ বাবে কেন্দ্ৰৰ অংশৰ অধীনত মহাৰাষ্ট্ৰলৈ ৩,১৩২ কোটি টকা আবণ্টন কৰা হৈছে, যাৰ ভিতৰত ১,৬৩১ কোটি টকা মোদী চৰকাৰে এপ্ৰিল মাহত মুকলি কৰে। শ্ৰী শ্বাহে কয় যে মহাৰাষ্ট্ৰ চৰকাৰৰ শ্ৰী দেৱেন্দ্ৰ ফাড়নাবিচ, শ্ৰী একনাথ সিন্দে আৰু শ্ৰী অজিত পাৱাৰ তিনিওগৰাকীয়ে কৃষকসকলক সহায় কৰিবলৈ কেইবাটাও পদক্ষেপ গ্ৰহণ কৰে। তেওঁ কয় যে মহাৰাষ্ট্ৰ চৰকাৰে ৩১ লাখৰো অধিক কৃষকক উপকৃত কৰি ২,২১৫ কোটি টকাৰ সাহায্য পেকেজ ঘোষণা কৰিছে।

তেওঁ লগতে কয় যে ৰাজ্য চৰকাৰে ক্ষতিগ্ৰস্ত কৃষকসকলক নগদ ১০,০০০ টকা আৰু ৩৫  কেজি খাদ্য-শস্য প্ৰদান কৰাৰ আঁচনিও আৰম্ভ কৰিছে। তদুপৰি হ্ৰস্বম্যাদী কৃষি ঋণৰ আদায় স্থগিত ৰখাৰ লগতে ভূমি ৰাজহ আৰু বিদ্যালয় পৰীক্ষাৰ ক্ষেত্ৰতো ৰেহাই দিয়া হৈছে।

প্ৰধানমন্ত্ৰী মোদীৰ তৰফৰ পৰা কেন্দ্ৰীয় গৃহ মন্ত্ৰীগৰাকীয়ে আশ্বাস দিয়ে যে মহাৰাষ্ট্ৰ চৰকাৰে এক বিশদ প্ৰতিবেদন প্ৰেৰণ কৰাৰ লগে লগে প্ৰধানমন্ত্ৰী মোদীৰ ফালৰ পৰা ৰাজ্যৰ কৃষকসকলক সহায় কৰাত কোনো বিলম্ব কৰা নহ'ব। মহাৰাষ্ট্ৰৰ জনসাধাৰণে প্ৰকৃতাৰ্থত কৃষকসকলৰ হকে চিন্তা কৰা এখন চৰকাৰ বাছনি কৰাৰ বাবে এয়া সম্ভৱ হৈ উঠা বুলি তেওঁ মত প্ৰকাশ কৰে।

শ্ৰী অমিত শ্বাহে কয় যে আজি পদ্মশ্ৰী ড^০ ভিত্থালৰাও ভিখে পাটিল আৰু পদ্মভূষণ বালাচাহেব ভিখে পাটিলৰ পূৰ্ণাংগ প্ৰতিমূৰ্তি উন্মোচন কৰা হৈছে। তেওঁ কয় যে পদ্মশ্ৰী ভিখে পাটিলে তেওঁৰ গোটেই জীৱনটো এই অঞ্চল তথা সমগ্ৰ মহাৰাষ্ট্ৰৰ কৃষকসকলৰ কল্যাণৰ হকে উৎসৰ্গা কৰিছিল। তেওঁ লগতে কয় যে ড^০ ভিত্থালৰাও ভিখে পাটিল ভাৰতৰ সমবায় আন্দোলনৰ অন্যতম পথ প্ৰদৰ্শক আছিল। মহাৰাষ্ট্ৰৰ সমবায় খণ্ডৰ ইতিহাসত পদ্মশ্ৰী ড^০ ভিত্থালৰাও ভিখে পাটিল, ধনঞ্জয়ৰাও গাডগিল আৰু বৈকুণ্ঠভাই মেহতা ত্ৰিমূৰ্তিয়ে ৰাজ্যখনত সমবায় আন্দোলনৰ ভেটি স্থাপন কৰিছিল।

শ্ৰী শ্বাহে কয় যে পদ্মশ্ৰী ভিখে পাটিলে বিশ্বৰ প্ৰথমখন সমবায় চেনি কল প্ৰতিষ্ঠা কৰিছিল আৰু এই পদক্ষেপৰ ফলত কেৱল মহাৰাষ্ট্ৰৰেই নহয়, গুজৰাট, কৰ্ণাটক, উত্তৰ প্ৰদেশকে ধৰি আন কেইবাখনো ৰাজ্যৰ কৃষকসকল উপকৃত হৈছিল। তেওঁ লগতে কয় যে পদ্মশ্ৰী ড^০ ভিত্থালৰাও ভিখে পাটিলে প্ৰদৰ্শন কৰা ব্যৱস্থাৰ জৰিয়তে চেনি কলৰ লাভ ব্যৱসায়ীসকলৰ পকেটৰ পৰিবৰ্তে কৃষকসকলৰ বেংক একাউণ্টলৈ গৈছিল।

কেন্দ্ৰীয় সমবায় মন্ত্ৰীগৰাকীয়ে কয় যে পদ্মশ্ৰী ড^০ ভিত্থালৰাও ভিখে পাটিলৰ পুত্ৰ ড^০ বালাচাহেব ভিখে পাটিলে কেৱল সমবায় আন্দোলনক শক্তিশালী কৰাই নহয়, সমবায় প্ৰতিষ্ঠানৰ জৰিয়তে শিক্ষা, স্বাস্থ্য আৰু গ্ৰাম্য প্ৰগতিৰ হকে সমবায় লাভ ব্যৱহাৰৰ এক নতুন পৰম্পৰাৰো পথ প্ৰদৰ্শন কৰিছিল। তেওঁ উল্লেখ কৰে যে আঠ দশকৰো অধিক সময় ধৰি তেওঁৰ জীৱনত ড^০ বালাচাহেব ভিখে পাটিল সাতবাৰ সংসদলৈ নিৰ্বাচিত হৈছিল আৰু অটল বিহাৰী বাজপেয়ীৰ চৰকাৰতো সেৱা আগবঢ়াইছিল।

শ্ৰী শ্বাহে কয় যে তেওঁৰ পদক্ষেপৰ বাবে ভাৰতীয় ৰিজাৰ্ভ বেংকে মাধৱপুৰা মাৰ্কেণ্টাইল সমবায় বেংকক পুনৰুজ্জীৱিত কৰাৰ বাবে বিশেষ পেকেজ প্ৰদান কৰিছিল, যিয়ে গুজৰাটৰ ২২৫ টা সমবায় বেংকক উপকৃত কৰিছিল। তেওঁ লগতে কয় যে এই দুয়োজন বিশিষ্ট ব্যক্তিয়ে সমবায়, গ্ৰাম্য উন্নয়ন আৰু কৃষক কল্যাণৰ ক্ষেত্ৰত অপৰিসীম অৱদান আগবঢ়াইছে।

শ্ৰী অমিত শ্বাহে কয় যে আজি ড^০ ভিত্থালৰাও ভিখে পাটিল সমবায় চেনি কলটোও নৱীকৰণ কৰা হৈছে। ১৯৫০-৫১ চনত এই কল স্থাপন হোৱাৰ কালত কলটোৰ প্ৰতিদিনে ৫০০ টন কুঁহিয়াৰ প্ৰক্ৰিয়াকৰণৰ ক্ষমতা আছিল বুলি উল্লেখ কৰি তেওঁ কয় যে এই ক্ষমতা এতিয়া প্ৰতিদিনে ৭,২০০ টনলৈ বৃদ্ধি হৈছে। আগন্তুক বছৰবোৰত ইয়াৰ প্ৰক্ৰিয়াকৰণ ক্ষমতা প্ৰতিদিনে ৭,২০০ টনৰ পৰা ১৫,০০০ টন কুঁহিয়াৰলৈ বৃদ্ধি পাব। তেওঁ কয় যে প্ৰধানমন্ত্ৰী মোদীয়ে সমবায় মন্ত্ৰালয় প্ৰতিষ্ঠা কৰাৰ লগে লগে ৰাষ্ট্ৰীয় সমবায় উন্নয়ন নিগমে (এনচিডিচি) সমবায় চেনি কলবোৰ শক্তিশালী কৰাৰ বাবে এক আঁচনি আৰম্ভ কৰিছিল। এই আঁচনিৰ অধীনত উন্নত প্ৰদৰ্শন কৰা গোটসমূহক বিত্তীয় সাহায্য প্ৰদান কৰা হৈছিল। এই গোটসমূহৰ ভিতৰত ড^০ ভিত্থালৰাও ভিখে পাটিল সমবায় চেনি কলটো এতিয়া সম্প্ৰসাৰিত কৰা হৈছে।

শ্ৰী শ্বাহে উল্লেখ কৰে যে এই চেনি কলৰ সুৰা পাতন প্ৰকল্পটোৰ ক্ষমতা প্ৰতিদিনে ১৫ কিল'লিটাৰৰ পৰা ৯২ কিল'লিটাৰলৈ (কেএলপিডি) বৃদ্ধি কৰা হৈছে আৰু ইয়াক প্ৰতিদিনে ২৪০ কিল'লিটাৰলৈ সম্প্ৰসাৰণ কৰাৰ বাবে অনুমোদন প্ৰদান কৰা হৈছে। একেদৰে ইথানল প্ৰকল্পৰ ক্ষমতা প্ৰতিদিনে ২০ কিল'লিটাৰ (কেএলপিডি)ৰ পৰা প্ৰতিদিনে ১৫০ কিল'লিটাৰ (কেএলপিডি)লৈ বৃদ্ধি হৈছে। জৈৱ গেছ প্ৰকল্পৰ ক্ষমতা প্ৰতিদিনে ১২,০০০ কিউবিক মিটাৰৰ পৰা ৩০,০০০ কিউবিক মিটাৰলৈ বৃদ্ধি হৈছে আৰু সহ-উৎপাদন প্ৰকল্পৰ ক্ষমতা

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে প্ৰধানমন্ত্ৰী মোদীৰ নেতৃত্বত দেশত চেনি কলৰ সংখ্যা ৬৭ শতাংশ বৃদ্ধি হোৱাৰ লগতে চেনিৰ উৎপাদন ১ নিযুত মেট্ৰিক টন বৃদ্ধি হৈছে। তেওঁ লগতে কয় যে ডিষ্টিলাৰীৰ সংখ্যা দুগুণ হৈছে, ইথানল উৎপাদন ক্ষমতা পাঁচগুণ বৃদ্ধি হোৱাৰ লগতে ইয়াৰ যোগান দহগুণ বৃদ্ধি হৈছে। তদুপৰি পেট্ৰ’লত ইথানলৰ মিশ্ৰণ এতিয়া ২০ শতাংশত উপনীত হৈছে। শ্ৰী নৰেন্দ্ৰ মোদীয়ে প্ৰধানমন্ত্ৰী হিচাপে দায়িত্ব গ্ৰহণ কৰাৰ পাছৰে পৰা সমবায় চেনি কলবোৰ যথেষ্ট উপকৃত হোৱাটো ইয়াৰ জৰিয়তে প্ৰতিফলিত হোৱা বুলি তেওঁ উল্লেখ কৰে। কৃষকসকলৰ বাবে ১০,০০০ কোটি টকাৰো অধিক আয়কৰ ৰেহাই দিয়াটো মোদী চৰকাৰৰ এটা গুৰুত্বপূৰ্ণ সিদ্ধান্ত আছিল বুলি তেওঁ উল্লেখ কৰে। তেওঁ কয় যে মোদী মহাশয়ে সমবায় খণ্ডক কৰ নিষ্পত্তিৰ ক্ষেত্ৰত নিগমসমূহৰ দৰে সমমৰ্যাদা দিছে।

শ্ৰী শ্বাহে কয় যে প্ৰথমবাৰৰ বাবে মোদী চৰকাৰে সমবায়সমূহক নিয়ন্ত্ৰণ কৰাৰ বাবে পূৰ্বৰ পৰা বলৱৎ হোৱাকৈ এক নিষ্পত্তি আইন প্ৰণয়ন কৰে। কেন্দ্ৰীয় সহযোগিতা মন্ত্ৰীগৰাকীয়ে লগতে কয় যে এই পদক্ষেপে এতিয়া সমবায় চেনি কলসমূহক ৪,৪০০ কোটি টকাৰ বাৰ্ষিক বিত্তীয় বোজাৰ পৰা মুক্ত কৰিব।

শ্ৰী অমিত শ্বাহে সমবায় চেনি কলসমূহক সম্বোধন কৰি তেওঁলোকৰ ইথানল প্ৰকল্পসমূহক বহু উৎসৰ পৰা ইথানল উৎপাদন কৰিব পৰা গোটলৈ ৰূপান্তৰিত কৰাৰ লগতে পাচলিৰ আৱৰ্জনা, গোমধান আৰু চাউলৰ পৰা ইথানল উৎপাদনৰ ব্যৱস্থা আৰম্ভ কৰিবলৈ আহ্বান জনায়। তেওঁ কয় যে ইয়াৰ বাবে প্ৰয়োজনীয় বিত্তীয় সাহায্য ৰাষ্ট্ৰীয় সমবায় উন্নয়ন নিগম (এনচিডিচি)ৰ জৰিয়তে প্ৰদান কৰা হ'ব। তেওঁ লগতে কয় যে ইথানল ক্ৰয়ৰ ক্ষেত্ৰত সকলো সমবায়ক অগ্ৰাধিকাৰ দিয়া হৈছে। একেদৰে মোদী চৰকাৰে এনচিডিচিৰ ঋণ আঁচনিৰ অধীনত ১০,০০০ কোটি টকা প্ৰদান কৰিছে আৰু গুড়ৰ ওপৰত জিএছটি ২৮ শতাংশৰ পৰা ৫ শতাংশলৈ হ্ৰাস কৰিছে।

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে শেহতীয়াকৈ প্ৰধানমন্ত্ৰী মোদীয়ে প্ৰায় সকলো খাদ্য সামগ্ৰীৰ ওপৰত জিএছটি শূন্য কৰাকে ধৰি ৩৯৫ টা সামগ্ৰীৰ ওপৰত জিএছটি হ্ৰাস কৰিছে, যাৰ ফলত দেশৰ জনসাধাৰণ, বিশেষকৈ মাতৃ আৰু ভগ্নীসকল উপকৃত হৈছে। তেওঁ কয় যে প্ৰধানমন্ত্ৰী মোদীয়ে সকলো নাগৰিকক এই দীপাৱলীত কোনো বিদেশী সামগ্ৰী ঘৰত ব্যৱহাৰ নকৰাৰ প্ৰতিজ্ঞা কৰিবলৈ আহ্বান জনাইছে। শ্ৰী শ্বাহে কয় যে যদি ১৪০ কোটি ভাৰতীয়ই কেৱল ভাৰতত নিৰ্মিত সামগ্ৰী ব্যৱহাৰ কৰাৰ এই প্ৰতিশ্ৰুতি গ্ৰহণ কৰে, তেন্তে ২০৪৭ চনৰ আগতেই ভাৰত বিশ্বৰ শীৰ্ষস্থানত উপনীত হ'ব। তেওঁ লগতে কয় যে সমগ্ৰ বিশ্বৰ মানুহে উৎপাদনৰ বাবে ভাৰতলৈ আহিব লাগিব, কিয়নো কেৱল ভাৰততেই ১৪০ কোটি গ্ৰাহকৰ বজাৰ আছে।

শ্ৰী অমিত শ্বাহে কয় যে সমবায় চেনি কলসমূহে আনকি শস্য নচপোৱা কালতো বহু উৎসৰ পৰা ইথানল উৎপাদন অব্যাহত ৰাখিব লাগে আৰু শীতলীকৃত শাক-পাচলি, ফলমূলৰ ৰস, ফলৰ শাহ আৰু এইধৰণৰ সামগ্ৰী উৎপাদনলৈ সম্প্ৰসাৰণ কৰিব লাগে। তেওঁ লগতে কয় যে এনএএফইডি আৰু এনচিচিএফৰ সৈতে চুক্তি স্বাক্ষৰ কৰাৰ জৰিয়তে সমবায় চেনি কলবোৰ বহুমুখী হোৱাৰ প্ৰয়োজন আছে।

RK/VV/AK/PR/PS/DD