ಕೇಂದ್ರ ಗೃಹ ಹಾಗೂ ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಇಂದು ಹರಿಯಾಣದ ರೋಹ್ಟಕ್‌ ನಲ್ಲಿ ಸಬರ್ ಡೇರಿ ಘಟಕವನ್ನು ಲೋಕಾರ್ಪಣೆ ಮಾಡಿದರು. ಈ ಸಮಾರಂಭದಲ್ಲಿ ಹರಿಯಾಣದ ಮುಖ್ಯಮಂತ್ರಿ ಶ್ರೀ ನಾಯಬ್ ಸಿಂಗ್ ಸೈನಿ, ಸಹಕಾರ ಕೇಂದ್ರ ರಾಜ್ಯ ಸಚಿವ ಶ್ರೀ ಕೃಷ್ಣ ಪಾಲ್ ಗುರ್ಜರ್, ಕೇಂದ್ರ ಸಚಿವ ಶ್ರೀ ರಾವ್ ಇಂದರ್‌ಜಿತ್ ಸಿಂಗ್ ಮತ್ತು ಇತರ ಅನೇಕ ಗಣ್ಯರು ಭಾಗವಹಿಸಿದ್ದರು.

ಈ ಸಂದರ್ಭದಲ್ಲಿ ಮಾತನಾಡಿದ ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು, ಪ್ರತ್ಯೇಕ ಸಹಕಾರ ಸಚಿವಾಲಯವನ್ನು ಸ್ಥಾಪಿಸಬೇಕೆಂಬ ದೇಶದ ರೈತರ ದಶಕಗಳ ಬೇಡಿಕೆಯನ್ನು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಈಡೇರಿಸಿದ್ದಾರೆ ಮತ್ತು ಇದಕ್ಕಾಗಿ ಇಡೀ ರಾಷ್ಟ್ರವು ಅವರಿಗೆ ಕೃತಜ್ಞವಾಗಿದೆ ಎಂದು ಹೇಳಿದರು. ಕಳೆದ ನಾಲ್ಕು ವರ್ಷಗಳಲ್ಲಿ ಸಹಕಾರ ಸಚಿವಾಲಯವು ದೇಶದ ಎಲ್ಲಾ ರಾಜ್ಯ ಸರ್ಕಾರಗಳೊಂದಿಗೆ ಸೇರಿ ಸಹಕಾರ ಸಂಘಗಳ ಅಡಿಪಾಯವನ್ನು ಬಲಪಡಿಸುವ ಕೆಲಸ ಮಾಡಿದೆ ಎಂದು ಅವರು ತಿಳಿಸಿದರು. 2029ರ ವೇಳೆಗೆ ದೇಶದ ಪ್ರತಿ ಪಂಚಾಯಿತಿಯಲ್ಲೂ ಒಂದು ಸಹಕಾರ ಸಂಘ ಇರಲಿದೆ ಎಂಬ ವಿಶ್ವಾಸವನ್ನು ಕೇಂದ್ರ ಸಹಕಾರ ಸಚಿವರು ವ್ಯಕ್ತಪಡಿಸಿದರು.

ಶ್ರೀ ಅಮಿತ್ ಶಾ ಅವರು, ಇಂದು ಸಬರ್ ಡೈರಿ ಮೂಲಕ, ಸುಮಾರು ₹350 ಕೋಟಿ ವೆಚ್ಚದಲ್ಲಿ ನಿರ್ಮಿಸಲಾದ, ಮೊಸರು, ಮಜ್ಜಿಗೆ ಮತ್ತು ಯೋಗರ್ಟ್ ಉತ್ಪಾದಿಸುವ ದೇಶದ ಅತಿದೊಡ್ಡ ಸ್ಥಾವರವು ಹಾಲು ಉತ್ಪಾದಕರ ಕಲ್ಯಾಣಕ್ಕಾಗಿ ಪೂರ್ಣಗೊಂಡಿದೆ ಎಂದು ಹೇಳಿದರು. ಹರಿಯಾಣದಿಂದಲೇ ದೆಹಲಿ-ರಾಷ್ಟ್ರೀಯ ರಾಜಧಾನಿ ಪ್ರದೇಶದ (ದೆಹಲಿ-ಎನ್‌ ಸಿ ಆರ್) ಡೈರಿ ಉತ್ಪನ್ನಗಳ ಸಂಪೂರ್ಣ ಬೇಡಿಕೆಯನ್ನು ಪೂರೈಸಲಾಗುವುದು ಎಂದು ಅವರು ತಿಳಿಸಿದರು. ಗುಜರಾತ್‌ ನ ಸಬರಕಾಂತಾ ಜಿಲ್ಲೆಯಲ್ಲಿ ಪ್ರಾರಂಭವಾದ ಸಬರ್ ಡೈರಿಯು 9 ರಾಜ್ಯಗಳ ಹಾಲು ಉತ್ಪಾದಕರಿಗೆ ವ್ಯಾಪಕ ಅವಕಾಶಗಳನ್ನು ಸೃಷ್ಟಿಸಿದೆ ಎಂದು ಶ್ರೀ ಶಾ ಅವರು ಮತ್ತಷ್ಟು ತಿಳಿಸಿದರು. ಗುಜರಾತ್‌ ನಲ್ಲಿ ತ್ರಿಭುವನ್ ಭಾಯಿ, ಭೂರಾ ಭಾಯಿ ಮತ್ತು ಗಲ್ಬಾ ಭಾಯಿ ಅವರು ಡೈರಿಗಳಿಗೆ ಅಡಿಪಾಯ ಹಾಕಿದರು ಮತ್ತು ಇಂದು ಸಹಕಾರಿ ಡೈರಿಗಳ ಮೂಲಕ ಗುಜರಾತ್‌ನ 35 ಲಕ್ಷ ಮಹಿಳೆಯರು ವಾರ್ಷಿಕ ₹85,000 ಕೋಟಿ ಮೌಲ್ಯದ ವಹಿವಾಟು ನಡೆಸುತ್ತಿದ್ದಾರೆ.

ಸಬರ್ ಸ್ಥಾವರದಲ್ಲಿ ಪ್ರತಿದಿನ 150 ಮೆಟ್ರಿಕ್ ಟನ್ ಮೊಸರು, 10 ಮೆಟ್ರಿಕ್ ಟನ್ ಯೋಗರ್ಟ್, 3 ಲಕ್ಷ ಲೀಟರ್ ಮಜ್ಜಿಗೆ ಮತ್ತು 10,000 ಕಿಲೋಗ್ರಾಂ ಸಿಹಿತಿಂಡಿಗಳನ್ನು ಉತ್ಪಾದಿಸಲಾಗುವುದು, ಇದು ರೈತರ ಸಮೃದ್ಧಿಗೆ ದಾರಿ ಮಾಡಿಕೊಡಲಿದೆ ಎಂದು ಕೇಂದ್ರ ಸಹಕಾರ ಸಚಿವರು ಹೇಳಿದರು. ಇಂದು ಸಾಬರ್ ಡೈರಿಯು ರಾಜಸ್ಥಾನ, ಹರಿಯಾಣ, ಮಹಾರಾಷ್ಟ್ರ, ಪಂಜಾಬ್, ಉತ್ತರ ಪ್ರದೇಶ ಮತ್ತು ಬಿಹಾರದ ರೈತರಿಗೆ ಸೇವೆ ಸಲ್ಲಿಸುತ್ತಿದೆ ಎಂದು ಅವರು ಹೇಳಿದರು. ಅಮುಲ್ ನೇತೃತ್ವದಲ್ಲಿ, ಗುಜರಾತ್‌ನಲ್ಲಿ ಭ್ರೂಣ ವರ್ಗಾವಣೆ ಮತ್ತು ಲಿಂಗ-ನಿರ್ಣಯದಂತಹ ಆಧುನಿಕ ತಳಿ ತಂತ್ರಜ್ಞಾನಗಳ ಕುರಿತು ವ್ಯಾಪಕ ವೈಜ್ಞಾನಿಕ ಕಾರ್ಯಗಳನ್ನು ಕೈಗೊಳ್ಳಲಾಗಿದೆ ಎಂದು ಅವರು ಮತ್ತಷ್ಟು ತಿಳಿಸಿದರು. ಈ ತಂತ್ರಜ್ಞಾನಗಳನ್ನು ಹರಿಯಾಣದ ಪಶುಪಾಲಕರಿಗೂ ಲಭ್ಯವಾಗುವಂತೆ ಮಾಡಬೇಕು. ಇದರೊಂದಿಗೆ, ರಾಜ್ಯದಲ್ಲಿ ಜೇನುಸಾಕಣೆ ಮತ್ತು ಸಾವಯವ ಕೃಷಿಯನ್ನು ಉತ್ತೇಜಿಸುವ ಅಗತ್ಯವಿದೆ. ಗುಜರಾತ್‌ನಲ್ಲಿ ಜೈವಿಕ ಅನಿಲ (ಬಯೋಗ್ಯಾಸ್) ಕುರಿತು ಹಲವಾರು ಯಶಸ್ವಿ ಪ್ರಯೋಗಗಳನ್ನು ನಡೆಸಲಾಗಿದೆ ಮತ್ತು ಅಂತಹ ಉಪಕ್ರಮಗಳನ್ನು ಹರಿಯಾಣದಲ್ಲಿಯೂ ಜಾರಿಗೆ ತರಬೇಕು ಎಂದು ಅವರು ಉಲ್ಲೇಖಿಸಿದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಕಳೆದ 11 ವರ್ಷಗಳಲ್ಲಿ ಭಾರತದ ಡೈರಿ ಕ್ಷೇತ್ರವು ಶೇಕಡ 70ರಷ್ಟು ಬೆಳವಣಿಗೆಯನ್ನು ಕಂಡಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ಪ್ರಧಾನಿ ಮೋದಿಯವರ ನಾಯಕತ್ವದಲ್ಲಿ, ಭಾರತದ ಡೈರಿ ಕ್ಷೇತ್ರವು ವಿಶ್ವದಲ್ಲೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಡೈರಿ ಕ್ಷೇತ್ರವಾಗಿ ಹೊರಹೊಮ್ಮಿದೆ. 2014-15ರಲ್ಲಿ ಭಾರತದಲ್ಲಿ ಹಾಲು ಕರೆಯುವ ಪ್ರಾಣಿಗಳ ಸಂಖ್ಯೆ 8.6 ಕೋಟಿ ಇತ್ತು, ಅದು ಈಗ 11.2 ಕೋಟಿಗೆ ಏರಿಕೆಯಾಗಿದೆ ಎಂದು ಅವರು ತಿಳಿಸಿದರು. ಅದೇ ರೀತಿ, ಹಾಲಿನ ಉತ್ಪಾದನೆಯು 14.6 ಕೋಟಿ ಟನ್‌ಗಳಿಂದ 23.9 ಕೋಟಿ ಟನ್‌ಗಳಿಗೆ ಹೆಚ್ಚಾಗಿದೆ. ದೇಶೀಯ ತಳಿಯ ಹಸುಗಳಿಂದ ಸಿಗುವ ಹಾಲಿನ ಉತ್ಪಾದನೆಯು 2.9 ಕೋಟಿ ಟನ್‌ಗಳಿಂದ 5 ಕೋಟಿ ಟನ್‌ಗಳಿಗೆ ಏರಿಕೆಯಾಗಿದೆ. ಇಂದು ಭಾರತದಲ್ಲಿ ಸುಮಾರು 8 ಕೋಟಿ ರೈತರು ಡೈರಿ ಕ್ಷೇತ್ರದೊಂದಿಗೆ ಸಂಪರ್ಕ ಹೊಂದಿದ್ದಾರೆ ಎಂದು ಶ್ರೀ ಶಾ ಹೇಳಿದರು. ನಮ್ಮ ದೇಶದ ರೈತರು ಭಾರತದಲ್ಲಿ ತಲಾ ಹಾಲಿನ ಲಭ್ಯತೆಯನ್ನು 124 ಗ್ರಾಂನಿಂದ 471 ಗ್ರಾಂಗೆ ಹೆಚ್ಚಿಸಿದ್ದಾರೆ ಎಂದು ಅವರು ಮತ್ತಷ್ಟು ಸೇರಿಸಿದರು. ಕಳೆದ 11 ವರ್ಷಗಳಲ್ಲಿ ಭಾರತದ ಡೈರಿ ಕ್ಷೇತ್ರದಲ್ಲಿ ಅನೇಕ ಬದಲಾವಣೆಗಳಾಗಿದ್ದು, ಇವು ನಮ್ಮ ರೈತರಿಗೆ ಸಮೃದ್ಧಿಯನ್ನು ತಂದುಕೊಟ್ಟಿವೆ ಎಂದು ಕೇಂದ್ರ ಸಹಕಾರ ಸಚಿವರು ಹೇಳಿದರು.

ತಲಾ ಹಾಲಿನ ಲಭ್ಯತೆಯ ವಿಷಯದಲ್ಲಿ ಹರಿಯಾಣವು ಪ್ರತಿ ವರ್ಷ ಸ್ಥಿರವಾಗಿ ಮೊದಲಿನಿಂದ ಮೂರನೇ ಸ್ಥಾನದೊಳಗೆ ಇರುತ್ತದೆ ಎಂದು ಕೇಂದ್ರ ಗೃಹ ಸಚಿವ ಮತ್ತು ಸಹಕಾರ ಸಚಿವರು ಹೇಳಿದರು. ಪ್ರಧಾನಿ ಮೋದಿಯವರ ಅಧಿಕಾರಾವಧಿಯ ಸ್ಥಿರವಾದ ನೀತಿಗಳಿಂದಾಗಿ, ಇಂದು ಭಾರತವು ವಿಶ್ವದ ಅತಿದೊಡ್ಡ ಹಾಲು ಉತ್ಪಾದಕನಾಗಿ ಹೆಮ್ಮೆಯಿಂದ ನಿಂತಿದೆ ಎಂದು ಅವರು ಹೇಳಿದರು. 'ಶ್ವೇತ ಕ್ರಾಂತಿ 2.0' ಅಡಿಯಲ್ಲಿ, ಮುಂಬರುವ ದಿನಗಳಲ್ಲಿ ದೇಶಾದ್ಯಂತ 75,000ಕ್ಕೂ ಹೆಚ್ಚು ಡೈರಿ ಸೊಸೈಟಿಗಳನ್ನು ಸ್ಥಾಪಿಸಲಾಗುವುದು ಮತ್ತು ಸರ್ಕಾರವು 46,000 ಡೈರಿ ಸಹಕಾರ ಸಂಘಗಳನ್ನು ಬಲಪಡಿಸಲಿದೆ ಎಂದು ಶ್ರೀ ಶಾ ಹೇಳಿದರು. ನಮ್ಮ ಪ್ರಸ್ತುತ ಹಾಲು ಸಂಸ್ಕರಣಾ ಸಾಮರ್ಥ್ಯವು ದಿನಕ್ಕೆ 660 ಲಕ್ಷ  ಲೀಟರ್‌ಗಳಾಗಿದ್ದು, 2028-29ರ ವೇಳೆಗೆ ಇದನ್ನು 10 ಕೋಟಿ ಲೀಟರ್‌ಗಳಿಗೆ ಹೆಚ್ಚಿಸುವ ಗುರಿಯನ್ನು ನಾವು ಹೊಂದಿದ್ದೇವೆ ಎಂದು ಅವರು ತಿಳಿಸಿದರು. ಈ ಗುರಿ ಸಾಧಿಸಿದ ನಂತರ, ಎಲ್ಲಾ ಲಾಭವು ನೇರವಾಗಿ ಹಾಲು ಉತ್ಪಾದನೆಯಲ್ಲಿ ತೊಡಗಿರುವ ನಮ್ಮ ರೈತ ತಾಯಂದಿರು ಮತ್ತು ಸಹೋದರಿಯರಿಗೆ ತಲುಪಲಿದೆ.

ಇತ್ತೀಚೆಗೆ ಮೋದಿ ಸರ್ಕಾರವು ಪಶು ಆಹಾರ ಉತ್ಪಾದನೆ, ಗೊಬ್ಬರ ನಿರ್ವಹಣೆ, ಮತ್ತು ಸತ್ತ ಪ್ರಾಣಿಗಳ ಅವಶೇಷಗಳನ್ನು ವೃತ್ತಾಕಾರದ ಆರ್ಥಿಕತೆಯಲ್ಲಿ (circular economy) ಬಳಸಿಕೊಳ್ಳುವುದಕ್ಕಾಗಿ ಮೂರು ರಾಷ್ಟ್ರೀಯ ಸಹಕಾರ ಸಂಘಗಳನ್ನು ಸ್ಥಾಪಿಸಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ಮೋದಿ ಸರ್ಕಾರವು 'ರಾಷ್ಟ್ರೀಯ ಗೋಕುಲ್ ಮಿಷನ್', 'ರಾಷ್ಟ್ರೀಯ ಕೃತಕ ಗರ್ಭಧಾರಣಾ ಕಾರ್ಯಕ್ರಮ', 'ಪಶುಸಂಗೋಪನಾ ಮೂಲಸೌಕರ್ಯ ಅಭಿವೃದ್ಧಿ ನಿಧಿ' ಮತ್ತು 'ರಾಷ್ಟ್ರೀಯ ಪ್ರಾಣಿ ರೋಗ ನಿಯಂತ್ರಣ ಕಾರ್ಯಕ್ರಮ'ಗಳನ್ನು ಪ್ರಾರಂಭಿಸಿದೆ ಎಂದು ಅವರು ಹೇಳಿದರು. ಮುಂಬರುವ ದಿನಗಳಲ್ಲಿ, ಡೈರಿ ಸ್ಥಾವರಗಳ ನಿರ್ಮಾಣದಲ್ಲಿ ಭಾರತವು ಸ್ವಾವಲಂಬಿಯಾಗುವ ಗುರಿಯನ್ನು ಹೊಂದಿದೆ ಮತ್ತು ಈ ಉದ್ದೇಶಕ್ಕಾಗಿ, ಡೈರಿ ಸ್ಥಾವರಗಳ ನಿರ್ಮಾಣ ಹಾಗೂ ಸಂಬಂಧಿತ ಸಂಶೋಧನೆ ಮತ್ತು ಅಭಿವೃದ್ಧಿಯನ್ನು ಮೂರು ಪಟ್ಟು ವೇಗಗೊಳಿಸುವ ಮೂಲಕ ಮೋದಿ ಸರ್ಕಾರವು ಡೈರಿ ವಲಯದಲ್ಲಿ ಸ್ವಾವಲಂಬನೆಯತ್ತ ಸಾಗುತ್ತಿದೆ ಎಂದು ಶ್ರೀ ಶಾ ತಿಳಿಸಿದರು.

*****