প্রধান মন্ত্রী শ্রী নরেন্দ্র মোদীনা ঙসি গুজরাতকী ভুজতা লুপা করোর ৫৩,৪০০ হেনবগী মখল কয়াগী চাউখৎ-থৌরাংগী প্রোজেক্তশিংগী উরেপ-উয়ুং তমখ্রে, শঙ্গাখ্রে অমসুং লৈবাক মীয়ামদা কত্থোকখ্রে। মীয়াম তিনখিবা অদুদা ৱা ঙাংলদুনা মহাক্না কচ্ছকী মীয়ামদা নুংঙাইবা ফোংদোকখি অমসুং রিভোলুস্নরীশিং অমসুং অথৌবশিং, মরুওইনা নীংতম লান্মী শ্রী শ্যামজী কৃষ্ণ ভর্মাবু ইকায় খুম্নবা উৎখি। প্রধান মন্ত্রীনা কচ্ছকী ইচিল-ইনাওশিংবু থাগৎপা ফোংদোকখি, মহাক্না মখোয়গী রেসিলিয়েন্স অমসুং কন্ত্রিব্যুসনশিংবু থাগৎপা ফোংদোকখি।

শ্রী মোদীনা কচ্ছকী অশেংবা লমদম অসিদা মহাক্কী লাইগী ওইবা মমি উবা ফংই ফোংদোক্লদুনা অশাপুরা মাতাদা ইকায় খুম্নবা উৎখি। মহাক্না লমদম অসিদা লেপ্পা লৈতনা য়াইফ-মঙ্গোল পীরকপগীদমক থাগৎপা ফোংদোকখি অমসুং মীয়ামদা ইকায় খুম্নবা উৎখি।

কচ্ছকা লৈনরিবা মরী অদু পল্লদুনা শ্রী মোদীনা মহাক্না কচ্ছ জিলাদা তোইনা চৎখিবা অদু নীংশিংখি অমসুং লমদম অসিনা মহাক্কী পুন্সিগী মায়কৈ করম্না শেমগৎলকপগে হায়বগী মতাংদা পনখি। মহাক্না হায়খি পুন্সি মহিংগী ফিভমদা চাউনা ফগৎলক্লবসু, মমাংগী মতমদদি অৱাবা কয়া মায়োক্নখি। নর্মদা তুরেলগী ঈশিং অদু কচ্ছ লমদম য়ৌরকপা মতমদা মহাক্না কয়া য়াম্না নুংঙাইবা পোকখিবগে হায়বদুসু মহাক্না নীংশিংখি। মহাক্না মুখ্য মন্ত্রী ওইদ্রিঙৈগী মমাংদা, মহাক্না কচ্ছতা তোইনা চৎখি অমসুং দিস্ত্রিক্ত ওফিসতা তোঙান তোঙানবা প্রোগ্রামশিংদা শরুক য়াখি। শ্রী মোদীনা কচ্ছতা লৈরিবা লৌমীশিংগী অচেৎপা ফিরেপ অদুসু পনখি। মখোয়গী ৱাখল্লোন অসি মতম পুম্নমক্তা শিংথানিংঙাই ওই হায়না মহাক্না ফোংদোকখি। মহাক্না হায়খি মদুদি লমদম অসিদা মহাক্কী চহি কয়াগী এক্সপরিয়েন্সনা লমদম অসিগী চাউখৎ থৌরাংগী মায়কৈদা মহাক্কী হোৎনবদা চাউনা মতেং পাংখি।

কচ্ছনা আশাগী শক্তি অমসুং অচেৎপা হোৎনবগী মতুং ইন্না শিংথানিংঙাই ওইবা মাই পাকপা অমা ফংলে হায়না পল্লদুনা প্রধান মন্ত্রীনা মতম অমদা লমদম অসিগী তুংলমচৎকী মতাংদা মীওই কয়াদা চিংনবা পোকহনখিবা শাথিরবা য়ুহার হাখিবগী থৌদোক অদু নৌহৌনা নীংশিংখি। অদুম ওইনমক, কচ্ছ অসি উৎতগী অমুক হন্না হৌরক্কনি হায়না মহাক্না থাজবা থম্লম্মি অমসুং মীয়াম্না মদু পাংথোকখি। প্রধান মন্ত্রীনা হায়খি, ঙসি কচ্ছ অসি ললোন-ইতিক, কম্মর্স অমসুং তুরিজমগী মরুওইবা মফম অমা ওইরে। লাক্কদৌরিবা চহিশিংদা লমদম অসিগী থৌদাং অসি মখা তানা হেনগৎলগনি। মহাক্না কচ্ছকী খোঙজেল য়াংনা চাউখৎলকপা উবদা অমসুং মাগী খুমাং চাউশিল্লকপদা মতেং পাংবদা নুংঙাইবা ফোঙদোকখি। মহাক্কী খোঙচৎ মনুংদা ইনফ্রাস্ত্রকচর অমসুং শেন্মিৎলোনগী চাউখৎপদা মীৎয়েং থমদুনা লুপা করোর ৫০,০০০গী প্রোজেক্তশিং শঙ্গাখি অমসুং হৌদোকখি। প্রধান মন্ত্রীনা হায়খি মদুদি থৌরাংশিং অসিনা ভারতপু মকোক থোংবা ব্লু ইকোনোমী অমা অমসুং মালেমগী গ্রীন ইনর্জীগী মফম অমা ওইহনবদা চাউনা মতেং পাংগনি। অহোংবা পুরক্নবা থবকশিং অসিগীদমক মহাক্না কচ্ছকী মীয়ামদা নুংঙাইবা ফোংদোকখি।

শ্রী মোদীনা হায়খি মদুদি কচ্ছ অসি গ্রীন ইনর্জীগী মালেমগী খ্বাইদগী চাউবা হব অমা ওইরক্লি। মহাক্না গ্রীন হাইদ্রোজেনগী ত্রান্সফোর্মেতিব পোতেন্সিএলদা অকনবা ৱাফম থম্লদুনা মসিবু তুংলমচৎকী ফ্যুএলনি হায়না ফোংদোকখি। মহাক্না হায়খি মদুদি কার, বস অমসুং লম্বীগী লাইৎশিং অসি অথুবা মতমদা গ্রীন হাইদ্রোজেননা চলাইগনি। মসিনা ভারতকী ইনর্জীগী লমদা অহোংবা পুরক্কনি। শ্রী মোদীনা হায়খি মদুদি কন্দলা অসি লৈবাক অসিদা দিজাইন তৌরবা গ্রীন হাইদ্রোজেন হব অহুমগী মনুংদা অমনি। মহাক্না কচ্ছতা অনৌবা গ্রীন হাইদ্রোজেন প্লান্ত অমগী উরেপ উয়ুং তমখ্রে। মসিগী ফেসিলিতী অসিদা শীজিন্নরিবা তেক্নোলোজী অসি মপুং ফানা "মেদ ইন ইন্দিয়া"নি হায়না মহাক্না ফোংদোকখি। মখা তানা শ্রী মোদীনা ভারতকী সোলর রিভোলুসনদা কচ্ছকী মরুওইবা থৌদাং অদু পনখি। মালেমগী খ্বাইদগী চাউবা সোলর পাৱর প্রোজেক্ত অমা মফম অসিদা শেমগৎলি হায়না মহাক্না ফোংদোকখি। খাভদা কমপ্লেক্স অসি লিংখৎতুনা, কচ্ছ অসি মালেমগী ইনর্জী মেপতা মপাঙ্গল কন্না লৈরে হায়না মহাক্না মখা তাখি।

নাগরিকশিংগীদমক মৈগী মমল হন্থহন্দুনা মতিক চাবা মৈ ফংহন্নবা সরকারগী অচেৎপা ফিরেপ অদু নৌহৌনা ফোংদোক্লদুনা, প্রধান মন্ত্রীনা গুজরাতকী ইমুং লাখ কয়াদা কান্নবা ফংহনখ্রবা পি.এম. সুর্য় ঘর মুফ্ত বিজলী য়োজনা হৌদোকখিবা অদু পনখি। মহাক্না সমুদ্র তোর্বানগী লমশিংদা লৈরিবা শেন্মিৎলোনগী মরুওইবা অদু ফোংদোকখি। সমুদ্রগী লমদা লৈরিবা চাউখৎপা অসি লৈবাক কয়া চাউখৎপগী মরুওইবা মরম অমা ওইরি হায়না মহাক্না ফোংদোকখি। ধোলা ভিরা অমসুং লোথালবু "অরিবা মতমগী পোর্ত সিতীশিং" হায়না পল্লদুনা প্রধান মন্ত্রীনা হায়খি মদুদি মখোয় অসি ভারতকী শিংথানীংঙাই ওইরবা হেরিতেজ অমসুং পুৱারীগী ওইবা ললোন-ইতিক অমসুং চাউখৎ-থৌরাংদা লৌখিবা থৌদাং অদুগী মরুওইবা খুদম্নি। প্রধান মন্ত্রীনা হায়খি, "মসিগী লিগেসীদগী ইথিল লৌরদুনা সরকারনা পোর্তকী অকোইবদা লৈবা শহরশিং পাকথোক চাউথোকহন্দুনা পোর্ত-লিদ দিবেলপমেন্তকী ভিজন অদু মাংলোমদা পুখৎলি।" মহাক্না মখা তাখি মদুদি ভারতনা সীফুদ, তুরিজম অমসুং ললোন-ইতিক য়াওনা অনৌবা কোস্তেল ইকোসিস্তেম অমা থৌনা লৈনা শেমগৎলি। প্রধান মন্ত্রীনা হায়খি মদুদি পোর্তশিং মোদর্নাইজেৎ তৌনবা অমসুং পাকথোক চাউথোকহন্নবা মরু ওইবা ইনবেস্তমেন্তশিং তৌরি, মসিনা শিংথানিংঙাই ওইবা মহৈশিং ফংহল্লি। অহানবা ওইনা, মরুওইবা পোর্তশিংনা চহি অমদা রেকোর্দ ওইবা কার্গো তন করোর ১৫ পুন্না হেন্দল তৌখি। কন্দলা পোর্তনা মরুওইবা থৌদাং অমা লৌরি। ভারতকী মেরিতাইম ত্রেদকী শরুক অহুম থোকপগী অমা কচ্ছকী পোর্তশিংনা মেনেজ তৌরি হায়না মহাক্না পনখি। ইনফ্রাস্ত্রকচরগী মরুওইবা অদু খঙলদুনা প্রধান মন্ত্রীনা হায়খি মদুদি কন্দলা অমসুং মুন্দ্রা পোর্তশিংদা কেপাসিতি অমসুং কনেক্তিবিতী অসি লেপ্পা লৈতনা হেনগৎহল্লি। থৌরম অসিদা, অনৌবা জেতি অমা অমসুং ওপরেসনশিংবু হেন্না লাইথোকহন্নবা কার্গো স্তোরেজ ফেসিলিতী অমা য়াওনা শিপ্পিংগা মরী লৈনবা ফেসিলিতী কয়া শঙ্গাখি। প্রধান মন্ত্রীনা মেরিতাইম সেক্তরদা সরকারনা অহেনবা মীৎয়েং থম্লিবা অদু মখা তানা পনখি। চহি অসিগী বজেৎতা মসিগী চাউখৎ থৌরাংগীদমক্তা অখন্নবা ফন্দ অমা শেম্নবা লাউথোকখি। মহাক্না শিপ বিল্দিংগী মরুওইবা অদুসু পনখি। মহাক্না হায়খি মদুদি ভারতনা দোমেস্তিক্কী মথৌ তাবা খক্তা নত্তনা মালেমগী দিমান্দগীদমক্তসু অচৌবা জহাজশিং শাবগী থবক পায়খৎলগনি। থৌরাংশিং অসিনা লৈবাক অসিগী নহাশিংদা মেরিতাইম সেক্তরদা থবক ফংহন্নবা অচৌবা খুদোংচাবা পীগনি হায়না মহাক্না ফোংদোকখি।

 কচ্ছকী হেরিতেজকীদমক মপুং ফানা ইকাই খুম্নবা উৎলদুনা শ্রী মোদীনা হায়খি মদুদি হেরিতেজ অসিনা হৌজিক লমদম অসিগী চাউখৎ থৌরাংগীদমক থোরক্লিবা থৌনা অদু ওইরক্লি। মহাক্না হৌখিবা চহি তরাগী মনুংদা ভুজতা তেক্সতাইল, ফুদ প্রোসেসিং, সেরামিক্স অমসুং থুমগী পোত্থোক পুথোকপা য়াওনা তোঙান তোঙানবা ইন্দস্ত্রীশিংদা উবা ফংলিবা চাউখৎপা অদু পনখি। শ্রী মোদীনা কচ্ছকী ত্রেদিস্নেল ক্রাফ্টশিং হায়বদি কচ্ছ এম্ব্রোদরী, ব্লোক প্রিন্তিং, বন্দেনি ফেব্রিক, অমসুং লেদরৱার্ক অসি পাক শন্না শকখঙনবা ৱাফম থমখি অমসুং প্রধান মন্ত্রীনা ভুজোদী খুঙ্গংবু হেন্দলুম আর্তিস্ত্রীগী অহিংবা ম্যুজিয়ম অমা ওইনা থাগৎপা ফোংদোকখি। মহাক্না হৌজিক্তি জিওগ্রাফিকেল ইন্দিকেসন (জি.আই.) তেগ ফংখ্রবা অজরাখ প্রিন্তিংগী তোপ তোপ্পা চৎনবীবুসু শকখঙখি। মহাক্না মরুওইনা ত্রাইবেল ইমুংশিং অমসুং আর্তিসানশিংগীদমক মসিগী শকখঙবগী মরুওইবা অদু ফোংদোকখি, মরমদি মসিনা মখোয়গী কলচরেল আইদেন্তিতী অমসুং আর্তিসানশিপ মপাঙ্গল কনখৎহল্লি। মসিগী মথক্তা, শ্রী মোদীনা কেন্দ্রগী বজেৎকী মরুওইবা প্রোভিজনশিং অদু পনখি মদুদি লেদর অমসুং তেক্সতাইল ইন্দস্ত্রীশিংদা মতেং পাংলি। মহাক্না সেক্তরশিং অসিবু খুমাং চাউশিলহন্নবা সরকারগী ফিরেপ অদু অমুক হন্না ফোংদোকখি।

কচ্ছকী থবক কন্না তৌরিবা লৌমীশিংদা ইকায় খুম্নবা উৎলদুনা, অৱাবা কয়া মায়োক্নবদা মখোয়না হোৎনখিবা অদুগীদমক থাগৎপা ফোংদোক্লদুনা, প্রধান মন্ত্রীনা গুজরাত্তা গ্রাউন্দ ৱাতর লেবেল য়াম্না হন্থরকখিবা মতম অদু নীংশিংখি। অদুম ওইনমক, নর্মদা জীগী য়াইফ-মঙ্গোল অমসুং সরকারগী কৎথোক্লবা থৌনাগী মতেংনা, ফীভম অসি হোংলক্লি। প্রধান মন্ত্রীনা কেভাদিয়াদগী মোদকুবা ফাওবা শাংদোক্লিবা কেনেল অসিনা কচ্ছকী লাইবকশিং শেমগৎপদা অচৌবা থৌদাং লৌরি হায়না ফোংদোকখি। ঙসিদি কচ্ছকী লৌউ-শিংউগী পোত্থোকশিং হায়বদি হৈনৌ, দেৎশিং, কম্ফোই, জিরা অমসুং দ্রাগন ফ্রুত অসি মালেমগী কৈথেলশিংদা য়ৌরক্লি হায়না মহাক্না পনখি। লমদম অসিগী মমাংঙৈগী মতমগী মরমদা পল্লদুনা, পি.এম.না হায়খি মদুদি মতম অমদা কচ্ছতা খুদোংচাবশিং মরাং কায়না লৈতবনা মরম ওইদুনা মীশিং নমদুনা মাইগ্রেসন তৌবা তাখি। অদুম ওইনমক, অৱাংবা থাক্তা খুমাং চাউশিল্লকপগা লোয়ননা, মফম অসিগী নহারোলশিংনা হৌজিক্তি কচ্ছতা থবক ফংলি, মসিনা লমদম অসিগী চাউখৎলক্লিবা চাউখৎপগী খুদম অমা ওইরি।

শ্রী মোদীনা ভারতকী নহারোলশিংদা থবক ফংহন্নবা খুদোংচাবশিং ফংহনবা অসি মহাক্কী সরকারগী মরুওইবা প্রাইওরিতী অমা ওইরি হায়না অমুক হন্না ফোংদোকখি। মহাক্না অকনবা ৱাফম থমখি মদুদি তুরিজম অসি পাক-শন্না থবক পীবা ঙম্বা সেক্তর অমনি অমসুং কচ্ছ অসি মাগী ইনাক খুল্লবা পুৱারী, কলচরেল হেরিতেজ, অমসুং মহৌশাগী ফজবা লৈবনা লম অসিদা পাকথোক চাউথোকহন্নবগীদমক্তা অফবা মফম অমা ওইরি। কচ্ছকী রান উৎসাৱকী মীয়াম্না পাম্নবা হেনগৎলকপদা হরাওবা ফোংদোক্লদুনা শ্রী মোদীনা স্মৃতি ভান মেমোরিএলবু য়ুনেস্কোনা মালেমগী খ্বাইদগী ফবা ম্যুজিয়মশিংগী মনুংদা অমা ওইনা শকখঙখ্রে হায়না পনখি। লাক্কদৌরিবা চহিশিংদা কচ্ছকী তুরিজম ইন্দস্ত্রী অসি মখা তানা চাউখৎলগনি হায়না মহাক্না ফোংদোকখি। মহাক্না হায়খি মদুদি ধোরদো খুঙ্গং অসি মালেমগী ওইনা খ্বাইদগী ফবা তুরিজম খুঙ্গং অমা ওইনা মালেমগী ওইনা শকখঙনখ্রে। মসিগী মথক্তা, মান্দবীগী সমুদ্র তোর্বান অসি ভিজিতেরশিংগী অচৌবা এত্রেক্সন অমা ওইরক্লি। শ্রী মোদীনা গুজরাতকী মুখ্য মন্ত্রীদা তুরিজমগী ওইথোকপা য়াবা হেনগৎহন্নবগীদমক রন উৎসবকী মনুংদা মান্দবীদা বীচ ফেস্তিবেল অমা পাংথোক্নবা হায়খি। অহমেদাবাদ অমসুং ভুজগী মরক্তা নমো ভারত রেপিদ রেলনা লমদম অসিদা তুরিজমবু মখা তানা হেনগৎহনগনি হায়নসু মহাক্না পনখি।

প্রধান মন্ত্রীনা হায়খি মদুদি ২০১৪দা মহাক্না অহানবা ওইনা প্রধান মন্ত্রী ওইনা শিন্নখিবা নুমিৎ ওইবনা মে ২৬ অসি অখন্নবা মরুওইবা অমা ওইরি। মহাক্না মখা তাখি মদুদি ঙসিদি ভারত অসি ২০১৪দগী মালেমগী খ্বাইদগী চাউবা ১১শুবা ইকোনোমী ওইদুনা মালেমগী খ্বাইদগী চাউবা ৪শুবা ইকোনোমী ওইরে। মহাক্না মীয়ামগা শম্নহন্নবা লম্বী অমা ওইনা তুরিজমদা ভারতকী মপাঙ্গল কনবা থাজবা অদু অমুক হন্না ফোংদোকখি। মসি তুরিজমগী মহুত্তা তেরোরিজমবু পুক্নিং থৌগৎলিবা পাকিস্তানগুম্বা লৈবাকশিংগা চাংদম্নখি। তেরোরিজম অসি মালেমগী ওইনা অচৌবা খুদোংচাদবা অমনি অমসুং ভারতনা মসিগী মায়োক্তা জিরো-তোলরেন্স পোলিসী অমা লৈ হায়না মহাক্না অমুক হন্না ফোংদোকখি। ওপরেসন সিন্দুরগী মতাংদা পল্লদুনা প্রধান মন্ত্রীনা হায়খি মদুদি মিসন অসিনা তেরোরিজমগী মায়োক্তা ভারতকী অচেৎপা ফিরেপ অদু উৎলি। ভারতকী প্রজাশিংদা অশোক-অপন থোকহন্নবা হোৎনবা খুদিংমক চপ মান্নবা লোলদা অকনবা পাউখুম পীরগনি হায়না মহাক্না ফোংদোকখি অমসুং ভারতপু শিংননবা হোৎনরিবশিং অদুনা মতিক চাবা মহৈ ফংগনি হায়না মহাক্না অকনবা ৱাফম থমখি।

প্রধান মন্ত্রীনা হায়খি, "ওপরেসন সিন্দুর অসি মীওইবা জাতিবু ঙাকথোক্নবা অমসুং তেরোরিজম মুত্থৎনবা মিসন অমনি।" মহাক্না এপ্রিল ২২গী মতুংদা বিহারদা পাংথোকখিবা রেলী অমদা মহাক্না তেরর আউৎফিৎশিং অমসুং ইনফ্রাস্ত্রকচরশিং থুগায়নবা ৱাশক লৌখিবা অদু নীংশিংখি। পহলগামগী লানগী চয়োল অনিগী মতুংদা পকিস্তাননা তেরোরিস্তশিংগী মায়োক্তা থবক অমত্তা পায়খৎখিদবদা পাউখুম পীনবা ভারতকী আর্মদ ফোর্সশিংদা য়াথং পীখি হায়নসু মহাক্না পনখি। মহাক্না হায়খি মদুদি ভারতনা তেরোরিস্ত হেদক্বার্তরশিংবু নিংথিনা তার্গেৎ তৌদুনা, মাগী আর্মদ ফোর্সেসকী কেপাসিতী অমসুং দিসিপ্লিন উৎলি। মহাক্না হায়খি মদুদি ভারতনা মালেমদা উৎখ্রে মদুদি মানা তেরোরিস্তশিংগী মফমশিংবু ময়েক শেংনা মুত্থৎপা ঙম্মি। প্রধান মন্ত্রীনা মখা তানা পনখি মদুদি ভারতনা অকনবা খোঙথাং লৌখৎলকপদগী পাকিস্তাননা অকিবা পোকখিবা অদু পনখি। মহাক্না পুক্নিং চিংশিনখি মদুদি পাকিস্তাননা ভারতকী সিভিলিয়নশিংদা লান্দারক্নবা হোৎনখি, অদুবু ভারতনা মখোয়গী লান্মীগী মফমশিংদা য়াম্না কন্না লান্দাবগা লোয়ননা শরুক অনি হেন্না লান্দাখি। মহাক্না মখা তাখি, "পাকিস্তানগী এয়রবেজশিং অমসুং মিলিতরী ইন্সতোলেসনশিং ভারতনা মাংহনখিবনা মালেমবু থোইদোক্না অঙকপা পোকহনখি।" মহাক্না আর্মদ ফোর্সশিংবু মখোয়গী অখন্নবা প্রোফেস্নেলিজম, থৌনা অমসুং প্রিসিজনগীদমক থাগৎপা ফোংদোকখি।

১৯৭১গী পুৱারী ওইরবা লান, মদুদা পাকিস্তানগী লান্মীনা ভুজ এয়র বেজদা লান্দারকখিবা অদু নীংশিংলদুনা, শ্রী মোদীনা ভুজকী নুপীশিংগী থোইদোক হেন্দোকপা থৌনাগীদমক থাগৎপা ফোংদোকখি। মখোয়না অরুবা ফিভমদা এয়র বেজ অদু অমুক হন্না শেমগৎপদা মরুওইবা থৌদাং লৌখি। মহাক্না হায়খি মদুদি, পাকিস্তাননা লেপ্তনা বোম্ব থাদরকখিবা মতমদা, ভুজকী নুপীশিংনা এয়রবেজ অসি পুং ৭২গী মনুংদা অমুক হন্না শেমগৎখি, মসিনা মাগী থবকশিং অথুবা মতমদা পাংথোকপা ঙমহনখি। মহাক্না হায়খি মদুদি মহাক্না হায়রিবা থৌনা ফরবা নুপীশিং অসিগা মমাংদা উনবগী খুদোংচাবা ফংখি। মহাক্না মখোয়গী রেসিলিয়েন্স অমসুং কন্ত্রিব্যুসনশিংবু থাগৎপা ফোংদোকখি।

প্রধান মন্ত্রীনা হায়খি, "ভারতকী লান্থেং অসি ঙমখৈ লান্না চত্থবা তেরোরিজম অমসুং মদুগী স্পোন্সরশিংগা লান্থেংনবনি।" মহাক্না হায়খি মদুদি ভারতকী য়েক্নবা অসি তেরোরিজমবু পুক্নিং থৌগৎলিবা ফোর্সশিংগা ওই, লৈবাক অমহেক্তগী মীওইশিংগা নত্তে। কচ্ছতগী পাকিস্তানগী প্রজাশিংদা ৱা ঙাংলদুনা, প্রধান মন্ত্রীনা মখোয়দা লৈরিবা ফীভম অদু খঙহন্নবা হায়খি। মহাক্কী সরকার অমসুং মিলিতরীনা তেরোরিজমবু শৌগৎপীরি অমসুং শেল তানবগী পাম্বৈ অমা ওইনা শিজিন্নরি হায়না মহাক্না পনখি। মহাক্না পাকিস্তানগী মীয়ামদা হায়খি মদুদি মসিগী লম্বী অসি তশেংনমক মখোয়গী য়াইফনবগীদমক্তা ওইগদ্রা হায়বদু য়েংশিনগদবনি। মহাক্না হায়খি মদুদি পাৱর-দ্রিভন এজেন্দাশিংনা পাকিস্তানগী মীওইশিংগী পুন্সিদা খুদোংথীবা থোকহল্লি অমসুং মখোয়গী অঙাংশিংগী তুংলমচৎপু অমম্বা মাইকৈদা পুশিল্লি। প্রধান মন্ত্রীনা পুক্নিং চিংশিনখি মদুদি করিগুম্বা পাকিস্তাননা তেরোরিজমগী ফত্তবা অসিদগী লাপথোকপা পাম্লবদি, মাগী মীয়ামনা মসিগী মায়োক্তা লেপকদবনি অমসুং মসি মুত্থৎপদা শরুক য়াগদবনি।

ভারতকী ময়েক শেংবা লমজেল অদু অমুক হন্না ফোংদোক্লদুনা অমসুং লৈবাক অসিনা চাউখৎপা, শান্তি অমসুং নুংঙাই য়াইফবগী লম্বী অদু খনখ্রে হায়না পল্লদুনা শ্রী মোদীনা থাজবা ফোংদোকখি মদুদি কচ্ছকী স্পিরিৎ অসিনা ভারতপু চাউখৎলবা লৈবাক অমা ওইহন্নবা হোৎনবদা ইথিল পীগনি। মাংলোমদা চংশিল্লক্লিবা, কচ্ছিগী অনৌবা চহি লাকপদা, শ্রী মোদীনা লাক্কদৌরিবা আশাধি বিজগীদমক মহাক্কী য়াইফ পাউজেল পীখি। মহাক্না কচ্ছকী মীয়াম্বু মখোয়গী চাউখৎপা অমসুং চাউখৎ-থৌরাংগী মায় পাকপশিংগীদমক অমুক হন্না থাগৎপা ফোংদোক্লদুনা ৱারোইশিন পীখি।

থৌরম অদুদা গুজরাতকী মুখ্য মন্ত্রী, শ্রী ভুপেন্দ্রভাই পতেল, কেন্দ্রগী পাৱর অমসুং হাউজিং অমসুং অর্বান এফিয়র্সকী মন্ত্রী, শ্রী মনোহর লাল য়াওনা অতোপ্পা শক্নাইরবশিংসু শরুক য়াখি।

বেকগ্রাউন্দ

প্রধান মন্ত্রীনা গুজরাতকী ভুজতা লুপা করোর ৫৩,৪০০ হেনবগী দিবেলপমেন্ত প্রোজেক্ত কয়াগী উরেপ উয়ুং তমখ্রে অমসুং শঙ্গাখ্রে। পাৱর সেক্তরগী প্রোজেক্তশিং অসিদা খাবদা রিন্যুএবল ইনর্জী পার্কতা পুথোকপা রিন্যুএবল ইনর্জী থাদোক্নবা ত্রান্সমিসন প্রোজেক্তশিং, ত্রান্সমিসন নেতৱার্ক পাকথোক চাউথোকহনবা, তাপিদা অল্ত্রা সুপর ক্রিতিকেল থর্মেল পাৱর প্লান্ত য়ুনিৎ য়াওরি। মসিদা কন্দলা পোর্তকী প্রোজেক্তশিং অমসুং গুজরাত সরকারগী লম্বী, ঈশিং অমসুং সোলর প্রোজেক্ত কয়াসু য়াওরি।

***