এয়র ত্রেবেল অসি শাফবা, মমল হোংবা অমসুং মীপুম খুদিংমক্তা য়ৌহনবগী মহাক্কী অচেৎপা ফিরেপ অদুগী মতুং ইন্না, প্রধান মন্ত্রী শ্রী নরেন্দ্র মোদীনা ঙসি হরিয়ানাগী হিসারদা লুপা করোর ৪১০ হেন্না চংগদবা মহারাজা অগ্রেসেন এয়রপোর্তকী অনৌবা তর্মিনেল বিল্দিংগী উরেপ উয়ুং তমখ্রে। মীয়াম তিনখিবা অদুদা ৱা ঙাংলদুনা মহাক্না হরিয়ানাগী মীয়ামদা য়াইফ-পাউজেল পীখি। রাজ্য অসিগী মশক তাক্লিবা মগুনশিং অদুদি মখোয়গী শক্তি, স্পোর্তসমেনশিপ অমসুং ব্রদরহুদনি হায়না মহাক্না ফোংদোকখি। মহাক্না লৌরোক পন্থাগী চিল্লবা মতম অসিদা থৌজাল পীনবগীদমক মশিং য়াম্লবা মীয়াম্না তিনখিবা অদুবু থাগৎপা ফোংদোকখি।

প্রধান মন্ত্রীনা গুরু জম্বেশ্বর, মহারাজা অগ্রেসেন অমসুং শেংলবা অগরোহা ধামদা ইকায় খুম্নবা উৎখি। মহাক্না হরিয়ানাগী, মরু ওইনা হিসারগী মহাক্কী হৌখ্রবা মতম অদু পল্লদুনা মহাক্না মহাক্কী পার্তীনা মহাকপু রাজ্য অসিগী থৌদাংশিং পীখিবা মতমদা মহাক্কী মরুপ কয়াগা লোয়ননা নক্না থবক তৌমিন্নখিবা মতম অদু মহাক্না নীংশিংখি। মহাক্না হরিয়ানাদা পার্তীগী ফাউন্দেসন মপাঙ্গল কনখৎহন্নবা মহাক্কী মরুপশিং অসিনা হোৎনরিবা অদু পনখি। মহাক্না চাউখৎলবা হরিয়ানা অমসুং চাউখৎলবা ভারতকী পান্দমদা মহাক্কী পার্তীনা অচেৎপা থাজবা থম্লিবা অমসুং মসিগী মঙলান অসিগী মায়কৈদা থবক তৌরিবা অসিদা চাউথোকচবা ফোংদোকখি।

প্রধান মন্ত্রীনা হায়খি মদুদি “ঙসি অসি লৈবাক পুম্বগীদমক্তা য়াম্না মরু ওইবা নুমিৎ অমনি মরমদি মসি সম্বিধানগী আর্কিতেক্ত, বাবাসাহেব অম্বেদকরগী মপোক কুমওননি”। বাবাসাহেবকী পুন্সি, মহাক্কী লান্থেং অমসুং মহাক্কী পাউজেল অসিনা সরকার অসিগী চহি ১১গী খোঙচৎ অসিগী য়ুম্ফম ওইরি। সরকার অসিগী ৱারেপ খুদিংমক, পোলিসী খুদিংমক অমসুং নুমিৎ খুদিংগী তৌরিবা থবকশিং অসি বাবাসাহেবকী মীৎয়েং অদুগীদমক কত্থোক্লে হায়না মহাক্না অকনবা ৱাফম থমখি। মহাক্না হায়খি মদুদি সরকার অসিনা খুদোংচাবা ফংদ্রবা, তুহৎপীরবা, লায়রবা, ত্রাইবেল কম্ম্যুনিতী অমসুং নুপীশিংগী পুন্সি ফগৎহন্নবা অমসুং মখোয়গী মঙলানশিং মপুং ফাহন্নবগীদমক লেপ্লি। মহাক্না হায়খি মদুদি লেপ্পা লৈতনা অমসুং খোঙজেল য়াংনা চাউখৎপা অসি পান্দমশিং অসি ফংনবগীদমক্তা মখোয়গী সরকারগী মন্ত্র ওইরি।

হরিয়ানা অমসুং অয়োধ্যা ধামগা শম্নহল্লিবা ফ্লাইৎ হৌদোকখিবগী মতাংদা পল্লদুনা শ্রী কৃষ্ণগী শেংলবা লমদম অমসুং ভগবান রামগী সহরগা হকথেংননা শম্নহল্লিবা অসিগী খুদম অমা ওইরিবা অসি পল্লদুনা প্রধান মন্ত্রীনা হায়খি মদুদি অতোপ্পা সহরশিংদা ফ্লাইৎশিং অথুবা মতমদা হৌরগনি। মহাক্না হিসার এয়রপোর্তকী অনৌবা তর্মিনেল বিল্দিংগী উরেপ উয়ুং তম্বগী থৌরম অদু পনখি। মসি হরিয়ানাগী এস্পিরেসনবু অনৌবা থাক্তা পুখৎনবগী খোঙথাং অমনি হায়না মহাক্না হায়খি। মরুওইবা মাইলস্তোন অসিগীদমক মহাক্না হরিয়ানাগী মীয়ামদা নুংঙাইবা ফোংদোকখি।

লৈবাক শিনবা থুংনা হৌজিক মঙফাওনরক্লিবা মঙলান অমা ওইরিবা, স্লিপ্পর তোংবা মীওইশিং ফাওবা এয়রপ্লেনদা তোংগনি হায়না মহাক্না থাজবা পীখিবা অদু নৌহৌনা পল্লদুনা, হৌখিবা চহি ১০দা ভারত মচা মিল্লিয়ন কয়ানা অহানবা ওইনা এয়র ত্রেভেলগী খুদোংচাবা ফংলে হায়না শ্রী মোদীনা ফোংদোকখি। মহাক্না হায়খি মদুদি হান্নদি মতিক চাবা রেলৱে স্তেসন লৈতবা মফমশিংদা অনৌবা এয়রপোর্তশিংসু শাখ্রে। মহাক্না হায়খি মদুদি ২০১৪গী মমাংদা, ভারত্তা চহি ৭০গী মনুংদা এয়রপোর্ত ৭৪ লৈরম্মি, অদুবু ঙসিদি এয়রপোর্ত ১৫০গী মথক্তা লৈরে। মহাক্না অকনবা ৱাফম থমখি মদুদি উরান স্কিমগী মখাদা এয়রদ্রোম ৯০ রোমগা শম্নখ্রে। মসিদা রুত ৬০০ হেন্না মথৌ তৌরি। মসিনা মীওই কয়াগীদমক শেল চংদবা এয়র ত্রেভেল তৌবগী খুদোংচাবা ফংহল্লি। মহাক্না হায়খি মদুদি মসিনা চহিগী ওইনা এয়র ত্রেভেলরশিংগী খ্বাইদগী ৱাংবা মশিং য়ৌখ্রে। মহাক্না মখা তানা হায়খি মদুদি তোঙান তোঙানবা এয়রলাইন্সশিংনা অনৌবা এয়রক্রাফ্ত ২,০০০গী রেকোর্দ ওইনা ওর্দর পীখ্রে। মসিনা পাইলোৎশিং, এয়র হোস্তেসশিং অমসুং অতোপ্পা সর্ভিসশিংগীদমক থবক কয়া অমা শেমগৎলগনি। এয়রক্রাফ্তগী মেনতেন্সন সেক্তরনা থবক ফংহন্নবা অচৌবা খুদোংচাবশিং পীগনি হায়নসু মহাক্না ফোংদোকখি। “হিসার এয়রপোর্তনা হরিয়ানাগী নহারোলশিংগী এস্পিরেসনশিং হেনগৎহল্লগনি, মখোয়দা অনৌবা খুদোংচাবশিং অমসুং মঙলানশিং ফংহল্লগনি," হায়না মহাক্না মখা তাখি।

“ঐখোয়গী সরকারনা কন্নেক্তিবিতীদা মীৎয়েং চংদুনা লায়রবশিংগী য়াইফ-থৌরাং অমসুং সোসিএল জস্তিস ফংহন্দুনা বাবাসাহেব অম্বেদকরগী মীৎয়েং অমসুং সম্বিধান শেম্লিবশিংগী অপাম্বশিং মপুং ফাহল্লি", হায়না প্রধান মন্ত্রীনা ফোংদোকখি। মহাক্না কংগ্রেস পার্তীবু বাবাসাহেব অম্বেদকরবু ইকায় খুম্নদবগীদমক মরাল শিখি। মহাক্না হায়খি মদুদি মহাক্না হিংলিঙৈ মতমদা, মখোয়না মহাকপু ইকায়বা পীখি, মহাক্কী মীখলদা অনিরক মায়থিবা নংহনখি, অমসুং মহাকপু সিস্তেম অসিদগী লৌথোক্নবা থৌরাং তৌখি। মহাক্না হায়খি মদুদি বাবাসাহেব লৈখিদ্রবা মতুংদা, পার্তী অসিনা মহাক্কী লিগেসি মুত্থৎনবা অমসুং মহাক্কী ৱাখল্লোনশিংবু মুত্থৎনবা হোৎনখি। মহাক্না হায়খি মদুদি দা. অম্বেদকরনা সম্বিধানগী ঙাক্লৌ ওইরম্মি, অদুগা মখোয়না সম্বিধানবু থুগাইবা ওইরকখি। মহাক্না হায়খি মদুদি দা. অম্বেদকরনা থোং মান্নবা পুরক্নবা পান্দম থমখি, কংগ্রেসনা লৈবাক অসিদা ভোৎ বেঙ্ক পোলিসীগী ভাইরস শন্দোকখি।

শ্রী মোদীনা হায়খি মদুদি বাবাসাহেব অম্বেদকরনা লায়রবা অমসুং শোত্থরবা মীওই খুদিংগীদমক ইকাই খুম্নবা পুন্সি অমা, মখোয়গী মঙলানশিং অমসুং অপাম্বশিং মপুং ফাহনবা ঙম্বা পুন্সি অমগী মঙলান শাগৎলমখি। মহাক্না মমাংগী সরকারগী মতম শাংনা লৈরম্বা মতমদা এস.সি., এস.তি. অমসুং ও.বি.সি. কম্ম্যুনিতীশিংবু সেকেন্দ-ক্লাস সিতিজনশিং ওইনা লৌবগীদমক মমাংগী সরকারবু চৈখি। মহাক্না মখোয়গী লৈঙাক্কী মখাদা লৈরম্বা দিস্পেরিতী অদু ফোংদোকখি, লুচিংবা খরগী স্বিমিং পুলশিংদা ঈশিং য়ৌখি অদুবু খুঙ্গংশিংদা য়ৌখিদে। নীংতম্বা ফংলবা চহি ৭০গী মতুংদসু, খুঙ্গংগী ইমুংশিংগী চাদা ১৬ খক্তদা তেপ ৱাতর কনেক্সন ফংলম্মি, মসিনা এস.সি., এস.তি. অমসুং ও.বি.সি.দা চাউনা চৈথেং পীখি। মহাক্না হায়খি মদুদি হৌখিবা চহি ৬-৭ অসিদা, মখোয়গী সরকারনা খুঙ্গংগী ইমুং করোর ১২গী মথক্তা তেপ ৱাতর কনেক্সন ফংহনখ্রে। মসিনা খুঙ্গংগী ইমুংশিংগী ৮০%দা কভরেজ হেনগৎহল্লে। মহাক্না থাজবা থমখি মদুদি বাবাসাহেবকী য়াইফ-মঙ্গোলগা লোয়ননা থক্নবা ঈশিং অসি য়ুমথোং খুদিংদা য়ৌহল্লগনি। মহাক্না এস.সি., এস.তি. অমসুং ও.বি.সি. কম্ম্যুনিতীশিংদা য়াম্না শাথীনা শোকহল্লিবা তোইলেৎ লৈতবগী মতাংদসু পনখি। লায়রবা মীওইশিংগীদমক ইকাই খুম্নরবা পুন্সি অমা লৈহন্নবা, তোইলেৎ করোর ১১ হেন্না শাবগী থবক সরকারনা পায়খৎলিবা অদু মহাক্না পনখি।

দিসপেন্সনগী লৈঙাক অদুবু চৈরদুনা হায় মসিনা মরম ওইদুনা এস.সি., এস.তি. অমসুং ও.বি.সি. কম্ম্যুনিতীশিংনা অচৌবা পল কয়া মায়োক্নখি। বেঙ্কশিং ফাওবা এক্সেস তৌবা হায়বসি ফংলরোইদবা মঙলান অমা ওইখি। প্রধান মন্ত্রীনা হায়খি মদুদি ইন্সুরেন্স, লোন অমসুং ফাইনান্সিএল এসিস্তেন্স অসি মখোয়গীদমক্তা ফংলরোইদবা মঙলান অমা ওইখি। মহাক্কী সরকারগী মখাদা জন ধন একাউন্তশিংগী খ্বাইদগী চাউবা কান্নবা ফংলবশিং অসি এস.সি., এস.তি. অমসুং ও.বি.সি. কম্ম্যুনিতীশিংনি হায়খি। মহাক্না চাউথোকচবা ফোংদোকখি মদুদি ঙসিদি, হায়রিবা মীওইশিং অসিনা মখোয়গী রুপে কার্দশিংবু  মশাদা থাজবগা লোয়ননা উৎলি, মসিনা মখোয়গী শেল-থুমগী ওইবা ইনক্লুজন অমসুং শক্তি লৈহনবগী খুদম্নি।

শ্রী মোদীনা কংগ্রেস পার্তীবু শেংলবা সম্বিধানবু শক্তি ফংনবগী খুৎলাই অমা ওইনা ওন্থোকপগীদমক চৈখি। মহাক্না ফোংদোকখি মদুদি মখোয়না শক্তিগী অৱাবা মায়োক্নরকপা মতম খুদিংদা, মসিনা সম্বিধানবু থুগাইখি। মহাক্না ইমর্জেন্সীগী মতম অদুদা মতমদুগী সরকারনা শক্তি লৈহন্নবা সম্বিধানগী স্পিরিত অদু মাংহনখিবগী মতাংদা পনখি। সম্বিধানগী মরুওইবা ৱাফমদি পুম্নমক্কীদমক য়ুনিফোর্ম সিভিল কোদ অমা লৈহনবনি হায়না মহাক্না অকনবা ৱাফম থমখি। অদুবু মতমদুগী সরকারনা মসি থবক ওইনা পাংথোকখিদে। য়ুনিফোর্ম সিবিল কোদ অসি সম্বিধানগী প্রিন্সিপলশিংগা মান্নরবসু উত্তরাখন্দদা চৎনহনখিদবা অদু মহাক্না পনখি।

প্রধান মন্ত্রী শ্রী নরেন্দ্র মোদীনা হায়খি মদুদি সম্বিধান্না এস.সি., এস.তি. অমসুং ও.বি.সি. কম্ম্যুনিতীশিংগীদমক রিজার্বেসনগী প্রোভিজন শেম্লে, অদুবু কংগ্রেসনা মসিবু এপীজমেন্তগী খুৎলাই অমা ওইহনখি। কর্নাতকাগী হৌজিক লৈরিবা সরকারনা সম্বিধান্না অসিগুম্বা প্রোভিজনশিং অসি অয়াবা পীদ্রবসু ধর্মগী মতুং ইন্না সরকারগী তেন্দরদা রিজর্বেসন পীবগী হন্দক্কী  রিপোর্তশিংগী মতাংদা মহাক্না পনখি। মহাক্না হায়খি মদুদি এপীজমেন্ত পোলিসীশিংনা মুস্লিম কম্ম্যুনিতীদা য়াম্না চাউনা খুদোংথীবা পীরি। মসিনা এক্সত্রিমিস্ত খরা খক্তদা কান্নবা ফংহল্লি অদুগা খুন্নাইগী অতোপ্পশিংবু কান্নবা ফংহন্দনা, মহৈ তম্বা ফংহন্দনা অমসুং লায়রবা ওইহল্লি। মহাক্না ৱাকফ এক্ত অসি মমাংগী সরকারগী অশোয়বা পোলিসীশিংগী খ্বাইদগী চাউবা খুদমনি হায়না পনখি। মহাক্না হায়খি মদুদি ২০১৩দা, মীখল পাঙথোক্কদবগী থা খরা মাংওইননা, কংগ্রেসনা ৱাকফ এক্ত অসি ভোৎ বেঙ্ক অসিবু এপীজ তৌনবগীদমক শেমদোকখি, মসিনা কন্সতিত্যুস্নেল প্রোভিজন কয়াদগী হেন্না ৱাংখৎখি।

কংগ্রেসনা মুসলিমশিংগী য়াইফনবগীদমক থবক তৌরি হায়না ফোংদোকপগা লোয়ননা করিগুম্বা পার্তী অসিনা মুসলিম কম্ম্যুনিতীগীদমক্তা তশেংনা মীৎয়েং চঙলবদি পার্তীগী প্রসিদেন্ত ওইনা মুসলিম অমবু খল্লমগনি নৎত্রগা মখোয়গী তিকেৎশিংগী ৫০% মুসলিম কেন্দিদেৎশিংদা পীরমগনি হায়না শ্রী মোদীনা ফোংদোকখি। ৱাকফকী মখাদা লৈবা লমগী অচৌবা ত্রেক্তশিং, লায়রবশিং, কনা লৈজদ্রবা নুপীশিং অমসুং অঙাংশিংদা কান্নবা পীনবা শেম্বা অদুবু মদুগী মহুত্তা লম মাফিয়া খরনা শীজিন্নখি হায়না পল্লদুনা শ্রী মোদীনা হায়খি মদুদি মাফিয়াশিং অসিনা দলিতশিং, শোত্থরবা কাংলুপশিং অমসুং ত্রাইবেলশিংগী লমদা খুদোংচাদবা কয়া মায়োক্নহনখি। ৱাকফ এক্তকী এমেন্দমেন্তশিংনা অসিগুম্বা এক্সপ্লোইতেসন অসি লোইশিনগনি হায়না মহাক্না পনখি। অহোংবা আইন অসিদা মরুওইবা অনৌবা প্রোভিজন অমা য়াওরি, মদুদি ৱাকফ বোর্দশিংনা ত্রাইবেলশিংগী লমদা খুৎ থিংজিনবা য়াহল্লোই হায়না মহাক্না ফোংদোকখি। মহাক্না মসিবু ত্রাইবেলশিংগী ইন্তরেস্ত ঙাক্নবা মরুওইবা খোংথাং অমনি হায়না শন্দোক্না তাকখি। মহাক্না হায়খি মদুদি অনৌবা প্রোভিজনশিং অসিনা ৱাকফকী অশেংবা মশক অদুদা ইকায় খুম্নবা উৎলগনি। মসিনা লায়রবা অমসুং পাস্মান্দা মুস্লিম ইমুংশিং, নুপী অমসুং অঙাংশিংগী হকশিং ঙাক্লগনি। মসিনা সম্বিধানগী অশেংবা ৱাখল্লোন অমসুং অশেংবা সোসিএল জস্তিস উৎলি হায়না মহাক্না ফোংদোকখি।

বাবাসাহেব অম্বেদকরগী লিগেসীবু ইকায় খুম্নবা অমসুং তুংগী মীরোলশিংবু পুক্নিং থৌগৎনবা ২০১৪দগী লৈঙাক্না লৌখৎলিবা খোংথাং কয়া অদু পল্লদুনা, প্রধান মন্ত্রীনা হায়খি মদুদি ভারত অমসুং মপাল লৈবাক অনিমক্তা বাবাসাহেবকা মরী লৈনবা মফমশিং অসি চহি কয়াগী মমাংদগী কান্নবা ফংদ্রি। মহাক্না হায়খি মদুদি মুম্বাইগী ইন্দু মিলদা বাবাসাহেবকী মেমোরিএল অমা শাবগীদমক্তা মীওইশিংনা খোঙজং চংশিনখি। মহাক্না অকনবা ৱাফম থমখি মদুদি মখোয়গী সরকারনা মরুওইবা মফম পুম্নমক, এমহৌদা লৈবা বাবাসাহেবকী পোক্নফম, লন্দন্দা লৈবা মহাক্কী মহৈ তম্বগী মফম, দিল্লীদা লৈবা মহাক্কী মহাপারিনির্ভন স্তাল অমসুং নাগপুরদা লৈবা মহাক্কী দিক্ষা ভুমী অসিনচিংবা অসি "পঞ্চতীর্থ" ওইহন্দুনা শেমগৎলে। মহাক্না বাবাসাহেববু ইকায় খুম্নবা উৎনবা হন্দক্তা দিক্ষা ভুমিদা চৎলুবগী মহাক্কী খুদোংচাবা অদু শন্দোক্না হায়খি। প্রধান মন্ত্রীনা কংগ্রেসপু বাবাসাহেব অমসুং চৌধরী চরন সিংহবু মখোয়গী থবক তৌরিঙৈ মনুংদা ভারত রত্নগা লোয়ননা ইকায় খুম্নবা উৎপদা মায়থীবা পীরদুনা সোসিএল জস্তিসকী মতাংদা ৱা ঙাংবগীদমক মরাল শিখি। মহাক্না চাউথোক্না হায়খি মদুদি কেন্দ্রদা বিজেপিনা শৌগৎপা সরকার অমা লৈরিঙৈদা বাবাসাহেবপু ভারত রত্ন পীখি অমসুং চৌধরী চরন সিংহবু ভারত রত্ন পীখিবা অসিসু মখোয়গী পার্তী অদুনি।

হরিয়ানা সরকারনা খুন্নাইগী অচুম্বা ৱায়েল অমসুং লায়রবশিংগী য়াইফ-থৌরাংগী লম্বী অসিবু মপাঙ্গল কনখৎহন্নবগীদমক থাগৎপা ফোংদোক্লদুনা, প্রধান মন্ত্রীনা হরিয়ানাদা মমাংগী লৈঙাক্কী মখাদা লৈঙাক্কী থবকশিংগী অৱাবা ফীভম অদু পনখি। থবক ফংনবগীদমক্তা মীওইশিংনা রাজনিতীগী মরীশিংদা থাজবা থমগদবনি নত্ত্রগা মখোয়গী ইমুং-মনুংগী লন-থুমশিং য়োনগদবনি। প্রধান মন্ত্রীনা হায়খি মদুদি মুখ্য মন্ত্রী নয়াব সিংহ সাইনিগী সরকারনা অসিগুম্বা শেঞ্জা-থুমজা তৌবগী থৌওংশিং অসি মুত্থৎখ্রে। প্রধান মন্ত্রীনা হরিয়ানাগী লুচিংবশিংবু থাগৎপা ফোংদোকখি। হরিয়ানাগী নহারোল ২৫,০০০ সরকারগী থবক ফংহন্দনবা মমাংগী সরকারশিংনা হোৎনখি হায়না মহাক্না পনখি। অদুম ওইনমক, মুখ্য মন্ত্রাঈ নয়াব সিংহ সাইনিনা ওফিস পায়রকপা মতমদা, মতিক চাবা কেন্দিদেৎশিংদা এপোইন্তমেন্ত লেতর লিশিং কয়া পীখি। মহাক্না মসিবু মখোয়গী অফবা লৈঙাকপগী খুদম অমনি হায়খি অমসুং লাক্কদৌরিবা চহিশিংদা অনৌবা থবক লিশিং কয়া শেমগৎনবা সরকারগী রোদমেপপু থাগৎপা ফোংদোকখি।

লৈবাক অসিদা হরিয়ানাগী মরুওইবা থৌদাং অদু ফোংদোক্লদুনা, লান্মীদা থবক তৌরিবা নহারোল মশিং য়াম্না লৈরি হায়না পল্লদুনা, শ্রী মোদীনা ও.আর.ও.পি.গী মতাংদা চহি কয়াগী মমাংগী দিসপেন্সনশিংবু য়ানীংদবা ফোংদোকখি অমসুং ও.আর.ও.পি. অসি মহাক্কী সরকারনা ইমপ্লিমেন্ত তৌখিবনি ফোংদোকখি। ও.আর.ও.পি.গী মখাদা হরিয়ানাগী এক্স-সর্বিসমেনশিংদা লুপা করোর ১৩,৫০০গী শেনফম পীখ্রে হায়না মহাক্না হায়খি। মহাক্না হায়খি মদুদি মমাংগী সরকারনা স্কিম অসিগীদমক লুপা করোর ৫০০ খক্তমক এলোকেৎ তৌখি অদুগা লৈবাক অসিগী লান্মীশিংবু লান্না লমজিংখি। মহাক্না হায়খি মদুদি মমাংগী সরকারনা দলিতশিং, শোত্থরবা কাংলুপশিং, নৎত্রগা লান্মীশিংবু তশেংনা মতেং ফংহনখিদে।

চাউখৎলবা ভারত অমগী মঙলান মপাঙ্গল কনখৎহনবদা হরিয়ানানা লৌরিবা থৌদাং অসিদা থাজবা থম্লদুনা, প্রধান মন্ত্রীনা রাজ্য অসিনা স্পোর্তস অমসুং এগ্রিকলচরদা মালেমগী থাক্তা শাফু পীরিবা অদু থাগৎপা ফোংদোকখি। মহাক্না হরিয়ানাগী নহারোলশিংদা থাজবা থমখি অমসুং অনৌবা এয়রপোর্ত অমসুং ফ্লাইৎশিং অসি হরিয়ানাগী আশাশিং মপুং ফাহন্নবগী ইথিলনি হায়না ফোংদোকখি অমসুং অনৌবা মাইলস্তোন অসিগীদমক হরিয়ানাগী মীয়ামদা নুংঙাইবা ফোংদোকপগা লোয়ননা ৱারোল পীবা লোইশিনখি।

থৌরম অদুদা হরিয়ানাগী মুখ্য মন্ত্রী, শ্রী নয়াব সিংহ সাইনি, কেন্দ্রগী সিভিল এভিয়েসনগী রাজ্য মন্ত্রী, শ্রী মুরলিধর মোহোল অমসুং অতৈ মকোক থোংবা মীওইশিংসু শরুক য়াখি।

বেকগ্রাউন্দ

মহারাজা আগ্রসেন এয়রপোর্তকী অনৌবা তর্মিনেল বিল্দিং অসিদা খ্বাইদগী নৌবা পেসেঞ্জর তর্মিনেল, কার্গো তর্মিনেল অমসুং এ.তি.সি. বিল্দিং অমা য়াওগনি। হিসারদগী অয়োধ্যাদা (চয়োল অমদা অনিরক), জম্মু, অহমেদাবাদ, জয়পুর অমসুং চান্দিগরদা চয়োল অমদা ফ্লাইৎ অহুমগী সেদ্যুল ফ্লাইৎশিংগা লোয়ননা, চাউখৎ থৌরাং অসিনা হরিয়ানাগী এভিয়েসন কন্নেক্তিবিতীদা অচৌবা অওনবা অমা পুরক্লগনি।

***