জয় সচ্ছিদানন্দ জী!!!

স্বামী বিচার পুরনা অনন্দ জী মহারাজজী, রাজ্যপাল মঙ্গুভাই পতেলজী, মুখ্য মন্ত্রী মোহন য়াদবজী, ঐহাক্কী মন্ত্রীমন্দলগী মরুপ জ্যোতিরাদিত্য সিন্দিয়াজী, এম.পি. ভি.দি. শর্মা জী, এম.পি. জনর্দন সিংহ সিগ্রিৱাল জী, স্তেজতা লৈরিবা অতোপ্পা মীহুৎশিং অমসুং ঐহাক্কী নুংশিরবা ইচিল-ইনাওশিং, দিল্লী, হরিয়ানা, পঞ্জাব অমসুং লৈবাক পুম্বদগী মফম অসিদা তিনবীরিবা মশিং য়াম্লবা ভক্তশিং। ঐহাক্না ময়াম পুম্নমকপু খুরুমজরি।

মরুপশিং,

ঙসি শ্রী অনন্দপুর ধামদা লাকপদা ঐহাক নুংঙাইবা ফাওই। ঐহাক্না গুরুজী মহারাজকী লাইশঙদা দর্শন তৌখি। তশেংনা, ঐহাক্কী থম্মোয় অসি নুংঙাইবা ফাওই।

মরুপশিং,

ঋষিশিংগী তপস্যা, পারমার্থ (চেরিতি) না চৎনবী অমা ওইরক্লিবা, সেবা তৌবগী ৱারেপ্না মীওইবা খুন্নাইগী য়াইফনবা লম্বী য়াৎলিবা লমদম অসি অচম্বা নত্তে। অমসুং মরম অসিনা অশোক-নগরগী মতাংদা ঐখোয়গী ঋষিশিংনা হায়রম্মি মদুদি অৱাবা অসি মফমসিদা লাকপদা অকিবা পোকই। ঙসি ঐহাক্না বৈশাখী অমসুং শ্রী গুরু মহারাজজীগী অবতরন দিবসকী থৌরমদা শরুক য়াবগী খুদোংচাবা ফংজবা অসিদা ঐহাক নুংঙাইবা ফাওই। মসিগী য়াইফরবা থৌরম অসিদা, অহানবা পাদশাহী শ্রী শ্রী চামাগা নিপান শুবা শ্রী স্বামী অদ্বৈত আনন্দজী মহারাজ অমসুং পাদশাহীগী অতৈ ঋষি পুম্নমক্তা ঐনা ইকায় খুম্নবা উৎচরি। ঐহাক্না খঙবা ঙমলে মদুদি ১৯৩৬গী ঙসিগী নুমিত্তা শ্রী দ্বিতীয়া পাদশাহীজীদা মহাসমাধি পীখি। ১৯৬৪গী ঙসিগী নুমিত্তা শ্রী ত্রিতিয়া পাদশাহীজীনা সেলভেসন ফংখি। ঐহাক্না হায়রিবা সদগুরু মহারাজজী অনিমক্তা ইকায় খুম্নবা উৎচরি। ঐহাক্না মা জগেশ্বরী দেবী, মা বিজাসন, মা জানকী কারিলা মাতা ধামদা ইকায় খুম্নবা উৎচরি অমসুং শ্রী গুরু মহারাজজীগী বাইসাকী অমসুং অবতারন উৎসবকীদমক্তা ময়াম পুম্নমকপু নুংঙাইবা ফোংদোকচরি।

মরুপশিং,

ঐখোয়গী ভারত অসি লম্বোইবশিং, মিস্তিকশিং অমসুং ঋষিশিংগী লমদমনি। ঐখোয়গী ভারত, ঐখোয়গী খুন্নাইনা অরুবা তাঙ্কক অমা লান্থোকপা মতমদা, লমদমসিদা লম্বোইবা নৎত্রগা মিস্তিক অমা লাকই অমসুং খুন্নাই অসিদা অনৌবা মায়কৈ অমা পীরি। ঐখোয়না মসি পুজ্যা স্বামি অদ্বৈত অনন্দজী মহারাজকী পুন্সিদা উবা ফংই। অদ্বৈত ফিলোসোফীগী অঙকপা লৌশিং অসি আদি শঙ্করচার্য়গুম্বা আচার্য়শিংনা শন্দোক্না তাকখিবা মতম অমা লৈরম্মি। মীখা পোল্লিঙৈগী মতমগী মনুংদা, খুন্নাই অসিনা লৌশিং অসি কাউবা হৌরকখি। অদুবু চপ মান্নবা মতম অদুদা, অদ্বৈতকী ৱাখল্লোনগা লোইননা লৈবাক্কী থম্মোয়বু লান্থোকহনখিবা অসিগুম্লবা অঙকপা মীওইশিং অমসুং হর্মিতশিংসু লাকখি। মসিগী চৎনবী অসিদা, পুজ্যা অদ্বৈত আনন্দজী মহারাজনা ভারতকী মীচম প্রজাশিংদা শন্দোক্নবা থৌরাং লৌখৎখি। মহারাজ জীনা অদ্বৈতকী লৌশিং অসি ঐখোয় পুম্নমক্কীদমক লায়থোকহনখি, অমসুং মসি মীপুম খুদিংমক্তা য়ৌহনখি।

মরুপশিং,

অদ্বৈত হায়বসিনা দ্যুলিতী লৈতবা মফম হায়বনি। অদ্বৈত হায়বসিনা হিংলিবা জিব খুদিংমক্তা ঈশ্বর অমখক্তমক উবা হায়বা ৱাখল্লোন অসিনি! মসিগী মথক্তা, পোৎশক পুম্নমকপু ঈশ্বরগী মওং-মতৌ ওইনা উবগী ৱাখল্লোন অসি অদ্বৈতনি। পরমহন্স দয়াল মহারাজনা অদ্বৈতকী ৱাখল্লোন অসিবু অচম্বা ৱাহৈদা হায়রম্মি - "অদোম করিনো, ঐহাক অদুনি।" ৱাখল খনবিয়ু, মসি কয়াদা ফজরিবা, অদোম করিনো, ঐহাক মসিনি। ৱাখল্লোন অসিনা 'ঐগী অমসুং নহাক্কী' অনিগী খেন্নবা অদু মুত্থৎলি। অমসুং করিগুম্বা মীপুম খুদিংমক্না মসিগী ৱাখল্লোন অসিবু য়াবা ঙম্লবদি, য়েৎনবা খুদিংমক লোইশিনগনি।

মরুপশিং,

মীকুপ খরগী মমাংদা, ঐহাক্না তরুকশুবা পাদশাহী স্বামি শ্রী ভিচার পুরনা অনন্দ জী মহারাজগা ৱারী শানখি। অহানবা পাদশাহী পরমহন্স দয়াল মহারাজজীগী ৱাখল্লোনগা লোয়ননা মহাক্না ঐঙোন্দা অনন্দ ধামগী সেবাগী থবক থৌরমশিংগী মরমদা হায়খি। মফম অসিদা, সাধনগী কাংলোন মঙা থম্লে, অমসুং নিস্বার্থ সেবা অসি মখোয়শিং অসিগী মনুংদা অমনি। লায়রবশিং অমসুং শোত্থরবশিংগীদমক্তা ওইজবা থিনা সেবা তৌবা, নারায়নগী সেবা অসি মীওইবগী সেবা ওইনা উবগী ৱাখল্লোন অসি ঐখোয়গী চৎনবীগী য়ুম্ফম্নি। ঐহাক্না য়াম্না নুংঙাইবা ফাওই মদুদি অনন্দপুর ত্রস্তনা মপুং ফানা কত্থোক্তুনা অসিগুম্বা কলচর অসিবু মখা তানা মাংলোমদা পুখৎলি। ত্রস্তনা চলাইরিবা হোস্পিতাল অসিদা অনাবা লিশিং কয়া লায়েংলি। লায়েংবগীদমক্তা লেম্না কেম্পশিং পাংথোক্লি। হৌজিক্কী মতমগী গৌশালা অসিসু কাউ সর্ভিসকীদমক্তা চলাইরি। অনৌবা জেনরেসনগী চাউখৎ-থৌরাংগীদমক ত্রস্ত অসিনা স্কুল কয়া অমা চলাইরি। অমসুং মসি খক্তা নত্তে, অনন্দপুর ধামনা অকোয়বগী ফিভম ঙাকথোকপগা লোয়ননা মীওইবা খুন্নাইগীদমক অচৌবা থৌদাং অমা লৌরি। ঐহাক্না হায়খি মদুদি আশ্রম অসিগী লৈহৌচেন্দ্রবা লম একর লিশিং কয়া অমা অশঙ-অমান্না থলহনখ্রে। ঙসি অসিগুম্বা আশ্রম অসিদা পাম্বী লিশিং কয়া থাখ্রে।

ইচিল-ইনাওশিং,

অসিগুম্বা সেবা তৌবগী ৱাখল্লোন অসি ঙসি ঐখোয়গী সরকারনা হোৎনরিবা পুম্নমক্কী মরু ওইবা ওইরি। ঙসিদি প্রধান মন্ত্রী গরীব কল্যান অন্ন য়োজনানা মরম ওইদুনা লায়রবা মীওই খুদিংমক চানবা চিঞ্জাক্কীদমক ৱাখল ৱাবা তৌহন্দ্রে। ঙসিদি অয়ুশ্মান য়োজনাগী খুত্থাংদা লায়রবশিং অমসুং অহল ওইরবা মীওই খুদিংমক লায়েংবগী চিংনবা লৈহন্দ্রে। ঙসিদি পি.এম. অৱাস য়োজনাগী খুত্থাংদা লায়রবা মীওই খুদিংমক পক্কগী য়ুমগী অৱাবা লৈহন্দ্রে। ঙসিদি, ঈশিংগী সমস্যা অসি জল জীবন মিসন য়োজনাগী মতেংনা খুঙ্গং খুদিংমক্তা লোইশিন্নবা হোৎনরি। লৈবাক অসিদা অনৌবা এ.আই.আই.এম.এস., আই.আই.তি.শিং অমসুং আই.আই.এম.শিং রেকোর্দ মশীংনা হাংদোক্লি। খ্বাইদগী লায়রবশিংগী অঙাংশিংগী মঙলানশিং অদু মংফাওনরে। ঐখোয়গী অকোয়বগী ফিভম অসি শেংদোকপা অমসুং মহৌশাগী ফিভম অসি ঙাক-শেন্নবগীদমক, সরকারনা "এক পেদ মা কে নাম" কেম্পেনসু হৌদোকখ্রে। ঙসিদি, কেম্পেন অসিগী মখাদা লৈবাক অসিদা উ পাম্বী কোতি কয়া থাখ্রে। লৈবাক অসিনা অসিগুম্বা পাক-চাউরবা থাক অমদা অসিগুম্বা থবক কয়া পাংথোকপা ঙম্লবদি, মসিগী মপুং ওইবা মরমদি ঐখোয়গী সেবাগী ৱাখল্লোন অসিনি। লাইরবশিং অমসুং লায়রবশিংবু চাউখৎহন্নবা ৱারেপ লৌবা, 'সবকা সাথ, সবকা বিকাস'গী মন্ত্র, সেবাগী ৱাখল্লোন অসি ঙসিদি সরকারগী পোলিসী অমসুং থৌনা ওইরে।

মরুপশিং,

ঐখোয়না থবক তৌনবা ৱারেপ লৌদুনা অমত্তা ওইনা পুনশিনবা মতমদা, ঐখোয়না অতোপ্পদা অফবা তৌবতা নত্তনা অতোপ্পা কয়া অমসু তৌরি। সেবা তৌবগী ৱাখল্লোন অসিনা ঐখোয়গী মওং-মতৌসু ফগৎহল্লি, ঐখোয়গী ৱাখল্লোনবু মপুং ফাহল্লি। সর্ভিসনা ঐখোয়বু ঐখোয়গী ইশাগী ৱাংমদা খনবা ঙমহল্লি অমসুং ঐখোয়বু খুন্নাই, লৈবাক অমসুং মীওইবা খুন্নাইগী অচৌবা পান্দমগা শম্নহল্লি। ঐখোয়না পুন্না অমসুং অমত্তা ওইনা থবক তৌমিন্নবা তম্বা ফংই। ঐখোয়না পুন্সিগী তোঙান-তোঙানবা হীরমশিং খঙই। ময়াম পুম্নমক অসি সর্ভিসকী থবক্তা কত্থোক্লবা মীওইশিংনি। অদোম্না অদোমগী পুন্সিদা থেংনখিবা, খুদোংচাদবশিংগা লান্থেংনখিবা অমসুং মখোয়শিং অদু কোকহনখিবা ওইরম্বা য়াই, সর্ভিস তৌরিঙৈ মতমদা ঐখোয়না মসি পুম্নমক অসি লায়না তম্বা ঙম্মি। মরম অসিনা ঐনা হায়রি, সেবা অসি সাধনা অমনি, মসি গঙ্গা অমনি মদুদা মীপুম খুদিংমক্না স্নান তৌবা তাই।

মরুপশিং,

অশোক নগর অমসুং অনন্দপুর ধামগুম্বা লমদমশিং অসিনা লৈবাক অসিদা চাউনা কান্নবা পীরি। মসিগী চাউখৎ থৌরাং অসি ঐখোয়গী থৌদাংনি। মসিগী মফম অসি কলা, কলচর অমসুং মহৌশাগী ফজবশিংনা মঙাল পীরি। মফম অসিদা চাউখৎপা অমসুং হেরিতেজগী অচৌবা ওইথোকপা কয়া লৈরি! মসিনা মরম ওইদুনা ঐখোয়না এম.পি. অমসুং অশোক নগরদা চাউখৎ-থৌরাং অসি খোংজেল য়াংনা হেনগৎহল্লি। চান্দরী হেন্দলুমবু অনৌবা থাক্তা পুখৎনবগীদমক, চান্দরী সারিদা জি.আই. তেগ পীখ্রে। প্রানপুরদা ক্রাফ হেন্দলুম তুরিজম ভিলেজ হৌখ্রে। মসিনা লমদম অসিগী শেন্মিৎলোনদা অনৌবা শাহৌ অমা পীরগনি। মধ্য প্রদেশ সরকারনা উজ্জৈন সিমহস্থাগী শেম-শাবা হৌখ্রে।

ইচিল-ইনাওশিং,

নুমিৎ খরনিগী মমাংদা, রাম নবমীগী চাউরবা কুমহৈ অমা পাংথোকখি। ঐখোয়না লৈবাক অসিদা "রাম ভনগমন পাথ" শেমগৎলি। রাম ভনগমন পাথ অসিগী মরুওইবা শরুক অমা মধ্য প্রদেশ ফাওদুনা চৎকনি অমসুং ঐখোয়গী এম.পি. অসি হান্ননা য়াম্না নুংঙাইবা অমসুং অঙকপা অমনি। মসিগী মশক অসি থবকশিং অসিনা মখা তানা মপাঙ্গল কনখৎহনগনি।

মরুপশিং,

লৈবাক অসিনা ২০৪৭ ফাওবদা চাউখৎলবা ভারত অমা ওইনবা পান্দম থম্লি। ঐখোয়না পান্দম অসি তশেংনা ফংলগনি হায়না ঐখোয়না থাজৈ। অদুবু খোঙচৎ অসিদা ঐখোয়না মরুওইবা ৱাফম খরা খনবা মথৌ তাই। ঐখোয়না মালেমগী লৈবাক কয়া অমা চাউখৎপগী খোঙচৎতা মখোয়গী চৎনবীশিংদগী লাপথোক্লকপা, মখোয়গী চৎনবীশিং অদু মখোয়না তুংওইননা থমলম্বা উবা ফংলি। ভারত্তা ঐখোয়না ঐখোয়গী অরিবা মতমগী চৎনবী অসি ঙাক্না চৎকদবনি। ভারতকুম্বা লৈবাক অমদা ঐখোয়গী চৎনবী অসি ঐখোয়গী আইদেন্তিতীগা শম্নবা খক্তা নত্তে হায়বা অসি ঐখোয়না নীংশিংগদবনি। ঐখোয়গী কলচরনা ঐখোয়গী শক্তিবু মপাঙ্গল কনখৎহল্লি। ঐহাক্না নুংঙাইবা ফাওই মদুদি অনন্দপুর ধাম ত্রস্তনা মসিগী মাইকৈ অসিদা থবক কয়া পায়খৎলি। ঐহাক্না থাজবা থম্লি মদুদি অনন্দপুর ধামগী সর্ভিস ৱার্কনা চাউখৎলবা ভারতকী ৱারেপপু অনৌবা ইনর্জীগা লোয়ননা মাংলোমদা পুখৎকনি। ঐহাক্না অমুক্কা হন্না ময়াম পুম্নমকপু বৈশাখী অমসুং শ্রী গুরু মহারাজজীগী মপোক কুমওনগীদমক নুংঙাইবা ফোংদোকচরি। হরাও-তয়াম্বা ফোংদোকচরি। জয় শ্রী সচ্ছিদানন্দা।

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***