খুরুমজরি !

की मानियेर मोरिस?

आप लोग ठीक हव जा ना?

आज हमके मॉरीशस के धरती पर

आप लोगन के बीच आके बहुत खुसी होत बातै !

हम आप सब के प्रणाम करत हई !

মরুপশিং,

চহি ১০ গী মমাঙদা নুমিৎ অসিদা ঐ মাউরিসসতা লাকপা মতমদা, ঐ থুংলগদবা চয়োল অমগী মমাঙদা ঐখোয় য়াওশঙ কুহ্মৈ পাংথোকখ্রে। ঐনা ভারত্তগী ফাগুৱাগী হরাওবা পুরকখি। হন্দক্না ঐনা মাউরিসসতগী মচু কয়াগী য়াওশঙগী অবের পুদুনা ভারত্ত হল্লগনি। ঐখোয়না ভারত্ত নোংমগী মতুংদা য়াওশঙ পাংথোক্লগনি। থা অসিগী তাং ১৪ দা লৈবাক অদুদা মফম খুদিং অবেরনা থল্লগনি।

राम के हाथे ढोलक सोहै

लछिमन हाथ मंजीरा।

भरत के हाथ कनक पिचकारी...

शत्रुघन हाथ अबीरा...

जोगिरा........

ঐখোয়না য়াওশঙগী ৱারি শানবা মতমদা, কমদৌনা ঐখোয়না গুজিয়াগী মহাও কাউবা ঙমগনি। মতম অমদা ভারতকী নোংচুপ থঙবা শরুক্ত মাউরিসসনা চিনি ফংহলমখি। মরম অদুনা গুজরাতি লোলদা চিনি অসি ‘মোরাস’ হায়না খঙনরিবনি। মতমগী মতুংইন্না, ভারত অমসুং মাউরিসসকী মরক্ত লৈনরিবা মরীগী অথুম্বা তপ্না তপ্না হেনগৎলক্লে। মসিগী অথুম্বা অসিগা লোয়ননা, নুংঙাইরবা নেসনেল দে অমগী ঐনা মাউরিসসকী মীয়ামদা য়াইফ পাউজেল পীজরি।

মরুপশিং,

ঐনা মাউরিসসতা লাকপা মতম খুদিংমক্ত, ঐগী মীয়াম মরক্ত ঐ লৈবগুম ফাওই। মসি মফম অসিগী নুংশিৎ, লৈহাও অমসুং ঈশিং, শক্লিবা ঈশৈ, ধোলক্কী তান, দাল পুরিগী মহাওগা মরী লৈনবগী ৱাখল্লোন অমা লৈরি। কুতচা অমসুং গেতেউজ পিমেন্ত ভারতকা মান্নবা মনম চেল্লি। মাউরিসসকী লৈবাক লৈহাওদা ঐখোয়গী ইপা-ইপুশিং ওইরিবা ভারতমচা কয়াগী ঈ অমসুং হুমাং তিনখ্রে। ঐখোয় ইমুং অমগী শরুকশিংনি অমসুং মরম অদুনা মসিগী ৱাখল্লোনগা লোয়ননা প্রধান মন্ত্রী নবিন রামগুলাম জি অমসুং মহাক্কী মন্ত্রী মন্দলগী মরুপশিং ঙসি মফম অসিদা ঐখোয়গা পুল্লিবনি। ঐনা ময়ামগী মফমদা ঐগী য়াইফ পাউজেল পীজরি। প্রধান মন্ত্রী নবিন জিদগী থম্মোয়দগী থোক্লকপা ৱাহৈশিং ফোঙদোকখ্রে। মহাক্না তরাম্না ওকখিবা অমসুং ফজরবা ৱাহৈশিংগীদমক ঐনা মহাক থাগৎপা ফোঙদোকচরি।

মরুপশিং,

মাউরিসসকী মীয়াম, সরকার মফম অসিদা লৈরে, প্রধান মন্ত্রীনা লাউথোকখিবা মতুংইন্না, ঐঙোন্দা খ্বাইদগী ৱাংবা সিবিলিয়ানগী ইকায়খুম্নবা উৎনবা ৱারেপ লৌরে। অদোমগী ৱারেপ অদু ঐনা তরাম্না ওকচরি। মসিগী ইকায়খুম্নবা অসি ভারত অমসুং মাউরিসসকী মরক্ত লৈনরিবা পুৱারি ওইরবা মরীশিং ইকায়খুম্নবা উৎপনি। ঙসি মাউরিসস অসিগুম্বা অৱাংবা থাকশিংদা পুখৎলকখিবা, কৎথোকপগা লোয়ননা লমদম অসিগী থবক তৌখিবা, মীরোল কয়াগী ভারতমচাশিং ইকায়খুম্নবা মনা অমনি। মসিগী ইকায়খুম্নবা উৎপা অসিগীদমক ঐনা মাউরিসসকী মীয়াম অমসুং সরকারদা ঐগী তৌবীমল খঙবা উৎচরি।

মরুপশিং,

হৌখিবা চহিদা, ভারতকী রাষ্ট্রপতিনা নেসনেল দে থৌরমদা চীফ গেষ্ট ওইখি। মসিনা ভারত অমসুং মাউরিসসকী মরক্ত লৈনরিবা মরীশিং ফগৎলকপগী খুদম উৎলে। মার্চ ১২ অসি নেসনেল দে ওইনবা খনখিবা অসিদা ঐখোয়গী লৈবাকশিংগী মান্নবা পুৱারি লৈবগী মমি তারে। নুমিৎ অসিদা মহাত্মা গান্ধীনা দান্দি সত্যগ্রহ হৌখিবনি। নুমিৎ অসিনা লৈবাক অনিমক্ত নিংতম ইহৌশিং নিংশিংহল্লে। মাউরিসসমচা অমা ওইখিবা অমসুং মীয়ামগী হকশিং ফংনবা লান্থেংনখিবা বেরিষ্টর মনিলাল দোক্তরগুম্বা শক্নাইরবা মীওই অমা কনা অমতনা কাউবা ঙম্লোই। ঐখোয়গী চাচা রামগুলাম জিনা নেতাজি সুভাস অমসুং অতৈশিংগা লোয়ননা মীনাই ওইবগী মায়োক্ত লান্থেংনখি। বিহারগী পাতনাগী পুৱারি ওইরবা গান্ধী মৈদান্দা লৈরিবা সিৱুসাগুর জিগী মীতম অসি মসিগী চৎনবী অসিগী খুদম অমা ওইরি। ঐনা মফম অসিদগী সিৱুসাগুর জি অমসুং নবিন জিগী মফমদা ইকায়খুম্নবা উৎনবগী খুদোংচাবা ফংলে।

মরুপশিং,

ঐনা অদোমগী মরক্ত লৈরিঙৈদা, অদোমগী মফমদা ৱা ঙাংলিঙৈদা, লোয়লম লৈঙাক মনুংদা নমথাক তৌদুনা মশিং থিঙমদ্রবা ভারতমচা কয়া মফম অসিদা পুরকখিবগী চহি ২০০ রোমগী পুৱারি অমদা ঐ অমুক হন্না পুখি। মখোয় চৈনা কয়া খাংখি অমসুং মীরাইবীবা মায়োক্নখি। ৱারবা মতম অদুদা, ভগবান রাম, রাম চরিত মনাস, ভগবান রামনা হোৎনখিবশিং, মহাক্কী মাইপাকপশিং, মহাক্কী ইথিল অমসুং মহাক্না অৱাবা খাংখিবা অদুনা মখোয়গী মপাঙ্গলগী হৌরকফম ওইখি। মখোয় মশামক ভগবন রামদা উৎখি অমসুং মহাক্কী মফমদগী থৌনা অমসুং থাজবা ফংখি।

राम बनिइहैं तो बन जइहै,

बिगड़ी बनत बनत बन जाहि।

चौदह बरिस रहे बनवासी,

लौटे पुनि अयोध्या माँहि॥

ऐसे दिन हमरे फिर जइहैं,

बंधुवन के दिन जइहें बीत।

पुनः मिलन हमरौ होई जईहै,

जइहै रात भयंकर बीत॥

মরুপশিং,

ইন্তরনেসনেল রামায়ন কনফরেন্সগীদমক মফম অসিদা ১৯৯৮ দা লাকখিবা অদু ঐ নিংশিংলি। মতম অদুদা ঐ সরকারগী ফম অমতা পায়দ্রি। ঐ ইচম চম্বা থৌমী অমা ওইনা লাকখিবনি। য়াম্না নুংঙাইরিবদি, মতম অদুদা নবিন জি প্রধান মন্ত্রী ওইরমখি। তুংদা, ঐনা প্রধান মন্ত্রী ওইরকপদা, দিল্লিদা ঐগী ৱাশক লৌবগী থৌরমদা শরুক য়াদুনা নবিন জিনা ঐবু ইকায়খুম্নবা উৎখি।

মরুপশিং,

ভগবন রাম অমসুং রামায়ন্দা চেৎনবা থাজবা অমসুং নুংশিবা ঐনা চহি কয়াগী মমাঙদা মফম অসিদা উবা ফংখিবা অদু ঙসি ফাওবা উরি। চহি ৫০০ শাংনা ঙাইরক্লবা মতুংদা, হৌখিবা চহিদা অয়োধ্যদা প্রান প্রাতিস্থা থৌরমদা কৎথোকপগী ইথক অমা উবা ফংখি। ভারত শীনবা থুংনা লৈখিবা হরাওবা অদুগা চপ মান্ননা মাউরিসসতা মমি তাখি। অদোমগী থম্মোয়গী মরী অদু খঙদুনা, মাউরিসসনা ছুতি তঙ্খায় লাউথোকখি। মসিগী ভারত অমসুং মাউরিসসকী মরক্ত লৈরিবা লাইনিংগী মরী অসিনা তুংকোইবা ঐখোয়গী মরুপ-মপাংগী অকনবা য়ুম্ফম অমা ওইরে।

মরুপশিং,

মাউরিসসকী ইমুং কয়া হন্দক মহা কুম্ভদগী হল্লক্লে হায়বা ঐ খঙলে। মীওই করোর ৬৫ দগী ৬৬ ফাওবা তিন্দুনা, মীওইবগী পুৱারিদা মীশিং খ্বাইদগী য়াম্না তিনবা ওইদুনা মালেম অসি অঙকপা ফাওহনখিবা পুৱারি ওইরবা থৌরম অদুদা মাউরিসসকী মীওইশিং শরুক য়াখি। মখোয়না মহা কুম্ভ শরুক য়াবা চৎনিংলবসু, মাউরিসসকী ঐগী ইনাওশিং অমসুং ইচলশিং শরুক য়াবা ঙমখিদে হায়বা ঐ খঙলে। মখোয়গী ৱাখল ঐ খঙলে। মরম অদুনা ঐনা মহা কুম্ভগী শেংলবা ইতিনফমদগী শোক্লকপা ঈশিং ঐনা মফম অসিদা পুরক্লে। হয়েং শেংলবা ঈশিং অসি মফম অসিগী গঙ্গা তলাউদা থাদরগনি। চহি ৫০ গী মমাংদা, গোমুখতগী মফম অসিদা গঙ্গা পুরকখি অমসুং গঙ্গা তলাউদা তিনহলখি। হয়েং, শেংলবা থৌদোক অদুগা চপ মান্নবা অমা অমুক হন্না উরগনি। ইমা গঙ্গাগী থৌজালগা লোয়ননা অমসুং মহা কুম্ভদগী পুরকপা প্রসাদ অসিগা লোয়ননা, মাউরিসস চাউখৎপগী অনৌবা থাকশিং য়ৌনবা ঐনা থৌনিজরি।

মরুপশিং,

মাউরিসস ১৯৬৮ দা নিংতম্বা ফংলম্বা য়াই, অদুবু মীওই খুদিংমক পুন্না চৎমিন্নদুনা লৈবাক অসি চাউখৎপগী লম্বী অসি মালেমগী মশক থোকপা খুদম অমনি। মালেমগী মফম কয়াগী মীওইশিং মাউরিসস মখোয়গী য়ুম ওইরে, খেন্নবা কয়াগী ফজরবা লৈকোল অমা ওইনা নাৎশিংগী ফজরবা ফিদা অমা শেম্লে। বিহার, উত্তর প্রদেস অমসুং ভারতকী মফম কয়াদগী ঐখোয়গী ইপা-ইপুশিং মফম অসিদা পুরকখি। করিগুম্বা অদোম্না লোল, দাইলেক্তশিং অমসুং চাকচা-য়ুথকশিং উরবদি, অদোম্না মাউরিসসতা অপীকপা ভারত অমগী মমি তারে। ভারতকী মীরোল কয়া সিলভর স্ক্রিন্দা মাউরিসস পাম্নরে। অদোম্না ফজবা হিন্দী ঈশৈশিং য়েংবা মতমদা, অদোম্না ভারতকী য়ুম, ইল ঔজ সের্ফশিং, গ্রিস-গ্রিস বিচগী ফজবশিং, কাউদান ৱাতরফ্রন্ত অমসুং রোচেষ্টর ফলসকী খোঞ্জেল তাগনি। ভারতকী সেনিমাদা উদবা মাউরিসসকী মফম অমা থিবদা ৱাগনি। তশেংনা হায়রবদা, ঈশৈনা ভারতকী ওইবা মতমদা, মফমনা মাউরিসস ওইবদা, ফিল্ম অদু শোইদনা হিত অমা ওইগনি।

মরুপশিং,

ভোজপুর অমসুং বিহারগা অদোমগা লৈনবা অচেৎপা থম্মোয়গী মরী ঐসু খঙলে।

पूर्वांचल के सांसद होवे के नाते, हम जननी कि बिहार के सामर्थ्य केतना ज्यादा बा... एक समय रहे जब बिहार, दुनिया क समृद्धि के केंद्र रहल.. अब हम मिलके, बिहार के गौरव फिर से वापस लाए के काम करत हई जा।

মরুপশিং,

মালেমগী মফম কয়া লাইরিক তম্নবা মফম লাপ্না লৈবা মতমদা, ভারতকী বিহারদা নালান্দাগুম্বা মালেমগী লাইরিক তম্ফম লৈখি। ঐখোয়গী সরকারনা নালান্দা য়ুনিভর্সিতি অমুক হিঙ্গৎহল্লে অমসুং নালান্দগী থৌনা অমুক হাপ্লে। ঙসিদি, শান্তি পুরক্নবগীদমক ভগবন বুদ্ধগী পাউতাকশিংনা মখা তানা মালেমদা ইথিল পীগনি। ঐখোয়না মসিগী ইনাকখুল্লবা হেরিতেচ অসি ঙাক-শেনবা খক নত্তনা, মালেমগী ওইনা য়োকখৎলি। ঙসিদি, বিহারগী থাংজি মরু ভারত শীনবা থুংনা মশক খঙলে। বিহারগী থাংজিং মরু মালেম শীনবা থুংবগী অচাপোৎকী মিনু অমা ওইগদবা কুইদ্রে।

हम जानीला कि हियां मखाना के केतना पसंद करल जा ला...

हमके भी मखाना बहुत पसंद बा....

মরুপশিং,

ঙসিদি, ভারতনা তুংগী মীরোলশিংগীদমক মাউরিসসকা লৈনবা অচেৎপা মরীশিং য়োকখৎলি অমসুং ঙাক-শেন্দুনা থম্লি।  মাউরিসসতা লৈবা ভারতমচাশিংগী মীরোল তরেৎশুবদা ও.সি.আই কার্দশিং পীনবা ৱারেপ অমা লৌখিবদা ঐ অপেনবা ফাওই। মাউরিসসকী রাষ্ট্রপতি অমসুং মহাক্কী লোয়নবী ব্রিন্দা জিদা ও.সি.আই কার্দশিং পীবগী খুদোংচাবা ঐ ফংলে। ঐনা প্রধান মন্ত্রী অমসুং মহাক্কী লোয়নবী, বিনা জিদা ও.সি.আই কার্দশিং পীরে। চহি অসিগী প্রভাসি ভারতিয়া দিবস মনুংদা, মালেম শীনবা থুংনা খুন্দারিবা গিরমিতিয়া ফুরুপকী করিগুম্বা থবক কয়া পায়খৎনবা ঐনা ৱাফম পুখৎখ্রে। গিরমিতিয়া ফুরুপকী অপুনবা দেতাবেজ অমা শেমগৎনবা ভারত সরকারনা অকনবা থবক অমা পায়খৎলিবা হায়বা খঙবদা ঐ য়াম্না হরাওই। গিরমিতিয়া ফুরুপকী মীওইশিংনা য়ুম হোংলকখিবা খুঙ্গংশিং অমসুং সহরশিংগী মতাংদা ই-পাউ খোমজিনবগী থবক পায়খৎলে। মখোয়না খুন্দারম্বা মফমশিং খঙদোক্নবা ঐখোয়না থবক পায়খৎলে। গিরমিতিয়া ফুরুপকী মমাংঙৈদগী হৌরগা হৌজিক ফাওবগী পুৱারি মফম অমদা খোমজিন্দুনা থম্লে। মতম মতমগী মতুংইন্না ৱার্ল্দ গিরমিতিয়া কনফরেন্সশিং পাংথোক্লে। শিন্মীশিং ওইহন্নবা পুখিবা মীওইশিংগী লম্বীশিং মশক খঙদোক্নবা গিরমিতিয়া ফুরুপকা শম্নবা মাউরিসস অমসুং অতোপ্পা লৈবাকশিং পুন্না থবক তৌমিন্নবা ভারতনা থৌরাং তৌরে। পুৱারি ওইরবা মাউরিসসকী আপ্রাভাসি ঘাত য়াওনা হায়রিবা লম্বীশিং অসিগী হেরিতেচ ঙাক-শেন্নবা ঐখোয়না পান্দম থম্লি।

মরুপশিং,

মাউরিসস মরুপ অমা ওইবা খক নত্তনা, ঐখোয়গী ইমুং-মনুংনি। ভারতকা গ্লোবেল সাউথ অনিগী মরক্ত মাউরিসসনা থোঙ অমা ওইরি। চহি ১০ গী মমাংদা, প্রধান মন্ত্রী ওইনা অহানবা ওইনা ঐ ২০১৫ দা মাউরিসসতা লাকখি, ঐনা ভারতকী সাগর ভিজন লাউথোকখি। ঙসি ফাওবা মাউরিসস ভিজন অসিগী ময়াইদা লৈরি। মসি শেন থাদবা, ইনফ্রাষ্ট্রকচর, ললোন-ইতিক নত্ত্রগা অৱাবা তারকপদা মতেং পাংবা ওইবা য়াই। ভারতনা মতম পুম্নমক্ত মাউরিসসকীদমক লেপ্লি। ২০২১ দা ঐখোয়না কমপ্রেহেন্সিপ কোওপরেসন এন্দ পার্তনরশিপ এগ্রিমেন্ত খুৎয়েক পীনখিবা অহানবা অফ্রিকান য়ুনিয়নগী লৈবাক মাউরিসসনি। মসিনা মাউরিসসনা ভারতকী কৈথেলশিংদা চঙলকপা য়াবগী খুদোংচাবশিং পীরে। ভারতকী কম্পেনিশিংনা মাউরিসসতা দোল্লার মিল্লিয়ন কয়া থাদরে। মাউরিসসকী মীয়ামগীদমক মরুওইবা ইনফ্রাষ্ট্রকচর প্রোজেকশিং ঐখোয়না লোয়ননা শেমগৎলে। মসিনা চাউখৎহল্লে, থবকশিং ফংহল্লে অমসুং উদ্যোগশিং অওনবা পুরক্লে। মাউরিসসতা কেপাসিতি বিল্দিংগী লমদা ভারত অচৌবা মরুপ অমনি।

মরুপশিং,

মাউরিসসকী পাক-চাউরবা সমুদ্রগী শরুকশিং আইন্না য়াদনা ঙা ফাবা, পাইরেসি অমসুং ফত্তবা থবকশিংদগী ঙাকথোক্নবা লৈবাক অসিগী রিছোর্সশিং দরকার ওই। অদোমগী লৈবাক্কী য়াইফনবা অমসুং ভারত মহাসাগর লমদম ঙাক-শেন্নবা ভারতনা মাউরিসসকা লোয়ননা থবক পায়খৎলি। অৱাবা তারকপা মতমদা, ভারতনা মতম চুপ্পদা মাউরিসসকীদমক লেপ্লি। কোবিদ-১৯ লাকপা মতমদা, ভারতনা অহানবা ওইনা ভেক্সিন লাখ ১ অমসুং হিদাক লাংথকশিং ফংহনখি। মাউরিসসনা অৱাবা তারকপদা ভারতনা অহানবা ওইনা মতেং পাংখি। মাউরিসসনা নুংঙাইরকপা মতমদা, ভারতনা অহানবা ওইনা হরাওগনি। পুম্নমক অসিগী মথক্ত, ঐনা মমাঙদা হায়খ্রে, ঐখোয়গী ওইনা মাউরিসস ইমুং-মনুংনি।

মরুপশিং,

ভারত অমসুং মাউরিসস পুৱারিগী মরী লৈবা খক নত্তনা মখোয়গী খুদোংচাবশিং শরুক য়ামিন্নরি। ভারতনা য়াংনা চাউখৎলকপদা, লৈবাক অসিনা মাউরিসসকী চাউখৎপদা থৱায় য়াওনা মতেং পাংলি। মেত্রো সিষ্টেম, ইলেক্ত্রিক বসশিং, সোলার পৱার প্রোজেকশিং, য়ু.পি.আই অমসুং রুপে কার্দশিং অমসুং অনৌবা সংসদকী বিল্দিং শাবা য়াওনা হিরম কয়াদা ভারতনা মরুপ-মপাংগী ৱাখল্লোন অমগা লোয়ননা মাউরিসসকী মতেং পাংলি।

ঙসি ভারত মালেমদা ৫শুবা খ্বাইদগী চাউবা ইকোনোমি ওইরে অমসুং অথুবা মতমদা ৩শুবা খ্বাইদগী চাউবা ওইনবা লম্বীদা লৈরে। ঐখোয়গী চাউখৎপগী কান্নবশিং মাউরিসসনা লৌগনি হায়না ভারতনা মতম পুম্নমক্ত থাজৈ। মরম অদুনা, ভারতনা জি-২০ গী প্রসিদেন্দ ওইবা মতমদা, ঐখোয়না মাউরিসস অখন্নবা লৈবাক অমা ওইনা চেপাউ পীখি। সম্মিৎ মনুংদা, অহানবা ওইনা অফ্রিকান য়ুনিয়ন জি-২০ গী লেংদ্রবা মেম্বর ওইহনখি। মতম কয়াদগী তান্দুনা লাক্লবা অসি ভারতনা প্রদিদেন্দ ওইরিঙৈদা থবক ওইনা পাংথোকখ্রে।

মরুপশিং,

মমিং চৎলবা ঈশৈ অমা মফম অসিদা লৈরে…

तार बांधी धरती ऊपर

आसमान गे माई...

घुमी फिरी बांधिला

देव अस्थान गे माई...

गोर तोहर लागीला

धरती हो माई...

ঐখোয়না পৃথিবী অসি ঐখোয়গী ইমানি হায়না খল্লি। চহি ১০ গী মমাঙদা ঐনা মাউরিসসতা লাকখিবা মতমদা, অইং-অশাগী খল হোংলকপগী মতাংদা মাউরিসসনা হায়রিবা অসি ঐখোয়না তাগদবনি হায়না ঐনা মালেম শীনবা থুংনা লাউথোকখি। ঙসি ভারত অমসুং মাউরিসসনা মালেম শীনবা থুংনা হিরম অসি পাক-শন্না খঙহন্নবদা ঐ হরাওই। ভারত অমসুং মাউরিসস ইন্তরনেসনেল সোলার এল্লাইন্স অমসুং গ্লোবেল বাইওফুএল এল্লাইন্সকী মরুওইবা মেম্বরশিংনি। ঙসি, মাউরিসসসু এক পের মা কে নাম কেম্পেন শরুক য়ারে। এক পের মা কে নাম কেম্পেনগী মখাদা, ঙসি ঐনা প্রধান মন্ত্রী নবিন জিগা লোয়ননা উ পাম্বী অমা থারে। কেম্পেন অসিনা ঐখোয় পোকপীবা ইমাগা মরী অমা শাগৎপা খক নত্তনা, মালেম ইমাগসু মরী অমা লৈনহল্লে। কেম্পেন অসি শরুক য়ানবা ঐনা মাউরিসসকী মীয়ামদা হায়জরি।

মরুপশিং,

২১শুবা চহিচাদা মাউরিসসকী খুদোংচাবা কয়া লাক্লে। ভারতনা মাউরিসসকা খোঙথাং খুদিং চৎমিন্নগনি হায়না ঐনা থাজবা পীরি। অমুক হন্না, ঐনা প্রধান মন্ত্রী অমসুং মহাক্কী সরকার অমসুং মাউরিসসকী মীয়াম থাগৎপা ফোঙদোকচরি।

অমুক হন্না, নেসনেল দে থৌরমদা ময়াম পুম্নমক য়াইফ পাউজেল পীজরি।

অদোম থাগৎপা ফোঙদোকচরি।

খুরুমজরি।

দিসক্লেমর: মসি প্রধান মন্ত্রীগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

***