ନମସ୍ତେ !

ମରିସସବାସୀ କେମିତି ଅଛନ୍ତି ?

ଆପଣ ସମସ୍ତେ ଭଲ ଅଛନ୍ତି ?

ଆଜି ମରିସସ ଭୂମିରେ ଆପଣମାନଙ୍କ ମଧ୍ୟରେ ଉପସ୍ଥିତ ରହି ମୁଁ ବହୁତ ଖୁସି !

ମୁଁ ଆପଣ ସମସ୍ତଙ୍କୁ ପ୍ରଣାମ କରୁଛି !
ବନ୍ଧୁଗଣ,

୧୦ ବର୍ଷ ପୂର୍ବେ ଏହି ତାରିଖରେ ମୁଁ ଯେତେବେଳେ ମରିସସ୍ ଆସିଥିଲି, ଆମେ ପହଞ୍ଚିବାର ମାତ୍ର ଗୋଟିଏ ସପ୍ତାହ ପୂର୍ବରୁ ହୋଲି ପାଳନ କରିଥିଲୁ। ମୁଁ ଭାରତରୁ ଫଗୁଆର ଉତ୍ସାହ ମୋ ସହିତ ଆଣିଥିଲି। ଏଥର ମୁଁ ମୋ ସହିତ ମରିସସ୍ରୁ ହୋଲିର ରଙ୍ଗ ଭାରତରୁ ମୋ ସହିତ ନେଇକି ଯିବି। ଆମେ ଗୋଟିଏ ଦିନ ପରେ ସେଠାରେ ହୋଲି ପାଳନ କରିବୁ। ୧୪ ତାରିଖରେ, ସବୁଠି ରଙ୍ଗ ଖେଳାଯିବ।

"राम के हाथे ढोलक सोहै
लछिमन हाथ मंजीरा।
भरत के हाथ कनक पिचकारी...
शत्रुघन हाथ अबीरा...
जोगिरा........

 ଏବଂ ଯେତେବେଳେ ଆମେ ହୋଲି ବିଷୟରେ କଥା ହେଉ, ଆମେ
ଗୁଜିଆର ମିଠା ସ୍ୱାଦକୁ କିପରି ଭୁଲିପାରିବା ? ଗୋଟିଏ ସମୟ ଥିଲା, ଯେତେବେଳେ ମରିସସ୍ ଭାରତର ପଶ୍ଚିମାଞ୍ଚଳଗୁଡ଼ିକୁ ମଧ୍ୟ ଚିନି ଯୋଗାଇଥିଲା, ସେମାନଙ୍କ ମିଠାରେ ମିଠା ମିଶାଇବା ପାଇଁ। ହୁଏତ ଏହି କାରଣ ପାଇଁ ଗୁଜରାଟୀରେ ଚିନିକୁ 'ମୋରା' ମଧ୍ୟ କୁହାଯାଏ। ସମୟ ସହିତ, ଭାରତ ଏବଂ ମରିସସ୍ ମଧ୍ୟରେ ସମ୍ପର୍କରେ ମିଠା କ୍ରମାଗତ ଭାବରେ ବୃଦ୍ଧି ପାଉଛି। ଏହି ମିଠା ସହିତ, ମୁଁ ମରିସସ୍ ର ସମସ୍ତ ନାଗରିକଙ୍କୁ ଜାତୀୟ ଦିବସର ବହୁତ ବହୁତ ଶୁଭକାମନା ଜଣାଉଛି।

ବନ୍ଧୁଗଣ,

ଯେତେବେଳେ ମୁଁ ମରିସସ୍ ଆସେ, ମୋତେ ଲାଗୁଛି ଯେ ମୁଁ ମୋ ନିଜ ଲୋକଙ୍କ ମଧ୍ୟରେ ଅଛି। ବାୟୁରେ, ମାଟିରେ, ପାଣିରେ, ଗାନ କରାଯାଉଥିବା ଗୀତରେ, ଢୋଲର ତାଳରେ, ଡାଲ ପୁରୀର ସ୍ୱାଦରେ ଏକ ନିଜର ଭାବନା ଥାଏ। କଚ୍ଛ ଏବଂ ଗେଟୋ ପିମେଣ୍ଟ ଭାରତର ପରିଚିତ ସୁଗନ୍ଧ ବହନ କରନ୍ତି। ଏବଂ ଏହି ସଂଯୋଗ ପ୍ରାକୃତିକ, କାରଣ ଏଠାକାର ମାଟି ଅନେକ ଭାରତୀୟଙ୍କ ରକ୍ତ ଏବଂ ଝାଳ ସହିତ ମିଶିଛି, ଯେଉଁମାନେ ଆମର ପୂର୍ବପୁରୁଷ ଥିଲେ। ଆମେ ସମସ୍ତେ ଗୋଟିଏ ପରିବାରର ଅଂଶ, ଏବଂ ଏହି ଭାବନା ସହିତ ପ୍ରଧାନମନ୍ତ୍ରୀ ନବୀନ ରାମଗୁଲାମ ଜୀ ଏବଂ ତାଙ୍କ କ୍ୟାବିନେଟ୍ ସହଯୋଗୀମାନେ ଆଜି ଆମ ସହିତ ଉପସ୍ଥିତ ଅଛନ୍ତି। ଆପଣମାନଙ୍କୁ ସମସ୍ତଙ୍କୁ ମୋର ହାର୍ଦ୍ଦିକ ଶୁଭେଚ୍ଛା। ପ୍ରଧାନମନ୍ତ୍ରୀ ନବୀନ ଜୀ ଯେଉଁ ଶବ୍ଦଗୁଡ଼ିକ କହିଛନ୍ତି, ତାହା କେବଳ ହୃଦୟରୁ ହିଁ ବାହାରିଥାଏ। ତାଙ୍କର ଉଷ୍ମ ଏବଂ ହୃଦୟସ୍ପର୍ଶୀ କଥା ପାଇଁ ମୁଁ ତାଙ୍କୁ ଆନ୍ତରିକ ଭାବରେ ଧନ୍ୟବାଦ ଜଣାଉଛି।

ବନ୍ଧୁଗଣ,

ମରିସସର ଲୋକମାନେ, ଏଠାକାର ସରକାର, ଯେପରି ପ୍ରଧାନମନ୍ତ୍ରୀ ଏବେ ଘୋଷଣା କରିଛନ୍ତି, ମୋତେ ସେମାନଙ୍କର ସର୍ବୋଚ୍ଚ ନାଗରିକ ସମ୍ମାନ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। ମୁଁ ଆପଣଙ୍କ ନିଷ୍ପତ୍ତିକୁ ବିନମ୍ରତାର ସହ ଗ୍ରହଣ କରୁଛି। ଏହା ଭାରତ ଏବଂ ମରିସସ ମଧ୍ୟରେ ଐତିହାସିକ ସମ୍ପର୍କକୁ ସମ୍ମାନ କରେ। ଏହା ସେହି ଭାରତୀୟମାନଙ୍କ ପାଇଁ ମଧ୍ୟ ଏକ ସମ୍ମାନ ଯେଉଁମାନେ ପିଢ଼ି ପରେ ପିଢ଼ି ଏହି ଭୂମିକୁ ସମର୍ପିତ ଭାବରେ ସେବା କରିଛନ୍ତି ଏବଂ ଆଜି ମରିସସକୁ ଏତେ ଉଚ୍ଚତାରେ ପହଞ୍ଚାଇଛନ୍ତି। ଏହି ସମ୍ମାନ ପାଇଁ ମୁଁ ମରିସସର ପ୍ରତ୍ୟେକ ନାଗରିକ ଏବଂ ଏଠାକାର ସରକାରଙ୍କୁ ମୋର କୃତଜ୍ଞତା ଜଣାଉଛି।

ବନ୍ଧୁଗଣ,

ଗତ ବର୍ଷ, ଜାତୀୟ ଦିବସ ଅବସରରେ ଭାରତର ରାଷ୍ଟ୍ରପତି ମୁଖ୍ୟ ଅତିଥି ଥିଲେ। ଏହା ମରିସସ ଏବଂ ଭାରତ ମଧ୍ୟରେ ସମ୍ପର୍କର ଶକ୍ତିକୁ ଦର୍ଶାଏ। ଏବଂ 12 ମାର୍ଚ୍ଚକୁ ଜାତୀୟ ଦିବସ ଭାବରେ ବାଛିବା ନିଜେ ଆମ ଦୁଇ ଦେଶର ସହଭାଗୀ ଇତିହାସର ପ୍ରତିଫଳନ। ଏହି ଦିନଟି ହେଉଛି, ସେହି ଦିବସ ଯେତେବେଳେ ମହାତ୍ମା ଗାନ୍ଧୀ ଦାସତ୍ୱ ବିରୁଦ୍ଧରେ ଦାଣ୍ଡି ସତ୍ୟାଗ୍ରହ ଆରମ୍ଭ କରିଥିଲେ। ଏହି ଦିନଟି ଉଭୟ ଦେଶର ସ୍ୱାଧୀନତା ସଂଗ୍ରାମର ସ୍ମରଣ କରାଇଥାଏ। ବାରିଷ୍ଟର ମଣିଲାଲ ଡକ୍ଟରଙ୍କ ଭଳି ଜଣେ ମହାନ ବ୍ୟକ୍ତିତ୍ୱଙ୍କୁ କେହି ଭୁଲିପାରିବେ ନାହିଁ, ଯିଏ ମରିସସ ଆସିଥିଲେ ଏବଂ ଲୋକଙ୍କ ଅଧିକାର ପାଇଁ ଲଢ଼େଇ ଆରମ୍ଭ କରିଥିଲେ। ଆମର ଚାଚା ରାମଗୁଲାମ ଜୀ, ନେତାଜୀ ସୁଭାଷ ଏବଂ ଅନ୍ୟମାନଙ୍କ ସହିତ, ଦାସତ୍ୱ ବିରୁଦ୍ଧରେ ଏକ ଅସାଧାରଣ ସଂଘର୍ଷର ନେତୃତ୍ୱ ନେଇଥିଲେ। ବିହାରର ପାଟନାର ଐତିହାସିକ ଗାନ୍ଧୀ ମୈଦାନରେ ସିୱୁସାଗୁର ଜୀଙ୍କ ପ୍ରତିମୂର୍ତ୍ତି ଏହି ସମୃଦ୍ଧ ପରମ୍ପରାର ସ୍ମରଣ କରାଇଥାଏ। ନବୀନ ଜୀଙ୍କ ସହିତ ସିୱୁସାଗୁର ଜୀଙ୍କୁ ଏଠାରେ ଶ୍ରଦ୍ଧାଞ୍ଜଳି ଦେବାର ସୌଭାଗ୍ୟ ମୋତେ ମିଳିଛି।

ବନ୍ଧୁଗଣ,

ଯେତେବେଳେ ମୁଁ ଆପଣଙ୍କ ମଧ୍ୟରେ ଆସେ, ଆପଣଙ୍କୁ ଭେଟିଥାଏ, ଆପଣଙ୍କ ସହିତ କଥା ହୁଏ, ମୁଁ ଇତିହାସର ଦୁଇଶହ ବର୍ଷ ପଛକୁ ଫେରିଯାଏ, ସେହି ସମୟକୁ ଯାହା ବିଷୟରେ ଆମେ କେବଳ ପଢ଼ିଛୁ - ଯେତେବେଳେ ଉପନିବେଶବାଦ ସମୟରେ ଅଗଣିତ ଭାରତୀୟଙ୍କୁ ପ୍ରତାରଣା ମାଧ୍ୟମରେ ଏଠାକୁ ଅଣାଯାଇଥିଲା। ସେମାନେ ଅନେକ ଯନ୍ତ୍ରଣା, କଷ୍ଟ ଏବଂ ବିଶ୍ୱାସଘାତକତାକୁ ସହ୍ୟ କରିଥିଲେ। ସେହି କଷ୍ଟକର ସମୟରେ, ସେମାନଙ୍କର ଶକ୍ତିର ଉତ୍ସ ଥିଲେ ପ୍ରଭୁ ରାମ, ରାମ ଚରିତ ମାନସ, ପ୍ରଭୁ ରାମଙ୍କ ସଂଘର୍ଷ, ତାଙ୍କର ବିଜୟ, ତାଙ୍କର ପ୍ରେରଣା ଏବଂ ତାଙ୍କ ତପସ୍ୟା। ସେମାନେ ପ୍ରଭୁ ରାମଙ୍କ ଠାରେ ନିଜକୁ ଦେଖିଲେ ଏବଂ ତାଙ୍କ ଠାରୁ ଶକ୍ତି ଏବଂ ଆତ୍ମବିଶ୍ୱାସ ପାଇଲେ ।

राम बनिइहैं तो बन जइहै,
बिगड़ी बनत बनत बन जाहि।
चौदह बरिस रहे बनवासी,
लौटे पुनि अयोध्या माँहि॥

ऐसे दिन हमरे फिर जइहैं,
बंधुवन के दिन जइहें बीत।
पुनः मिलन हमरौ होई जईहै,
जइहै रात भयंकर बीत॥

ବନ୍ଧୁଗଣ,

ମୁଁ ୧୯୯୮ ମସିହାରେ 'ଅନ୍ତର୍ଜାତୀୟ ରାମାୟଣ ସମ୍ମିଳନୀ' ପାଇଁ ଏଠାକୁ ଆସିଥିବା କଥା ମନେ ପକାଉଛି। ସେତେବେଳେ ମୁଁ କୌଣସି ସରକାରୀ ପଦବୀରେ ନ ଥିଲି। ମୁଁ ଜଣେ ସାଧାରଣ କର୍ମୀ ଭାବରେ ଆସିଥିଲି। ଆଶ୍ଚର୍ଯ୍ୟର କଥା ହେଉଛି, ନବୀନ ଜୀ ସେତେବେଳେ ମଧ୍ୟ ପ୍ରଧାନମନ୍ତ୍ରୀ ଥିଲେ। ପରେ, ଯେତେବେଳେ ମୁଁ ପ୍ରଧାନମନ୍ତ୍ରୀ ହେଲି, ନବୀନ ଜୀ ଦିଲ୍ଲୀରେ ମୋର ଶପଥ ଗ୍ରହଣ ଉତ୍ସବରେ ଯୋଗ ଦେଇ ମୋତେ ସମ୍ମାନିତ କରିଥିଲେ।

ବନ୍ଧୁଗଣ,

ବର୍ଷ ବର୍ଷ ପୂର୍ବରୁ ମୁଁ ଏଠାରେ ଭଗବାନ ରାମ ଏବଂ ରାମାୟଣ ପ୍ରତି ଯେଉଁ ଗଭୀର ବିଶ୍ୱାସ ଏବଂ ଭାବନା ଅନୁଭବ କରିଥିଲି ତାହା ଆଜି ମଧ୍ୟ ସେହିପରି ଦୃଢ଼ ରହିଛି। ଗତ ବର୍ଷ ଜାନୁଆରୀରେ ଅଯୋଧ୍ୟାରେ ପ୍ରାଣ ପ୍ରତିଷ୍ଠା ସମାରୋହ ସମୟରେ - ୫୦୦ ବର୍ଷର ଲମ୍ବା ଅପେକ୍ଷାର ଅନ୍ତ ଘଟାଇ - ସମଗ୍ର ଭାରତରେ ଯେଉଁ ଉତ୍ସାହ ଏବଂ ଉତ୍ସବ ହୋଇଥିଲା ତାହା ଏଠାରେ ମରିସସରେ ମଧ୍ୟ ସମାନ ଭାବରେ ପ୍ରତିଫଳିତ ହୋଇଥିଲା। ଆମର ହୃଦୟସ୍ପର୍ଶୀ ସମ୍ପର୍କକୁ ବୁଝି ମରିସସ ଅଧା ଦିନ ଛୁଟି ଘୋଷଣା ମଧ୍ୟ କରିଥିଲା। ଭାରତ ଏବଂ ମରିସସ ମଧ୍ୟରେ ବିଶ୍ୱାସର ଏହି ସମାନ ବନ୍ଧନ ଆମର ସ୍ଥାୟୀ ବନ୍ଧୁତାର ଏକ ଦୃଢ଼ ମୂଳଦୁଆ ଗଠନ କରେ।

ବନ୍ଧୁଗଣ,

ମୁଁ ଜାଣେ ଯେ ମରିସସର ଅନେକ ପରିବାର ସମ୍ପ୍ରତି ମହାକୁମ୍ଭରୁ ଫେରିଛନ୍ତି। ମାନବ ଇତିହାସର ଏହି ସର୍ବବୃହତ ସମାବେଶରେ ବିଶ୍ୱ ଆଶ୍ଚର୍ଯ୍ୟ ହୋଇଛି - ଯେଉଁଥିରେ 65 ରୁ 66 କୋଟି ଲୋକ ଉପସ୍ଥିତ ଥିଲେ - ଏବଂ ମରିସସର ଲୋକମାନେ ମଧ୍ୟ ଏହି ଐତିହାସିକ କାର୍ଯ୍ୟକ୍ରମରେ ସାମିଲ ହୋଇଥିଲେ। କିନ୍ତୁ ମୁଁ ଏହା ମଧ୍ୟ ଜାଣେ ଯେ ମରିସସର ମୋର ଅନେକ ଭାଇ ଏବଂ ଭଉଣୀ, ସେମାନଙ୍କର ହୃଦୟର ଇଚ୍ଛା ସତ୍ତ୍ୱେ, ଏକତାର ଏହି ମହାକୁମ୍ଭରେ ଯୋଗ ଦେଇପାରିଲେ ନାହିଁ। ମୁଁ ଆପଣଙ୍କ ଭାବନାକୁ ବୁଝିପାରୁଛି। ସେଥିପାଇଁ ମୁଁ ମହାକୁମ୍ଭ ସମୟରେ ଟାଣି ନିଆଯାଇଥିବା ପବିତ୍ର ସଙ୍ଗମରୁ ପବିତ୍ର ଜଳକୁ ମୋ ସହିତ ଆଣିଛି। ଆସନ୍ତାକାଲି, ଏହି ପବିତ୍ର ଜଳକୁ ଏଠାରେ ଗଙ୍ଗା ତାଲାବରେ ବିସର୍ଜନ କରାଯିବ। 50 ବର୍ଷ ପୂର୍ବେ ଗୋମୁଖରେ ଗଙ୍ଗା ଜଳ ଏଠାକୁ ଅଣାଯାଇଥିଲା ଏବଂ ଗଙ୍ଗା ତାଲାବରେ ବିସର୍ଜନ କରାଯାଇଥିଲା। ଆସନ୍ତାକାଲି, ଆମେ ପୁଣି ଥରେ ସମାନ ପବିତ୍ର ମୁହୂର୍ତ୍ତର ସାକ୍ଷୀ ହେବା। ମୋର ପ୍ରାର୍ଥନା ଯେ ମାତା ଗଙ୍ଗାଙ୍କ ଆଶୀର୍ବାଦ ଏବଂ ମହାକୁମ୍ଭର ଏହି ପ୍ରସାଦ ସହିତ, ମରିସସ ସମୃଦ୍ଧିର ନୂତନ ଶିଖରରେ ପହଞ୍ଚୁ।

ବନ୍ଧୁଗଣ,

ମରିସସ ହୁଏତ 1968 ରେ ସ୍ୱାଧୀନତା ପାଇଥାଇପାରେ, କିନ୍ତୁ ଏହି ଦେଶ ସମସ୍ତଙ୍କୁ ଏକାଠି ନେଇ ଯେପରି ଅଗ୍ରଗତି କରିଛି , ତାହା ବିଶ୍ୱ ପାଇଁ ଏକ ଉଲ୍ଲେଖନୀୟ ଉଦାହରଣ। ବିଶ୍ୱର ବିଭିନ୍ନ କୋଣରୁ ଲୋକମାନେ ମରିସସକୁ ନିଜର ଘର କରିଛନ୍ତି, ସଂସ୍କୃତିର ଏକ ସ୍ପନ୍ଦନଶୀଳ ଦୃଶ୍ୟପଟ ସୃଷ୍ଟି କରିଛନ୍ତି – ଯାହା ବିବିଧତାର ଏକ ସୁନ୍ଦର ଉଦ୍ୟାନ। ଆମର ପୂର୍ବପୁରୁଷମାନଙ୍କୁ ବିହାର, ଉତ୍ତର ପ୍ରଦେଶ ଏବଂ ଭାରତର ଅନ୍ୟାନ୍ୟ ଅଞ୍ଚଳରୁ ଏଠାକୁ ଅଣାଯାଇଥିଲା। ଯଦି ଆପଣ ଭାଷା, ଉପଭାଷା ଏବଂ ଖାଦ୍ୟ ଅଭ୍ୟାସକୁ ପର୍ଯ୍ୟବେକ୍ଷଣ କରନ୍ତି, ତେବେ ଆପଣ ଦେଖିବେ ଯେ ମରିସସ୍ ଏକ କ୍ଷୁଦ୍ର ଭାରତକୁ ପ୍ରତିଫଳିତ କରେ। ଭାରତୀୟମାନଙ୍କର ପିଢ଼ି ରୂପେଲି ପରଦାରେ ମରିସସକୁ ପ୍ରଶଂସା କରିଛନ୍ତି। ଯେତେବେଳେ ଆପଣ ହିଟ୍ ହିନ୍ଦୀ ଗୀତ ଦେଖନ୍ତି, ଆପଣ ଇଣ୍ଡିଆ ହାଉସ୍, ଇଲେ ଅକ୍ସ ସର୍ଫସ୍ , ଗ୍ରୀସ୍-ଗ୍ରୀସ୍ ବିଚ୍, କାଉଡାନ୍ ୱାଟରଫ୍ରଣ୍ଟର ସୁନ୍ଦର ଦୃଶ୍ୟ ଦେଖିବେ ଏବଂ ରୋଚେଷ୍ଟର ଜଳପ୍ରପାତର ଶବ୍ଦ ଶୁଣିବେ। ହୁଏତ, ମରିସସର ଏପରି କୌଣସି କୋଣ ନାହିଁ ଯାହା ଭାରତୀୟ ସିନେମାରେ ନିଜର ସ୍ଥାନ ପାଇନାହିଁ। ପ୍ରକୃତରେ, ଯେତେବେଳେ ସଙ୍ଗୀତ ଭାରତୀୟ ହୋଇଥାଏ ଏବଂ ସ୍ଥାନ ମରିସସ୍ ହୋଇଥାଏ, ସେତେବେଳେ ଫିଲ୍ମଟି ହିଟ୍ ହେବାର ଗ୍ୟାରେଣ୍ଟି ଅଧିକ ହୋଇଯାଏ !

ବନ୍ଧୁଗଣ,

ମୁଁ ସମଗ୍ର ଭୋଜପୁର ଅଞ୍ଚଳ ଏବଂ ବିହାର ସହିତ ଆପଣଙ୍କର ଗଭୀର ଭାବପ୍ରବଣ ସମ୍ପର୍କକୁ ମଧ୍ୟ ବୁଝିପାରୁଛି ।

ପୂର୍ବାଞ୍ଚଳର ସାଂସଦ ହୋଇଥିବାରୁ, ମୁଁ ଜାଣେ ଯେ ବିହାରର କେତେ ସମ୍ଭାବନା ଅଛି। ଗୋଟିଏ ସମୟ ଥିଲା ଯେତେବେଳେ ବିହାର ବିଶ୍ୱର ସମୃଦ୍ଧିର କେନ୍ଦ୍ର ଥିଲା। ଏବେ, ଆମେ ଏକାଠି ବିହାରର ଗୌରବ ଫେରାଇ ଆଣିବା ପାଇଁ କାମ କରୁଛୁ।

ବନ୍ଧୁଗଣ,

ଯେତେବେଳେ ବିଶ୍ୱର ଅନେକ ଅଂଶ ଶିକ୍ଷାର ପହଞ୍ଚଠାରୁ ବହୁ ଦୂରରେ ଥିଲା, ସେତେବେଳେ ଭାରତର ବିହାରରେ ନାଳନ୍ଦା ଭଳି ଏକ ବିଶ୍ୱ ଶିକ୍ଷା କେନ୍ଦ୍ର ଥିଲା। ଆମ ସରକାର ନାଳନ୍ଦା ବିଶ୍ୱବିଦ୍ୟାଳୟକୁ ପୁନର୍ଜୀବିତ କରିଛି ଏବଂ ନାଳନ୍ଦାର ଆତ୍ମାକୁ ପୁନର୍ଜୀବିତ କରିଛି। ଆଜି, ଭଗବାନ ବୁଦ୍ଧଙ୍କ ଶିକ୍ଷା ବିଶ୍ୱକୁ ଶାନ୍ତିର ଅନୁସନ୍ଧାନରେ ପ୍ରେରଣା ଦେଇ ଚାଲିଛି । ଆମେ କେବଳ ଏହି ସମୃଦ୍ଧ ଐତିହ୍ୟକୁ ସଂରକ୍ଷଣ କରୁନାହୁଁ ବରଂ ବିଶ୍ୱ ସ୍ତରରେ ଏହାର ପ୍ରଚାର ମଧ୍ୟ କରୁଛୁ। ଆଜି, ବିହାରର ମଖାନା ସାରା ଭାରତରେ ବ୍ୟାପକ ସ୍ୱୀକୃତି ପାଉଛି। ସାରା ବିଶ୍ୱରେ ସ୍ନାକ୍ସ ମେନୁରେ ବିହାରର ମଖାନା ସ୍ଥାନ ପାଇବାକୁ ବହୁତ ସମୟ ଲାଗିବ ନାହିଁ।
 

"ମୁଁ ଜାଣେ ଏଠାରେ ମଖାନାକୁ କେତେ ପସନ୍ଦ କରାଯାଏ।

ମୁଁ ମଧ୍ୟ ମଖାନାକୁ ଭଲ ପାଏ।"
 

ବନ୍ଧୁଗଣ,

ଆଜି, ଭାରତ ଭବିଷ୍ୟତ ପିଢ଼ି ପାଇଁ ମରିସସ ସହିତ ଏହାର ଗଭୀର ସମ୍ପର୍କକୁ ପରିପୁଷ୍ଟ ଏବଂ ସଂରକ୍ଷଣ କରୁଛି। ମୁଁ ଖୁସି ଯେ ମରିସସରେ ଥିବା ଭାରତୀୟ ପ୍ରବାସୀମାନଙ୍କର ସପ୍ତମ ପିଢ଼ିକୁ OCI କାର୍ଡ ବିସ୍ତାର କରିବା ପାଇଁ ନିଷ୍ପତ୍ତି ନିଆଯାଇଛି। ମୋତେ ମରିସସର ରାଷ୍ଟ୍ରପତି ଏବଂ ତାଙ୍କ ପତ୍ନୀ ବୃନ୍ଦା ଜୀଙ୍କୁ OCI କାର୍ଡ ପ୍ରଦାନ କରିବାର ସୌଭାଗ୍ୟ ମିଳିଥିଲା। ପ୍ରଧାନମନ୍ତ୍ରୀ ଏବଂ ତାଙ୍କ ପତ୍ନୀ ବୀଣା ଜୀଙ୍କୁ OCI କାର୍ଡ ପ୍ରଦାନ କରିବାର ମଧ୍ୟ ମୋତେ ସମ୍ମାନ ମିଳିଥିଲା। ଏହି ବର୍ଷର ପ୍ରବାସୀ ଭାରତୀୟ ଦିବସରେ, ମୁଁ ସାରା ବିଶ୍ୱରେ ବସବାସ କରିଥିବା ଗିର୍ମିଟିଆ ସମ୍ପ୍ରଦାୟ ପାଇଁ କିଛି ପଦକ୍ଷେପ ନେବା ଲାଗି ମଧ୍ୟ ପ୍ରସ୍ତାବ ଦେଇଥିଲି । ଆପଣମାନେ ଜାଣି ଖୁସି ହେବେ ଯେ ଭାରତ ସରକାର ଗିର୍ମିଟିଆ ସମ୍ପ୍ରଦାୟର ଏକ ବ୍ୟାପକ ଡାଟାବେସ୍ ତିଆରି କରିବା ପାଇଁ ସକ୍ରିୟ ଭାବରେ କାର୍ଯ୍ୟ କରୁଛି। ଗିର୍ମିଟିଆ ସମ୍ପ୍ରଦାୟର ସଦସ୍ୟମାନେ ଯେଉଁ ଗ୍ରାମ ଏବଂ ସହରରୁ ସ୍ଥାନାନ୍ତରିତ ହୋଇଥିଲେ ସେ ବିଷୟରେ ସୂଚନା ସଂଗ୍ରହ କରିବା ପାଇଁ ପ୍ରୟାସ ଚାଲିଛି । ଆମେ ସେମାନେ ଯେଉଁ ସ୍ଥାନରୁ ବସବାସ କରିଛନ୍ତି ତାହା ଚିହ୍ନଟ କରିବା ପାଇଁ ମଧ୍ୟ କାର୍ଯ୍ୟ କରୁଛୁ। ଗିର୍ମିଟିଆ ସମ୍ପ୍ରଦାୟର ସମଗ୍ର ଇତିହାସ - ଅତୀତରୁ ବର୍ତ୍ତମାନ ପର୍ଯ୍ୟନ୍ତ ସେମାନଙ୍କର ଯାତ୍ରା - ଗୋଟିଏ ସ୍ଥାନରେ ନଥୀକରଣ କରାଯାଉଛି। ଆମର ପ୍ରୟାସ ହେଉଛି ଯେ, ଏକ ବିଶ୍ୱବିଦ୍ୟାଳୟ ସହିତ ମିଶି, ଗିର୍ମିଟିଆ ଐତିହ୍ୟ ଏବଂ ବିଶ୍ୱ ଗିର୍ମିଟିଆ ସମ୍ମିଳନୀର ଐତିହ୍ୟ ଉପରେ ଏକ ଅଧ୍ୟୟନ କରାଯିବା ଉଚିତ । ଭାରତ ମରିସସ ଏବଂ ଗିର୍ମିଟିଆ ସମ୍ପ୍ରଦାୟ ସହିତ ଜଡିତ ଅନ୍ୟ ଦେଶଗୁଡ଼ିକ ସହିତ 'ଇଣ୍ଡେଞ୍ଚର୍ଡ ଲେବର ରୁଟ୍' ଚିହ୍ନଟ କରିବାକୁ ମଧ୍ୟ ଯୋଜନା କରୁଛି । ଆମେ ମରିସସର ଐତିହାସିକ ଅପ୍ରବାସୀ ଘାଟ ସମେତ ଏହି ରାସ୍ତାଗୁଡ଼ିକରେ ଥିବା ପ୍ରମୁଖ ଐତିହ୍ୟ ସ୍ଥାନଗୁଡ଼ିକୁ ସଂରକ୍ଷଣ କରିବାକୁ ଲକ୍ଷ୍ୟ ରଖିଛୁ ।

 ବନ୍ଧୁଗଣ,
ମରିସସ କେବଳ ଏକ ସହଯୋଗୀ ଦେଶ ନୁହେଁ। ଆମ ପାଇଁ, ମରିସସ ହେଉଛି ପରିବାର। ଏହି ବନ୍ଧନ ଗଭୀର ଏବଂ ଦୃଢ଼, ଇତିହାସ, ଐତିହ୍ୟ ଏବଂ ମାନବ ଆତ୍ମାରେ ମୂଳ। ମରିସସ୍ ଭାରତକୁ ବିସ୍ତୃତ ବିଶ୍ୱ ଦକ୍ଷିଣ ସହିତ ସଂଯୋଗ କରୁଥିବା ଏକ ସେତୁ ମଧ୍ୟ। ଦଶ ବର୍ଷ ପୂର୍ବେ, 2015 ରେ ପ୍ରଧାନମନ୍ତ୍ରୀ ଭାବରେ ମୋର ପ୍ରଥମ ମରିସସ୍ ଗସ୍ତରେ, ମୁଁ ଭାରତର ସାଗର ଭିଜନ ଘୋଷଣା କରିଥିଲି। ସାଗର ଅର୍ଥ ହେଉଛି 'କ୍ଷେତ୍ରରେ ସମସ୍ତଙ୍କ ପାଇଁ ସୁରକ୍ଷା ଏବଂ ଅଭିବୃଦ୍ଧି'। ଆଜି, ମରିସସ୍ ଏହି ଦୃଷ୍ଟିକୋଣର କେନ୍ଦ୍ରରେ ଅଛି। ଏହା ନିବେଶ ହେଉ କିମ୍ବା ଭିତ୍ତିଭୂମି, ବାଣିଜ୍ୟ କିମ୍ବା ସଙ୍କଟ ପ୍ରତିକ୍ରିୟା, ଭାରତ ସର୍ବଦା ମରିସସ୍ ସହିତ ଠିଆ ହୋଇଛି। ମରିସସ୍ ହେଉଛି ଆଫ୍ରିକୀୟ ସଂଘର ପ୍ରଥମ ଦେଶ ଯାହା ସହିତ ଆମେ 2021 ରେ ବ୍ୟାପକ ଆର୍ଥିକ ସହଯୋଗ ଏବଂ ସହଭାଗୀତା ଚୁକ୍ତିନାମା ସ୍ୱାକ୍ଷର କରିଥିଲୁ। ଏହା ନୂତନ ସୁଯୋଗ ଖୋଲିଛି, ମରିସସ୍ କୁ ଭାରତୀୟ ବଜାରରେ ଅଗ୍ରାଧିକାର ପ୍ରବେଶ ପ୍ରଦାନ କରିଛି। ଭାରତୀୟ କମ୍ପାନୀଗୁଡ଼ିକ ମରିସସ୍ ରେ ଲକ୍ଷ ଲକ୍ଷ ଡଲାର ନିବେଶ କରିଛନ୍ତି। ଆମେ ମରିସସ୍ ର ଲୋକଙ୍କ ପାଇଁ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରକଳ୍ପ ନିର୍ମାଣରେ ସହଭାଗୀ ହୋଇଛୁ। ଏହା ଅଭିବୃଦ୍ଧିକୁ ବୃଦ୍ଧି କରୁଛି, ନିଯୁକ୍ତି ସୃଷ୍ଟି କରୁଛି ଏବଂ ଶିଳ୍ପକୁ ପରିବର୍ତ୍ତନ କରୁଛି। ଭାରତ ମରିସସ୍ ରେ କ୍ଷମତା ନିର୍ମାଣରେ ଏକ ଗର୍ବିତ ଅଂଶୀଦାର।

ବନ୍ଧୁଗଣ,

ବିଶାଳ ସମୁଦ୍ର କ୍ଷେତ୍ର ସହିତ ମରିସସ୍ କୁ ଅବୈଧ ମାଛ ଧରିବା, ଲୁଟ ଏବଂ ଅପରାଧରୁ ଏହାର ସମ୍ପଦଗୁଡ଼ିକୁ ସୁରକ୍ଷିତ ରଖିବା ଆବଶ୍ୟକ। ଏକ ବିଶ୍ୱସ୍ତ ଏବଂ ନିର୍ଭରଯୋଗ୍ୟ ବନ୍ଧୁ ଭାବରେ, ଭାରତ ମରିସସ ସହିତ ଆପଣଙ୍କ ଜାତୀୟ ସ୍ୱାର୍ଥକୁ ସୁରକ୍ଷା ଦେବା ଏବଂ ଭାରତ ମହାସାଗର କ୍ଷେତ୍ରକୁ ସୁରକ୍ଷିତ ରଖିବା ପାଇଁ କାର୍ଯ୍ୟ କରେ। ସଙ୍କଟ ସମୟରେ, ଭାରତ ସର୍ବଦା ମରିସସ ସହିତ ଛିଡା ହୋଇଛି। ଯେତେବେଳେ COVID-19 କାୟା ବିସ୍ତାର କରିଥିଲା, ଭାରତ ପ୍ରଥମ ଦେଶ ଥିଲା ଯିଏ 1 ଲକ୍ଷ ଟୀକା ଏବଂ ଅତ୍ୟାବଶ୍ୟକ ଔଷଧ ଯୋଗାଇଥିଲା। ଯେତେବେଳେ ମରିସସ ଏକ ସଙ୍କଟର ସମ୍ମୁଖୀନ ହୁଏ, ଭାରତ ପ୍ରଥମ ପ୍ରତିକ୍ରିୟାକାରୀ ଭାବେ ଠିଆ ହୁଏ। ଯେତେବେଳେ ମରିସସ ସମୃଦ୍ଧ ହୁଏ, ଭାରତ ପ୍ରଥମ ଉତ୍ସବ ପାଳନ କରେ। ସର୍ବୋପରି, ଯେପରି ମୁଁ ପୂର୍ବରୁ କହିଥିଲି, ଆମ ପାଇଁ, ମରିସସ ହେଉଛି ପରିବାର।

ବନ୍ଧୁଗଣ,
ଭାରତ ଏବଂ ମରିସସ କେବଳ ଇତିହାସ ଦ୍ୱାରା ନୁହେଁ , ବରଂ ଭବିଷ୍ୟତର ସହଭାଗୀ ସୁଯୋଗ ଦ୍ୱାରା ମଧ୍ୟ ଜଡିତ। ଭାରତ ଯେଉଁଠାରେ ଦ୍ରୁତ ପ୍ରଗତି କରୁଛି, ସେଠାକୁ ଏହା ସକ୍ରିୟ ଭାବରେ ମରିସସର ଅଭିବୃଦ୍ଧିକୁ ସମର୍ଥନ କରୁଛି। ମେଟ୍ରୋ ସିଷ୍ଟମ ଏବଂ ଇଲେକ୍ଟ୍ରିକ୍ ବସ୍ ଠାରୁ ଆରମ୍ଭ କରି ସୌରଶକ୍ତି ପ୍ରକଳ୍ପ, UPI ଏବଂ RuPay କାର୍ଡ ପରି ଆଧୁନିକ ସେବା ଏବଂ ନୂତନ ସଂସଦ ଭବନ ନିର୍ମାଣ - ଭାରତ ବନ୍ଧୁତାର ମନୋଭାବ ସହିତ ମରିସସକୁ ସମର୍ଥନ କରୁଛି। ଆଜି, ଭାରତ ବିଶ୍ୱର ପଞ୍ଚମ ବୃହତ ଅର୍ଥନୈତିକ ଶକ୍ତି ଭାବରେ ଠିଆ ହୋଇଛି ଏବଂ ଶୀଘ୍ର ବିଶ୍ୱର ତୃତୀୟ ବୃହତ ଅର୍ଥନୀତି ହେବା ପାଇଁ ମାର୍ଗରେ ଅଛି। ଭାରତ ସର୍ବଦା ଆଶା କରେ ଯେ ମରିସସ ଆମର ଅଭିବୃଦ୍ଧିରୁ ପ୍ରଚୁର ଲାଭ ପାଇବ। ସେଥିପାଇଁ, ଯେତେବେଳେ ଭାରତ G20 ର ସଭାପତିତ୍ୱ କରିଥିଲା, ଆମେ ମରିସସକୁ ଏକ ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ଭାବରେ ଆମନ୍ତ୍ରଣ କରିଥିଲୁ। ଭାରତରେ ଅନୁଷ୍ଠିତ ଶିଖର ସମ୍ମିଳନୀ ସମୟରେ, ଆଫ୍ରିକୀୟ ସଂଘକୁ ପ୍ରଥମ ଥର ପାଇଁ G20 ର ସ୍ଥାୟୀ ସଦସ୍ୟ କରାଯାଇଥିଲା। ଏହି ଦୀର୍ଘ ଦିନର ଦାବି ଶେଷରେ ଭାରତର ଅଧ୍ୟକ୍ଷତାରେ ପୂରଣ ହୋଇଥିଲା।

ବନ୍ଧୁଗଣ,

 ଏଠାରେ  ଏକ ପ୍ରସିଦ୍ଧ ଗୀତ ଅଛି ..

तार बांधी धरती ऊपर
आसमान गे माई...
घुमी फिरी बांधिला
देव अस्थान गे माई...
गोर तोहर लागीला
धरती हो माई...

ଆମେ ପୃଥିବୀକୁ ଆମର ମାତା ବୋଲି ମାନିଥାଉ। ଯେତେବେଳେ ମୁଁ 10 ବର୍ଷ ପୂର୍ବେ ମରିସସ ଗସ୍ତ କରିଥିଲି, ମୁଁ ସାରା ବିଶ୍ୱ ଉଦ୍ଦେଶ୍ୟରେ କହିଥିଲି ଯେ, ଜଳବାୟୁ ପରିବର୍ତ୍ତନ ବିଷୟରେ ମରିସସ କ'ଣ କହୁଛି ତାହା ଆମକୁ ଶୁଣିବାକୁ ପଡିବ। ମୁଁ ଖୁସି ଯେ ଆଜି ମରିସସ ଏବଂ ଭାରତ ମିଳିତ ଭାବରେ ସାରା ବିଶ୍ୱରେ ଏହି ବିଷୟରେ ସଚେତନତା ପ୍ରସାର କରୁଛନ୍ତି। ମରିସସ ଏବଂ ଭାରତ ଅନ୍ତର୍ଜାତୀୟ ସୌର ମେଣ୍ଟ ଏବଂ ଗ୍ଲୋବାଲ ବାୟୋଫୁଏଲ ମେଣ୍ଟ ଭଳି ପଦକ୍ଷେପର ପ୍ରମୁଖ ସଦସ୍ୟ। ଆଜି, ମରିସସ ଏକ ପେଡ୍ ମା କେ ନାମ ଅଭିଯାନ ସହିତ ମଧ୍ୟ ଜଡିତ। ଆଜି, ମୁଁ ପ୍ରଧାନମନ୍ତ୍ରୀ ନବୀନ ରାମଗୁଲାମ ଜୀଙ୍କ ସହିତ ଏକ ପେଡ୍ ମା କେ ନାମ ଅଭିଯାନ ଅଧୀନରେ ଏକ ଗଛ ଲଗାଇଲି। ଏହି ଅଭିଯାନ କେବଳ ଆମକୁ ଜନ୍ମ ଦେଇଥିବା ମା' ସହିତ ନୁହେଁ, ବରଂ ପୃଥିବୀ ମାତା ସହିତ ମଧ୍ୟ ଏକ ବନ୍ଧନ ସୃଷ୍ଟି କରେ। ମୁଁ ମରିସସର ସମସ୍ତ ନାଗରିକଙ୍କୁ ଏହି ଅଭିଯାନର ଅଂଶ ହେବାକୁ ଅନୁରୋଧ କରୁଛି।

ବନ୍ଧୁଗଣ,

ଏକବିଂଶ ଶତାବ୍ଦୀରେ ମରିସସ ପାଇଁ ଅନେକ ସମ୍ଭାବନା ଦେଖାଦେଉଛି। ମୁଁ ଆପଣଙ୍କୁ ନିଶ୍ଚିତ କରୁଛି ଯେ ଭାରତ ମରିସସ ସହିତ ପ୍ରତ୍ୟେକ ପଦକ୍ଷେପରେ ଅଛି। ପୁଣି ଥରେ, ମୁଁ ପ୍ରଧାନମନ୍ତ୍ରୀ, ତାଙ୍କ ସରକାର ଏବଂ ମରିସସର ଲୋକମାନଙ୍କୁ ଧନ୍ୟବାଦ ଜଣାଉଛି।

ପୁଣି ଥରେ, ଜାତୀୟ ଦିବସ ଅବସରରେ ଆପଣ ସମସ୍ତଙ୍କୁ
ବହୁତ ବହୁତ ଧନ୍ୟବାଦ।  ନମସ୍କାର।

ସ୍ୱୀକାର - ଏହା ପ୍ରଧାନମନ୍ତ୍ରୀଙ୍କ ମନ୍ତବ୍ୟର ଆନୁମାନିକ ଅନୁବାଦ। ମୂଳ ମନ୍ତବ୍ୟ ହିନ୍ଦୀରେ ଦିଆଯାଇଥିଲା।

***

SSP