অসামগী রাজ্যপাল, শ্রী লক্ষ্মন প্রসাদ আচার্য়জী, দাইনামিক ওইরবা মুখ্য মন্ত্রী, হিমন্তা বিস্বা শর্মাজী, ইন্দস্ত্রীগী লুচিংবশিং, মশক নাইবা মীথুংলেনশিং, নুপী অমদি নুপাশিং!

নোংপোক থংবা ভারত অমসুং অৱাং নোংপোক্কী লমদম অসি ঙসি অনৌবা তুংলমচৎ অমদা চঙশিল্লগনি। এদভান্তেজ অসাম অসি অসামগী পোতেন্সিএল অমসুং প্রোগ্রেসকা মালেম পুম্বগা শম্নহন্নবা অচৌবা খোংথাং অমনি। মমাংদা ভারতকী চাউখৎ-থৌরাংদা নোংপোক থংবা ভারতনা মরু ওইবা থৌদাং অমা লৌরম্মি হায়না পুৱারীনা তাক্লি। ঙসি, ভারতনা চাউখৎলবা লৈবাক অমা ওইবগী মায়কৈদা চংশিল্লকপদা, নোংপোক থংবা ভারত অমসুং ঐখোয়গী অৱাং নোংপোক লমদম্না অমুক্কা হন্না মখোয়গী শক্তি উৎনবা শেম-শারি। ঐহাক্না এদভান্তেজ অসাম অসি হায়রিবা ৱাখল্লোন অসিগী মমি অমা ওইনা উরি। অসিগুম্বা চাউরবা থৌরম অসি শীনবগীদমক ঐনা অসাম সরকার অমসুং হিমন্তজীগী তীম পুম্নমকপু থম্মোয় শেংনা থাগৎপা ফোংদোকচরি। ঐহাক্না নীংশিংলি মদুদি ২০১৩দা ঐহাক অসামদা মীখলগী কেম্পেনগীদমক লাকখিবা মতমদা, ঐহাক্না থৌরম অমদা করিগুম্বা খরা হায়জখি: "ঐখোয়না অলফাবেত তম্বদা ' Aনা অসাম’ হায়বগদবা মতম অদু কুইদ্রে।"

মরুপশিং,

ঙসিদি, ঐখোয় পুম্নমক্না মালেমগী ফিভমশিং অদু কুপ্না য়েংশিল্লি অমসুং খঙলি। মালেমগী ওইবা তম্বা ঙমদবা লৈরবসু, মালেম শিনবা থুংনা লৈরিবা এক্সপর্তশিংগী থাজবা অসি অমা খক্তনি অমসুং থাজবা অসি ভারতকী য়াম্না থুনা চাউখৎলকপনি। ভারতকী মফমদা থাজবা থম্লিবা অসিগী তঙাইফদবা মরম অমা লৈরি। ঙসিগী ভারত অসি খোংথাং অমদগী অমদা, চাউনা থবক পায়খৎলি। ২১শুবা চহিচা অসিগী লাক্কদৌরিবা চহি ২৫গীদমক অশাংবা মতমগী মীৎয়েং অমগা লোয়ননা থবক পায়খৎলি। ঙসি মালেমগী থাজবা অসি ভারতকী নহা ওইরিবা মীশিং অদুদা য়ুম্ফম ওইরি, মখোয় অসি য়াম্না থুনা স্কিল লৈরক্লি অমসুং ইনোবেসনবু থৌগৎলি। মালেমনা ভারতকী নিও-মিদল ক্লাসতা থাজবা থম্লি, মখোয় অসি লাইরবদগী থোরক্লি অমসুং অনৌবা এস্পিরেসনগা লোয়ননা মাংলোমদা চংশিল্লি। মালেমনা ভারতকী মীওই বিল্লিয়ন ১.৪বু থাজৈ, মখোয়না রাজনিতীগী ওইবা অচেৎপা অমসুং পোলিসী কন্তিন্যুতীবু শৌগৎলি। মালেমনা ভারতকী লৈঙাক্লোনদা থাজবা থম্লি, মসিনা লেপ্পা লৈতনা রিফোর্মশিং পায়খৎলি। ঙসি ভারতনা লোকেল সপ্লাই চেনশিং মপাঙ্গল কনখৎহল্লি। ভারতনা মালেমগী তোঙান তোঙানবা মফমশিংগা লোয়ননা ফ্রী ত্রেদ এগ্রীমেন্ত সাইন তৌরি। নোংপোক এসিয়াগা ঐখোয়গী কনেক্তিবিতী অসি লেপ্তনা ফগৎলক্লি। মসিগী মথক্তা, অনৌবা ইন্দিয়া-মিদ্দল ইস্ত-য়ুরোপ ইকোনোমিক কোরিদোর অসিনা অনৌবা খুদোংচাবা কয়া অমা ফংহল্লি।

মরুপশিং,

ভারতকী লমদা মালেমগী ওইনা থাজবা হেনগৎলক্লিবা অসিগী মরক্তা, ঐখোয়না পুম্নমক্না ঙসি অসামদা, মা কামাখ্যাগী অশেংবা লমদম অসিদা খন্ন-নৈনখ্রে। ভারতকী চাউখৎ-থৌরাংদা আসামগী কন্ত্রিব্যুসন লেপ্তনা হেনগৎলক্লি। এদভান্তেজ অসাম সম্মিৎকী অহানবা ইদিসন অসি ২০১৮দা পাংথোকখি। মতম অদুদা অসামগী শেন্মিৎলোন অসি লুপা করোর লাখ ২.৭৫ ওইরম্মি। ঙসি অসাম অসি লুপা করোর লাখ ৬গী ইকোনোমী অমা ওইরে। মসিনা তাক্লিবদি বিজেপি সরকারগী মখাদা চহি তরুক্কী মনুংদা অসামগী শেন্মিৎলোনগী অসি শরুক অনি হেনগৎলে। মসি দবল ইঞ্জিন লৈঙাক্কী দবল ইফেক্তনি। অসামদা অচৌবা ইনভেস্তমেন্তশিং, ময়াম পুম্নমক্না তৌখিবা অসি য়াওনা, অসাম অসি অপুনবা ওইথোকপা য়াবা মফম অমদা ওন্থোক্লে। অসাম সরকারনা এজুকেসন, স্কিল দিবেলপমেন্ত, তোঙান তোঙানবা ইনফ্রাস্ত্রকচর প্রোজেক্তশিং অমসুং হেন্না ফবা ইনভেস্তমেন্ত এনভাইরনমেন্ত অমা শেমগৎপদা মীৎয়েং থম্লি।

হৌখিবা চহিশিংদা, বিজেপি সরকারনা রাজ্য অসিদা কনেক্তিবিতীগা মরী লৈনবা ইনফ্রাস্ত্রকচরদা পাক শন্না থবক তৌখি। ঐহাক্না ময়ামদা খুদম অমা পীজগে। ২০১৪গী মমাংদা ব্রহ্মপুত্রা তুরেলগী মথক্তা থোং অহুমখক্তমক লৈরম্মি। মসিনা তাকপদি চহি ৭০গী মনুংদা থোং অহুম খক্তমক শাখি। অদুম ওইনমক, হৌখিবা চহি ১০ অসিদা ঐখোয়না অনৌবা থোং ৪ শঙ্গাখ্রে। মসিগী থোংশিং অসিগী মনুংদা অমা ভারত রত্ন ভুপেন হাজারিকা জীগী মিংদা মমিং থোনখ্রে। ২০০৯ অমসুং ২০১৪গী মরক্তা, আসামনা রেলৱেজকী বজেৎতা চাংচত্তা লুপা করোর ২,১০০ ফংখি। ঐখোয়গী সরকারনা আসামগী রেলৱেজকী বজেৎ অসি শরুক মরি হেনগৎতুনা লুপা করোর ১০,০০০দা য়ৌহনখ্রে। মসিগী মথক্তা, অসামদা রেলৱে স্তেসন ৬০ হেন্না মোদর্নাইজ তৌরি। ঙসি অৱাং-নোংপোক্কী অহানবা সেমি-হাই স্পীদ ত্রেন গুৱাহাতি অমসুং ন্যু জলপাইগুরিগী মরক্তা চৎপা হৌখ্রে।

মরুপশিং,

অসামগী এয়র কনেক্তিবিতী অসি য়াম্না থুনা চাউখৎলক্লি। ২০১৪ ফাওবদা, মফম অসিদা ফ্লাইত তরেৎখক্তদা ওপরেৎ তৌখি। ঙসিদি, ফ্লাইতশিং অসি রুত ৩০ রোমদা চৎলি। মসিনা লোকেল ইকোনোমীদা অচৌবা ইনোৎ অমা পীরি অমসুং অসামগী নহারোলশিংগীদমক থবক ফংহন্নবগী খুদোংচাবা কয়া অমা লৈহল্লি।

মরুপশিং,

অসিগুম্বা অহোংবা অসি ইনফ্রাস্ত্রকচর খক্তদা অকক্নবা ওইদে। লো এন্দ ওর্দরদা মমাংদা অমুক্তা ওইখিদ্রিবা মওংদা ফগৎলকপা অমা লৈখ্রে। হৌখিবা চহি তরা অসিদা, শান্তিগী য়ানচে কয়া অমা খুৎয়েক পীনখ্রে, অমসুং মতম শাংনা লৈরম্বা ঙমখৈগী ৱাথোকশিং লোইশিনখ্রে। ঙসিদি, অসামগী মফম খুদিংমক্তা, নাগরিক খুদিংমক্তা, নহা খুদিংমক্তা রাজ্য অসিগী চাউখৎ-থৌরাংগীদমক্তা চোকথবা লৈতনা থবক তৌরি।

মরুপশিং,

ঙসি ভারতকী শেন্মিৎলোনগী সেক্তর খুদিংমক্তা অমসুং থাক খুদিংমক্তা অচৌবা রিফোর্মশিং পাংথোক্লি। ঐখোয়না ইজ ওফ দুইং বিজিনেস ফগৎহন্নবা লেপ্পা লৈতনা হোৎনরি। ঐখোয়না ইন্দস্ত্রী অমসুং ইনোবেসন কলচর অমা প্রমোৎ তৌনবা মপুং ফাবা ইকোসিস্তেম অমা শেমগৎলে। স্তার্ত-অপশিংগীদমক্তা পোলিসী ওইগেরা, মেন্যুফেকচরিংগীদমক্তা পি.এল.আই. স্কিম ওইগেরা, নৎত্রগা মেন্যুফেকচরিং কম্পনীশিং অমসুং এম.এস.এম.ই.শিংগীদমক্তা তেক্স মেনুফেকচরিং ওইগেরা, ঐখোয় পুম্নমক্কীদমক্তা অফবা পোলিসীশিং শেম্লে। সরকারনা ইনফ্রাস্ত্রকচরদা চাউনা শেল থাদরি। ইন্সতিত্যুস্নেল রিফোর্মশিং, ইন্দস্ত্রী, ইনফ্রাস্ত্রকচর অমসুং ইনোবেসনগী অপুনবা অসিনা ভারতকী চাউখৎপগী য়ুম্ফম্নি। মসিনা মরম ওইদুনা ইনভেস্তরশিংনা ভারতকী পোতেন্সিএল অমসুং গ্রোথকী ত্রান্সফোর্মেতিব ওইবা ওইথোকপা য়াবশিং খঙবা ঙমহল্লি। অসামসু মসিগী খুমাং চাউশিল্লকপ অসিদা দবল ইঞ্জিনগী খোঙজেল য়াংনা মাংলোমদা চংশিল্লি। আসামনা ২০৩০ ফাওবদা মসিগী শেন্মিৎলোন অসি দোল্লর বিল্লিয়ন ১৫০দা হেনগৎহন্নবা পান্দম থম্লি। অসামনা মাগী পান্দম অসি ফংবা ঙমগনি হায়না ঐহাক্না থাজবা থম্লি। ঐহাক্কী থাজবসি অসামগী হৈথোই-শিংথোইরবা মীয়াম অমসুং মফমসিদা লৈরিবা বিজেপি সরকারগী থৌনাদগীনি। ঙসি আসাম অসি খা-নোংপোক এসিয়া অমসুং ভারতকী মরক্তা থোঙ অমা ওইরক্লি। মসিগী পোতেন্সিএল অসিবু মখা তানা হেনগৎহন্নবা, সরকারনা "উন্নতী" হায়নসু খঙনবা অৱাং নোংপোক্কী ত্রান্সফোর্মেতিব ইন্দস্ত্রিএলাইজেসন স্কিম হৌদোক্লে। স্কিম অসিনা অসাম য়াওনা অৱাং নোংপোক লমদম পুম্বদা ইন্দস্ত্রী, ইনভেস্তমেন্ত অমসুং তুরিজম হেনগৎহনগনি। ঐহাক্না মফম অসিদা লৈরিবা ইন্দস্ত্রীগী লুচিংবশিং পুম্নমকপু স্কিম অসিগী অমসুং অসামগী অপুনবা পোতেন্সিএলগী মপুং ফানা কান্নবা লৌনবা হায়জরি। অসামগী নেচরেল রিসোর্সশিং অমসুং স্ত্রেতেজিক ওইবা মফম অসিনা মসি ইনভেস্তমেন্তকী পাম্নবা মফম অমা ওইহল্লি। অসামগী মপাঙ্গলগী খুদম অমা হায়রগদি অসাম তীনি। অসাম তী অসি মালেমগী ব্রান্দ অমনি, মালেম শীনবা থুংনা চা পামজবশিংগী পুন্সিগী মরুওইবা শরুক অমনি। অসামগী তীনা হৌজিক চহি ২০০ মপুং ফারক্লে। অসিগুম্বা লিগেসী অসিনা অসামবু অতোপ্পা সেক্তরশিংদসু মগুন লৈহনবদা পুক্নিং থৌগৎলি।

মরুপশিং,

ঙসিদি মালেমগী শেন্মিৎলোনদা অচৌবা অহোংবা অমা লাক্লি। মালেম অসিনা রেসিলেন্ত সপ্লাই চেন অমা মথৌ তারি। মরুওইবা মতম অসিদা, ভারতনা মিসন মোদতা মেনুফেকচরিং সেক্তর মপাঙ্গল কনখৎহন্নবা খোঙথাং অমা হৌদোক্লে। মেক ইন ইন্দিয়াগী মখাদা ঐখোয়না মমল হোংবা মেনুফেকচরিংবু পুক্নিং থৌগৎলি। ঐখোয়গী ইন্দস্ত্রীশিং - ফার্মাস্যুতিকেল্স, ইলেক্ত্রোনিক্স, অমসুং ওতোমোবাইলসনা দোমেস্তিক দিমান্দ ফংবতা নত্তনা ইন্তরনেস্নেল মার্কেতশিংদা মেনুফেকচরিং এক্সিলেন্সকী অনৌবা বেঞ্চমার্কশিংসু শেমগৎলি। মেনুফেকচরিং রিভোলুসন অসিদা অসামনা মরু ওইবা থৌদাং অমা লৌরি।

মরুপশিং,

অসামনা মতম পুম্নমক্তা মালেমগী ললোন-ইতিক্তা অচৌবা শরুক অমা তমদুনা লাক্লি। ঙসিদি, ভারতকী ওনশোর নেচরেল গ্যাস পুথোকপগী ৫০%দি অসামদা লৈরি। হৌখিবা চহি খরা অসিদা, অসামগী রিফাইনরীশিংগী কেপাসিতী য়াম্না হেনগৎলে। ইলেক্ত্রোনিক্স, সেমিকন্দক্তরশিং অমসুং গ্রীন ইনর্জীগুম্বা অনৌবা মতমগী সেক্তরশিংদা অসামসু খোঙজেল য়াংনা থোরক্লি। সরকারগী পোলিসীশিংনা মরম ওইদুনা, অসাম অসি হাই-তেক ইন্দস্ত্রীশিং অমসুং স্তার্ত-অপশিংগী হব অমা ওইরক্লি।

মরুপশিং,

নুমিৎ খরনিগী মমাংদা কেন্দ্র সরকারনা কেন্দ্রগী বজেৎতা নাম্রুপ- IV প্লান্তকী অয়াবা পীখি। লাক্কদৌরিবা চহিশিংদা, য়ুরিয়া পুথোকপা প্লান্ত অসিনা অৱাং নোংপোক্কী খক্তা নত্তনা লৈবাক পুম্বগী ফর্তিলাইজরগী দিমান্দ মপুং ফাহল্লগনি। অসামনা নোংপোক থংবা ভারতকী মরুওইবা মেনুফেকচরিং হব অমা ওইরকপা নুমিৎ অদু লাপত্রে। মসিগী পান্দম অসি ফংনবা কেন্দ্র সরকারনা বি.জে.পি.না লুচিংবা রাজ্য সরকারবু মপুং ফানা মতেং পাংলি।

মরুপশিং,

২১শুবা চহিচাদা, মালেমগী খুমাং চাউশিনবা অসি দিজিতেল রিভোলুসন, ইনোবেসন অমসুং তেক্নোলোজিগী খুমাং চাউশিল্লকপদা মখা পোল্লি। মসিগীদমক্তা ঐখোয়না হেন্না নীংথিনা শেম-শাবা হেনগৎলক্লিবমখৈ, মালেমগী থাক্তা ঐখোয়না হেন্না মপাঙ্গল কনখৎলগনি। মরম অসিনা ঐখোয়গী সরকারনা ২১শুবা চহিচাগী পোলিসীশিং অমসুং স্ত্রেতেজীশিংগা লোয়ননা অপুনবা খোঙজেল য়াংনা মাংলোমদা চংশিল্লি। হৌখিবা চহি ১০ অসিদা ভারতনা ইলেক্ত্রোনিক্স অমসুং মোবাইল মেন্যুফেকচরিংদা চাউনা খুমাং চাউশিল্লকপা ঐখোয়না খঙলে। হৌজিক, ভারতনা মসিগী মাই পাকপগী ৱারী অসি সেমিকন্দক্তর পুথোকপদসু নৌহৌনা পাংথোক্নবা পান্দম থম্লি। অসাম অসি ভারত্তা সেমিকন্দক্তর মেনুফেকচরিংগী মরুওইবা মফম অমা ওইরক্লিবা অসিদা ঐহাক চাউথোকচৈ। থা খরগী মমাংদা, অসামগী জাগিরোদ তাতা সেমিকন্দক্তর এসেমব্লী এন্দ তেস্ত ফেসিলিতী শঙ্গাখি। মসিগী প্লান্ত অসিনা লাক্কদৌরিবা চহিশিংদা অৱাং নোংপোক লমদম পুম্বদা তেক্নোলোজিগী চাউখৎপা পুরকপদা মরু ওইবা থৌদাং অমা লৌগনি।

মরুপশিং,

সেমিকন্দক্তর সেক্তরদা ইনোবেসন পুরক্নবা ঐখোয়না আই.আই.তি.শিংগা লোয়ননা থবক তৌমিন্নরি। লৈবাক অসিদা সেমিকন্দক্তর রিসর্চ সেন্তর অমসু শেমগৎলি। চহি তরাগী খুজিং অসিগী লোইশিল্লকপদা, ইলেক্ত্রোনিক্স সেক্তর অসি দোল্লর বিল্লিয়ন 500গী মমল য়ৌগনি হায়না পানরি। ঐখোয়গী খোঙজেল অমসুং চাউখৎপা অসি য়েংলগা, সেমিকন্দক্তর পুথোকপদা ভারত অসি মালেমগী পাৱরহাউস অমা ওইরক্লগনি হায়বসি থাজবা য়াবনি। মসিনা থবক মিলিয়ন কয়া ফংহল্লগনি অমসুং অসামগী শেন্মিৎলোনদা কান্নবা ফংহল্লগনি।

মরুপশিং,

হৌখিবা চহি ১০ অসিদা, ভারতনা মাগী অকোয়বগী ফিভমগী থৌদাংশিং অদু খঙনা পোলিসীগী ৱারেপশিং লৌরি। ঙসিদি মালেমনা ঐখোয়গী রিন্যুএবল ইনর্জী মিসন অসি মোদেল প্রাক্তিস অমনি হায়না লৌরি অমসুং ঐখোয়গী এপ্রোচ অসি ঙাক্না চৎলি। লৈবাক অসিনা হৌখিবা চহি ১০দা সোলর, ৱিন্দ অমসুং সস্তেনেবল ইনর্জী রিসোর্সশিংদা চাউনা ইনভেস্তমেন্ত তৌখ্রে। মসিনা ঐখোয়গী ইকোলোজিকেল কম্মিতমেন্তশিং মপুং ফাহনবতা নত্তনা ঐখোয়গী রিন্যুএবল ইনর্জী পুথোকপগী কেপাসিতীসু মশক থোক্না হেনগৎহল্লে। ঐখোয়না ২০৩০ ফাওবদা লৈবাক অসিগী ইনর্জী ইনফ্রাস্ত্রকচরদা রিন্যুএবল ইনর্জী কেপাসিতী গিগাৱাৎ ৫০০ হাপ্নবা পান্দম থম্লি। সরকারনা ২০৩০ ফাওবদা চহিগী ওইনা গ্রীন হাইদ্রোজেন মেত্রিক তন মিলিয়ন ৫ পুথোক্নবা মিসন অমদা থবক তৌরি। গ্যাস ইনফ্রাস্ত্রকচর পাকথোক চাউথোকহনবগা লোয়ননা লৈবাক অসিদা গ্যাসকী দিমান্দসু য়াম্না থুনা হেনগৎলক্লি। গ্যাসতা য়ুম্ফম ওইবা শেন্মিৎলোন অসি খোংজেল য়াংনা চাউখৎলক্লি, অমসুং খোংচৎ অসিদা আসামগী অচৌবা খুদোংচাবা লৈ। পি.এল.আই. স্কিমশিংদগী হৌরগা গ্রীন ইনিসিয়েতিবশিং ফাওবদা সরকারনা ইন্দস্ত্রীশিংগীদমক খুদোংচাবা কয়া অমা শেমখ্রে। পোলিসী পুম্নমক অসি ময়ামগী য়েংলগা শেমখ্রে। ঐহাক্না অসামবু রিন্যুএবল ইনর্জী সেক্তরদা মকোক থোংবা অমা ওইহনবা পাম্মি। অদুম ওইনমক, মসি অদোমগুম্বা ইন্দস্ত্রীগী লুচিংবশিংনা মাংলোমদা চংশিল্লকপা অমসুং অসামগী অপুনবা পোতেন্সিএল মপুং ফানা শিজিন্নবা মতমদা খক্তদা ওইথোকপা ঙমগনি।

মরুপশিং,

২০৪৭ ফাওবদা, ভারতপু বিক্সিত ভারত (চাউখৎলবা ভারত) ওইহন্নবগীদমক নোংপোক থংবা ভারতনা মরুওইবা থৌদাং অমা লৌগনি। ঙসিদি, অৱাং-নোংপোক অমসুং নোংপোক ভারত্তা ইনফ্রাস্ত্রকচর, লোজিস্তিক্স, লৌউ-শিংউ, তুরিজম অমসুং ইন্দস্ত্রীদা খোঙজেল য়াংনা খুমাং চাউশিল্লি। মালেম অসিনা ভারতকী চাউখৎ-থৌরাংগী খোঙচৎতা লমদম অসিনা লমজিংদুনা চৎকদবা নুমিৎ অদু কুইদ্রে। ঐহাক্না থাজবা থম্লি মদুদি ময়াম্না খোঙচৎ অসিদা শরুক য়াগনি অমসুং অসামগী চাউখৎপদা মতেং পাংগনি। অসাম অসি মালেমগী খা থংবা শরুক পুম্নমক্তা ভারতকী তৌবা ঙম্বশিংবু অনৌবা থাক্তা পুখৎপা রাজ্য অমা ওইহন্নবা ঐখোয় পুন্না থবক তৌমিন্নসি। ঐহাক্না অমুক্কা হন্না, মীফম অসিগীদমক্তা ময়াম পুম্নমকপু য়াইফ-পাউজেল পীজরি। অমসুং ঐহাক্না মসি ফোংদোকপা অসিদা, ঐহাক্না ময়ামদা ঐহাক্কী থাজবা পীজরি। ঐহাক্না ময়ামগা লোয়ননা লেপমিন্নরি অমসুং 'ভিক্সিত ভারত' খোঙচৎ অসিদা ময়ামগী থৌদাংবু মপুং ফানা শৌগৎলি।

হন্না-হন্না থাগৎচরি।

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

*****