কেন্দ্রগী মন্ত্রীমন্দলগী ইকায়খুম্নরবা মেম্বরশিং, ইকায়খুম্নরবশিং, এম্বেসেদরশিং, শক্নাইরবা সি.ই.ওশিং, ইকায়খুম্নরবা অতিথিশিং, অতোপ্পা শক্নাইরবশিং, ইবেম্মাশিং অমসুং ইবুংঙোশিং,

ইন্দিয়া ইনর্জি ৱিক শরুক য়ানবা লৈবাক শীনবা থুংবা অমসুং মালেমগী মফম কয়াদগী যশোভুমিদা পুল্লিবা মীওইশিং তরাম্না ওকচরি। অদোম ইনর্জি ৱিক শরুক য়াবা খক নত্তনা ভারতকী ইনর্জিগী পান্দমগী তৎনবা য়াদ্রবা শরুক অমনি। মীয়াম পুম্নমক, মরুওইনা মপান লৈবাকশিংদগী লাক্লিবশিং ঐনা তরাম্না ওকচরি।

মরুপশিং,

২১শুবা চহিচা অসি ভারতকীনি হায়না ঙসি মালেম অসিদা অখঙ-অহৈ খুদিংমক্না হায়রি। ভারতনা মশাগী লৈবাক চাউখৎহনবা খক নত্তনা মালেমসু চাউখৎহল্লি অমসুং মসিদা ঐখোয়গী ইনর্জি সেক্তরনা মরুওইবা থৌদাং অমা লৌরি। ভারতকী ইনর্জিগী পান্দম অসি য়ুম্বী মঙাদা লেপ্লি: ঐখোয়গী লৈজবা লনশিং ঐখোয়না শীজিন্নরি। অনিশুবদা, ঐখোয়গী হৈথোই-শিংথোইবা মীওইশিং অনৌবা থবক পায়খৎনবা পুক্নিং থৌগৎলি। অহুমশুবদা, ঐখোয়গী শেন-থুমগী মপাঙ্গল অমসুং রাজনিতিগী তুংদু-লৈতাবা লৈরি। মরিশুবদা, ভারতকী লম্মিৎ-তুমিৎকী মরুওইবা অসিনা ইনর্জিগী ললোন-ইতিক হেন্না পাম্নরে অমসুং লাইরে। মঙাশুবদা, ভারতনা মালেমগী ওইনা তুংকোইনা চৎনবা য়াগদবা থবক পায়খৎলে। হায়রিবা মরমশিং অসিনা ভারতকী ইনর্জি সেক্তরদা অনৌবা খুদোংবশিং ফংহল্লে।

মরুপশিং,

মথংগী চহি ২০ অসি বিকসিত ভারত অমগীদমক য়াম্না মরুওই অমসুং মথং চহি ৫ অসিদা ঐখোয়না থবক কয়া মাইপাক্না পায়খৎকনি। ঐখোয়গী ইনর্জিগী পান্দম কয়া ২০৩০ ফাওবা মতম থারি। ২০৩০ দা ঐখোয়না রিন্যুএবল পুথোকপা অসিদা ইনর্জি গিগাৱাত ৫০০ হাপচিনগনি। ২০৩০ দা নেত-জিরো কার্বোন ইমিসনগী পান্দম ফংনবা ভারত রেলৱেজনা পান্দম থম্লি। ঐখোয়গী পান্দমদি ২০৩০ ফাওবদা চহি অমদা গ্রিন হায়দ্রোজেন মেত্রিক তন মিল্লিয়ন ৫ পুথোকপনি। হায়রিবা পান্দমশিং অসি থাজবা হেঞ্জিন্না থম্বা মানগনি, অদুবু ঐখোয়না পান্দমশিং অদু ফংগনি হায়না হৌখিবা চহি ১০ দা লৈখিবা ভারতকী মাইপাকপশিং অদুনা ঐখোয়দা থাজবা পীরে।

মরুপশিং,

হৌখিবা চহি ১০ দা, ভারত ১০শুবা খ্বাইদগী চাউবা ইকোনোমি ওইরম্বদগী ৫শুবা খ্বাইদগী চাউবা ইকোনোমি ওইরক্লে। মতম অসিদা, ঐখোয়গী সোলার ইনর্জি পুথোকপা ঙম্বা শরুক ৩২ হেনগৎখি। ঙসি, ভারত মালেমদা সোলার পৱার পুথোকপা অহুমশুবা খ্বাইদগী চাউবা লৈবাক ওইরে। ঐখোয়গী নন-ফোসি ফুয়েল ইনর্জি পুথোকপা ঙম্বা শরুক অহুম হেনগৎলে। থানখিবা মতমদগী ঙনখৎনা পেরিস এগ্রিমেন্তগী পান্দমশিং ফংবা অহানবা জি-২০ লৈবাক ভারতনা ওইরে। মসিগী পান্দম অসি ঙনখৎনা ভারতনা ফংবগী খুদম অমদি ইথানোল য়ানশিনবনি। হৌজিক ভারতনা ইথানোল চাদা ১৯ য়ানশিনবদগী, মপান লৈবাকশিংদা চৎখিগদবা শেনফমশিং কল্লে, লৌমীশিংগী শেন্থোক হেনগৎহল্লে অমসুং কার্বোনদাইওক্সাইদ থাদোকপা শিংথাবা য়ানা হন্থরে। ভারতকী বাইওফুয়েল ইন্দষ্ট্রি য়াংনা চাউখৎনবা থৌরাং তৌরে। ঐখোয়গী মেত্রিক তন মিল্লিয়ন ৫০০ গী ফিদষ্টোক কেপাসিতি লৈরে। ভারতনা জি-২০ গী প্রসিদেন্ত ওইবা মতমদা, গ্লোবেল বাইওফুয়েল এল্লাইন্স লিংখৎলে অমসুং মসিদা মালেমগী লৈবাক ২৮ অমসুং মালেমগী লুপ ১২ শরুক য়ারে। থবক অসিনা অমোৎপশিং শেন ওন্থোক্লে অমসুং সেন্তর ওফ এক্সলেন্স লিংখৎলে।

মরুপশিং,

লৈবাক অসিগী হায়দ্রোকার্বোনগী লনশিং মপুংফানা শীজিন্ননবা ভারতনা মখা তানা অওনবা কয়া পুরক্লে। য়াম্না চাউনা মশক খঙলবশিং অমসুং গ্যাস ইনফ্রাষ্ট্রকচর পাকথোক-চাউথোকপদগী, ঐখোয়গী গ্যাস সেক্তর পাকথোক-চাউথোক্লে। মসিনা ঐখোয়গী ইনর্জি শীজিন্নবদা নেচরেল গ্যাসকী চাকথুং হেনগৎলে। হৌজিক, ভারত রিফাইনিংগী মরিশুবা খ্বাইদগী চাওবা মফম ওইরে অমসুং মসিগী রিফাইন তৌবা ঙম্বগী চাং চাদা ২০ হেনগৎহন্নবা থবক পায়খৎলি।

মরুপশিং,

ঐখোয়গী সেন্দিমেন্তরি বেসিনশিংদা হায়দ্রোকার্বোনগী লন কয়া লৈরি। কয়া অমা মশক খঙদোক্লবসু, মশক খঙদ্রিবা কয়া লৈরি। ভারতকী মরুওইবা সেক্তরশিং পাম্নবা হেনগৎনবা, সরকারনা ওপন এগ্রিএজ লাইসেন্সিং পোলিসি (ও এ এল পি) হৌদোক্লে। মসি এক্সক্লুসিপ ইকোনোমিক জোন হাংদোকপা নত্ত্রগা শিঙ্গল-ৱিন্দো ক্লিয়ারেন্স সিষ্টেম অমা লিংখৎপা ওইবা য়াই, সেক্তর অসিদা সরকারনা মপুংফানা মতেং পাংলে। ওইলফিল্দস রিগুলেসন এন্দ দিবলপমেন্ত এক্ত শেমদোক্লবা মতুংদা, হৌজিক মরী লৈনবশিং থৌশিল ফজনা লৈবা, লিজ শাংদোকপগী কান্নবা ফংলে অমসুং শেন-থুমগী তার্মশিং ফগৎলে। সরকারগী অওনবশিং অসিনা সমুদ্রগী শরুকশিংদা থাউ অমসুং গ্যাস থিবা অমসুং ষ্টাতেজিক পেত্রোলিয়ম রিজার্বশিং শেন্নবা লাইহনগনি। 

মরুপশিং,

ভারত্ত গ্যাস ফংফম কয়া মশক খঙদোকপা অমসুং পাইপলাইন ইনফাষ্ট্রকচর হেনগৎহনবদগী, নেচরেল গ্যাস ফংহনবা হেনগৎলে। মসিগী ফল ওইনা, লাক্লিবা চহিশিংদা নেচরেল গ্যাস শীজিন্নবা হেনগৎনবা থৌরাং তৌরে অমসুং মসিদা হিরম অশিদা শেন থাদনবগী খুদোংচাবা কয়া পীরে।

মরুপশিং,

হৌজিক ভারতনা মেক ইন ইন্দিয়াদা অকনবা মীৎয়েং থম্লি। পি.ভি মোদুলশিং য়াওনা ভারত্ত মখল কয়াগী হার্দৱায়রশিং শানবা য়াম্লবা খুদোংচাবশিং লৈরি। লমদম অসিদা পোৎ-চৈ শাবদা ঐখোয়না শৌগৎলি। হৌখিবা চহি ১০ দা, ভারতনা সোলার পি.ভি মোদুল শাবা ঙম্বগী চাং গিগাৱাত ২ দগী গিগাৱাত ৭০ দা হেনগৎলে। প্রক্সন-লিঙ্ক ইন্সেন্তিপ (পি এল আই) স্কিমনা সেক্তর অসি অমুক্কা হেন্না পাম্নরে, অফবা মখলগী সোলার পি.ভি মোদুলশিং পুথোকপা হেনগৎলে।

মরুপশিং,

বেত্তরিগী লমদা অনৌবা থবক কয়া পায়খৎনবা অমসুং পোৎথোক পুথোক্নবা খুদোংচাবা কয়া লৈরি। ইলেক্ত্রিক মোবিলিতিগী মাইকৈদা ভারত য়াংনা চঙশিল্লি। ঐখোয়গী অচৌবা লৈবাক অমগী দরকার ওইবশিং পীবা ঙম্নবা, বেত্তরি শাবগী থবকশিং য়াংশিনহনবা দরকার ওইরে। মরম অদুনা, গ্রিন ইনর্জি শৌগৎনবা চহি অসিগী বজেত্ত থৌরাং কয়া লাউথোক্লে। কোবাল্ত পাউদর, লিথিয়ম-আইওন বেত্তরি ৱেষ্ট, মিশি অমসুং জিঙ্ক, অতোপ্পা মরুওইবা মিনরেলশিং য়াওনা ই.ভিগা মরী লৈনবা মচাকশিং অমসুং মোবাইল ফোনগী বেত্তরি শাবদা বেসিক কষ্টমস দ্যুতিশিং সরকারনা লৌথোক্লে। ভারত্ত অফবা সপ্লাই চেন অমা শেমগৎপদা নেসনেল ক্রিতিকেল মিনরেলস মিসন্না মরুওইবা থৌদাং অমা লৌগনি। মসিগী মথক্ত, লিথিয়ম বেত্তরি নত্তবা থবক অমা পায়খৎনবা ঐখোয়না পুক্নিং থৌগৎলি। চহি অসিগী বজেত্ত ন্যুক্লিয়ার ইনর্জি সেক্তরসু হাংদোক্লে। ইনর্জিদা শেন থাদবা খুদিংমক নহারোলশিংগী অনৌবা থবক পীরে অমসুং গ্রিন জোবশিং ফংহল্লে।

মরুপশিং,

ভারতকী ইনর্জি সেক্তর চাউখৎনবা, ঐখোয়গী মীয়ামগী শক্তিগা লোয়ননা মসি ফগৎহল্লে। ঐখোয়না ইচম চম্বা ইমুংশিং অমসুং লৌমীশিং ইনর্জি পুথোকহল্লে। হৌখিবা চহিদা ঐখোয়না পি.এম সুর্য়াঘর মুফ বিজলি য়োজনা হৌদোকখ্রে। স্কিম অসিগী থবক অসি শুপ্নগী ইনর্জি পুথোকপা খক নত্তে। মসিনা সোলার সেক্তরদা অনৌবা স্কিলশিং হেনগৎহল্লে, অনৌবা থবক তৌনবা ফিবম অমা শেমগৎলে অমসুং অদোমগী শেন থাদনবা খুদোংচাবশিং হেনগৎহল্লে।

মরুপশিং,

ঐখোয়গী মহৌশাগী ফিবম ফগৎহনবগা লোয়ননা ঐখোয়গী চাউখৎপা হেনগৎহল্লিবা ইনর্জিগী পাম্বৈশিং পীনবা ভারতনা থবক পায়খৎলে। হন্দক্কী ইনর্জি ৱিক অসিনা মাইকৈ অসিদা লম্বীশিং লমজিংগনি হায়না ঐনা থাজৈ। ভারত্ত নৌনা লাকপা খুদোংচাবা খুদিংমক অদোম্না থিদোক্কনি হায়না থাজবা থম্লি। অদোমগী মফমদা য়াইফ পাউজেল পীজরি।

অদোম থাগৎচরি।

**