ನಾನು ಹೀಗೆ ಹೇಳುತ್ತೇನೆ, ಭೂಪೇನ್ ದಾ! ನೀವು ಹೇಳಿ, 'ಅಮರ್ ರಹೇ! ಅಮರ್ ರಹೇ'! (ಅವರು ಅಮರರಾಗಿ ಉಳಿಯಲಿ)

ಭೂಪೇನ್ ದಾ, ಅಮರ್ ರಹೇ! ಅಮರ್ ರಹೇ!

ಭೂಪೇನ್ ದಾ, ಅಮರ್ ರಹೇ! ಅಮರ್ ರಹೇ!

ಭೂಪೇನ್ ದಾ, ಅಮರ್ ರಹೇ! ಅಮರ್ ರಹೇ!

ಅಸ್ಸಾಂ ರಾಜ್ಯಪಾಲರಾದ ಗೌರವಾನ್ವಿತ ಶ್ರೀ ಲಕ್ಷ್ಮಣ ಪ್ರಸಾದ್ ಆಚಾರ್ಯ ಜಿ, ಈ ರಾಜ್ಯದ ಜನಪ್ರಿಯ ಮುಖ್ಯಮಂತ್ರಿ ಶ್ರೀ ಹಿಮಂತ ಬಿಸ್ವಾ ಶರ್ಮಾ ಜಿ, ಅರುಣಾಚಲ ಪ್ರದೇಶದ ಯುವ ಮುಖ್ಯಮಂತ್ರಿ ಶ್ರೀ ಪೇಮಾ ಖಂಡು ಜಿ, ನನ್ನ ಸಂಪುಟ ಸಹೋದ್ಯೋಗಿ ಶ್ರೀ ಸರ್ಬಾನಂದ ಸೋನೋವಾಲ್ ಜಿ, ವೇದಿಕೆಯಲ್ಲಿ ಉಪಸ್ಥಿತರಿರುವ ಭೂಪೇನ್ ಹಜಾರಿಕಾ ಜಿ ಅವರ ಸಹೋದರ, ಶ್ರೀಮತಿ ಹಜಾರಿಕಾ ಜಿ, ಭೂಪೇನ್ ಹಜಾರಿಕಾ ಜಿ ಅವರ ಸಹೋದರಿ ಶ್ರೀಮತಿ ಕವಿತಾ ಬರುವಾ ಜಿ, ಭೂಪೇನ್ ದಾ ಅವರ ಪುತ್ರ ಶ್ರೀ ತೇಜ್ ಹಜಾರಿಕಾ ಜಿ - ತೇಜ್, ನಾನು ನಿಮ್ಮನ್ನು 'ಕೆಮ್ ಚೋ!' ಎಂದು ಸ್ವಾಗತಿಸುತ್ತೇನೆ. ಇಲ್ಲಿ ಉಪಸ್ಥಿತರಿರುವ ಇತರೆ ಗಣ್ಯರೆ ಮತ್ತು ಅಸ್ಸಾಂನ ನನ್ನ ಸಹೋದರ ಸಹೋದರಿಯರೆ!

ಇಂದು ಅದ್ಭುತ ದಿನ, ಈ ಕ್ಷಣ ಅಮೂಲ್ಯವಾದುದು. ನಾನು ಇಲ್ಲಿ ಕಂಡ ಅದ್ಭುತ ದೃಶ್ಯ, ನಾನು ನೋಡಿದ ಭೂಪೇನ್ ಅವರ ಸಂಗೀತದ ಉತ್ಸಾಹ, ಸಾಮರಸ್ಯ, ಲಯ - ನಾನು ಅದನ್ನು ಭೂಪೇನ್ ದಾ ಅವರ ಸ್ವಂತ ಮಾತುಗಳಲ್ಲಿ ಹೇಳಿದರೆ - ನನ್ನ ಹೃದಯವು "ಸಮೇ ಓ ಧೈರೇ ಚಲೋ, ಸಮಯ ಓ ಧೈರೇ ಚಲೋ" ಹಾಡು ಮತ್ತೆ ಮತ್ತೆ ಪ್ರತಿಧ್ವನಿಸುತ್ತಿತ್ತು. ಭೂಪೇನ್ ಅವರ ಸಂಗೀತದ ಈ ಅಲೆ ಎಲ್ಲೆಡೆ, ಅಂತ್ಯವಿಲ್ಲದೆ ಹರಿಯಬೇಕೆಂದು ನನ್ನ ಹೃದಯ ಬಯಸುತ್ತದೆ. ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಎಲ್ಲಾ ಕಲಾವಿದರನ್ನು ನಾನು ತುಂಬಾ ಕೃತಜ್ಞತೆಯಿಂದ ಕಾಣುತ್ತೇನೆ. ಅಸ್ಸಾಂನ ಉತ್ಸಾಹವು ಇಲ್ಲಿನ ಪ್ರತಿಯೊಂದು ಸಂದರ್ಭವೂ ಹೊಸ ದಾಖಲೆಯನ್ನು ಸೃಷ್ಟಿಸುತ್ತದೆ. ಇಂದು ಸಹ, ನಿಮ್ಮ ಪ್ರದರ್ಶನಗಳ ಅದ್ಭುತ ಸಿದ್ಧತೆ ಸ್ಪಷ್ಟವಾಗಿ ಗೋಚರಿಸುತ್ತಿದೆ, ನಿಮ್ಮೆಲ್ಲರಿಗೂ ನನ್ನ ಅಭಿನಂದನೆಗಳು!

ಸ್ನೇಹಿತರೆ,

ಕೆಲವು ದಿನಗಳ ಹಿಂದೆ ಅಂದರೆ ಸೆಪ್ಟೆಂಬರ್ 8ರಂದು, ನಾವು ಭೂಪೇನ್ ಹಜಾರಿಕಾ ಜಿ ಅವರ ಜನ್ಮ ದಿನ ಆಚರಿಸಿದೆವು. ಆ ದಿನ, ಭೂಪೇನ್ ದಾ ಅವರಿಗೆ ಮೀಸಲಾಗಿರುವ ಲೇಖನದಲ್ಲಿ, ನಾನು ನನ್ನ ಭಾವನೆಗಳನ್ನು ವ್ಯಕ್ತಪಡಿಸಿದೆ. ಈ 100ನೇ ಜನ್ಮ ದಿನಾಚರಣೆಯಲ್ಲಿ ಭಾಗವಹಿಸಲು ನನಗೆ ಅವಕಾಶ ಸಿಕ್ಕಿದ್ದು ನನ್ನ ಅದೃಷ್ಟ. ಈಗಷ್ಟೇ, ಹಿಮಂತ ಜಿ ಹೇಳುತ್ತಿದ್ದರು, ನೀವು ಇಲ್ಲಿಗೆ ಬರುವ ಮೂಲಕ ಆಶೀರ್ವಾದ ಪಡೆದಿದ್ದೀರಿ ಎಂದು. ಅದು ಇನ್ನೊಂದು ರೀತಿಯಲ್ಲಿ! ಅಂತಹ ಪವಿತ್ರ ಸಂದರ್ಭದಲ್ಲಿ ಹಾಜರಿರುವುದು ನಿಜಕ್ಕೂ ನನ್ನ ಅದೃಷ್ಟ. ನಾವೆಲ್ಲರೂ ಭೂಪೇನ್ ದಾ ಅವರನ್ನು ಪ್ರೀತಿಯಿಂದ 'ಸುಧಾ ಕೊಂಥೋ' ಎಂದು ಕರೆಯುತ್ತಿದ್ದೆವು. ಭರತನ ಭಾವನೆಗಳಿಗೆ ಧ್ವನಿ ನೀಡಿದ, ಸಂಗೀತವನ್ನು ಸೂಕ್ಷ್ಮತೆಯೊಂದಿಗೆ ಜೋಡಿಸಿದ, ಭರತನ ಕನಸುಗಳನ್ನು ತನ್ನ ಹಾಡುಗಳಲ್ಲಿ ಹೆಣೆದ, ಮತ್ತು ಮಾತೆ ಗಂಗೆಯ ಕರುಣೆಯನ್ನು ಮಾತೆ ಭಾರತಿಗೆ ನಿರೂಪಿಸಿದ ಆ 'ಸುಧಾ ಕೊಂಥೋ' ಅವರ ಶತಮಾನೋತ್ಸವ ವರ್ಷ ಇದು - ಗಂಗಾ ಬೆಹ್ತಿ ಹೋ ಕ್ಯುಂ? ಗಂಗಾ ಬೆಹ್ತಿ ಹೋ ಕ್ಯುಂ?

ಸ್ನೇಹಿತರೆ,

ಭೂಪೇನ್ ದಾ ತಮ್ಮ ಟಿಪ್ಪಣಿಗಳ ಮೂಲಕ ಭಾರತವನ್ನು ಒಂದುಗೂಡಿಸುತ್ತಲೇ ಇದ್ದರು, ಅದು ಭಾರತದ ಅನೇಕ ಪೀಳಿಗೆಗೆ ಸ್ಫೂರ್ತಿ ನೀಡುತ್ತಲೇ ಇದೆ.

ಸಹೋದರ - ಸಹೋದರಿಯರೆ,

ಭೂಪೇನ್ ದಾ ಭೌತಿಕವಾಗಿ ನಮ್ಮ ನಡುವೆ ಇಲ್ಲ, ಆದರೆ ಅವರ ಹಾಡುಗಳು, ಅವರ ಧ್ವನಿ ಇಂದಿಗೂ ಭಾರತದ ಅಭಿವೃದ್ಧಿಯ ಪಯಣಕ್ಕೆ ಸಾಕ್ಷಿಯಾಗಿ ನಿಂತಿವೆ, ಅದಕ್ಕೆ ಚೈತನ್ಯ ತುಂಬುತ್ತಿವೆ. ನಮ್ಮ ಸರ್ಕಾರ ಭೂಪೇನ್ ದಾ ಅವರ ಶತಮಾನೋತ್ಸವ ವರ್ಷವನ್ನು ಹೆಮ್ಮೆಯಿಂದ ಆಚರಿಸುತ್ತಿದೆ. ಭೂಪೇನ್ ಹಜಾರಿಕಾ ಅವರ ಹಾಡುಗಳು, ಅವರ ಸಂದೇಶಗಳು ಮತ್ತು ಅವರ ಜೀವನ ಪ್ರಯಾಣವನ್ನು ನಾವು ಪ್ರತಿ ಮನೆಗೂ ಸಾಗಿಸುತ್ತಿದ್ದೇವೆ. ಇಂದು ಅವರ ಜೀವನ ಚರಿತ್ರೆಯನ್ನು ಸಹ ಇಲ್ಲಿ ಬಿಡುಗಡೆ ಮಾಡಲಾಗಿದೆ. ಈ ಸಂದರ್ಭದಲ್ಲಿ, ನಾನು ಡಾ. ಭೂಪೇನ್ ಹಜಾರಿಕಾ ಅವರಿಗೆ ಗೌರವ ಸಲ್ಲಿಸುತ್ತೇನೆ. ಅಸ್ಸಾಂನ ನನ್ನ ಸಹೋದರ ಸಹೋದರಿಯರೊಂದಿಗೆ, ಭೂಪೇನ್ ದಾ ಅವರ ಈ ಶತಮಾನೋತ್ಸವದ ಜನ್ಮ ವರ್ಷದಲ್ಲಿ ಪ್ರತಿಯೊಬ್ಬ ಭಾರತೀಯರಿಗೂ ನನ್ನ ಶುಭಾಶಯಗಳನ್ನು ಸಲ್ಲಿಸುತ್ತೇನೆ.

ಸ್ನೇಹಿತರೆ,

ಭೂಪೇನ್ ಹಜಾರಿಕಾ ಅವರು ತಮ್ಮ ಜೀವನದುದ್ದಕ್ಕೂ ಸಂಗೀತ ಸೇವೆ ಸಲ್ಲಿಸಿದರು. ಸಂಗೀತ ಧ್ಯಾನವಾದಾಗ, ಅದು ನಮ್ಮ ಆತ್ಮವನ್ನು ಮುಟ್ಟುತ್ತದೆ. ಸಂಗೀತವು ಸಂಕಲ್ಪವಾದಾಗ, ಅದು ಸಮಾಜಕ್ಕೆ ಹೊಸ ದಿಕ್ಕು ತೋರಿಸುವ ಮಾಧ್ಯಮವಾಗುತ್ತದೆ. ಅದಕ್ಕಾಗಿಯೇ ಭೂಪೇನ್ ದಾ ಅವರ ಸಂಗೀತವು ತುಂಬಾ ವಿಶೇಷವಾಗಿತ್ತು. ಅವರು ಬದುಕಿದ ಆದರ್ಶಗಳು, ಅವರು ಅನುಭವಿಸಿದ ಅನುಭವಗಳನ್ನು ಅವರು ತಮ್ಮ ಹಾಡುಗಳಲ್ಲಿ ಹಾಡಿದರು. 'ಏಕ್ ಭಾರತ್, ಶ್ರೇಷ್ಠ ಭಾರತ್' ಚೈತನ್ಯವನ್ನು ಅವರು ಬದುಕಿದ್ದಾಗಲೇ ನಾವು ಅವರ ಹಾಡುಗಳಲ್ಲಿ ಭಾರತ ಮಾತೆಭಾರತಯ ಬಗ್ಗೆ ಅಪಾರ ಪ್ರೀತಿಯನ್ನು ಕಾಣುತ್ತೇವೆ.

ಯೋಚಿಸಿ - ಅವರು ಈಶಾನ್ಯದಲ್ಲಿ ಜನಿಸಿದರು, ಬ್ರಹ್ಮಪುತ್ರದ ಪವಿತ್ರ ಅಲೆಗಳು ಅವರಿಗೆ ಸಂಗೀತದ ಪಾಠಗಳನ್ನು ಕಲಿಸಿದವು. ನಂತರ ಅವರು ಪದವಿ ಪಡೆಯಲು ಕಾಶಿಗೆ ಹೋದರು, ಬ್ರಹ್ಮಪುತ್ರದ ಅಲೆಗಳಿಂದ ಪ್ರಾರಂಭವಾದ ಸಂಗೀತ ಅನ್ವೇಷಣೆಯು ಗಂಗೆಯ ಗೊಣಗಾಟದ ಮೂಲಕ ಪೂರ್ಣತೆ ಪಡೆಯಿತು. ಕಾಶಿಯ ಚೈತನ್ಯವು ಅವರ ಜೀವನಕ್ಕೆ ನಿರಂತರ ಹರಿವು ನೀಡಿತು. ಅವರು ಅಲೆದಾಡುವ ಪ್ರಯಾಣಿಕರಾದರು, ಅವರು ಇಡೀ ಭಾರತದಾದ್ಯಂತ ಪ್ರಯಾಣಿಸಿದರು. ನಂತರ, ತಮ್ಮ ಪಿಎಚ್‌ಡಿ ಪಡೆಯಲು, ಅವರು ಅಮೆರಿಕಕ್ಕೂ ಹೋದರು! ಆದರೂ, ಜೀವನದ ಪ್ರತಿಯೊಂದು ಹಂತದಲ್ಲೂ, ಅವರು ನಿಜವಾದ ಮಗನಾಗಿ ಅಸ್ಸಾಂನ ಮಣ್ಣಿನೊಂದಿಗೆ ಸಂಪರ್ಕ ಹೊಂದಿದ್ದರು. ಆದ್ದರಿಂದ ಅವರು ಭಾರತಕ್ಕೆ ಮರಳಿದರು! ಇಲ್ಲಿ, ಸಿನೆಮಾದಲ್ಲಿ, ಅವರು ಸಾಮಾನ್ಯ ಮನುಷ್ಯನ ಧ್ವನಿಯಾದರು, ಅವರ ಜೀವನದ ನೋವಿಗೆ ಅವರು ಧ್ವನಿ ನೀಡಿದರು. ಆ ಧ್ವನಿ ಇಂದಿಗೂ ನಮ್ಮನ್ನು ಜೀವಂತವಾಗಿಸುತ್ತಿದೆ.

ಅವರ ಹಾಡು "ಮನುಹೆ ಮನುಹೋರ್ ಬೇಬ್, ಜೋಡಿಹೆ ಆಕೋನು ನಭಾಬೆ, ಆಕೋನಿ ಹೋಹನುಭೂತಿರೆ, ಭಬಿಬೋ ಕೊನೆನು ಕುವಾ?" - ಅಂದರೆ, ಮನುಷ್ಯರು ಇತರ ಮನುಷ್ಯರ ಸಂತೋಷ ಮತ್ತು ದುಃಖಗಳು, ನೋವು ಮತ್ತು ಸಂಕಟಗಳ ಬಗ್ಗೆ ಯೋಚಿಸದಿದ್ದರೆ, ಈ ಜಗತ್ತಿನಲ್ಲಿ ಯಾರು ಪರಸ್ಪರ ಕಾಳಜಿ ವಹಿಸುತ್ತಾರೆ? - ಊಹಿಸಿ, ಇದು ನಮಗೆ ಎಷ್ಟು ಸ್ಪೂರ್ತಿದಾಯಕವಾಗಿದೆ. ಈ ಚಿಂತನೆಯೊಂದಿಗೆ, ಇಂದು ಭಾರತವು ಹಳ್ಳಿಗಳು, ಬಡವರು, ದಲಿತರು, ವಂಚಿತರು ಮತ್ತು ಬುಡಕಟ್ಟು ಸಮುದಾಯಗಳ ಜೀವನ ಸುಧಾರಿಸಲು ತೊಡಗಿಸಿಕೊಂಡಿದೆ.

ಸ್ನೇಹಿತರೆ,

ಭೂಪೇನ್ ದಾ ಭಾರತದ ಏಕತೆ ಮತ್ತು ಸಮಗ್ರತೆಯ ಮಹಾನ್ ನಾಯಕ. ದಶಕಗಳ ಹಿಂದೆ, ಈಶಾನ್ಯವು ನಿರ್ಲಕ್ಷ್ಯಕ್ಕೆ ಒಳಗಾದಾಗ, ಈಶಾನ್ಯವು ಹಿಂಸಾಚಾರ ಮತ್ತು ಪ್ರತ್ಯೇಕತಾವಾದದ ಕಾಡ್ಗಿಚ್ಚಿನಲ್ಲಿ ಉರಿಯುವಾಗ, ಆ ಕಷ್ಟದ ಸಮಯಗಳಲ್ಲಿ ಭೂಪೇನ್ ದಾ ಭಾರತದ ಏಕತೆಯ ಧ್ವನಿಯನ್ನು ಎತ್ತುತ್ತಲೇ ಇದ್ದರು. ಅವರು ಸಮೃದ್ಧ ಈಶಾನ್ಯದ ಕನಸು ಕಂಡರು. ಪ್ರಕೃತಿಯ ಅದ್ಭುತ ಸೌಂದರ್ಯದಲ್ಲಿ ನೆಲೆಗೊಂಡಿರುವ ಈಶಾನ್ಯದ ಬಗ್ಗೆ ಅವರು ಹಾಡಿದರು. ಇಡೀ ಅಸ್ಸಾಂಗಾಗಿ, ಅವರು ಹಾಡಿದರು:

"ನಾನಾ ಜಾತಿ-ಉಪೋಜತಿ, ರಹೋನಿಯಾ ಕೃಷ್ಟಿ, ಅಕುವಾಲಿ ಲೋಯಿ ಹೊಯಿಸಿಲ್ ಸೃಷ್ಟಿ, ಈ ಮೊರ್ ಅಹೋಮ್ ದೇಶ್." ನಾವು ಈ ಹಾಡನ್ನು ಗುನುಗುವಾಗ, ನಾವು ಅಸ್ಸಾಂನ ವೈವಿಧ್ಯತೆಯ ಬಗ್ಗೆ ಹೆಮ್ಮೆಪಡುತ್ತೇವೆ. ಅಸ್ಸಾಂನ ಶಕ್ತಿ ಮತ್ತು ಸಾಮರ್ಥ್ಯದ ಬಗ್ಗೆ ನಮಗೆ ಹೆಮ್ಮೆ ಅನಿಸುತ್ತದೆ.

ಸ್ನೇಹಿತರೆ,

ಅವರು ಅರುಣಾಚಲವನ್ನು ಸಮಾನವಾಗಿ ಪ್ರೀತಿಸುತ್ತಿದ್ದರು, ಆದ್ದರಿಂದ ಇಂದು ಅರುಣಾಚಲದ ಮುಖ್ಯಮಂತ್ರಿ ವಿಶೇಷವಾಗಿ ಇಲ್ಲಿಗೆ ಬಂದಿದ್ದಾರೆ. ಭೂಪೇನ್ ದಾ ಬರೆದಿದ್ದಾರೆ: "ಅರುಣ್ ಕಿರಣ್ ಶಿಶ್ ಭೂಷಣ, ಭೂಮಿ ಸುರಮಯಿ ಸುಂದರ, ಅರುಣಾಚಲ ಹಮಾರಾ, ಅರುಣಾಚಲ ಹಮಾರಾ."

ಸ್ನೇಹಿತರೆ,

ನಿಜವಾದ ದೇಶಭಕ್ತನ ಹೃದಯದಿಂದ ಹೊರಹೊಮ್ಮುವ ಧ್ವನಿ ಎಂದಿಗೂ ವ್ಯರ್ಥವಾಗುವುದಿಲ್ಲ. ಇಂದು ಈಶಾನ್ಯಕ್ಕಾಗಿ ಅವರ ಕನಸುಗಳನ್ನು ನನಸಾಗಿಸಲು, ನಾವು ಹಗಲಿರುಳು ಶ್ರಮಿಸುತ್ತಿದ್ದೇವೆ. ಭೂಪೇನ್ ದಾ ಅವರಿಗೆ ಭಾರತ ರತ್ನ ನೀಡುವ ಮೂಲಕ ನಮ್ಮ ಸರ್ಕಾರವು ಈಶಾನ್ಯದ ಕನಸುಗಳು ಮತ್ತು ಘನತೆಯನ್ನು ಗೌರವಿಸಿದೆ, ಈಶಾನ್ಯವನ್ನು ರಾಷ್ಟ್ರದ ಆದ್ಯತೆಯನ್ನಾಗಿ ಮಾಡಿದೆ. ಅಸ್ಸಾಂ ಮತ್ತು ಅರುಣಾಚಲವನ್ನು ಸಂಪರ್ಕಿಸುವ ದೇಶದ ಅತಿ ಉದ್ದದ ಸೇತುವೆಗಳಲ್ಲಿ ಒಂದನ್ನು ನಾವು ನಿರ್ಮಿಸಿದಾಗ, ನಾವು ಅದಕ್ಕೆ ಭೂಪೇನ್ ಹಜಾರಿಕಾ ಸೇತುವೆ ಎಂದು ಹೆಸರಿಸಿದೆವು. ಇಂದು ಅಸ್ಸಾಂ ಮತ್ತು ಇಡೀ ಈಶಾನ್ಯವು ವೇಗವಾಗಿ ಪ್ರಗತಿ ಸಾಧಿಸುತ್ತಿದೆ. ಅಭಿವೃದ್ಧಿಯ ಪ್ರತಿಯೊಂದು ಆಯಾಮದಲ್ಲೂ ಹೊಸ ದಾಖಲೆಗಳನ್ನು ಸ್ಥಾಪಿಸಲಾಗುತ್ತಿದೆ. ಅಭಿವೃದ್ಧಿಯ ಈ ಸಾಧನೆಗಳು ಭೂಪೇನ್ ದಾ ಅವರಿಗೆ ರಾಷ್ಟ್ರವು ಸಲ್ಲಿಸುವ ನಿಜವಾದ ಗೌರವವಾಗಿದೆ.

ಸ್ನೇಹಿತರೆ,

ನಮ್ಮ ಅಸ್ಸಾಂ, ನಮ್ಮ ಈಶಾನ್ಯ, ಯಾವಾಗಲೂ ಭಾರತದ ಸಾಂಸ್ಕೃತಿಕ ವೈವಿಧ್ಯತೆಗೆ ದೊಡ್ಡ ಕೊಡುಗೆ ನೀಡಿದೆ. ಈ ಭೂಮಿಯ ಇತಿಹಾಸ, ಅದರ ಹಬ್ಬಗಳು, ಅದರ ಆಚರಣೆಗಳು, ಅದರ ಕಲೆ, ಅದರ ಸಂಸ್ಕೃತಿ, ಅದರ ನೈಸರ್ಗಿಕ ಸೌಂದರ್ಯ, ಅದರ ದೈವಿಕ ಪ್ರಭಾವಲಯ, ಮತ್ತು ಇವೆಲ್ಲವುಗಳೊಂದಿಗೆ ಭಾರತ ಮಾತೆಯ ಗೌರವ, ಘನತೆ ಮತ್ತು ರಕ್ಷಣೆಗಾಗಿ ಇಲ್ಲಿನ ಜನರು ಮಾಡಿದ ತ್ಯಾಗಗಳು - ಇವೆಲ್ಲವೂ ಇಲ್ಲದೆ ನಾವು ನಮ್ಮ ಮಹಾನ್ ಭಾರತವನ್ನು ಊಹಿಸಲೂ ಸಾಧ್ಯವಿಲ್ಲ. ನಮ್ಮ ಈಶಾನ್ಯ ನಿಜಕ್ಕೂ ರಾಷ್ಟ್ರಕ್ಕೆ ಹೊಸ ಬೆಳಕು ಮತ್ತು ಹೊಸ ಉದಯದ ನಾಡು. ಎಲ್ಲಕ್ಕಿಂತ ಮುಖ್ಯವಾಗಿ, ದೇಶದ ಮೊದಲ ಸೂರ್ಯೋದಯ ಇಲ್ಲಿ ನಡೆಯುತ್ತದೆ. ಭೂಪೇನ್ ದಾ ತಮ್ಮ ಹಾಡಿನಲ್ಲಿ ಈ ಭಾವನೆಗೆ ಧ್ವನಿ ನೀಡಿದ್ದಾರೆ: "ಅಹೋಮ್ ಅಮರ್ ರುಪ್ಪೋಹಿ, ಗುಣೋರು ನೈ ಹೆಶ್, ಭಾರತೋರ್ ಪುರ್ಬೋ ದಿಖೋರ್, ಹುರ್ಜೋ ಉಥಾ ದೇಶ್!"

ಆದ್ದರಿಂದ, ಸಹೋದರ ಸಹೋದರಿಯರೆ,

ನಾವು ಅಸ್ಸಾಂನ ಇತಿಹಾಸವನ್ನು ಆಚರಿಸಿದಾಗ ಮಾತ್ರ ಭಾರತದ ಇತಿಹಾಸವು ಪೂರ್ಣಗೊಳ್ಳುತ್ತದೆ, ಆಗ ಮಾತ್ರ ಭಾರತದ ಸಂತೋಷವು ಪೂರ್ಣಗೊಳ್ಳುತ್ತದೆ ಮತ್ತು ನಾವು ಹೆಮ್ಮೆಯಿಂದ ಮುಂದುವರಿಯಬೇಕು.

ಸ್ನೇಹಿತರೆ,

ನಾವು ಸಂಪರ್ಕದ ಬಗ್ಗೆ ಮಾತನಾಡುವಾಗ, ಜನರು ಸಾಮಾನ್ಯವಾಗಿ ರೈಲು, ರಸ್ತೆ ಅಥವಾ ವೈಮಾನಿಕ ಸಂಪರ್ಕದ ಬಗ್ಗೆ ಯೋಚಿಸುತ್ತಾರೆ. ಆದರೆ ರಾಷ್ಟ್ರದ ಏಕತೆಗೆ, ಇನ್ನೊಂದು ಸಂಪರ್ಕವು ಅಷ್ಟೇ ಅವಶ್ಯಕವಾಗಿದೆ, ಅದು ಸಾಂಸ್ಕೃತಿಕ ಸಂಪರ್ಕ. ಕಳೆದ 11 ವರ್ಷಗಳಲ್ಲಿ, ಈಶಾನ್ಯದ ಅಭಿವೃದ್ಧಿಯ ಜತೆಗೆ, ರಾಷ್ಟ್ರವು ಸಾಂಸ್ಕೃತಿಕ ಸಂಪರ್ಕಕ್ಕೂ ಹೆಚ್ಚಿನ ಪ್ರಾಮುಖ್ಯತೆ ನೀಡಿದೆ. ಇದು ನಿರಂತರವಾಗಿ ಮುಂದುವರಿಯುತ್ತಿರುವ ಒಂದು ಧ್ಯೇಯವಾಗಿದೆ. ಇಂದು ಈ ಸಂದರ್ಭದಲ್ಲಿ, ನಾವು ಆ ಧ್ಯೇಯದ ಒಂದು ನೋಟವನ್ನು ನೋಡುತ್ತಿದ್ದೇವೆ. ಇತ್ತೀಚೆಗೆ, ನಾವು ವೀರ್ ಲಚಿತ್ ಬೋರ್ಫುಕನ್ ಅವರ 400ನೇ ಜನ್ಮ ದಿನಾಚರಣೆಯನ್ನು ರಾಷ್ಟ್ರೀಯ ಮಟ್ಟದಲ್ಲಿ ಆಚರಿಸಿದ್ದೇವೆ. ಸ್ವಾತಂತ್ರ್ಯ ಹೋರಾಟದಲ್ಲಿಯೂ ಸಹ, ಅಸ್ಸಾಂ ಮತ್ತು ಈಶಾನ್ಯದ ಅಸಂಖ್ಯಾತ ಯೋಧರು ಅಭೂತಪೂರ್ವ ತ್ಯಾಗಗಳನ್ನು ಮಾಡಿದ್ದಾರೆ! 'ಆಜಾದಿ ಕಾ ಅಮೃತ್ ಮಹೋತ್ಸವ'ದ ಸಮಯದಲ್ಲಿ, ನಾವು ಮತ್ತೊಮ್ಮೆ ಈಶಾನ್ಯದ ಸ್ವಾತಂತ್ರ್ಯ ಹೋರಾಟಗಾರರನ್ನು ಮತ್ತು ಈ ಪ್ರದೇಶದ ಇತಿಹಾಸವನ್ನು ಜೀವಂತಗೊಳಿಸಿದ್ದೇವೆ. ಇಂದು, ಇಡೀ ರಾಷ್ಟ್ರವು ಅಸ್ಸಾಂನ ಇತಿಹಾಸ ಮತ್ತು ಕೊಡುಗೆಯೊಂದಿಗೆ ಪರಿಚಿತವಾಗುತ್ತಿದೆ. ಇತ್ತೀಚೆಗೆ, ನಾವು ದೆಹಲಿಯಲ್ಲಿ ಅಷ್ಟಲಕ್ಷ್ಮಿ ಮಹೋತ್ಸವ ಆಯೋಜಿಸಿದ್ದೇವೆ. ಆ ಆಚರಣೆಯಲ್ಲೂ, ಅಸ್ಸಾಂನ ಶಕ್ತಿ ಮತ್ತು ಕೌಶಲ್ಯ ಸ್ಪಷ್ಟವಾಗಿತ್ತು.

ಸ್ನೇಹಿತರೆ,

ಸಂದರ್ಭಗಳು ಏನೇ ಇರಲಿ, ಅಸ್ಸಾಂ ಯಾವಾಗಲೂ ರಾಷ್ಟ್ರದ ಹೆಮ್ಮೆಗೆ ಧ್ವನಿ ನೀಡಿದೆ. ಭೂಪೇನ್ ದಾ ಅವರ ಹಾಡುಗಳಲ್ಲಿ ನಾವು ಕೇಳುವ ಈ ಧ್ವನಿ. 1962ರ ಯುದ್ಧ ನಡೆದಾಗ, ಅಸ್ಸಾಂ ಆ ಯುದ್ಧವನ್ನು ನೇರವಾಗಿ ವೀಕ್ಷಿಸುತ್ತಿತ್ತು. ಆ ಸಮಯದಲ್ಲಿ, ಭೂಪೇನ್ ದಾ ರಾಷ್ಟ್ರಕ್ಕೆ ಬಲ ನೀಡಿದರು. ಅವರು ಹಾಡಿದರು: "ಪ್ರೋತಿ ಜೋವಾನ್ ರುಕ್ತೋರೆ ಬಿಂದು, ಹಹಹೋರ್ ಅನಂತ್ ಹಿಂದೂ, ಸೇ ಹಹಹೋರ್ ದುರ್ಜೋಯ್ ಲಾಹೋರ್, ಜಶಿಲೇ ಪ್ರತಿಜ್ಞ ಜೋಯ್ರೆ." ಆ ಪ್ರತಿಜ್ಞೆಯು ದೇಶವಾಸಿಗಳಲ್ಲಿ ಹೊಸ ಉತ್ಸಾಹ ತುಂಬಿತು.

ಸ್ನೇಹಿತರೆ,

ಆ ಭಾವನೆ, ಆ ಚೈತನ್ಯ, ಇನ್ನೂ ಜನರ ಹೃದಯದಲ್ಲಿ ಬಂಡೆಯಂತೆ ದೃಢವಾಗಿ ನಿಂತಿದೆ. ಆಪರೇಷನ್ ಸಿಂದೂರ್ ಸಮಯದಲ್ಲೂ ನಾವು ಇದನ್ನು ನೋಡಿದ್ದೇವೆ. ಪಾಕಿಸ್ತಾನದ ಭಯೋತ್ಪಾದಕ ಸಂಚುಗಳಿಗೆ ದೇಶವು ತಕ್ಕ ಉತ್ತರ ನೀಡಿತು, ಭಾರತದ ಶಕ್ತಿ ಪ್ರಪಂಚದಾದ್ಯಂತ ಪ್ರತಿಧ್ವನಿಸಿತು. ಭಾರತದ ಶತ್ರು ಯಾವುದೇ ಮೂಲೆಯಲ್ಲಿ ಸುರಕ್ಷಿತವಾಗಿರುವುದಿಲ್ಲ ಎಂಬುದನ್ನು ನಾವು ತೋರಿಸಿದ್ದೇವೆ. ತನ್ನ ಭದ್ರತೆ ಮತ್ತು ಹೆಮ್ಮೆಯ ವಿಷಯದಲ್ಲಿ ನವ ಭಾರತವು ಯಾವುದೇ ಬೆಲೆ ತೆರಲು ಸಿದ್ಧವಿದೆ, ರಾಜಿ ಮಾಡಿಕೊಳ್ಳುವ ಪ್ರಶ್ನೆಯೇ ಇಲ್ಲ.

ಸ್ನೇಹಿತರೆ,

ಅಸ್ಸಾಂನ ಸಂಸ್ಕೃತಿಯ ಪ್ರತಿಯೊಂದು ಆಯಾಮವು ಅದ್ಭುತ ಮತ್ತು ಅಸಾಧಾರಣವಾಗಿದೆ, ಆದ್ದರಿಂದ ದೇಶದ ಮಕ್ಕಳು 'ಎ ಫಾರ್ ಅಸ್ಸಾಂ' ಅನ್ನು ಕಲಿಯುವ ದಿನ ದೂರವಿಲ್ಲ ಎಂದು ನಾನು ಆಗಾಗ್ಗೆ ಹೇಳಿದ್ದೇನೆ. ಅದರ ಸಂಸ್ಕೃತಿ, ಘನತೆ ಮತ್ತು ಹೆಮ್ಮೆಯ ಜೊತೆಗೆ, ಅಸ್ಸಾಂ ಅಪಾರ ಸಾಧ್ಯತೆಗಳ ಮೂಲವಾಗಿದೆ. ಅಸ್ಸಾಂನ ಉಡುಪು, ಅದರ ಪಾಕಪದ್ಧತಿ, ಅದರ ಪ್ರವಾಸೋದ್ಯಮ, ಅದರ ಉತ್ಪನ್ನಗಳು - ನಾವು ದೇಶಾದ್ಯಂತ ಮಾತ್ರವಲ್ಲದೆ ಪ್ರಪಂಚದಾದ್ಯಂತ ಈ ಎಲ್ಲಾ ಮನ್ನಣೆ ನೀಡಬೇಕು. ನಿಮಗೆಲ್ಲರಿಗೂ ತಿಳಿದಿದೆ, ನಾನು ಸ್ವತಃ ಅಸ್ಸಾಂನ ಗಮೋಸಾದ ಬ್ರಾಂಡಿಂಗ್ ಅನ್ನು ತುಂಬಾ ಹೆಮ್ಮೆಯಿಂದ ಉತ್ತೇಜಿಸುತ್ತೇನೆ. ಅದೇ ರೀತಿ, ನಾವು ಅಸ್ಸಾಂನ ಪ್ರತಿಯೊಂದು ಉತ್ಪನ್ನವನ್ನು ಪ್ರಪಂಚದ ದೂರದ ಮೂಲೆಗಳಿಗೆ ಕೊಂಡೊಯ್ಯಬೇಕು.

ಸ್ನೇಹಿತರೆ,

ಭೂಪೇನ್ ದಾ ಅವರ ಇಡೀ ಜೀವನವು ರಾಷ್ಟ್ರದ ಗುರಿಗಳಿಗೆ ಸಮರ್ಪಿತವಾಗಿದೆ. ಭೂಪೇನ್ ದಾ ಅವರ ಜನ್ಮ ಶತಮಾನೋತ್ಸವದ ಈ ದಿನದಂದು, ನಾವು ದೇಶಕ್ಕಾಗಿ ಸ್ವಾವಲಂಬನೆಯ ಸಂಕಲ್ಪ ಸ್ವೀಕರಿಸಬೇಕು. ಅಸ್ಸಾಂನ ನನ್ನ ಸಹೋದರ ಸಹೋದರಿಯರಿಗೆ ನಾನು ಮನವಿ ಮಾಡುತ್ತೇನೆ - ನಾವು 'ವೋಕಲ್ ಫಾರ್ ಲೋಕಲ್'ನ ಬ್ರಾಂಡ್ ರಾಯಭಾರಿಗಳಾಗಬೇಕು. ನಾವು ಸ್ಥಳೀಯ ವಸ್ತುಗಳ ಬಗ್ಗೆ ಹೆಮ್ಮೆ ಪಡಬೇಕು. ನಾವು ಸ್ಥಳೀಯ ವಸ್ತುಗಳನ್ನು ಖರೀದಿಸಬೇಕು ಮತ್ತು ನಾವು ಸ್ಥಳೀಯ ವಸ್ತುಗಳನ್ನು ಮಾರಾಟ ಮಾಡಬೇಕು. ನಾವು ಈ ಅಭಿಯಾನಗಳನ್ನು ವೇಗವಾಗಿ ಮುನ್ನಡೆಸಿದಷ್ಟೂ, ವಿಕಸಿತ ಭಾರತದ ಕನಸು ಅಷ್ಟೇ ವೇಗವಾಗಿ ನನಸಾಗುತ್ತದೆ.

ಸ್ನೇಹಿತರೆ,

13ನೇ ವಯಸ್ಸಿನಲ್ಲಿ ಭೂಪೇನ್ ದಾ ಒಂದು ಹಾಡು ಬರೆದಿದ್ದರು: "ಅಗ್ನಿಜುಗೋರ್ ಫಿರಿಂಗೋಟಿ ಮೋಯಿ, ನೋಟುನ್ ಭಾರತ್ ಗಧಿಮ್, ಹರ್ಬೋಹರರ್ ಹರ್ಬೋಶ್ವೋ ಪುನೋರ್ ಫಿರೈ ಅನಿಮ್, ನೋಟುನ್ ಭಾರತ್ ಗಧಿಮ್."

ಸ್ನೇಹಿತರೆ,

ಈ ಹಾಡಿನಲ್ಲಿ, ಅವರು ತಮ್ಮನ್ನು ತಾವು ಬೆಂಕಿಯ ಕಿಡಿ ಎಂದು ಪರಿಗಣಿಸಿದರು, ಹೊಸ ಭಾರತ ನಿರ್ಮಿಸುವುದಾಗಿ ಸಂಕಲ್ಪ ಮಾಡಿದರು. ಪ್ರತಿಯೊಬ್ಬ ಸಂತ್ರಸ್ತ ಮತ್ತು ವಂಚಿತ ವ್ಯಕ್ತಿಯು ತನ್ನ ಹಕ್ಕುಗಳನ್ನು ಮರಳಿ ಪಡೆಯುವ ಹೊಸ ಭಾರತ ಅದಾಗಿತ್ತು.

ನನ್ನ ಸಹೋದರ ಸಹೋದರಿಯರೆ,

ಆ ಸಮಯದಲ್ಲಿ ಭೂಪೇನ್ ದಾ ಕಂಡ ಹೊಸ ಭಾರತದ ದೃಷ್ಟಿಕೋನವು ಇಂದು ದೇಶದ ಸಂಕಲ್ಪವಾಗಿದೆ. ನಾವು ಈ ಸಂಕಲ್ಪಕ್ಕೆ ನಮ್ಮನ್ನು ಸಂಪರ್ಕಿಸಿಕೊಳ್ಳಬೇಕು. ಇಂದು ನಾವು 2047ರ ವಿಕಸಿತ ಭಾರತವನ್ನು ಪ್ರತಿಯೊಂದು ಪ್ರಯತ್ನದ, ಪ್ರತಿಯೊಂದು ಸಂಕಲ್ಪದ ಕೇಂದ್ರದಲ್ಲಿ ಇರಿಸುವ ಸಮಯವಾಗಿದೆ. ಇದಕ್ಕೆ ಸ್ಫೂರ್ತಿ ಭೂಪೇನ್ ದಾ ಅವರ ಹಾಡುಗಳಿಂದ, ಅವರ ಜೀವನದಿಂದ ಬರುತ್ತದೆ. ನಮ್ಮ ಈ ಸಂಕಲ್ಪಗಳು ಭೂಪೇನ್ ಹಜಾರಿಕಾ ಅವರ ಕನಸುಗಳನ್ನು ಈಡೇರಿಸುತ್ತವೆ. ಈ ಉತ್ಸಾಹದಿಂದ, ಮತ್ತೊಮ್ಮೆ ನಾನು ಎಲ್ಲಾ ದೇಶವಾಸಿಗಳಿಗೆ ಭೂಪೇನ್ ದಾ ಅವರ ಶತಮಾನೋತ್ಸವದ ಶುಭಾಶಯಗಳನ್ನು ಕೋರುತ್ತೇನೆ. ನಾನು ನಿಮ್ಮೆಲ್ಲರಿಗೂ ಮನವಿ ಮಾಡುತ್ತೇನೆ: ದಯವಿಟ್ಟು ನಿಮ್ಮ ಮೊಬೈಲ್ ಫೋನ್‌ಗಳನ್ನು ತೆಗೆದುಕೊಂಡು ಬ್ಯಾಟರಿ ದೀಪಗಳನ್ನು ಆನ್ ಮಾಡಿ ಮತ್ತು ಭೂಪೇನ್ ದಾ ಅವರಿಗೆ ಗೌರವ ಸಲ್ಲಿಸಿ. ಈ ಸಾವಿರಾರು ದೀಪಗಳು ಭೂಪೇನ್ ದಾ ಅವರ ಅಮರ ಆತ್ಮಕ್ಕೆ ಗೌರವ ಸಲ್ಲಿಸುತ್ತವೆ. ಇಂದಿನ ಪೀಳಿಗೆ ಅವರ ಧ್ವನಿಯನ್ನು ಬೆಳಕಿನಿಂದ ಅಲಂಕರಿಸುತ್ತಿದೆ.

ತುಂಬು ಧನ್ಯವಾದಗಳು!

*****