17 ستمبر 2025 کو وزیر اعظم جناب نریندر مودی پورے بھارت میں خواتین، نوعمر لڑکیوں اور بچوں کے لیے صحت اور غذائیت کی خدمات کو مضبوط بنانے کی جانب ایک تاریخی قدم اٹھاتے ہوئے ’سوست ناری، سشکت پریوار ابھیان‘ کا آغاز 8ویں پوشن ماہ کے ساتھ کریں گے۔

یہ پہل وزارت صحت و خاندانی بہبود (ایم او ایچ ایف ڈبلیو) اور خواتین اور بچوں کی ترقی کی وزارت (ایم او ڈبلیو سی ڈی) کی مشترکہ قیادت میں کی جا رہی ہے، جو خواتین اور بچوں کی صحت و غذائیت کے لیے ان کے مشترکہ عزم کو ظاہر کرتی ہے۔ ایم او ایچ ایف ڈبلیو ملک بھر میں ہیلتھ کیمپ اور سہولیات کے ذریعے حفاظتی، ترویجی اور علاجی صحت خدمات کی فراہمی کو یقینی بنائے گی، جبکہ ایم او ڈبلیو سی ڈی، پوشن ماہ کی سرگرمیوں کو اس مہم کے ساتھ جوڑے گی، آنگن واڑی مراکز کے ذریعے خواتین اور نوعمر لڑکیوں کو متحرک کرے گی اور بڑے پیمانے پر غذائی مشاورت اور تراکیب کی عملی نمائش کی قیادت کرے گی۔ دونوں وزارتیں مل کر خون کی کمی کی روک تھام، متوازن غذا اور ماہواری کی صحت و صفائی کے بارے میں آگاہی مہم بھی چلائیں گی تاکہ خواتین اور نوعمر لڑکیوں کی صحت اور غذائیت کی ضروریات کو جامع اور مربوط طریقے سے پورا کیا جا سکے۔

سوست ناری، سشکت پریوار ابھیان کا مقصد عزت مآب وزیر اعظم کے صحت، پوشن (غذائیت)، فٹنس اور وکست بھارت 2047 کے وژن کو آگے بڑھانا ہے۔ یہ قومی سطح پر چلائی جانے والی جامع مہم کمیونٹی سطح پر خواتین کے لیے حفاظتی، ترویجی اور علاجی صحت خدمات فراہم کرنے کی کوشش کرے گی۔ اس کے تحت غیر متعدی امراض، خون کی کمی، تپ دق اور سکل سیل بیماری کی اسکریننگ، بروقت تشخیص اور علاج کی سہولتوں کو مضبوط بنایا جائے گا، جبکہ زچگی، بچوں اور نوعمروں کی صحت کو قبل از پیدائش نگہداشت، حفاظتی ٹیکہ کاری، غذائیت، ماہواری کی صحت و صفائی، طرزِ زندگی اور ذہنی صحت سے متعلق آگاہی سرگرمیوں کے ذریعے فروغ دیا جائے گا۔

ایکس (سابقہ ٹوئٹر) پر ایک پوسٹ میں، عزت مآب وزیر صحت و خاندانی بہبود جناب جے پی نڈا نے اس پہل کے مقصد پر زور دیا کہ یہ اقدام پورے بھارت میں خواتین اور بچوں کے لیے صحت کی خدمات کو مضبوط بنانے کے لیے ہے تاکہ بہتر رسائی، معیاری نگہداشت اور آگاہی کو یقینی بنایا جا سکے۔ انہوں نے تمام نجی اسپتالوں اور صحت کے شعبے کے اسٹیک ہولڈروں سے اپیل کی کہ وہ آگے آئیں اور اس جن بھاگیداری ابھیان کا ایک لازمی حصہ بنیں۔

ملک گیر آغاز اور ہیلتھ کیمپ

یہ مہم 17 ستمبر سے 2 اکتوبر 2025 تک پورے ملک میں آروگیہ مندر، کمیونٹی ہیلتھ سینٹرز، ضلعی اسپتالوں اور دیگر سرکاری صحت سہولیات میں منعقد کی جائے گی۔

ملک بھر میں ایک لاکھ سے زائد ہیلتھ کیمپ منعقد کیے جائیں گے، جس سے یہ خواتین اور بچوں کے لیے اب تک کی سب سے بڑی صحت آگاہی مہم بن جائے گی۔

تمام سرکاری صحت سہولیات میں روزانہ ہیلتھ کیمپ منعقد کیے جائیں گے۔

مرکزی اور ریاستی وزرا، ارکان پارلیمنٹ اور دیگر عوامی نمائندے اس مہم میں شامل ہوں گے۔ آشا ورکر، اے این ایم، آنگن واڑی ورکر، سیلف ہیلپ گروپ، پنچایتی راج ادارے، شہری مقامی ادارے، مائی بھارت رضاکار اور نوجوانوں کے گروپ نچلی سطح پر کمیونٹی کو متحرک کرنے میں کلیدی کردار ادا کریں گے۔

اہم صحت خدمات

ماہرین کی خدمات بشمول امراضِ نسواں، اطفال، امراض چشم، کان ناک گلا، دندان سازی، امراض جلد اور نفسیات کو میڈیکل کالج ضلعی اسپتالوں، مرکزی سرکاری اداروں اور نجی اسپتالوں کے ذریعے فراہم کیا جائے گا۔

مرکزی سرکاری ادارے جیسے ایمس (AIIMS)، دفاعی اور ریلوے اسپتال، ای ایس آئی سی (ESIC) اسپتال، سی جی ایچ ایس (CGHS) مراکز اور قومی اہمیت کے ادارے بھی ان کوششوں کو تقویت دیں گے تاکہ ماہرین کی خدمات اور نگہداشت کی تسلسل آخری حد تک پہنچ سکے۔ کئی نجی شعبے کے صحت مراکز نے بھی اس پہل کی حمایت کی پیشکش کی ہے، جس سے اس اقدام کے دائرہ کار، معیار اور رسائی میں مزید وسعت آئے گی۔

اس دو ہفتے طویل ایونٹ کے دوران درج ذیل خدمات فراہم کی جائیں گی:

غیر متعدی امراض اور ویلنس: کیمپ میں ہائی بلڈ پریشر، ذیابیطس اور موٹاپے کی اسکریننگ بی پی، بلڈ شوگر اور بی ایم آئی چیک کے ذریعے کی جائے گی۔ خطرے کی جانچ، ریفرل اور طرزِ زندگی میں تبدیلی، غذائیت، جسمانی سرگرمی اور تمباکو نوشی ترک کرنے پر مشاورت، دائمی بیماریوں کی بروقت تشخیص اور بہتر انتظام میں مددگار ہوگی۔

کینسر اسکریننگ: خواتین کے لیے منہ کے معائنے، چھاتی کے طبی معائنے، خود چھاتی کے معائنے کی تربیت اور سروائیکل کینسر اسکریننگ کی سہولیات فراہم کی جائیں گی۔ ماموگرافی اور آنکولوجی کیئر کے لیے ریفرل سروسز بھی دستیاب ہوں گی، ساتھ ہی منہ، چھاتی اور سروائیکل کینسر سے متعلق آگاہی سیشنز بھی منعقد کیے جائیں گے۔

خون کی کمی اور غذائیت: نوعمر لڑکیوں اور خواتین کے لیے بڑے پیمانے پر ہیموگلوبن ٹیسٹنگ اور خون کی کمی کی اسکریننگ کی جائے گی، جس کے ساتھ آئی ایف اے سپلیمنٹس اور پیٹ کے کیڑوں کی گولیاں بھی فراہم کی جائیں گی۔ غذائیت سے متعلق مشاورت، متوازن غذا کے عملی مظاہرے، انوپراشن تقریبات اور صحت مند تراکیب کی نمائش پوشن آگاہی کو مزید مستحکم کریں گی، جبکہ ماہواری کی صحت و صفائی کو فروغ دینا نوعمر لڑکیوں کو بااختیار بنائے گا۔ یہ اقدامات ایف ایس ایس اے آئی کے ایٹ رائٹ (Eat Right) اقدام سے مزید تقویت پائیں گے، جو کمیونٹیز میں محفوظ، صحت مند اور پائیدار غذائی عادات کو فروغ دیتا ہے۔

تپ دق (ٹی بی): کمزور خواتین کی ٹی بی اسکریننگ، بلغم کے نمونے جمع کرنا اور موبائل ایکس رے یونٹس بروقت تشخیص میں مدد فراہم کریں گے۔ مریضوں کو علاج کے لیے ڈاٹس مراکز سے جوڑا جائے گا، جبکہ رضاکاروں کو نکشے متر کے طور پر متحرک کیا جائے گا تاکہ وہ غذائی اور نفسیاتی مدد فراہم کر سکیں۔

سکل سیل بیماری: قبائلی آبادی پر خصوصی توجہ دی جائے گی، جس میں سکل سیل اسکریننگ، سکل سیل کارڈز کی تقسیم اور مشاورتی خدمات شامل ہوں گی۔ جینیاتی مشاورت اور ریفرل سے طویل مدتی نگہداشت اور بیماری کے انتظام کو یقینی بنایا جائے گا۔

زچگی اور بچوں کی صحت: جامع قبل از پیدائش نگہداشت فراہم کی جائے گی، جس میں ہیموگلوبن ٹیسٹنگ، بلڈ پریشر مانیٹرنگ، وزن کی جانچ اور بچے کی نشوونما کا جائزہ شامل ہوگا۔ ماں اور بچے کے تحفظ کے کارڈ کی تقسیم، محفوظ حمل اور ادارہ جاتی زچگی پر مشاورت، بچوں کی نشوونما کی نگرانی، شیر خوار اور نوعمر بچوں کی خوراک پر رہنمائی اور حفاظتی ٹیکہ جات کی خدمات زچگی اور بچوں کی صحت کو مزید بہتر بنائیں گی۔

حفاظتی ٹیکہ جات: بچوں اور نوعمروں کے لیے چھوٹے ہوئے ویکسین لگائے جائیں گے، جبکہ حاملہ خواتین کے لیے ٹی ڈی ویکسینیشن کو ترجیح دی جائے گی۔

آگاہی اور مشاورت: کیمپ میں ماہواری کی صحت و صفائی کو فروغ دیا جائے گا، سینیٹری پیڈ تقسیم کیے جائیں گے اور ذہنی صحت کے مشاورتی سیشن منعقد کیے جائیں گے۔ سیلف ہیلپ گروپس، پنچایتی راج ادارے وغیرہ کی قیادت میں مہم چلائی جائے گی تاکہ تیل اور چینی کے استعمال میں کمی کی حوصلہ افزائی ہو اور زیادہ صحت مند غذا کو فروغ ملے۔

خون کا عطیہ: ملک گیر سطح پر خون عطیہ مہمات منعقد کی جائیں گی تاکہ ایمرجنسی کیئر، سرجری اور خون کی بیماریوں کے علاج کو مضبوط کیا جا سکے۔ عطیہ دہندگان کو ای-رکت کوش پورٹل (https://eraktkosh.mohfw.gov.in) پر رجسٹر کیا جائے گا۔

ڈیجیٹل ہیلتھ سروسز: مستفیدین کو پی ایم-جے اے وائی، آیوشمان وایاوندنا اور آبھا (ABHA) کے تحت رجسٹر کیا جائے گا۔ ہیلتھ کیمپ میں کارڈ کی توثیق اور شکایات کے ازالے کے لیے ہیلپ ڈیسک قائم کیے جائیں گے۔

آیوش خدمات: یوگا سیشن، آیوروید مشاورت اور دیگر آیوش خدمات کا اہتمام کیا جائے گا تاکہ خواتین اور خاندانوں کے لیے جامع صحت اور ویلنس کے طریقوں کو فروغ دیا جا سکے۔

نوجوانوں اور شہریوں کی شمولیت: ابھیان میں بھارت کے نوجوانوں اور کمیونٹیوں کو اس جن بھاگیداری مہم میں شامل کرنے پر خصوصی توجہ دی جائے گی۔ مائی بھارت رضاکار آگاہی مہمات، صحت کے عہد، ثقافتی سرگرمیوں اور کمیونٹی کی متحرک مہمات میں سرگرم کردار ادا کریں گے۔ شہریوں کو بھی MyGov پورٹل (www.mygov.in) کے ذریعے رضاکارانہ خون اور اعضا کے عطیہ کے لیے عہد بند کرنے اور مخصوص پلیٹ فارم (www.nikshay.in) پر نکشے متر کے طور پر رجسٹر ہونے کی ترغیب دی جائے گی تاکہ وہ ٹی بی کے مریضوں کو غذائیت، مشاورت اور نگہداشت فراہم کر سکیں۔ یہ ”پورے سماج کی شمولیت“ کا طریقہ مہم کی زیادہ سے زیادہ رسائی اور اثر کو یقینی بنائے گا۔

پورے حکومتی اداروں کا اشتراک:

ایم او ڈبلیو سی ڈی کے ساتھ ساتھ کئی دیگر وزارتیں بھی اس ابھیان کو بھرپور تعاون فراہم کریں گی۔ وزارت دیہی ترقیات اور وزارت پنچایتی راج خواتین کو سیلف ہیلپ گروپ اور پنچایتی راج اداروں کے ذریعے متحرک کریں گی۔ وزارت تعلیم اسکولوں اور اعلیٰ تعلیمی اداروں کے ساتھ ہم آہنگی کرے گی، جبکہ نوجوانوں کی امور اور کھیلوں کی وزارت مائی بھارت رضاکاروں کے ساتھ مل کر صحت سے متعلق آگاہی اور رسائی کو مضبوط کرے گی۔ وزارت برائے قبائلی امور قبائلی کمیونٹیوں تک رسائی میں مدد کرے گی۔ اس کے علاوہ، وزارت دفاع، وزارت ریلوے، وزارت محنت و روزگار، وزارت آیوش، وزارت ہیوی انڈسٹریز، وزارت داخلہ وغیرہ اپنی اپنی طبی اداروں میں ہیلتھ کیمپوں کا اہتمام کریں گی۔

***********

ش ح۔ ف ش ع

U: 5995