ମିଜୋରାମ ରାଜ୍ୟପାଳ ଭି.କେ.ସିଂହ, ମୁଖ୍ୟମନ୍ତ୍ରୀ ଲାଲଡୁହୋମା, କେନ୍ଦ୍ର କ୍ୟାବିନେଟର ସହଯୋଗୀ ଅଶ୍ୱିନୀ ବୈଷ୍ଣବ, ମିଜୋରାମ ସରକାରଙ୍କ ମନ୍ତ୍ରୀବର୍ଗ, ସାଂସଦ, ଅନ୍ୟ ନିର୍ବାଚିତ ପ୍ରତିନିଧି ସମୂହ ଓ ମିଜୋରାମ ଜନତା ।

ସୁନୀଳ ପର୍ବତମାଳାର ରାଜ୍ୟ ମିଜୋରାମକୁ ଦେଖୁଥିବା ମହାପ୍ରଭୁ ପଥିଆନଙ୍କୁ ସଭକ୍ତି ପ୍ରଣାମ କରୁଛି । ମିଜୋରାମର ଲେଙ୍ଗପୁଇ ବିମାନବନ୍ଦରରେ ଏବେ ମୁଁ ରହିଛି । ଦୁର୍ଭାଗ୍ୟବଶତଃ ଖରାପ ପାଗ ଲାଗି ମୁଁ ଦୁଃଖିତ ଯେ ଆଇଜଲରେ ମୁଁ ଆପଣଙ୍କୁ ସାକ୍ଷାତ କରିପାରୁନି । କିନ୍ତୁ ଏଠାରେ ରହି ବି ମୁଁ ଆପଣମାନଙ୍କର ଶ୍ରଦ୍ଧା ଓ ଭଲ ପାଇବାକୁ ଜାଣି ପାରୁଛି ।

 ବନ୍ଧୁଗଣ,

ଏହା ସ୍ୱାଧୀନତା ଆନ୍ଦୋଳନ ହେଉ ଅବା ଦେଶ ନିର୍ମାଣ ମିଜୋରାମର ସବୁ ନାଗରିକ ଆଗକୁ ଆସିଛନ୍ତି । ଲାଲନୁ ରୋପୁଇଲାନି ଓ ପଶଲଥା ଖୁଆଙ୍ଗଚେରାଙ୍କ ପରି ମହାନୁଭବମାନେ ଦେଶର ପ୍ରେରଣା ସ୍ରୋତ ପାଲଟିଛନ୍ତି । ସେବା ସାହସ ସହାନୁଭୂତି ମିଜୋ ସମାଜର ବଳ ଓ ପୁଞ୍ଜି । ଆଜି ମିଜୋରାମ ଦେଶର ପ୍ରଗତିରେ ଉଲ୍ଲେଖନୀୟ ଭୂମିକା ନିଭାଉଛି ।

ବନ୍ଧୁବର୍ଗ,

ସାରା ଦେଶ ବିଶେଷକରି ମିଜୋରାମ ଲାଗି ଆଜି ହେଉଛି ଏକ ଐତିହାସିକ ଦିନ । ଭାରତର ରେଲୱେ ମାନଚିତ୍ରରେ ମିଜୋରାମର ଆଇଜଲ ଆଜିଠାରୁ ସ୍ଥାନିତ ହେବ । କିଛି ବର୍ଷ ପୂର୍ବେ ଏହାର ଶିଳାନ୍ୟାସ ମୁଁ କରିଥିଲି । ତାହା ଆଜି ସଫଳ ହୋଇଛି । ଆଜି ଗର୍ବର ସହ ଦେଶ ଲାଗି ମୁଁ ଏହାକୁ ଉତ୍ସର୍ଗ କରୁଛି । ବିଭିନ୍ନ ବାଧା ବିଘ୍ନକୁ ଅତିକ୍ରମ କରି ଆଜି ଏହି ବୈରବି ସାଇରଙ୍ଗ ରେଲୱେ ଲାଇନ ବିଛା ଯାଇପାରିଛି । ଆମ ଇଞ୍ଜିନିୟରମାନଙ୍କ ଦକ୍ଷତା ଓ ଶ୍ରମିକମାନଙ୍କ ଉତ୍ସାହ ପାଇଁ ଏହା ସଫଳ ହୋଇପାରିଛି ।

ବନ୍ଧୁଗଣ,

ଆମେମାନେ ପରସ୍ପର ସହ ସମ୍ବନ୍ଧିତ । ଏବେ ପ୍ରଥମଥର ଲାଗି ମିଜୋରାମର ସଇରଙ୍ଗରୁ ସିଧା ସଳଖ ଦିଲ୍ଲୀ ଯିବା ଲାଗି ରାଜଧାନୀ ଏକ୍ସପ୍ରେସ ଦୌଡିବ । ଏହା ଏକ ରେଲୱେ ଯୋଗାଯୋଗ କେବଳ ନୁହେଁ ବରଂ ରୂପାନ୍ତରୀକରଣର ଜୀବନଧାରା । ମିଜୋରାମ ଲୋକଙ୍କ ଜୀବନ ଓ ଜୀବିକାକୁ ଏହା ବହୁଳ ମାତ୍ରାରେ ପ୍ରଭାବିତ କରିବ । ମିଜୋରାମର ଚାଷବାସ ଓ ବେପାର ସାରା ଦେଶକୁ ପହଂଚିପାରିବ । ଶିକ୍ଷା ଓ ସ୍ୱାସ୍ଥ୍ୟ ଲାଗି ନାରଗିକମାନେ ସବୁପ୍ରକାର ସୁବିଧା ପାଇପାରିବେ । ପର୍ଯ୍ୟଟନ, ପରିବହନ ଓ ଆତିଥେୟତା କ୍ଷେତ୍ରରେ ନିଯୁକ୍ତି ସୁଯୋଗ ସୃଷ୍ଟି ହେବ ।

ବନ୍ଧୁଗଣ,

ବହୁକାଳ ଯାଏ ଆମ ଦେଶର କିଛି ରାଜନୈତିକ ଦଳ ବୋଟ ବ୍ୟାଙ୍କ ପଲିଟିକ୍ସ କରୁଥିଲେ । ଯେଉଁ ସ୍ଥାନରେ ଅଧିକା ଭୋଟ ମିଳିବାର ଆଶା ରହିଥିଲା ସେହି ସ୍ଥାନକୁ ସେମାନେ ଅଧିକା ଫୋକସ କରୁଥିଲେ । ମିଜୋରାମ ସମେତ ସମଗ୍ର ଉତର-ପୂର୍ବ ରାଜ୍ୟର ଲୋକେ ଏପ୍ରକାର ରାଜନୀତି ଯୋଗୁଁ ଶୀକାର ହେଉଥିଲେ । କିନ୍ତୁ ଆମର ଆଭିମୁଖ୍ୟ ଅଲଗା । ଯେଉଁମାନେ ପୂର୍ବରୁ ଅବହେଳିତ ରହିଥିଲେ ସେମାନଙ୍କୁ ଆଜି ଆମେ ଆଗକୁ ଆଣିପାରିଛୁ । ଯେଉଁମାନେ ଆର୍ଥିକ ଅନୁନ୍ନତ ବର୍ଗର ଥିଲେ ସେମାନେ ଆଜି ଆଗକୁ ଆସିପାରିଛନ୍ତି । ଗତ ଏଗାର ବର୍ଷ ଧରି ଆମେ ଉତର-ପୂର୍ବ ରାଜ୍ୟର ଉନ୍ନତି ଲାଗି ଲଗାତର ଉଦ୍ୟମ କରିଆସୁଛୁ । ଏହି ଅଂଚଳ ଏବେ ସାରା ଦେଶର ବିକାଶର ଇଞ୍ଜିନରେ ପରିଣତ ହୋଇପାରିଛି ।

ବନ୍ଧୁଗଣ,

ରାଜ୍ୟର ଉତର-ପୂର୍ବ କ୍ଷେତ୍ରର ଅଧିକାଂଶ ରାଜ୍ୟ ଏବେ ପ୍ରଥମ ଥର ଲାଗି ରେଲୱେ ମାନଚିତ୍ରରେ ସ୍ଥାନିତ ହୋଇଛନ୍ତି । କେନ୍ଦ୍ର ସରକାରଙ୍କ ଉଦ୍ୟମକ୍ରମେ ରାଜ୍ୟର ଗ୍ରାମୀଣ ରାସ୍ତା, ମୋବାଇଲ ସଂଯୋଗୀକରଣ, ଇଂଟରନେଟ ସଂଯୋଗ, ବିଜୁଳି ଟ୍ୟାପ ପାଣି, ଏଲପିଜି ସଂଯୋଗ ପରି ସୁବିଧା ଉପଲବ୍ଧ ହୋଇପାରିଛି । ବିମାନ ଯାତ୍ରା ଲାଗି ବି ମିଜେରାମର ଲୋକେ ଉଡାନ ଯୋଜନା ପାଇପାରୁଛନ୍ତି । ଶୀଘ୍ର ରାଜ୍ୟରେ ହେଲିକପ୍ଟର ସେବା ମିଳିବାକୁ ଯାଉଛି । ମିଜୋରାମର ନିଭୃତାଂଚଳକୁ ଯୋଗାଯୋଗ ଲାଗି ବାଟ ଫିଟିପାରିବ ।

ବନ୍ଧୁଗଣ,

ଉତର-ପୂର୍ବ ଅର୍ଥନୈତିକ କରିଡର ସମେତ ଆକ୍ଟ ଇଷ୍ଟ ଯୋଜନା ଲାଗି ମିଜୋରାମ ଏକ ପ୍ରମୁଖ ଭୂମିକା ନିଭାଉଛି । କଳାଦାନ ମଲ୍ଟିମୋଡାଲ ଟ୍ରାନଜିଟ ଟ୍ରାନ୍ସପୋର୍ଟ ପ୍ରକଳ୍ପ, ସାଇରଙ୍ଗ ମାଓବୁଚୁହା ରେଲୱେ ଲାଇନ ପାଇଁ ଦକ୍ଷିଣ-ପୂର୍ବ ଏସିଆ ଦେଇ ବଙ୍ଗୋପସାଗରକୁ ମିଜୋରାମ ଯୋଡି ହୋଇପାରିବ । ସାରା ଉତର-ପୂର୍ବ ଭାରତ ଓ ଦକ୍ଷିଣ-ପୂର୍ବ ଏସିଆ ବାଣିଜ୍ୟ ଓ ପରିବହନ କ୍ଷେତ୍ରରେ ବାଣିଜ୍ୟ ଓ ପର୍ଯ୍ୟଟନ ବିକଶିତ ହୋଇପାରିବ ।

ବନ୍ଧୁଗଣ,

ପ୍ରତିଭାଦୀପ୍ତ ଯୁବକମାନଙ୍କର ରାଜ୍ୟ ହେଉଛି ମିଜୋରାମ । ସେମାନଙ୍କୁ ସଶକ୍ତ କରିବା ଆମ କାମ । ଏଗାରଟି ଏକଲବ୍ୟ ବିଦ୍ୟାଳୟ ଆମ ସରକାର ପ୍ରତିଷ୍ଠା କରିଛନ୍ତି । ଅ୍ଧମ ଛଅଟି ଏପରି ସ୍କୁଲ ନିର୍ମାଣ କରିବାକୁ ଆମର ଉଦ୍ୟମ ରହିଛି । ବିଭିନ୍ନ ଷ୍ଟାର୍ଟ ଅପ ଲାଗି ଉତର-ପୂର୍ବ ରାଜ୍ୟ ଏବେ ଏକ ପ୍ରମୁଖ କେନ୍ଦ୍ର ଭାବରେ ଗଢି ଉଠିବାକୁ ଯାଉଛି । ଏହି ଅଂଚଳରେ ୪,୫୦୦ ଷ୍ଟାର୍ଟ ଅପ ସମେତ ୨୫ଟି ଇନକ୍ୟୁବେଟର କାମ କରୁଥିବା ଜାଣି ମୁଁ ଖୁସି ହେଲି । ଯୁବ ପିଢି ଏଥିରେ ସାମିଲ ହୋଇ ରାଜ୍ୟକୁ ଅଗ୍ରସର କରିପାରିଛନ୍ତି ।

ବନ୍ଧୁଗଣ,

 ବୈଶ୍ୱିକ କ୍ରୀଡା ଲାଗି ଆମ ଦେଶ ଏକ ପ୍ରମୁଖ କେନ୍ଦ୍ରରେ ପରିଣତ ହେବାକୁ ଯାଉଛି । ଏଥିପାଇଁ ଦେଶରେ ଅର୍ଥନୈତିକ ସୁଯୋଗ ସୃଷ୍ଟି ହେବ । କ୍ରୀଡା ବିଶେଷକରି ଫୁଟବଲ ଓ ଅନ୍ୟାନ୍ୟ ଖେଳ ଲାଗି ମିଜୋରାମର ଏକ ଅଦଭୂତ ପରମ୍ପରା ରହିଛି । ଅତୀତରେ ଏସବୁ ଖେଳର ଚାମ୍ପିଆନ ସୃଷ୍ଟି ହୋଇଛନ୍ତି । ଆମ କ୍ରୀଡା ଯୋଜନାଗୁଡିକ ବି ମିଜୋରାମକୁ ଲାଭ ଦେଉଛି । ଖେଲୋ ଇଣ୍ଡିଆ ଯୋଜନା ଅଧୀନରେ ଏହି ରାଜ୍ୟରେ ଅନେକ ଆଧୁନିକ କ୍ରୀଡା ଭିତିଭୂମି ଆମେ ତିଆରି କରୁଛୁ । ନିକଟରେ ଜାତୀୟ କ୍ରୀଡା ଯୋଜନା, ଖେଲୋ ଇଣ୍ଡିଆ ଖେଲୋ ନୀତି ପରି କିଛି ଯୋଜନା ଆମ ସରକାର ପ୍ରଣୟନ କରିଛନ୍ତି ଯାହା ରାଜ୍ୟର ଯୁବବର୍ଗଙ୍କୁ କାମ ଦେବ ।

ବନ୍ଧୁଗଣ,

ଦେଶ କିମ୍ବା ବାହାରେ ଏହି ସୁନ୍ଦର ଉତର-ପୂର୍ବ ରାଜ୍ୟର ଆମ୍ବାସଡର ହେବାରେ ମୋର ଅପାର ଆନନ୍ଦ ରହିଛି । ନିକଟରେ ଦିଲ୍ଲୀର ଅଷ୍ଟଲକ୍ଷ୍ମୀ ଉତ୍ସବରେ ଯୋଗ ଦେବାକୁ ମୋତେ ସୁଯୋଗ ମିଳିଥିଲା । ହସ୍ତତନ୍ତ, ହସ୍ତଶିଳ୍ପ, ଜିଆଇ ଟ୍ୟାଗଯୁକ୍ତ ସାମଗ୍ରୀ, ଉତର-ପୂର୍ବ ରାଜ୍ୟର ପର୍ଯ୍ୟଟନ ସମ୍ବନ୍ଧିତ ଜିନିଷ ସମ୍ପର୍କରେ ଏହି ସ୍ଥାନରେ ପ୍ରଦର୍ଶନୀ କରାଯାଇଥିଲା । ରାଇଜିଂ ନର୍ଥ ଇଷ୍ଟ ସମିଟରେ ଉତର-ପୂର୍ବ ରାଜ୍ୟର ବିଭବତା ସମ୍ପର୍କରେ ମୁଁ ପୁଞ୍ଜି ନିବେଶକାରୀଙ୍କୁ ଉତ୍ସାହିତ କରିଥିଲି । ଏହି ସମିଟରେ ଅନେକ ଯୋଜନା ଓ ପ୍ରକଳ୍ପକୁ ରୂପାୟନ କରିବା ପାଇଁ ସୁଯୋଗ ରହିଥିଲା । ଯେବେ ମୁଁ ଲୋକାଲ ଫର ଭୋକାଲ କଥା କହିଥିଲି ସେବେ ଉତର-ପୂର୍ବ କାରିଗର ଓ ଚାଷୀଙ୍କ ଲାଗି ବେଶ ସୁହାଇଥିଲା । ମିଜୋରାମର ବାଉଁଶ ଶିଳ୍ପ, ଅଦା, ହଳଦୀ ଓ କଦଳୀ ଭଲ ଭାବରେ ପରିଚିତ ।

ବନ୍ଧୁଗଣ,

ଇଜ ଅଫ ଲିଭିଙ୍ଗ ଓ ଇଜ ଅଫ ଡୁଇଂ ବିଜିନେସକୁ ଉତ୍ସାହିତ କରିବା ଲାଗି ଆମେ କ୍ରମାଗତ ଭାବରେ ଉଦ୍ୟମ କରିଆସୁଛୁ । ନିକଟରେ ଜିଏସଟି ନେଇ ସଂସ୍କାର ବି ଅଣାଯାଇଛି । ଏହା ସୂଚାଉଛି ଯେ ଅନେକ ସାମଗ୍ରୀ ଉପରୁ ଜିଏସଟି ଶୁଳ୍କ ହ୍ରାସ ପାଇବା ପରେ ବହୁ ପରିବାର ଏହାର ସୁଫଳ ପାଉଛନ୍ତି । ୨୦୧୪ ପୂର୍ବରୁ ପ୍ରତିଦିନ ବ୍ୟବହାର କରାଯାଉଥିବା ଟୁଥପେଷ୍ଟ, ସାବୁନ ଓ ତେଲ ଉପରେ ୨୭ ପ୍ରତିଶତ ଟ୍ୟାକ୍ସ ଲାଗୁଥିଲା । କିନ୍ତୁ ଏବେ ତାହା ମାତ୍ର ୫ ପ୍ରତିଶତ ଜିଏସଟିକୁ ଖସିଛି । କଂଗ୍ରେସ ଶାସନ ସମୟରେ ଔଷଧ, ପରୀକ୍ଷା ସାମଗ୍ରୀ, ଇନସ୍ୟୁରାନ୍ସ ଯୋଜନାଗୁଡିକରେ ଅଧିକା ଟ୍ୟାକ୍ସ ଲାଗୁଥିଲା । ଫଳରେ ସ୍ୱାସ୍ଥ୍ୟ ଚିକିତ୍ସା ଓ ଇନସ୍ୟୁରାନ୍ସ କରିବା ସାଧାରଣ ଲୋକଙ୍କ ଲାଗି ଦୁଷ୍କର ହୋଇପଡୁଥିଲା । କିନ୍ତୁ ଏସବୁ ଆଜି ସହଜସାଧ୍ୟ ହୋଇଛି । ନୂଆ ଜିଏସଟି ଫଳରେ କ୍ୟାନସର ଔଷଧ ଏବେ ଶସ୍ତା ହୋଇଛି । ୨୨ ସେପ୍ଟେମ୍ବର ପରେ ସିମେଂଟ ଓ ଅନ୍ୟାନ୍ୟ ନିର୍ମାଣ ସାମଗ୍ରୀ ବି ଶସ୍ତା ହେବାର ରହିଛି । କାର ଓ ସ୍କୁଟର ତିଆରି କରୁଥିବା ବିଭିନ୍ନ କମ୍ପାନୀ ଏବେ ଜିନିଷ ଶସ୍ତା କରିଦେଲେଣି । ମୁଁ ସୁନିଶ୍ଚିତ ଯେ ସାରା ଦେଶରେ ଏବେ ଉତ୍ସବର ମାହୋଲ ଆହୁରି ଚମକିବ ।

ବନ୍ଧୁଗଣ,

ନୂଆ ଜିଏସଟି ସଂସ୍କାର ଫଳରେ ହୋଟେଲ ରହଣି ଶୁଳ୍କ ବି ହ୍ରାସ ପାଇଛି । ସଂସ୍କାର ଫଳରେ ଏହା ଏବେ ମାତ୍ର ୫ ପ୍ରତିଶତକୁ ଖସିଛି । ବିଭିନ୍ନସ୍ଥାନ ପରିଭ୍ରମଣ କରିବା, ହୋଟେଲ ରହଣି, ଖାଇବା ପିଇବା ଏବେ ପ୍ରାୟ ଶସ୍ତା ହେବ । ଫଳରେ ଦେଶର ବିଭିନ୍ନସ୍ଥାନ ବୁଲିବା, ରହିବା ଓ ଖାଇବା ବି ଶସ୍ତା ହେବ । ପର୍ଯ୍ୟଟନ କ୍ଷେତ୍ରରେ ଉତର-ପୂର୍ବ ଅଂଚଳ ଏଥିରେ ବହୁ ଲାଭାନ୍ୱିତ ହେବେ ।

ବନ୍ଧୁଗଣ,

୨୦୨୫-୨୬ର ପ୍ରଥମ କ୍ୱାର୍ଟରରେ ଆମ ଅର୍ଥନୀତିର ୭.୮ ପ୍ରତିଶତ ଅଭିବୃଦ୍ଧି ହୋଇଛି । ଏହା ସୂଚାଉଛି ଯେ, ସାରା ବିଶ୍ୱରେ ଭାରତବର୍ଷର ଦ୍ରୁତ ଆର୍ଥନୀତିକ ଅଭିବୃଦ୍ଧି ଘଟିଛି । ମେକ ଇନ ଇଣ୍ଡିଆ ଓ ରପ୍ତାନୀ କ୍ଷେତ୍ରରେ ବି ଭାରତବର୍ଷର ଅଭିବୃଦ୍ଧି ହୋଇପାରିଛି । ଆତଙ୍କବାଦକୁ ପ୍ରୋତ୍ସାହନ ଦେଉଥିବା ଆତଙ୍କୀମାନଙ୍କ ଅପେରସନ ସିନ୍ଦୂରରେ ଆମ ସୈନିକ କିଭଳି ପ୍ରତିହତ କଲେ ତାହା ଆପଣମାନଙ୍କୁ ଅବଗତ । ସାରା ଦେଶ ଆମ ସୈନିକଙ୍କ ଲାଗି ଏବେ ଗର୍ବିତ । ଏହି ଅପରେସନ ବେଳେ ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ଆମ ଯୁଦ୍ଧାସ୍ତ୍ର ଭଲ ଭାବରେ କାମ ଦେଲା । ଆମ ନିରାପତା ଲାଗି ଅର୍ଥନୀତିର ବିକାଶ ଓ ମାନୁଫାକ୍‌ଚରିଂ କ୍ଷେତ୍ରରେ ଉନ୍ନତି ଆବଶ୍ୟକ ।

ବନ୍ଧୁଗଣ,

ଆମ ସରକାର ପ୍ରତିଟି ନାଗରିକ, ପରିବାର ଓ ଅଂଚଳର ବିକାଶ ଲାଗି ପ୍ରତିବଦ୍ଧ । ଆମ ଲୋକଙ୍କ ସଶକ୍ତିକରଣ ଦ୍ୱାରା ହିଁ ଆମେ ବିକଶିତ ଦେଶ ଭାବରେ ଛିଡା ହୋଇପାରିବା । ଏହି ଯାତ୍ରାରେ ମୁଁ ଆଶା କରୁଛି ଯେ, ମିଜୋରାମର ଲୋକେ ସହଯୋଗ କରିବେ । ଆଉଥରେ ଆପଣମାନଙ୍କୁ ଧନ୍ୟବାଦ ଜ୍ଞାପନ କରୁଛି ଓ ଭାରତର ରେଲୱେ ମାନଚିତ୍ରରେ ଆଇଜଲ ସ୍ଥାନିତ ହେବାକୁ ସ୍ୱାଗତ କରୁଛି । ଆଜି ଖରାପ ପାଗ ପାଇଁ ମୁଁ ଆଇଜଲ ଯାଇପାରିଲିନି । କିନ୍ତୁ ଖୁବଶୀଘ୍ର ଆମେ ସାକ୍ଷାତ ହେବା । ଧନ୍ୟବାଦ ।

PBD