وزیر اعظم ڈاکٹر نوین چندر رام غلام جی،

دونوں ممالک کے مندوبین

میڈیا کے دوستو،

نمسکار۔

یہ میرے لیے فخر کی بات ہے کہ مجھے اپنے پارلیمانی حلقے میں آپ کو خوش آمدید کہنے کا موقع مل رہا ہے۔ کاشی کی سر زمین قدیم زمانے سے ہندوستان کی تہذیب اور ثقافتی روح کی علامت رہی ہے۔

ہماری ثقافت اور روایات صدیوں پہلے ہندوستان سے ماریشس پہنچی، اور وہاں کی زندگی کے دھارے میں بس گئی۔ کاشی میں ماں گنگا کے بلاتعطل بہاؤ کی طرح ہندوستانی ثقافت کا مسلسل بہاؤ ماریشس کو مالا مال کر رہا ہے۔ اور آج، جب ہم کاشی میں ماریشس کے دوستوں کا استقبال کر رہے ہیں، یہ محض ایک رسمی نہیں ہے، بلکہ ایک روحانی ملاقات ہے۔ اس لیے میں فخر سے کہتا ہوں کہ ہندوستان اور ماریشس صرف شراکت دار نہیں ہیں بلکہ ایک خاندان ہیں۔

دوستو،

ماریشس ہندوستان کی ‘پڑوسی پہلے’ پالیسی اور ‘مہاساگر’ نظریہ  کا ایک اہم ستون ہے۔ مارچ میں مجھے ماریشس کے قومی دن کی تقریبات میں شرکت کا شرف حاصل ہوا۔ اس وقت ہم نے اپنے تعلقات کو ‘وسیع اسٹریٹیجک شراکت داری’ کا درجہ دیا تھا۔ آج ہم نے دو طرفہ تعاون کے تمام پہلوؤں کا تفصیل سے جائزہ لیا۔ ہم نے علاقائی اور عالمی مسائل پر بھی خیالات کا اظہار کیا۔

دوستو،

میں چاگوس معاہدے کے اختتام پر وزیر اعظم رام غلام جی اور ماریشس کے لوگوں کو تہہ دل سے مبارکباد پیش کرتا ہوں۔ یہ ماریشس کی خودمختاری کے لیے ایک تاریخی کامیابی ہے۔ ہندوستان نے ہمیشہ غیر آباد کاری اور ماریشس کی خودمختاری کو مکمل تسلیم کرنے کی حمایت کی ہے۔ اور اس میں ہندوستان ماریشس کے ساتھ مضبوطی سے کھڑا ہے۔

دوستو،

ماریشس کی ترقی میں ہندوستان کو ایک قابل اعتماد اور بنیادی شراکت دار ہونے پر فخر ہے۔ آج ہم نے ماریشس کی ضروریات اور ترجیحات کو مدنظر رکھتے ہوئے ایک خصوصی اقتصادی پیکیج کا فیصلہ کیا ہے۔

اس سے بنیادی ڈھانچہ مضبوط ہوگا، روزگار کے نئے مواقع پیدا ہوں گے اور صحت کی سہولیات کو تقویت ملے گی۔

ہندوستان سے باہر پہلا جن اوشدھی کیندر اب ماریشس میں قائم کیا گیا ہے۔ آج، ہم نے فیصلہ کیا ہے کہ ہندوستان ماریشس میں آیوش سینٹر آف ایکسی لینس، 500 بستروں پر مشتمل سر سیووساگر رام غلام نیشنل اسپتال، اور ویٹرنری اسکول اور جانوروں کے اسپتال کی تعمیر میں تعاون کرے گا۔

ہم چاگوس میرین پروٹیکٹڈ ایریا جیسے منصوبوں کو بھی آگے بڑھائیں گے۔ ایس ایس آر انٹرنیشنل ایئرپورٹ کا اے ٹی سی ٹاور؛ اور شاہراہوں اور رنگ روڈز کی توسیع کی جائے گی۔

یہ پیکج کوئی امداد نہیں ہے۔ یہ ہمارے مشترکہ مستقبل میں سرمایہ کاری ہے۔

دوستو،

پچھلے سال، یو پی آئی اور  روپے کارڈ ماریشس میں متعارف کرائے گئے تھے۔ اب ہم مقامی کرنسی میں تجارت کو فعال کرنے کے لیے کام کریں گے۔

توانائی کا تحفظ ہماری شراکت داری کا ایک اہم ستون ہے۔ ہندوستان اپنی توانائی کی منتقلی میں ماریشس کی حمایت کر رہا ہے۔ ماریشس کو 100 الیکٹرک بسیں فراہم کی جارہی ہیں، جن میں سے 10 پہلے ہی پہنچ چکی ہیں۔ توانائی کے شعبے میں جامع شراکت داری کا معاہدہ اسے مزید تقویت دے گا۔ ہم نے ‘تمارنڈ فالس’ میں 17.5 میگاواٹ کے  سولر پاور پلانٹ کی تعمیر میں تعاون کرنے کا فیصلہ کیا ہے۔

ہم ایک طویل عرصے سے انسانی وسائل کی ترقی میں تعاون کر رہے ہیں۔ اب تک 5000 سے زیادہ ماریشس کے شہریوں نے ہندوستان میں تربیت حاصل کی ہے۔ میرے مارچ کے دورے کے دوران 500 سرکاری ملازمین کو تربیت دینے کا فیصلہ کیا گیا۔ مجھے بہت خوشی ہے کہ اس کا پہلا بیچ اس وقت مسوری میں زیر تربیت ہے۔

آج ہم نے فیصلہ کیا کہ ماریشس میں سائنس اور ٹیکنالوجی کا ایک نیا ڈائریکٹوریٹ قائم کیا جائے گا۔ اور، جلد ہی ہم ماریشس میں مشن کرم یوگی کے تربیتی ماڈیول بھی شروع کریں گے۔

ہندوستان کے آئی آئی ٹی مدراس اور انڈین انسٹی ٹیوٹ آف پلانٹیشن مینجمنٹ نے ماریشس یونیورسٹی کے ساتھ معاہدوں پر دستخط کیے ہیں۔ یہ معاہدے تحقیق، تعلیم اور اختراع میں باہمی شراکت کو نئی بلندیوں تک لے جائیں گے۔

دوستو،

ایک آزاد، کھلا، محفوظ، مستحکم اور خوشحال بحر ہند ہماری مشترکہ ترجیح ہے۔ اس تناظر میں، ہندوستان ماریشس کے خصوصی اقتصادی زون کی سیکورٹی اور سمندری صلاحیت کو مضبوط بنانے کے لیے پوری طرح پرعزم ہے۔

ہندوستان ہمیشہ بحر ہند کے خطے میں پہلے جواب دہندہ اور خالص سیکورٹی فراہم کنندہ کے طور پر کھڑا رہا ہے۔

ماریشس کے کوسٹ گارڈ کے جہاز کی ہندوستان میں مرمت کی جا رہی ہے۔ ان کے 120 افسران کو بھی بھارت میں تربیت دی جا رہی ہے۔

آج ہائیڈروگرافی کے شعبے میں تعاون پر ایک معاہدے پر دستخط کیے گئے ہیں۔ اور، اگلے 5 سالوں کے لیے، ہم خصوصی اقتصادی زون، نیویگیشن چارٹس، اور ہائیڈرو گرافک ڈیٹا کے مشترکہ سروے میں تعاون کریں گے۔

عزت مآب وزیرا عظم،

ہندوستان اور ماریشس دو قومیں ہیں، لیکن ہمارے خواب اور تقدیر ایک ہیں۔

اس سال ہم سر شیو ساگر رام غلام کی 125 ویں یوم پیدائش منا رہے ہیں۔ وہ نہ صرف ماریشس کے بابائے قوم تھے بلکہ ہندوستان اور ماریشس کے درمیان اٹوٹ پل کے بانی بھی تھے۔ ان کی یوم پیدائش ہمیں اپنے تعلقات کو نئی بلندیوں تک لے جانے کی ترغیب دیتی رہے گی۔

میں ایک بار پھر وفد کو دل سے خوش آمدید کہتا ہوں۔ آپ سب کا بہت بہت شکریہ۔

*****

ش ح-ع و۔ ف ر

UR No-5886