ഭാരത് മാതാ കീ ജയ്!

ഭാരത് മാതാ കീ ജയ്!

ഭാരത് മാതാ കീ ജയ്!

നിങ്ങളെല്ലാം ഇന്ന് എന്തൊരു അന്തരീക്ഷമാണ് സൃഷ്ടിച്ചത്!

ഗുജറാത്ത് ഗവർണർ ശ്രീ ആചാര്യ ദേവവ്രത് ജി, ജനപ്രിയ മുഖ്യമന്ത്രി ഭൂപേന്ദ്രഭായ് പട്ടേൽ, കേന്ദ്ര മന്ത്രിസഭയിലെ എന്റെ സഹപ്രവർത്തകൻ സി.ആർ. പാട്ടീൽ, ഗുജറാത്ത് ​ഗവൺമെന്റിലെ എല്ലാ മന്ത്രിമാരും, അഹമ്മദാബാദ് മേയർ പ്രതിഭാ ജി, മറ്റ് പൊതു പ്രതിനിധികൾ, അഹമ്മദാബാദിലെ എന്റെ സഹോദരീ സഹോദരന്മാരേ!

ഇന്ന്, നിങ്ങളെല്ലാവരും ശരിക്കും ഒരു അന്തരീക്ഷം സൃഷ്ടിച്ചു. ഈ ലക്ഷക്കണക്കിന് ആളുകളുടെ സ്നേഹവും അനുഗ്രഹവും ലഭിക്കാൻ കഴിഞ്ഞതിൽ ഞാൻ എത്ര ഭാഗ്യവാനാണെന്ന് ഞാൻ പലപ്പോഴും കരുതുന്നു. ഞാൻ നിങ്ങളോട് എത്ര നന്ദി പറഞ്ഞാലും അത് ഒരിക്കലും മതിയാകില്ല. നോക്കൂ, അവിടെ ഒരു ചെറിയ നരേന്ദ്രൻ നിൽക്കുന്നു!

സുഹൃത്തുക്കളേ,

നിലവിൽ, രാജ്യമെമ്പാടും ഗണേശോത്സവത്തിനായി വിസ്മയകരമായ ഒരു ആവേശമുണ്ട്. ഭഗവാൻ ഗണപതി ബാപ്പയുടെ അനുഗ്രഹത്താൽ, ഇന്ന് ഗുജറാത്തിന്റെ വികസനവുമായി ബന്ധപ്പെട്ട നിരവധി പദ്ധതികളുടെ ശുഭകരമായ തുടക്കം കുറിക്കുന്നു. ഇന്ന് നിങ്ങൾക്ക് നിരവധി വികസന പദ്ധതികൾ സമർപ്പിക്കാൻ എനിക്ക് അവസരം ലഭിച്ചത് എന്റെ ഭാഗ്യമാണ്. ഈ വികസന പ്രവർത്തനങ്ങൾക്ക് നിങ്ങളെയെല്ലാം ഞാൻ ഹൃദയപൂർവ്വം അഭിനന്ദിക്കുന്നു.

സുഹൃത്തുക്കളേ,

ഈ മൺസൂൺ കാലത്ത്, ഗുജറാത്തിന്റെ പല ഭാഗങ്ങളിലും കനത്ത മഴ പെയ്യുന്നു. രാജ്യത്തുടനീളം, മേഘവിസ്ഫോടനങ്ങൾ ഒന്നിനുപുറകെ ഒന്നായി സംഭവിക്കുന്നു, അത്തരം നാശനഷ്ടങ്ങളുടെ ദൃശ്യങ്ങൾ ടിവിയിൽ കാണുമ്പോൾ, നമുക്ക് സ്വയം നിയന്ത്രിക്കാൻ പോലും പ്രയാസമാണ്. ദുരിതബാധിതരായ എല്ലാ കുടുംബങ്ങൾക്കും ഞാൻ എന്റെ അനുശോചനം അറിയിക്കുന്നു. പ്രകൃതിയുടെ ഈ കോപം മുഴുവൻ മനുഷ്യരാശിക്കും, മുഴുവൻ ലോകത്തിനും, നമ്മുടെ മുഴുവൻ രാജ്യത്തിനും ഒരു വെല്ലുവിളിയായി മാറിയിരിക്കുന്നു. കേന്ദ്ര ​ഗവൺമെന്റ്, എല്ലാ സംസ്ഥാന ​ഗവൺമെന്റുകളുമായും ചേർന്ന്, ദുരിതാശ്വാസ, രക്ഷാ പ്രവർത്തനങ്ങളിൽ പൂർണ്ണമായും ഏർപ്പെട്ടിരിക്കുന്നു.

സുഹൃത്തുക്കളേ,

ഗുജറാത്തിന്റെ ഈ ഭൂമി രണ്ട് മോഹനന്മാരുടെ നാടാണ്. ഒരാൾ സുദർശന ചക്ര-ധാരി മോഹൻ, നമ്മുടെ ദ്വാരകാധിപതി ശ്രീകൃഷ്ണൻ, മറ്റൊരാൾ ചർക്ക-ധാരി മോഹൻ, സബർമതിയിലെ സന്യാസി പൂജ്യ ബാപ്പു. ഇന്ന്, അവർ രണ്ടുപേരും കാണിച്ച പാത പിന്തുടർന്ന് ഭാരതം കൂടുതൽ ശക്തമായി വളരുന്നു. സുദർശന ചക്രധാരി മോഹൻ നമ്മെ രാഷ്ട്രത്തെയും സമൂഹത്തെയും എങ്ങനെ സംരക്ഷിക്കണമെന്ന് പഠിപ്പിച്ചു. നീതിയുടെയും സുരക്ഷയുടെയും ഒരു കവചമാക്കി അദ്ദേഹം സുദർശൻ ചക്രത്തെ മാറ്റി, അത് 'പാതാളത്തിൽ' പോലും ശത്രുവിനെ വേട്ടയാടുകയും ശിക്ഷ നൽകുകയും ചെയ്യുന്നു. ആ ചൈതന്യം ഇന്ന് ഭാരതത്തിന്റെ തീരുമാനങ്ങളിൽ പ്രതിഫലിക്കുന്നു - നമ്മുടെ രാഷ്ട്രം മാത്രമല്ല, ലോകം മുഴുവൻ അനുഭവിച്ചറിഞ്ഞത്. നമ്മുടെ ഗുജറാത്തും അഹമ്മദാബാദും കഴിഞ്ഞ കാലത്ത് ദുഷ്‌കരമായ ദിവസങ്ങൾക്ക് സാക്ഷ്യം വഹിച്ചു. പട്ടം പറത്തൽ സമയത്ത് കലാപകാരികൾ ജീവൻ പോലും എടുക്കുമായിരുന്നു; ആളുകൾ കർഫ്യൂവിൽ ജീവിക്കേണ്ടി വന്നപ്പോൾ; ഉത്സവങ്ങൾ നടക്കുമ്പോൾ അഹമ്മദാബാദിന്റെ മണ്ണിൽ രക്തക്കറ പുരളുമായിരുന്നു. ഡൽഹിയിൽ ഇരിക്കുന്ന കോൺഗ്രസ് ​ഗവൺമെന്റ് ഒന്നും ചെയ്തില്ലെങ്കിലും ഈ ആക്രമണകാരികൾ നമ്മുടെ രക്തം ചൊരിഞ്ഞു. എന്നാൽ ഇന്ന്, തീവ്രവാദികളെയും അവരുടെ യജമാനന്മാരെയും അവർ എവിടെ ഒളിച്ചാലും നമ്മൾ വെറുതെ വിടുന്നില്ല. പഹൽഗാമിനോട് ഭാരതം എങ്ങനെ പ്രതികാരം ചെയ്തുവെന്ന് ലോകം കണ്ടു. വെറും 22 മിനിറ്റിനുള്ളിൽ എല്ലാം ഇല്ലാതാക്കി. നൂറുകണക്കിന് കിലോമീറ്റർ അകലെ മുൻകൂട്ടി നിശ്ചയിച്ച ലക്ഷ്യങ്ങൾ ആക്രമിച്ചുകൊണ്ട്, നൂറുകണക്കിന് കിലോമീറ്റർ അകലെയുള്ള ഭീകരതയുടെ നാഡീ കേന്ദ്രത്തെ ഞങ്ങൾ ആക്രമിച്ചു. നമ്മുടെ സായുധ സേനയുടെ 'ശൗര്യ'ത്തിന്റെയും (ധൈര്യം) സുദർശൻ ചക്രധാരി മോഹന്റെ ഭാരതത്തിന്റെ 'ഇച്ഛാശക്തി'യുടെയും (ഇച്ഛാശക്തി) പ്രതീകമായി ഓപ്പറേഷൻ സിന്ദൂർ മാറി.

സുഹൃത്തുക്കളേ,

ചർക്ക-ധാരി മോഹൻ, നമ്മുടെ പൂജ്യ ബാപ്പു, 'സ്വദേശി' (സ്വാശ്രയത്വം) വഴി ഭാരതത്തിന് അഭിവൃദ്ധിയുടെ പാത കാണിച്ചുതന്നു. ഇവിടെ നമുക്ക് സബർമതി ആശ്രമമുണ്ട്. ബാപ്പുവിന്റെ പേരിൽ പതിറ്റാണ്ടുകളായി അധികാരം ആസ്വദിച്ച പാർട്ടി അദ്ദേഹത്തിന്റെ ആത്മാവിനെ തന്നെ ചവിട്ടിമെതിച്ചതിന് ഈ ആശ്രമം സാക്ഷിയായി നിലകൊള്ളുന്നു. ബാപ്പുവിന്റെ 'സ്വദേശി' എന്ന മന്ത്രം അവർ എന്താണ് ചെയ്തത്? വർഷങ്ങളായി, ഗാന്ധിയുടെ പേരിൽ രാഷ്ട്രീയം നടത്തുന്നവർ - അവരുടെ വായിൽ നിന്ന് 'സ്വച്ഛത' (ശുചിത്വം) സംബന്ധിച്ചോ 'സ്വദേശി'യെക്കുറിച്ചോ ഒരു വാക്ക് പോലും നിങ്ങൾ കേട്ടിട്ടുണ്ടാകില്ല. അവരുടെ ദർശനത്തിന് എന്ത് സംഭവിച്ചുവെന്ന് രാജ്യത്തിന് മനസ്സിലാകുന്നില്ല. അറുപത് മുതൽ അറുപത്തിയഞ്ച് വർഷം വരെ, കോൺഗ്രസ് ഭാരതത്തെ ഭരിച്ചു, മറ്റ് രാജ്യങ്ങളെ ആശ്രയിച്ചു - അങ്ങനെ അവർക്ക് ഇറക്കുമതിയുമായി കളിക്കാനും ​ഗവൺമെന്റിലിരിക്കുമ്പോൾ അഴിമതികളിൽ ഏർപ്പെടാനും കഴിയും. എന്നാൽ ഇന്ന്, ഭാരതം 'ആത്മനിർഭരത' (സ്വാശ്രയത്വം) ഒരു 'വികസിത ഭാരതം' (വികസിത ഇന്ത്യ) കെട്ടിപ്പടുക്കുന്നതിനുള്ള അടിത്തറയാക്കി മാറ്റി. നമ്മുടെ കർഷകരുടെയും മത്സ്യത്തൊഴിലാളികളുടെയും കന്നുകാലി വളർത്തുന്നവരുടെയും സംരംഭകരുടെയും ശക്തിയാൽ, ഭാരതം വികസനത്തിന്റെ പാതയിൽ അതിവേഗം മുന്നേറുകയാണ് - സ്വാശ്രയത്വത്തിന്റെ പാതയിൽ. ഗുജറാത്തിൽ നമുക്ക് എത്ര കന്നുകാലി വളർത്തുന്നവരുണ്ടെന്ന് നോക്കൂ, നമ്മുടെ ക്ഷീരമേഖലയുടെ ശക്തി കാണുക! ഏതാനും മണിക്കൂറുകൾക്ക് മുമ്പ്, ഞാൻ ഫിജിയുടെ പ്രധാനമന്ത്രിയെ കണ്ടു. അദ്ദേഹം വളരെ ബഹുമാനത്തോടെയും ആദരവോടെയും സംസാരിച്ചു, നമ്മുടേത് പോലെ തന്റെ ക്ഷീരമേഖലയും സഹകരണ പ്രസ്ഥാനവും വികസിപ്പിക്കാൻ ആഗ്രഹിക്കുന്നുവെന്ന് പറഞ്ഞു. സുഹൃത്തുക്കളേ, നമ്മുടെ ക്ഷീരമേഖലയെ ശക്തിപ്പെടുത്തിയത് നമ്മുടെ കന്നുകാലി വളർത്തുന്നവരാണ്, അവരിൽ, നമ്മുടെ സഹോദരിമാരാണ് ഏറ്റവും കൂടുതൽ സംഭാവന നൽകിയത്. നമ്മുടെ സഹോദരിമാർ അവരുടെ സമർപ്പണത്തിലൂടെ ക്ഷീരമേഖലയെ ശക്തവും സ്വാശ്രയവുമാക്കിയിട്ടുണ്ട്, ഇന്ന് ലോകമെമ്പാടും അതിന്റെ സ്തുതികൾ ആലപിക്കപ്പെടുന്നു.

എന്നാൽ സുഹൃത്തുക്കളേ,

ഇന്ന് ലോകമെമ്പാടുമുള്ള രാഷ്ട്രീയം സാമ്പത്തിക സ്വാർത്ഥതാൽപ്പര്യത്താൽ നയിക്കപ്പെടുന്നതും എല്ലാവരും സ്വന്തം അജണ്ട നിറവേറ്റുന്നതിൽ തിരക്കിലായിരിക്കുന്നതും നമുക്ക് വ്യക്തമായി കാണാൻ കഴിയും. അഹമ്മദാബാദിന്റെ നാട്ടിൽ നിന്ന്, എന്റെ ചെറുകിട സംരംഭകരോടും, കടയുടമകളായ എന്റെ സഹോദരീസഹോദരന്മാരോടും, എന്റെ കർഷക സഹോദരന്മാരോടും, എന്റെ കന്നുകാലി വളർത്തൽ സഹോദരീസഹോദരന്മാരോടും - ഗാന്ധിയുടെ മണ്ണിൽ നിന്ന് ഞാൻ ഇത് പറയുന്നു - എന്റെ രാജ്യത്തെ ചെറുകിട സംരംഭകർക്കും, കർഷകർക്കും, കന്നുകാലി വളർത്തൽക്കാർക്കും, നിങ്ങൾ ഓരോരുത്തർക്കും, ഞാൻ നിങ്ങൾക്ക് ആവർത്തിച്ച് ഉറപ്പ് നൽകുന്നു: മോദിക്ക്, നിങ്ങളുടെ താൽപ്പര്യങ്ങളാണ് പരമപ്രധാനം. ചെറുകിട സംരംഭകർക്കും, കർഷകർക്കും, കന്നുകാലി വളർത്തൽക്കാർക്കും ഒരു ദോഷവും എന്റെ ​ഗവൺമെന്റ് ഒരിക്കലും അനുവദിക്കില്ല. സമ്മർദ്ദം എത്ര വലുതായാലും, അത് സഹിക്കാനുള്ള നമ്മുടെ കഴിവ് ഞങ്ങൾ ശക്തിപ്പെടുത്തുന്നത് തുടരും.

സുഹൃത്തുക്കളേ,

ഇന്ന്, 'ആത്മനിർഭർ ഭാരത് അഭിയാൻ' (സ്വാശ്രയ ഇന്ത്യ കാമ്പെയ്ൻ) ഗുജറാത്തിൽ നിന്ന് വലിയ ഊർജ്ജം നേടുന്നു, ഇതിന് പിന്നിൽ രണ്ട് പതിറ്റാണ്ടുകളുടെ കഠിനാധ്വാനമുണ്ട്. ഇവിടെ മിക്കവാറും എല്ലാ ദിവസവും കർഫ്യൂ ഏർപ്പെടുത്തിയിരുന്ന ആ ദിവസങ്ങൾ ഇന്നത്തെ ഈ യുവതലമുറ കണ്ടിട്ടില്ല. വ്യവസായവും വ്യാപാരവും ദുഷ്കരമാക്കി, അസ്വസ്ഥതയുടെ അന്തരീക്ഷം നിലനിർത്തി. എന്നാൽ ഇന്ന്, അഹമ്മദാബാദ് ഇന്ത്യയിലെ ഏറ്റവും സുരക്ഷിതമായ നഗരങ്ങളിൽ ഒന്നാണ്, ഇത് നിങ്ങൾ എല്ലാവരും മുഖേനയാണ് നേടിയെടുത്തത്.

സുഹൃത്തുക്കളേ, 

ഗുജറാത്തിൽ സൃഷ്ടിച്ച സമാധാനത്തിന്റെയും സുരക്ഷയുടെയും അന്തരീക്ഷം നമുക്ക് ചുറ്റും നല്ല ഫലങ്ങൾ നൽകുന്നു. ഇന്ന്, ഗുജറാത്തിന്റെ മണ്ണിൽ എല്ലാത്തരം വ്യവസായങ്ങളും വികസിച്ചുകൊണ്ടിരിക്കുന്നു. നമ്മുടെ ഗുജറാത്ത് എങ്ങനെ ഒരു ഉൽ‌പാദന കേന്ദ്രമായി മാറിയെന്ന് കാണുന്നതിൽ മുഴുവൻ സംസ്ഥാനവും അഭിമാനിക്കുന്നു. പ്രത്യേക ഗുജറാത്തിനായി പ്രസ്ഥാനം നടന്നപ്പോൾ, പ്രത്യേകിച്ച് നിങ്ങളുടെ ഇടയിലുള്ള മൂത്ത സഹോദരീ സഹോദരന്മാരേ, നിങ്ങൾ അറിഞ്ഞിരിക്കണം, “നിങ്ങൾ എന്തിനാണ് ഗുജറാത്തിനെ വേർപെടുത്താൻ ആഗ്രഹിക്കുന്നത്? നിങ്ങൾ പട്ടിണി കിടന്ന് മരിക്കും. നിങ്ങൾക്ക് എന്താണുള്ളത്? ധാതുക്കളോ വറ്റാത്ത നദികളോ ഇല്ല. പത്ത് വർഷത്തിൽ ഏഴ് വർഷം വരൾച്ചയിൽ കടന്നുപോകുന്നു. ഖനികളില്ല, വ്യവസായങ്ങളില്ല, കൃഷിയില്ല. ഒരു വശത്ത് റാൻ ഉണ്ട്, മറുവശത്ത് പാകിസ്ഥാൻ ഉണ്ട് - നിങ്ങൾ എന്തു ചെയ്യും?” അവർ ഞങ്ങളെ പരിഹസിച്ചു, “ഉപ്പ് കൂടാതെ, നിങ്ങൾക്ക് ഒന്നുമില്ല.” എന്നാൽ സ്വന്തം കാലിൽ നിൽക്കാനുള്ള ഉത്തരവാദിത്തം ഗുജറാത്തിൽ വന്നപ്പോൾ, ഗുജറാത്തിലെ ജനങ്ങൾ പിന്മാറിയില്ല. ഗുജറാത്തിന് എന്താണുള്ളത് എന്ന് ഒരിക്കൽ ചോദിച്ചവരോട് ഇന്ന് - നമുക്ക് ഒരു വജ്രഖനി പോലും ഇല്ലായിരിക്കാം, പക്ഷേ ലോകത്തിലെ പത്തിൽ ഒമ്പത് വജ്രങ്ങളും ഇവിടെ ഗുജറാത്തിലാണ് സംസ്കരിച്ച് മിനുക്കുന്നത്.

സുഹൃത്തുക്കളേ,

കുറച്ച് മാസങ്ങൾക്ക് മുമ്പ് ഞാൻ ദാഹോദിൽ എത്തി. അവിടെയുള്ള റെയിൽവേ ഫാക്ടറിയിൽ ശക്തമായ ഇലക്ട്രിക് ലോക്കോമോട്ടീവ് എഞ്ചിനുകൾ നിർമ്മിക്കുന്നു. ഇന്ന്, ഗുജറാത്തിൽ നിർമ്മിച്ച മെട്രോ കോച്ചുകൾ മറ്റ് രാജ്യങ്ങളിലേക്ക് കയറ്റുമതി ചെയ്യുന്നു. ഇതിനുപുറമെ, മോട്ടോർ സൈക്കിളുകളായാലും കാറുകളായാലും, ഗുജറാത്ത് അവ വളരെയധികം ഉത്പാദിപ്പിക്കുന്നു. ഭാരതത്തിലെയും ലോകമെമ്പാടുമുള്ള വലിയ കമ്പനികൾ ഇവിടെ ഫാക്ടറികൾ സ്ഥാപിക്കുന്നു. ഗുജറാത്ത് ഇതിനകം തന്നെ വിമാനങ്ങളുടെ വ്യത്യസ്ത ഭാഗങ്ങൾ നിർമ്മിക്കുകയും കയറ്റുമതി ചെയ്യുകയും ചെയ്തു. ഇപ്പോൾ വഡോദരയിൽ ഗതാഗത വിമാനങ്ങൾ നിർമ്മിക്കുന്നതിനുള്ള പ്രവർത്തനങ്ങൾ ആരംഭിച്ചു. ഗുജറാത്തിൽ തന്നെ വിമാനങ്ങൾ നിർമ്മിക്കുന്നു - അത് നമുക്ക് അഭിമാനം നൽകുന്നില്ലേ? ഇപ്പോൾ ഗുജറാത്ത് ഇലക്ട്രിക് വാഹന നിർമ്മാണത്തിനുള്ള ഒരു പ്രധാന കേന്ദ്രമായി മാറുകയാണ്. നാളെ, 26 ന്, ഞാൻ ഹൻസൽപൂരിലേക്ക് പോകുന്നു, അവിടെ ഇലക്ട്രിക് വാഹന നിർമ്മാണവുമായി ബന്ധപ്പെട്ട ഒരു വലിയ സംരംഭം ആരംഭിക്കുന്നു. ഇന്ന്, സെമികണ്ടക്ടറുകൾ ഇല്ലാതെ എല്ലാ ആധുനിക ഇലക്ട്രോണിക് ഉപകരണങ്ങളും നിർമ്മിക്കാൻ കഴിയില്ല. സെമികണ്ടക്ടർ മേഖലയിലും ഗുജറാത്ത് ഇപ്പോൾ വലിയ പേര് സൃഷ്ടിക്കാൻ പോകുന്നു. തുണിത്തരങ്ങൾ, രത്നങ്ങൾ, ആഭരണങ്ങൾ എന്നിവ ഇതിനകം ഗുജറാത്തിന്റെ സ്വത്വമായി മാറിയിരിക്കുന്നു. മരുന്നുകളുടെയും വാക്സിനുകളുടെയും കാര്യത്തിൽ, ഇന്ത്യയുടെ മൊത്തം ഔഷധ ഉൽപ്പന്ന കയറ്റുമതിയുടെ മൂന്നിലൊന്ന് ഭാഗവും ഗുജറാത്തിലാണ്.

സുഹൃത്തുക്കളേ,

വ്യവസായമായാലും കൃഷിയായാലും ടൂറിസമായാലും മികച്ച കണക്റ്റിവിറ്റി വളരെ പ്രധാനമാണ്. കഴിഞ്ഞ 20-25 വർഷത്തിനിടയിൽ, ഗുജറാത്തിന്റെ കണക്റ്റിവിറ്റി പൂർണ്ണമായും രൂപാന്തരപ്പെട്ടു. ഇന്നും നിരവധി റോഡ്, റെയിൽ പദ്ധതികൾ ഇവിടെ ഉദ്ഘാടനം ചെയ്യുകയും തറക്കല്ലിടുകയും ചെയ്തിട്ടുണ്ട്. സർദാർ പട്ടേൽ റിംഗ് റോഡ് ഇപ്പോൾ കൂടുതൽ വീതികൂട്ടിക്കൊണ്ടിരിക്കുകയാണ്. ഇത് ആറ് വരി വീതിയുള്ള റോഡായി മാറുകയാണ്. നഗരത്തിലെ ഏറ്റവും തിരക്കേറിയ പ്രദേശങ്ങളിലെ ഗതാഗതക്കുരുക്ക് പ്രശ്നങ്ങൾ ഇത് കുറയ്ക്കും. അതുപോലെ, വിരാംഗാം-ഖുദാദ്-രാംപുര റോഡിന്റെ വീതി കൂട്ടൽ ഇവിടുത്തെ കർഷകർക്കും വ്യവസായങ്ങൾക്കും സൗകര്യം നൽകും. ഈ പുതിയ അണ്ടർപാസുകളും റെയിൽവേ ഓവർബ്രിഡ്ജുകളും നഗരത്തിന്റെ കണക്റ്റിവിറ്റി കൂടുതൽ മെച്ചപ്പെടുത്തും.

സുഹൃത്തുക്കളേ,

പഴയ ചുവന്ന ബസുകൾ മാത്രം ഓടുന്ന ഒരു കാലമുണ്ടായിരുന്നു. ആളുകൾ പറയുമായിരുന്നു - നിങ്ങൾക്ക് എവിടെ പോകണമെങ്കിലും, നിങ്ങൾ "ചുവപ്പ് ബസിൽ പോകുക". എന്നാൽ ഇന്ന്, ബിആർടിഎസ് 'ജൻമാർഗ്' (ബസ് റാപ്പിഡ് ട്രാൻസിറ്റ് സിസ്റ്റം കോറിഡോർ) ഉം എസി-ഇലക്ട്രിക് ബസുകളും പുതിയ സൗകര്യങ്ങൾ നൽകുന്നു. മെട്രോ റെയിൽ അതിവേഗം വികസിച്ചുകൊണ്ടിരിക്കുന്നു, ഇത് അഹമ്മദാബാദിലെ ജനങ്ങൾക്ക് യാത്രാ സൗകര്യം ഉറപ്പാക്കിയിട്ടുണ്ട്.

സുഹൃത്തുക്കളേ,

ഗുജറാത്തിലെ എല്ലാ നഗരങ്ങളിലും ഒരു വലിയ വ്യാവസായിക ഇടനാഴി ഉണ്ട്. എന്നാൽ 10 വർഷം മുമ്പ് വരെ, തുറമുഖങ്ങൾക്കും അത്തരം വ്യാവസായിക ക്ലസ്റ്ററുകൾക്കുമിടയിൽ നല്ല റെയിൽ കണക്റ്റിവിറ്റിയുടെ അഭാവമുണ്ടായിരുന്നു. 2014 ൽ നിങ്ങൾ എന്നെ ഡൽഹിയിലേക്ക് അയച്ചപ്പോൾ, ഗുജറാത്തിന്റെ ഈ പ്രശ്നം പരിഹരിക്കുന്നതിനുള്ള പ്രവർത്തനങ്ങൾ ഞാൻ ആരംഭിച്ചു. കഴിഞ്ഞ 11 വർഷത്തിനുള്ളിൽ, ഗുജറാത്തിൽ ഏകദേശം 3,000 കിലോമീറ്റർ പുതിയ റെയിൽവേ ട്രാക്കുകൾ സ്ഥാപിച്ചു. ഗുജറാത്തിലെ മുഴുവൻ റെയിൽവേ ശൃംഖലയും 100 ശതമാനം വൈദ്യുതീകരിച്ചു. ഗുജറാത്തിന് ഇന്ന് ലഭിച്ച റെയിൽവേ പദ്ധതികൾ കർഷകർക്കും വ്യവസായങ്ങൾക്കും തീർത്ഥാടകർക്കും ഒരുപോലെ പ്രയോജനപ്പെടും.

സുഹൃത്തുക്കളേ,

നഗരങ്ങളിൽ താമസിക്കുന്ന ദരിദ്രർക്ക് മാന്യമായ ജീവിതം നൽകാൻ ഞങ്ങളുടെ ​ഗവൺമെന്റ് പ്രതിജ്ഞാബദ്ധമാണ്. ഇതിന്റെ നേരിട്ടുള്ള തെളിവാണ് വിമാനത്താവളത്തിൽ നിന്ന് വരുമ്പോഴും പോകുമ്പോഴും കാണുന്ന  ഞങ്ങളുടെ രേമാപീർ നോ ടെക്രോ, നമ്മുടെ രേമാപീറിന്റ തില. പൂജ്യ ബാപ്പു എപ്പോഴും ദരിദ്രരുടെ അന്തസ്സിന് ഊന്നൽ നൽകിയിരുന്നു. ഇന്ന്, സബർമതി ആശ്രമത്തിന്റെ പ്രവേശന കവാടത്തിൽ ദരിദ്രർക്കായി നിർമ്മിച്ച പുതിയ വീടുകൾ ഇതിന് ഒരു ജീവിക്കുന്ന ഉദാഹരണമാണ്. ദരിദ്രർക്ക് 1,500 നല്ല വീടുകൾ നൽകുക എന്നാൽ എണ്ണമറ്റ പുതിയ സ്വപ്നങ്ങൾക്ക് അടിത്തറയിടുക എന്നാണ്. ഈ വീടുകളിൽ താമസിക്കുന്നവരുടെ മുഖങ്ങളിലെ സന്തോഷം ഈ നവരാത്രിയിലും ദീപാവലിയിലും കൂടുതൽ വലുതായിരിക്കും. ഇതോടൊപ്പം, പൂജ്യ ബാപ്പുവിനോടുള്ള യഥാർത്ഥ ആദരസൂചകമായി, ബാപ്പുവിന്റെ സബർമതി ആശ്രമത്തിന്റെ നവീകരണവും നടക്കുന്നു. ഞങ്ങളുടെ രണ്ട് മഹാത്മാക്കൾ - സർദാർ സാഹിബിന്റെ മഹത്തായ പ്രതിമ, സ്റ്റാച്യു ഓഫ് യൂണിറ്റി, ഞങ്ങൾ ആ ജോലി പൂർത്തിയാക്കി. ആ സമയത്ത്, സബർമതി ആശ്രമത്തിന്റെ ജോലി ഏറ്റെടുക്കാൻ ഞാൻ ആഗ്രഹിച്ചു, പക്ഷേ അന്നത്തെ കേന്ദ്ര ​ഗവൺമെന്റ് ഞങ്ങളെ പിന്തുണച്ചില്ല. ഒരുപക്ഷേ, അവർ ഗാന്ധിജിയെ പോലും പിന്തുണച്ചില്ലായിരിക്കാം. അതുകൊണ്ടാണ്, എനിക്ക് ഒരിക്കലും ആ ജോലി മുന്നോട്ട് കൊണ്ടുപോകാൻ കഴിയാത്തത്. പക്ഷേ, സർദാർ വല്ലഭായ് പട്ടേലിന്റെ ഏകതാ പ്രതിമ ഭാരതത്തിനും ലോകത്തിനും പ്രചോദനത്തിന്റെ ഒരു വലിയ കേന്ദ്രമായി മാറിയതുപോലെ, സബർമതി ആശ്രമത്തിന്റെ നവീകരണ പ്രവർത്തനങ്ങൾ പൂർത്തിയാകുമ്പോൾ, എന്റെ വാക്കുകൾ ശ്രദ്ധിക്കുക, സുഹൃത്തുക്കളേ, നമ്മുടെ സബർമതി ആശ്രമം ലോകത്തിലെ സമാധാനത്തിനുള്ള ഏറ്റവും വലിയ പ്രചോദന കേന്ദ്രമായി മാറാൻ പോകുന്നു.

സുഹൃത്തുക്കളേ,

നമ്മുടെ തൊഴിലാളി കുടുംബങ്ങൾക്ക് മെച്ചപ്പെട്ട ജീവിതം ലഭിക്കുക എന്നതാണ് ഞങ്ങളുടെ ദൗത്യം. അതുകൊണ്ടാണ്, ചേരികളിൽ താമസിക്കുന്നവർക്കായി പക്കാ ഗേറ്റഡ് സൊസൈറ്റികൾ നിർമ്മിക്കാൻ ഞങ്ങൾ വർഷങ്ങൾക്ക് മുമ്പ് ഗുജറാത്തിൽ മുൻകൈയെടുത്തത്. കഴിഞ്ഞ വർഷങ്ങളിൽ, ചേരികൾക്ക് പകരം വീടുകൾ നിർമ്മിച്ച നിരവധി പദ്ധതികൾ ഗുജറാത്തിൽ പൂർത്തിയായിട്ടുണ്ട്, ഈ പ്രചാരണം തുടർച്ചയായി നടക്കുന്നു.

സുഹൃത്തുക്കളേ,

ആരും ശ്രദ്ധിക്കാത്ത ഒരാൾക്ക് - മോദി അവരെ ബഹുമാനിക്കുന്നു. ഇത്തവണ ഞാൻ ചെങ്കോട്ടയിൽ നിന്ന് പറഞ്ഞിരുന്നു - പിന്നാക്കക്കാർക്ക് മുൻഗണന നൽകുക, നഗരത്തിലെ ദരിദ്രരുടെ ജീവിതം എളുപ്പമാക്കുക എന്നിവയും ഞങ്ങളുടെ വലിയ മുൻഗണനയാണ്. തെരുവ് കച്ചവടക്കാരെപ്പോലും മുമ്പ് ആരും പരിപാലിച്ചിരുന്നില്ല. ഞങ്ങളുടെ ​ഗവൺമെന്റ് അവർക്കായി പ്രധാനമന്ത്രി സ്വാനിധി യോജന ആരംഭിച്ചു. ഇന്ന്, ഈ പദ്ധതി കാരണം, രാജ്യത്തുടനീളമുള്ള ഏകദേശം 70 ലക്ഷം തെരുവ് കച്ചവടക്കാർക്ക് ബാങ്കുകളിൽ നിന്ന് വായ്പ ലഭിക്കുന്നു. ഗുജറാത്തിലെ ലക്ഷക്കണക്കിന് ആളുകൾക്ക് ഇത് പ്രയോജനം ചെയ്തിട്ടുണ്ട്.

സുഹൃത്തുക്കളേ,

കഴിഞ്ഞ 11 വർഷത്തിനിടെ 25 കോടി ആളുകൾ ദാരിദ്ര്യത്തെ മറികടന്ന് അതിൽ നിന്ന് പുറത്തുവരുന്നു. ലോകത്തിന്, ഇത് ഒരു അത്ഭുതമാണ് - 25 കോടി ആളുകൾ ദാരിദ്ര്യത്തിൽ നിന്ന് പുറത്തുവരുന്നു എന്ന വലിയ കണക്ക്. ലോകമെമ്പാടുമുള്ള എല്ലാ സമ്പദ്‌വ്യവസ്ഥകളും ഇന്ന് ഇതിനെക്കുറിച്ച് ചർച്ച ചെയ്യുന്നു.

സുഹൃത്തുക്കളേ,

 ദാരിദ്ര്യത്തിൽ നിന്ന് ഒരു ദരിദ്രൻ കരകയറുമ്പോൾ, നവ മധ്യവർഗത്തിന്റെ രൂപത്തിൽ അവൻ ഒരു പുതിയ ശക്തിയായി ഉയർന്നുവരുന്നു. ഇന്ന്, ഈ നവ മധ്യവർഗവും നമ്മുടെ പരമ്പരാഗത മധ്യവർഗവും - ഒരുമിച്ച് - രാജ്യത്തിന്റെ വലിയ ശക്തിയായി മാറുകയാണ്. നവ മധ്യവർഗത്തെയും മധ്യവർഗത്തെയും ശാക്തീകരിക്കുക എന്നതാണ് ഞങ്ങളുടെ തുടർച്ചയായ ശ്രമം. അഹമ്മദാബാദിലെ നമ്മുടെ സഹോദരങ്ങൾക്ക്, ഒരു സന്തോഷവാർത്തയുണ്ട് - ബജറ്റിൽ 12 ലക്ഷം രൂപ വരെയുള്ള വരുമാനത്തിന് ആദായനികുതി ഇളവ് പ്രഖ്യാപിച്ച ദിവസം, പ്രതിപക്ഷത്തിന് ഇത് എങ്ങനെ സാധ്യമാകുമെന്ന് പോലും മനസ്സിലായില്ല.

സുഹൃത്തുക്കളേ,

തയ്യാറാകൂ - നമ്മുടെ ​ഗവൺമെന്റ് ജിഎസ്ടിയിലും പരിഷ്കാരങ്ങൾ കൊണ്ടുവരുന്നു, ഈ ദീപാവലിക്ക് മുമ്പ് നിങ്ങൾക്കായി ഒരു വലിയ സമ്മാനം ഒരുങ്ങുകയാണ്. ജിഎസ്ടി പരിഷ്കരണം കാരണം, നമ്മുടെ ചെറുകിട സംരംഭകർക്ക് പ്രയോജനം ലഭിക്കും, കൂടാതെ നിരവധി ഇനങ്ങളുടെ നികുതിയും കുറയും. അത് ബിസിനസ്സ് സമൂഹമായാലും നമ്മുടെ കുടുംബമായാലും, എല്ലാവർക്കും ഈ ദീപാവലിക്ക് ഇരട്ടി സന്തോഷത്തിന്റെ ബോണസ് ലഭിക്കും.

സുഹൃത്തുക്കളേ,

ഇപ്പോൾ ഞാൻ പ്രധാനമന്ത്രി സൂര്യ ഘർ സംരംഭത്തെക്കുറിച്ച് സംസാരിക്കുകയായിരുന്നു. ഇപ്പോൾ, പ്രധാനമന്ത്രി സൂര്യ ഘർ: മുഫ്ത് ബിജ്ലി യോജനയിലൂടെ, ഞങ്ങൾ വൈദ്യുതി ബില്ലുകൾ പൂജ്യത്തിലേക്ക് കൊണ്ടുവരുന്നു. ഗുജറാത്തിൽ മാത്രം ഇതുവരെ ആറ് ലക്ഷത്തോളം കുടുംബങ്ങൾ ഈ പദ്ധതിയിൽ ചേർന്നിട്ടുണ്ട്. ഗുജറാത്തിലെ ഈ കുടുംബങ്ങൾക്ക് ​ഗവൺമെന്റ് മൂവായിരം കോടിയിലധികം രൂപ നൽകിയിട്ടുണ്ട്. തൽഫലമായി, അവർ ഇപ്പോൾ അവരുടെ വൈദ്യുതി ബില്ലിൽ പ്രതിമാസം ഗണ്യമായ തുക ലാഭിക്കുന്നു.

സുഹൃത്തുക്കളേ,

ഇന്ന് അഹമ്മദാബാദ് നഗരം സ്വപ്നങ്ങളുടെയും പ്രതിജ്ഞകളുടെയും നഗരമായി മാറുകയാണ്. എന്നാൽ ഒരു കാലത്ത് ആളുകൾ അഹമ്മദാബാദിനെ 'ഗർദാബാദ്' എന്ന് വിളിച്ച് പരിഹസിച്ചിരുന്നു. എല്ലായിടത്തും പൊടിയും അഴുക്കും പറന്നിരുന്നു, മാലിന്യക്കൂമ്പാരങ്ങൾ - അത് നഗരത്തിന്റെ ദൗർഭാഗ്യമായി മാറിയിരുന്നു. ഇന്ന്, ശുചിത്വത്തിന്റെ കാര്യത്തിൽ, അഹമ്മദാബാദ് രാജ്യത്ത് സ്വയം ഒരു പേര് നേടുന്നതിൽ ഞാൻ സന്തോഷിക്കുന്നു. അഹമ്മദാബാദിലെ ഓരോ പൗരന്റെയും സഹകരണം കൊണ്ടാണ് ഇത് സാധ്യമായത്.

എന്നാൽ സുഹൃത്തുക്കളേ,

ഈ ശുചിത്വം, 'സ്വച്ഛത'യുടെ ഈ കാമ്പെയ്‌ൻ വെറുമൊരു ദിവസത്തേക്കുള്ളതല്ല. തലമുറകൾ തലമുറകളായി, എല്ലാ ദിവസവും ചെയ്യേണ്ട ഒരു പ്രവൃത്തിയാണിത്. ശുചിത്വം ഒരു ശീലമാക്കുക, അപ്പോൾ മാത്രമേ നമുക്ക് ആവശ്യമുള്ള ഫലങ്ങൾ കൈവരിക്കാൻ കഴിയൂ.

സുഹൃത്തുക്കളേ,

മുമ്പ് നമ്മുടെ സബർമതി നദി എങ്ങനെയായിരുന്നു? പണ്ട് അത് ഒരു വരണ്ട അഴുക്കുചാല് പോലെയായിരുന്നു, അതിൽ സർക്കസുകൾ നടന്നിരുന്നു, കുട്ടികൾ അവിടെ ക്രിക്കറ്റ് കളിച്ചിരുന്നു. ഈ അവസ്ഥ മാറ്റാൻ അഹമ്മദാബാദിലെ ജനങ്ങൾ ദൃഢനിശ്ചയം ചെയ്തു. ഇപ്പോൾ, സബർമതി നദീതീരം ഈ നഗരത്തിന് അഭിമാനം പകരുകയാണ്.

സുഹൃത്തുക്കളേ,

കങ്കാരിയ തടാകത്തിലെ വെള്ളം പോലും പച്ചപ്പും കളകൾ കാരണം ദുർഗന്ധം വമിക്കുന്നതുമായിരുന്നു. അവിടെ ചുറ്റിനടക്കുന്നത് ബുദ്ധിമുട്ടായിരുന്നു, സാമൂഹിക വിരുദ്ധർക്ക് പ്രിയപ്പെട്ട സ്ഥലമായി അത് മാറിയിരുന്നു - ആരും അവിടെ കടന്നുപോകാൻ ധൈര്യപ്പെട്ടില്ല. ഇന്ന്, സന്ദർശിക്കാൻ ഏറ്റവും നല്ല സ്ഥലങ്ങളിൽ ഒന്നായി ഇത് മാറിയിരിക്കുന്നു. തടാകത്തിൽ ബോട്ടിംഗ് ആയാലും  വിനോദവും -പഠനവും ഒത്തു ചേരുന്ന  കുട്ടികൾക്കായുള്ള കിഡ്‌സ് സിറ്റിയായാലും അഹമ്മദാബാദിന്റെ മാറിക്കൊണ്ടിരിക്കുന്ന ചിത്രത്തിന്റെ ഭാഗമാണ്. അഹമ്മദാബാദിന്റെ ഒരു വലിയ രത്നമായി മാറിയ കങ്കാരിയ കാർണിവൽ - അത് നഗരത്തിന് ഒരു പുതിയ വ്യക്തിത്വം നൽകുന്നു.

സുഹൃത്തുക്കളേ,

അഹമ്മദാബാദ് ഇന്ന് വിനോദസഞ്ചാരത്തിന്റെ ആകർഷകമായ കേന്ദ്രമായി ഉയർന്നുവരുന്നു. അഹമ്മദാബാദ് യുനെസ്കോയുടെ ലോക പൈതൃക നഗരമാണ്. പഴയ നഗര കവാടങ്ങളായാലും സബർമതി ആശ്രമമായാലും ഇവിടുത്തെ പൈതൃക സ്ഥലങ്ങളായാലും, ഇന്ന് നമ്മുടെ നഗരം ലോക ഭൂപടത്തിൽ തിളങ്ങുന്നു. ഇപ്പോൾ, പുതിയതും ആധുനികവുമായ ടൂറിസം രൂപങ്ങളും ഇവിടെ അതിവേഗം വികസിച്ചുകൊണ്ടിരിക്കുകയാണ്. മുമ്പ് ടൂറിസത്തെക്കുറിച്ച് നമ്മൾ സംസാരിച്ചിരുന്ന കാലത്ത്, അഹമ്മദാബാദിനെയോ ഗുജറാത്തിനെയോ കുറിച്ച് ദസാഡ ഓഫീസ് രേഖകളിൽ പരാമർശിക്കുക പോലും ഉണ്ടായിരുന്നില്ല. അക്കാലത്ത്, ടൂറിസത്തിന്റെ കാര്യം വരുമ്പോൾ, ഗുജറാത്തിൽ നിന്നുള്ള ആളുകൾ "നമുക്ക് അബുവിലേക്ക് പോകാം" എന്ന് പറയുമായിരുന്നു, തെക്കൻ ഗുജറാത്തിൽ നിന്നുള്ള ആളുകൾ ദിയുവിലേക്കും ദാമനിലേക്കും പോകുമായിരുന്നു. അതായിരുന്നു നമ്മുടെ മുഴുവൻ ലോകവും. മതപരമായി ചായ്‌വുള്ള സഞ്ചാരികൾ സോമനാഥ്, ദ്വാരക, അല്ലെങ്കിൽ അംബാജി എന്നിവ സന്ദർശിക്കുമായിരുന്നു - നാലോ അഞ്ചോ അത്തരം സ്ഥലങ്ങൾ മാത്രം. എന്നാൽ ഇന്ന്, ഗുജറാത്ത് ടൂറിസത്തിന്റെ ഒരു പ്രധാന സ്ഥലമായി മാറിയിരിക്കുന്നു. റാൻ ഓഫ് കച്ചിൽ, വൈറ്റ് റാൻ കാണാൻ ലോകം ഭ്രാന്തമായി പോകുന്നു. ആളുകൾ സ്റ്റാച്യു ഓഫ് യൂണിറ്റി കാണാൻ ആഗ്രഹിക്കുന്നു, അവർ ബെറ്റ് ദ്വാരകയിലെ പാലം കാണാൻ വരുന്നു, കൂടാതെ അതിലൂടെ നടക്കാൻ പോലും അവരുടെ വാഹനങ്ങളിൽ നിന്ന് ഇറങ്ങി. നിങ്ങൾ ഒരു തീരുമാനമെടുത്തുകഴിഞ്ഞാൽ, എന്റെ സുഹൃത്തുക്കളേ, ഫലങ്ങൾ വരും. ഇന്ന്, അഹമ്മദാബാദ് സം​ഗീത പരിപാടിയുമായി ബന്ധപ്പെട്ട സമ്പദ്‌വ്യവസ്ഥയുടെ ഒരു പ്രധാന കേന്ദ്രമായി മാറുകയാണ്. കുറച്ച് മാസങ്ങൾക്ക് മുമ്പ്, ഇവിടെ നടന്ന കോൾഡ്‌പ്ലേ സം​ഗീത നിശ ലോകമെമ്പാടും ചർച്ച ചെയ്യപ്പെട്ടു. ഒരു ലക്ഷം പേർക്ക് ഇരിക്കാനുള്ള സൗകര്യമുള്ള അഹമ്മദാബാദിന്റെ സ്റ്റേഡിയവും ആകർഷണ കേന്ദ്രമായി മാറിയിരിക്കുന്നു. ഇത് കാണിക്കുന്നത് അഹമ്മദാബാദിന് വലിയ സംഗീത കച്ചേരികളും പ്രധാന കായിക മത്സരങ്ങളും നടത്താൻ കഴിയുമെന്നാണ്.

സുഹൃത്തുക്കളേ,

തുടക്കത്തിൽ ഞാൻ ഉത്സവങ്ങളെക്കുറിച്ച് പറഞ്ഞിരുന്നു. ഇത് ഉത്സവങ്ങളുടെ കാലമാണ് - നവരാത്രി, വിജയദശമി, ധന്തേരസ്, ദീപാവലി, എല്ലാം വരുന്നു. തീർച്ചയായും ഇവ നമ്മുടെ സംസ്കാരത്തിന്റെ ഉത്സവങ്ങളാണ്, പക്ഷേ അവ 'ആത്മനിർഭർത'ത്തിന്റെ (സ്വാശ്രയത്വത്തിന്റെ) ഉത്സവങ്ങളായി മാറണം. അതിനാൽ, ഞാൻ നിങ്ങളോട് വീണ്ടും എന്റെ അഭ്യർത്ഥന ആവർത്തിക്കാൻ ആഗ്രഹിക്കുന്നു, ആദരണീയനായ ബാപ്പുവിന്റെ നാട്ടിൽ നിന്ന്, ഭാരതത്തിലെ എന്റെ സഹ പൗരന്മാരോടും ഞാൻ അഭ്യർത്ഥിക്കുന്നു. നമ്മുടെ ജീവിതത്തിൽ ഒരു മന്ത്രം സ്വീകരിക്കണം - നമ്മൾ എന്ത് വാങ്ങിയാലും അത് ഇന്ത്യയിൽ നിർമ്മിച്ചതായിരിക്കും, അത് സ്വദേശിയായിരിക്കും. വീടിന്റെ അലങ്കാരത്തിന്, നിങ്ങൾ ഇന്ത്യയിൽ നിർമ്മിച്ച സാധനങ്ങൾ വാങ്ങണം. സുഹൃത്തുക്കൾക്കുള്ള സമ്മാനങ്ങൾക്ക്, ഭാരതത്തിലെ ജനങ്ങൾ ഇന്ത്യയിൽ നിർമ്മിച്ചവ മാത്രം തിരഞ്ഞെടുക്കുക. കടയുടമകളോടും വ്യാപാരികളോടും ഞാൻ ഇത് പ്രത്യേകിച്ച് പറയാൻ ആഗ്രഹിക്കുന്നു - ഈ രാജ്യത്തെ മുന്നോട്ട് കൊണ്ടുപോകുന്നതിന് നിങ്ങൾക്ക് വളരെയധികം സംഭാവന നൽകാൻ കഴിയും. വിദേശ വസ്തുക്കൾ വിൽക്കില്ലെന്ന് ഉറച്ചു തീരുമാനിക്കുക, "ഇവിടെ സ്വദേശി മാത്രമേ വിൽക്കൂ" എന്ന് അഭിമാനത്തോടെ എഴുതിയ ഒരു ബോർഡ് സ്ഥാപിക്കുക. നമ്മുടെ ഈ ചെറിയ ശ്രമങ്ങളിലൂടെ, ഈ ഉത്സവങ്ങൾ ഭാരതത്തിന്റെ സമൃദ്ധിയുടെ മഹത്തായ ആഘോഷങ്ങളായി മാറും.

സുഹൃത്തുക്കളേ,

തുടക്കത്തിൽ പലപ്പോഴും ആളുകൾ നിരാശയോട് കൂടുതൽ പരിചിതരായിരുന്നിരിക്കാം. നദീതീരത്തെക്കുറിച്ച് ഞാൻ ആദ്യമായി സംസാരിച്ചപ്പോൾ എല്ലാവരും അത് ചിരിച്ചു തള്ളിക്കളഞ്ഞതായി ഞാൻ ഓർക്കുന്നു. "നദീതീരത്ത് വന്നോ ഇല്ലയോ?" സ്റ്റാച്യു ഓഫ് യൂണിറ്റിയെക്കുറിച്ച് ഞാൻ ഒരു പത്രസമ്മേളനം നടത്തിയപ്പോൾ, എല്ലാവരും എന്നെ പരിഹസിച്ചു, "തിരഞ്ഞെടുപ്പുകൾ വരുന്നു, അതുകൊണ്ടാണ് മോദി ജി ഇത് ഉന്നയിക്കുന്നത്." പക്ഷേ പറയൂ, സ്റ്റാച്യു ഓഫ് യൂണിറ്റി നിർമ്മിച്ചിട്ടുണ്ടോ ഇല്ലയോ? ഇന്ന് ലോകം അതിനെ അത്ഭുതത്തോടെ നോക്കുന്നുണ്ടോ ഇല്ലയോ? കച്ചിലെ റാൻ ഉത്സവിനെക്കുറിച്ച് ഞാൻ സംസാരിച്ചപ്പോൾ ആളുകൾ ചോദിച്ചു, "ആരാണ് കച്ചിലേക്ക് പോകുക? ആരാണ് റാണിലേക്ക് പോകുന്നത്?" എന്നാൽ ഇന്ന്, നീണ്ട ക്യൂകളുണ്ട്; ആളുകൾ ആറ് മാസം മുമ്പേ അവരുടെ യാത്രകൾ ബുക്ക് ചെയ്യുന്നു. അത് സംഭവിച്ചോ ഇല്ലയോ? ഗുജറാത്തിൽ ഒരു വിമാന നിർമ്മാണ പ്ലാന്റ് സ്ഥാപിക്കപ്പെടുന്നു - ആരെങ്കിലും അത് സങ്കൽപ്പിച്ചിരിക്കുമോ? ഞാൻ ആദ്യമായി ഗിഫ്റ്റ് സിറ്റിയെ സങ്കൽപ്പിച്ചപ്പോൾ, മിക്കവാറും എല്ലാവരും അതിനെ കളിയാക്കിയത് ഓർക്കുന്നു - അത്തരമൊരു കാര്യം എങ്ങനെ സംഭവിക്കും, അത്തരമൊരു കെട്ടിടങ്ങൾ എങ്ങനെ നിർമ്മിക്കാം എന്ന് ചോദിച്ചുകൊണ്ട്. എന്നാൽ ഇന്ന്, ഗിഫ്റ്റ് സിറ്റി ഭാരതത്തിന്റെ ഏറ്റവും അഭിമാനകരമായ അധ്യായങ്ങളിലൊന്ന് എഴുതുകയാണ്. ഈ രാജ്യത്തിന്റെ സാധ്യതകൾ നിങ്ങൾ ശ്രദ്ധാപൂർവ്വം കാണണമെന്ന് ഞാൻ ആഗ്രഹിക്കുന്നതിനാലാണ് ഇതെല്ലാം നിങ്ങളെ ഓർമ്മിപ്പിക്കുന്നത്. നിങ്ങൾ അതിനെ ബഹുമാനിക്കുന്നുവെങ്കിൽ, നിങ്ങൾ അതിനായി സ്വയം സമർപ്പിച്ചാൽ, ഭാരതത്തിലെ ജനങ്ങൾ ഒരിക്കലും നിങ്ങളുടെ ദൃഢനിശ്ചയം പരാജയപ്പെടുത്താൻ അനുവദിക്കില്ല. ഈ രാജ്യത്തെ ജനങ്ങൾ അവരുടെ വിയർപ്പും രക്തവും നൽകും. നിരവധി ഭീകരാക്രമണങ്ങൾക്ക് ശേഷം, ശത്രുവിനെ ഒന്നും ചെയ്യാൻ കഴിയില്ലെന്ന് വിശ്വസിച്ചിരുന്ന ഒരു കാലമുണ്ടായിരുന്നു. എന്നാൽ ഭാരതം സർജിക്കൽ സ്ട്രൈക്കുകൾ നടത്തി അവരുടെ ലോഞ്ചിംഗ് പാഡുകൾ നശിപ്പിച്ചു. ഭാരതം വ്യോമാക്രമണങ്ങൾ നടത്തി അവരുടെ പരിശീലന കേന്ദ്രങ്ങൾ തകർത്തു. ഭാരതം ഓപ്പറേഷൻ സിന്ദൂർ നടത്തി അവയുടെ കാതലായ ഭാഗത്ത് തന്നെ ആക്രമണം നടത്തി. ഭാരതത്തിന്റെ ചന്ദ്രയാൻ ശിവശക്തി പോയിന്റിൽ ഇറങ്ങി, മുമ്പ് ആരും പോയിട്ടില്ലാത്ത സ്ഥലത്ത് എത്തി, നമ്മുടെ ത്രിവർണ്ണ പതാക ഉയർത്തി. ശുഭാൻഷു ശുക്ല അന്താരാഷ്ട്ര ബഹിരാകാശ കേന്ദ്രത്തിലേക്ക് പോയി. ഇപ്പോൾ ഗഗൻയാനിനുള്ള ഒരുക്കങ്ങൾ നടക്കുന്നു. നമ്മുടെ സ്വന്തം ബഹിരാകാശ നിലയം നിർമ്മിക്കുന്നതിനുള്ള പ്രവർത്തനങ്ങളും പുരോഗമിക്കുന്നു. സുഹൃത്തുക്കളേ, ഈ സംഭവങ്ങൾ ഓരോന്നും തെളിയിക്കുന്നത് വിശ്വാസത്തോടെയും സമർപ്പണത്തോടെയും ദൈവത്തിന്റെ രൂപമായ ജനങ്ങളുടെ അനുഗ്രഹങ്ങളാലും പിന്തുണയാലും നാം വിജയം കൈവരിക്കുന്നു എന്നാണ്. അതേ ആത്മവിശ്വാസത്തോടെ, ഈ രാഷ്ട്രം സ്വയംപര്യാപ്തമാകും എന്നാണ് ഞാൻ പറയുന്നത്. ഈ രാജ്യത്തെ ഓരോ പൗരനും "വോക്കൽ ഫോർ ലോക്കൽ" എന്നതിന്റെ വാഹകനാകും. ഓരോ പൗരനും സ്വദേശി എന്ന മന്ത്രം അനുസരിച്ചു ജീവിക്കും. പിന്നെ, ഇനി ഒരിക്കലും മറ്റുള്ളവരെ ആശ്രയിക്കേണ്ട ഒരു സാഹചര്യം നമുക്ക് നേരിടേണ്ടിവരില്ല.

സുഹൃത്തുക്കളേ,

കോവിഡ് സാഹചര്യം ഉണ്ടായിരുന്നപ്പോൾ, മുമ്പ് ലോകത്ത് എവിടെയെങ്കിലും നിർമ്മിച്ച ഒരു വാക്സിൻ നമ്മുടെ രാജ്യത്ത് എത്താൻ 30-40 വർഷമെടുക്കുമായിരുന്നു. കോവിഡ് സമയത്ത് എന്ത് സംഭവിക്കുമെന്ന് ആളുകൾക്ക് സംശയമുണ്ടായിരുന്നു. എന്നാൽ ഈ രാജ്യം തീരുമാനിച്ചു, സ്വന്തം വാക്സിൻ സൃഷ്ടിച്ചു, 140 കോടി പൗരന്മാർക്ക് എത്തിച്ചു. ഇതാണ് നമ്മുടെ രാജ്യത്തിന്റെ ശക്തി. ആ ശക്തിയിലുള്ള വിശ്വാസത്തോടെ, ഗുജറാത്തിലെ എന്റെ സഹ സുഹൃത്തുക്കളോട് ഞാൻ പറയാൻ ആഗ്രഹിക്കുന്നു - നിങ്ങൾ എനിക്ക് പഠിപ്പിച്ച പാഠങ്ങൾ, നിങ്ങൾ എന്നെ പഠിപ്പിച്ച രീതി, നിങ്ങൾ എന്നിൽ നിറച്ച ഊർജ്ജവും ആവേശവും - 2047 ആകുമ്പോഴേക്കും, ഭാരതം സ്വാതന്ത്ര്യത്തിന്റെ 100 വർഷം ആഘോഷിക്കുമ്പോൾ, ഈ രാഷ്ട്രം ഒരു 'വികസിത ഭാരത'മായി മാറിയിരിക്കും.

അതുകൊണ്ട് സുഹൃത്തുക്കളേ,

ഒരു 'വികസിത ഭാരതം' നിർമ്മിക്കുന്നതിനുള്ള ഒരു സുപ്രധാന വഴി സ്വദേശി (സ്വദേശ സ്വാശ്രയത്വം) ആണ്. മറ്റൊരു സുപ്രധാന വഴി ആത്മനിർഭർ ഭാരത് (സ്വാശ്രയ ഇന്ത്യ) ആണ്. വസ്തുക്കൾ സൃഷ്ടിക്കുന്ന, നിർമ്മിക്കുന്ന, ഉൽപ്പാദിപ്പിക്കുന്ന എല്ലാവരോടും ഞാൻ  അഭ്യർത്ഥിക്കുന്നു - നിങ്ങളുടെ ഗുണനിലവാരം തുടർച്ചയായി മെച്ചപ്പെടുത്തുക, നിങ്ങളുടെ ചെലവ് കുറയ്ക്കുക. ഭാരതത്തിലെ ജനങ്ങൾക്ക് ഒരിക്കലും പുറത്തു നിന്ന് ഒന്നും വാങ്ങേണ്ടി വരില്ല. ഈ ആത്മാവിനെ നാം ഉണർത്തുകയും ലോകത്തിന് മുന്നിൽ അത്തരമൊരു മാതൃക കാണിക്കുകയും വേണം. എന്റെ സുഹൃത്തുക്കളേ, ഒരു പ്രതിസന്ധി നേരിടുമ്പോൾ, അവർ ഉന്നതരും ഉറച്ചവരുമായി നിൽക്കുന്നു, അവർ ഫലങ്ങൾ കൈവരിക്കുന്നു. നമുക്കും ഇത് ഒരു അവസരമാണ്. നമ്മുടെ ദൃഢനിശ്ചയം നിറവേറ്റാനുള്ള ശക്തിയോടെ നാം മുന്നോട്ട് പോകണം. ഗുജറാത്ത് എപ്പോഴും എന്നെ പിന്തുണച്ചതുപോലെ, മുഴുവൻ രാഷ്ട്രവും എന്നെ പിന്തുണയ്ക്കുമെന്ന്, രാജ്യം തീർച്ചയായും ഒരു 'വികസിത ഭാരതം' ആയി ഉയർന്നുവരുമെന്ന് എനിക്ക് പൂർണ്ണ വിശ്വാസമുണ്ട്. വികസനത്തിന്റെ ഈ വിലയേറിയ സമ്മാനങ്ങൾ ലഭിച്ചതിന് നിങ്ങൾക്കെല്ലാവർക്കും എന്റെ ഹൃദയംഗമമായ അഭിനന്ദനങ്ങൾ! ഗുജറാത്ത് വളരെയധികം പുരോഗമിക്കട്ടെ, പുതിയ ഉയരങ്ങളിലെത്തട്ടെ; ഗുജറാത്തിന് എത്രത്തോളം ശക്തിയുണ്ടോ, അത് പ്രവർത്തനത്തിലൂടെ അത് തെളിയിക്കും. നിങ്ങൾക്കെല്ലാവർക്കും ഞാൻ എന്റെ അഗാധമായ നന്ദി അറിയിക്കുന്നു! ഇപ്പോൾ, പൂർണ്ണ ശക്തിയോടെ, എന്നോടൊപ്പം പറയുക:

ഭാരത് മാതാ കീ ജയ്! ഭാരത് മാതാ കീ ജയ്! ഭാരത് മാതാ കീ ജയ്!

നന്ദി!

***