କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ
ସାରାଦେଶର କୃଷିକ୍ଷେତ୍ରର ସ୍ଥିତିର ସମୀକ୍ଷା କଲେ କେନ୍ଦ୍ର କୃଷିମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ
Posted On:
01 SEP 2025 5:38PM by PIB Bhubaneshwar
- ଦିଲ୍ଲୀରେ ଆୟୋଜିତ ଏକ ଉଚ୍ଚସ୍ତରୀୟ ବୈଠକରେ ଶ୍ରୀ ଶିବରାଜ ସିଂହ ବିଭିନ୍ନ ରାଜ୍ୟରେ ହେଉଥିବା ବର୍ଷା ପରିସ୍ଥିତି ସମ୍ପର୍କିତ ତଥ୍ୟ ସଂଗ୍ରହ କରିଛନ୍ତି
- ପଞ୍ଜାବର କିଛି ଅଞ୍ଚଳରେ ବନ୍ୟା ପରିସ୍ଥିତି ଏବଂ ତାହାର ଫସଲ ଉପରେ ପଡ଼ିଥିବା ପ୍ରଭାବ ବିଷୟରେ ବରିଷ୍ଠ ଅଧିକାରୀମାନେ କେନ୍ଦ୍ର ମନ୍ତ୍ରୀଙ୍କୁ ଅବଗତ କରାଇଥିଲେ
- ପଞ୍ଜାବର ଚାଷୀମାନେ ଆଦୌ ଚିନ୍ତିତ ହେବା ଉଚିତ୍ ନୁହେଁ, କେନ୍ଦ୍ର ସରକାର ପ୍ରଭାବିତ ଚାଷୀଙ୍କ ସହିତ ସମ୍ପୂର୍ଣ୍ଣ ଭାବରେ ଅଛନ୍ତି - ଶ୍ରୀ ଶିବରାଜ ସିଂହ
- ଖୁବ୍ ଶୀଘ୍ର ପଞ୍ଜାବର ବନ୍ୟା ପ୍ରଭାବିତ ଅଞ୍ଚଳ ଗସ୍ତ କରିବେ କେନ୍ଦ୍ର କୃଷି ମନ୍ତ୍ରୀ ଶ୍ରୀ ଶିବରାଜ ସିଂହ
- ବୈଠକରେ ଶ୍ରୀ ଶିବରାଜ ସିଂହ କୃଷକମାନଙ୍କ ବୃହତ ସ୍ୱାର୍ଥରେ 'ସମୃଦ୍ଧ କୃଷି ମଡେଲ' ପାଇଁ ମାର୍ଗଦର୍ଶିକା ପ୍ରଦାନ କରିଛନ୍ତି
କେନ୍ଦ୍ର କୃଷି ଏବଂ କୃଷକ କଲ୍ୟାଣ ଏବଂ ଗ୍ରାମୀଣ ବିକାଶ ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ, ଆଜି ନୂଆଦିଲ୍ଲୀରେ ଏକ ବୈଠକ କରି ସାରା ଦେଶର କୃଷି କ୍ଷେତ୍ରର ସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି। ଏକ ଉଚ୍ଚସ୍ତରୀୟ ବୈଠକରେ ଶ୍ରୀ ଶିବରାଜ ସିଂହ ବିଭିନ୍ନ ରାଜ୍ୟରେ ହେଉଥିବା ବର୍ଷା ବିଷୟରେ ତଥ୍ୟ ନେଇଛନ୍ତି। ସେ ପଞ୍ଜାବର କିଛି ଅଞ୍ଚଳରେ ହୋଇଥିବା ବନ୍ୟା ଏବଂ ଫସଲ ଉପରେ ଏହାର ପ୍ରଭାବ ବିଷୟରେ ଅଧିକାରୀଙ୍କ ସହିତ ବିସ୍ତୃତ ଆଲୋଚନା କରିଥିଲେ। ବୈଠକରେ ଶ୍ରୀ ଶିବରାଜ ସିଂହ କହିଛନ୍ତି ଯେ, ପଞ୍ଜାବର ଚାଷୀ ଭାଇ ଏବଂ ଭଉଣୀମାନେ ଆଦୌ ଚିନ୍ତିତ ହେବା ଉଚିତ୍ ନୁହେଁ, ଏହି ପ୍ରାକୃତିକ ବିପର୍ଯ୍ୟୟ ସମୟରେ କେନ୍ଦ୍ର ସରକାର ପ୍ରଭାବିତ ଚାଷୀମାନଙ୍କ ସହିତ ଅଛନ୍ତି। ଆଗାମୀ ଦିନରେ ସେ ପରିସ୍ଥିତିର ସମୀକ୍ଷା ପାଇଁ ପଞ୍ଜାବର ବନ୍ୟା ପ୍ରଭାବିତ ଅଞ୍ଚଳ ଗସ୍ତ କରିବେ ଏବଂ ପ୍ରଭାବିତ ଚାଷୀମାନଙ୍କୁ ଘଟଣାସ୍ଥଳରେ ଭେଟି ସେମାନଙ୍କୁ ସମସ୍ତ ପ୍ରକାରର ସାହାଯ୍ୟ କରିବାକୁ ଚେଷ୍ଟା କରିବେ ବୋଲି ଶ୍ରୀ ଶିବରାଜ ସିଂହ କହିଛନ୍ତି।
ବୈଠକରେ କେନ୍ଦ୍ର କୃଷି ସଚିବ ଡକ୍ଟର ଦେବେଶ ଚତୁର୍ବେଦୀଙ୍କ ସହିତ ଅନ୍ୟାନ୍ୟ ବରିଷ୍ଠ ଅଧିକାରୀମାନେ କେନ୍ଦ୍ର ମନ୍ତ୍ରୀ ଶିବରାଜ ସିଂହଙ୍କୁ ସାରା ଦେଶରେ କୃଷି କ୍ଷେତ୍ରର ସ୍ଥିତି ବିଷୟରେ ବିସ୍ତୃତ ସୂଚନା ଦେଇଥିଲେ। ଏହି ସମୟରେ, ଗତ ବର୍ଷ ତୁଳନାରେ ଖରିଫ ଚାଷ କ୍ଷେତ୍ରରେ ଆଶାଜନକ ବୃଦ୍ଧି ଘଟିଛି ବୋଲି ସେମାନେ କହିଥିଲେ। ଖାଦ୍ୟଶସ୍ୟ ସହିତ, ଉଦ୍ୟାନ କୃଷି କ୍ଷେତ୍ରର ଅଗ୍ରଗତି ବିଷୟରେ ମଧ୍ୟ କେନ୍ଦ୍ର କୃଷି ମନ୍ତ୍ରୀ ଶ୍ରୀ ଚୌହାନ ପଚାରି ବୁଝିଥିଲେ। ସେ ବିଶେଷ କରି ଆଳୁ, ପିଆଜ ଏବଂ ଟମାଟୋର ଉତ୍ପାଦନ ସ୍ଥିତି ଏବଂ ମୂଲ୍ୟ ବିଷୟରେ ତଥ୍ୟ ସଂଗ୍ରହ କରିଥିଲେ। ବୈଠକରେ, ଅଧିକାରୀମାନେ ବିଭିନ୍ନ ରାଜ୍ୟରେ ବର୍ଷା ଏବଂ ଜଳଭଣ୍ଡାରର ସ୍ଥିତି ବିଷୟରେ ମଧ୍ୟ ସୂଚନା ଦେଇଥିଲେ, ଯେଉଁଥିରେ ସେମାନେ କହିଥିଲେ ଯେ ଏହି ବର୍ଷ ଅନେକ ରାଜ୍ୟରେ ହାରାହାରି ଠାରୁ ଅଧିକ ବର୍ଷା ହୋଇଛି, ଯାହା ଫସଲ ପାଇଁ ଏକ ଲାଭଦାୟକ ସ୍ଥିତି। ଭଲ ବର୍ଷା ଯୋଗୁଁ ଜଳଭଣ୍ଡାରଗୁଡ଼ିକ ମଧ୍ୟ ପୂର୍ଣ୍ଣ ଅଛି।
କେନ୍ଦ୍ର ମନ୍ତ୍ରୀ ଶିବରାଜ ସିଂହ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ଯେ ଚାଷୀମାନେ ଖାଦ୍ୟଶସ୍ୟ ସହିତ ଉଦ୍ୟାନ କୃଷି ସମେତ ସମନ୍ୱିତ କୃଷି ପାଇଁ ଚାଷୀମାନଙ୍କୁ ଉତ୍ସାହିତ କରନ୍ତୁ, ଯାହା ଦ୍ୱାରା ଚାଷୀମାନଙ୍କୁ ଅଧିକ ଲାଭ ମିଳିବ। ସେ କହିଥିଲେ ଯେ, ଭବିଷ୍ୟତର ଚାହିଦାକୁ ଦୃଷ୍ଟିରେ ରଖି, କ୍ଷେତରେ ଶସ୍ୟ ସହିତ ଅନ୍ୟାନ୍ୟ ବିକଳ୍ପ ପଦକ୍ଷେପ ନେଇ ଆମକୁ କୃଷି କ୍ଷେତ୍ରକୁ ସାମଗ୍ରିକ ଭାବରେ ବିକଶିତ କରିବାକୁ ପଡିବ। ଏହି ଦିଗରେ ଉଦ୍ୟାନ କୃଷି ଏବଂ 'ସମନ୍ବିତ କୃଷି' ହେଉଛି ପ୍ରଭାବଶାଳୀ ପଦକ୍ଷେପ। ସେ କୃଷକମାନଙ୍କ ମଧ୍ୟରେ 'ସମନ୍ବିତ କୃଷି ମଡେଲ'ର ବ୍ୟାପକ ପ୍ରଚାର ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ।
********
SSP
(Release ID: 2162913)
Visitor Counter : 2