مرکزی وزیر زراعت و کسان بہبود اور دیہی ترقی جناب شیو راج سنگھ چوہان نے آج نئی دہلی میں ملک بھر میں زراعت کے شعبے کی صورتحال کا جائزہ لینے کے لیے ایک اجلاس منعقد کیا۔اس اعلیٰ سطحی اجلاس میں جناب شیو راج سنگھ نے مختلف ریاستوں میں بارش کی صورتحال کا جائزہ لیا اور پنجاب کے بعض حصوں میں سیلاب اور فصلوں پر اس کے اثرات کے بارے میں افسران کے ساتھ تفصیلی گفتگو کی۔اجلاس کے دوران جناب شیو راج سنگھ نے کہا کہ پنجاب کے وہ کسان، جو سیلاب سے متاثر ہوئے ہیں، پریشان نہ ہوں کیونکہ مرکزی حکومت قدرتی آفت کے اس لمحے میں متاثرہ کسانوں کے ساتھ پختہ طور پر کھڑی ہے۔ انہوں نے بتایا کہ وہ جلد ہی پنجاب کے سیلاب متاثرہ علاقوں کا دورہ کریں گے تاکہ زمینی صورتحال کا جائزہ لیں اور ذاتی طور پر متاثرہ کسانوں سے ملاقات کرکے تمام ممکنہ امداد کو یقینی بنائیں۔

اس اجلاس میں زراعت کے سکریٹری ڈاکٹر دیوش چترویدی اور دیگر سینئر افسران بھی موجود تھے، جنہوں نے مرکزی وزیر کو ملک بھر میں زراعت کے شعبے کے بارے میں تفصیلی بریفنگ دی۔ اجلاس میں بتایا گیا کہ کھریف کی بونے کی رقبے میں گزشتہ سال کے مقابلے میں حوصلہ افزا اضافہ دیکھنے کو ملا ہے۔

وزیر نے پھلوں کی پیداوار اور خوراکی اناج کی فصلوں کی پیش رفت کا بھی جائزہ لیا۔ انہوں نے خاص طور پر آلو، پیاز اور ٹماٹر کی پیداوار اور قیمتوں کی تفصیلات طلب کیں۔ افسران نے مختلف ریاستوں میں بارش اور ذخائر کی صورتحال سے آگاہ کیا، بتایا کہ اس سال کئی ریاستوں میں اوسط سے زیادہ بارش ہوئی، جو فصلوں کے لیے مفید ہے۔

جناب شیو راج سنگھ نے افسران کو ہدایت دی کہ وہ کسانوں کو مشترکہ (مربوط نظام) زراعت اپنانے کی ترغیب دیں، جس میں خوراکی اناج کے ساتھ پھلوں کی کاشت بھی شامل ہو، تاکہ وہ زیادہ آمدنی حاصل کر سکیں۔ انہوں نے کہا کہ مستقبل کی ضروریات کو مدنظر رکھتے ہوئے، زراعت کے شعبے کو کھیتوں میں اناج کی پیداوار کے ساتھ متبادل اقدامات کے ذریعے جامع ترقی حاصل کرنی چاہیے۔ پھلوں کی کاشت اور مشترکہ زراعت اس سمت میں مؤثر ذرائع ہیں۔ انہوں نے یہ بھی ہدایت دی کہ ‘مربوط زراعت کے ماڈل’کو کسانوں کے درمیان وسیع پیمانے پر فروغ دیا جائے۔

*******

ش ح۔  ع و۔ا ش ق

U.NO. 5543