ಅಂಕಿಅಂಶಗಳು ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ
azadi ka amrit mahotsav

2025-26ರ ಮೊದಲ ತ್ರೈಮಾಸಿಕದ (ಏಪ್ರಿಲ್-ಜೂನ್) ಒಟ್ಟು ಆಂತರಿಕ ಉತ್ಪನ್ನದ (ಜಿಡಿಪಿ) ತ್ರೈಮಾಸಿಕ ಅಂದಾಜುಗಳು


2024-25ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ 6.5% ರಷ್ಟಿದ್ದ ಬೆಳವಣಿಗೆ ದರಕ್ಕೆ ಹೋಲಿಸಿದರೆ, 2025-26ರ ಮೊದಲ ತ್ರೈಮಾಸಿಕದಲ್ಲಿ ನೈಜ ಜಿಡಿಪಿ 7.8% ರಷ್ಟು ಬೆಳವಣಿಗೆಯನ್ನು ದಾಖಲಿಸುವ ಅಂದಾಜಿಸಲಾಗಿದೆ

ಸೇವಾ ವಲಯದಲ್ಲಿನ ಉತ್ಸಾಹಭರಿತ ಬೆಳವಣಿಗೆಯು ಭಾರತದ ಆರ್ಥಿಕತೆಯು 2025-26ರ ಮೊದಲ ತ್ರೈಮಾಸಿಕದಲ್ಲಿ 7.6% ರ ನೈಜ GVA ಬೆಳವಣಿಗೆಯನ್ನು ದಾಖಲಿಸಲು ಕಾರಣವಾಗಿದೆ

Posted On: 29 AUG 2025 4:00PM by PIB Bengaluru

ಮಿನಿಸ್ಟ್ರಿ ಆಫ್ ಸ್ಟ್ಯಾಟಿಸ್ಟಿಕ್ಸ್ ಆ್ಯಂಡ್ ಪ್ರೋಗ್ರಾಮ್ ಇಂಪ್ಲಿಮೆಂಟೇಶನ್  (MoSPI) ಅಡಿಯಲ್ಲಿನ ನ್ಯಾಷನಲ್ ಸ್ಟ್ಯಾಟಿಸ್ಟಿಕ್ಸ್ ಆಫೀಸ್  (NSO), ಈ ಪತ್ರಿಕಾ ಪ್ರಕಟಣೆಯಲ್ಲಿ 2025-26ನೇ ಆರ್ಥಿಕ ವರ್ಷದ (FY) ಏಪ್ರಿಲ್-ಜೂನ್ ತ್ರೈಮಾಸಿಕದ (Q1) ಒಟ್ಟು ಆಂತರಿಕ ಉತ್ಪನ್ನದ (GDP) ತ್ರೈಮಾಸಿಕ ಅಂದಾಜುಗಳನ್ನು, ಸ್ಥಿರ (2011-12) ಮತ್ತು ಚಾಲ್ತಿ ಬೆಲೆಗಳಲ್ಲಿನ ಅದರ ವೆಚ್ಚದ ಅಂಶಗಳೊಂದಿಗೆ ಬಿಡುಗಡೆ ಮಾಡುತ್ತಿದೆ. ವಿವಿಧ ಆರ್ಥಿಕ ವಲಯಗಳಿಗೆ ಮೂಲ ಬೆಲೆಗಳಲ್ಲಿನ ಒಟ್ಟು ಮೌಲ್ಯವರ್ಧನೆಯ (GVA) ತ್ರೈಮಾಸಿಕ ಅಂದಾಜುಗಳು ಹಾಗೂ ವರ್ಷದಿಂದ ವರ್ಷಕ್ಕೆ ಆಗಿರುವ ಶೇಕಡಾವಾರು ಬದಲಾವಣೆಗಳು, ಮತ್ತು 2023-24, 2024-25 ಹಾಗೂ 2025-26ನೇ ಆರ್ಥಿಕ ವರ್ಷಗಳ Q1 ತ್ರೈಮಾಸಿಕದ GDPಯ ವೆಚ್ಚದ ಅಂಶಗಳನ್ನು ಸ್ಥಿರ ಮತ್ತು ಚಾಲ್ತಿ ಬೆಲೆಗಳಲ್ಲಿ ಅನುಬಂಧ A ಯ ಹೇಳಿಕೆ 1 ರಿಂದ 4 ರಲ್ಲಿ ನೀಡಲಾಗಿದೆ.

ಪ್ರಮುಖ ಮುಖ್ಯಾಂಶಗಳು:

  • ಕಳೆದ ಆರ್ಥಿಕ ವರ್ಷದ (2024-25) ಮೊದಲ ತ್ರೈಮಾಸಿಕದ 6.5% ಬೆಳವಣಿಗೆಗೆ ಹೋಲಿಸಿದರೆ, 2025-26ರ ಮೊದಲ ತ್ರೈಮಾಸಿಕದಲ್ಲಿ ನಿಜವಾದ ಜಿಡಿಪಿ (Real GDP) 7.8% ರಷ್ಟು ಬೆಳವಣಿಗೆ ದಾಖಲಿಸುವ ಅಂದಾಜಿಸಲಾಗಿದೆ.
  • 2025-26ರ ಮೊದಲ ತ್ರೈಮಾಸಿಕದಲ್ಲಿ ನಾಮಮಾತ್ರ ಜಿಡಿಪಿ (Nominal GDP)ಯು 8.8% ಬೆಳವಣಿಗೆ ದರವನ್ನು ಕಂಡಿದೆ.
  • ಕಳೆದ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ 1.5% ರಷ್ಟು ಬೆಳವಣಿಗೆ ಕಂಡಿದ್ದ ಕೃಷಿ ಮತ್ತು ಸಂಬಂಧಿತ ವಲಯವು, ಈ ಬಾರಿ 3.7% ರಷ್ಟು ನಿಜವಾದ ಜಿವಿಎ ಬೆಳವಣಿಗೆಯನ್ನು ಸಾಧಿಸಿದೆ.
  • ದ್ವಿತೀಯ ವಲಯಗಳಲ್ಲಿ, ಮುಖ್ಯವಾಗಿ ಉತ್ಪಾದನಾ ವಲಯ (7.7%) ಮತ್ತು ನಿರ್ಮಾಣ ವಲಯ (7.6%) ಸ್ಥಿರ ಬೆಲೆಗಳಲ್ಲಿ 7.5% ಕ್ಕಿಂತ ಹೆಚ್ಚಿನ ಬೆಳವಣಿಗೆಯನ್ನು ದಾಖಲಿಸಿವೆ.
  • ಗಣಿಗಾರಿಕೆ ಮತ್ತು ಕಲ್ಲುಗಣಿಗಾರಿಕೆ (-3.1%) ಹಾಗೂ ವಿದ್ಯುತ್, ಅನಿಲ, ನೀರು ಸರಬರಾಜು ಮತ್ತು ಇತರೆ ಸೇವಾ ವಲಯ (0.5%) ಆರ್ಥಿಕ ವರ್ಷ 2025-26 ರ ಮೊದಲ ತ್ರೈಮಾಸಿಕದಲ್ಲಿ ಮಂದಗತಿಯ ನೈಜ  ಬೆಳವಣಿಗೆಯನ್ನು ಕಂಡಿವೆ.
  • ಕಳೆದ ವರ್ಷದ ಇದೇ ಅವಧಿಯಲ್ಲಿದ್ದ 6.8% ಬೆಳವಣಿಗೆ ದರವನ್ನು ಮೀರಿ, ತೃತೀಯ ವಲಯ (Tertiary Sector)ವು ಈ ತ್ರೈಮಾಸಿಕದಲ್ಲಿ 9.3% ರಷ್ಟು ಗಣನೀಯ ಬೆಳವಣಿಗೆಯನ್ನು ದಾಖಲಿಸಿದೆ.
  • ಕಳೆದ ವರ್ಷದ ಕೇವಲ 4.0% ಬೆಳವಣಿಗೆಯಿಂದ ಚೇತರಿಸಿಕೊಂಡ ಸರ್ಕಾರಿ ಅಂತಿಮ ಬಳಕೆಯ ವೆಚ್ಚ (GFCE)ವು, ಈ ಬಾರಿ ನಾಮಮಾತ್ರ ದರದಲ್ಲಿ 9.7% ಬೆಳವಣಿಗೆಯನ್ನು ದಾಖಲಿಸಿದೆ.
  • ನಿಜವಾದ ಖಾಸಗಿ ಅಂತಿಮ ಬಳಕೆಯ ವೆಚ್ಚ (PFCE)ವು 7.0% ರಷ್ಟು ಬೆಳವಣಿಗೆ ಕಂಡಿದೆ, ಆದರೆ ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ಇದು 8.3% ರಷ್ಟಿತ್ತು.
  • ಕಳೆದ ವರ್ಷದ ಮೊದಲ ತ್ರೈಮಾಸಿಕದ 6.7% ಬೆಳವಣಿಗೆಯನ್ನು ಮೀರಿ, ಒಟ್ಟು ಸ್ಥಿರ ಬಂಡವಾಳ ರಚನೆ (GFCF)ಯು ಸ್ಥಿರ ಬೆಲೆಗಳಲ್ಲಿ 7.8% ರಷ್ಟು ಬೆಳವಣಿಗೆಯನ್ನು ದಾಖಲಿಸಿದೆ.
  1. ತ್ರೈಮಾಸಿಕ ಅಂದಾಜುಗಳು ಮತ್ತು ಬೆಳವಣಿಗೆಯ ದರಗಳು

2025-26ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಸ್ಥಿರ ಬೆಲೆಗಳಲ್ಲಿ ನೈಜ ಜಿಡಿಪಿ ಅಥವಾ ಜಿಡಿಪಿ ₹47.89 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ, ಇದು 2024-25ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ₹44.42 ಲಕ್ಷ ಕೋಟಿಗಳಷ್ಟಿದ್ದು, ಇದು 7.8% ಬೆಳವಣಿಗೆಯ ದರವನ್ನು ದಾಖಲಿಸಿದೆ. 2025-26ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ನಾಮಮಾತ್ರ ಜಿಡಿಪಿ ಅಥವಾ ಪ್ರಸ್ತುತ ಬೆಲೆಗಳಲ್ಲಿ ಜಿಡಿಪಿ ₹86.05 ಲಕ್ಷ ಕೋಟಿಗಳಷ್ಟಿದೆ ಎಂದು ಅಂದಾಜಿಸಲಾಗಿದೆ, ಇದು 2024-25ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ₹79.08 ಲಕ್ಷ ಕೋಟಿಗಳಷ್ಟಿದ್ದು, ಇದು 8.8% ಬೆಳವಣಿಗೆಯ ದರವನ್ನು ತೋರಿಸುತ್ತದೆ.

2025-26ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ನೈಜ ಜಿವಿಎ ₹44.64 ಲಕ್ಷ ಕೋಟಿಗಳಷ್ಟಿದ್ದು, 2024-25ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ₹41.47 ಲಕ್ಷ ಕೋಟಿಗಳಷ್ಟಿದ್ದು, ಇದು 7.6% ಬೆಳವಣಿಗೆಯ ದರವನ್ನು ದಾಖಲಿಸಿದೆ. 2025-26ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ನಾಮಮಾತ್ರ ಜಿವಿಎ ₹78.25 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ, ಇದು 2024-25ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ₹71.95 ಲಕ್ಷ ಕೋಟಿಗಳಾಗಿದ್ದು, ಇದು ಶೇ. 8.8 ರಷ್ಟು ಬೆಳವಣಿಗೆಯ ದರವನ್ನು ತೋರಿಸುತ್ತದೆ.

ಚಿತ್ರ. 1: 2022-23ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಿಂದ 2025-26ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದವರೆಗಿನ ತ್ರೈಮಾಸಿಕ GDP ಮತ್ತು GVA ಅಂದಾಜುಗಳು ಮತ್ತು ಸ್ಥಿರ ಬೆಲೆಗಳಲ್ಲಿನ ವರ್ಷದಿಂದ ವರ್ಷದ ಬೆಳವಣಿಗೆ ದರಗಳು.

ಚಿತ್ರ 2: ತ್ರೈಮಾಸಿಕ GVA ಯ ವಲಯ ಸಂಯೋಜನೆ ಮತ್ತು ಬೆಳವಣಿಗೆಯ ದರಗಳು

2025-26ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ನಾಮಮಾತ್ರ GVA ಯ ವಲಯ ಸಂಯೋಜನೆ

ಚಿತ್ರ 3: ವಿಶಾಲ ವಲಯಗಳಲ್ಲಿ ತ್ರೈಮಾಸಿಕ GVA ಯ ಸಂಯೋಜನೆ ಮತ್ತು ಬೆಳವಣಿಗೆಯ ದರಗಳು

[ಪ್ರಾಥಮಿಕ ವಲಯ: ಕೃಷಿ, ಜಾನುವಾರು, ಅರಣ್ಯ ಮತ್ತು ಮೀನುಗಾರಿಕೆ ಮತ್ತು ಗಣಿಗಾರಿಕೆ ಹಾಗೂ ಕಲ್ಲುಗಣಿಗಾರಿಕೆ

ದ್ವಿತೀಯ ವಲಯ: ಉತ್ಪಾದನೆ, ವಿದ್ಯುತ್, ಅನಿಲ, ನೀರು ಸರಬರಾಜು ಮತ್ತು ಇತರ ಉಪಯುಕ್ತ ಸೇವೆಗಳು ಮತ್ತು ನಿರ್ಮಾಣ

ತೃತೀಯ ವಲಯ: ವ್ಯಾಪಾರ, ಹೋಟೆಲ್‌ಗಳು, ಸಾರಿಗೆ, ಸಂವಹನ ಮತ್ತು ಪ್ರಸಾರ, ಹಣಕಾಸು, ರಿಯಲ್ ಎಸ್ಟೇಟ್ ಮತ್ತು ವೃತ್ತಿಪರ ಸೇವೆಗಳು ಮತ್ತು ಸಾರ್ವಜನಿಕ ಆಡಳಿತ, ರಕ್ಷಣಾ ಮತ್ತು ಇತರ ಸೇವೆಗಳಿಗೆ ಸಂಬಂಧಿಸಿದ ಸೇವೆಗಳು]

 

  1. ವಿಧಾನ ಮತ್ತು ಪ್ರಮುಖ ಡೇಟಾ ಮೂಲಗಳು:

ಜಿಡಿಪಿಯ ತ್ರೈಮಾಸಿಕ ಅಂದಾಜುಗಳನ್ನು 'ಬೆಂಚ್‌ಮಾರ್ಕ್-ಇಂಡಿಕೇಟರ್ ವಿಧಾನ'ವನ್ನು ಬಳಸಿ ಸಂಗ್ರಹಿಸಲಾಗುತ್ತದೆ. ಅಂದರೆ, ಹಿಂದಿನ ಹಣಕಾಸು ವರ್ಷದ (2024-25) ಅದೇ ತ್ರೈಮಾಸಿಕದ ಲಭ್ಯವಿರುವ ಅಂದಾಜುಗಳನ್ನು, ವಲಯಗಳ ಕಾರ್ಯಕ್ಷಮತೆಯನ್ನು ಪ್ರತಿಬಿಂಬಿಸುವ ಸಂಬಂಧಿತ ಸೂಚಕಗಳನ್ನು ಬಳಸಿಕೊಂಡು ವಿಸ್ತರಿಸಲಾಗುತ್ತದೆ. ವಿವಿಧ ಸಚಿವಾಲಯಗಳು/ಇಲಾಖೆಗಳು/ಖಾಸಗಿ ಸಂಸ್ಥೆಗಳಿಂದ ಪಡೆಯುವ ದತ್ತಾಂಶಗಳು ಈ ಅಂದಾಜುಗಳ ಸಂಗ್ರಹದಲ್ಲಿ ಅಮೂಲ್ಯವಾದ  ಮಾಹಿತಿಗಳಾಗಿ ಕಾರ್ಯನಿರ್ವಹಿಸುತ್ತವೆ.

ವಲಯವಾರು ಅಂದಾಜುಗಳನ್ನು ಈ ಕೆಳಗಿನ ಸೂಚಕಗಳನ್ನು ಬಳಸಿ ಸಂಗ್ರಹಿಸಲಾಗಿದೆ: ಅವುಗಳೆಂದರೆ, (i) 2025-26ರ ಕೃಷಿ ವರ್ಷದ (ಎವೈ) ಬೆಳೆ ಉತ್ಪಾದನಾ ಗುರಿಗಳು ಮತ್ತು 2024-25ರ ಕೃಷಿ ವರ್ಷದ ಆಹಾರ ಧಾನ್ಯಗಳು, ಎಣ್ಣೆಕಾಳುಗಳು ಹಾಗೂ ಇತರ ವಾಣಿಜ್ಯ ಬೆಳೆಗಳ ಉತ್ಪಾದನೆಯ ಮೂರನೇ ಮುಂಗಡ ಅಂದಾಜುಗಳು. (ii) 2024-25ರ ಕೃಷಿ ವರ್ಷದ ತೋಟಗಾರಿಕೆ ಬೆಳೆಗಳ ವಿಸ್ತೀರ್ಣ ಮತ್ತು ಉತ್ಪಾದನೆಯ ಎರಡನೇ ಮುಂಗಡ ಅಂದಾಜುಗಳು. (iii) 2025-26ರ ಹಣಕಾಸು ವರ್ಷದ ಪ್ರಮುಖ ಜಾನುವಾರು ಉತ್ಪನ್ನಗಳ ಬೇಸಿಗೆ ಕಾಲದ ಅಂದಾಜುಗಳು. (iv) 2025-26ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದ ಮೀನು ಉತ್ಪಾದನಾ ಅಂದಾಜುಗಳು. (v) 2025-26ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕಕ್ಕೆ ಲಭ್ಯವಿರುವ ತ್ರೈಮಾಸಿಕ ಹಣಕಾಸು ಫಲಿತಾಂಶಗಳ ಆಧಾರದ ಮೇಲೆ ಲಿಸ್ಟೆಡ್ ಕಂಪನಿಗಳ ಹಣಕಾಸು ಕಾರ್ಯಕ್ಷಮತೆ. (vi) ಕಲ್ಲಿದ್ದಲು, ಕಚ್ಚಾ ಪೆಟ್ರೋಲಿಯಂ, ನೈಸರ್ಗಿಕ ಅನಿಲ, ಸಿಮೆಂಟ್ ಉತ್ಪಾದನೆ ಮತ್ತು ಉಕ್ಕಿನ ಬಳಕೆ. (vii) ಕೈಗಾರಿಕಾ ಉತ್ಪಾದನೆಯ ಸೂಚ್ಯಂಕ (IIP). (viii) ರೈಲ್ವೇಗಳಿಗೆ ಸಂಬಂಧಿಸಿದ ನಿವ್ವಳ ಟನ್ ಕಿಲೋಮೀಟರ್‌ಗಳು ಮತ್ತು ಪ್ರಯಾಣಿಕರ ಕಿಲೋಮೀಟರ್‌ಗಳು. (ix) ವಿಮಾನ ನಿಲ್ದಾಣಗಳಲ್ಲಿ ನಿರ್ವಹಿಸಲಾದ ವಾಯು ಪ್ರಯಾಣಿಕರು ಮತ್ತು ಸರಕು ಸಾಗಣೆ ದಟ್ಟಣೆ. (x) ಪ್ರಮುಖ ಮತ್ತು ಸಣ್ಣ ಬಂದರುಗಳಲ್ಲಿ ನಿರ್ವಹಿಸಲಾದ ಸರಕು ಸಾಗಣೆ ದಟ್ಟಣೆ. (xi) ವಾಣಿಜ್ಯ ವಾಹನಗಳ ಮಾರಾಟ. (xii) ಬ್ಯಾಂಕ್ ಠೇವಣಿಗಳು ಮತ್ತು ಸಾಲಗಳು. (xiii) ಜೀವ ಮತ್ತು ಜೀವ ರಹಿತ ವಿಮಾ ಕಂಪನಿಗಳ ಪ್ರೀಮಿಯಂಗೆ ಸಂಬಂಧಿಸಿದ ಮಾಹಿತಿ. (xiv) 2025-26ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕಕ್ಕೆ GSTN ನಿಂದ ಲಭ್ಯವಿರುವ ಸರಕು ಮತ್ತು ಸೇವೆಗಳ ಹೊರಹರಿವು. (xv) 2025-26ರ ಮೊದಲ ತ್ರೈಮಾಸಿಕಕ್ಕೆ ಲಭ್ಯವಿರುವ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಖಾತೆಗಳು. (xvi) 2025-26ರ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕಕ್ಕೆ ಸರಕು ಮತ್ತು ಸೇವಾ ತೆರಿಗೆ (GST) ಸಂಗ್ರಹ. ಅಂದಾಜಿನಲ್ಲಿ ಬಳಸಲಾದ ಪ್ರಮುಖ ಸೂಚಕಗಳಲ್ಲಿ ಪ್ರತಿಬಿಂಬಿತವಾಗಿರುವ ವರ್ಷದಿಂದ ವರ್ಷಕ್ಕೆ ಆಗಿರುವ ಬೆಳವಣಿಗೆ ದರಗಳನ್ನು (%) ಅನುಬಂಧ ಬಿ ಯಲ್ಲಿ ನೀಡಲಾಗಿದೆ.

ಜಿಡಿಪಿ ಸಂಗ್ರಹಕ್ಕೆ ಬಳಸಲಾಗುವ ಒಟ್ಟು ತೆರಿಗೆ ಆದಾಯವು ಜಿ ಎಸ್‌ ಟಿ ಅಲ್ಲದ ಆದಾಯ ಹಾಗೂ ಜಿ ಎಸ್‌ ಟಿ ಆದಾಯ ಎರಡನ್ನೂ ಒಳಗೊಂಡಿದೆ. ಚಾಲ್ತಿ ಬೆಲೆಗಳಲ್ಲಿ ಉತ್ಪನ್ನಗಳ ಮೇಲಿನ ತೆರಿಗೆಗಳನ್ನು ಅಂದಾಜು ಮಾಡಲು ಕಂಟ್ರೋಲರ್ ಜನರಲ್ ಆಫ್ ಅಕೌಂಟ್ಸ್ (CGA) ಮತ್ತು ಭಾರತದ ಕಂಟ್ರೋಲರ್ ಮತ್ತು ಆಡಿಟರ್ ಜನರಲ್ (CAG) ಅವರ ವೆಬ್‌ ಸೈಟ್‌ ಗಳಲ್ಲಿನ ಮಾಹಿತಿಯನ್ನು ಬಳಸಲಾಗಿದೆ. ಸ್ಥಿರ ಬೆಲೆಗಳಲ್ಲಿ ಉತ್ಪನ್ನಗಳ ಮೇಲಿನ ತೆರಿಗೆಗಳನ್ನು ಸಂಗ್ರಹಿಸಲು, ತೆರಿಗೆ ವಿಧಿಸಿದ ಸರಕು ಮತ್ತು ಸೇವೆಗಳ ಪ್ರಮಾಣದ ಬೆಳವಣಿಗೆಯನ್ನು ಬಳಸಿ ಪ್ರಮಾಣದ ವಿಸ್ತರಣೆಯನ್ನು ಮಾಡಲಾಗುತ್ತದೆ. ಕೇಂದ್ರ ಸರ್ಕಾರದ ಚಾಲ್ತಿ ಬೆಲೆಗಳಲ್ಲಿನ ಒಟ್ಟು ಉತ್ಪನ್ನ ಸಬ್ಸಿಡಿಗಳನ್ನು, 2025-26ನೇ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದವರೆಗಿನ ಪ್ರಮುಖ ಸಬ್ಸಿಡಿಗಳಾದ ಆಹಾರ, ಯೂರಿಯಾ, ಪೆಟ್ರೋಲಿಯಂ ಮತ್ತು ಪೋಷಕಾಂಶ ಆಧಾರಿತ ಸಬ್ಸಿಡಿಗಳ ಮಾಹಿತಿಯನ್ನು ಬಳಸಿ ಸಂಗ್ರಹಿಸಲಾಗಿದೆ. ರಾಜ್ಯ ಸರ್ಕಾರಗಳ ಚಾಲ್ತಿ ಬೆಲೆಗಳಲ್ಲಿನ ಒಟ್ಟು ಉತ್ಪನ್ನ ಸಬ್ಸಿಡಿಗಳನ್ನು, 2025-26ನೇ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದವರೆಗೆ ರಾಜ್ಯಗಳು ಮಾಡಿದ ಒಟ್ಟು ಸಬ್ಸಿಡಿ ವೆಚ್ಚದ ಮಾಹಿತಿಯನ್ನು ಬಳಸಿ ಸಂಗ್ರಹಿಸಲಾಗಿದೆ. ಕೇಂದ್ರ ಮತ್ತು ರಾಜ್ಯಗಳಿಂದ ಲಭ್ಯವಿರುವ ಕಂದಾಯ ವೆಚ್ಚ, ಬಡ್ಡಿ ಪಾವತಿಗಳು, ಸಬ್ಸಿಡಿಗಳು ಇತ್ಯಾದಿಗಳ ಮಾಹಿತಿಯನ್ನು ಸರ್ಕಾರಿ ಅಂತಿಮ ಬಳಕೆಯ ವೆಚ್ಚವನ್ನು (GFCE) ಅಂದಾಜು ಮಾಡಲು ಬಳಸಲಾಗಿದೆ.

ಮೂಲ ಸಂಸ್ಥೆಗಳು ಒದಗಿಸುವ ದತ್ತಾಂಶಗಳಲ್ಲಿನ ಪರಿಷ್ಕರಣೆ ಮತ್ತು ಸುಧಾರಿತ ದತ್ತಾಂಶ ವ್ಯಾಪ್ತಿಯು, ಈ ಅಂದಾಜುಗಳ ಮುಂದಿನ ಪರಿಷ್ಕರಣೆಗಳ ಮೇಲೆ ಪರಿಣಾಮ ಬೀರುತ್ತವೆ. ಆದ್ದರಿಂದ, ಬಿಡುಗಡೆಯ ವೇಳಾಪಟ್ಟಿಯ ಪ್ರಕಾರ, ಈ ಮೇಲೆ ತಿಳಿಸಿದ ಕಾರಣಗಳಿಗಾಗಿ ಅಂದಾಜುಗಳು ಸಮಯಾನುಸಾರ ಪರಿಷ್ಕರಣೆಗೆ ಒಳಗಾಗುವ ಸಾಧ್ಯತೆಯಿದೆ. ಬಳಕೆದಾರರು ಈ ಅಂಕಿಅಂಶಗಳನ್ನು ವಿಶ್ಲೇಷಿಸುವಾಗ ಈ ಅಂಶಗಳನ್ನು ಪರಿಗಣನೆಗೆ ತೆಗೆದುಕೊಳ್ಳಬೇಕು. 2025-26ನೇ ಆರ್ಥಿಕ ವರ್ಷದ ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕದ (Q2, FY 2025-26) ಮುಂದಿನ ಜಿಡಿಪಿ ಅಂದಾಜುಗಳನ್ನು 28.11.2025 ರಂದು ಬಿಡುಗಡೆ ಮಾಡಲಾಗುವುದು.

*****

ಅನುಬಂಧ ಎ

ಅನುಬಂಧ ಬಿ

Click here to see PDF

 

*****


(Release ID: 2162096) Visitor Counter : 21
Read this release in: Odia , English , Urdu , Marathi , Hindi , Punjabi