U Myntri Sorkar Pdeng ba dei khmih ia ka Tnad Electronics and Information Technology u Ashwini Vaishnaw ryngkat u Myntri Rangbah ka jylla Gujarat u Bhupendra Patel mynta ka sngi ki la plie paidbah ia kawei na ki end-to-end Semiconductor OSAT Pilot Line Facility jong ka CG Power kaba nyngkong eh ha India ha Sanand, Gujarat. Kane ka jingialang kadei ka jingsdang ba kongsan ha ka jingïaid lynti jong ka India ha ka kam semiconductor hapoh ka jingïalam ba don jingïohi jngai jong u Myntri Rangbahduh ka ri u Narendra Modi.

Haba ai jingkren ha kane ka sngi, u Myntri u la ong ba ka jingplie ïa ki mar ba nyngkong ka dei ka sienjam kaba kongsan ha kaba pynurlong ïa ka jingangnud jong ka Bharat ban kyntiew ïa ka jingsaindur ia ka semiconductor, ka jingshna, bad ki lad kiba iadei bad kane ka kam, ha kaba ka Gujarat ka long kum ka jaka ba kongsan ha kane ka jingkylla. U Vaishnaw u la pynpaw ia ka bynta ba kongsan jong ka OSAT Pilot Line, da kaba ong ba ia ki chip ba la shna hangne ​​yn pyndonkam na ka bynta ka jingpynbiang ia ki nongthied. Shisien ba la mynjur ia kine ki chip, ka long kaba suk shibun ia ki karkhana khaii ban sdang ban pynmih pura ia ki mar kiba biang. U la ban jur ba kane ka jingplie paidbah ka long napdeng ki mawmer ba kongsan ba la ïoh hapoh ka India Semiconductor Mission, kaba la mynjur ïa shiphew tylli ki projek haduh mynta.

Haba pynpaw ïa ka jingdonkam ban kyntiew ïa ka nongrim ba khlaiñ jong ki riewdonsap, u Myntri u la ong ba kawei na ki jingthmu ba kongsan jong ka India Semiconductor Mission ka long ban pynbiang ia ki riew shemphang kiba tbit. Shuwa u snem 2032, la antad ba ka pyrthei kan iakynduh ia ka jingduna kaba shi million ngut ki briew ba tbit ha ka kam semiconductor, bad ka India ka don ka lad ban pyndap ia ka bynta kaba kongsan jong kane ka jingduna.

Na ka bynta kane, ka Sorkar ka la ïatreilang bad 270 tylli ki skulbah bad pynbiang ïa ki da ki tiar shna semiconductor kiba thymmai tam. Tang ha u snem 2025, kine ki tiar ki la ïoh ïa ka jingpyndonkam palat 1.2 klur. Namar kane, 20 tylli ki chip ba la saindur da 17 tylli ki jaka pule la dep ban shna ha ka Semi-Conductor Laboratory (SCL), Mohali.

U Myntri u la ong ba tang khyndiat eh ki ri ha ka pyrthei kiba ailad ïa ki samla pule ban ïoh ïa kum kine ki tiar. U la bynrap ba kane ka ienjam kan pynkupbor ïa ki samla jong ka India, kan pynkhlain ïa ka jinglong jingman ha ka liang ka teknikal, bad kan buh ïa ka ri kum ka jaka pdeng jong ki riewdonsap ha ka kam semiconductor ha ka pyrthei. U la ai khublei ruh ïa ka jingkyrshan ba tyngeh jong ka Sorkar Gujarat bad u Myntri Rangbah ka Jylla u Bhupendra Patel ha kaba kyntiew ïa ka jinglong jingman ka kam semiconductor ha Gujarat.

U Myntri Rangbah ka Jylla u Bhupendra Patel u la iaroh ia kane ka sienjam, da kaba pynpaw ia ka bynta jong ka ha kaba buh ia ka ri kum ka nongialam ha ka jingsaindur bad shna ia ki semiconductor. U Myntri ka Tnad kam karkhana jong ka jylla, u Balwant Singh Rajput. U MLA Kanhubhai Patel, bad ki heh ophisar jong ka MeitY bad ki nongialam jong ka CG Semi ki la iadonlang ha kane ka jingialang.

Shaphang ka jaka CG Semi OSAT

Ka jaka CG Semi kaba don ha Sanand, Gujarat, ka dei kawei na ki karkhana Outsourced Semiconductor Assembly and Test (OSAT) ba nyngkong eh jong ka India. Ka ai ia ki lad ki lynti na ka bynta ka jingpyniasoh ia ki chip, ka jingsong, ka jingtest bad ki jingshakri hadien ka jingtest, kaba kynthup ia ki buit tynrai bad ki teknoloji packaging kiba katkum ka juk mynta. Kane ka dei ka sienjam kaba kongsan ban pynkhlain ia ka bor jong ka India ha ka kam semiconductor bad ban kyrshan ia ka thong jong ka ri ban long kaba lah ban kyrshan dalade katba ka shakri ruh ia ki iew ka pyrthei.

Da ka jingkyrshan ka sorkar pdeng bad ka sorkar jylla, ka CG Semi ka bei tyngka palat T.7,600 klur (~USD 870 million) ha ki san snem ban kyntiew ia ar tylli ki jaka treikam kiba katkum ka juk mynta (G1 bad G2) ha Sanand, Gujarat.

Ka jaka treikam ka G1, kaba la plie mynta ka sngi, ka lah ban pynmih haduh 0.5 million unit ha ka shi sngi. Ka long kaba la pynkhreh ban pyniaid ia ka jingpyniasoh ia baroh ki kam kiba iadei bad ki chip, ka packaging, ka jingtest, bad ki jingshakri hadien ka jingtest. Ka jaka ka don ïa ki tiar kiba lah ban pynmih bun ki mar, ka rukom pyntreikam Manufacturing Execution System (MES) kaba thymmai tam na ka bynta ka jingpyntreikam hi dalade ha ka kyrdan 1 bad ka jinglah ban wad bniah, bad ki lab na ka bynta ka jingshaniah bad ka jingpeit bniah ïa ki jingthut. Mynta ka dang don hapoh ka jingpynskhem jong ka ISO 9001 bad IATF 16949. Ka customer qualification ha ki package bapher bapher kan sdang hadien ka jinglie paidbah. Ka CG Semi ka la pynkhreh ban sdang ia ka jingpynmih mar ha u snem 2026, kumba la kular ha ka ISM.

Ha ka jingjngai kaba kumba 3 km na G1, ka jaka treikam jong ka G2 ka dei kaba dang shna bad la khmih lynti ba yn pyndep ha kaba kut jong u snem 2026. Shisien ba la treikam, ka G2 kan sa kiew sha ka jinglah ban pynmih kumba 14.5 million unit ha ka shi sngi. Lada khein lang, kine ki ar tylli ki jaka la antad ba kin pynmih palat 5,000 tylli ki kam ba la skhem bad ruh ki kam kiba iadei bad ki ha ki snem ban wan.

Haba kren ha ka jingplie paidbah, u Vellayan Subbiah, Chairman jong ka CG Power, u la ong: “Kane ka jaka kam dei tang u mawmer na ka bynta jong nga ne na ka bynta ka CG Semi; ka long kum u mawjam jong ka ri baroh. Ka pyni kumno ka Sorkar bad ki Karkhana ki lah ban iawan lang da ka jingsngewskhem, ka pisa, bad ka jingpyniar ia ka kam ban pynurlong ia ka jingthmu ba la buh da u Myntri Rangbahduh ba donburom jong ngi. Man la ki chip kiba ngi shna hangne ​​ki long kum ka sienjam sha ka jinglah synshar dalade ka India ha ka liang ka teknoloji.”

Ban shna bad pyntreikam ia ka OSAT, ka CG Semi ka la pyniasoh lang ia ka kynhun jong ki riew shemphang ha kane ka kam kiba la don ka jingshemphang kaba la khein kyllum lang ban long 1,000 snem ha ki kam shna semiconductor. Ka kompeni ka la kiew bha ruh ha ka jingkyntiew ïa ki nongtrei da kaba phah ïa ki enjiniar, ki nongpynïaid, bad ki riew shemphang na India sha Malaysia haduh lai bnai ban ioh jinghikai—kaba pynthikna ïa ka jingioh jinghikai kaba kham stet bad ka jingpynkhreh na ka bynta ki kam kiba heh.

Da kane ka jingsdang ia ka kam, ka CG Semi ka la pynkhreh ban leh ïa ka bynta kaba kongsan ha kaba kyntiew ïa ka jingthmu jong ka India bad ban pynkhlain ïa ka kam semiconductor jong ka ri.

Shaphang ka CG Semi

Ka CG Semi ka dei ka jingtreilang hapdeng ka CG Power and Industrial Solutions Ltd. (Murugappa Group), ka Renesas Electronics Corporation (kaba trei ha ki kam semiconductor ha kylleng ka pyrthei), bad ka Stars Microelectronics (kaba trei ha ki kam OSAT & EMS kaba don ha Thailand). Ka CG Semi kaba don ha Sanand, Gujarat, ka ai ïa ki lad ki lynti kiba bniah na ka bynta ban pynïasoh bad test ïa ki semiconductor, kaba kynthup ïa ki package kiba kham bha bad kiba la rim kum ka SOIC, QFP, QFN, BGA, FCQFN, bad FCBGA. Ka kompeni ka don kti ha ki kam bapher bapher kum ki kali, ka kam iada ri, ki jingtei, bad ka IoT.