الیکٹرانکس اور انفارمیشن ٹکنالوجی کے مرکزی وزیر جناب اشونی ویشنو نے گجرات کے وزیر اعلی جناب بھوپندر پٹیل کے ساتھ آج گجرات کے سانند میں سی جی پاور کی بھارت کی پہلی سیمی کنڈکٹر اوسیٹ پائلٹ لائن سہولت کا افتتاح کیا۔ یہ تقریب وزیر اعظم جناب نریندر مودی کی دور اندیش قیادت میں بھارت کے سیمی کنڈکٹر سفر کا تاریخی آغاز ہے۔

اس موقع پر اظہار خیال کرتے ہوئے وزیر موصوف نے کہا کہ پائلٹ لائن کا افتتاح سیمی کنڈکٹر ڈیزائن، مینوفیکچرنگ اور ڈاؤن اسٹریم صلاحیتوں کو فروغ دینے کے بھارت کے خواب کو پورا کرنے کی سمت میں ایک فیصلہ کن قدم ہے اور گجرات اس تبدیلی میں ایک اہم مرکز کے طور پر ابھر رہا ہے۔ جناب ویشنو نے اوسیٹ پائلٹ لائن کے اہم کردار پر روشنی ڈالتے ہوئے کہا کہ یہاں تیار کردہ چپس کو کسٹمر کوالیفکیشن کے لیے استعمال کیا جائے گا۔ ایک بار جب ان چپس کی منظوری مل جاتی ہے تو ، تجارتی پلانٹس کے لیے اہل مصنوعات کی مکمل پیمانے پر پیداوار شروع کرنا بہت آسان ہوجاتا ہے۔ انھوں نے کہا کہ  یہ افتتاح انڈیا سیمی کنڈکٹر مشن کے تحت حاصل کئے گئے سب سے اہم سنگ میل میں سے ایک ہے ، جس نے اب تک دس پروجیکٹوں کو منظوری دی ہے۔

مضبوط ٹیلنٹ بیس تیار کرنے کی اہمیت پر روشنی ڈالتے ہوئے وزیر موصوف نے کہا کہ انڈیا سیمی کنڈکٹر مشن کا ایک اہم مقصد ہنرمند پیشہ ور افراد کی عالمی پائپ لائن تیار کرنا ہے۔ 2032 تک دنیا کو دس لاکھ سیمی کنڈکٹر پروفیشنلز کی کمی کا سامنا کرنا پڑے گا اور بھارت کے پاس اس فرق کے ایک اہم حصے کو پر کرنے کا موقع ہے۔

اس مقصد کے لیے حکومت نے 270 یونیورسٹیوں کے ساتھ ساجھیداری کی ہے اور انھیں جدید سیمی کنڈکٹر ڈیزائن ٹولز سے لیس کیا ہے۔ صرف 2025 میں ان ٹولز کا 1.2 کروڑ سے زیادہ استعمال ریکارڈ کیا گیا۔ اس کے براہ راست نتیجے کے طور پر 17 اداروں کے ذریعہ تیار کردہ 20 چپس پہلے ہی سیمی کنڈکٹر لیبارٹری (ایس سی ایل) موہالی میں کامیابی کے ساتھ تیار کی جاچکی ہیں۔

انھوں نے کہا کہ دنیا کے بہت کم ممالک طلبہ کو اس طرح کے جدید آلات تک رسائی فراہم کرتے ہیں۔ انھوں نے مزید کہا کہ یہ اقدام بھارتی نوجوانوں کو بااختیار بنائے گا، تکنیکی ایکو سسٹم کو مضبوط کرے گا اور ملک کو سیمی کنڈکٹر ٹیلنٹ کے عالمی مرکز کے طور پر کھڑا کرے گا۔ انھوں نے گجرات میں سیمی کنڈکٹر ایکو سسٹم کی ترقی میں گجرات حکومت اور وزیر اعلی جناب بھوپندر پٹیل کی مضبوط حمایت کا بھی اعتراف کیا۔

چیف منسٹر جناب بھوپیندر پٹیل نے اس اقدام کی ستائش کی اور سیمی کنڈکٹر ڈیزائن اور مینوفیکچرنگ میں ملک کو قائد کے طور پر پیش کرنے میں اس کے رول کو نمایاں کیا۔ ریاستی وزیر صنعت جناب بلونت سنگھ راجپوت۔ اس موقع پر ایم ایل اے جناب کانہو بھائی پٹیل اور ایم ای آئی ٹی وائی کے سینئر عہدیدار اور سی جی سیمی کی قیادت بھی موجود تھی۔

سی جی سیمی اوسیٹ سہولت کے بارے میں

گجرات کے سانند میں واقع سی جی سیمی سہولت بھارت کے پہلے مکمل پیمانے پر آؤٹ سورسڈ سیمی کنڈکٹر اسمبلی اور ٹیسٹ (او ایس اے ٹی) پلانٹس میں سے ایک ہے۔ یہ روایتی اور جدید پیکیجنگ ٹیکنالوجیز دونوں کا احاطہ کرتے ہوئے چپ اسمبلی ، پیکیجنگ ، ٹیسٹنگ اور پوسٹ ٹیسٹ خدمات کے لیے اینڈ ٹو اینڈ حل فراہم کرتا ہے۔ یہ بھارت کی سیمی کنڈکٹر صلاحیتوں کو مضبوط بنانے اور عالمی منڈیوں کی خدمت کرتے ہوئے خود کفیل بننے کے ملک کے ہدف کی حمایت کرنے کی سمت میں ایک اہم قدم ہے۔

مرکزی اور ریاستی حکومت کی مدد سے سی جی سیمی گجرات کے سانند میں دو جدید سہولیات (جی 1 اور جی 2) کی ترقی کے لیے پانچ برسوں میں 7،600 کروڑ روپے (~ 870 ملین امریکی ڈالر) سے زیادہ کی سرمایہ کاری کر رہا ہے۔

جی ون سہولت، جس کا آج افتتاح کیا گیا ہے، تقریباً 0.5 ملین یونٹ یومیہ کی اعلی صلاحیت کے ساتھ کام کرے گا۔ یہ اینڈ-ٹو-اینڈ چپ اسمبلی، پیکیجنگ، ٹیسٹنگ، اور پوسٹ ٹیسٹ خدمات کو سنبھالنے کے لیے لیس ہے۔ اس سہولت میں اعلی پیداوار کا سامان، لیول 1 آٹومیشن اور ٹریسیبلٹی کے لیے جدید مینوفیکچرنگ ایگزیکیوشن سسٹم (ایم ای ایس) اور قابل اعتماد اور ناکامی کے تجزیے کے لیے ان ہاؤس لیبارٹریز شامل ہیں۔ یہ فی الحال آئی ایس او 9001 اور آئی اے ٹی ایف 16949 سرٹیفیکیشن سے گزر رہا ہے۔ افتتاح کے بعد مختلف پیکیجز میں چلنے والی کسٹمر کوالیفکیشن شروع ہوجائے گی۔ سی جی سیمی آئی ایس ایم کے ساتھ عہد کے مطابق کیلنڈر سال 2026 میں کمرشل پروڈکشن شروع کرنے کی راہ پر گامزن ہے۔

جی 1 سے تقریباً 3 کلومیٹر کے فاصلے پر واقع ، جی 2 سہولت زیر تعمیر ہے اور توقع ہے کہ کیلنڈر سال 2026 کے آخر تک مکمل ہوجائے گی۔ ایک بار آپریشنل ہونے کے بعد ، جی 2 روزانہ تقریباً 14.5 ملین یونٹس کی صلاحیت تک بڑھ جائے گا۔ آنے والے برسوں میں دونوں تنصیبات مل کر 5000 سے زیادہ براہ راست اور بالواسطہ ملازمتیں پیدا کریں گی۔

افتتاحی تقریب میں خطاب کرتے ہوئے سی جی پاور کے چیئرمین جناب ویلان سبیاح نے کہا: ’’یہ سہولت میرے لیے یا سی جی سیمی کے لیے ایک سنگ میل سے زیادہ کی نمائندگی کرتی ہے۔ یہ ایک قومی سنگ میل ہے۔ اس سے پتہ چلتا ہے کہ کس طرح حکومت اور صنعت ہمارے عزت مآب وزیر اعظم کے وژن کو حاصل کرنے کے لیے عزم، سرمائے اور پیمانے کے ساتھ مل کر کام کر سکتی ہے۔ یہاں ہم جو بھی چپ بناتے ہیں وہ بھارت کی تکنیکی خودمختاری کی طرف ایک قدم ہے۔

اوسیٹ کی تعمیر اور اسے چلانے کے لیے سی جی سیمی نے سیمی کنڈکٹر میں 1000 سال سے زائد کا مشترکہ تجربہ رکھنے والے صنعت کے تجربہ کار افراد کی ایک ٹیم کو اکٹھا کیا ہے۔ کمپنی نے بھارتی انجینئروں، آپریٹرز اور تکنیکی ماہرین کو تین ماہ کی تربیت کے لیے ملائشیا بھیج کر افرادی قوت کی ترقی میں بھی نمایاں پیش رفت کی ہے ۔

اس لانچ کے ساتھ سی جی سیمی بھارت کے آتم نربھر بھارت وژن کو آگے بڑھانے اور ملک کے سیمی کنڈکٹر ایکو سسٹم کو مضبوط بنانے میں اہم کردار ادا کرنے کے لیے تیار ہے۔

سی جی سیمی کے بارے میں

سی جی سیمی سی جی پاور اینڈ انڈسٹریل سلوشنز لمیٹڈ (موروگاپا گروپ)، رینیاس الیکٹرانکس کارپوریشن (ایک عالمی سیمی کنڈکٹر پلیئر) اور اسٹارز مائیکرو الیکٹرانکس (تھائی لینڈ میں قائم اوسیٹ اور ای ایم ایس پلیئر) کا مشترکہ منصوبہ ہے۔ سی جی سیمی سیمی کنڈکٹر اسمبلی اور ٹیسٹ کے لیے جامع ٹرن کی حل فراہم کرتا ہے ، جس میں ایس او آئی سی ، کیو ایف پی ، کیو ایف این ، بی جی اے ، ایف سی کیو ایف این ، اور ایف سی بی جی اے جیسے جدید اور وراثتی پیکیجوں کا احاطہ کیا گیا ہے۔ کمپنی آٹوموٹو ، ڈیفنس ، انفراسٹرکچر اور آئی او ٹی جیسی صنعتوں میں متنوع ایپلی کیشنز کی خدمت کرتی ہے۔

***

(ش ح – ع ا)

U. No. 5420