ঙসি প্রধান মন্ত্রী শ্রী নরেন্দ্র মোদীনা ভিদিও মেসেজ অমগী খুৎথাংদা অহমেদবাদতা, সরদারধাম ফেজ-২, কন্যা ছত্রালয় উরেপ-উয়ুং তম্বা থৌরমদা ৱা ঙাংখ্রে। থৌরম অদুদা ৱা ঙাংবদা, প্রধান মন্ত্রীনা হায়খি সরদারধাম অসি মসিগী থবকগুম্না অশেংবনি অমসুং হোষ্টেল অমা শঙ্গারিবা অসি ইচানুপীশিংগী থবক অমসুং লাইরিক-লাইশু তম্বদা কৎথোক্লে। হোষ্টেল অসিদা লৈগদৌরিবা নুপীমচাশিংনা মখোয়গী অনিংবশিং অমসুং মঙলানশিং পুদুনা লাক্কনি অমসুং মখোয় ফংনবা খুদোংচাবা কয়া পীগনি। নুপীমচাশিং অসিনা মশা মরোমদোম লেপচবা ঙম্লকপদা, লৈবাক শেমগৎপগী থবক্ত মখোয়না মরুওইবা থৌদাং অমা লৌগনি অমসুং মখোয়গী ইমুংশিংগী ফিবমসু ফগৎলক্কনি। হোষ্টেল অসিদা লৈনবা খুদোংচাবা ফংগদৌরিবা নুপীমচাশিং অমসুং মখোয়গী ইমুং-মনুংশিংগী মীওইশিংদা তুংগী য়াইফনবগীদমক প্রধান মন্ত্রীনা মহাক্কী য়াইফ পাউজেল পীখি।

গার্লস হোষ্টেল ফেজ-২ গী উরেপ-উয়ুং তম্নবগী খুদোংচাবা পীবগীদমক তৌবীমল খঙবা উৎলদুনা, প্রধান মন্ত্রীনা হায়খি খুন্নাইগীদমক কৎথোক্লবা থবকশিংগী খুৎথাংদা হৌজিক নুপীমচা ৩,০০০ গী অফবা অচৌবা খুদোংচাবা অমা ফংলে। বদোদারাদা মহৈরোয় ২০০০গী হোষ্টেল অমা শাবা লোইশিল্লক্লে। সুরত, রাজকোত অমসুং মেহসনাদা লাইরিক-লাইশু অমসুং ত্রেনিংগী অসিগুম্বা মফমশিং শেমগৎলি। হায়রিবা থবকশিং অসিদা মতেং পাংলিবা খুদিংমক থাগৎপা ফোঙদোকচরি। খুন্নাইগী মপাঙ্গলদগী লৈবাক অমা চাউখৎপনি অমসুং সরদার ভাল্লাবভাই পতেলগী মফমদা ইকায়খুম্নবা উৎচরি।

মহাক্না গুজরাতকী চীফ মিনিষ্টর ওইরিঙৈগী মতম নিংশিংলদুনা, প্রধান মন্ত্রীনা হায়খি ভারত চাউখৎনবগীদমক গুজরাত চাউখৎহনবা তঙাইফদে হায়না মহাক্না মতম পুম্নমক্ত খনখি। ঙসিদি, গুজরাত্তগী তমখিবা পারাশিংনা লৈবাক চাউখৎহনবদা মতেং পাংলি। চহি ২৫-৩০ গী মমাংদা গুজরাতনা অরুবা ইন্দিগেতরশিং মায়োক্নখি অমসুং খুন্নাইগী অৱাবশিং কোকহন্নবা রাজ্য অসিগী মপাঙ্গল শীজিন্নবা তাখি। মহাক্না চীফ মিনিষ্টর ওইরকপা মতমদা, নুপীমচাশিং লাইরিক লাইশুগী লমদা শোৎথবা অমসুং ইমুং কয়া মখোয়গী মচানুপীশিং স্কুল কাহন্দবা অমসুং স্কুল কারবা নুপীমচাশিং ঙন্না লাইরিক তম্বা তোকপা থেংনবদা মহাক থম্মোয় কায়খি। চহি ২৫ গী মমাঙদা মীয়ামগী মতেংদগী ফিবম অসি অহোংবা পুরকখি। প্রধান মন্ত্রীনা মীয়ামদা “কন্যা সিক্ষ রথ যাত্রা” নিংশিংখি, জুন থাগী সেলসিয়স দিগ্রি ৪০-৪২ গী শারবা নুংশাগী মৈশা নিংশিংখি, মখোয়না খুঙ্গংশিং অমসুং য়ুমশিংদা চৎপা মতমদা, মমা-মপাশিংনা মচানুপীশিং স্কুলদা থিনবা অদু নিংশিংখি। যাত্রা অদুনা মরম ওইদুনা স্কুল কাবগী চাং হেনগৎলকখি অমসুং থবকশিং অদুগী কান্নবশিং ফংবদা চাউথোকচবা পোকখি। যাত্রা অদুগী ফল ওইনা স্কুল শাগৎলে, অনৌবা খুদোংচাবশিং ফংহল্লে, থবকশিং ফগৎহল্লে অমসুং ওজাশিং হাপ্লে। খুন্নাই থৱায় য়াওনা শরুক য়াখি অমসুং খুন্নাইগী থৌদাংশিং মপুংফানা পাংথোক্লে। মতম অদুদা স্কুল কাখিবা অঙাং অয়াম্বা হৌজিক দোক্তরশিং অমসুং ইঞ্জিনিয়ারশিং ওইরে, লাইরিক তম্বা তোকপগী চাং হন্থরে অমসুং গুজরাত শীনবা থুংনা লাইরিক তম্নিংবগী খৌরাংবা অমা লৈখি।

অতোপ্পা মরুওইবা ৱাফম অমা পল্লদুনা, প্রধান মন্ত্রীনা হায়খি অঙাং নুপীমচাশিং মমাগী শিওমনুঙদা লৈরিঙৈদা হাৎপা হায়বসি অচৌবা পাপ অমনি। ৱাফম অসিদা খুন্নাইগী লাংতক্নবা লৈখি অমসুং মসিগী মায়োক্ত খোঙজং অমা পায়খৎনবা মহাক মতেং ফংখি। সুরত্তগী উমিয়া মাতা ফাওবগী খোঙচৎ অদুদা নুপা-নুপী থোং মান্নবগী ৱাখল্লোন মপাঙ্গল কনখৎহনবদা মতেং পাংখি। লাইরেম্বীশিং- উমিয়া মাতা, খোদিয়ার মাতা, কালি মাতা, অম্বা মাতা নত্ত্রগা বহুচার মাতা লাৎলিবা লমদম অমা ওইরিবা গুজরাতনা অঙাং নুপীমচাশিং মমাগী শিওমনুঙদা লৈরিঙৈদা হাৎপগী দাগফম তাহল্লোইদবনি। মসিগী ৱাখল্লোন অসি হেক মিকপ থোকহনবদগী মীয়ামগী মতেং ফংখি অমসুং অঙাং নুপামচা-নুপীমচাগী রেসিওদা লৈরম্বা অহোবা অদু গুজরাতনা মাইপাক্না মেনখৎপা হৌরকখি।

প্রধান মন্ত্রীনা হায়খি খুন্নাইগী য়াইফনবা পুকচেল শেংনা থবকশিং পায়খৎলকপা মতমদা, ঈশ্বরনা মতেং পাংলকই- অমসুং খুন্নাই মশামক ঈশ্বরগী শক্তি অমা ওইরকই। ঙসিদি অসিগুম্বা থবকশিংগী মহৈ চারে অমসুং ঙসি খুন্নাইদা অনৌবা মিকপ অমা থোক্লে। নুপীমচাশিং লাইরক তমহন্নবা, মখোয়গী ইকায়খুম্নবা হেনগৎহন্নবা অমসুং অচৌবা হোষ্টেলশিং শাবা য়াওনা মখোয়গী খুদোংচাবা কয়া শেমগৎনবা হৌজিক মীয়াম থৱায় য়াওনা চোঙথোরক্লে। গুজরাত্ত হুনখিবা মরু অদু হৌজিক লৈবাক শীনবা থুংবগী খোঙজং অমা- “বেতি-বেতিয়োন, বেতি পরাউ” ওইরে, মসি মীয়ামগী খোঙজং অমা ওইরে। নুপীশিং অশোই-অঙাম থোক্তনবা অমসুং ফিবম ফগৎনবা পুৱারি ওইরবা থবক অসি লৈবাক শীনবা থুংনা পায়খৎলি।

ওপরেসন সিন্দুরগী মতাংদা, প্রধান মন্ত্রীনা হায়খি ইচানুপীশিংগী খোঞ্জেলশিং অমসুং থৌনাশিং তারে অমসুং মশক খঙলে। খুঙ্গংশিংদা লাখপতি দিদি করোর ৩ শেমগৎনবা পান্দম থমখিবা অদুগী মনুংদা করোর ২ ফংবা ঙমখ্রে। দ্রোন দিদিগুম্বা থবকশিংনা খুঙ্গংশিংদা খুন্নাইনা নুপীশিংদা য়েংলম্বা মীৎয়েংশিং হোংহল্লে। “বেঙ্ক শখি” অমসুং “বিমা শখি” গুম্বা স্কিমশিংদা ভারতকী নুপীশিংগী থৌনাগী থবকশিংগী খুৎথাংদা খুঙ্গংগী শেন-থুমগী ফিবম ফগৎলে।

লাইরিক-লাইশু তম্বগী মরুওইবা পান্দমদি খুন্নাইগী কান্নগদবা মীওইশিং শেমগৎপা অমসুং মখোয়গী তৌবা ঙম্বশিং হেনগৎহনবনি। ঙসিগী য়াংনা চৎলিবা মালেম অসিদা, মসিগী পান্দম অসি অমুক্কা হেন্না চুনরে। স্কিলশিং অমসুং লৌশিংদা চাংদম্নবগী থৌনা অমা লৈগদবনি অমসুং খুন্নাই অমগী অশেংবা মপাঙ্গল অসি খুন্নাই অদুগী মীয়ামগী স্কিলদা য়ুম্ফম ওই। মালেমগী লৈবাকশিংনা ভারতকী হৈথোই-শিংথোইরবা মীওইশিং য়াম্না পাম্নরে অমসুং চহি কয়া মমাঙগী সরকারশিংনা মতমগা চুনদ্রবা লাইরিক-লাইশু তম্বীগী থবকশিং পায়খৎলমখি। সরকার অসিনা অফবা অহোংবা কয়া পুরক্লে, অরিবা থবকশিং শীজিন্নদ্রে অমসুং লাইরিক-লাইশুগী থবকশিংদা অহোংবা পুরক্লে।

প্রধান মন্ত্রীনা হায়খি অনৌবা নেসনেল ইজুকেসন পোলিসিনা স্কিল দিবলপমেন্তনা অকনবা মীৎয়েং চঙলে। স্কিল ইন্দিয়া মিসনগী মখাদা তোঙান তোঙানবা হিরমশিংদা নহারোল মিল্লিয়ন কয়া হৈথোই-শিংথোইরবা মীওইশিং ওইহন্নবা সরকারনা থবক পায়খৎলি। অহল ওইশিল্লক্লবা মীওই মশিং য়ামগৎলকপগী অচৌবা খুদোংচাদবা অমা মালেম্না থেংনরি অমসুং হৈশিংবা নহারোল কয়া দরকার ওইরে অমসুং মসিদা মাঙজিল থানবগী থৌনা ভারতকী লৈরি। নহারোলশিং স্কিল লৈহনবা মতমদা, মসিনা থবক ফংনবগী য়াম্লবা খুদোংচাবশিং পীরি, মশানা মশাবু থাজবা অমসুং মশা মরোমদোম লেপচবা ঙম্বা হেনগৎহল্লে। নহারোলশিংগীদমক থবক য়াম্না পীনবা সরকারনা অকনবা মীয়েং চঙলি।

প্রধান মন্ত্রীনা হায়খি চহি ১১ গী মমাঙদা, ভারত্ত ষ্টার্দঅপ খর খক্ত লৈরমখি, ঙসিদি মশিং ২০০,০০০ য়ৌশিল্লক্লে। হৌজিক তয়ার-২ অমসুং তয়ার-৩ সহরশিংদা ষ্টার্দঅপশিং থোরক্লে। মুদ্র য়োজনা হৌদোকপদগী নহারোলশিং গরেন্তর য়াওদনা বেঙ্ক লোনশিং ফংলে। মসিগী ফল ওইনা, মশানা মশা থবক পীজনবা নহারোলশিংদা লুপা করোর লাখ ৩৩ ফংহনখ্রে। থবক অসিনা নহারোল লাখ কয়া অত্মনির্ভর ওইনবা শক্তি পীরে অমসুং অতোপ্পা মীওই কয়াসু থবক ফংলে। লুপা করোর লাখ ১ গী প্রধান মন্ত্রী বিকসিত ভারত রোজগার য়োজনা পায়খৎনবা মহাক্না নিংতম্বা নুমিত্ত মীয়ামদা ৱা ঙাংবদা লাউথোকখ্রে। স্কিম অসিগী মখাদা, কনাগুম্বা অমা প্রাইভেদ সেক্তরদা থবক ফংবা মতমদা, মহাক্কী অহানবা তোলোব ফংবদা সরকারনা লুপা ১৫,০০০ পীগনি।

প্রধান মন্ত্রীনা হায়খি অয়াংবা খোঙজেল অমদা লৈবাক শীনবা থুংনা ইনফ্রাষ্ট্রকচর শেমগৎপগী থবক খুমাঙচাউশিল্লি। প্রধান মন্ত্রী সু্র্য়া ঘর মুফ বিলজি য়োজনাগী মখাদা সোলার সিষ্টেমশিং খিনবগী থবকশিং পাক-শন্না পায়খৎলি। দ্রোন অমসুং দিফেন্স সিষ্টেমশিংদা ভারত মখা তানা চাউখৎলকপা উরে। মিসন্না লমজিংবা মেনুফেকচরিংদা সরকারনা অকনবা মীৎয়েং চঙলি। হায়রিবা থবকশিং অসিনা গুজরাত্ত অনৌবা থবক কয়া ফংহল্লে।

প্রধান মন্ত্রীনা হায়খি মালেম্না ভারতকী হোৎনবা অমসুং হৈথোই-শিংথোইবা লুম্না লৌরি অমসুং মসিগী গুনশিং ইকায়খুম্নরি, মসিগী ফল ওইনা, তোঙান তোঙানবা লৈবাকশিংদা খুদোংচাবা কয়া ফংলে। অনা-লায়য়েং, লাইরিক-লাইশু অমসুং স্পেসগুম্বা হিরমশিংদা মালেম শীনবা থুংনা ভারতকী নহারোলশিংগী ফজবা মমি অমা তারে অমসুং মখোয়গী থবক ঙম্বা অমসুং মাইপাকপশিংদা মালেম অসি অঙকপা পোক্নরে।

প্রধান মন্ত্রীনা হায়খি ভারত মশা মরোমদোম লেপচবা ঙমগদবনি; থাজবগা লোয়ননা খুন্নাইনা লৈবাক অসিগী পোৎথোকশিং শীজিন্নগদবনি। শ্বাদেসি ইহৌ অসি চহিচা অমা শুরবা পোৎলম অমা নত্তে, তুংগী ফগৎনবা খোঙজং অমনি অমসুং খুন্নাইদগী, মরুওইনা নহারোলশিংনা মসিগী লুচিংবা ওইগদবনি।

প্রধান মন্ত্রীনা মীয়াম্না মতেং পাংলকপশিংগীদমক থাগৎপা ফোঙদোক্লদুনা হায়খি, থবকশিং শীন্নদুনা মহাক্না কান্নবা লৌবা য়াই, অদুবু মীয়াম্না থবকশিং অদু পাংথোকপনি অমসুং মদুগী ফলশিং ফংলে। মহাক্না হৌজিক ফাওবা মীয়ামগী থবক তৌরক্লিবা অসিদা, মহাক্না নিংখিবা অমতা ফংদবা হৌজিক ফাওবা য়াওদ্রি অমসুং অনৌবা থৌদাংশিং লৌবা মতমদা মহাক্কী অনিংবশিং হেনগৎহন্নবা মসিগী থাজবা অসি মখা তানা লৈরি।

প্রধান মন্ত্রীনা হায়খি ঙসিগী তুংদু-লৈতাবা মালেমগী ফিবম অসিদা, ভারতকী খ্বাইদগী ফবা লম্বীদি অত্মনির্ভর ওইবনি। অত্মনির্ভর ওইবা হায়বদি লৈবাক অসিদা শাজবা পোৎলমশিং মরুওইনা লৌবা অমসুং মেক ইন ইন্দিয়াগী থবকশিংদমক হরাওবা হেনগৎহনবা হায়বনি। শ্বাদেসি ইহৌ অসি চহিচা অমা শুরবা পোৎলম অমা নত্তে, তুংগী ফগৎনবা খোঙজং অমনি অমসুং খুন্নাইদগী, মরুওইনা নহারোলশিংনা মসিগী লুচিংবা ওইগদবনি। মখোয়গী য়ুমশিংদা মপান লৈবাকশিংগী পোৎ-চৈশিং পুশিল্লক্তনবা ইমুংশিংনা ৱারেপ লৌগদবনি। মেদ ইন ইন্দিয়াগী মহাক্কী পাউজেল তাবদগী মীয়াম মপান লৈবাকশিংদা লুহোংবা লেপখি অমসুং ভারত্ত থৌরম পাংথোক্নবা ৱারেপ লৌখি। অসিগুম্বা থবকশিং অসিনা মশা মরোমদোম মরৈবাক নুংশিবগী ৱাখল্লোনশিং পোকহল্লে।

প্রধান মন্ত্রীনা হায়খি মেক ইন ইন্দিয়া অমসুং অত্মনির্ভর মাইপাকপা অসি মীওই খুদিংমক্কীনি অমসুং মসি অপুনবগী পাঙ্গল অমনি। মীয়াম্না ভারতকী পোৎথোকশিং খনবা হেক হৌবদা, কৈথেলদা চাংদম্নবা লৈবা মরমনা মশা মথন্থ মগুন লৈরক্কনি, হেন্না ফজনা য়োম্লক্কনি অমসুং মমল হোংদোরক্কনি। ভারতকী শেন লৈবাক অসিগী মপান্দা চৎহনখিবা অসি অফবা থবক নত্তে।

থাজবা ফোঙদোক্লদুনা, প্রধান মন্ত্রীনা হায়খি মীয়াম ৱাখল তাহন্দুনা মহাক্না শীন্নরিবা অপীকপা থবকশিং অসি খুন্নাইনা পাংথোকপা ঙমগনি অমসুং লৈবাক অসিদা অনৌবা থৌনা পীগনি। ঙসিগী খুন্নাই অসি লৌউ-শিংউবগী খুন্নাই খক ওইদ্রে, ওন্ত্রেপ্রেন্যুরগী খুন্নাইসু ওইরে। ললোনবশিংনা “মফম অসিদা লৈবাক অসিগী পোৎথোকশিং খক্ত য়োল্লি” হায়না থাবা বোর্দশিং থেৎকদবনি। মীয়াম্না লৈবাক অসিদা শাবা পোৎলমশিং খক্ত লৈগদবনি অমসুং ললোনবশিংনা লৈবাক অসিদা শাবা পোৎথোকশিং খক্ত য়োনগদবনি। মসিসু লৈবাক নিংবগী থবক অমনি-ওপরেসন সিন্দুর খক্ত নত্তে। শ্বাদেসি ওইবা হায়বসি লৈবাক্কী তৌবা মখল অমনি। মীয়াম্না ৱাশক লৌগদবনি অমসুং মতেং পাংগদবনি। মহাক্কী ৱারোল লোইশিল্লকপদা, মীয়াম মরক্ত শরুক য়াবগী খুদোংচাবা ফংবগীদমক প্রধান মন্ত্রীনা তৌবীমল খঙবা উৎখি অমসুং মীয়াম অমসুং মচানুপীশিংদা মহাক্কী য়াইফ পাউজেলশিং পীখি।

থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা য়ুনিয়ন হোম মিনিষ্টর শ্রী অমিত সাহ, গুজরাতকী চীফ মিনিষ্টর শ্রী ভুপেন্দ্রভাই পতেল য়াওখি।

Sharing my remarks during foundation stone laying ceremony of Sardardham Phase-II in Ahmedabad. https://t.co/4zB7AUJ45U

— Narendra Modi (@narendramodi) August 24, 2025

***