డిఫెన్స్ రీసెర్చ్ అండ్ డెవలప్‌మెంట్ ఆర్గనైజేషన్ (డీఆర్‌డీవో) నిన్న మధ్యాహ్నం 12.30 గంటలకు ఒడిశా తీరంలో సమీకృత గగనతల రక్షణ ఆయుధ వ్యవస్థ (ఇంటిగ్రేటెడ్ ఎయిర్ డిఫెన్స్ వెపన్ సిస్టమ్) తొలి వైమానిక పరీక్షలు విజయవంతంగా నిర్వహించింది. ఈ ఐఏడీడబ్ల్యూఎస్ స్వదేశీ క్విక్ రియాక్షన్ సర్ఫేస్ టు ఎయిర్ క్షిపణులు (క్యూఆర్ఎస్ఏఎమ్), అడ్వాన్స్‌డ్ వెరీ షార్ట్ రేంజ్ ఎయిర్ డిఫెన్స్ సిస్టమ్ (వీఎస్‌హెచ్ఓఆర్ఏడీఎస్) క్షిపణులు, హై-పవర్ లేజర్-ఆధారిత ఎనర్జీ వెపన్ (డీఈడబ్ల్యూ)లు గల బహుళ-అంచెల వైమానిక రక్షణ వ్యవస్థ.

రక్షణ రంగ పరిశోధన-అభివృద్ధి లాబొరేటరీ అభివృద్ధి చేసిన కేంద్రీకృత కమాండ్ - కంట్రోల్ సెంటర్ ఈ కార్యక్రమానికి నోడల్ లాబొరేటరీగా ఆయుధ వ్యవస్థకు చెందిన అన్ని విభాగాల సమగ్ర ఆపరేషన్‌ను నియంత్రిస్తుంది. వీఎస్‌హెచ్ఓఆర్ఏడీఎస్‌ను రీసెర్చ్ సెంటర్- ఇమారత్ పరిశోధనా కేంద్రం రూపొందించగా డీఈడబ్ల్యూను సెంటర్ ఫర్ హై ఎనర్జీ సిస్టమ్స్ అండ్ సైన్సెస్ అభివృద్ధి చేసింది.

వైమానిక పరీక్షల సమయంలో క్యూఆర్ఎస్ఏఎమ్, వీఎస్‌హెచ్ఓఆర్ఏడీఎస్, హై ఎనర్జీ లేజర్ ఆయుధ వ్యవస్థలు వివిధ పరిధులు, ఎత్తుల వద్ద రెండు హై-స్పీడ్ ఫిక్స్‌డ్ వింగ్ మానవరహిత వైమానిక వాహన లక్ష్యాలు, మల్టీ-కాప్టర్ డ్రోన్‌ సహా మూడు వేర్వేరు లక్ష్యాలను ఒకే సమయంలో పూర్తిగా ధ్వంసం చేశాయి. క్షిపణి వ్యవస్థలు, డ్రోన్ గుర్తింపు - విధ్వంస వ్యవస్థ, కమ్యూనికేషన్, రాడార్‌లతో పాటు ఆయుధ వ్యవస్థ కమాండ్ - కంట్రోల్ సహా అన్ని ఆయుధ వ్యవస్థ విభాగాలు ఎలాంటి లోపం లేకుండా చక్కగా పనిచేశాయి. విమాన డేటాను సంగ్రహించేందుకు చండీపూర్‌లోని ఇంటిగ్రేటెడ్ టెస్ట్ రేంజ్ రూపొందించిన రేంజ్ సాధనాల ద్వారా దీనిని నిర్ధారించారు. డీఆర్‌డీవో సీనియర్ శాస్త్రవేత్తలు, సాయుధ దళాల ప్రతినిధులు ఈ పరీక్షలను ప్రత్యక్షంగా వీక్షించారు.

విజయవంతంగా ఐఏడీడబ్ల్యూఎస్‌ను అభివృద్ధి చేసిన డీఆర్‌డీవో, సాయుధ దళాలు, రక్షణ రంగ ప్రతినిధులను రక్షణ మంత్రి శ్రీ రాజ్‌నాథ్ సింగ్ ఈ సందర్భంగా అభినందించారు. ఈ ప్రత్యేక వైమానిక పరీక్షలు భారత బహుళ-అంచెల వైమానిక-రక్షణ సామర్థ్యాన్ని, శత్రువుల వైమానిక దాడుల నుంచి కీలక ప్రదేశాల రక్షణను మరింత బలోపేతం చేస్తాయని ఆయన పేర్కొన్నారు.

ఈ విజయవంతమైన వైమానిక పరీక్షల్లో పాలుపంచుకున్న అన్ని బృందాలను రక్షణ శాఖ పరిశోధన-అభివృద్ధి విభాగం కార్యదర్శి, డీఆర్‌డీవో చైర్మన్ డాక్టర్ సమీర్ వి కామత్‌ అభినందించారు.

***