ৱেস্ত বেঙ্গলগী রাজ্যপাল সি.ভি. অনন্দ বোসজী, কেন্দ্রগী মন্ত্রীমন্দলগী ঐহাক্কী মরুপশিং, শান্তনু থাকুরজী, রবনীত সিংহজী, সুকান্তা মজুমদারজী, ৱেস্ত বেঙ্গল এসেমব্লীগী ওপোজিসনগী লুচিংবা শুভেন্দু অদিকারিজী, ঐহাক্কী পার্লিয়ামেন্তকী মরুপশিং, শোমিক ভত্তাচার্য়জী, মফম অসিদা লৈরিবা মীয়ামগী মীহুৎশিং, নুপীশিং অমসুং নুপাশিং,

ঙসি ঐহাক্না অমুক্কা হন্না ৱেস্ত বেঙ্গলগী চাউখৎ থৌরাং খোঙজেল য়াংখৎহন্নবা খুদোংচাবা ফংলে। হৌজিক্তা ঐহাক কোলকতা মেত্রোগী নাওপারাদগী জয় হিন্দ বিমান বন্দর ফাওবা চৎলুরগা হল্লক্লি। মতম অসিদা, ঐহাক্না মরুপ কয়াগা ৱারী শানবগী খুদোংচাবা ফংখি। হৌজিক কোলকতাগী পব্লিক ত্রান্সপোর্ত অসি তশেংনা মোদর্ন ওইরক্লিবা অসিদা মীপুম খুদিংমক নুংঙাইবা ফাওই। ঙসি, মফম অসিদা লেন-তরুক্কী এলিবেতেদ কোনা এক্সপ্রেসৱেগী উরেপ উয়ুংসু থমখ্রে। লুপা করোর লিশিং কয়াগী প্রোজেক্তশিং অসিগীদমক কোলকতাগী মীয়াম অমসুং ৱেস্ত বেঙ্গল পুম্নমক্তা নুংঙাইবা ফোংদোকচরি।

মরুপশিং,

কোলকতাগুম্বা ঐখোয়গী শহরশিং অসি ভারতকী পুৱারী অমসুং ঐখোয়গী তুংলমচৎ অনিমক্কী মপুং ওইবা মশক অমা ওইরি। ঙসি, ভারতনা মালেমগী খ্বাইদগী চাউবা অহুমশুবা শেন্মিৎলোন ওইবগী মায়কৈদা চংশিল্লিবা অসিদা, দম দম, কোলকতাগুম্বা শহরশিং অসিগী থৌদাং অসি য়াম্না চাউই। মরম অদুনা, ঙসিগী প্রোগ্রাম অসিগী পাউজেল অসি মেত্রো হৌদোকপা অমসুং হায়ৱেগী উরেপ উয়ুং তম্বগী থৌরমদগী হেন্না চাউই। থৌরম অসিনা ঙসিগী ভারতনা শহরশিংবু মতৌ করম্না শেমদোক-শাদোক্লিবগে হায়বদু উৎলি। ঙসি ভারতকী শহরশিংদা গ্রীন মোবিলিতীগীদমক হোৎনরি, ইলেক্ত্রিক চার্জিং পোইন্তশিং অমসুং ইলেক্ত্রিক বসশিংগী মশিং লেপ্তনা হেনগৎলক্লি, ৱেস্ত তু ৱেল্থতা ওন্থোক্নবা হোৎনরি, শহরগী ৱেস্তশিংদগী ইলেক্ত্রিসিতী পুথোক্নবা হোৎনরি, মেত্রোগী খুদোংচাবশিং হেনগৎলক্লি, মেত্রোগী নেৎৱার্ক পাকথোক চাউথোক্লি। ঙসিদি মালেমগী খ্বাইদগী চাউবা অহুমশুবা মেত্রো নেৎৱার্ক অসি ভারত্তা লৈরে হায়বা খঙবদা মীপুম খুদিংমক চাউথোকচবা পোক্লি। ২০১৪গী মমাংদা, লৈবাক অসিদা মেত্রো রুত অসি কিলোমীতর ২৫০ খক্তমক ওইরম্মি। ঙসি লৈবাক অসিদা মেত্রো রুত অসি কিলোমীতর লিশিং অমদগী হেন্না শাংখ্রে। কোলকতাদা মেত্রোসু লেপ্পা লৈতনা পাকথোক চাউথোক্লি। ঙসিসু, কোলকতাগী মেত্রো রেল নেৎৱার্ক্তা চাউরাক্না কিলোমিতর ১৪গী অনৌবা লাইনশিং হাপচিল্লি। কোলকতা মেত্রোদা অনৌবা স্তেসন ৭ হাপচিল্লি। হায়রিবা থবকশিং অসিনা কোলকতাগী মীয়ামগী পুন্সি মহিং অমসুং চৎথোক চৎশিন তৌবদা লায়থোকপা হেনগৎহল্লগনি।

মরুপশিং,

২১শুবা চহিচাগী ভারতকীসু ২১শুবা চহিচাগী ত্রান্সপোর্ত সিস্তেম অমা মথৌ তাই। মরম অসিনা ঙসিদি ঐখোয়না লৈবাক অসিদা রেলদগী রোদ ফাওবা, মেত্রোদগী এয়রপোর্ত ফাওবা, মোদর্ন ত্রান্সপোর্ত ফেসিলিতীশিং শেমগৎলি অমসুং মখোয়বু অমগা অমগা শম্নহল্লি। হায়বদি, মীওইশিং শহর অমদগী অতোপ্পা শহর অমদা পুথোক পুশিন তৌবগা লোয়ননা, ঐখোয়গী খোঙথাং অসি মখোয়বু মখোয়গী য়ুমগী মনাক নক্না অপনবা লৈতবা ত্রান্সপোর্ত ফংহনবা হায়বসিনি। কোলকতাগী মল্তি-মোদেল কন্নেক্তিবিতীদসু ঐখোয়না মসিগী মমি অমা উবা ফংলি। ঙসিগুম্না হাওরা অমসুং সিলদাগুম্বা লৈবাক অসিগী খ্বাইদগী চিনবা রেলৱে স্তেসনশিং অসি হৌজিক্তি মেত্রোগী খুত্থাংদা শম্নরে। মসিনা তাক্লিবদি স্তেসনশিংগী মরক্তা চৎথোক-চৎশিন তৌবদা মমাংদা পুং অমগা মখায় চঙলম্মি, হৌজিক্তি মেত্রোদা চৎপদা মিনিত খরা খক্তমক চঙলগনি। মতৌ অসুম্না, হাওরা স্তেসন সবৱেসু মল্তি মোদেল কন্নেক্তিবিতী ফংহল্লে। মমাংদা, ইস্তর্ন রেলৱে নৎত্রগা সাউথ ইস্তর্ন রেলৱেদগী ত্রেন অমা তোংনবগীদমক্তা অরাপ্পা মফম অমা চৎপা তারমখি। মসিগী সবৱে অসি শাবা লোইরবা মতুংদা, ইন্তরচেঞ্জদা চঙগদবা মতম অসি হন্থরগনি। ঙসিদগী কোলকতা এয়রপোর্ত অসিসু মেত্রোগা শম্নহনখ্রে। মসিনা তাক্লিবদি হৌজিক্তি শহরগী অরাপ্পা মফমশিংদগী এয়রপোর্ত অসি য়ৌবদা হেন্না লায়থোকহল্লগনি।

মরুপশিং,

ভারত সরকারনা ৱেস্ত বেঙ্গলগী চাউখৎ-থৌরাংগীদমক্তা তৌবা য়াবা পুম্নমক পাংথোক্লি। ঙসি, রেলৱেজ ১০০% ইলেক্ত্রিফাই তৌরবা লৈবাক অসিগী রাজ্যশিংগী মনুংদা ৱেস্ত বেঙ্গলসু অমা ওইরে। মতম কয়াগী মমাংদগী পুরুলিয়া অমসুং হাওরাগী মরক্তা MEMU ত্রেন অমগী দিমান্দ তৌদুনা লাকখি। ভারত সরকারনা মীয়ামগী দিমান্দ অসিসু মপুং ফাহনখ্রে। ঙসি, ৱেস্ত বেঙ্গলগী তোঙান তোঙানবা লম্বীশিংদা ভন্দে ভারত ত্রেন ৯ চেল্লি। মসিগী মথক্তা, অমৃত ভারত ত্রেন অনিসু ময়াম পুম্নমক্কীদমক চেল্লি।

মরুপশিং,

হৌখিবা চহি ১১ অসিদা, ভারত সরকারনা মফম অসিদা মরুওইবা হায়ৱে প্রোজেক্ত কয়া অমা লোইশিনখ্রে। প্রোজেক্ত কয়াদা থবক পায়খৎলি। লেন তরুক্না শাবা কোনা এক্সপ্রেসৱে অসি শাবা লোইরবা মতুংদা, মসিনা পোর্তকী কন্নেক্তিবিতীসু ফগৎহনগনি। মসিগী কন্নেক্তিবিতী অসিনা কোলকতা অমসুং ৱেস্ত বেঙ্গলগী অফবা তুংলমচৎকী য়ুম্ফম অদু মপাঙ্গল কনখৎহল্লগনি। হৌজিক্কী ওইনা মসি মঙাই।

মরুপশিং,

মতম খরগী মতুংদা, মসিদগী অনকপা মফম অমদা মীয়ামগী মীফম অমা পাংথোক্লগনি, মীফম অদুদা, ৱেস্ত বেঙ্গলগী চাউখৎ থৌরাং অমসুং তুংলমচৎকী মতাংদা ময়াম পুম্নমক্কা লোয়ননা কুপ্না খন্ন-নৈনগনি, অমসুং মসিদগী হেনবা কয়া অমা পাংথোক্কনি, মফম অদুদা মীওই কয়া অমা ঙাইরি, ঐহাক্না মফম অসিদা ঐগী ৱারোল লোইশিনজরি। ময়াম পুম্নমকপু য়াইফ-পাউজেল পীজরি! থাগৎচরি!

***