କ୍ୟାବିନେଟ
କେନ୍ଦ୍ର କ୍ୟାବିନେଟ ବୈଠକରେ ଜରୁରିକାଳୀନ ପରିସ୍ଥିତି ଘୋଷଣାର ୫୦ ବର୍ଷ ପୂର୍ତ୍ତି ପାଳନ ଉପଲକ୍ଷେ ସଂକଳ୍ପ ଗୃହୀତ
Posted On:
25 JUN 2025 4:10PM by PIB Bhubaneshwar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ଆଜି ଜରୁରିକାଳୀନ ପରିସ୍ଥିତି ଘୋଷଣାର ୫୦ ବର୍ଷ ପୂର୍ତ୍ତି ପାଳନ ପାଇଁ ଏକ ସଂକଳ୍ପ ଗୃହୀତ ହୋଇଛି। ସାହସିକତାର ସହିତ ଜରୁରିକାଳୀନ ପରିସ୍ଥିତି ଏବଂ ଭାରତୀୟ ସମ୍ବିଧାନର ଆତ୍ମାକୁ ନଷ୍ଟ କରିବା ଲାଗି ହୋଇଥିବା ଉଦ୍ୟମକୁ ବିରୋଧ କରିଥିବା ଅଗଣିତ ବ୍ୟକ୍ତିବିଶେଷଙ୍କୁ ସମ୍ମାନ ଜଣାଇବା ଏବଂ ସ୍ମୃତିଚାରଣ କରିବା ଏହି ସଂକଳ୍ପର ଉଦ୍ଦେଶ୍ୟ। ୧୯୭୪ରେ ନବନିର୍ମାଣ ଆନ୍ଦୋଳନ ଏବଂ ସମ୍ପୂର୍ଣ୍ଣ କ୍ରାନ୍ତି ଅଭିଯାନକୁ ଚାପିଦେବା ଲାଗି ଏକ ନିଷ୍ଠୁର ପ୍ରୟାସ ସହିତ ଏହି ଦମନଲୀଳା ଆରମ୍ଭ ହୋଇଥିଲା।
ଯେଉଁ ଲୋକମାନଙ୍କର ସାମ୍ବିଧାନିକ ଅଧିକାରକୁ ଛଡ଼େଇ ନିଆଯାଇଥିଲା ଏବଂ ଯେଉଁମାନେ ଅକଥନୀୟ ନିର୍ଯାତନାର ଶିକାର ହୋଇଥିଲେ ସେମାନଙ୍କ ଉଦ୍ଦେଶ୍ୟରେ ଆଜିର କ୍ୟାବିନେଟ୍ ବୈଠକରେ ଦୁଇ ମିନିଟ୍ ପାଇଁ ନିରବ ପ୍ରାର୍ଥନା କରାଯାଇଛି। ଜରୁରି ପରିସ୍ଥିତିର ଦମନକାରୀ ଉଦ୍ୟମ ପ୍ରତି ଅନୁକରଣୀୟ ସାହସ ପ୍ରଦର୍ଶନ କରିଥିବା ଏବଂ ଏହାକୁ ପ୍ରତିରୋଧ କରିଥିବା ଲୋକମାନଙ୍କ ପ୍ରତି କେନ୍ଦ୍ର କ୍ୟାବିନେଟ୍ ସମ୍ମାନ ପ୍ରଦର୍ଶନ କରିଥିଲା।
୨୦୨୫ ମସିହାରେ ସମ୍ବିଧାନ ହତ୍ୟା ଦିବସର ୫୦ ବର୍ଷ ପୂରଣ ହେଉଛି । ଏହା ଭାରତୀୟ ଇତିହାସର ଏକ ଅଭୁଲା ଅଧ୍ୟାୟ ଯେଉଁଥିରେ ସମ୍ବିଧାନକୁ ନଷ୍ଟ କରାଯାଇଥିଲା, ଭାରତର ଗଣତନ୍ତ୍ର ଏବଂ ଗଣତାନ୍ତ୍ରିକ ଭାବନା ଉପରେ ଆକ୍ରମଣ କରାଯାଇଥିଲା, ସଂଘୀୟ ବ୍ୟବସ୍ଥାକୁ ଅମାନ୍ୟ କରାଯାଇଥିଲା ଏବଂ ମୌଳିକ ଅଧିକାର, ମାନବ ସ୍ୱାଧୀନତା ଓ ମର୍ଯ୍ୟାଦାକୁ ଦମନ କରାଯାଇଥିଲା।
କେନ୍ଦ୍ର କ୍ୟାବିନେଟ ଦୃଢ଼ ଭାବେ ଦୋହରାଇଛନ୍ତି ଯେ, ଭାରତର ଲୋକମାନେ ଭାରତୀୟ ସମ୍ବିଧାନ ଏବଂ ଦେଶର ଗଣତାନ୍ତ୍ରିକ ନୀତିର ସ୍ଥିରତା ଉପରେ ଅତୁଟ ବିଶ୍ୱାସ ରଖିଛନ୍ତି। ଏକଛତ୍ରବାଦୀ ପ୍ରବୃତ୍ତିକୁ ପ୍ରତିରୋଧ କରୁଥିବା ଏବଂ ଆମ ସମ୍ବିଧାନ ଓ ଏହାର ଗଣତାନ୍ତ୍ରିକ ଢାଞ୍ଚାକୁ ରକ୍ଷା କରିବା ପାଇଁ ଦୃଢ଼ ଭାବରେ ଠିଆ ହୋଇଥିବା ଲୋକଙ୍କଠାରୁ ପ୍ରେରଣା ନେବା ବୟସ୍କମାନଙ୍କ ପାଇଁ ଯେତିକି ଗୁରୁତ୍ୱପୂର୍ଣ୍ଣ, ଯୁବପିଢ଼ି ପାଇଁ ମଧ୍ୟ ସେତିକି ଜରୁରୀ।
ଗଣତନ୍ତ୍ରର ଜନନୀ ଭାବରେ ଭାରତ ସାମ୍ବିଧାନିକ ମୂଲ୍ୟବୋଧର ସଂରକ୍ଷଣ, ରକ୍ଷା ଏବଂ ସୁରକ୍ଷାର ଏକ ଉଦାହରଣ ଭାବରେ ଠିଆ ହୋଇଛି।
ଏକ ରାଷ୍ଟ୍ର ଭାବରେ, ଆମର ସମ୍ବିଧାନ ଏବଂ ଏହାର ଗଣତାନ୍ତ୍ରିକ ଏବଂ ସଂଘୀୟ ଆତ୍ମାକୁ ବଜାୟ ରଖିବା ପାଇଁ ଆମର ସଂକଳ୍ପକୁ ନବୀକରଣ କରିବା ଲାଗି କ୍ୟାବିନେଟ ବୈଠକରେ ଆହ୍ୱାନ କରାଯାଇଛି।
*******
P.S/Swadhin
(Release ID: 2159949)
Visitor Counter : 2
Read this release in:
English
,
Urdu
,
Marathi
,
Nepali
,
Hindi
,
Assamese
,
Bengali-TR
,
Bengali
,
Manipuri
,
Punjabi
,
Gujarati
,
Tamil
,
Telugu
,
Kannada
,
Malayalam