ପ୍ରତ୍ୟେକ ଦିବସର ସଦୁପଯୋଗ କରି ରାଷ୍ଟ୍ର ନିର୍ମାଣରେ ଯୋଗଦାନ ଦିଅ : କେନ୍ଦ୍ରମନ୍ତ୍ରୀ

ନୂଆଦିଲ୍ଲୀରେ ଆଜି ଆୟୋଜିତ 'କର୍ମଚାରୀ ସଂକଳ୍ପ ସମ୍ମିଳନୀ'ରେ ଉଦବୋଧନ ଦେଇଛନ୍ତି କେନ୍ଦ୍ର କୃଷି ଏବଂ କୃଷକ କଲ୍ୟାଣ ଏବଂ ଗ୍ରାମୀଣ ବିକାଶ ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ । ଏହି ଅବସରରେ କେନ୍ଦ୍ର କୃଷି ଏବଂ କୃଷକ କଲ୍ୟାଣ ରାଷ୍ଟ୍ରମନ୍ତ୍ରୀ ଶ୍ରୀ ଭାଗୀରଥ ଚୌଧୁରୀ, କୃଷି ସଚିବ ଶ୍ରୀ ଦେବେଶ ଚତୁର୍ବେଦୀ, ଗ୍ରାମୀଣ ବିକାଶ ସଚିବ ଶ୍ରୀ ଶୈଳେଶ କୁମାର ସିଂହ ଏବଂ ଆଇସିଏଆରର ମହାନିର୍ଦ୍ଦେଶକ ଡକ୍ଟର ଏମ୍.ଏଲ୍. ଜାଟଙ୍କ ସମେତ ଉଭୟ ମନ୍ତ୍ରଣାଳୟର ଅଧିକାରୀ ଏବଂ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।

ଏହି ଅବସରରେ, କର୍ମଚାରୀ ଏବଂ ଅଧିକାରୀମାନଙ୍କୁ ସମ୍ବୋଧିତ କରି କେନ୍ଦ୍ରମନ୍ତ୍ରୀ କହିଥିଲେ ଯେ ଜୀବନର ପ୍ରତ୍ୟେକ ଦିନ, ପ୍ରତ୍ୟେକ ମୁହୂର୍ତ୍ତ ଗୁରୁତ୍ୱପୂର୍ଣ୍ଣ, ପ୍ରତ୍ୟେକେ ଲୋକଙ୍କ ଜୀବନକୁ ଉନ୍ନତ କରିବାରେ ଯୋଗଦାନ ଦେବା ଉଚିତ। ଆମର କାର୍ଯ୍ୟ ହେଉଛି ରାଷ୍ଟ୍ର ନିର୍ମାଣ, ଦଳଗତ ମନୋଭାବ ସହିତ ଏକାଠି କାମ କରିବା ଦ୍ୱାରା ଏକ ଆତ୍ମନିର୍ଭରଶୀଳ ଭାରତ ଗଠନକୁ ମଜବୁତ କରାଯିବ। ସେ ପ୍ରସ୍ତାବ ଦେଇଥିଲେ ଯେ ଆସନ୍ତା ବର୍ଷ ଏହି ସମ୍ମିଳନୀକୁ 'କର୍ମଯୋଗୀ ସଂକଳ୍ପ ସମ୍ମିଳନୀ' ନାମ ଦିଆଯାଉ। ସେ କହିଥିଲେ ଯେ କାର୍ଯ୍ୟାଳୟରେ ପ୍ରତ୍ୟେକ ଭୂମିକା ଗ୍ରହଣ କରୁଥିବା କର୍ମଚାରୀ ଏବଂ ଅଧିକାରୀମାନେ ଗୁରୁତ୍ୱପୂର୍ଣ୍ଣ ଓ ସମସ୍ତେ ସମ୍ମାନର ହକଦାର ।

କେନ୍ଦ୍ରମନ୍ତ୍ରୀ କହିଥିଲେ ଯେ ଦେଶର ବିକାଶରେ କୃଷି ବିଭାଗ, ଆଇସିଏଆର ଏବଂ ଗ୍ରାମୀଣ ବିକାଶ ମନ୍ତ୍ରଣାଳୟର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଖରିଫ ଫସଲ ପାଇଁ 'ବିକଶିତ କୃଷି ସଂକଳ୍ପ ଅଭିଯାନ'କୁ ଐତିହାସିକ ବୋଲି ବର୍ଣ୍ଣନା କରି ସେ କହିଛନ୍ତି ଯେ ଏହି ଅଭିଯାନ କୃଷି କ୍ଷେତ୍ରର ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଏତେ ବଡ଼ ସ୍ତରରେ ଏପରି ଅଭିଯାନ ପୂର୍ବରୁ କେବେ ହୋଇନଥିଲା। ୨୧୭୦ ବୈଜ୍ଞାନିକଙ୍କ ଦଳ ଗାଁ ଗସ୍ତ କରି ଚାଷୀଙ୍କ ସହ ଆଲୋଚନା କରିଥିଲେ। ଏହି ଅଭିଯାନ ମାଧ୍ୟମରେ ୫୦୦ରୁ ଅଧିକ ଗବେଷଣା ବିଷୟ ଉଭା ହୋଇଛି। ଏହା ଏକ ବଡ଼ ସଫଳତା।

ଶ୍ରୀ ଶିବରାଜ ସିଂହ କହିଛନ୍ତି ଯେ ଆଜି ଦେଶରେ ଖାଦ୍ୟ ଭଣ୍ଡାର ପୂର୍ଣ୍ଣ ହୋଇଛି, କିନ୍ତୁ କିଛି ଚ୍ୟାଲେଞ୍ଜ ମଧ୍ୟ ରହିଛି। ଆମକୁ ଡାଲି, ତୈଳବୀଜ, କପା ଏବଂ ପ୍ରାକୃତିକ କୃଷି ଉତ୍ପାଦନ ବୃଦ୍ଧି କରିବା ଦିଗରେ ଅଧିକ ଦୃଢ଼ ଭାବରେ ଆଗକୁ ବଢ଼ିବାକୁ ପଡିବ। ଏଥିରେ ଆପଣଙ୍କ ସହଯୋଗ ଆଶା କରାଯାଉଛି। ସେ କହିଛନ୍ତି ଯେ ରାଜ୍ୟ ସରକାରଙ୍କ ସହଯୋଗରେ କୃଷି ପାଇଁ ଏକ ରୋଡମ୍ୟାପ୍ ପ୍ରସ୍ତୁତ କରାଯାଉଛି। ଆଶା କରାଯାଉଛି ଯେ ମିଳିତ ପ୍ରୟାସ ସହିତ କୃଷି କ୍ଷେତ୍ର ଅଧିକ ସୁଦୃଢ ହେବ।

ସେ ଦୀନଦୟାଲ ଅନ୍ତ୍ୟୋଦୟ ଯୋଜନା-ଜାତୀୟ ଗ୍ରାମୀଣ ଜୀବିକା ମିଶନ ଅଧୀନରେ ଲଖପତି ଦିଦିଙ୍କ ବିକାଶ ବିଷୟରେ ମଧ୍ୟ କହିଥିଲେ। ସେ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୩ କୋଟି ଲଖପତି ଦିଦି ତିଆରି କରିବାର ଲକ୍ଷ୍ୟ ଦେଇଥିଲେ। ମୁଁ ଆପଣମାନଙ୍କୁ ଗର୍ବ ଏବଂ ଖୁସିର ସହିତ କହିବାକୁ ଚାହୁଁଛି ଯେ ଲଖପତି ଦିଦିଙ୍କ ସଂଖ୍ୟା ସମୟ ପୂର୍ବରୁ ୨ କୋଟି ୮୦ ଲକ୍ଷ ପାଖାପାଖି ପହଞ୍ଚିଛି। ଏହା ଏକ ଅସାଧାରଣ ଘଟଣା। ଘରର ଚାରି କାନ୍ଥ ମଧ୍ୟରେ ଆବଦ୍ଧ ଥିବା ମହିଳାମାନେ ଆଜି ଆତ୍ମନିର୍ଭରଶୀଳ ହୋଇ ନିଜର ପରିଚୟ ପ୍ରତିଷ୍ଠା କରୁଛନ୍ତି। ଏବେ ଦିଦିମାନେ ମଧ୍ୟ କୋଟିପତି ଦିଦି ହେଉଛନ୍ତି।

ଶ୍ରୀ ଶିବରାଜ ସିଂହ କହିଛନ୍ତି ଯେ ଗାଁରେ ଲୋକଙ୍କୁ ଘର ଯୋଗାଇବା କାର୍ଯ୍ୟ ମଧ୍ୟ ଦ୍ରୁତ ଗତିରେ କରାଯାଉଛି। ଘର ନିର୍ମାଣ ଏବଂ ପହଞ୍ଚାଇବା କାର୍ଯ୍ୟ ମଧ୍ୟ ୧୧୪ ଦିନର ରେକର୍ଡ ସମୟ ମଧ୍ୟରେ କରାଯାଇଛି। ଗ୍ରାମୀଣ ରାସ୍ତା ଏବଂ ଗୃହ ଲୋକଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣୁଛି। କେନ୍ଦ୍ରମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ଲାଲକିଲ୍ଲାର ପ୍ରାଚୀରରୁ କହିଥିଲେ ଯେ 'ସରକାର ଫାଇଲରେ ନୁହେଁ ବରଂ ଲୋକଙ୍କ ଜୀବନରେ ଦୃଶ୍ୟମାନ ହେବା ଉଚିତ।' ପ୍ରଧାନମନ୍ତ୍ରୀଙ୍କ ଏହି ସଂକଳ୍ପ ସେତେବେଳେ ପୂରଣ ହୋଇପାରିବ ଯେତେବେଳେ ଆମେ ସଚ୍ଚୋଟତାର ସହିତ ଲୋକଙ୍କ ସେବାରେ ସମର୍ପିତ ରହିବୁ। ସେ ଅଧିକାରୀମାନଙ୍କୁ କହିଥିଲେ ଯେ ସରକାରୀ ଚାକିରିରେ ରହିବା ସୌଭାଗ୍ୟର କଥା, ଏଣୁ ସେମାନେ ଏହି ସୁଯୋଗର ସର୍ବାଧିକ ସଦୁପଯୋଗ କରି ଲୋକଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣିବା ଉଚିତ ।

କେନ୍ଦ୍ରମନ୍ତ୍ରୀ କହିଛନ୍ତି ଯେ ବାୟୋଷ୍ଟିମୁଲାଣ୍ଟ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆଇସିଏଆର ଦ୍ବାରା ତିନି ସ୍ତରୀୟ ଯାଞ୍ଚ ପରେ ବାୟୋଷ୍ଟିମୁଲାଣ୍ଟ ନାମରେ ବିକ୍ରି ହେଉଥିବା ପ୍ରାୟ ୩୦୦୦୦ ଉତ୍ପାଦ ମଧ୍ୟରୁ କେବଳ ୬୦୦କୁ ପ୍ରମାଣିତ କରାଯାଇଛି। ସେହିପରି, ଚାଷୀମାନଙ୍କୁ ସମସ୍ୟାରେ  ପକାଇଥିବା ନକଲି ସାର, ବିହନ ଏବଂ କୀଟନାଶକ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।

ଶ୍ରୀ ଶିବରାଜ ସିଂହ ଚୌହାନ ପ୍ରଧାନମନ୍ତ୍ରୀଙ୍କ ରାଷ୍ଟ୍ର ସର୍ବୋଚ୍ଚ ନୀତିର ବ୍ୟାଖ୍ୟା କରି କହିଛନ୍ତି ଯେ ଭାରତ ସର୍ବଦା ବିଶ୍ୱ ସମ୍ମୁଖରେ ନିଜର ଦୃଢ଼ ପ୍ରତିଛବି ଉପସ୍ଥାପନ କରିଆସିଛି। ଭାରତ 'ବସୁଧୈବ କୁଟୁମ୍ବକମ୍' ମନୋଭାବ ଥିବା ଏକ ଦେଶ, କିନ୍ତୁ ଯେତେବେଳେ ଜାତୀୟ ସ୍ୱାର୍ଥର କଥା ଆସେ, କିପରି ଆମର ପକ୍ଷ ଦୃଢ଼ ଭାବରେ ରଖାଯିବ ତାହା ଆମେ ଜାଣୁ। ପ୍ରଧାନମନ୍ତ୍ରୀଙ୍କ ନିଷ୍ପତ୍ତି ଦେଶର ଚାଷୀ, ପଶୁପାଳନ ଚାଷୀ ଏବଂ ମତ୍ସ୍ୟଜୀବୀଙ୍କ ସ୍ୱାର୍ଥକୁ ସୁରକ୍ଷିତ ରଖିଛି।

କେନ୍ଦ୍ରମନ୍ତ୍ରୀ ସମସ୍ତ କର୍ମଚାରୀ ଏବଂ ଅଧିକାରୀଙ୍କୁ ସ୍ୱଦେଶୀ ଉତ୍ପାଦ ଗ୍ରହଣ କରିବା ନିମନ୍ତେ ପ୍ରଧାନମନ୍ତ୍ରୀଙ୍କ ଆହ୍ୱାନକୁ ଗ୍ରହଣ କରିବାକୁ କହିଥିଲେ ଏବଂ ଯଥାସମ୍ଭବ ସ୍ୱଦେଶୀ ଉତ୍ପାଦ ବ୍ୟବହାର କରିବାକୁ ପ୍ରତିଜ୍ଞା ନେଇଥିଲେ। ସେ କହିଥିଲେ ଯେ ସ୍ୱଦେଶୀ ଉତ୍ପାଦ ଗ୍ରହଣ କରିବା ଦ୍ୱାରା ଦେଶର ଅଭାବୀ ବର୍ଗକୁ ନିଯୁକ୍ତି ମିଳିବ ଏବଂ ଅର୍ଥନୀତି ସୁଦୃଢ଼ ହେବ।

ଶେଷରେ, କେନ୍ଦ୍ରମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ ସମସ୍ତ କର୍ମଚାରୀ ଏବଂ ଅଧିକାରୀଙ୍କୁ ସେମାନଙ୍କର ବ୍ୟକ୍ତିଗତ ଜୀବନ ପ୍ରତି ମଧ୍ୟ ଧ୍ୟାନ ଦେବାକୁ ନିବେଦନ କରିଥିଲେ। ସେ କହିଥିଲେ ଯେ ବ୍ୟସ୍ତବହୁଳ କାର୍ଯ୍ୟସୂଚୀ ମଧ୍ୟରେ, ବ୍ୟକ୍ତି ନିଜ ପାଇଁ, ନିଜ ପିଲାମାନଙ୍କ ପାଇଁ ଏବଂ ପରିବାର ପାଇଁ ସମୟ ବାହାର କରିବାକୁ ପଡିବ। ଅଫିସ୍ କାମ ଏବଂ ବ୍ୟକ୍ତିଗତ ଜୀବନ ମଧ୍ୟରେ ସନ୍ତୁଳନ ସ୍ଥାପନ କରି ଆଗକୁ ବଢ଼ନ୍ତୁ, ଏହା ହେଉଛି ପ୍ରକୃତ ଜୀବନ ବଞ୍ଚିବାର ସୂତ୍ର। ସେ କହିଥିଲେ ଯେ ଜୀବନ ବଞ୍ଚିବାର ତିନୋଟି ଉପାୟ ଅଛି, ଗୋଟିଏ ହେଉଛି ଦୁଃଖ ସହିତ କାମ କରିବା, ଦ୍ୱିତୀୟ ହେଉଛି ସନ୍ତୁଷ୍ଟ ମନୋଭାବ ସହିତ କାମ କରିବା ଏବଂ ତୃତୀୟ ହେଉଛି ଖୁସି, ଶକ୍ତି ଏବଂ କଠିନ ପରିଶ୍ରମ ସହିତ ଆଗକୁ ବଢ଼ିବାର ପଦ୍ଧତି। ତୃତୀୟ ଉପାୟଟି ଜୀବନରେ ପରିବର୍ତ୍ତନର ଏକ ନୂତନ କାହାଣୀ ଲେଖିପାରିବ।

TKM