ملک بھر سے کسان تنظیموں کے رہنماؤں اور کاشتکاروں کے ایک بڑے اجتماع نے آج زراعت اور کسانوں کی بہبود اور دیہی ترقی کے مرکزی وزیر جناب شیوراج سنگھ چوہان سے پوسا کیمپس ، نئی دہلی کے سبرامنیم ہال میں ملاقات کی اور کسانوں کے مفادات کے تحفظ کے لیے مرکزی حکومت کے فیصلہ کن اقدام کے لیے اظہار تشکر اور حمایت کی ۔  میٹنگ میں زراعت کے مرکزی وزیر مملکت جناب بھاگیرتھ چودھری ، زراعت کے سکریٹری جناب دیویش چترویدی ، آئی سی اے آر کے ڈائریکٹر جنرل ڈاکٹرایم ایل،جاٹ  اور مختلف ریاستوں کے نمائندوں نے بھی شرکت کی ۔

اس موقع پر کسان تنظیموں کے کئی نمائندوں نے اس کسان دوست تاریخ ساز فیصلے کے لیے وزیر اعظم کا شکریہ ادا کرتے ہوئے ایک آواز ہوکر بات کی۔

بھارتیہ کسان سنگھ کے نمائندے جناب  ہرپال سنگھ ڈاگر ، جناب دھرمیندر ملک ، جناب  دھرمیندر چودھری،  جناب وریندر لوہان ، جناب  کرپا سنگھ نتھو والا ، جناب کلدیپ سنگھ بجد پور ، جناب بابا راجندر سنگھ ملک ، جناب ترونیش شرما ، جناب کے پی سنگھ تھینوا ، جناب آچاریہ رام گوپال والیا ، جناب ونود آنند ، جناب راجکمار بالیان ، جناب اشوک بالیان ، جناب وی پی چندر آر پٹیل ، جناب رامپال جاٹ ، جناب کرشناویر چودھری ، جناب بھوپیندر سنگھ مان  اور جناب کے سائی ریڈی نے وزیر اعظم کا ان کے جرات مندانہ اقدامات کے لیے شکریہ ادا کیا ۔

انڈین فارمر چودھری چرن سنگھ آرگنائزیشن کے قومی صدر دھرمیندر چودھری نے کہا: ‘‘ عزت مآب وزیر اعظم جناب نریندر مودی نے کسانوں ، مویشی پالنے والوں اور ماہی گیروں کے مفاد میں ایک غیر متزلزل بیان دیا ہے ۔  ہندوستان کسی بھی قیمت پر اپنے مفادات سے سمجھوتہ نہیں کرے گا ۔  اس اعلان سے نہ صرف لاکھوں خوراک فراہم کرنے والوں کو راحت ملتی ہے بلکہ زراعت اور دیہی ہندوستان کی خود کفالت کو بھی تقویت ملتی ہے ۔  ہم اس دور اندیش اور کسان دوست وژن کا پورے دل سے خیر مقدم کرتے ہیں اور اس کی حمایت کرتے ہیں ، جو آنے والی نسلوں کو تحریک دے گا ۔’’

چھتیس گڑھ یوتھ پروگریسو فارمرز ایسوسی ایشن کے وریندر لوہان نے کہا:‘‘امریکی کمپنیوں کو ہمارے زراعت اور ڈیری کے شعبوں میں اجازت نہ دینے کا جرات مندانہ فیصلہ ہر کھیت ،کھلیان اور گئوشالہ میں گونج رہا ہے ۔  آپ نے دکھادیا ہے کہ ہندوستانی کسان صرف خوراک فراہم کرنے والا ہی نہیں بلکہ اس قوم کی روح ہے ، ایک ایسی روح جس پر کبھی کوئی غیر ملکی طاقت اپنا قبضہ نہیں جما سکتی۔  آپ نے ہمیں یقین دلایا ہے کہ جب تک موجودہ قیادت دہلی میں ہے ، کوئی بھی طاقت ہندوستان کے کسانوں کو غلام نہیں بنا سکتی ۔  میں وزیر زراعت شیوراج سنگھ چوہان کا بھی شکریہ ادا کرتا ہوں کہ انہوں نے نقلی کھادوں ، بیجوں اور کیڑے مار ادویات کے خلاف کارروائی کی ۔’’

دھرمیندر ملک نے کہا:‘‘ہم وزیر اعظم اور وزیر زراعت کا شکریہ ادا کرتے ہیں اور آپ سے اپیل کرتے ہیں کہ آپ اپنے موقف پر قائم رہیں اور آزاد تجارت سے متعلق ہماری پالیسیاں تبدیل نہ کریں ۔  ہم ہمیشہ آپ کے ساتھ کھڑے رہیں گے ۔’’

کرپا سنگھ نتھو والا نے کہا: ‘‘ہم معاہدے پر امریکی دباؤ کے اندیشے کے سبب بہت پریشان تھے ۔  اگر یہ منظور کرلیا جاتا تو کسان برباد ہو جاتے ،  لیکن وزیر اعظم اور وزیر زراعت نے کسانوں کے مفاد میں ایک مضبوط فیصلہ لیا ۔  ان کا یہ فیصلہ پنجاب اور ملک بھر کے کسانوں کے لیے باعث  فخر ہے ۔  میں تمام شہریوں ، کسانوں اور تاجروں سے کہتا ہوں کہ امریکہ جوچاہے کہے ، وہ ہمیں نقصان نہیں پہنچاسکے گا ۔  وزیر زراعت ، مبارک ہو ، ملک کے کسان آپ کے ساتھ کھڑے ہیں۔’’

پنجاب سے کلدیپ سنگھ باجدپور نے وزیر اعظم اور وزیر زراعت کی تعریف کرتے ہوئے کہا کہ حکومت کسانوں کی فلاح و بہبود کے لیے کئی اقدامات کررہی ہے ، جو ان کی زندگیوں میں تبدیلی لارہے ہیں ۔  انہوں نے امید ظاہر کی کہ مزید سخت اقدامات کیے جائیں گے ، اس لیے کسانوں کو امریکہ جیسے ممالک کی طرف نہیں دیکھنا پڑے گا ۔

اپنے خطاب میں مرکزی وزیر زراعت جناب شیوراج سنگھ چوہان نے کہا کہ یہ اجتماع ایک چھوٹے ہندوستان کی نمائندگی کرتا ہے ۔  ‘‘میں آپ کو سلام پیش کرتا ہوں-یہاں کے میرے کسان بھائی-جو نہ صرف ہندوستان بلکہ دنیا بھر کے لیے غذا فراہم کرنے کے لیے دن رات محنت کرتے ہیں ۔  اناج زندگی ہے ، اناج دیوتا ہے۔  کسان فراہم کنندہ اور زندگی دینے والا دونوں ہوتا ہے ۔  میرے لیے کسانوں کی خدمت کرنا خدا کی عبادت ہے اور اس سے بڑی عبادت کوئی نہیں ہے ۔ ’’

جناب چوہان نے اس بات کا اعادہ کیا کہ حکومت نقلی کھاد اور کیمیکل تیار کرنے والوں کے خلاف سخت کارروائی کرنے کے لیے جلد ہی ایک نیا قانون لائے گی ۔  انہوں نے کہا کہ کسانوں کی فلاح و بہبود کے لیے مختلف اسکیموں کو ترجیحی بنیادوں پر آگے بڑھایا جا رہا ہے ۔  ابھی کل (11 اگست) پردھان منتری فصل بیمہ یوجنا کے تحت راجستھان کے جھنجھنو کے کسانوں کو بیمہ کی رقم کی ڈیجیٹل ادائیگی کی گئی ۔

وزیر اعظم کے ‘قوم مقدم ’ کے عزم کو اجاگر کرتے ہوئے ، جناب چوہان نے کہا کہ پہلگام کے بزدلانہ دہشت گردانہ حملے کے بعد سندھ طاس معاہدہ کی منسوخی ایک تاریخ ساز  فیصلہ تھا ، جس کے لیے پوری قوم وزیر اعظم کی مشکور ہے ۔

مرکزی وزیر زراعت نے اس بات پر زور دیا کہ وزیر اعظم نے ہمیشہ مضبوط ، جرات مندانہ ، قوم پر مرکوز فیصلے کیے ہیں ، جن کے لیے ملک ہمیشہ ان کا مقروض رہے گا ۔

********

ش ح۔ش ب۔ ج ا

U-4646