লৌমীশিংগী য়াইফনবা কেন্দ্র সরকারগী অকনবা ৱারেপ শৌগৎনবা অমসুং তৌবীমল খঙবা উৎনবা, ঙসি ন্যু দিল্লিগী পুসা কেম্পস, সুব্রাহমনয়ম হোলদা এগ্রিকলচর অমসুং ফার্মরস ৱেলিফয়ার অমসুং রুরেল দিবলপমেন্তগী য়ুনিয়ন মিনিষ্টর শ্রী সিবরাজ সিংহ চৌহান্না লৈবাক শীনবা থুংবগী লৌমীশিং অমসুং লৌমী লুপশিংগী লুচিংবশিংগা মীফম অমা পাংথোকখ্রে। মীফম অদুদা এগ্রিকলচরগী রাজ্য মন্ত্রী শ্রী ভগিরথ চৌধুরি, এগ্রিকলচর সেক্রেতরি শ্রী দেবেস চতুর্বেদি, আই.সি.এ.আরগী দিরেক্তর জেনেরেল দোক্তর এম.এল জাত অমসুং তোঙান তোঙানবা রাজ্যশিংগী মীহুৎশিং শরুক য়াখি।

থৌরম অদুদা, লৌমী লুপশিংগী তোঙান তোঙানবা মীহুৎশিংনা অমতা ওইনা ৱা ঙাংখি অমসুং লৌমীশিংগী য়াইফনবা পুৱারি ওইরবা ৱারেপ অসিগীদমক প্রধান মন্ত্রীগী মফমদা মখোয়না তৌবীমল খঙবা উৎখি।

ভারতিয় কিষান সঙ্গগী মীহুৎশিং শ্রী হরপাল সিংহ দাগার, শ্রী ধর্মেন্দ্র মালিক, শ্রী ধর্মেন্দ্র চৌধুরি, শ্রী বিরেন্দ্র লোহান, শ্রী কিরপা সিংহ নাথুৱালা, শ্রী কুলদিপ সিংহ বাজিদপুর, শ্রী বাবা রাজেন্দ্র সিংহ মালিক, শ্রী তরুনেস শর্মা, শ্রী কে.পি সিংহ তাইনুৱা, শ্রী অচার্য়া রামগোপাল ৱালিয়া, শ্রী বিনোদ অনন্দ, শ্রী রাজকুমার বলয়ান, শ্রী অশোক বলয়ান, শ্রী বিপিচন্দ্র আর.পতেল, শ্রী রামপাল জাত, শ্রী কৃষ্ণবীর চৌধুরি, শ্রী ভুপেন্দ্র সিংহ মন অমসুং শ্রী কে সাই রেদিনা মহাক্কী অচেৎপা খোঙথাংশিংগীদমক প্রধান মন্ত্রী থাগৎপা ফোঙদোকখি।

ইন্দিয়ান ফার্মর চৌধুরি চরন সিংহ ওর্গনাইজেসনগী নেসনেল প্রসিদেন্ত ধর্মেন্দ্র চৌধুরিনা হায়খি লৌমীশিং, শা-ষন লোইবশিং অমসুং ঙামীশিংগী য়াইফনবা প্রধান মন্ত্রী শ্রী নরেন্দ্র মোদীনা অচেৎপা ৱারেপ অমা লৌরে। ফিবম অমতদা ভারতনা লৌমীশিংগী য়াইফনবা থবকশিং য়াশিন্নবা তৌরোই। লৈবাক অসিগী প্রধান মন্ত্রীনা লাউথোকখিবা ৱাফম অসিনা চীঞ্জাক পুথোক্লিবা লৌমী করোর কয়াগী পুক্নিং লৈতাহনবা খক নত্তনা, লৌউ-শিংউ অমসুং ভারতকী খুঙ্গং অত্মনির্ভর ওইনবগী ৱাশক মপাঙ্গল কনখৎহল্লে। তুংগী মীরোলশিং ইথিল পীগদবা প্রধান মন্ত্রীগী মীৎয়েং শানবা অমসুং লৌমীগী য়াইফনবা ফিরেপ মখোয়না তরাম্না ওক্লি অমসু মপুংফানা শৌগৎলি।

ছতিসগর য়ুথ প্রোগ্রেসিপ ফার্মরস এসোসিএসনগী বিরেন্দ্র লোহান্না হায়খি থৌনা ফরবা ৱারেপ অসিনা অমেরিকাগী কম্পেনিশিং ঐখোয়গী লৌউ-শিংউগী থবক্ত চঙলক্নবগী অয়াবা পীদ্রে অমসুং লৌবুক, খুঙ্গং অমসুং শঙ্গোল খুদিংমক্ত দাইরি সেক্তরশিংনা খোন্থাং য়ৈরে। ভারতকী লৌমীশিং চীঞ্জাক পুথোকপা খক নত্তনা, লৈবাক অসিগী থৱায়নি। মপান লৈবাক্কী মীওই অমতনা থৱায় অসি ফাজিনবা য়ারোই হায়বা অদোম্না উৎলে। দিল্লিদা হৌজিক লৈরিবা লৈঙাক অসি লৈরিবমখৈ মপানগী শাফু অমতনা ভারতকী লৌমীশিং মখোয়গী মখাদা লৈহনবা ঙম্লোই হায়বা অদোম্না ঐখোয়দা থাজবা পীরে। খদ্রক্কী হারশিং, মরুশিং অমসুং তিলহাৎ হিদাকশিংগী মথক্ত অকনবা থবক লৌখৎপগীদমক ঐনা থম্মোয় শেংনা য়ুনিয়ন মিনিষ্টর সিবরাজ সিংহ চৌহান থাগৎপা ফোঙদোকচরি।

ধর্মেন্দ্র মালিক্না হায়খি ঐখোয়না প্রধান মন্ত্রী অমসুং এগ্রিকলচর মিনিষ্টর থাগৎচরি অমসুং অদোমগী ৱারেপ অদু হোংদনবা অমসুং ফ্রি ত্রেদকী মতাংদা ঐখোয়গী থৌশিলশিং হোংদনবা হায়জরি। ঐখোয়না মতম পুম্নমক্ত অদোমগীদমক লেপকনি।

কিরপা সিংহ নাতুৱালানা হায়খি, এগ্রিমেন্ত অসিদা অমেরিকানা কন্না তকশিল্লকপা অদুদা ঐখোয় থৱায় য়াম্না ৱাখি। করিগুম্বা মসি থবক ওইনা পাংথোকখ্রবদি, লৌমীশিং মাঙলগনি। অদুবু লৌমীশিংগী য়াইফনবা প্রধান মন্ত্রী অমসুং এগ্রিকলচর মিনিষ্টরনা অচেৎপা ৱারেপ অমা লৌরে। মসিনা পঞ্জাবগী লৌমীশিং অপেনবা পোক্লে অমসুং লৈবাক শীনবা থুংনা চাউথোকচরে। ঐনা মীয়াম, লৌমীশিং অমসুং ললোনবশিংদা হায়জরি-অমেরিকানা হায়নিংবা হায়জসনু, মসিনা ঐখোয়দা অকায়বা পীরোই। এগ্রিকলচর মিনিষ্টর থাগৎচরি, লৈবাক অসিগী লৌমীশিং অদোমগীদমক লেপ্লি।

পঞ্জাবতগী কুলদিপ সিংহ বাজিদপুরনা প্রধান মন্ত্রী অমসুং এগ্রিকলচর মিনিষ্টর থাগৎলদুনা হায়খি মখোয়গী পুন্সি অহোংবা পুরকখিবা লৌমীশিংগী য়াইফনবা থবক কয়া সরকারনা পায়খৎলে। মখা তানা অকনবা থবকশিং পায়খৎলক্কনি হায়বগী থাজবা থম্লি, মরম অদুনা লৌমীশিংনা য়ু.এসগুম্বা লৈবাকশিংদা হন্না য়েংলোইদবনি।

য়ুনিয়ন এগ্রিকলচর মিনিষ্টর শ্রী সিবরাজ সিংহ চৌহান্না হায়খি মীফম অসি অপীকপা ভারত অমা ওইরে। ভারত খক নত্তনা মালেমগী মীয়াম থাক্নবগীদমক অহিং অমসুং নুংথিল থবক কন্না শুরিবা ঐগী লৌমী ইচিন-ইনাওশিং ঐনা ইকায়খুম্নবা উৎচরি। মহৈ-মরোংনা থৱায়নি, মহৈ-মরোং অসি ঈশ্বরনি। লৌমী অসি চীঞ্জাক পুথোকপা অমসুং থৱায় হিংহনবা অনিমক্নি। ঐগী ওইনা, লৌমীশিংগী সেবা তৌবা অসি ঈশ্বর লাৎপনি অমসুং মসিগী হেনবা লাই নিংবা অমা লৈতে।

শ্রী সিবরাজ সিংহ চৌহান্না হায়খি খদ্রক্কী হারশিং অমসুং কেমিকেলশিং পুথোকপশিংগী মথক্ত অকনবা থবক পায়খৎনবা অনৌবা আইন অমা অথুবা মতমদা চৎনরগনি। লৌমীশিংগী য়াইফনবা স্কিম কয়া মাইপাক্না পায়খৎলি। ঙরাং ওগষ্ট ১১ দা, প্রধান মন্ত্রী ফাসাল বিমা য়োজনাগী মখাদা রাজস্থান্দা ঝুনঝুনুগী লৌমীশিংদা দিজিতেল পেমেন্তদা ইন্সুরেন্সকী শেনফমশিং ফংহনখ্রে।

শ্রী সিবরাজ সিংহ চৌহান্না হায়খি ‘লৈবাক্কী থবক্না অহানবা’ হায়বসি প্রধান মন্ত্রীগী ৱাশক্নি। পেহালগাম তেরর এত্তেক মতুংদা ইন্দস ৱাতর ত্রিতি চৎনখিদবা অসি পুৱারি ওইরবা ৱারেপ অমনি অমসুং মসিগীদমক লৈবাক শীনবা থুংনা প্রধান মন্ত্রী থাগৎপা ফোঙদোক্লি।

য়ুনিয়ন এগ্রিকলচর মিনিষ্টর শ্রী সিবরাজ সিংহ চৌহান্না হায়খি প্রধান মন্ত্রীনা মতম পুম্নমক্ত লৈবাক্কী য়াইফনবা অকনবা, অচেৎপা ৱারেপ লৌরিবা অসিগীদমক লৈবাক অসিনা মতম চুপ্পগী তৌবীমল খঙবা উৎকনি। 

***