ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಮನ್ ಕಿ ಬಾತ್ ಕಾರ್ಯಕ್ರಮವು ದೇಶಾದ್ಯಂತ ನಡೆಯುತ್ತಿರುವ ಸಕಾರಾತ್ಮಕ ಬದಲಾವಣೆಗಳನ್ನು ಪ್ರದರ್ಶಿಸಲು ಮತ್ತು ಭಾರತದ ಅಭಿವೃದ್ಧಿ ಪ್ರಯಾಣದಲ್ಲಿ ನಾಗರಿಕರು ಸಕ್ರಿಯವಾಗಿ ಭಾಗವಹಿಸುವಂತೆ ಪ್ರೋತ್ಸಾಹಿಸಲು ಒಂದು ವಿಶಿಷ್ಟ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತಿದೆ.

ಈ ಮಾಸಿಕ ರೇಡಿಯೋ ಕಾರ್ಯಕ್ರಮದ ಮೂಲಕ, ಪ್ರಧಾನ ಮಂತ್ರಿಯವರು ಶಿಕ್ಷಣ, ಆರೋಗ್ಯ, ಪರಿಸರ, ನಾವೀನ್ಯತೆ ಮತ್ತು ಸಾಮಾಜಿಕ ಸೇವೆಯಂತಹ ಕ್ಷೇತ್ರಗಳಲ್ಲಿ ಭಾರತೀಯರು ಪರಿಣಾಮಕಾರಿ ಕೆಲಸ ಮಾಡುತ್ತಿರುವ ಸ್ಪೂರ್ತಿದಾಯಕ ಕಥೆಗಳನ್ನು ಹಂಚಿಕೊಳ್ಳುತ್ತಾರೆ. ಯುವಕರು, ರೈತರು, ಮಹಿಳೆಯರು, ಕುಶಲಕರ್ಮಿಗಳು, ಉದ್ಯಮಿಗಳು, ಕ್ರೀಡಾಪಟುಗಳು ಮತ್ತು ಸ್ವ-ಸಹಾಯ ಗುಂಪುಗಳಿಂದ ನಡೆಸಲ್ಪಡುವ ತಳಮಟ್ಟದ ಉಪಕ್ರಮಗಳು ಮತ್ತು ಸಮುದಾಯ ಆಧಾರಿತ ಪ್ರಯತ್ನಗಳನ್ನು ಅವರು ಎತ್ತಿ ತೋರಿಸುತ್ತಾರೆ. ಈ ಕಥೆಗಳು ಹೆಚ್ಚಾಗಿ ದೂರದ ಮತ್ತು ವೈವಿಧ್ಯಮಯ ಪ್ರದೇಶಗಳಿಂದ ಬರುತ್ತವೆ, ಇದು ರಾಷ್ಟ್ರದ ಶ್ರೀಮಂತ ಮತ್ತು ಅಂತರ್ಗತ ಮನೋಭಾವವನ್ನು ಪ್ರತಿಬಿಂಬಿಸುತ್ತದೆ. ಮನ್ ಕಿ ಬಾತ್ ದೇಶದ ಸಾಧನೆಗಳು ಮತ್ತು ಇತಿಹಾಸದ ಅಪರಿಚಿತ ವೀರರ ಕೊಡುಗೆಗಳತ್ತ ಗಮನ ಸೆಳೆಯುತ್ತದೆ. ಕಾಲಾನಂತರದಲ್ಲಿ, ಮನ್ ಕಿ ಬಾತ್ ರಾಷ್ಟ್ರ ನಿರ್ಮಾಣದ ಪ್ರಬಲ ಮಾಧ್ಯಮವಾಗಿ ವಿಕಸನಗೊಂಡಿದೆ, ಭಾರತದ ವೈವಿಧ್ಯತೆ, ದೃಢತೆ ಮತ್ತು ಸಾಮಾಜಿಕ ಬದ್ಧತೆಯನ್ನು ಆಚರಿಸುವ ಕಥೆಗಳ ಮೂಲಕ ಸಾರ್ವಜನಿಕ ಸಂವಾದವನ್ನು ರೂಪಿಸುತ್ತಿದೆ.

ಮನ್ ಕಿ ಬಾತ್ ಕಾರ್ಯಕ್ರಮವನ್ನು ಆಕಾಶವಾಣಿ ಯಾವುದೇ ಹೆಚ್ಚುವರಿ ವೆಚ್ಚವಿಲ್ಲದೆ ಅಸ್ತಿತ್ವದಲ್ಲಿರುವ ಆಂತರಿಕ ಸಂಪನ್ಮೂಲಗಳನ್ನು ಬಳಸಿಕೊಂಡು ನಿರ್ಮಿಸುತ್ತದೆ ಮತ್ತು ಇದು ಪ್ರಾರಂಭವಾದಾಗಿನಿಂದ 34.13 ಕೋಟಿ ರೂ. ಆದಾಯವನ್ನು ಗಳಿಸಿದೆ.

ಮನ್ ಕಿ ಬಾತ್ ಕಾರ್ಯಕ್ರಮದ ಮೂಲಕ ಕೇಳುಗರನ್ನು ತೊಡಗಿಸಿಕೊಳ್ಳುವುದು ಸಾಂಪ್ರದಾಯಿಕ ಮತ್ತು ಡಿಜಿಟಲ್ ವೇದಿಕೆಗಳಲ್ಲಿ ಬಹು ರೂಪಗಳನ್ನು ಪಡೆಯುತ್ತಿದೆ.

ಆಕಾಶವಾಣಿ ತನ್ನ ರಾಷ್ಟ್ರೀಯ ಮತ್ತು ಪ್ರಾದೇಶಿಕ ಜಾಲದಾದ್ಯಂತ ನೇರ ಪ್ರಸಾರ ಮಾಡುವ ಮೂಲಕ ಬಹತೇಕ ಕೇಳುಗರು ಕಾರ್ಯಕ್ರಮವನ್ನು ಕೇಳುವ ಮೂಲಕ ತೊಡಗಿಸಿಕೊಳ್ಳುತ್ತಾರೆ. ಸ್ಥಳೀಯ ಶ್ರೋತೃಗಳನ್ನು ತಲುಪಲು ಪ್ರಾದೇಶಿಕ ಭಾಷಾ ಆವೃತ್ತಿಗಳನ್ನು ಸಹ ಪ್ರಸಾರ ಮಾಡಲಾಗುತ್ತಿದೆ.

ಅಲ್ಲದೆ, ಈ ಕಾರ್ಯಕ್ರಮವು ದೂರದರ್ಶನದ ವಿವಿಧ ರಾಷ್ಟ್ರೀಯ ಮತ್ತು ಪ್ರಾದೇಶಿಕ ಭಾಷಾ ವಾಹಿನಿಗಳಲ್ಲಿ ಪ್ರಸಾರವಾಗುತ್ತದೆ. ದೂರದರ್ಶನ ವಾಹಿನಿಗಳಲ್ಲದೆ, ಡಿಡಿ ಫ್ರೀ ಡಿಶ್ 48 ಆಕಾಶವಾಣಿ ವಾಹಿನಿಗಳು ಮತ್ತು 92 ಖಾಸಗಿ ದೂರದರ್ಶನ ವಾಹಿನಿಗಳನ್ನು ಸಹ ನೀಡುತ್ತದೆ, ಇದು ಗ್ರಾಮೀಣ ಮತ್ತು ದೂರದ ಪ್ರದೇಶಗಳನ್ನು ಒಳಗೊಂಡಂತೆ ದೇಶಾದ್ಯಂತ ವೀಕ್ಷಕರಿಗೆ ಕಾರ್ಯಕ್ರಮವು ಲಭ್ಯವಾಗುವಂತೆ ಮಾಡುತ್ತದೆ. ಮನ್ ಕಿ ಬಾತ್ ನ ದೃಶ್ಯ ಸ್ವರೂಪವು ಹಂಚಿಕೆಯ ಅನುಭವಗಳನ್ನು ಸಕ್ರಿಯಗೊಳಿಸುತ್ತದೆ, ಸಾಮೂಹಿಕ ಪ್ರತಿಬಿಂಬ ಮತ್ತು ಚರ್ಚೆಯನ್ನು ಉತ್ತೇಜಿಸುವ ಮೂಲಕ ಪ್ರೇಕ್ಷಕರ ತೊಡಗಿಸಿಕೊಳ್ಳುವಿಕೆಯನ್ನು ಹೆಚ್ಚಿಸುತ್ತದೆ.

ಡಿಜಿಟಲ್ ಪ್ಲಾಟ್ಫಾರ್ಮ್ ಗಳಲ್ಲಿ, ಕೇಳುಗರ ತೊಡಗಿಸಿಕೊಳ್ಳುವಿಕೆ ಗಮನಾರ್ಹವಾಗಿ ವಿಸ್ತರಿಸಿದೆ. ಈ ಕಾರ್ಯಕ್ರಮವನ್ನು ಯೂಟ್ಯೂಬ್ ಚಾನೆಲ್ ಗಳಲ್ಲಿ (PMO India, AIR ಇತ್ಯಾದಿ) ಮತ್ತು ಪ್ರಸಾರ ಭಾರತಿಯ ಒಟಿಟಿ ಪ್ಲಾಟ್ಫಾರ್ಮ್ ವೇವ್ಸ್ ನಲ್ಲಿ ಹಾಗೂ 260 ಕ್ಕೂ ಹೆಚ್ಚು ಆಕಾಶವಾಣಿ ವಾಹಿನಿಗಳನ್ನು ನೀಡುವ “NewsOnAIR” ಮೊಬೈಲ್ ಅಪ್ಲಿಕೇಶನ್ ಮೂಲಕ ನೇರ ಪ್ರಸಾರ ಮತ್ತು ಆರ್ಕೈವ್ ಮಾಡಲಾಗಿದೆ. ವ್ಯಾಪಕ ಪ್ರಸರಣವನ್ನು ಸುಗಮಗೊಳಿಸಲು ಪ್ರಸಾರ ಭಾರತಿ, ಪಿಬಿ ಶಬ್ದ್ ನ ಸುದ್ದಿ ಫೀಡ್ ಸೇವೆಯಲ್ಲಿಯೂ ಇದನ್ನು ಲಭ್ಯವಾಗುವಂತೆ ಮಾಡಲಾಗಿದೆ.

ಈ ಕಾರ್ಯಕ್ರಮವನ್ನು ಭಾರತ ಮತ್ತು ಪ್ರಪಂಚದಾದ್ಯಂತದ ಕೇಳುಗರು ಫೇಸ್ಬುಕ್, ಟ್ವಿಟರ್/ಎಕ್ಸ್ ಮತ್ತು ಇನ್ಸ್ಟಾಗ್ರಾಮ್ ನಂತಹ ಸಾಮಾಜಿಕ ಮಾಧ್ಯಮ ವೇದಿಕೆಗಳ ಮೂಲಕ ವ್ಯಾಪಕವಾಗಿ ಕೇಳುತ್ತಿದ್ದಾರೆ. ನಿಯಮಿತವಾಗಿ ಆಲಿಸುವುದು ಮತ್ತು ವೀಕ್ಷಿಸುವುದರ ಜೊತೆಗೆ, ನಾಗರಿಕರು MyGov ಪೋರ್ಟಲ್ ಮೂಲಕ ಕಾರ್ಯಕ್ರಮಕ್ಕಾಗಿ ಸಲಹೆಗಳನ್ನು ನೀಡುವ ಮೂಲಕ, ಪ್ರಧಾನ ಮಂತ್ರಿಯವರಿಗೆ ಪತ್ರಗಳು ಅಥವಾ ಇಮೇಲ್ ಗಳನ್ನು ಬರೆಯುವ ಮೂಲಕ ಮತ್ತು ಧ್ವನಿ ಸಂದೇಶಗಳನ್ನು ರೆಕಾರ್ಡ್ ಮಾಡುವ ಮೂಲಕ ಸಕ್ರಿಯವಾಗಿ ಭಾಗವಹಿಸುತ್ತಿದ್ದಾರೆ.

ಸಾಂಸ್ಥಿಕ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ, ಶಾಲೆಗಳು, ಗ್ರಾಮ ಪಂಚಾಯಿತಿಗಳು, ಸ್ವ-ಸಹಾಯ ಗುಂಪುಗಳು ಮತ್ತು ಸರ್ಕಾರೇತರ ಸಂಸ್ಥೆಗಳು ನಾಗರಿಕ ಜಾಗೃತಿ ಮತ್ತು ಸಮುದಾಯ ಚರ್ಚೆಯನ್ನು ಉತ್ತೇಜಿಸಲು ಸಾಮೂಹಿಕ ಆಲಿಸುವಿಕೆ ಅಥವಾ ವೀಕ್ಷಣೆಯನ್ನು ಆಯೋಜಿಸುತ್ತವೆ.

ಈ ಮಾಹಿತಿಯನ್ನು ಇಂದು ರಾಜ್ಯಸಭೆಯಲ್ಲಿ ವಾರ್ತಾ ಮತ್ತು ಪ್ರಸಾರ ಹಾಗೂ ಸಂಸದೀಯ ವ್ಯವಹಾರಗಳ ರಾಜ್ಯ ಸಚಿವರಾದ ಡಾ. ಎಲ್ ಮುರುಗನ್ ಅವರು ನೀಡಿದರು.

*****