U Myntri Sorkar Pdeng ba dei khmih ia ka Tnad Communications, u Jyotiraditya M. Scindia  u la pyniaid ia ka jingialang jong kito kiba don bynta ha ka kam mynta ka sngi ryngkat bad u Secretary, Tnad Telecommunications, Dr. Neeraj Mittal hapoh ka sienjam Sanchar Saathi ban ai jingmut bad pynkhlaiñ shuh shuh ïa ki sienjam pyrshah ïa ki kam thok lyngba ki lad cyber kiba ïadei bad ka kam telecom, ha ka jingiadei bad ka jingdonkam kyrkieh ban pynsngewthuh kham bha, ban pyntreikam ïa ki lad jingïada, bad ban pynshlur ïa ka Jan-bhagidari lyngba ka jingpyntip paidbah.

Kane ka sienjam ‘Sanchar Saathi’ kaba pynshong nongrim ha ka kam digital kaba shngain na ka bynta ki paidbah ka pynïasoh lang ïa ki atiar kiba kham khlain kum ka CEIR (Central Equipment Identity Register) ban khanglad ïa ki phone ba la tuh ne ba la jah, ka DIP (Digital Intelligence Platform), ki system ba la pynshong nongrim ha ka AI kum ka ASTR (ban lap ïa ki connection ba la shim ha ki kot ki sla ba thok) bad ka FRI (Financial Fraud Risk Indicator) ban lap & khanglad ia ki jingleh thok kiba lah ban mih. Ka la wanrah ïa ka jingkiew kaba phylla ha kaba pynskhem ïa ka jinglong jingman ka kam telecom jong ka ri India.

Haduh mynta, palat 82 lak tylli ki connection mobile thok ki la shah pynduh, bad palat 35 lak tylli ki phone kiba la jah ne shah tuh la khang noh. Kane ka sienjam ka la jop ruh ban khanglad ïa 1.35 klur ki jingphone thok na shabar ri tang hapoh 24 kynta naduh ba la pyntreikam ïa kane ka rukom treikam. Kane ka rukom treikam ka la wanrah 97% ka jingduna ha kum kine ki jingphone.

Ka rynsan Sanchar Saathi ka la sakhi ïa ka jingïashim bynta kaba khraw jong ki paidbah, ha kaba 16 klur ngut ki nongpyndonkam bad ka jingkheiñ kyllum jong ki 2 lak ngut ki nongpyndonkam man la ka sngi. Lyngba ka atiar ASTR ba la pyndonkam da ka AI, ki kaiphod jong ki nongshong shnong, bad ki jingai jingmut jong ki nongshim bynta, palat 4.7 klur tylli ki connection mobile la pynduh noh. Kane ka sienjam ka la ialam ruh ban khanglad ïa 5.1 lak tylli ki mobile handset, ban pynduh ïa 24.46 lak tylli ki WhatsApp Account, bad ban buh ha ka thup ïa ki 20,000 tylli ki nongphah SMS kiba donkti ha ki kam thok.

Hapoh ka CEIR system jong u Sanchar Saathi, la khang 35.49 lak tylli ki tiar kiba la jah ne shah tuh, 21.57 lak la lapdien, bad 5.19 lak la ioh biang. Mynta, ka Sanchar Saathi ka la pynïasoh 620 tylli ki seng, ba kynthup ïa ki tnad treikam jong ka sorkar pdeng, ki bor pulit jong ka jylla, ki nongpynbiang ïa ki jingshakri telecom (TSP), bad ka GSTN, kaba pynlong ïa ka jingïatreilang kaba khlaiñ ban ïakhun pyrshah ïa ki kam thok lyngba ka telecom bad ki jingma kiba don ha ka kam cyber ha kylleng ka ri.

La plie paidbah ia ka Sanchar Saathi App ha ka ktien Hindi bad 21 tylli ki jait ktien tynrai

Ha ka sienjam ba kongsan ban kyntiew ïa ka jinglah ban ïoh ïa ki jingtip, u Myntri Sorkar Pdeng u la pyllait paidbah ïa ka Sanchar Saathi mobile application ha ka ktien Hindi bad 21 tylli ki jait ktien tynrai, kaba pynthikna ïa ka jingpoi jong ka ha kylleng ki thaiñ bapher bapher. La sdang nyngkong eh ha u bnai Kyllalyngkot 2025, kane ka app ka ailad ïa ki nongpyndonkam ban pyntip ïa ki jingïakren kiba ym shaniah, ban khanglad ne wad ïa ki phone ba la jah/shah tuh, bad ban peit bniah ïa ki connection mobile ba khlem ioh jingbit. Mynta lah ban ioh ha baroh ar tylli ki rynsan Android bad iOS, kaba ai bor ia ki nongshong shnong ha kylleng ka ri da ki tiar iada digital ha ki ktien bapher bapher. Ka App ka la don palat 46 lak ngut ki briew kiba download.

Iasam ia ki jingshem da kiba iadon bynta bad ki nongshong shnong

Ha ka jingiakren la don ki nongshim bynta ba kongsan na ka bor pyntreikam ia ka ain, ki nongpynbiang ia ki jingshakri telecom, ki jaka kiba trei ha ki kam pisa, bad ki sengbhalang. Ki nongïashim bynta ki kynthup ïa u Shikha Goel, (Head-Telangana Cyber Security Bureau), u Sanjeev Kumar Sharma (DDG – Digital Intelligence Unit), u Rajesh Kumar (CEO I4C), u Pushpamitra Sahu (CGM, RBI) Shivnath Thukral (Head of Public Policy, PhonePe), u M. Paramasivam (ED, PNB) ki web developer bad ki kynhun teknikal jong ki sienjam Sanchar Saathi, kumjuh ruh ki heh ophisar na ka C-DOT, RPF bad ka Tnad Telecommunications.

Ki nongshong shnong na Haryana bad Uttar Pradesh ruh ki la ïasam ïa ki jingshem jong ki halor ki sienjam jong ka Sanchar Saathi, da kaba pynpaw ïa ka jingsngewnguh halor ka jingkiew ka jingtreikam bad ka jinglah ban pynbeit ïa ki jingeh ha ka por. Ki la iathuh kumno ki la lah ban ioh biang ia ki mobile phone jong ki ba la tuh da kaba pyndonkam ia ka rynsan. U Sujit Beck, u nongshong shnong uba peit ia ki kam cyber, u la iathuh kumno u la iarap ban pynduh ia ki hajar tylli ki connection mobile ba thok lyngba ka Sanchar Saathi bad iarap ia ki briew, khamtam ia kiba la tymmen, lyngba ki jingpynsngewthuh bad ka sienjam kaba mardor pyrshah ia ka jingthok lyngba ki lad cyber.

Ka Sanchar Saathi ka dang ïai bteng ban kiew kum ka rynsan kaba khlaiñ, kaba kynthup ïa baroh kaba ai bor ïa ki nongshong shnong ban ïada na ka jingleh thok lyngba ka telecom bad ban noh synñiang shibun sha ka bor cyber kaba khlain jong ka India. Ka jingpyniar ia ka app sha ki ktien jong ki thain ka pyni ia ka sienjam kaba kongsan ban pynthikna ia ka jingshngain ha ka kam digital na ka bynta baroh.

<><><>