য়োর এক্সিলেন্সী, শ্রী রাস্ত্রপতি,
লৈবাক অনিমক্তগী মশক নাইবা দেলিগেৎশিং,
মেদিয়াগী মরুপশিং,
খুরুমজরি!

অহানবদা, ভারত মচা খুদিংমক্কী মায়কৈদগী, ঐহাক্না মালদীবকী হিস এক্সিলেন্সী অমসুং মীয়াম্বু মখোয়গী নীংতম্বা চহি 60শুবা মপোক কুমওন্দা থম্মোয় শেংনা নুংঙাইবা ফোংদোকচরি।

মসিগী পুৱারী ওইরবা থৌরম অসিদা ঐহাকপু অথোইবা মীথুংলেন ওইনা কৌবীরকপগীদমক্তা ঐহাক্না হিস এক্সিলেন্সী রাস্ত্রপতিবু থাগৎচরি।

চহি অসিদা ভারত অমসুং মালদীবকী মরক্তা দিপ্লোমেতিক রিলেসনশিপকী চহি 60শুবা মপোক কুমওনসু পাংথোক্লি। অদুম ওইনমক, ঐখোয়গী মরীগী হৌরকফম অসি পুৱারীদগী হেন্না অরিবা অমসুং সমুদ্রগুম্না অরুবা অমনি। ঙসি ফোঙখিবা ঐখোয়গী লৈবাক অনিগী চৎনবীগী ওইবা জহাজশিং য়াওবা নিংশিং স্তাম্প অসিনা ঐখোয় য়ুম্লোন্নবশিং খক্তা নত্তনা পুন্না চৎমিন্নরিবা খোঙচৎ অমগী খোঙবুরোইশিংনি হায়বা উৎলি।

মরুপশিং,

ভারত অসি মালদীবকী খ্বাইদগী নক্নবা য়ুম্লোন্নবশিংনি। মালদীব অসি ভারতকী "নেবরহুদ ফার্স্ত" পোলিসী অমসুং ঐখোয়গী মহাসাগর ভিজন অনিমক্তা মরুওইবা মফম অমা কল্লি। ভারতনা মালদীবকী খ্বাইদগী থাজবা মরুপ ওইবদা চাউথোকচরি। মহৌশাগী ওইবা দিজাস্তর ওইরো নত্রগা মালেমগী লাইচৎ ওইরো, ভারতনা মালদীবকী "ফার্স্ত রেস্পোন্দর" ওইনা মতম পুম্নমক্তা মতেং পাংদুনা লাক্লি। তঙাই ফদবা পোৎলমশিং সপ্লাই তৌবদা ওইরবসু নৎত্রগা কোবিদ মতুংদা শেন্মিৎলোন ফগৎহনবদা ওইরবসু ভারতনা মালদীবকা লোয়ননা মতম পুম্নমক্তা থবক তৌমিন্নরি।

ঐখোয়গীদমক্তদি, মরুপ-মপাং ওইবগী মরী অসি মতম পুম্নমক্তা খ্বাইদগী মরু ওই।

মরুপশিং,

হৌখিবা ওক্তোবরদা রাস্ত্রপতিগী ভারত খোঙচৎ মনুংদা, ঐখোয়না কমপ্রিহেন্সিব ইকনোমিক অমসুং মেরিতাইম সেক্যুরিতী পার্তনরশিপকীদমক মান্নবা ভিজন অমা শিয়র তৌরি। মসিগী মঙলান অসি হৌজিক তশেং তশেংনা ওইরক্লি। মসিগী মহৈ ওইনা, ঐখোয়গী নাকল অনিগী ওইবা মরীশিং অসি অনৌবা অৱাংবা থাক্তা য়ৌরক্লি, অমসুং মরু ওইবা প্রোজেক্ত কয়া অমা শঙ্গাখ্রে।

ভারতকী মতেংগা লোয়ননা শেমগৎখিবা সোসিএল হাউজিং য়ুনিৎ লিশিং মরি অসিনা মালদীবকী ইমুং কয়াগীদমক অনৌবা অহৌবা অমা ওইহল্লগনি। গ্রেতর মেল কনেক্তিবিতী প্রোজেক্ত, অদ্দু রোদ দিবেলপমেন্ত প্রোজেক্ত, অমসুং হানিমাধু ইন্তর্নেস্নেল এয়রপোর্ত অমুক হন্না শেমগৎপা অসিগুম্বা প্রোজেক্তশিংনা লমদম অসি ত্রান্সিৎ অমসুং ইকোনোমিক এক্তিবিতীগী মরু ওইবা মফম অমা ওইহল্লগনি।

য়াম্না থুনা, ফেরী সিস্তেম হৌদোকপগা লোয়ননা, তোঙান তোঙানবা ইথৎশিংগী মরক্তা শম্নবা অসি হেন্না লায়থোক্লগনি। মদুগী মতুংদা, ইথৎশিংগী মরক্তা লৈরিবা অরাপ্পা অসি GPDনা ওল্লরোই, অদুবু ফেরীগী মতমনা ওল্লগনি!

ঐখোয়গী দিবেলপমেন্ত পার্তনরশিপতা অনৌবা ইনোৎ অমা পীনবগীদমক, ঐখোয়না মালদীবতা দোল্লর মিলিয়ন 565গী লাইন ওফ ক্রেদিৎ - চাউরাক্না লুপা করোর লিশিং মঙাগী শেনফম অমা পীনবা ৱারেপ লৌখ্রে। মসি মালদীবকী মীয়ামগী মরুওইবশিংগা চুনবা ইনফ্রাস্ত্রকচর দিবেলপমেন্ত প্রোজেক্তশিংদা শীজিন্নগনি।

মরুপশিং,

ঐখোয়না ঐখোয়গী ইকোনোমিক পার্তনরশিপ অসি খুমাং চাউশিলহন্নবা খোঙথাং কয়া অমা লৌখৎলি। ম্যুচুএল ইনভেস্তমেন্ত হেনগৎহন্নবা, ঐখোয়না অথুবা মতমদা বাইলেতরেল ইনভেস্তমেন্ত ত্রিতী অমা ফাইনেলাইজ তৌনবা থবক পায়খৎলগনি। ফ্রী ত্রেদ এগ্রীমেন্তগী মতাংদা খন্ন-নৈনবগী থবকসু হৌখ্রে। হৌজিক ঐখোয়গী পান্দমদি - পেপরৱার্কতগী চাউখৎপা ওইহনবনি!

লোকেল কারেন্সী সেতলমেন্ত সিস্তেমগী মতেংনা, ললোন-ইতিক অসি হৌজিক্তি রুপী অমসুং রুফিয়াদা হকথেংননা পাংথোকপা ঙম্মি। মালদীবতা UPI য়াম্না থুনা চৎনহনবা অসিনা তুরিজম অমসুং রিতেল সেক্তর অনিমক হেন্না মপাঙ্গল কনখৎহল্লগনি।

মরুপশিং,

দিফেন্স অমসুং সেক্যুরিতীগী লমদা তেংবাং পীনবা অসিনা অমনা অমবু থাজবা থম্বা উৎলি। ঙসি উরেপ উয়ুং তম্লিবা দিফেন্স মিনিস্ত্রী বিলদিং অসি থাজবগী অচেৎপা খুদম অমনি - ঐখোয়গী মপাঙ্গল কনবা পার্তনরশিপকী মশক অমনি ।

ঐখোয়গী কোলাবোরেসন অসি হৌজিক্তি ৱেদর সাইন্সতা হেনগৎলগনি। ৱেদরনা ওইনীংবা ওইরবসু, ঐখোয়গী মরুপ-মপাং ওইবগী মরী অসি মতম পুম্বদা মঙাল অমসুং ময়েক শেংনা লৈগনি!

ভারতনা মালদীবকী ঙাকশেলগী মপাঙ্গল হেনগৎহনবদা মখা তানা মতেং পাংগনি। ভারত মহাসাগর লমদমদা শান্তি, তংদুন লৈতাবা অমসুং চাউখৎপা অসি ঐখোয়গী অপুনবা পান্দমনি। কোলম্বো সেক্যুরিতী কনক্লেবকী খুত্থাংদা ঐখোয় পুন্না লমদম অসিগী মেরিতাইম সেক্যুরিতী মপাঙ্গল কনখৎহল্লগনি।

ক্লাইমেৎ চেঞ্জ অসি ঐখোয়গী লৈবাক অনিমক্কী অচৌবা শিংনবনি। ঐখোয়না রিন্যুএবল ইনর্জী প্রমোৎ তৌনবা য়ানরে অমসুং মসিগী লম অসিদা ভারতনা মালদীবকা লোয়ননা মসিগী এক্সপরিয়েন্স শিয়র য়ামিন্নগনি।

এক্সিলেন্সী,

পুৱারী ওইরবা থৌরম অসিদা ঐহাক্না অমুক্কা হন্না অদোম অমসুং মালদীবকী মীয়াম্বু থম্মোয় শেংনা নুংঙাইবা ফোংদোকচরি। ঐহাক্না অদোম পুম্নমকপু তরাম্না ওকপীবগীদমক থাগৎপা ফোংদোকচরি।

ভারতনা মালদীবকী চাউখৎপা অমসুং য়াইফবগী লম্বীদা খোঙথাং খুদিংমক্তা মতেং পাংগনি হায়না ঐনা অমুক হন্না থাজবা পীজরি।

হন্না-হন্না থাগৎচরি!

খঙহঞ্জবা - মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***