প্ৰধানমন্ত্ৰী শ্ৰী নৰেন্দ্ৰ মোদীয়ে আজি বিহাৰৰ মোতিহাৰীত ৭,০০০ কোটি টকাতকৈও অধিক মূল্যৰ ৰাষ্ট্ৰ উন্নয়ন প্ৰকল্পৰ আধাৰশিলা স্থাপন, উদ্বোধন আৰু উৎসৰ্গা কৰে। পবিত্ৰ শাওন মাহত বাবা সোমেশ্বৰনাথৰ ওচৰত সেৱা জনাই প্ৰধানমন্ত্ৰীয়ে আশীৰ্বাদ বিচাৰে আৰু বিহাৰৰ জনসাধাৰণৰ জীৱনত সুখ আৰু সমৃদ্ধিৰ কামনা কৰে। সমাৱেশত ভাষণ দি শ্ৰী মোদীয়ে কয় যে এইখন হৈছে চম্পাৰণৰ ভূমি, যিয়ে ইতিহাস গঢ় দিছে। স্বাধীনতা আন্দোলনৰ সময়ত এই ভূমিয়ে মহাত্মা গান্ধীক এক নতুন দিশ প্ৰদান কৰিছিল। তেওঁ গুৰুত্ব আৰোপ কৰি কয় যে এই ভূমিৰ পৰা পোৱা অনুপ্ৰেৰণাই এতিয়া বিহাৰৰ নতুন ভৱিষ্যতক গঢ় দিব। এই উন্নয়নমূলক পদক্ষেপৰ বাবে তেওঁ উপস্থিত সকলোকে আৰু বিহাৰৰ জনসাধাৰণক অভিনন্দন জ্ঞাপন কৰে।

শ্ৰী মোদীয়ে একবিংশ শতিকাত দ্ৰুত গোলকীয় প্ৰগতি দেখা গৈছে বুলি উল্লেখ কৰি কয় যে এসময়ত কেৱল পশ্চিমীয়া ৰাষ্ট্ৰসমূহে দখল কৰা আধিপত্য এতিয়া পূবৰ দেশসমূহে ক্ৰমান্বয়ে ভাগ কৰি লৈছে, যাৰ অংশগ্ৰহণ আৰু প্ৰভাৱ বৃদ্ধি পাইছে। তেওঁ গুৰুত্ব আৰোপ কৰি কয় যে পূবৰ ৰাষ্ট্ৰসমূহে এতিয়া উন্নয়নত নতুন গতি লাভ কৰিছে। ইয়াৰ সমান্তৰালভাৱে প্ৰধানমন্ত্ৰীগৰাকীয়ে কয় যে পূবৰ দেশসমূহে যেনেকৈ বিশ্বব্যাপী অগ্ৰগতি লাভ কৰিছে, ভাৰততো তেনেকৈ পূবৰ ৰাজ্যসমূহৰ যুগ আৰম্ভ হৈছে। তেওঁ আগন্তুক সময়ত পূবৰ মোতিহাৰী পশ্চিমৰ মুম্বাইৰ দৰে বিশেষ হোৱাটো নিশ্চিত কৰাৰ বাবে চৰকাৰৰ সংকল্পক দৃঢ়তাৰে প্ৰকাশ কৰে। শ্ৰী মোদীয়ে গুৰুগ্ৰামৰ দৰে গয়াতো সমান সুযোগ, পুনেৰ দৰে পাটনাত ঔদ্যোগিক বিকাশ আৰু চুৰাটৰ দৰে সান্থাল পাৰাগণাত উন্নয়নৰ কল্পনা কৰে। তেওঁ আশা প্ৰকাশ কৰে যে জলপাইগুৰি আৰু জাজপুৰৰ পৰ্যটনে জয়পুৰৰ দৰে নতুন অভিলেখ স্থাপন কৰিব, আৰু বীৰভূমৰ জনসাধাৰণে বেংগালুৰুৰ দৰে প্ৰগতি লাভ কৰিব।

"পূব ভাৰতক আগুৱাই নিবৰ বাবে বিহাৰক এখন উন্নত ৰাজ্যলৈ ৰূপান্তৰিত কৰিব লাগিব", শ্ৰী মোদীয়ে গুৰুত্ব আৰোপ কৰি কয় যে বিহাৰত আজি দ্ৰুত প্ৰগতি সম্ভৱ, কিয়নো কেন্দ্ৰ আৰু ৰাজ্য দুয়োখন চৰকাৰেই বিহাৰৰ উন্নয়নৰ বাবে দায়বদ্ধ। এইক্ষেত্ৰত তেওঁ সমৰ্থনৰ পাৰ্থক্যটো স্পষ্ট কৰিবলৈ তথ্যৰ উদ্ধৃতি দিয়েঃ পূৰ্বতে কেন্দ্ৰত থকা চৰকাৰসমূহৰ কাৰ্যকালৰ ১০ বছৰত বিহাৰে প্ৰায় ২ লাখ কোটি টকাহে লাভ কৰিছিল আৰু এয়া আছিল শ্ৰী নীতিশ কুমাৰৰ নেতৃত্বাধীন চৰকাৰৰ বিৰুদ্ধে এক প্ৰকাৰৰ ৰাজনৈতিক প্ৰতিশোধ। প্ৰধানমন্ত্ৰীয়ে দৃঢ়তাৰে কয় যে ২০১৪ চনত ক্ষমতালৈ অহাৰ পাছত তেওঁৰ চৰকাৰে বিহাৰৰ বিৰুদ্ধে এই প্ৰতিশোধমূলক ৰাজনীতিৰ অন্ত পেলাইছিল আৰু বিগত ১০ বছৰ ধৰি তেওঁলোকৰ শাসনকালত বিহাৰৰ উন্নয়নৰ বাবে প্ৰায় ৯ লাখ কোটি টকা আবণ্টন দিয়া হৈছে। তেওঁ উল্লেখ কৰে যে পূৰ্বৰ তুলনাত ই চাৰিগুণ বেছি আৰু নিশ্চিত কৰি কয় যে এই পুঁজি সমগ্ৰ বিহাৰত জনকল্যাণ আৰু উন্নয়নমূলক প্ৰকল্পৰ বাবে ব্যৱহাৰ কৰা হৈছে।

দুই দশক পূৰ্বে বিহাৰে সন্মুখীন হোৱা হতাশা বুজিবলৈ আজিৰ প্ৰজন্মৰ প্ৰয়োজনীয়তাৰ ওপৰত গুৰুত্ব আৰোপ কৰি শ্ৰী মোদীয়ে কয় যে পূৰ্বৰ চৰকাৰসমূহৰ শাসনকালত উন্নয়ন স্থবিৰ হৈ পৰিছিল আৰু দৰিদ্ৰ লোকসকলৰ বাবে থকা পুঁজি তেওঁলোকৰ ওচৰলৈ যোৱাটো প্ৰায় অসম্ভৱ আছিল। তেওঁ তেতিয়াৰ নেতৃত্বক কেৱল দৰিদ্ৰ লোকসকলৰ ধন লুট কৰাৰ ওপৰত গুৰুত্ব দিয়াৰ বাবে সমালোচনা কৰে। প্ৰধানমন্ত্ৰীয়ে বিহাৰৰ জনসাধাৰণৰ স্থিতিস্থাপকতাক প্ৰশংসা কৰি ইয়াক এনে এখন ৰাজ্য বুলি অভিহিত কৰে, য'ত অসম্ভৱক সম্ভৱ কৰি তোলা হৈছে। পূৰ্বৰ চৰকাৰৰ বন্ধনৰ পৰা মুক্ত কৰি দৰিদ্ৰ লোকসকলক কল্যাণমূলক আঁচনিসমূহ পোনপটীয়াকৈ প্ৰদান কৰাৰ বাবে তেওঁ বিহাৰক প্ৰশংসা কৰে। শ্ৰী মোদীয়ে লগতে উল্লেখ কৰে যে বিগত ১১ বছৰত সমগ্ৰ দেশতে প্ৰধানমন্ত্ৰী আৱাস যোজনাৰ অধীনত ৪ কোটিৰো অধিক গৃহ নিৰ্মাণ কৰা হৈছে, যাৰ ভিতৰত কেৱল বিহাৰত প্ৰায় ৬০ লাখ গৃহ নিৰ্মাণ কৰা হৈছে। তেওঁ উল্লেখ কৰে যে এই সংখ্যাই নৰৱে, নিউজিলেণ্ড আৰু ছিংগাপুৰৰ দৰে দেশৰ মুঠ জনসংখ্যাক অতিক্ৰম কৰিছে। "কেৱল মোতিহাৰী জিলাত, প্ৰায় ৩ লাখ পৰিয়ালে পকী গৃহ লাভ কৰিছে, আৰু এই সংখ্যা দ্ৰুতগতিত বৃদ্ধি পাই আছে। অঞ্চলটোৰ ১২,০০০ৰো অধিক পৰিয়ালে আজি তেওঁলোকৰ নতুন গৃহৰ চাবি লাভ কৰিছে", শ্ৰী মোদীয়ে কয়। ইয়াৰ উপৰি ৪০,০০০ৰো অধিক দৰিদ্ৰ পৰিয়ালে তেওঁলোকৰ বেংক একাউণ্টত পকী ঘৰ নিৰ্মাণৰ বাবে পুঁজি লাভ কৰিছে, যাৰ অধিকাংশই দলিত, মহাদলিত আৰু পিছপৰা সম্প্ৰদায়ৰ। প্ৰধানমন্ত্ৰীয়ে মন্তব্য কৰে যে পূৰ্বৰ চৰকাৰৰ শাসনকালত দৰিদ্ৰ লোকসকলৰ বাবে এনে আৱাসগৃহ লাভ কৰাটো অকল্পনীয় আছিল। তেওঁ স্মৰণ কৰে যে তেওঁলোকৰ কাৰ্যকালত জমিদাৰসকলে লক্ষ্য কৰি লোৱাৰ ভয়ত বিহাৰৰ জনসাধাৰণে আনকি তেওঁলোকৰ ঘৰবোৰ ৰং কৰিবলৈও ভয় কৰিছিল। তেওঁ দৃঢ়তাৰে কয় যে পূৰ্বৰ শাসক দলৰ নেতাসকলে কেতিয়াও জনসাধাৰণক পকী ঘৰ প্ৰদান কৰিব নোৱাৰিলেহেঁতেন।

বিহাৰৰ প্ৰগতিৰ কৃতিত্ব ইয়াৰ মাতৃ আৰু ভগ্নীসকলৰ শক্তি আৰু সংকল্পক দি শ্ৰী মোদীয়ে কয় যে বিহাৰৰ মহিলাসকলে তেওঁলোকৰ চৰকাৰে গ্ৰহণ কৰা প্ৰতিটো পদক্ষেপৰ গুৰুত্ব স্পষ্টভাৱে বুজি পায়। তেওঁ অনুষ্ঠানত মহিলাসকলৰ বৃহৎ উপস্থিতিৰ কথা স্বীকাৰ কৰে আৰু সেই দিনবোৰ স্মৰণ কৰে। যেতিয়া তেওঁলোকে আনকি ১০ টকাও লুকুৱাই ৰাখিব লগা হৈছিল আৰু বেংক একাউণ্টত প্ৰৱেশাধিকাৰ নাছিল। প্ৰধানমন্ত্ৰীয়ে দৰিদ্ৰ লোকসকলৰ মৰ্য্যাদা সম্পৰ্কে তেওঁৰ বোধগম্যতাৰ কথা দৃঢ়তাৰে উল্লেখ কৰে আৰু বেংকসমূহৰ দুৱাৰ দৰিদ্ৰ লোকসকলৰ বাবে কিয় বন্ধ কৰি দিয়া হৈছিল বুলি প্ৰশ্ন কৰে। তেওঁ জন ধন একাউণ্ট খোলাৰ বাবে আৰম্ভ কৰা ব্যাপক অভিযানৰ ওপৰত আলোকপাত কৰে, যি মহিলাসকলক যথেষ্ট উপকৃত কৰিছে। বিহাৰৰ প্ৰায় ৩.৫ কোটি মহিলাৰ এতিয়া জন ধন একাউণ্ট আছে। শ্ৰী মোদীয়ে গুৰুত্ব আৰোপ কৰি কয় যে চৰকাৰী আঁচনিৰ পুঁজি এতিয়া এই একাউণ্টসমূহত পোনপটীয়াকৈ হস্তান্তৰ কৰা হৈছে। তেওঁ লগতে উল্লেখ কৰে যে শ্ৰী নীতিশ কুমাৰৰ অধীনত বিহাৰ চৰকাৰে শেহতীয়াকৈ বৃদ্ধ, বিশেষভাৱে সক্ষম আৰু বিধৱা মাতৃসকলৰ বাবে মাহিলী পেন্সন ৪০০ টকাৰ পৰা ১,১০০ টকালৈ বৃদ্ধি কৰিছে। প্ৰধানমন্ত্ৰীয়ে উল্লেখ কৰে যে এই ধন পোনপটীয়াকৈ হিতাধিকাৰীসকলৰ বেংক একাউণ্টত জমা কৰা হৈছে। তেওঁ লগতে কয় যে কেৱল যোৱা ডেৰ মাহত, বিহাৰৰ ২৪,০০০ৰো অধিক আত্মসহায়ক দলে ১,০০০ কোটি টকাতকৈও অধিক সাহায্য লাভ কৰিছে। মাতৃ আৰু ভগ্নীসকলে ৰখা জন ধন একাউণ্টসমূহে প্ৰদান কৰা বিত্তীয় সবলীকৰণৰ বাবে এই সফলতা অৰ্জন কৰিব পৰা হৈছে বুলি তেওঁ কয়।

মহিলা সবলীকৰণ পদক্ষেপৰ শক্তিশালী ফলাফলৰ ওপৰত গুৰুত্ব আৰোপ কৰি, সমগ্ৰ দেশৰ লগতে বিহাৰতো 'লাখপতি দিদি' ৰ সংখ্যা বৃদ্ধি হোৱাৰ কথা উল্লেখ কৰি প্ৰধানমন্ত্ৰীয়ে কয় যে ৰাষ্ট্ৰৰ লক্ষ্য হৈছে ৩ কোটি লাখপতি দিদি সৃষ্টি কৰা আৰু এতিয়ালৈকে ডেৰ কোটি মহিলাই এই মাইলৰ খুঁটি অতিক্ৰম কৰিছে। তেওঁ গুৰুত্ব আৰোপ কৰি কয় যে বিহাৰত ২০ লাখৰো অধিক মহিলা লাখপতি দিদি হৈ পৰিছে, কেৱল চম্পাৰণত ৮০,০০০ৰো অধিক মহিলাই এই মৰ্য্যাদা লাভ কৰিবলৈ আত্মসহায়ক গোটত যোগদান কৰিছে। শ্ৰী মোদীয়ে নাৰী শক্তিক মজবুত কৰাৰ লক্ষ্যৰে সামূহিক বিনিয়োগ পুঁজি হিচাপে ৪০০ কোটি টকা মুকলি কৰাৰ কথা ঘোষণা কৰে। তেওঁ শ্ৰী নীতিশ কুমাৰে আৰম্ভ কৰা "জীৱিকা দিদি" আঁচনিখনৰ প্ৰশংসা কৰে, যিয়ে বিহাৰৰ লাখ লাখ মহিলাক আত্মনিৰ্ভৰশীল হোৱাৰ পথ প্ৰশস্ত কৰিছে।

তেওঁলোকৰ দলৰ দৃষ্টিভংগীৰ পুনৰাবৃত্তি কৰিঃ 'ভাৰতৰ প্ৰগতিৰ বাবে বিহাৰৰ প্ৰগতি অপৰিহাৰ্য', শ্ৰী মোদীয়ে গুৰুত্ব আৰোপ কৰে যে বিহাৰ কেৱল তেতিয়াহে আগবাঢ়ি যাব যেতিয়া ইয়াৰ যুৱক-যুৱতীসকল আগবাঢ়ি যাব। তেওঁ এক সমৃদ্ধিশালী বিহাৰ আৰু প্ৰতিগৰাকী যুৱক-যুৱতীৰ বাবে নিযুক্তিৰ প্ৰতি চৰকাৰৰ প্ৰতিশ্ৰুতি পুনৰ নিশ্চিত কৰে। সম্পূৰ্ণ স্বচ্ছতাৰে চৰকাৰী ভূমিকাত লাখ লাখ যুৱক-যুৱতীক নিযুক্তি দিয়াৰ বাবে শ্ৰী নীতিশ কুমাৰৰ চৰকাৰক প্ৰশংসা কৰি প্ৰধানমন্ত্ৰীয়ে কয় যে শেহতীয়া বছৰবোৰত বিহাৰৰ ভিতৰতে নিযুক্তিৰ সুযোগ সৃষ্টিৰ বাবে গুৰুত্বপূৰ্ণ প্ৰচেষ্টা গ্ৰহণ কৰা হৈছে। তেওঁ উল্লেখ কৰে যে বিহাৰৰ মুখ্যমন্ত্ৰীয়ে বিহাৰৰ যুৱক-যুৱতীসকলৰ বাবে অধিক নিযুক্তিৰ বাবে নতুন প্ৰস্তাৱ গ্ৰহণ কৰিছে। কেন্দ্ৰীয় চৰকাৰে এই প্ৰচেষ্টাবোৰক কান্ধত কান্ধ মিলাই সম্পূৰ্ণ সমৰ্থন আগবঢ়াই আছে বুলি তেওঁ আশ্বাস দিয়ে।

প্ৰধানমন্ত্ৰীয়ে ঘোষণা কৰে যে কেন্দ্ৰীয় চৰকাৰে শেহতীয়াকৈ ব্যক্তিগত খণ্ডত প্ৰথমবাৰৰ বাবে চাকৰি বিচৰা লোকসকলক সহায় কৰাৰ লক্ষ্যৰে এক গুৰুত্বপূৰ্ণ আঁচনি অনুমোদন কৰিছে। এই আঁচনিৰ অধীনত, ব্যক্তিগত কোম্পানীত প্ৰথম নিযুক্তি লাভ কৰা যুৱক-যুৱতীসকলক কেন্দ্ৰীয় চৰকাৰে ১৫,০০০ টকা প্ৰদান কৰিব। তেওঁ কয় যে এই আঁচনিখন ১ আগষ্টৰ পৰা কাৰ্যকৰী কৰা হ'ব আৰু কেন্দ্ৰই ১ লাখ কোটি টকা ব্যয় কৰিব। এই পদক্ষেপে বিহাৰৰ যুৱক-যুৱতীসকলক যথেষ্ট উপকৃত কৰিব বুলি তেওঁ কয়। শ্ৰী মোদীয়ে মুদ্ৰা যোজনাৰ দৰে আঁচনিৰ জৰিয়তে বিহাৰত আত্ম-নিযুক্তিৰ প্ৰসাৰৰ প্ৰচেষ্টাৰ ওপৰতো আলোকপাত কৰে। তেওঁ উল্লেখ কৰে যে কেৱল যোৱা দুমাহতে বিহাৰত মুদ্ৰা যোজনাৰ অধীনত লাখ লাখ ঋণ বিতৰণ কৰা হৈছে। বিশেষকৈ চম্পাৰণত ৬০,০০০ যুৱক-যুৱতীয়ে তেওঁলোকৰ আত্ম-নিযুক্তি উদ্যোগক সমৰ্থন কৰিবলৈ মুদ্ৰা ঋণ লাভ কৰিছে বুলি তেওঁ জানিবলৈ দিয়ে।

আন দলৰ নেতাসকলে কেতিয়াও নিযুক্তি প্ৰদান কৰিব নোৱাৰে, বিশেষকৈ যিসকলে চাকৰি প্ৰদানৰ আশা দি জনসাধাৰণৰ ভূমি দখল কৰে। শ্ৰী মোদীয়ে জনসাধাৰণক নতুন আশাৰে আলোকিত হোৱা লণ্ঠনৰ যুগ আৰু আজিৰ বিহাৰৰ মাজৰ পাৰ্থক্য মনত ৰাখিবলৈ আহ্বান জনায়। তেওঁ এই পৰিবৰ্তনৰ কৃতিত্ব তেওঁলোকৰ মিত্ৰশক্তি চৰকাৰৰ সৈতে বিহাৰৰ যাত্ৰাক দিয়ে আৰু দৃঢ়তাৰে কয় যে মিত্ৰশক্তিৰ সমৰ্থনেৰে বিহাৰৰ সংকল্প দৃঢ় আৰু অটল হৈ আছে।

প্ৰধানমন্ত্ৰীয়ে শেহতীয়া বছৰবোৰত নক্সালবাদৰ বিৰুদ্ধে গ্ৰহণ কৰা নিৰ্ণায়ক পদক্ষেপৰ ওপৰত আলোকপাত কৰে, যি বিহাৰৰ যুৱক-যুৱতীসকলক যথেষ্ট উপকৃত কৰিছে। তেওঁ কয় যে চম্পাৰণ, ঔৰংগাবাদ, গয়া আৰু জামুইৰ দৰে জিলাসমূহ-যি এসময়ত মাওবাদীৰ প্ৰভাৱৰ দ্বাৰা পিছ পৰি আছিল-এতিয়া সেই অঞ্চলসমূহত উগ্ৰবাদ হ্ৰাস হোৱা দেখা গৈছে। তেওঁ গুৰুত্ব আৰোপ কৰি কয় যে এসময়ত মাওবাদীৰ হিংসাৰে প্ৰভাৱিত অঞ্চলসমূহত যুৱক-যুৱতীসকলে এতিয়া ডাঙৰ সপোন দেখিছে। তেওঁ ভাৰতক নক্সালবাদৰ পৰা সম্পূৰ্ণৰূপে মুক্ত কৰাৰ বাবে চৰকাৰৰ প্ৰতিশ্ৰুতি পুনৰ নিশ্চিত কৰে।

"এয়া এক নতুন ভাৰত-এনে এক ভাৰত যি শত্ৰুক শাস্তি দিবলৈ ভূমি আৰু আকাশ- এই দুয়োটা বাহিনী একত্ৰিত কৰাৰ ক্ষেত্ৰত কোনো প্ৰচেষ্টা এৰি নিদিয়ে", শ্ৰী মোদীয়ে ঘোষণা কৰে যে বিহাৰৰ মাটিৰ পৰাই তেওঁ অপাৰেচন সিন্দুৰ আৰম্ভ কৰাৰ সংকল্প লৈছিল। তেওঁ দৃঢ়তাৰে কয় যে আজি সেই অভিযানৰ সফলতা সমগ্ৰ বিশ্বই প্ৰত্যক্ষ কৰিছে।

প্ৰধানমন্ত্ৰীয়ে দৃঢ়তাৰে কয় যে বিহাৰত কোনো সামৰ্থ্য বা সম্পদৰ অভাৱ নাই আৰু আজি বিহাৰৰ সম্পদ ইয়াৰ প্ৰগতিৰ সঁজুলি হৈ পৰিছে। তেওঁলোকৰ চৰকাৰৰ প্ৰচেষ্টাৰ পাছত মখানাৰ মূল্য বৃদ্ধিৰ ওপৰত আলোকপাত কৰি, মখানা কৃষকসকলৰ বৃহৎ বজাৰৰ সৈতে একত্ৰীকৰণৰ ফলতেই এয়া সম্ভৱ হৈছে বুলি তেওঁ কয়। তেওঁ এই খণ্ডটোক আৰু অধিক সমৰ্থন আগবঢ়াবলৈ এখন মখানা ব’ৰ্ড গঠনৰ কথাও উল্লেখ কৰে। শ্ৰী মোদীয়ে বিহাৰৰ কৃষি সমৃদ্ধিৰ উদাহৰণ হিচাপে কেইবাটাও গুৰুত্বপূৰ্ণ সামগ্ৰী-কল, লিচু, মিৰ্চা চাউল, কাটাৰ্ণী চাউল, জাৰদালু আম আৰু মাঘাই পান তালিকাভুক্ত কৰে। শ্ৰী মোদীয়ে গুৰুত্ব আৰোপ কৰি কয় যে এইবোৰৰ লগতে আন বহুতো সামগ্ৰীয়ে বিহাৰৰ কৃষক আৰু যুৱক-যুৱতীসকলক বিশ্বৰ বজাৰৰ সৈতে সংযোগ কৰিব।

কৃষকসকলৰ উৎপাদিত সামগ্ৰী আৰু উপাৰ্জন বৃদ্ধি কৰাটো চৰকাৰৰ বাবে এক সৰ্বোচ্চ অগ্ৰাধিকাৰ বুলি উল্লেখ কৰি শ্ৰী মোদীয়ে উল্লেখ কৰে যে পিএম-কিষাণ সন্মান নিধি যোজনাৰ অধীনত সমগ্ৰ দেশৰ কৃষকসকলক প্ৰায় ৩.৫ লাখ কোটি টকা বিতৰণ কৰা হৈছে। তেওঁ উল্লেখ কৰে যে কেৱল মোতিহাৰীত ৫ লাখৰো অধিক কৃষকে এই আঁচনিৰ জৰিয়তে ১,৫০০ কোটিতকৈও অধিক টকা লাভ কৰিছে।

প্ৰধানমন্ত্ৰীয়ে দৃঢ়তাৰে কয় যে চৰকাৰে শ্লোগান বা প্ৰতিশ্ৰুতিত থমকি ৰোৱা নাই, ই কাৰ্য্যৰ জৰিয়তে প্ৰদান কৰিছে। তেওঁ গুৰুত্ব আৰোপ কৰি কয় যে যেতিয়া তেওঁলোকৰ চৰকাৰে কয় যে ই পিছপৰা আৰু অত্যন্ত পিছপৰা সম্প্ৰদায়ৰ বাবে কাম কৰে, তেতিয়া এই প্ৰতিশ্ৰুতি ইয়াৰ নীতি আৰু সিদ্ধান্তসমূহত প্ৰতিফলিত হয়। তেওঁ কয় যে তেওঁলোকৰ লক্ষ্য স্পষ্টঃ প্ৰতিজন পিছপৰা ব্যক্তিৰ বাবে অগ্ৰাধিকাৰ, সেয়া পিছপৰা অঞ্চল হওক বা পিছপৰা শ্ৰেণী, তেওঁলোক চৰকাৰৰ অগ্ৰাধিকাৰৰ কেন্দ্ৰবিন্দু হৈ থাকে। শ্ৰী মোদীয়ে উল্লেখ কৰে যে কেইবা দশক ধৰি ১১০খনৰো অধিক জিলাক পিছপৰা আৰু অৱহেলিত হিচাপে চিহ্নিত কৰা হৈছিল আৰু তেওঁলোকৰ চৰকাৰে এই জিলাসমূহক উচ্চাকাংক্ষী জিলা হিচাপে মনোনীত কৰি তেওঁলোকৰ উন্নয়নক অগ্ৰাধিকাৰ দিছিল। প্ৰধানমন্ত্ৰীয়ে উল্লেখ কৰে যে আনকি ভাৰতৰ সীমান্তৰ গাঁওসমূহকো দীৰ্ঘদিন ধৰি "অন্তিম গাঁও" বুলি গণ্য কৰা হৈছিল আৰু পিছত ৰখা হৈছিল, কিন্তু চৰকাৰে সেইবোৰক "প্ৰথম গাঁও" হিচাপে পুনৰ্নিৰ্ধাৰণ কৰে আৰু তেওঁলোকৰ উন্নয়নক অগ্ৰাধিকাৰ দিয়ে। তেওঁ উল্লেখ কৰে যে অ’বিচি সম্প্ৰদায়ে দীৰ্ঘদিন ধৰি অ’বিচি আয়োগৰ বাবে সাংবিধানিক মৰ্যাদা দাবী কৰি আহিছে-এই দাবী তেওঁলোকৰ মিত্ৰশক্তি চৰকাৰে পূৰণ কৰিছে। শ্ৰী মোদীয়ে জনজাতীয় সম্প্ৰদায়ৰ ভিতৰত আটাইতকৈ প্রান্তীয় লোকসকলৰ বাবে জনমান যোজনা আৰম্ভ কৰাৰ কথা উল্লেখ কৰে, য’ত তেওঁলোকৰ উন্নয়নৰ বাবে ২৫,০০০ কোটি টকা আবণ্টন দিয়া হৈছিল। প্ৰধানমন্ত্ৰীয়ে এই দৃষ্টিভংগীৰ সৈতে সংগতি ৰাখি এটা নতুন গুৰুত্বপূৰ্ণ পদক্ষেপৰ কথা ঘোষণা কৰেঃ প্ৰধানমন্ত্ৰী ধন-ধান্য কৃষি যোজনা, যিটো শেহতীয়াকৈ কেন্দ্ৰীয় মন্ত্ৰীসভাই অনুমোদন জনাইছে। এই আঁচনিৰ অধীনত, কৃষিগতভাৱে সম্ভাৱনাৰে সমৃদ্ধ কিন্তু উৎপাদনশীলতা আৰু কৃষকৰ উপাৰ্জনত পিছ পৰি থকা ১০০ খন জিলাক চিনাক্ত আৰু অগ্ৰাধিকাৰ দিয়া হ’ব। তেওঁ কয় যে এই জিলাসমূহৰ কৃষকসকলে এই আঁচনিৰ অধীনত সহায় লাভ কৰিব। তেওঁ গুৰুত্ব আৰোপ কৰি কয় যে ই সমগ্ৰ দেশৰ প্ৰায় ১.৭৫ কোটি কৃষকক প্ৰত্যক্ষভাৱে উপকৃত কৰিব, যাৰ এক গুৰুত্বপূৰ্ণ অংশ হৈছে বিহাৰ।

হাজাৰ হাজাৰ কোটি টকাৰ ৰে’ল আৰু পথ প্ৰকল্পৰ উদ্বোধন আৰু আধাৰশিলা স্থাপনৰ ওপৰত আলোকপাত কৰি শ্ৰী মোদীয়ে কয় যে এই প্ৰকল্পসমূহে বিহাৰৰ জনসাধাৰণৰ সুবিধা যথেষ্ট বৃদ্ধি কৰিব। তেওঁ লগতে সমগ্ৰ দেশৰ চাৰিটা ভিন্ন পথত অমৃত ভাৰত এক্সপ্ৰেছৰ শুভাৰম্ভ কৰে। প্ৰধানমন্ত্ৰীয়ে লগতে উল্লেখ কৰে যে অমৃত ভাৰত এক্সপ্ৰেছ এতিয়া মোতিহাৰী-বাপুধামৰ পৰা দিল্লীৰ আনন্দ বিহাৰলৈ পোনপটীয়াকৈ চলিব। মোতিহাৰী ৰেল ষ্টেচনটো আধুনিক সুবিধা আৰু এক নতুন ৰূপৰ সৈতে পুনৰ বিকশিত কৰা হৈছে বুলি উল্লেখ কৰি তেওঁ লগতে কয় যে দাৰভাংগা-নৰকাতিয়াগঞ্জ ৰে’লপথ দ্বৈত ৰে’লপথলৈ উন্নত কৰাৰ ফলত এই পথত ভ্ৰমণৰ সুবিধা যথেষ্ট উন্নত হ’ব।

ভাৰতৰ বিশ্বাস আৰু সাংস্কৃতিক ঐতিহ্যৰ সৈতে চম্পাৰণৰ গভীৰ সম্পৰ্কৰ ওপৰত গুৰুত্ব আৰোপ কৰি শ্ৰী মোদীয়ে কয় যে ৰাম-জানকী পথ মোতিহাৰীৰ সত্তৰঘাট, কেশৰিয়া, চাকিয়া আৰু মধুবনৰ মাজেৰে পাৰ হ'ব। তেওঁ উল্লেখ কৰে যে সীতামড়ীৰ পৰা অযোধ্যালৈ নিৰ্মাণ কৰা নতুন ৰে'ল লাইনে চম্পাৰণৰ ভক্তসকলৰ অযোধ্যা যাত্ৰা সূচল কৰিব। তেওঁ মন্তব্য কৰে যে এই পদক্ষেপসমূহে বিহাৰত সংযোগ যথেষ্ট বৃদ্ধি কৰিব আৰু অঞ্চলটোত নতুন নিযুক্তিৰ সুযোগ সৃষ্টি কৰিব।

প্ৰধানমন্ত্ৰীয়ে পূৰ্বৰ চৰকাৰসমূহক দীৰ্ঘদিন ধৰি দৰিদ্ৰ, দলিত, পিছপৰা শ্ৰেণী আৰু জনজাতীয় সম্প্ৰদায়ৰ নামত ৰাজনীতিত জড়িত হৈ থকাৰ বাবে সমালোচনা কৰে আৰু কয় যে তেওঁলোকে কেৱল সমান অধিকাৰ অস্বীকাৰ কৰাই নহয় বৰঞ্চ নিজৰ পৰিয়ালৰ বাহিৰৰ লোকসকলক সন্মান প্ৰদৰ্শন কৰাত ব্যৰ্থ হৈছে। তেওঁ দৃঢ়তাৰে কয় যে বিহাৰে আজি তেওঁলোকৰ অহংকাৰ স্পষ্টভাৱে প্ৰত্যক্ষ কৰিছে। বিহাৰক তেওঁলোকৰ বিদ্বেষপূৰ্ণ অভিপ্ৰায়ৰ পৰা সুৰক্ষিত কৰাৰ আহ্বান জনাই শ্ৰী মোদীয়ে বৰ্তমানৰ বিহাৰ চৰকাৰৰ সমৰ্পিত প্ৰচেষ্টাক প্ৰশংসা কৰে আৰু সকলোকে সামূহিকভাৱে বিহাৰৰ উন্নয়ন ত্বৰান্বিত কৰিবলৈ আৰু এক উজ্জ্বল ভৱিষ্যতৰ দিশে আগবাঢ়িবলৈ আহ্বান জনায়। তেওঁ নতুন বিহাৰ নিৰ্মাণৰ বাবে এক অংশীদাৰী সংকল্পৰ আহ্বান জনাই আৰু আজি উদ্বোধন কৰা উন্নয়নমূলক প্ৰকল্পসমূহৰ বাবে জনসাধাৰণক অভিনন্দন জনাই তেওঁৰ ভাষণৰ সামৰণি মাৰে।

বিহাৰৰ ৰাজ্যপাল শ্ৰী আৰিফ মহম্মদ খান, বিহাৰৰ মুখ্যমন্ত্ৰী শ্ৰী নীতিশ কুমাৰ, কেন্দ্ৰীয় মন্ত্ৰী শ্ৰী জিতন ৰাম মাঝি, শ্ৰী গিৰিৰাজ সিং, শ্ৰী ৰাজীৱ ৰঞ্জন সিং, শ্ৰী চিৰাগ পাছোৱান, শ্ৰী ৰামনাথ ঠাকুৰ, শ্ৰী নিত্যানন্দ ৰায়, শ্ৰী সতীশ চন্দ্ৰ ডুবে, ড^০ ৰাজভূষণ চৌধুৰী আদি বিশিষ্ট ব্যক্তিসকল এই অনুষ্ঠানত উপস্থিত আছিল।

পটভূমি

প্ৰধানমন্ত্ৰীয়ে ৰে’ল, পথ, গ্ৰাম্য উন্নয়ন, মীনপালন, ইলেক্ট্ৰনিকছ আৰু তথ্য প্ৰযুক্তি খণ্ডৰ বাবে ৰাষ্ট্ৰ উন্নয়নমূলক প্ৰকল্পসমূহৰ আধাৰশিলা স্থাপন, উদ্বোধন আৰু উৎসৰ্গা কৰে।

সংযোগ আৰু আন্তঃগাঁথনি বৃদ্ধিৰ প্ৰতিশ্ৰুতিৰ সৈতে সংগতি ৰাখি প্ৰধানমন্ত্ৰীয়ে একাধিক ৰে’ল প্ৰকল্প ৰাষ্ট্ৰলৈ উৎসৰ্গা কৰে। ইয়াত সমস্তিপুৰ-বাচৱাৰা ৰে’ল লাইনৰ মাজত স্বয়ংক্ৰিয় সংকেত অন্তৰ্ভুক্ত কৰা হৈছে যিয়ে এই খণ্ডত দক্ষ ৰে’ল পৰিচালনা সক্ষম কৰিব। ৫৮০ কোটি টকাতকৈও অধিক মূল্যৰ দাৰভাংগা-সমস্তিপুৰ দ্বৈতকৰণ প্ৰকল্পৰ অংশ হিচাপে দাৰভাংগা-থালৱাৰা আৰু সমস্তিপুৰ-ৰামভদ্ৰপুৰ ৰে’ল লাইন দ্বৈতকৰণৰ ফলত ৰে’ল চলাচলৰ ক্ষমতা বৃদ্ধি পাব আৰু বিলম্ব হ্ৰাস হ’ব।

প্ৰধানমন্ত্ৰীয়ে একাধিক ৰে’ল প্ৰকল্পৰ আধাৰশিলাও স্থাপন কৰে। ৰে’ল প্ৰকল্পসমূহৰ ভিতৰত পাটলিপুত্রত বন্দে ভাৰত ৰে’লৰ ৰক্ষণাবেক্ষণৰ বাবে আন্তঃগাঁথনিৰ উন্নয়ন অন্তৰ্ভুক্ত আছে। ভাটনি-চাপ্ৰা গ্ৰামীণ ৰে’ল লাইনত (১১৪ কিলোমিটাৰ) স্বয়ংক্ৰিয় সংকেত প্ৰদান কৰি সুচল ৰে'ল চলাচল সম্ভৱ কৰা হ'ব। ট্ৰেকশ্যন ব্যৱস্থাৰ আন্তঃগাঁথনি শক্তিশালী কৰি আৰু শক্তি দক্ষতা অনুকূল কৰি উচ্চ ৰে’লৰ গতি সক্ষম কৰিবলৈ ভাটনী-চাপ্ৰা গ্ৰামিন খণ্ডত ট্ৰেকশ্যন ব্যৱস্থাৰ উন্নয়ন। দাৰভাংগা-নৰকাতিয়াগঞ্জ ৰে’ল লাইন দ্বৈতকৰণৰ বাবে প্ৰায় ৪,০৮০ কোটি টকাৰ প্ৰকল্পৰ জৰিয়তে বিভাগীয় ক্ষমতা বৃদ্ধি কৰা হ’ব, অধিক যাত্ৰী আৰু মালবাহী ৰে’লৰ চলাচল সম্ভৱ হ’ব, উত্তৰ বিহাৰ আৰু দেশৰ বাকী অংশৰ মাজত সংযোগ শক্তিশালী হ’ব।

অঞ্চলটোত পথ আন্তঃগাঁথনিৰ এক গুৰুত্বপূৰ্ণ বিকাশত, প্ৰধানমন্ত্ৰীয়ে আৰা-মোহনিয়া ৰাষ্ট্ৰীয় ঘাইপথ-৩১৯ আৰু পাটনা-বক্সাৰ ৰাষ্ট্ৰীয় ঘাইপথ-৯২২ক সংযোগ কৰা ৰাষ্ট্ৰীয় ঘাইপথ-৩১৯ৰ আৰা বাইপাছৰ ৪ লেনৰ আধাৰশিলা স্থাপন কৰে, যি নিৰৱচ্ছিন্ন সংযোগ প্ৰদান কৰে আৰু ভ্ৰমণৰ সময় হ্ৰাস কৰে।

প্ৰধানমন্ত্ৰীয়ে আৰা চহৰক ৰাষ্ট্ৰীয় ঘাইপথ-০২ (সোণালী চতুৰ্ভুজ)ৰ সৈতে সংযোগ কৰা ৰাষ্ট্ৰীয় ঘাইপথ-৩১৯ৰ অংশ ৮২০ কোটি টকাতকৈও অধিক মূল্যৰ ৰাষ্ট্ৰীয় ঘাইপথ-৩১৯ৰ ৪ লেনৰ পাৰাৰিয়াৰ পৰা মোহনিয়া অংশ উদ্বোধন কৰে যিয়ে মালবাহী আৰু যাত্ৰীৰ চলাচল উন্নত কৰিব। আনবোৰৰ ভিতৰত ৩৩৩ চি ৰাষ্ট্ৰীয় ঘাইপথৰ সৰৱনৰ পৰা চাকাইলৈ চলাচল সহজ কৰি তুলিব আৰু বিহাৰ তথা ঝাৰখণ্ডৰ মাজত এক মূল সংযোগ হিচাপে কাম কৰিব।

প্ৰধানমন্ত্ৰীয়ে আই টি/আই টি ই এছ/ই এছ ডি এম উদ্যোগ আৰু ষ্টাৰ্টআপৰ প্ৰচাৰৰ বাবে দাৰভাংগাত ভাৰতৰ নতুন ছফ্টৱেৰ প্ৰযুক্তি উদ্যান (এছ টি পি আই) সুবিধা আৰু পাটনাত এছ টি পি আইৰ অত্যাধুনিক ইনকিউবেচন সুবিধা উদ্বোধন কৰে। এই সুবিধাসমূহে তথ্য প্ৰযুক্তি ছফ্টৱেৰ আৰু সেৱা ৰপ্তানি বৃদ্ধি কৰাত সহায় কৰিব। ই উদীয়মান উদ্যোগীসকলৰ বাবে প্ৰযুক্তিগত ষ্টাৰ্টআপ পৰিবেশতন্ত্ৰৰ প্ৰতিপালন কৰিব, উদ্ভাৱন, আই পি আৰ আৰু সামগ্ৰীৰ বিকাশক উৎসাহিত কৰিব।

বিহাৰত মীনপালন আৰু জলজ পালন খণ্ডক শক্তিশালী কৰাৰ দিশত এক গুৰুত্বপূৰ্ণ পদক্ষেপ হিচাপে শ্ৰী মোদীয়ে প্ৰধানমন্ত্ৰী মৎস্য সম্পদ যোজনা (পি এম এম এছ ৱাই)ৰ অধীনত অনুমোদিত কেইবাটাও মীনপালন উন্নয়ন প্ৰকল্প উদ্বোধন কৰে। ইয়াৰ জৰিয়তে বিহাৰৰ বিভিন্ন জিলাত নতুন মাছ পালন কেন্দ্ৰ, জৈৱ ফ্ল'ক গোট, অলংকাৰিক মাছ পালন, সংহত জলজ পালন গোট, আৰু মাছৰ খাদ্য কলকে ধৰি আধুনিক মীন আন্তঃগাঁথনিৰ শুভাৰম্ভ কৰা হ'ব। জলজ পালন প্ৰকল্পসমূহে বিহাৰৰ গ্ৰাম্য অঞ্চলত নিযুক্তিৰ সুযোগ সৃষ্টি, মাছ উৎপাদন বৃদ্ধি, উদ্যোগশীলতা বৃদ্ধি আৰু আৰ্থ-সামাজিক উন্নয়ন ত্বৰান্বিত কৰাত সহায় কৰিব।

ভৱিষ্যতৰ বাবে সাজু ৰে’ল নেটৱৰ্কৰ দৃষ্টিভংগীৰ সৈতে সংগতি ৰাখি, প্ৰধানমন্ত্ৰী

ৰাজেন্দ্ৰ নগৰ টাৰ্মিনেল (পাটনা)ৰ পৰা নতুন দিল্লীলৈ, বাপুধাম মোতিহাৰীৰ পৰা দিল্লীলৈ (আনন্দ বিহাৰ টাৰ্মিনেল), দাৰভাংগাৰ পৰা লক্ষ্ণৌলৈ (গোমতী নগৰ) আৰু মালদা চহৰৰ পৰা লক্ষ্ণৌলৈ (গোমতী নগৰ) ভাগলপুৰৰ মাজেৰে চাৰিখন নতুন অমৃত ভাৰত ৰে’লৰ শুভাৰম্ভ কৰি অঞ্চলটোত সংযোগ উন্নত কৰা হয়।

প্ৰধানমন্ত্ৰীয়ে দীনদয়াল অন্ত্যোদয়া যোজনা-ৰাষ্ট্ৰীয় গ্ৰাম্য জীৱিকা মিছন (ডি এ ৱাই-এন আৰ এল এম)ৰ অধীনত বিহাৰৰ প্ৰায় ৬১,৫০০ টা আত্মসহায়ক গোটলৈ ৪০০ কোটি টকা মুকলি কৰে। মহিলা নেতৃত্বাধীন উন্নয়নৰ ওপৰত বিশেষ গুৰুত্ব দি ১০ কোটিৰো অধিক মহিলাক আত্মসহায়ক গোটৰ (এছ এইচ জি) সৈতে সংযুক্ত কৰা হৈছে।

প্ৰধানমন্ত্ৰীয়ে ১২ হাজাৰ হিতাধিকাৰীৰ গৃহ প্ৰৱেশৰ অংশ হিচাপে কিছুসংখ্যক হিতাধিকাৰীৰ হাতত চাবি হস্তান্তৰ কৰে আৰু প্ৰধানমন্ত্ৰী আৱাস যোজনা-গ্ৰামীণৰ ৪০,০০০ হিতাধিকাৰীৰ বাবে ১৬০ কোটিৰো অধিক টকা মুকলি কৰে।

*****

MJPS/SR/MK