ബിഹാറിലെ മോത്തിഹാരിയിൽ ഇന്ന് 7,000 കോടിയിലധികം രൂപയുടെ വികസന പദ്ധതികൾക്ക് പ്രധാനമന്ത്രി ശ്രീ നരേന്ദ്ര മോദി തറക്കല്ലിടുകയും ഉദ്ഘാടനം നിർവഹിക്കുകയും രാഷ്ട്രത്തിന് സമർപ്പിക്കുകയും ചെയ്തു. പുണ്യമാസമായ സാവൻ മാസത്തിൽ ബാബ സോമേശ്വരനാഥിന്റെ പാദങ്ങളിൽ വണങ്ങിക്കൊണ്ട് പ്രധാനമന്ത്രി അനുഗ്രഹം തേടി, ബിഹാറിലെ എല്ലാ നിവാസികളുടെയും ജീവിതത്തിൽ സന്തോഷവും സമൃദ്ധിയും ഉണ്ടാകട്ടെ എന്ന് ആശംസിച്ചു. ഇത് ചരിത്രത്തെ രൂപപ്പെടുത്തിയ ചമ്പാരന്റെ നാടാണെന്ന് സമ്മേളനത്തെ അഭിസംബോധന ചെയ്യവെ ശ്രീ മോദി പറഞ്ഞു. സ്വാതന്ത്ര്യസമരകാലത്ത്, ഈ ഭൂമി മഹാത്മാഗാന്ധിക്ക് ഒരു പുതിയ ദിശാബോധം നൽകി. ഈ മണ്ണിൽ നിന്നുള്ള പ്രചോദനം ഇപ്പോൾ ബിഹാറിന്റെ പുതിയ ഭാവിയെ രൂപപ്പെടുത്തുമെന്ന് അദ്ദേഹം ഊന്നിപ്പറഞ്ഞു. ഈ വികസന സംരംഭങ്ങൾക്ക് സന്നിഹിതരായ എല്ലാവർക്കും ബിഹാറിലെ ജനങ്ങൾക്കും അദ്ദേഹം അഭിനന്ദനങ്ങൾ അറിയിച്ചു.

21-ാം നൂറ്റാണ്ട് ദ്രുതഗതിയിലുള്ള ആഗോള പുരോഗതിക്ക് സാക്ഷ്യം വഹിക്കുന്നുണ്ടെന്നും, ഒരുകാലത്ത് പാശ്ചാത്യ രാജ്യങ്ങൾ മാത്രം കൈവശം വച്ചിരുന്ന ആധിപത്യം ഇപ്പോൾ കിഴക്കൻ രാജ്യങ്ങൾ കൂടുതലായി പങ്കിടുന്നുണ്ടെന്നും, അവരുടെ പങ്കാളിത്തവും സ്വാധീനവും വളർന്നുവരുന്നുവെന്നും ശ്രീ മോദി അഭിപ്രായപ്പെട്ടു. കിഴക്കൻ രാജ്യങ്ങൾ ഇപ്പോൾ വികസനത്തിൽ പുതിയ ആക്കം കൈവരിക്കുന്നുണ്ടെന്ന് അദ്ദേഹം ഊന്നിപ്പറഞ്ഞു. സമാന്തരമായി, കിഴക്കൻ രാജ്യങ്ങൾ ആഗോളതലത്തിൽ മുന്നേറുന്നതുപോലെ, ഇന്ത്യയിൽ, ഇത് കിഴക്കൻ സംസ്ഥാനങ്ങളുടെ യുഗമാണെന്ന് പ്രധാനമന്ത്രി പ്രസ്താവിച്ചു. വരും കാലങ്ങളിൽ, കിഴക്കൻ മേഖലയിലെ മോത്തിഹാരി പടിഞ്ഞാറൻ മേഖലയിലെ മുംബൈ പോലെ പ്രാധാന്യമർഹിക്കുന്നുണ്ടെന്ന് ഉറപ്പാക്കാനുള്ള ​ഗവൺമെന്റിന്റെ ദൃഢനിശ്ചയം അദ്ദേഹം ആവർത്തിച്ചു. ഗുരുഗ്രാമിലെന്നപോലെ ഗയയിലും, പൂനെയിലെന്നപോലെ പട്‌നയിലെ വ്യാവസായിക വളർച്ചയും, സൂറത്തിന് സമാനമായ സന്താൽ പർഗാനയിലെ വികസനവും ശ്രീ മോദി വിഭാവനം ചെയ്തു. ജൽപായ്ഗുരിയിലെയും ജജ്പൂരിലെയും ടൂറിസം ജയ്പൂരിലെ പോലെ പുതിയ റെക്കോർഡുകൾ സ്ഥാപിക്കുമെന്നും, ബിർഭുമിലെ ജനങ്ങൾ ബെംഗളൂരുവിലേതുപോലെ പുരോഗമിക്കുമെന്നും അദ്ദേഹം പ്രത്യാശ പ്രകടിപ്പിച്ചു.

"കിഴക്കൻ ഇന്ത്യയെ മുന്നോട്ട് കൊണ്ടുപോകാൻ, ബിഹാറിനെ ഒരു വികസിത സംസ്ഥാനമാക്കി മാറ്റണം", ശ്രീ മോദി ഊന്നിപ്പറഞ്ഞു, ബിഹാറിന്റെ വികസനത്തിന് കേന്ദ്ര-സംസ്ഥാന ​ഗവൺമെന്റുകൾ പ്രതിജ്ഞാബദ്ധരായതിനാൽ ഇന്ന് ബിഹാറിൽ ദ്രുതഗതിയിലുള്ള പുരോഗതി സാധ്യമാണെന്ന് അദ്ദേഹം പറഞ്ഞു. പിന്തുണയുടെ കാര്യത്തിലെ വ്യത്യാസം വ്യക്തമാക്കാൻ അദ്ദേഹം വിവരങ്ങൾ ഉദ്ധരിച്ചു: മുൻ ​ഗവൺമെന്റുകൾ കേന്ദ്രത്തിൽ അധികാരത്തിലിരുന്ന 10 വർഷത്തിനിടെ, ബിഹാറിന് ഏകദേശം 2 ലക്ഷം കോടി രൂപ മാത്രമേ ലഭിച്ചുള്ളൂ, ഇത് ശ്രീ നിതീഷ് കുമാറിന്റെ നേതൃത്വത്തിലുള്ള ​ഗവൺമെന്റിനെതിരായ രാഷ്ട്രീയ പ്രതികാര നടപടിയാണെന്ന് അഭിപ്രായപ്പെട്ടു. 2014 ൽ അധികാരത്തിൽ വന്നതിനുശേഷം, തന്റെ ​ഗവൺമെന്റ് ബിഹാറിനെതിരായ ഈ പ്രതികാര രാഷ്ട്രീയം അവസാനിപ്പിച്ചുവെന്ന് പ്രധാനമന്ത്രി ഉറപ്പിച്ചു പറഞ്ഞു, കഴിഞ്ഞ 10 വർഷമായി അവരുടെ ഭരണത്തിൻ കീഴിൽ, ബിഹാറിന്റെ വികസനത്തിനായി ഏകദേശം 9 ലക്ഷം കോടി രൂപ അനുവദിച്ചിട്ടുണ്ടെന്ന് അദ്ദേഹം ഊന്നിപ്പറഞ്ഞു. മുൻ ഭരണകാലത്ത് നൽകിയതിനേക്കാൾ നാലിരട്ടി കൂടുതലാണിതെന്ന് അദ്ദേഹം ചൂണ്ടിക്കാട്ടി, ഈ ഫണ്ട് ബിഹാറിലുടനീളമുള്ള പൊതുജനക്ഷേമത്തിനും വികസന പദ്ധതികൾക്കുമായി വിനിയോഗിക്കുന്നുണ്ടെന്ന് അദ്ദേഹം വ്യക്തമാക്കി.

രണ്ട് പതിറ്റാണ്ടുകൾക്ക് മുമ്പ് ബിഹാർ നേരിട്ട നിരാശ ഇന്നത്തെ തലമുറ മനസ്സിലാക്കേണ്ടതിന്റെ പ്രാധാന്യം അടിവരയിട്ടുകൊണ്ട്, മുൻ ​ഗവൺമെന്റുകളുടെ ഭരണത്തിൻ കീഴിൽ വികസനം സ്തംഭിച്ചിരുന്നുവെന്നും ദരിദ്രർക്കുള്ള ഫണ്ടുകൾ അവരിലേക്ക് എത്തുന്നത് മിക്കവാറും അസാധ്യമായിരുന്നുവെന്നും ശ്രീ മോദി പറഞ്ഞു. ദരിദ്രർക്കുള്ള പണം കൊള്ളയടിക്കുന്നതിൽ മാത്രം ശ്രദ്ധ കേന്ദ്രീകരിച്ച അന്നത്തെ നേതൃത്വത്തെ അദ്ദേഹം വിമർശിച്ചു. അസാധ്യമായത് സാധ്യമാക്കുന്നവരുടെ നാടാണ് ബിഹാർ എന്ന് വിശേഷിപ്പിച്ച പ്രധാനമന്ത്രി, ബിഹാറിലെ ജനങ്ങളുടെ കരുത്തിനെ പ്രശംസിച്ചു. മുൻകാല ഭരണത്തിന്റെ ചങ്ങലകളിൽ നിന്ന് ബിഹാറിനെ മോചിപ്പിച്ചതിലൂടെ ദരിദ്രർക്ക് നേരിട്ട് ക്ഷേമ പദ്ധതികൾ എത്തിക്കാൻ കഴിഞ്ഞതിന് അദ്ദേഹം പൊതുജനങ്ങളെ പ്രശംസിച്ചു. കഴിഞ്ഞ 11 വർഷത്തിനിടെ രാജ്യത്തുടനീളം പി എം ആവാസ് യോജനയ്ക്ക് കീഴിൽ 4 കോടിയിലധികം വീടുകൾ നിർമ്മിച്ചിട്ടുണ്ടെന്നും ബിഹാറിൽ മാത്രം 60 ലക്ഷത്തോളം വീടുകൾ നിർമ്മിച്ചിട്ടുണ്ടെന്നും ശ്രീ മോദി എടുത്തുപറഞ്ഞു. നോർവേ, ന്യൂസിലാൻഡ്, സിംഗപ്പൂർ തുടങ്ങിയ രാജ്യങ്ങളിലെ മൊത്തം ജനസംഖ്യയേക്കാൾ ഈ കണക്ക് കൂടുതലാണെന്ന് അദ്ദേഹം അഭിപ്രായപ്പെട്ടു. “മോത്തിഹാരി ജില്ലയിൽ മാത്രം ഏകദേശം 3 ലക്ഷം കുടുംബങ്ങൾക്ക് ഉറപ്പുള്ള വീടുകൾ ലഭിച്ചു, എണ്ണം അതിവേഗം വളർന്നുകൊണ്ടിരിക്കുന്നു. ഈ മേഖലയിലെ 12,000-ത്തിലധികം കുടുംബങ്ങൾക്ക് ഇന്ന് അവരുടെ പുതിയ വീടുകളുടെ താക്കോലുകൾ ലഭിച്ചു”, ശ്രീ മോദി പറഞ്ഞു. കൂടാതെ, 40,000-ത്തിലധികം ദരിദ്ര കുടുംബങ്ങൾക്ക് അടച്ചുറപ്പുള്ള വീടുകൾ നിർമ്മിക്കുന്നതിനായി ബാങ്ക് അക്കൗണ്ടുകളിൽ ഫണ്ട് ലഭിച്ചു, അവരിൽ ഭൂരിഭാഗവും ദളിത്, മഹാദളിത്, പിന്നോക്ക സമുദായങ്ങളിൽ പെട്ടവരാണ്. മുൻ ​ഗവൺമെന്റ് ഭരണകാലത്ത് ദരിദ്രർക്ക് അത്തരം വീടുകൾ ലഭിക്കുന്നത് സങ്കൽപ്പിക്കാൻ പോലും കഴിയാത്ത കാര്യമാണെന്ന് പ്രധാനമന്ത്രി അഭിപ്രായപ്പെട്ടു. അവരുടെ ഭരണകാലത്ത്, ഭൂവുടമകൾ ലക്ഷ്യമിടുന്നതായി ഭയന്ന് ആളുകൾ വീടുകൾ പെയിന്റ് ചെയ്യാൻ പോലും ഭയപ്പെട്ടിരുന്നുവെന്ന് അദ്ദേഹം ഓർമ്മിപ്പിച്ചു. മുൻ ഭരണകക്ഷിയിലെ നേതാക്കൾക്ക് ഒരിക്കലും ജനങ്ങൾക്ക് അടച്ചുറപ്പുള്ള വീടുകൾ നൽകാൻ കഴിയുമായിരുന്നില്ലെന്ന് അദ്ദേഹം ഉറപ്പിച്ചു പറഞ്ഞു. 

ബിഹാറിന്റെ പുരോഗതിക്ക് കാരണം അവിടുത്തെ അമ്മമാരുടെയും സഹോദരിമാരുടെയും ശക്തിയും ദൃഢനിശ്ചയവുമാണ് എന്ന് പറഞ്ഞ ശ്രീ മോദി, ബിഹാറിലെ സ്ത്രീകൾക്ക് അവരുടെ ​ഗവൺമെന്റ് സ്വീകരിക്കുന്ന ഓരോ ചുവടുവയ്പ്പിന്റെയും പ്രാധാന്യം വ്യക്തമായി മനസ്സിലാകുന്നുണ്ടെന്ന് പറഞ്ഞു. പരിപാടിയിൽ സ്ത്രീകളുടെ വലിയ സാന്നിധ്യത്തെ അദ്ദേഹം പ്രശംസിച്ചു, ബാങ്ക് അക്കൗണ്ടുകൾ ലഭ്യമല്ലാത്തതിനാൽ അവർക്ക് 10 രൂപ പോലും ഒളിപ്പിക്കേണ്ടി വന്നതും ബാങ്കുകളിൽ പ്രവേശനം നിഷേധിക്കപ്പെട്ടതുമായ ദിവസങ്ങളെ അദ്ദേഹം ഓർമ്മിപ്പിച്ചു. ദരിദ്രരുടെ അന്തസ്സിനെക്കുറിച്ചുള്ള തന്റെ ധാരണ പ്രധാനമന്ത്രി വ്യക്തമാക്കി, എന്തുകൊണ്ടാണ് അവരുടെ വാതിലുകൾ പിന്നാക്കക്കാർക്ക് വേണ്ടി അടച്ചിരിക്കുന്നതെന്ന് ബാങ്കുകളോട് താൻ ചോദിച്ചത് എങ്ങനെയെന്ന് അദ്ദേഹം വിവരിച്ചു. ജൻ ധൻ അക്കൗണ്ടുകൾ തുറക്കുന്നതിനായി ആരംഭിച്ച വിപുലമായ പ്രചാരണം അദ്ദേഹം എടുത്തുകാട്ടി, ഇത് സ്ത്രീകൾക്ക് വളരെയധികം പ്രയോജനം ചെയ്തു, ബിഹാറിലെ ഏകദേശം 3.5 കോടി സ്ത്രീകൾക്ക് ഇപ്പോൾ ജൻ ധൻ അക്കൗണ്ടുകളുണ്ട്. ​ഗവൺമെന്റ് പദ്ധതി ഫണ്ടുകൾ ഇപ്പോൾ ഈ അക്കൗണ്ടുകളിലേക്ക് നേരിട്ട് മാറ്റുന്നുണ്ടെന്ന് ശ്രീ മോദി ഊന്നിപ്പറഞ്ഞു. ശ്രീ നിതീഷ് കുമാറിന്റെ കീഴിൽ ബിഹാർ ​ഗവൺമെന്റ് അടുത്തിടെ പ്രായമായവർ, ഭിന്നശേഷിക്കാർ, വിധവകളായ അമ്മമാർ എന്നിവരുടെ പ്രതിമാസ പെൻഷൻ 400 രൂപയിൽ നിന്ന് 1,100 രൂപയായി വർദ്ധിപ്പിച്ചതായും അദ്ദേഹം പരാമർശിച്ചു. ഈ പണം നേരിട്ട് ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നിക്ഷേപിക്കുന്നുണ്ടെന്ന് പ്രധാനമന്ത്രി ചൂണ്ടിക്കാട്ടി. കഴിഞ്ഞ ഒന്നര മാസത്തിനുള്ളിൽ ബിഹാറിലെ 24,000-ത്തിലധികം സ്വയം സഹായ സംഘങ്ങൾക്ക് 1,000 കോടിയിലധികം രൂപ സഹായം ലഭിച്ചിട്ടുണ്ടെന്നും, അമ്മമാരും സഹോദരിമാരും നടത്തുന്ന ജൻ ധൻ അക്കൗണ്ടുകൾ നൽകുന്ന സാമ്പത്തിക ശാക്തീകരണമാണ് ഈ വിജയത്തിന് കാരണമെന്നും അദ്ദേഹം കൂട്ടിച്ചേർത്തു.

സ്ത്രീ ശാക്തീകരണ സംരംഭങ്ങളുടെ ശക്തമായ ഫലങ്ങൾ അടിവരയിട്ട്, രാജ്യത്തുടനീളവും ബിഹാറിലും 'ലഖ്പതി ദീദി'കളുടെ എണ്ണം വർദ്ധിക്കുന്നത് ചൂണ്ടിക്കാട്ടി, 3 കോടി ലഖ്പതി ദീദികളെ സൃഷ്ടിക്കുക എന്നതാണ് ദേശീയ ലക്ഷ്യമെന്നും, ഇതുവരെ 1.5 കോടി സ്ത്രീകൾ ഈ നാഴികക്കല്ല് കൈവരിച്ചിട്ടുണ്ടെന്നും പ്രധാനമന്ത്രി പറഞ്ഞു. ബിഹാറിലെ 20 ലക്ഷത്തിലധികം സ്ത്രീകൾ ലഖ്പതി ദീദികളായി മാറിയെന്നും, ചമ്പാരനിൽ മാത്രം 80,000-ത്തിലധികം സ്ത്രീകൾ സ്വയം സഹായ സംഘങ്ങളിൽ ചേർന്നാണ് ഈ പദവിയിലെത്തിയതെന്നും അദ്ദേഹം ഊന്നിപ്പറഞ്ഞു. നാരി ശക്തിയുടെ കരുത്തിനെ ശക്തിപ്പെടുത്തുക എന്ന ലക്ഷ്യത്തോടെ, കമ്മ്യൂണിറ്റി നിക്ഷേപ ഫണ്ടായി 400 കോടി രൂപ അനുവദിക്കുമെന്ന് ശ്രീ മോദി പ്രഖ്യാപിച്ചു. ബിഹാറിലെ ലക്ഷക്കണക്കിന് സ്ത്രീകൾക്ക് സ്വാശ്രയത്വത്തിന് വഴിയൊരുക്കിയ ശ്രീ നിതീഷ് കുമാർ ആരംഭിച്ച "ജീവിക ദീദി" പദ്ധതിയെ അദ്ദേഹം പ്രശംസിച്ചു.

'ഇന്ത്യയുടെ പുരോഗതിക്ക് ബിഹാറിന്റെ പുരോഗതി അനിവാര്യമാണ്' എന്ന പാർട്ടിയുടെ കാഴ്ചപ്പാട് ആവർത്തിച്ചുകൊണ്ട്, ബിഹാറിലെ യുവാക്കൾ മുന്നോട്ട് നീങ്ങിയാൽ മാത്രമേ ബിഹാർ മുന്നോട്ട് പോകൂ എന്ന് ശ്രീ മോദി ഊന്നിപ്പറഞ്ഞു. സമ്പന്നമായ ഒരു ബിഹാറിനും എല്ലാ യുവാക്കൾക്കും തൊഴിൽ നൽകുന്നതിനുമുള്ള ​ഗവൺമെന്റിന്റെ പ്രതിബദ്ധത അദ്ദേഹം വീണ്ടും ഉറപ്പിച്ചു. ബിഹാറിൽ തന്നെ തൊഴിലവസരങ്ങൾ സൃഷ്ടിക്കുന്നതിന് സമീപ വർഷങ്ങളിൽ ഗണ്യമായ ശ്രമങ്ങൾ നടന്നിട്ടുണ്ടെന്ന് പ്രധാനമന്ത്രി പ്രസ്താവിച്ചു, പൂർണ്ണ സുതാര്യതയോടെ ലക്ഷക്കണക്കിന് യുവാക്കളെ ​ഗവൺമെന്റ് തസ്തികകളിൽ നിയമിച്ചതിന് ശ്രീ നിതീഷ് കുമാറിന്റെ ​ഗവൺമെന്റിനെ പ്രശംസിച്ചു. ബിഹാറിലെ യുവാക്കൾക്ക് കൂടുതൽ തൊഴിൽ നൽകുന്നതിനായി ബിഹാർ മുഖ്യമന്ത്രി പുതിയ തീരുമാനങ്ങൾ എടുത്തിട്ടുണ്ടെന്നും, ഈ ശ്രമങ്ങളെ കേന്ദ്രം തോളോട് തോൾ ചേർന്ന് പിന്തുണയ്ക്കുന്നുണ്ടെന്നും അദ്ദേഹം പറഞ്ഞു.

സ്വകാര്യ മേഖലയിൽ ആദ്യമായി ജോലി തേടുന്നവരെ പിന്തുണയ്ക്കുന്നതിനായി കേന്ദ്ര ​ഗവൺമെന്റ് അടുത്തിടെ ഒരു പ്രധാന പദ്ധതിക്ക് അംഗീകാരം നൽകിയതായി പ്രധാനമന്ത്രി പ്രഖ്യാപിച്ചു. ഈ പദ്ധതി പ്രകാരം, ഒരു സ്വകാര്യ കമ്പനിയിൽ ആദ്യമായി നിയമനം ലഭിക്കുന്ന യുവാക്കൾക്ക് കേന്ദ്ര ​ഗവൺമെന്റ് ₹15,000 അനുവദിക്കും. ഓഗസ്റ്റ് 1 മുതൽ പദ്ധതി നടപ്പിലാക്കുമെന്നും കേന്ദ്രം ₹1 ലക്ഷം കോടി ചെലവഴിക്കുമെന്നും അദ്ദേഹം പറഞ്ഞു, ഈ സംരംഭം ബിഹാറിലെ യുവാക്കൾക്ക് ഗണ്യമായി പ്രയോജനം ചെയ്യുമെന്ന് ഊന്നിപ്പറഞ്ഞു. മുദ്ര യോജന പോലുള്ള പദ്ധതികളിലൂടെ ബിഹാറിൽ സ്വയം തൊഴിൽ പ്രോത്സാഹിപ്പിക്കുന്നതിനുള്ള ശ്രമങ്ങളെക്കുറിച്ചും ശ്രീ മോദി എടുത്തുപറഞ്ഞു. കഴിഞ്ഞ രണ്ട് മാസത്തിനുള്ളിൽ മാത്രം, ബിഹാറിൽ മുദ്ര യോജന പ്രകാരം ലക്ഷക്കണക്കിന് വായ്പകൾ വിതരണം ചെയ്തിട്ടുണ്ടെന്നും, പ്രത്യേകിച്ച് ചമ്പാരനിൽ 60,000 യുവാക്കൾക്ക് അവരുടെ സ്വയം തൊഴിൽ സംരംഭങ്ങളെ പിന്തുണയ്ക്കുന്നതിനായി മുദ്ര വായ്പകൾ ലഭിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

മറ്റ് പാർട്ടികളിൽ നിന്നുള്ള നേതാക്കൾക്ക്, പ്രത്യേകിച്ച് ജോലി വാഗ്ദാനം ചെയ്യുന്നതിന്റെ മറവിൽ ജനങ്ങളുടെ ഭൂമി പിടിച്ചെടുക്കുന്നവർക്ക്,ഒരിക്കലും തൊഴിൽ നൽകാൻ കഴിയില്ലെന്ന് വാദിച്ച ശ്രീ മോദി, റാന്തൽ വിളക്കുകളുടെ കാലഘട്ടവും പുതിയ പ്രതീക്ഷകളാൽ പ്രകാശിതമായ ഇന്നത്തെ ബിഹാറും തമ്മിലുള്ള വ്യത്യാസം ഓർമ്മിക്കാൻ പൊതുജനങ്ങളോട് അഭ്യർത്ഥിച്ചു.  സഖ്യ ​ഗവൺമെന്റുമായുള്ള ബിഹാറിന്റെ യാത്രയ്ക്ക് ഈ പരിവർത്തനത്തെ അദ്ദേഹം നന്ദി പറഞ്ഞു, സഖ്യത്തിനായുള്ള പിന്തുണയിൽ ബിഹാറിന്റെ ദൃഢനിശ്ചയം ഉറച്ചതും അചഞ്ചലവുമായി തുടരുന്നു എന്ന് അദ്ദേഹം ചൂണ്ടിക്കാട്ടി.

സമീപ വർഷങ്ങളിൽ നക്സലിസത്തിനെതിരെ സ്വീകരിച്ച നിർണായക നടപടി പ്രധാനമന്ത്രി എടുത്തുകാട്ടി, ഇത് ബിഹാറിലെ യുവാക്കൾക്ക് വളരെയധികം ഗുണം ചെയ്തു. ചമ്പാരൻ, ഔറംഗാബാദ്, ഗയ, ജാമുയി തുടങ്ങിയ ജില്ലകൾ - ഒരുകാലത്ത് മാവോയിസ്റ്റ് സ്വാധീനത്താൽ നിയന്ത്രിക്കപ്പെട്ടിരുന്നവ - ഇപ്പോൾ തീവ്രവാദത്തിന്റെ പതനത്തിന് സാക്ഷ്യം വഹിക്കുന്നുണ്ടെന്ന് അദ്ദേഹം പറഞ്ഞു. ഒരുകാലത്ത് മാവോയിസ്റ്റ് അക്രമത്താൽ മൂടപ്പെട്ട പ്രദേശങ്ങളിലെ യുവാക്കൾ ഇപ്പോൾ വലിയ സ്വപ്നങ്ങൾ കാണുന്നുണ്ടെന്ന് അദ്ദേഹം ഊന്നിപ്പറഞ്ഞു, നക്സലിസത്തിന്റെ പിടിയിൽ നിന്ന് ഇന്ത്യയെ പൂർണ്ണമായും മോചിപ്പിക്കുന്നതിനുള്ള ​ഗവൺമെന്റിന്റെ പ്രതിബദ്ധത അദ്ദേഹം വീണ്ടും ഉറപ്പിച്ചു.

"ഇതൊരു പുതിയ ഇന്ത്യയാണ് - ശത്രുക്കളെ ശിക്ഷിക്കുന്നതിലും കരയിൽ നിന്നും ആകാശത്ത് നിന്നും സൈന്യത്തെ സജ്ജമാക്കുന്നതിലും ഒരു വിട്ടുവീഴ്ച്ചയും നടത്താത്ത ഇന്ത്യ", ശ്രീ മോദി പ്രഖ്യാപിച്ചു, ഓപ്പറേഷൻ സിന്ദൂർ ആരംഭിക്കാൻ താൻ തീരുമാനിച്ചത് ബിഹാറിന്റെ മണ്ണിൽ നിന്നാണെന്ന് ഓർമ്മിപ്പിച്ചു. ഇന്ന് ആ ഓപ്പറേഷന്റെ വിജയം ലോകം മുഴുവൻ കാണുന്നുണ്ടെന്ന് അദ്ദേഹം പറഞ്ഞു.

ബിഹാറിന് കഴിവുകളിലോ വിഭവങ്ങളിലോ കുറവുകൾ ഇല്ലെന്നും ഇന്ന് ബിഹാറിന്റെ വിഭവങ്ങൾ അതിന്റെ പുരോഗതിയുടെ ഉപകരണങ്ങളായി മാറിക്കൊണ്ടിരിക്കുകയാണെന്നും പ്രധാനമന്ത്രി പറഞ്ഞു. മഖാന കർഷകരെ വലിയ വിപണികളുമായി സംയോജിപ്പിക്കുന്നതിന്റെ ഫലമായാണ് മഖാന വിലയിൽ വർധനവ് ഉണ്ടായതെന്ന് അദ്ദേഹം ചൂണ്ടിക്കാട്ടി. ഈ മേഖലയെ കൂടുതൽ പിന്തുണയ്ക്കുന്നതിനായി ഒരു മഖാന ബോർഡ് രൂപീകരിച്ചതിനെക്കുറിച്ചും അദ്ദേഹം പരാമർശിച്ചു. വാഴപ്പഴം, ലിച്ചി, മിർച്ച അരി, കതർണി അരി, സർദാലു മാമ്പഴം, മാഘായ് പാൻ തുടങ്ങിയ നിരവധി പ്രധാന ഉൽപ്പന്നങ്ങൾ ബിഹാറിന്റെ കാർഷിക സമ്പന്നതയുടെ ഉദാഹരണങ്ങളായി ശ്രീ മോദി പട്ടികപ്പെടുത്തി. ഇവയും മറ്റ് നിരവധി ഉൽപ്പന്നങ്ങളും ബീഹാറിലെ കർഷകരെയും യുവാക്കളെയും ആഗോള വിപണികളുമായി ബന്ധിപ്പിക്കുമെന്ന് അദ്ദേഹം ഊന്നിപ്പറഞ്ഞു.

കർഷകരുടെ ഉൽ‌പാദനവും വരുമാനവും വർദ്ധിപ്പിക്കുക എന്നത് ​ഗവൺമെന്റിന്റെ മുൻ‌ഗണനയാണെന്ന് പറഞ്ഞ ശ്രീ മോദി, പി എം-കിസാൻ സമ്മാൻ നിധി യോജന പ്രകാരം രാജ്യത്തുടനീളമുള്ള കർഷകർക്ക് ഏകദേശം 3.5 ലക്ഷം കോടി രൂപ വിതരണം ചെയ്തിട്ടുണ്ടെന്ന് എടുത്തുപറഞ്ഞു. മോത്തിഹാരിയിൽ മാത്രം 5 ലക്ഷത്തിലധികം കർഷകർക്ക് ഈ പദ്ധതിയിലൂടെ 1,500 കോടിയിലധികം രൂപ ലഭിച്ചിട്ടുണ്ടെന്ന് അദ്ദേഹം ചൂണ്ടിക്കാട്ടി.

മുദ്രാവാക്യങ്ങളിലോ വാഗ്ദാനങ്ങളിലോ ​ഗവൺമെന്റ് ഒതുങ്ങുന്നില്ല, പ്രവൃത്തികളിലൂടെയാണ് ഗവൺമെന്റ് മുന്നോട്ട് പോകുന്നതെന്ന് പ്രധാനമന്ത്രി ഉറപ്പിച്ചു പറഞ്ഞു. പിന്നാക്ക, അങ്ങേയറ്റം പിന്നാക്കം നിൽക്കുന്ന സമൂഹങ്ങൾക്കായി പ്രവർത്തിക്കുന്നുവെന്ന് അവരുടെ ഗവൺമെന്റ് പറയുമ്പോൾ, ഈ പ്രതിബദ്ധത അതിന്റെ നയങ്ങളിലും തീരുമാനങ്ങളിലും പ്രതിഫലിക്കുന്നുവെന്ന് അദ്ദേഹം ഊന്നിപ്പറഞ്ഞു. അവരുടെ ദൗത്യം വ്യക്തമാണെന്ന് അദ്ദേഹം പറഞ്ഞു: പിന്നാക്ക പ്രദേശങ്ങളോ പിന്നോക്ക വിഭാഗങ്ങളോ ആകട്ടെ, ഓരോ പിന്നാക്ക വ്യക്തിക്കും മുൻഗണന നൽകുന്നത് ഗവൺമെന്റിന്റെ മുൻഗണനകളിൽ കേന്ദ്രബിന്ദുവാണ്. പതിറ്റാണ്ടുകളായി, 110-ലധികം ജില്ലകൾ പിന്നാക്കം നിൽക്കുന്നതും അവഗണിക്കപ്പെട്ടതുമായി മുദ്രകുത്തപ്പെട്ടിരുന്നുവെന്നും, അഭിലാഷ ജില്ലകളായി നിശ്ചയിച്ച് അവരുടെ വികസനം മുന്നോട്ട് നയിച്ചതിലൂടെ അവരുടെ ഗവൺമെന്റ് ഈ ജില്ലകൾക്ക് മുൻഗണന നൽകിയിട്ടുണ്ടെന്നും ശ്രീ മോദി ചൂണ്ടിക്കാട്ടി. ഇന്ത്യയുടെ അതിർത്തി ഗ്രാമങ്ങൾ പോലും വളരെക്കാലമായി "അവസാന ഗ്രാമങ്ങൾ" ആയി കണക്കാക്കപ്പെട്ടിരുന്നുവെന്നും പിന്നിൽ ഉപേക്ഷിക്കപ്പെട്ടിരുന്നുവെന്നും പ്രധാനമന്ത്രി ചൂണ്ടിക്കാട്ടി, എന്നാൽ ഗവൺമെന്റ് അവയെ "ആദ്യ ഗ്രാമങ്ങൾ" എന്ന് പുനർനിർവചിക്കുകയും അവയുടെ വികസനത്തിന് മുൻഗണന നൽകുകയും ചെയ്തു. ഒബിസി സമൂഹം ഒബിസി കമ്മീഷന് ഭരണഘടനാ പദവി നൽകണമെന്ന് വളരെക്കാലമായി ആവശ്യപ്പെട്ടിരുന്നു - തങ്ങളുടെ സഖ്യ ഗവൺമെന്റ് ഈ ആവശ്യം നിറവേറ്റിയതായി അദ്ദേഹം എടുത്തുപറഞ്ഞു. ഗോത്രവർഗ സമൂഹങ്ങളിൽ ഏറ്റവും പാർശ്വവൽക്കരിക്കപ്പെട്ടവർക്കായി ജൻമൻ യോജന ആരംഭിച്ചതിനെക്കുറിച്ച് ശ്രീ മോദി പരാമർശിച്ചു, അവരുടെ വികസനത്തിനായി ₹25,000 കോടി അനുവദിച്ചു. ഈ ദർശനവുമായി ഇണങ്ങിച്ചേർന്ന ഒരു പുതിയ പ്രധാന സംരംഭം പ്രധാനമന്ത്രി പ്രഖ്യാപിച്ചു: കേന്ദ്ര മന്ത്രിസഭ അടുത്തിടെ അംഗീകരിച്ച പ്രധാൻ മന്ത്രി ധൻ-ധാന്യ കൃഷി യോജന. ഈ പദ്ധതി പ്രകാരം, കാർഷികമായി സമ്പന്നവും എന്നാൽ ഉൽപ്പാദനക്ഷമതയിലും കർഷക വരുമാനത്തിലും പിന്നിലുമായ 100 ജില്ലകളെ കണ്ടെത്തി മുൻഗണന നൽകും. ഈ ജില്ലകളിലെ കർഷകർക്ക് ഈ പദ്ധതി പ്രകാരം ലക്ഷ്യമിട്ട പിന്തുണ ലഭിക്കുമെന്ന് അദ്ദേഹം പറഞ്ഞു. രാജ്യത്തുടനീളമുള്ള ഏകദേശം 1.75 കോടി കർഷകർക്ക് ഇത് നേരിട്ട് പ്രയോജനം ചെയ്യുമെന്ന് അദ്ദേഹം ഊന്നിപ്പറഞ്ഞു, അതിൽ ഒരു പ്രധാന പങ്ക് ബീഹാറിൽ നിന്നുള്ളതാണ്.

ആയിരക്കണക്കിന് കോടി രൂപയുടെ റെയിൽവേ, റോഡ് പദ്ധതികളുടെ ഉദ്ഘാടനവും തറക്കല്ലിടലും എടുത്തുകാണിച്ചുകൊണ്ട്, ഈ പദ്ധതികൾ ബീഹാറിലെ ജനങ്ങളുടെ സൗകര്യം ഗണ്യമായി വർദ്ധിപ്പിക്കുമെന്ന് ശ്രീ മോദി പറഞ്ഞു. രാജ്യത്തുടനീളമുള്ള നാല് വ്യത്യസ്ത റൂട്ടുകളിൽ അമൃത് ഭാരത് എക്സ്പ്രസ് അദ്ദേഹം ഫ്ലാഗ് ഓഫ് ചെയ്തു. മോത്തിഹാരി റെയിൽവേ സ്റ്റേഷൻ ആധുനിക സൗകര്യങ്ങളോടും പുതിയ രൂപത്തോടും കൂടി പുനർവികസിപ്പിച്ചുകൊണ്ടിരിക്കുകയാണെന്ന് പരാമർശിച്ചുകൊണ്ട്, അമൃത് ഭാരത് എക്സ്പ്രസ് ഇപ്പോൾ മോത്തിഹാരി-ബാപുധാമിൽ നിന്ന് ഡൽഹിയിലെ ആനന്ദ് വിഹാറിലേക്ക് നേരിട്ട് ഓടുമെന്നും പ്രധാനമന്ത്രി എടുത്തുപറഞ്ഞു. ദർഭംഗ-നർക്കതിയാഗഞ്ച് റെയിൽ പാത ഇരട്ടിപ്പിക്കൽ ഈ റൂട്ടിലെ യാത്രാ സൗകര്യം വളരെയധികം മെച്ചപ്പെടുത്തുമെന്ന് അദ്ദേഹം കൂട്ടിച്ചേർത്തു.

ഇന്ത്യയുടെ വിശ്വാസവും സാംസ്കാരിക പൈതൃകവുമായുള്ള ചമ്പാരന്റെ ആഴത്തിലുള്ള ബന്ധം ഊന്നിപ്പറഞ്ഞുകൊണ്ട് ശ്രീ മോദി, രാമ-ജാനകി പാത മോത്തിഹാരിയുടെ സത്തർഘട്ട്, കേസരിയ, ചാകിയ, മധുബൻ എന്നിവിടങ്ങളിലൂടെ കടന്നുപോകുമെന്ന് പറഞ്ഞു. സീതാമർഹിയിൽ നിന്ന് അയോധ്യയിലേക്ക് വികസിപ്പിക്കുന്ന പുതിയ റെയിൽവേ ലൈൻ ചമ്പാരനിൽ നിന്നുള്ള ഭക്തർക്ക് അയോധ്യയിലേക്ക് ദർശനത്തിനായി പോകാൻ സഹായിക്കുമെന്ന് അദ്ദേഹം എടുത്തുപറഞ്ഞു. ഈ സംരംഭങ്ങൾ ബീഹാറിലെ കണക്റ്റിവിറ്റി ഗണ്യമായി വർദ്ധിപ്പിക്കുകയും മേഖലയിൽ പുതിയ തൊഴിലവസരങ്ങൾ സൃഷ്ടിക്കുകയും ചെയ്യുമെന്ന് അദ്ദേഹം അഭിപ്രായപ്പെട്ടു.

ദരിദ്രർ, ദളിതർ, പിന്നാക്ക വിഭാഗങ്ങൾ, ആദിവാസി സമൂഹങ്ങൾ എന്നിവരുടെ പേരു പറഞ്ഞ് ദീർഘകാലമായി രാഷ്ട്രീയത്തിൽ ഏർപ്പെട്ടിരുന്ന മുൻ ​ഗവൺമെന്റുകളെ പ്രധാനമന്ത്രി വിമർശിച്ചു, തുല്യ അവകാശങ്ങൾ നിഷേധിക്കുക മാത്രമല്ല, സ്വന്തം കുടുംബത്തിന് പുറത്തുള്ളവരെ ബഹുമാനിക്കുന്നതിൽ അവർ പരാജയപ്പെടുകയും ചെയ്തു. ബീഹാർ ഇന്ന് അവരുടെ ധാർഷ്ട്യത്തിന് വ്യക്തമായി സാക്ഷ്യം വഹിക്കുന്നുണ്ടെന്ന് അദ്ദേഹം ഉറപ്പിച്ചു പറഞ്ഞു. അവരുടെ ദുരുദ്ദേശ്യത്തിൽ നിന്ന് ബിഹാറിനെ സംരക്ഷിക്കണമെന്ന് ആഹ്വാനം ചെയ്ത ശ്രീ മോദി, നിലവിലെ ബിഹാർ ​ഗവൺമെന്റിന്റെ സമർപ്പിത ശ്രമങ്ങളെ പ്രശംസിക്കുകയും ബീഹാറിന്റെ വികസനം ത്വരിതപ്പെടുത്താനും ശോഭനമായ ഭാവിയിലേക്ക് നീങ്ങാനും എല്ലാവരോടും അഭ്യർത്ഥിക്കുകയും ചെയ്തു. ഒരു പുതിയ ബിഹാർ നിർമ്മിക്കാനുള്ള പൊതുവായ ദൃഢനിശ്ചയത്തിന് ആഹ്വാനം ചെയ്തുകൊണ്ട് അദ്ദേഹം ഉപസംഹരിച്ചു, ഇന്ന് ഉദ്ഘാടനം ചെയ്ത വികസന പദ്ധതികൾക്ക് ജനങ്ങളെ അഭിനന്ദിച്ചു.

ബീഹാർ ഗവർണർ ശ്രീ ആരിഫ് മുഹമ്മദ് ഖാൻ, ബീഹാർ മുഖ്യമന്ത്രി ശ്രീ നിതീഷ് കുമാർ, കേന്ദ്രമന്ത്രിമാരായ ശ്രീ ജിതൻ റാം മാഞ്ചി, ശ്രീ ഗിരിരാജ് സിംഗ്, ശ്രീ രാജീവ് രഞ്ജൻ സിംഗ്, ശ്രീ ചിരാഗ് പാസ്വാൻ, ശ്രീ രാംനാഥ് താക്കൂർ, ശ്രീ നിത്യാനന്ദ് റായ്, ശ്രീ സതീഷ് ചന്ദ്ര ദുബെ, ഡോ. രാജ് ഭൂഷൺ ചൗധരി എന്നിവർ ചടങ്ങിൽ പങ്കെടുത്തു.

പശ്ചാത്തലം

റെയിൽ, റോഡ്, ഗ്രാമവികസനം, മത്സ്യബന്ധനം, ഇലക്ട്രോണിക്സ്, വിവരസാങ്കേതിക മേഖലകൾക്കായുള്ള വികസന പദ്ധതികൾ പ്രധാനമന്ത്രി തറക്കല്ലിടുകയും, ഉദ്ഘാടനം ചെയ്യുകയും,രാഷ്ട്രത്തിന് സമർപ്പിക്കുകയും ചെയ്തു.

കണക്റ്റിവിറ്റിയും അടിസ്ഥാന സൗകര്യങ്ങളും വർദ്ധിപ്പിക്കുന്നതിനുള്ള പ്രതിജ്ഞാബദ്ധതയ്ക്ക് അനുസൃതമായി, പ്രധാനമന്ത്രി ഒന്നിലധികം റെയിൽ പദ്ധതികൾ രാഷ്ട്രത്തിന് സമർപ്പിച്ചു. ഈ വിഭാഗത്തിൽ കാര്യക്ഷമമായ ട്രെയിൻ പ്രവർത്തനങ്ങൾ സാധ്യമാക്കുന്ന സമസ്തിപൂർ-ബച്വാര റെയിൽ പാതയ്ക്കിടയിലെ ഓട്ടോമാറ്റിക് സിഗ്നലിംഗ് ഇതിൽ ഉൾപ്പെടുന്നു. 580 കോടിയിലധികം രൂപയുടെ ദർഭംഗ-സമസ്തിപൂർ ഇരട്ടിപ്പിക്കൽ പദ്ധതിയുടെ ഭാഗമായ ദർഭംഗ-തൽവാര, സമസ്തിപൂർ-രാംഭദ്രപൂർ റെയിൽ പാത ഇരട്ടിപ്പിക്കൽ, ഇത് ട്രെയിൻ പ്രവർത്തനങ്ങളുടെ ശേഷി വർദ്ധിപ്പിക്കുകയും കാലതാമസം കുറയ്ക്കുകയും ചെയ്യും. 

നിരവധി റെയിൽ പദ്ധതികൾക്ക് പ്രധാനമന്ത്രി തറക്കല്ലിട്ടു. പാടലിപുത്രയിൽ വന്ദേ ഭാരത് ട്രെയിനുകളുടെ അറ്റകുറ്റപ്പണികൾക്കുള്ള അടിസ്ഥാന സൗകര്യ വികസനം റെയിൽ പദ്ധതികളിൽ ഉൾപ്പെടുന്നു. ട്രെയിൻ പ്രവർത്തനങ്ങൾ സുഗമമാക്കുന്നതിന് ഭട്‌നി-ഛപ്ര ഗ്രാമിൻ റെയിൽ പാതയിൽ (114 കിലോമീറ്റർ) ഓട്ടോമാറ്റിക് സിഗ്നലിംഗ്. ട്രാക്ഷൻ സിസ്റ്റം അടിസ്ഥാന സൗകര്യങ്ങൾ ശക്തിപ്പെടുത്തുന്നതിലൂടെയും ഊർജ്ജ കാര്യക്ഷമത ഒപ്റ്റിമൈസ് ചെയ്യുന്നതിലൂടെയും ഉയർന്ന ട്രെയിൻ വേഗത സാധ്യമാക്കുന്നതിന് ഭട്‌നി-ഛപ്ര ഗ്രാമിൻ വിഭാഗത്തിലെ ട്രാക്ഷൻ സിസ്റ്റം നവീകരിക്കുന്നു. സെക്ഷൻ അനുസരിച്ചുള്ള ശേഷി വർദ്ധിപ്പിക്കുന്നതിനും കൂടുതൽ പാസഞ്ചർ, ചരക്ക് ട്രെയിനുകളുടെ പ്രവർത്തനം സാധ്യമാക്കുന്നതിനും വടക്കൻ ബീഹാറിനും രാജ്യത്തിന്റെ മറ്റ് ഭാഗങ്ങൾക്കും ഇടയിലുള്ള കണക്റ്റിവിറ്റി ശക്തിപ്പെടുത്തുന്നതിനുമായി ഏകദേശം 4,080 കോടി രൂപയുടെ ദർഭംഗ-നർക്കതിയാഗഞ്ച് റെയിൽ പാത ഇരട്ടിപ്പിക്കൽ പദ്ധതി ഇതിൽ പെടുന്നു.

മേഖലയിലെ റോഡ് അടിസ്ഥാന സൗകര്യങ്ങൾക്ക് ഒരു പ്രധാന ഉത്തേജനമായി, തടസ്സമില്ലാത്ത കണക്റ്റിവിറ്റി നൽകുന്നതും യാത്രാ സമയം കുറയ്ക്കുന്നതുമായ NH-319 ലെ ആര ബൈപാസിന്റെ 4-വരി പാതയ്ക്ക് പ്രധാനമന്ത്രി തറക്കല്ലിട്ടു.

ആറ ടൗണിനെ NH-02 (സുവർണ്ണ ചത്വരം)വുമായി ബന്ധിപ്പിക്കുന്ന NH-319 ന്റെ ഭാഗമായ 820 കോടി രൂപ വിലമതിക്കുന്ന, പരാരിയ മുതൽ മൊഹാനിയ വരെയുള്ള നാലുവരിയുടെ  ഉദ്ഘാടനവും പ്രധാനമന്ത്രി നിർവഹിച്ചു. ചരക്കുനീക്കവും യാത്രക്കാരുടെ നീക്കവും മെച്ചപ്പെടുത്തുന്ന NH-333C യുടെ സർവാൻ മുതൽ ചകായ് വരെയുള്ള നടപ്പാതയുള്ള രണ്ട് വരി പാതയാണ് പ്രധാനമന്ത്രി ഉദ്ഘാടനം ചെയ്തത്. ചരക്കുകളുടെയും ആളുകളുടെയും നീക്കത്തിന് ഇത് സഹായകമാകും. ബീഹാറിനും ഝാർഖണ്ഡിനും ഇടയിലുള്ള ഒരു പ്രധാന കണ്ണിയായി ഇത് പ്രവർത്തിക്കും.

ഐടി/ഐടിഇഎസ്/ഇഎസ്ഡിഎം വ്യവസായത്തെയും സ്റ്റാർട്ടപ്പുകളെയും പ്രോത്സാഹിപ്പിക്കുന്നതിനായി ദർഭംഗയിൽ പുതിയ സോഫ്റ്റ്‌വെയർ ടെക്‌നോളജി പാർക്ക്സ് ഓഫ് ഇന്ത്യ (എസ്ടിപിഐ) സൗകര്യവും പട്‌നയിൽ എസ്ടിപിഐയുടെ അത്യാധുനിക ഇൻകുബേഷൻ സൗകര്യവും പ്രധാനമന്ത്രി ഉദ്ഘാടനം ചെയ്തു. ഐടി സോഫ്റ്റ്‌വെയർ, സേവന കയറ്റുമതികൾ വർദ്ധിപ്പിക്കുന്നതിന് ഈ സൗകര്യങ്ങൾ സഹായിക്കും. വളർന്നുവരുന്ന സംരംഭകർക്കായി ടെക് സ്റ്റാർട്ടപ്പ് ആവാസവ്യവസ്ഥയെ പരിപോഷിപ്പിക്കുകയും നവീകരണം, ഐപിആർ, ഉൽപ്പന്ന വികസനം എന്നിവ പ്രോത്സാഹിപ്പിക്കുകയും ചെയ്യും.

ബീഹാറിലെ മത്സ്യബന്ധന, മത്സ്യക്കൃഷി മേഖലയെ ശക്തിപ്പെടുത്തുന്നതിനുള്ള ഒരു പ്രധാന ചുവടുവയ്പിൽ, പ്രധാനമന്ത്രി മത്സ്യ സമ്പദ യോജന (പിഎംഎംഎസ്‌വൈ) പ്രകാരം അനുവദിച്ച മത്സ്യബന്ധന വികസന പദ്ധതികളുടെ ഒരു പരമ്പര പ്രധാനമന്ത്രി ഉദ്ഘാടനം ചെയ്തു. ബീഹാറിലെ വിവിധ ജില്ലകളിലായി പുതിയ മത്സ്യ ഹാച്ചറികൾ, ബയോഫ്ലോക്ക് യൂണിറ്റുകൾ, അലങ്കാര മത്സ്യകൃഷി, സംയോജിത മത്സ്യകൃഷി യൂണിറ്റുകൾ, മത്സ്യ തീറ്റ മില്ലുകൾ എന്നിവയുൾപ്പെടെയുള്ള ആധുനിക മത്സ്യബന്ധന അടിസ്ഥാന സൗകര്യങ്ങളുടെ ഉദ്ഘാടനമാണ് ഇതിലൂടെ നടക്കുന്നത്. ബീഹാറിലെ ഗ്രാമപ്രദേശങ്ങളിൽ തൊഴിലവസരങ്ങൾ സൃഷ്ടിക്കുന്നതിനും, മത്സ്യ ഉൽപാദനം വർദ്ധിപ്പിക്കുന്നതിനും, സംരംഭകത്വം പ്രോത്സാഹിപ്പിക്കുന്നതിനും, സാമൂഹിക-സാമ്പത്തിക വികസനം ത്വരിതപ്പെടുത്തുന്നതിനും അക്വാകൾച്ചർ പദ്ധതികൾ സഹായിക്കും.

ഭാവിയിലേക്ക് സജ്ജമാകുന്ന റെയിൽവേ ശൃംഖലയെക്കുറിച്ചുള്ള തന്റെ കാഴ്ചപ്പാടിന് അനുസൃതമായി, പ്രധാനമന്ത്രി

രാജേന്ദ്ര നഗർ ടെർമിനൽ (പട്‌ന) മുതൽ ന്യൂഡൽഹി വരെയും, ബാപുധാം മോത്തിഹാരി മുതൽ ഡൽഹി വരെയും (ആനന്ദ് വിഹാർ ടെർമിനൽ), ദർഭംഗ മുതൽ ലഖ്‌നൗ (ഗോമതി നഗർ), മാൾഡ ടൗൺ മുതൽ ലഖ്‌നൗ (ഗോമതി നഗർ) വരെ ഭഗൽപൂർ വഴിയുളള നാല് പുതിയ അമൃത് ഭാരത് ട്രെയിനുകൾ ഫ്ലാഗ് ഓഫ് ചെയ്തു.

ദീൻദയാൽ അന്ത്യോദയ യോജന-ദേശീയ ഗ്രാമീണ ഉപജീവന ദൗത്യം (DAY-NRLM) പ്രകാരം ബീഹാറിലെ ഏകദേശം 61,500 സ്വയം സഹായ സംഘങ്ങൾക്ക് 400 കോടി രൂപ പ്രധാനമന്ത്രി അനുവദിച്ചു. സ്ത്രീകൾ നയിക്കുന്ന വികസനത്തിന് പ്രത്യേക ശ്രദ്ധ നൽകിക്കൊണ്ട്, 10 കോടിയിലധികം സ്ത്രീകളെ സ്വയം സഹായ ഗ്രൂപ്പുകളുമായി (SHG) ബന്ധിപ്പിച്ചിട്ടുണ്ട്.

12,000 ഗുണഭോക്താക്കളുടെ ഗൃഹപ്രവേശനത്തിന്റെ ഭാഗമായി പ്രധാനമന്ത്രി ചില ഗുണഭോക്താക്കൾക്ക് താക്കോലുകൾ കൈമാറി, പ്രധാനമന്ത്രി ആവാസ് യോജന-ഗ്രാമീണിന്റെ 40,000 ഗുണഭോക്താക്കൾക്ക് 160 കോടിയിലധികം രൂപയും അനുവദിച്ചു.

*****