ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಇಂದು ನವದೆಹಲಿಯಲ್ಲಿ ನಡೆದ ಭಾರತ ವಿಕಾಸ ಪರಿಷತ್ತಿನ (BVP) 63ನೇ ಸಂಸ್ಥಾಪನಾ ದಿನಾಚರಣೆಯಲ್ಲಿ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡು ಮಾತನಾಡಿದರು. ಈ ಸಂದರ್ಭದಲ್ಲಿ, ಸುಪ್ರೀಂ ಕೋರ್ಟ್‌ನ ಮಾಜಿ ನ್ಯಾಯಾಧೀಶರು ಮತ್ತು ಭಾರತೀಯ ವಿಕಾಸ ಪರಿಷತ್ತಿನ ರಾಷ್ಟ್ರೀಯ ಅಧ್ಯಕ್ಷರಾದ ನಿವೃತ್ತ ನ್ಯಾಯಮೂರ್ತಿ ಶ್ರೀ ಆದರ್ಶ್ ಕುಮಾರ್ ಗೋಯಲ್ ಸೇರಿದಂತೆ ಅನೇಕ ಗಣ್ಯರು ಉಪಸ್ಥಿತರಿದ್ದರು.

ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು, ಭಾರತದ ದೃಷ್ಟಿಕೋನದಿಂದ ಭಾರತದ ಅಭಿವೃದ್ಧಿಯನ್ನು ಬಯಸುವವರಿಗೆ ಭಾರತ ವಿಕಾಸ ಪರಿಷತ್ತಿನ 63ನೇ ಸಂಸ್ಥಾಪನಾ ದಿನವು ಬಹಳ ಮುಖ್ಯವಾದ ದಿನವಾಗಿದೆ ಎಂದು ಹೇಳಿದರು. ಯಾವುದೇ ಸಂಸ್ಥೆಯು 63 ವರ್ಷಗಳ ಕಾಲ ನಿರ್ವಿವಾದವಾಗಿ ನಡೆದರೆ, ಅದು ತನ್ನಲ್ಲೇ ಒಂದು ಮಹತ್ವದ ಸಾಧನೆಯಾಗಿದೆ. ಆದರೆ, ಸೃಜನಾತ್ಮಕ ಶಕ್ತಿಯೊಂದಿಗೆ ಜನರ ಸೇವೆಗೆ ಮುಡಿಪಾದ ಸಂಸ್ಥೆಯು 63 ವರ್ಷ ಮತ್ತು ಅದಕ್ಕೂ ಮೀರಿ ನಡೆದಾಗ, ಅದರ ಹಿಂದೆ ಅಸಂಖ್ಯಾತ ನಿಷ್ಠಾವಂತ ವ್ಯಕ್ತಿಗಳ ಅಪಾರ ಸಮರ್ಪಣೆ ಮತ್ತು ತ್ಯಾಗವಿರುತ್ತದೆ ಎಂದು ಅವರು ಹೇಳಿದರು. ಶ್ರೀ ಶಾ ಅವರು, ಒಬ್ಬ ವ್ಯಕ್ತಿಯ ಜೀವನದಲ್ಲಿ 63 ವರ್ಷವನ್ನು ಇಳಿ ವಯಸ್ಸು ಎಂದು ಪರಿಗಣಿಸಲಾಗಿದ್ದರೂ, ಸುಸಂಘಟಿತ ಮತ್ತು ಪರಿಣಾಮಕಾರಿ ಸಂಸ್ಥೆಗೆ 63 ವರ್ಷಗಳು ಅದರ ಯೌವನವನ್ನು ಪ್ರತಿನಿಧಿಸುತ್ತವೆ ಎಂದರು.

ಶ್ರೀ ಅಮಿತ್ ಶಾ ಅವರು, ಭಾರತ ವಿಕಾಸ ಪರಿಷತ್ತು ಸ್ವಾಮಿ ವಿವೇಕಾನಂದರ ಜೀವನ ಮತ್ತು ಆದರ್ಶಗಳಿಂದ ಮಾರ್ಗದರ್ಶನ ಪಡೆದಿದೆ ಎಂದು ಹೇಳಿದರು. ಸಮಾಜದ ಸೃಜನಾತ್ಮಕ ಶಕ್ತಿಯನ್ನು ಬಳಸಿಕೊಳ್ಳಲು ಪರಿಷತ್ತು ಸಮರ್ಪಣೆ, ಸಂಘಟನೆ ಮತ್ತು ಸಂಸ್ಕಾರ ಎಂಬ ಮೂರು ಗುಣಗಳನ್ನು ಅಳವಡಿಸಿಕೊಂಡಿದೆ. ಸಾಂಘಿಕ ಶಕ್ತಿಯಿಂದ ಉತ್ಪತ್ತಿಯಾದ ಶಕ್ತಿಯು ಲಕ್ಷಾಂತರ ಭಾರತೀಯರ ಜೀವನದಲ್ಲಿ ಬೆಳಕು ತಂದಿದೆ ಮತ್ತು ಸಾಮಾಜಿಕ ಸಂಘಟನೆಯ ಶಕ್ತಿಯು ಹೆಚ್ಚು ಅಗತ್ಯವಿರುವವರ ಜೀವನವನ್ನು ತಲುಪಿದೆ ಎಂದು ಅವರು ಹೇಳಿದರು. ಶ್ರೀ ಶಾ ಅವರು, ಸೇವೆ ಮಾಡುವವರು ಮತ್ತು ಸೇವೆಯ ಅಗತ್ಯವಿರುವವರ ನಡುವೆ ಭಾರತ ವಿಕಾಸ ಪರಿಷತ್ತು ಸೇತುವೆಯಾಗಿ ಕೆಲಸ ಮಾಡಿದೆ ಎಂದರು. ಭಾರತ ವಿಕಾಸ ಪರಿಷತ್ತು ಕೇವಲ ಒಂದು ಸಂಘಟನೆಯಲ್ಲ, ಅದೊಂದು ಕಲ್ಪನೆ. ಇದು ಪ್ರತಿಯೊಬ್ಬ ಭಾರತೀಯನನ್ನು ಭಾರತದ ಸಾರಕ್ಕೆ ಸಂಪರ್ಕಿಸುವ ಪ್ರಯತ್ನವಾಗಿದೆ.

ಕೇಂದ್ರ ಗೃಹ ಸಚಿವರು, ಸ್ಥಾಪನೆಯಾಗಿ ಆರು ದಶಕಗಳು ಕಳೆದರೂ ಭಾರತ ವಿಕಾಸ ಪರಿಷತ್ತು ಪ್ರಸ್ತುತತೆ ಮತ್ತು ಸೂಕ್ತತೆಯೊಂದಿಗೆ ತನ್ನ ಕೆಲಸವನ್ನು ಮುಂದುವರೆಸಿದೆ ಎಂದು ಹೇಳಿದರು. ಈ ಸಂಸ್ಥೆಯು ಸೇವೆಯನ್ನು ಸಂಘಟನೆಗೆ, ಸಂಘಟನೆಯನ್ನು ಸಂಸ್ಕಾರಕ್ಕೆ ಮತ್ತು ಸಂಸ್ಕಾರವನ್ನು ರಾಷ್ಟ್ರ ನಿರ್ಮಾಣಕ್ಕೆ ಜೋಡಿಸುವಂತಹ ಒಂದು ಗಮನಾರ್ಹ ಕಾರ್ಯ ಸಂಸ್ಕೃತಿಯನ್ನು ಅಭಿವೃದ್ಧಿಪಡಿಸಿದೆ. ಭಾರತ ವಿಕಾಸ ಪರಿಷತ್ತು ಯಾವುದೇ ಪ್ರಚಾರದ ಆಸೆಯಿಲ್ಲದೆ 63 ವರ್ಷಗಳಿಂದ ನಿರ್ಗತಿಕರ ಸೇವೆ ಮಾಡಿದೆ ಮತ್ತು ಇಂದಿನ ಜಗತ್ತಿಗೆ ಇಂತಹ ಸಂಸ್ಥೆಗಳ ಅವಶ್ಯಕತೆಯಿದೆ ಎಂದು ಅವರು ಹೇಳಿದರು.

ಇಂದಿನ ಕಾರ್ಯಕ್ರಮದಲ್ಲಿ ಮಣಿಪುರದ ಸ್ವಾತಂತ್ರ್ಯ ಹೋರಾಟಗಾರರಾದ ಶ್ರೀ ಹೇಮಮ್ ನೀಲಮಣಿ ಸಿಂಗ್ ಅವರಿಗೆ ಮರಣೋತ್ತರವಾಗಿ ಗೌರವ ಸಲ್ಲಿಸಲಾಗಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. 1944ರಲ್ಲಿ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಕರೆಯಿಂದ ಪ್ರೇರಿತರಾದ ಹೇಮಮ್ ನೀಲಮಣಿ ಸಿಂಗ್ ಅವರು ಭಾರತೀಯ ರಾಷ್ಟ್ರೀಯ ಸೇನೆಗೆ (ಆಜಾದ್ ಹಿಂದ್ ಫೌಜ್) ಸೇರಿದರು ಎಂದು ಅವರು ಸ್ಮರಿಸಿದರು. ಅವರು ತಮ್ಮ ಸಂಪನ್ಮೂಲಗಳನ್ನೆಲ್ಲಾ ನೇತಾಜಿಯವರಿಗೆ ಸಮರ್ಪಿಸಿದರು ಮತ್ತು 1945ರವರೆಗೂ ಬಂಧನಕ್ಕೊಳಗಾಗಲಿಲ್ಲ. 1946ರಲ್ಲಿ ಜೈಲಿನಿಂದ ಬಿಡುಗಡೆಯಾದ ನಂತರ, ಅವರು ಮೊಯಿರಾಂಗ್‌ಗೆ ಹಿಂತಿರುಗಿ, ಮುಂದೆ ಸೇವೆ, ಶಿಕ್ಷಣ ಮತ್ತು ಸಹಕಾರವನ್ನು ತಮ್ಮ ಜೀವನದ ಅಡಿಪಾಯವನ್ನಾಗಿ ಮಾಡಿಕೊಂಡರು. ತಾನು ಮೊದಲ ಬಾರಿಗೆ ಮಣಿಪುರಕ್ಕೆ ಭೇಟಿ ನೀಡಿದಾಗ, ಅಲ್ಲಿನ ಯುವಕರು ನಿರರ್ಗಳವಾಗಿ ಹಿಂದಿ ಮಾತನಾಡುವುದನ್ನು ಕಂಡಿದ್ದೆ ಎಂದು ಶ್ರೀ ಶಾ ನೆನಪಿಸಿಕೊಂಡರು. ಆ ಯುವಕರಲ್ಲಿ ನೀವು ಹೇಗೆ ಇಷ್ಟು ಚೆನ್ನಾಗಿ ಹಿಂದಿ ಮಾತನಾಡುತ್ತೀರಿ ಎಂದು ಕೇಳಿದಾಗ, ಅದಕ್ಕೆ ಶ್ರೀ ಹೇಮಮ್ ನೀಲಮಣಿ ಸಿಂಗ್ ಅವರೇ ಕಾರಣ ಎಂದು ಅವರು ಹೇಳಿದ್ದರು. ಗೃಹ ಸಚಿವರು, ಶ್ರೀ ಹೇಮಮ್ ನೀಲಮಣಿ ಸಿಂಗ್ ಅವರು ತಮ್ಮ ಇಡೀ ಜೀವನವನ್ನು ಭಾಷಾ ಏಕತೆಗಾಗಿ ಮುಡಿಪಾಗಿಟ್ಟಿದ್ದರು ಎಂದು ಹೇಳಿದರು.

ಕೇಂದ್ರ ಗೃಹ ಸಚಿವರು ಮಾತನಾಡಿ, ಇಂದು ಭಾರತ ವಿಕಾಸ ಪರಿಷತ್ ಅತ್ಯಂತ ದೊಡ್ಡ ಸಂಸ್ಥೆಯಾಗಿ ಬೆಳೆದಿದೆ. ದೇಶದ 412 ಜಿಲ್ಲೆಗಳಲ್ಲಿ 1,600 ಕ್ಕೂ ಹೆಚ್ಚು ಶಾಖೆಗಳನ್ನು ಹೊಂದಿದ್ದು, 84,000 ಕ್ಕೂ ಹೆಚ್ಚು ಕುಟುಂಬಗಳು ಈ ಸೇವಾ ಕಾರ್ಯದಲ್ಲಿ ತೊಡಗಿಸಿಕೊಂಡಿವೆ. ಸೇವಾ ಮನೋಭಾವದಿಂದ ಕೆಲಸ ಮಾಡುವವರಿಗೆ ಈ ಸಂಸ್ಥೆಯು ವೇದಿಕೆಯನ್ನು ಒದಗಿಸಿದೆ, ಅವರೊಂದಿಗೆ ಬಲವಾದ ಸಂಬಂಧವನ್ನು ಬೆಳೆಸಿದೆ ಎಂದು ಅವರು ಹೇಳಿದರು. ಭಾರತ ವಿಕಾಸ ಪರಿಷತ್‌ನ ಕಾರ್ಯಕರ್ತರು ದುರಂತಗಳ ಸಮಯದಲ್ಲಿ ಪರಿಹಾರ ಕಾರ್ಯಗಳಿಗೆ ಮುಂದಾಗುತ್ತಾರೆ, ರೋಗಿಗಳಿಗೆ ಸಹಾಯ ಮಾಡಲು ರಕ್ತದಾನ ಶಿಬಿರಗಳನ್ನು ಆಯೋಜಿಸುತ್ತಾರೆ, ಹಳ್ಳಿಗಳಲ್ಲಿ ಮೌಲ್ಯ ಆಧಾರಿತ ಶಿಬಿರಗಳನ್ನು ನಡೆಸುತ್ತಾರೆ ಮತ್ತು ಅನೇಕ ಶಾಲೆಗಳಲ್ಲಿ ಮೌಲ್ಯಗಳ ದೀಪವನ್ನು ಬೆಳಗಿಸುತ್ತಾರೆ ಎಂದು ಶ್ರೀ ಶಾ ನುಡಿದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು 2047ರ ವೇಳೆಗೆ ಭಾರತವನ್ನು 'ವಿಕಸಿತ ಭಾರತ'ವನ್ನಾಗಿ ಮಾಡುವ ಮತ್ತು ಪ್ರತಿಯೊಂದು ಕ್ಷೇತ್ರದಲ್ಲೂ ವಿಶ್ವದಲ್ಲೇ ಅಗ್ರಗಣ್ಯನನ್ನಾಗಿ ಮಾಡುವ ಪ್ರತಿಜ್ಞೆಯನ್ನು ದೇಶವಾಸಿಗಳ ಮುಂದೆ ಮಾಡಿದ್ದಾರೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ಈ ಪ್ರತಿಜ್ಞೆಯಲ್ಲಿ ಕಲ್ಪನೆ ಮತ್ತು ಸಂಕಲ್ಪದ ಜೊತೆಗೆ, ಆ ಪ್ರತಿಜ್ಞೆಯನ್ನು ಸಾಬೀತುಪಡಿಸುವ ಕಾರ್ಯಯೋಜನೆಯೂ ಇದೆ. ಮೋದಿ ಜೀ ಅವರು ಎಲ್ಲರ ಮುಂದೆ ಐದು ಗುರಿಗಳನ್ನು ಇಟ್ಟಿದ್ದಾರೆ, ಇದರಲ್ಲಿ ವಿಕಸಿತ ಭಾರತದ ಗುರಿ, ಪ್ರತಿಯೊಂದು ರೀತಿಯ ಗುಲಾಮಗಿರಿಯಿಂದ ಮುಕ್ತಿ, ನಮ್ಮ ಪರಂಪರೆಯ ಬಗ್ಗೆ ಹೆಮ್ಮೆ, ಏಕತೆ ಮತ್ತು ಐಕ್ಯತೆಯ ಭಾವನೆ ಹಾಗೂ ನಾಗರಿಕರಲ್ಲಿ ಕರ್ತವ್ಯ ಪ್ರಜ್ಞೆಯನ್ನು ಮೂಡಿಸುವುದು ಸೇರಿವೆ ಎಂದು ಅವರು ಹೇಳಿದರು. ಶ್ರೀ ಶಾ ಅವರು, ಭಾರತ ವಿಕಾಸ ಪರಿಷತ್ತು ಈ ಐದು ಗುರಿಗಳ ಮೇಲೆ ಬಹಳ ಹಿಂದಿನಿಂದಲೂ ಒಬ್ಬ 'ಸೇವಕ'ನಂತೆ ಕೆಲಸ ಮಾಡುತ್ತಿದೆ ಎಂದರು.

ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು, ಇದು ಪ್ರಧಾನಮಂತ್ರಿಯಾಗಿ ಶ್ರೀ ನರೇಂದ್ರ ಮೋದಿಯವರ 11ನೇ ವರ್ಷವಾಗಿದೆ ಎಂದು ಹೇಳಿದರು. ಮೋದಿ ಜೀ ಅವರ ಈ 11 ವರ್ಷಗಳ ಅಧಿಕಾರಾವಧಿಯ ಬಗ್ಗೆ ಇತಿಹಾಸಕಾರರು ಸುವರ್ಣಾಕ್ಷರಗಳಲ್ಲಿ ಬರೆಯಲಿದ್ದಾರೆ. ಕಳೆದ 11 ವರ್ಷಗಳಲ್ಲಿ 55 ಕೋಟಿಗೂ ಹೆಚ್ಚು ಜನರ ಬ್ಯಾಂಕ್ ಖಾತೆಗಳನ್ನು ತೆರೆಯಲಾಗಿದೆ, 15 ಕೋಟಿ ಮನೆಗಳಿಗೆ ಶುದ್ಧ ಕುಡಿಯುವ ನೀರನ್ನು ಒದಗಿಸಲಾಗಿದೆ, 12 ಕೋಟಿಗೂ ಹೆಚ್ಚು ಮನೆಗಳಲ್ಲಿ ಶೌಚಾಲಯಗಳನ್ನು ನಿರ್ಮಿಸಲಾಗಿದೆ ಎಂದು ಅವರು ಹೇಳಿದರು. ಶ್ರೀ ಶಾ ಅವರು, 10 ಕೋಟಿಗೂ ಹೆಚ್ಚು ಮನೆಗಳಿಗೆ ಗ್ಯಾಸ್ ಸಿಲಿಂಡರ್‌ಗಳನ್ನು ಒದಗಿಸಲಾಗಿದೆ ಮತ್ತು 4 ಕೋಟಿಗೂ ಹೆಚ್ಚು ಜನರಿಗೆ ಅವರ ಸ್ವಂತ ಮನೆಗಳನ್ನು ನೀಡಲಾಗಿದೆ ಎಂದರು. ಮುದ್ರಾ ಯೋಜನೆಯಡಿ ಕೋಟ್ಯಂತರ ರೂಪಾಯಿ ಸಾಲ ನೀಡಲಾಗಿದ್ದು, ಇದರಲ್ಲಿ ಮೂರನೇ ಎರಡರಷ್ಟು ಸಾಲವನ್ನು ದೇಶದ ಅಭಿವೃದ್ಧಿಗೆ ಜೋಡಿಸಲು ಮಹಿಳಾ ಶಕ್ತಿಗೆ ನೀಡಲಾಗಿದೆ. 'ಲಕ್ಷಪತಿ ದೀದಿ' ಮೂಲಕ ಮಹಿಳಾ ಶಕ್ತಿಗೆ ಉತ್ತೇಜನ ನೀಡಲಾಗುತ್ತಿದೆ ಎಂದು ಅವರು ಹೇಳಿದರು.

ಕಳೆದ 11 ವರ್ಷಗಳಲ್ಲಿ ಪ್ರಧಾನಮಂತ್ರಿ ಮೋದಿ ಸರ್ಕಾರವು ದೊಡ್ಡ ಘೋಷಣೆಗಳನ್ನು ಕೂಗದೆ, 'ಸೇವಕ'ನಂತೆ ಮೌನವಾಗಿ, ಸೇವಾ ಮನೋಭಾವದಿಂದ ಮತ್ತು ಸೇವೆ ಸಲ್ಲಿಸುವ ಸಂಕಲ್ಪದೊಂದಿಗೆ ಕಾರ್ಯನಿರ್ವಹಿಸಿದೆ ಎಂದು ಶ್ರೀ ಅಮಿತ್ ಶಾ ಅವರು ಹೇಳಿದರು. ವಸಾಹತುಶಾಹಿ ಪರಂಪರೆಯನ್ನು ತೊಡೆದುಹಾಕಲು ಮೋದಿಜಿ ಸಾಕಷ್ಟು ಕೆಲಸ ಮಾಡಿದ್ದಾರೆ ಎಂದರು. ರಾಜ್‌ ಪಥ್‌ ಗೆ 'ಕರ್ತವ್ಯ ಪಥ' ಎಂದು ಮರುನಾಮಕರಣ ಮಾಡುವ ಮೂಲಕ, ಇದು ಕೋಟ್ಯಂತರ ನಾಗರಿಕರಿಗೆ ಭಾರತದ ಸಂವಿಧಾನದಲ್ಲಿ ನಮೂದಿಸಲಾದ ಕರ್ತವ್ಯಗಳನ್ನು ನೆನಪಿಸುತ್ತದೆ. ಪ್ರಜಾಪ್ರಭುತ್ವದಲ್ಲಿ, ಹಕ್ಕುಗಳನ್ನು ತಮ್ಮ ರಾಜಕೀಯಕ್ಕೆ ಸಾಧನವಾಗಿಸಿಕೊಳ್ಳುವವರಲ್ಲಿ ಕರ್ತವ್ಯವನ್ನು ಯಾರಾದರೂ ನೆನಪಿಸಿದರೆ, ಆಗ ಸಂವಿಧಾನದ ಆಶಯವು ಭೂಮಿಗೆ ಇಳಿಯುತ್ತದೆ ಎಂದು ಶ್ರೀ ಶಾ ಹೇಳಿದರು. ದೇಶದ ನೌಕಾಪಡೆಯು ಬ್ರಿಟಿಷ್ ಸೇನೆಯ ಚಿಹ್ನೆಯನ್ನು ಶಿವಾಜಿ ಮಹಾರಾಜರ ಚಿಹ್ನೆಯೊಂದಿಗೆ ಬದಲಾಯಿಸಿದಾಗ, ಪ್ರತಿಯೊಬ್ಬ ಭಾರತೀಯನು ಹೆಮ್ಮೆಪಡುತ್ತಾನೆ ಎಂದು ಅವರು ಹೇಳಿದರು. ಸ್ವಾತಂತ್ರ್ಯದ ನಂತರ, ಹುತಾತ್ಮರಾದ ಸೈನಿಕರ ನೆನಪಿಗಾಗಿ ಯುದ್ಧ ಸ್ಮಾರಕವನ್ನು ನಿರ್ಮಿಸಲಾಯಿತು. ಸಂಸತ್ತಿನಲ್ಲಿ ಸೆಂಗೋಲ್ (ರಾಜದಂಡ) ಸ್ಥಾಪನೆಯ ಮೂಲಕ, ಭಾರತವು ಯಾವ ದಿಕ್ಕಿನಲ್ಲಿ ಮುಂದುವರಿಯುತ್ತಿದೆ ಎಂಬುದರ ಕುರಿತು ಒಂದು ದೃಷ್ಟಿಯನ್ನು ಮುಂದಿಡಲಾಗಿದೆ. ಪ್ರಧಾನಮಂತ್ರಿ ಮೋದಿಜಿಯವರ ಕೈಗಳಿಂದ ಸಂಸತ್ತಿನಲ್ಲಿ ಸೆಂಗೋಲ್ ಅನ್ನು ಸ್ಥಾಪಿಸಿದಾಗ, ನಮ್ಮ ಋಷಿಮುನಿಗಳು ಕನಸು ಕಂಡ ಭಾರತದ ಹಾದಿಯಲ್ಲಿ ನಾವು ಮುನ್ನಡೆದಿದ್ದೇವೆ ಎಂಬ ಭಾವನೆ ಕೋಟ್ಯಂತರ ಭಾರತೀಯರ ಮನಸ್ಸಿಗೆ ಬಂದಿತು ಎಂದು ಶ್ರೀ ಶಾ ಹೇಳಿದರು.

ಕೇಂದ್ರ ಗೃಹ ಸಚಿವರು ಮಾತನಾಡಿ, ಬ್ರಿಟಿಷರು ನೀಡಿದ್ದ ಅಂಡಮಾನ್-ನಿಕೋಬಾರ್ ದ್ವೀಪಗಳ ಹೆಸರುಗಳನ್ನು ಸುಭಾಷ್ ದ್ವೀಪ ಮತ್ತು ಶಹೀದ್ ದ್ವೀಪ ಎಂದು ಬದಲಾಯಿಸಲಾಯಿತು. ಹಾಗೆಯೇ, ರೇಸ್ ಕೋರ್ಸ್ ರಸ್ತೆಗೆ ಲೋಕ ಕಲ್ಯಾಣ ಮಾರ್ಗ ಎಂದು ಮರುನಾಮಕರಣ ಮಾಡಿರುವುದು ಸಹ ದೊಡ್ಡ ಬದಲಾವಣೆಯ ಸೂಚನೆಯಾಗಿದೆ ಎಂದು ಅವರು ಹೇಳಿದರು. ಮೋದಿಜಿ ಯಾವುದೇ ಸಂಘರ್ಷವಿಲ್ಲದೆ ಪರಂಪರೆ ಮತ್ತು ಅಭಿವೃದ್ಧಿ ಎರಡನ್ನೂ ಒಟ್ಟಾಗಿ ಮುನ್ನಡೆಸಿದ್ದಾರೆ ಎಂದರು. ರಾಮಮಂದಿರ ನಿರ್ಮಿಸುವುದರಿಂದ ದೇಶಕ್ಕೆ ಏನು ಲಾಭ ಎಂದು ಎಡಪಂಥೀಯ ಸಿದ್ಧಾಂತದ ಜನರು ಕೇಳುತ್ತಾರೆ ಎಂದು ಶ್ರೀ ಶಾ ಹೇಳಿದರು. ಅದರಿಂದ ಏನು ಲಾಭವಾಗುತ್ತದೆ ಎಂದು ಅವರಿಗೆ ಅರ್ಥವಾಗುವುದಿಲ್ಲ ಎಂದು ನನಗೆ ತಿಳಿದಿದೆ ಎಂದರು. ಆದರೆ, ಮೋದಿಜಿ ರಾಮಮಂದಿರವನ್ನು ನಿರ್ಮಿಸಿದರು ಮತ್ತು 5G ತರಲು ಸಹ ಕೆಲಸ ಮಾಡಿದರು. ಇದರ ಜೊತೆಗೆ, ಅವರು ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ಬೀದಿಬದಿಯ ತರಕಾರಿ ಮಾರುವವರನ್ನೂ ತಲುಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ಶ್ರೀ ಶಾ ಹೇಳಿದರು.

ಶ್ರೀ ಅಮಿತ್ ಶಾ ಅವರು, ಒಂದೆಡೆ ಕಾಶಿ, ಉಜ್ಜಯಿನಿ, ಶಾರದಾ ಪೀಠಗಳಲ್ಲಿನ ದೇವಾಲಯಗಳನ್ನು ಜೀರ್ಣೋದ್ಧಾರ ಮಾಡಲಾಗಿದೆ ಮತ್ತು ಕರ್ತಾರ್‌ ಪುರ ಕಾರಿಡಾರ್ ಅನ್ನು ನಿರ್ಮಿಸಲಾಗಿದೆ. ಇನ್ನೊಂದೆಡೆ, ಐಐಎಂ, ಐಐಟಿ ಮತ್ತು ಏಮ್ಸ್‌ಗಳ ಸಂಖ್ಯೆಯೂ ಮೂರು ಪಟ್ಟು ಹೆಚ್ಚಾಗಿದೆ ಎಂದು ಹೇಳಿದರು. ಹೊಸ ಶಿಕ್ಷಣ ನೀತಿಯು ಮಾತೃಭಾಷಾ ಶಿಕ್ಷಣಕ್ಕೆ ಬೆಂಬಲ ನೀಡಿದರೆ, ಇಂದು ಭಾರತವು ಕೃತಕ ಬುದ್ಧಿಮತ್ತೆ (Artificial Intelligence) ಮತ್ತು ಸೈಬರ್ ಭದ್ರತೆಯ ಕ್ಷೇತ್ರದಲ್ಲಿಯೂ ಮುಂಚೂಣಿಯಲ್ಲಿರಲು ಸಿದ್ಧವಾಗಿದೆ. ಒಂದೆಡೆ ಮೋದಿ ಸರ್ಕಾರವು ಯೋಗಕ್ಕೆ ಜಾಗತಿಕ ಮನ್ನಣೆ ನೀಡಿದ್ದರೆ, ಮತ್ತೊಂದೆಡೆ ಭಾರತವು ಹಸಿರು ಜಲಜನಕ (Green Hydrogen), ಡ್ರೋನ್ ಸೇರಿದಂತೆ ಅನೇಕ ಬಾಹ್ಯಾಕಾಶ ತಂತ್ರಜ್ಞಾನಗಳನ್ನು ಅಳವಡಿಸಿಕೊಂಡಿದೆ. 'ಆಜಾದಿ ಕಾ ಅಮೃತ್ ಮಹೋತ್ಸವ'ವನ್ನು ಆಚರಿಸುವ ಮೂಲಕ ನಾವು 140 ಕೋಟಿ ಭಾರತೀಯರಿಗೆ ಸ್ವಾತಂತ್ರ್ಯ ಚಳವಳಿಯ ನಾಯಕತ್ವದ ಪರಿಕಲ್ಪನೆಯನ್ನು ನೆನಪಿಸುತ್ತೇವೆ ಮತ್ತು 'ಪಿಎಂ ಗತಿಶಕ್ತಿ'ಯ ಬೃಹತ್ ಯೋಜನೆಯನ್ನೂ ರೂಪಿಸುತ್ತೇವೆ. ನಾವು 370ನೇ ವಿಧಿಯನ್ನು ರದ್ದುಪಡಿಸುವ ಮೂಲಕ ಕಾಶ್ಮೀರವನ್ನು ಭಯೋತ್ಪಾದನೆಯಿಂದ ಮುಕ್ತಗೊಳಿಸುವ, ಸಿಎಎ (CAA) ತರುವ ಕೆಲಸ ಮಾಡುತ್ತೇವೆ ಮತ್ತು ದೇಶವನ್ನು ನಕ್ಸಲೀಯತೆಯಿಂದ ಮುಕ್ತಗೊಳಿಸುವ ಅಂಚಿನಲ್ಲಿದ್ದೇವೆ. ಇದರೊಂದಿಗೆ, ಸಹಕಾರ ಸಚಿವಾಲಯವನ್ನು ಪ್ರಾರಂಭಿಸುವ ಮೂಲಕ, ಸಣ್ಣ ರೈತರು ಮತ್ತು ಹಳ್ಳಿಯ ಬಡವರಿಗಾಗಿ ಕೆಲಸ ಮಾಡುವ ದಿಕ್ಕಿನಲ್ಲಿಯೂ ನಾವು ಮುನ್ನಡೆಯುತ್ತೇವೆ ಎಂದು ಅವರು ಹೇಳಿದರು.

ನಮ್ಮ ಪರಂಪರೆಯನ್ನು ಮರೆಯದೆ ಅಭಿವೃದ್ಧಿಯ ಆಧಾರದ ಮೇಲೆ ಮುನ್ನಡೆಯುವ ಮತ್ತು ನಮ್ಮೆಲ್ಲಾ ಸ್ವಾತಂತ್ರ್ಯ ಹೋರಾಟಗಾರರು ಕನಸು ಕಂಡ ಭಾರತವನ್ನು ನಿರ್ಮಿಸುವ ಸಮಯ ಬಂದಿದೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ಸೇವಾ ಸಂಸ್ಥೆಗಳು ಇದೇ ಗುರಿಯೊಂದಿಗೆ ಈ ಹಾದಿಯಲ್ಲಿ ಸಾಗದ ಹೊರತು, ಸರ್ಕಾರಗಳೊಂದೇ ಎಲ್ಲಾ ಸಮಸ್ಯೆಗಳನ್ನು ಪರಿಹರಿಸಲು ಸಾಧ್ಯವಿಲ್ಲ. ಭಾರತ ವಿಕಾಸ ಪರಿಷತ್ತು ಈ ಯುಗ ಆರಂಭವಾಗುವ ಮೊದಲಿನಿಂದಲೂ ಈ ಹಾದಿಯಲ್ಲಿ ಸಾಗುತ್ತಾ ಬಂದಿದೆ, ಇಂದಿಗೂ ಸಾಗುತ್ತಿದೆ ಮತ್ತು ಮುಂದೆಯೂ ಸಾಗಲಿದೆ ಎಂದು ಶ್ರೀ ಶಾ ಹೇಳಿದರು.

*****