য়োর হাইনেস,

এক্সিলেন্সীস,

ব্রাজিলগী চিয়রমেনশিপকী মখাদা BRICSনা অকোয়বগী ফিভম অমসুং হকশেলগী সেক্যুরিতীগুম্বা মরুওইবা হীরমশিংদা অখন্নবা মীৎয়েং থম্লিবা অসিদা ঐহাক নুংঙাইবা ফাওই। হীরমশিং অসি অমগা অমগা মরী লৈনবতা নত্তনা মীওইবা খুন্নাইগী অফবা তুংলমচৎকীদমক য়াম্না মরু ওই।

মরুপশিং,

চহি অসিদা, ব্রাজিলদা COP-30  পাংথোক্লি, মসিনা BRICSতা অকোয়বগী ফিভমগী মতাংদা খন্ন-নৈনবশিং অসি মরুওইবা অমসুং মতম চানা পাংথোকহল্লি। ক্লাইমেৎ চেঞ্জ অমসুং এনভাইর্নমেন্ত সেফতী অসি মতম পুম্নমক্তা ভারতকী খ্বাইদগী মরুওইবা ৱাফম ওইদুনা লাক্লি। ঐখোয়গীদমক্তদি, মসি ইনর্জীগী মতাংদা খক্তা নত্তে, মসি পুন্সি অমসুং মহৌশাগী মরক্তা খল কাইহনদনবগী মতাংদনি। মীওই খরনা মসিবু মশীং খক্তমক ওইনা উবা মতমদা, ভারতকী ওইনদি ঐখোয়গী নোংমগী পুন্সি অমসুং চৎনবীগী শরুক অমনি। ঐখোয়গী চৎনবীদা, পৃথীবি অসি মমা অমা ওইনা ইকাই খুম্নৈ। মরম অসিনা, ইমা পৃথীবি অসিনা ঐখোয়বু মথৌ তারকপা মতমদা, ঐখোয়না মতম পুম্নমক্তা মতেং পাংই। ঐখোয়না ঐখোয়গী ৱাখল্লোন, ঐখোয়গী লমচৎ-শাজৎ অমসুং ঐখোয়গী পুন্সি মহিংদা অহোংবা পুরক্লি।

"পিপল, প্লানেৎ এন্দ প্রোগ্রেস"কী ৱাখল্লোনগী লমজিং মখাদা, ভারতনা মরুওইবা খোঙথাং কয়া অমা হৌদোকখ্রে, মখোয়শিং অদুদি মিসন লাইফ (লাইফস্তাইল ফোর এনভাইর্নমেন্ত), 'এক পের মা কে নাম' (ইমাগী মমিংদা উ অমা), ইন্তর্নেস্নেল সোলর এলাইন্স, কোলিজন ফোর দিজাস্তর রেসিলিয়েন্ত ইনফ্রাস্ত্রকচর, গ্রীন হাইদ্রোজেন মিসন, গ্লোবেল বাইওফ্যুএল্স এলাইন্স অমসুং বিগ কেৎস এলাইন্সনি।

G20গী ভারতকী প্রসিদেন্সীগী মতমদা, ঐখোয়না সস্তেনেবল দিবেলপমেন্ত অমসুং গ্লোবেল নোর্থ অমসুং সাউথকী মরক্তা লৈরিবা খেন্নবা অদু কোকহন্নবা অকনবা ৱাফম থমখি। মসিগী পান্দম অসিগা লোয়ননা ঐখোয়না গ্রীন দিবেলপমেন্ত পেক্তকী মতাংদা লৈবাক পুম্নমক্কী মরক্তা য়ানবা পুরকখি। অকোয়বগী ফিভমগা মরী লৈনবা থবকশিং পুক্নিং থৌগৎনবা ঐখোয়না গ্রীন ক্রেদিৎ ইনিসিয়েতিবসু হৌদোক্লে।

মালেমগী খ্বাইদগী য়াঙনা চাউখৎলক্লিবা মরুওইবা ইকোনোমী অমা ওইজরবসু, ভারত অসি পেরিসকী কম্মিৎমেন্তশিং মতম চানা ফংবা অহানবা লৈবাক ওইরি। 2070 ফাওবদা নেৎ জিরো ফংনবা ঐখোয়না পান্দম থম্লিবা অসিগী মায়কৈদসু ঐখোয়না খোঙজেল য়াংনা খুমাং চাউশিল্লি। হৌখিবা দিকেদ অমদা, ভারতনা সোলর ইনর্জীগী ইনস্তোল তৌরবা কেপাসিতীদা চাউরাক্না 4000% হেনগৎলকপা উবা ফংলে। খোঙথাংশিং অসিগী খুত্থাংদা, ঐখোয়না তুং কোইবা অমসুং গ্রীন ওইবা তুংলমচৎ অমগীদমক অচেৎপা য়ুম্ফম অমা শেমগৎলি।

মরুপশিং,

ভারতকী ওইনা, ক্লাইমেৎ জস্তিস অসি অপাম্বা খক্তমক নত্তে, মসি মোরেল ওবলিগেসন অমনি। তেক্নোলোজী ত্রান্সফর অমসুং দরকার ওইবা লৈবাকশিংদা শেল থাদবা ঙমদ্রবদি, ক্লাইমেৎ এক্সন অসি ক্লাইমেৎ তোক খক্তা ওইরগনি হায়না ভারতনা থাজৈ। ক্লাইমেৎ এম্বিসন অমসুং ক্লাইমেৎ ফাইনান্সিংগী মরক্তা লৈরিবা খেন্নবা অদু কোকহনবা হায়বসি চাউখৎলবা লৈবাকশিংগী অখন্নবা অমসুং মরুওইবা থৌদাং অমনি। ঐখোয়না লৈবাক পুম্নমকপু, মরুওইনা মালেমগী ওইবা শিংনবশিংনা মরম ওইদুনা চিঞ্জাক, ফ্যুএল, ফর্তিলাইজর অমসুং শেন-থুমগী অৱাবা মায়োক্নরিবা লৈবাকশিংগা পুন্না চৎমিন্নরি।

লৈবাকশিং অসিনা চাউখৎলবা লৈবাকশিংনা মখোয়গী তুংলমচৎ শেম্বা ঙম্বগী থাজবা অসিগা চপ মান্ননা লৈগদবনি। মীওইবা খুন্নাইগী সস্তেনেবল অমসুং ইনক্লুসিব দিবেলপমেন্ত অসি দবল স্তেন্দর্দ লৈরিঙৈদা ফংহনবা ঙম্লোই। ঙসি ফোংলিবা "ফ্রেমৱার্ক দিক্লারেসন ওন ক্লাইমেৎ ফাইনান্স" অসি মসিগী মাইকৈ অসিদা থাগৎনিংঙাই ওইবা খোঙথাং অমনি। ভারতনা খোঙথাং অসিবু মপুং ফানা শৌগৎলি।

মরুপশিং,

গ্রহ অসিগী হকশেল অমসুং মীওইবা খুন্নাইগী হকশেল অসি নক্নবা মরী লৈনৈ। COVID-19গী লাইচৎ অসিনা ঐখোয়দা ভাইরসশিংনা ভিজা মথৌ তাদে, অমসুং পাসপোর্তকী মতুং ইন্না সোলুসনশিং খনবদি য়ারোই হায়বা তাক্লে। মান্নবা শিংনবশিং অসি পুন্না হোৎনমিন্নদুনা খক্তনা মায়োক্নবা ঙমগনি।

'ৱান আর্থ, ৱান হেল্থ'গী মন্ত্রনা লমজিংদুনা ভারতনা লৈবাক পুম্নমক্কা মতেং পাংবা হেনগৎহনখ্রে। ঙসিদি, ভারতনা মালেমগী খ্বাইদগী চাউবা হেল্থ ইন্সুরেন্স স্কিম "আয়ুশ্মান ভারত"গী হৌরকফম ওইরি। মসি মীওই মিলিয়ন 500 হেনবগী লাইফলাইন অমা ওইরে। আয়ুর্বেদ, য়োগ, য়ুনানি অমসুং সিদ্ধাগুম্বা ত্রেদিস্নেল মেদিসিন সিস্তেমশিংগী ইকোসিস্তেম অমা লিংখৎলে। দিজিতেল হেল্থ ইনিসিয়েতিবশিংগী খুত্থাংদা, ঐখোয়না লৈবাক অসিগী খ্বাইদগী অরাপ্পা মফমশিংদা লৈরিবা মীওই মশিং হেনগৎলক্লিবা অসিদা হেল্থকেয়র সর্বিসশিং ফংহল্লি। হিরমশিং অসিদা ভারতনা মায় পাক্না পায়খৎলিবা থবকশিং অদু ঐখোয়না নখোয়দা শিয়র তৌবদা নুংঙাইবা ফাওই।

BRICSনা হকশেলগী লমদা মতেং পীনবা হেনগৎহনবদা অখন্নবা মীৎয়েং থম্লিবা অসিদা ঐহাক নুংঙাইবা ফাওই। 2022দা হৌদোক্কদৌরিবা BRICS ভেক্সিন R&D সেন্তর অসি মসিগী মাইকৈ অসিদা মরু ওইবা খোঙথাং অমনি। লুচিংবা অসিনা ঙসি ফোঙখিবা "সোসিএল্লি-দিতর্মাইন দিজিজশিং মুত্থৎনবা BRICS পার্তনরশিপ"কী ৱারোল অসিনা ঐখোয়গী মতেং পীনবা অসি মপাঙ্গল কনখৎহন্নবা অনৌবা ইথিল পীগনি।

মরুপশিং,

ঙসিগী মরুওইবা অমসুং কন্সত্রক্তিব ওইবা খন্ন-নৈনবগীদমক শরুক য়ারিবা পুম্নমক্তা ঐহাক্না থমোয় শেংনা থাগৎপা ফোংদোকচরি। লাক্কদৌরিবা চহিদা ভারতনা BRICSকী চেয়রমেন ওইগদৌরিবা অসিগী মখাদা ঐখোয়না মরুওইবা ইসু পুম্নমক্তা পুন্না থবক তৌমিন্নগনি। ঐখোয়গী পান্দমদি BRICSপু কোওপরেসন অমসুং সস্তেনেবিলিতীগীদমক্তা রেসিলিয়েন্স অমসুং ইন্নোবেসন শেমগৎপা ওইনা অমুক হন্না মশক তাকপা ওইরগনি। ঐখোয়না G-20গী প্রসিদেন্সীদা ইনক্লুসিবিতী পুরকখিবগুম্না অমসুং গ্লোবেল সাউথকী অৱাবা অদু এজেন্দাগী মকোক্তা থমখিবগুম্না, BRICSকী প্রসিদেন্সীগী মতমদা, ঐখোয়না ফোরম অসি মীয়ামদা মীৎয়েং থমদুনা অমসুং "হ্যুমেনিতী ফোরম"গী স্পিরিৎকা লোয়ননা মাংলোমদা চংশিনগনি।

অমুক হন্না ঐহাক্না মায়পাক্লবা BRICS সম্মিৎ অসিগীদমক রাস্ত্রপতি লুলাবু থমোয় শেংনা নুংঙাইবা ফোংদোকচরি।

হন্না-হন্না থাগৎচরি।

খঙহঞ্জবা - মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***